Kategorie: Nuus

Studenteraadvoorsitter boet vir sy Hitler-opmerkings

Die voorsitter van Wits se studenteraad Mcebo Dlamini, wat aspekte van Hitler bewonder, is summier uit sy amp verwyder.

Die verskoning wat gebruik is om Dlamini die swye op te lê is glo ‘n hangende appèl teen sy skorsing rakende ‘n ander klag. Dit is nie bekend wat die aanklagte teen Dlamini is nie.

Adam Habib, visekanselier van die Universiteit van die Witwatersrand, het gesê Dlamini is in Februarie skuldig bevind aan wangedrag en hy het ‘n opgeskorte vonnis van een jaar vir elke klag ontvang.

Habib het eers ontken dat Dlamini se verklaring “oor sy bewondering vir Hitler” sy besluit beïnvloed het, maar later toegegee dat dit wel “ondersoek” word as deel van die veldtog teen die studenteraadvoorsitter se spraakvryheid.

“Kragtens die grondwet van die Verteenwoordigende Studenteraad (VSR) word ‘n lid van die studenteraad uit sy amp verwyder indien hy skuldig bevind word aan wangedrag deur ‘n studente dissiplinêre komitee. Die SR-lid kan appèl aanteken teen sy skorsing,” het Habib Maandag in ‘n woordryke verklaring gesê wat kennelik daarop gemik was om die werklike redes vir die skorsing te verbloem.

Dlamini is met onmiddellike effek uit sy amp geskop “in die beste belang van die universiteit”, het Habib gesê.

Die heksejag teen Dlamini het gekom toe hy aspekte van Hitler uitgesonder het en daarna geweier het om om verskoning te vra.

Dlamini het nie die gaskamers of die Holocaust verdedig nie en in sy reaksie sy bewondering vir Hitler gekwalifiseer, maar dit was klaarblyklik nie genoeg om sy vryheid van spraak te waarborg nie.

Dlamini het ook Hitler se magsvergrype met dié van oorlogsmisdadigers Benjamin Netanyahu, George Bush en Tony Blair vergelyk.

Volgens Habib kan Dlamini nie vryheid van spraak geniet nie omdat “die universiteit ooreenkomstig sy waardes moet optree”.

Dié waardes behels blykbaar dat Afrikaners vir volksmoord uitgesonder mag word en swart leiersfigure aangehits mag word om op die basis van ras teen Afrikaners te diskrimineer.

Die hoeveelheid geleenthede waar Wits se Great Hall amptelik gebruik is vir sulke bedrywighede is te veel om te noem.

Beeld het verlede jaar ‘n soortgelyke heksejag teen die NWU-Puk kampus van stapel gestuur oor mindere bewerings van “Nazisme”.

Die koerant het ‘n koshuis se dans-choreografie waar studente se arms opgehou word, as Nazisme voorgehou en as ‘n rede aangevoer vir die PUK om te “transformeer”.

Twee mans by Moslemspotprent-uitstalling geskiet

Die polisie in Texas het twee gewapende mans by ‘n tentoonstelling naby Dallas doodgeskiet.

Die twee het glo by ‘n kunsuitstalling van spotprente oor die Profeet Mohammed opgedaag en ‘n veiligheidswag in die been geskiet, het Reuters berig.

Die wag is lig beseer in die skietery in die voorstad, Garland, maar is intussen uit die hospitaal ontslaan.

Sondag se aanval het plaasgevind in ‘n parkeerterrein van die Curtis Culwell Center, ‘n binnenshuise arena in die voorstad noordoos van Dallas.

Niemand anders is beseer nie.

Die Nederlandse anti-Islamitiese politikus, Geert Wilders het die geleentheid bygewoon. Hy het op Twitter gesê dat skote geskiet is, maar dat hy die gebou verlaat het en veilig is.

Dit is onduidelik of die skietery verband hou met Islam of die spotprente by die uitstalling het owerhede Sondag gesê.

“Ek het geen idee wie hulle is nie, behalwe dat hulle dood is en in die straat was,” het die stad se polisiewoordvoerder, Joe Harn, aan Reuters gesê.

As ‘n voorsorgmaatreël, het die polisie die motor van die verdagtes ondersoek vir enige plofstof wat dalk in die voertuig versteek kon gewees het, het Harn bygevoeg.

Die geleentheid is geadverteer as die “Muhammad Art Exhibit and Contest” en is deur Pamela Geller gereël.

Geller, wat bekend is vir haar felle kritiek teen Islam, het aan Fox News gesê dat sy besluit het om die Garlandruimte vir die kunsuitstalling te benut, want dit is waar Amerikaanse Moslem-leiers ‘n konferensie oor die bekamping van Moslemhaat ‘n week na die Charlie Hebdo-aanvalle gehou het.

In Januarie, het gewapende mans 12 mense in Parys vermoor wat by die Franse satiriese tydskrif Charlie Hebdo gewerk het.

Die meeste van die mense wat die geleentheid bygewoon het was nog in die arena toe die geweld ontvou het en was onbewus van wat gebeur het totdat die polisie die gebou binnegestorm het en almal aangeraai het om binnenshuis te bly as gevolg van ‘n skietery.

“Die eerste verdagte is onmiddellik geskiet. Die tweede verdagte is geskiet en gewond -… Hy [die gewonde] het vir sy rugsak gereik. Natuurlik het beamptes nie geweet wat in die rugsak is nie, en het hom weer geskiet. Hy is gedood,” het Garland se burgemeester Douglas Athas aan CNN gesê.

Polisieminister berispe xenofobiese aanvallers

Die minister van polisie, Nathi Nhleko sê armoede en werkloosheid is nie ‘n rede om buitelanders aan te val nie.

Die SAUK berig Nhleko het tradisionele leiers, sakelui en inwoners van Germiston toegespreek.

Sewe mense is verlede maand dood in xenofobiese geweld in dele van KwaZulu-Natal en Gauteng en duisende is ontwortel.

Meer as 300 mense is reeds in hegtenis geneem in verband met die geweld en verskeie klopjagte is uitgevoer.

Nhleko het Suid-Afrikaners gevra om hul mede-Afrikane met respek te behandel.

Intussen het die interministeriële komitee vir migrasie, gelei deur die minister in die presidensie, Jeff Radebe die families van Suid-Afrikaners besoek wat in die onlangse geweld teenoor buitelanders in Umlazi, suid van Durban dood is.

Radebe en sy span het die familie van die 24-jarige Ayanda Dlamini besoek, wat verlede maand in die geweld dood is. Hy sal na verwagting ook die families van nog twee slagoffers besoek – Thabo Mzombe wat in Umlazi doodgeskiet is en Petros Dlamini wat in Chatsworth dood is.

Radebe sê die komitee gaan alle aspekte van migrasie ondersoek, om ‘n blywende oplossing vir die uitdaging van xenofobiese geweld te vind.

Mandela-groep toegang tot Gasa geweier

Die Russiese president Wladimir Poetin het Woensdag met lede van ‘n groep wat hulself die “Ouderlinge” noem, ontmoet nadat hulle toegang tot Gasa geweier is.

Voormalige staatshoofde en leiers van die belangrikste internasionale organisasies was in Moskou om die Oekraïne te bespreek asook wêreldvrede.

Die groep is deur Israel toegang tot Gasa geweier nadat hulle by die Palestyne wou gaan besoek aflê. Poetin het hulle op sy Nowo-Ogarjowo landgoed buite Moskou ontvang vir hul driedaagse besoek aan Rusland se hoofstad.

Die groep is gestig in 2007 deur die voormalige Suid-Afrikaanse president Nelson Mandela om hul invloed oral te laat geld.

Bestaande ​​uit 12 lede, en tans onder leiding van die voormalige sekretaris-generaal van die VN, Kofi Annan, wil die oudstes help om die wêreld se ernstige en ingewikkelde probleme op te los.

Desmond Tutu is ook deel van die groep.

“Kollegas, vriende, Laat my u hartlik in Moskou verwelkom…Ongelukkig het die wêreld nie eenvoudiger geraak sedert julle aktief aan die politieke lewe deelgeneem het nie. Ek probeer nie sê dat dit julle nalatenskap is nie, maar bloot dat ons wêreld regtig kompleks en uiteenlopend is en met baie konfliksituasies worstel,” het die Russiese president gesê in sy verwelkomingsrede.

Afgesien van vergaderings met president Poetin, het die oudstes gesprekke met die minister van buitelandse sake Sergei Lawrof, voormalige Sowjetpresident Mikhail Gorbatsjof en die voormalige premier Jefgeni Primakof gevoer.

Die oudstes wat deel was van die besoek aan Moskou was: Martti Ahtisaari, voormalige Finse president; Kofi Annan, voormalige sekretaris-generaal van die VN; Lakhdar Brahimi, voormalige Algerynse minister van buitelandse sake, Gro Harlem Brundtland, voormalige premier van Noorweë; Jimmy Carter, voormalige Amerikaanse president, en Ernesto Zedillo, voormalige Mexikaanse president.

Annan, Ahtisaari, Brahimi en Zedillo is almal trustees wat op die raad van George Soros se Open Society Foundation dien.

Brittanje dié week lamgelê deur verkiesing

Leiers van politieke partye in Brittanje is besig om hulle verkiesingsveldtogte af te handel in die laaste naweek voor die land se algemene verkiesing.

Volgens die jongste meningspeilings loop die Konserwatiewe Party en die Arbeidsparty kop-aan-kop om die verkiesing te wen.

Kiesers sal Donderdag na die stembus gaan om die land se 56ste regering te verkies.

Daar is egter nie enige party wat sonder ‘n koalisie sal kan regeer nie, iets wat die FT verlede week as die laaste stuiptrekkings van ‘n eertydse wêreldmoondheid beskryf het.

Die Konserwatiewe Party van David Cameron en die Liberaal Demokrate regeer die land op die oomblik saam.

Die VSA kyk toenemend na Duitsland as Europese vennoot omdat Brittanje nie genoeg in NAVO wil belê nie, wat gelei tot ‘n afwatering in die verhouding van die Atlantiese tandem. Cameron se belofte dat ‘n referendum oor die EU gehou sal word, is een van sy party se sentrale temas.

Cameron vrees dat UKIP se leier, Nigel Farage, met sy vaardige retoriek van die konserwatiewe steun kan afrokkel.

Farage is teen immigrasie gekant wat ‘n “massiewe ooraanbod in die arbeidsmark” veroorsaak.

Die huidige koalisie-regering spog dat die Verenigde Koninkryk meer in buitelandse hulp uitdeel “as enige ander Westerse land”, iets wat Farage ook uitbuit.

UKIP word as “ekstreem en rassisties” deur hulle mededingers voorgehou.

Die Konserwatiewe Party hoop dat die aankondiging van die koninklike geboorte van ‘n prinses hul kanse sal vergroot op ‘n oorwinning.

Intussen het die Russiese media berig dat die baba ten minste drie dae ouer is as wat die gesin wil voorgee en dat die aankondiging ‘n “opvoering” is.

DA-sirkus: Maimane van seksuele wangedrag beskuldig

Die Demokratiese Alliansie baklei dat die hare waai onder mekaar oor wie as leier aangewys gaan word by die nasionale kongres hierdie naweek in Port Elizabeth.

Terwyl die parlementêre leier Mmusi Maimane na die gunsteling lyk, het die stryd vir die beheer van die amptelike opposisie warm geraak toe daar beskuldigings van seksuele wangedrag in ‘n e-pos teen hom en top-leiers wat help met sy veldtog, Athol Trollip, John Steenhuisen en Paul Boughey, gemaak is.

Die betrokkenes het intussen in ‘n verklaring gesê die anonieme e-pos was “negatief, vals en vernietigend”.

Vier kandidate gaan meeding om die pos van federale voorsitter by die party se kongres. Maimane, Wilmot James, Adrian Naidoo en Morgan Oliphant het hulself verkiesbaar gestel.

Die DA se grootste provinsie wat ondersteuning betref, is die Wes-Kaap, maar dit lyk of DA-stemmers in Gauteng ‘n swart leier wil hê.

Minstens 1 500 afgevaardigdes sal die kongres bywoon, waarvan 373 van Gauteng, terwyl die Wes-Kaap 423 afgevaardigdes sal stuur.

Uit die 373 Gautengse afgevaardigdes het reeds 195 hul steun aan Maimane toegesê. Dit gee hom ’n stewige deel van die party se naasgrootste provinsie.

Maimane, wat deur Helen Zille voorgestoot word, word uitgedaag deur die DA se voorsitter Wilmot James.

Maimane en James gaan mekaar glo Maandagaand in ‘n Amerikaanse styl debat pak wat lewendig uitgesaai sal word deur die Afrikaanse betaalkanaal kykNET, op die program Insig.

Die bespreking en debat sal waarskynlik in Engels gehou word aangesien die DA slegs Engels as voertaal aanvaar. Rapport se redakteur Waldimar Pelser, sal as skeidsregter optree.

Maimane sal die DA vinniger kan verswart, sê ontleders. Hy is glo verbind tot verswarting weens sy aandrang op “verskeidenheid in die party” omdat die DA ‘n “duidelike visie vir die land en die party nodig het”.

Hy sê opvattings dat hy die uittredende partyleier, Helen Zille, se marionet was, het hom nog nooit gepla nie.

Sy meteoriese opgang in die DA onder Zille se leierskap het deurentyd kritiek ontlok. Zille het klaarblyklik steeds genoeg invloed om hom tot leier verkies te kry.

“Daar is groeiende steun binne en buite die party vir Maimane om die DA se nuwe leier te word,” het ‘n DA-woordvoerder gesê.

Huisbraak op video vasgevang

‘n Veiligheidskamera het Woensdagoggend ‘n huisbraak in Ninapark, Pretoria, waar verskeie waardevolle items gesteel is, op video vasgevang.

Volgens Johan Roux (53), huiseienaar, het die voorval omstreeks 10:45 plaasgevind en het dit vier verdagtes net ses minute geneem om die voordeur oop te breek, ‘n paar waardevolle items te neem en weg te jaag.

Roux was by die werk toe die voorval plaasgevind het, het die Moot Rekord berig.

“Sover ons kon agterkom is televisies en hul afstandbeheerders, asook van my vrou se juweliersware gesteel. Ons kon nog nie vasstel presies wat alles weg is nie, omdat die forensiese-span vandag eers ‘n ondersoek kom doen het. Ons kon nog nie al die skade bepaal nie,” het Roux gesê.

Sedert hy in 1993 in sy huis ingetrek het, het Roux nog nooit voorheen ‘n huisbraak gehad nie.

“So paar jaar gelede het iemand oor ons muur gespring en ‘n fiets en ‘n paar ander items gesteel, maar ons het nog nooit voorheen met ‘n huisbraak probleme gehad nie.”

Voor die inbraak het die verdagtes glo ‘n uur vroeër verby die huis gery, by die oprit ingery en ‘n rukkie daar vertoef, voordat hulle weer weggery het.

Tydens die huisbraak het twee van die verdagtes die huis ingegaan, terwyl twee ander in die motor gewag het, het Roux gesê.

Volgens polisiewoordvoerder Matthews Nkoadi, is die polisie nie bewus van die voorval nie.

Britse politikus wat Afrikaners steun uit party geskors

‘n Britse politikus en kandidaat vir UKIP in die huidige parlementêre verkiesing in dié land, is uit sy party geskors, onder andere omdat hy simpatie vir Afrikaners en blanke Suid-Afrikaners uitgespreek het. In ‘n aanlynonderhoud het mnr. Jack Sen, die kandidaat vir Wes-Lancashire, gesê dat “Westerse regerings die etniese suiwering van mense van Europese afkoms in Suid-Afrika ignoreer”. Sy party het hom summier geskors en hul van sy uitlatings gedistansieer.

Mnr. Sen sou binnekort ‘n onderhoud aan PRAAG toestaan waarin hy sou uitwei oor ‘n globale strategie om die Westerse beskawing te red, waaronder die blanke minderheid in Suid-Afrika. Mnr. Sen het hom ook tydens die onderhoud beskryf as “onbeskaamd polities inkorrek”.

In ‘n onderhoud met die Londense Guardian wat vandag op die koerant se webblad verskyn, sê Jack Sen:

Die Suid-Afrikaanse en in die besonder, Afrikanerminderheid is na my mening ‘n bedreigde spesie. Dit word stelselmatig gejag tot op die punt van uitsterwing deur mense waaroor ons terug in 1994 vertel is dat hulle in demokratiese harmonie wou leef.

Onthou iemand nog die reënboognasiepropagandaveldtog? Dis moeilik om daardie verhewe ideaal te bereik as mense vir die pret in Johannesburg of Kaapstad doodgeskiet word. Die jagseisoen is nog oop, sover ek kan sien.

Sen word ook kwalik geneem dat hy verwys het na “gemeenskaplike bande” tussen die Arbeiderskandidaat, mnr. Ed Miliband, en prominente Suid-Afrikaanse Jode soos wyle Joe Slovo en Nadine Gordimer.

“U lesers sal moet besluit wat daardie bande is,” het hy gesê. Dit is bekend dat die Suid-Afrikaanse kommunistiese leier, Joe Slovo, en Ralph Miliband, Ed se vader, boesemvriende was.

In ‘n twiet wat blykbaar nie deur Sen self uitgestuur is nie, is verwys na Luciana Berger, as “Brittanje se jongste Joodse politikus”. Tesame met die noem van Joe Slovo en Nadine Gordimer se name, was dit genoeg om Sen van “anti-Semitisme” te beskuldig.

Sen het verder teen linkses uitgevaar en hulle van “dubbele standaarde” beskuldig as daar besluit word wie slagoffers is. Hy meen die Weste “word deur linkses beheer wie se wortels na die Oosbloklande teruggevoer kan word”.

Met betrekking tot die verwydering van Rhodes se standbeeld in Kaapstad, het Sen gekla oor die voorkeurbehandeling wat Nelson Mandela in die Verenigde Koninkryk ontvang. “Stel u voor dat daar voorgestel word dat die Mandela-standbeeld in Londen verwyder word omdat hy einlik ‘n veroordeelde massamoordenaar en terroris was?”

‘n Woordvoerder van UKIP het die party van Sen se uitlatings gedistansieer en gesê dat hy geskors is: “Jack Sen, ‘n UKIP-kandidaat, het menings uitgespreek wat op geen manier met die party se menings of dié van ons hardwerkende, toegewyde kandidate versoen kan word nie. In die lig van hierdie en ander uitsprake, word mnr. Sen met onmiddellike ingang uit UKIP geskors.”

Mnr. Sen het bevestig dat hy, ondanks sy skorsing uit die party, steeds sy breedvoerige onderhoud met PRAAG sal toestaan waarin hy oor sy standpunte sal uitwei.

ISIS gaan van krag tot krag

Die Islamitiese Staat (ISIS) is die mees suksesvolle radikale Islamitiese groep wat groot dele van die grondgebied in die ooste van Sirië en oral in die noorde en weste van Irak ingeneem het.

‘n Verslag wat aan die VN se Veiligheidsraad in Julie verlede jaar voorgelê is deur ‘n VN-waarnemersmissie (UNDOF), toon dat dat Israel ten nouste betrokke is by die ondersteuning van ISIS.

Die Israelse premier Benjamin Netanyahu, het die skepping van ISIS verwelkom in ‘n toespraak in Junie 2014 by Tel Aviv Universiteit se INSS-byeenkoms.

Intussen het ‘n voormalige Amerikaanse generaal Wesley Clarke in ‘n onderhoud met CNN ook toegegee dat ISIS geskep is deur die VSA se “vriende en bondgenote”.

Die groep se brutale taktiek, insluitende massamoord en ontvoering van lede van godsdienstige en etniese minderhede, asook die onthoofding van soldate en joernaliste, het vrees en woede in die wêreld ontlok.

Die groep beplan die totstandkoming van ‘n kalifaat, ‘n staat wat deur ‘n enkele politieke en godsdienstige leier volgens sjaria, die Islamitiese wet, regeer word.

Al is die groep tans beperk tot Sirië en Irak, het ISIS beloof om die ” grense van Jordanië en Libanon te breek” en Palestina te bevry. Dit kry steun van Moslems oral in die wêreld en eis dat almal ‘n alliansie met sy leier, Ibrahim Awad Ibrahim Ali al-Badri al-Samarrai, beter bekend as Abu Bakr al-Baghdadi, aangaan.

ISIS se oorsprong dateer na die oorlede Abu Musab al-Zarqawi, ‘n Jordaniër wat die beweging Tawhid wa al-Jihad in 2002 tot stand gebring het. ‘n Jaar na die Amerikaans-geleide inval in Irak, het Zarqawi ‘n alliansie met Osama bin Laden aangegaan en Al-Kaïda in Irak (AQI) gestig, wat ‘n mag om mee rekening te hou in die insurgensie geword het. Die taktiek van Abu Musab al-Zarqawi is as te ekstreem deur Al-Kaïda se leiers beskou.

Na Zarqawi se dood in 2006, het AQI ‘n sambreelorganisasie, die Islamitiese Staat, in Irak (ISI) gevorm. ISI is stelselmatig verswak deur middel van Amerikaanse troepe se optrede en die vorming van Sahwa-rade (” ontwaking” ) deur Soenni Arabiese stamlede, wat die groep se wreedaardighede verwerp het.

Nadat hy in 2010 die leier geword het, het Baghdadi ISIS heropgebou. Teen 2013 was die groep opnuut besig met dosyne aanvalle ‘n maand in Irak. Dit het ook aangesluit by die rebellie teen pres. Bashar al-Assad in Sirië en die Al-Nusra Front tot stand gebring.

In April 2013 het Baghdadi ‘n samesmelting van sy magte in Irak en Sirië en die totstandkoming van die Islamitiese Staat in Irak en die Levant (ISIS) aangekondig.

Die leiers van Al-Nusra en Al-Kaïda het die skuif verwerp, maar vegters lojaal aan Al-Baghdadi het weggebreek van Al-Nusra en gehelp om ISIS in Sirië te hou.

Godsdienstige minderhede, veral Irak se Jazidi’s, is deur die Islamitiese Staat-groep geteiken.

Teen die einde van Desember 2013, het ISIS se fokus terug na Irak verskuif en ‘n politieke dooie punt tussen die Shia-geleide regering en die minderheid Soenni Arabiese gemeenskap uitgebuit. Met die hulp van stamlede, het die groep beheer oor die sentrale stad Falluja oorgeneem.

In Junie 2014 het Isis die noordelike stad Mosul ingeneem en toe suidwaarts in die rigting van Bagdad begin beweeg. Teen die einde van die maand, nadat die groep sy beheer oor dosyne stede en dorpe gekonsolideer het, het ISIS die skepping van ‘n kalifaat verklaar.

Sommige Soenni Arabiere het die Islamitiese Staat-groep ondersteun nadat Mosul ingeneem is. Sommmige waarnemers skat dat IS en sy bondgenote ongeveer 40 000 vierkante kilometer in Irak en Sirië beheer, ongeveer die grootte van België. Ander meen hulle beheer nader aan 90 000 vierkante kilometer, ongeveer die grootte van Jordanië. Die gebied sluit stede soos Mosul, Tikrit, Falluja en Tal Afar in Irak; Raqqa in Sirië, olievelde, damme, hoofpaaie en grenskruisings in.

Dit word beraam dat agt miljoen mense in die gebied woon, wat gedeeltelik of ten volle deur ISIS beheer word. In die gebiede het die groep streng vertolkings van Sharia geïmplementeer en word vroue gedwing om sluiers te dra, nie-Moslems gedwing om ‘n spesiale belasting te betaal of hulle tot Islam te bekeer en strawwe afgedwing wat geseling en teregstelling insluit.

Duisende buitelanders het vir ISIS in Sirië en Irak geveg. Amerikaanse amptenare is van mening dat daar tot soveel as 31 000 vegters in Irak en Sirië is. ‘n Deskundige oor Irak, Hisham al-Hashimi, sê ongeveer 30 persent is ” ideoloë” en dat die res uit vrees of onder dwang aangesluit het.

‘n Betekenisvolle aantal IS-vegters is nie Irakse of Siriese burgers nie. Die Soufan-groep het onlangs beraam dat meer as 12 000 buitelanders van minstens 81 lande, insluitende 2 500 uit Westerse lande, oor die afgelope drie jaar na Sirië gereis het om vir ISIS te veg.

Die Islamitiese Staat het een van die mees gedugte djihadistiese groepe ter wêreld geword. ISIS-vegters het toegang tot en is in staat om ‘n verskeidenheid klein en swaar wapentuig te gebruik. Dit sluit in vragmotorgemonteerde masjiengewere, vuurpyllanseeerders, lugafweerwapens en beweeglike grond-tot-lug-missielstelsels. Hulle het ook tenks en gepantserde voertuie van sowel die Irakse as Siriese weermagte gebuit. Dit sluit Amerikaanse Humvees en bombestande vragmotors in.

Die groep beskik klaarblyklik ook oor ‘n buigsame voorsieningsketting wat ‘n konstante voorraad ammunisie en klein vuurwapens tot vegters se beskikking stel. Die betekennisvolle vuurkrag het ISIS gehelp om in Augustus Koerdiese Peshmerga-posisies in die noorde van Irak, tot vele se verbasing, te verower.

Die Islamitiese Staat het glo US$ 2 miljard in kontant en bates, wat dit die wêreld se rykste militante groep maak. Aanvanklik het die meeste finansiële bystand van individue in Arabiese Golfstate gekom. Vandag is IS grootliks selfvoorsienend en verdien maandeliks miljoene dollar uit die olie- en gasvelde wat dit beheer, asook uit belasting, tolgeld, smokkelarry, afpersing en ontvoering. Die offensief in Irak was ook uiters lonend en het hulle toegang gegee tot die kontant wat in groot handelsbanke gehou is in die stede wat hulle verower het.

Onthoofdings, kruisigings en massaskietery is gebruik om hul vyande te terroriseer. ISIS-lede regverdig hierdie gruweldade deur verse uit die Koran waarin verwys word na ” kap die koppe van ongelowiges af” , maar Moslems verwerp dit.

Selfs die Al-Kaïda leier, Ayman al-Zawahiri, wat hom in Februarie 2014 van ISIS gedistansieer het oor die groep se optrede in Sirië, het Zarqawi in 2005 reeds gewaarsku dat sodanige brutaliteit daartoe sal lei dat dit ” Moslem-harte en simpatie” sal verloor.

Bron: Die Republikein, BBC, CNN, Jerusalem Post

MRK afgeraai om Zoeloekoning te ondersoek

Die voorsitter van die parlementêre portefeuljekomitee oor justisie, Mathole Motshkega het probeer om die voorsitter van die Menseregtekommissie, Lawrence Mushwana af te raai om voort te gaan met die ondersoek na uitsprake van koning Goodwill Zwelithini.

Die ondersoek word gedoen ná bewerings dat uitsprake van die koning bygedra het tot xenofobiese geweld, het RSG berig.

Motshekga wat volhou dat hy in sy persoonlike hoedanigheid praat, sê as hy Mushwana was sou hy die saak as afgehandel beskou het.

Mushwana het bevestig dat personeel van die kommissie onder druk geplaas word weens die ondersoek.

President Jacob Zuma het intussen gesê streekleiers van die Suider Afrikaanse Ontwikkelingsgemeenskap is tevrede met die wyse waarop Suid-Afrika op die xenofobiese geweld in die land gereageer het.

Die president het by ‘n buitengewone beraad van die SAOG in Harare, Zimbabwe gesê Suid-Afrika sal verslae oor die aanvalle aan die SAOG, die Afrika Unie en die Verenigde Nasies stuur.

Leiers van die streekorganisasie het gesê dat die industralisering van die streek sal help om die probleem van ekonomiese migrasie op te los.

Zuma sê daar is ooreengekom dat industralisasie deel van die oplossing is. Hy sê ‘n strategie wat deur die SAOG goedgekeur is sal bydra tot die visie van ‘n vreedsame en vooruitstrewende Afrika.

Die beraad het Woensdagaand tot ‘n einde gekom.

Die KwaZulu-Natalse spesiale verwysingsgroep oor migrasie en gemeenskapsintegrasie sê intussen hulle het reeds met sakeleiers en handelaars van Inanda en KwaMashu, noord van Durban beraadslaag.

Die voormalige VN hoë kommissaris oor Menseregte, Navi Pillay is die voorsitter van die groep wat aangestel is om navorsing te doen oor die oorsake van xenofobiese geweld in die provinsie.

Pillay sê ‘n voorlopige verslag sal binne drie maande aan die premier van KwaZulu-Natal, Senzo Mchunu voorgelê word. Die groep moet ook ‘n herintegrasie plan saamstel en aan die premier voorlê.