VF+ bevraagteken grondwetlikheid van EFF

iecHaatspraak, ‘n beleid gegrond op rassisme en ‘n ekonomiese beleid van nasionalisering druis in teen die letter en gees van Suid-Afrika se Grondwet en die Vryheidsfront Plus het in die lig hiervan by die Verkiesingskommissie (OVK) ten sterkste beswaar aangeteken teen die registrasie van Julius Malema se politieke party, die Ekonomiese Vryheidsvegters (EVV).

Volgens mnr. Pieter Groenewald, die VF Plus se voorsitter, is ‘n sterk bewoorde brief hieroor aan die Verkiesingskommissie (OVK) gestuur waarin die kommissie versoek word om Malema se registrasie-aansoek om grondwetlike redes af te keur. Individue en partye het tot einde verlede week geleentheid gehad om beswaar teen die registrasie aan te teken.

“Die EVV propageer die nasionalisering van grond, myne, banke en ander bates sonder enige vergoeding, en in besonder op ‘n rasse-grondslag. Dit is ongrondwetlik.

“Malema is reeds deur die hooggeregshof van Suid-Afrika skuldig bevind aan haatspraak oor die sing van die gewraakte lied ‘Shoot the Boer’, wat sedertdien verbied is en tot haatspraak verklaar is.

“Met die sing van die lied het Malema rasse-polarisasie geskep en emosie opgejaag teenoor ‘n spesifieke ras- en etniese groep wat ook ongrondwetlik is.

“Tot nou toe het Malema as leier van die EVV geen berou getoon nie. Die VF Plus glo dat hy met sy ongrondwetlike optrede sal voortgaan en dat hy sy party sal misbruik as ‘n voertuig vir soortgelyke diskriminerende optrede en beleidsrigtings.

“Daarbenewens is die woord ‘Vegters’ of ‘Fighters’ in Engels nie geskik vir ‘n demokratiese bestel waar politieke partye verkiesings op ‘n geordende en demokratiese wyse voer nie. Art. 16 van die Verkiesingskommissiewet stel dit duidelik dat enige naam of afkorting wat die propageer of aanhitsing van geweld of haat voorstel, nie aanvaarbaar is nie,” sê mnr. Groenewald.

‘n Verdere versoek is ook aan die OVK gerig waarin die VF Plus beswaar aanteken teen die Engelse afkortings van die name van die VF Plus (FF Plus in Engels) en die EVV (EFF in Engels) aangesien dit tot verwarring onder die publiek kan lei.

Mnr. Groenewald sê die VF Plus ervaar reeds dat verwarring bestaan op onder meer netwerke van die sosiale-media.

“Die VF Plus sal oor hierdie aangeleenthede die nodige bewyse aan die Verkiesingskommissie voorlê indien dit benodig word. Oor die naamkwessie verwag ons ook ‘n deeglike verduideliking van die (OVK) oor sy besluit.

“Tot nog toe is die VF Plus die enigste party wat die registrasie van Malema se party teenstaan. By ons is daar geen twyfel nie dat dit ongrondwetlik is en die OVK sal gewis sy mandaat versaak indien die registrasie van die EVV goedgekeur word, sê mnr. Groenewald.

Mbeki onttrek van Seriti-ondersoek weens geld

Thabo Mbeki
Thabo Mbeki

Max Boqwana, wat oudpres. Thabo Mbeki en sy voormalige kabinetministers by die Seriti-kommissie van ondersoek verteenwoordig, het hom aan die verrigtinge onttrek.

Die Kommissie sê die onttrekking van sy regsverteenwoordiger sal geen invloed op sy werksaamhede hê nie.

Woordvoerder vir die kommissie, William Baloyi, sê: “Eintlik is daar geen impak op die kommissie nie. Dit is nie verpligtend vir die getuies om hul regspanne te bring nie. Dit is net ‘n opsie.“

Mbeki het verduidelik dat hy onttrek hangende ‘n aansoek om geldelike hulp van die staat.

Mbeki se woordvoerder, Mukoni Ratshitanga, sê Mbeki se posisie sal hersien word as die regering ‘n besluit oor regshulp aan die voormalige president geneem het.

Adv. Tshepo Sibeko, getuienisleier, het bevestig dat daar vergaderings met Boqwana was.
“Ons het geen beswaar teen sy onttrekking nie.”
Regter Willie Seriti, voorsitter van die kommissie, het gesê die regsverteenwoordiging van getuies is buite die grense van die kommissie.
Getuies kan hul eie regsverteenwoordiging hê, waarvoor hulle self moet betaal.
Pres. Jacob Zuma het die kommissie in 2011 aangestel om beweerde korrupsie in die multimiljardrand-wapentransaksie van 1999 te ondersoek.

Kaapstad: Moslems, ANC, Cosatu betoog teen geweld in Egipte

MJC1Duisende betogers sal vanoggend in Kaizergracht in Kaapstad byeenkom vir ‘n optog na die parlement om beswaar te maak teen die dood van betogers in Egipte.

Woensdagoggend se optog word gelei deur die Moslem-regsraad (MJC) asook ander organisasies, waaronder die ANC en Cosatu, wat hulle daarby sal aansluit.

“Die doel van die optog is om te protesteer teen die gewelddadige staatsgreep wat plaasgevind het drie weke gelede in Egipte en ook die gevolglike massamoord van betogers teen die staatsgreep. As Suid-Afrikaners voel ons dit is ons verantwoordelikheid om te reageer op ‘n ondemokratiese proses en die staatsterrorisme in Afrika,” het die MJC–woordvoerder Naboweya Mallick gesê.

Vroeër hierdie week, die Claremont Main Road-moskee in Kaapstad gevra vir ‘n einde aan die geweld in Egipte en vir die herstel van demokratiese regering.

Mandela-pad teen R6 miljoen opgeknap

Zille agter haar donkerbril
Zille agter haar donkerbril

Die Wes-Kaapse premier Helen Zille het die opgeknapte ‘Madiba Vryheidspad’ by die Drakensteinse korrektiewe dienste-sentrum naby die Paarl geopen.

Oudpresident Nelson Mandela het in Februarie 1990 sy eerste tree na vryheid op die historiese pad by die destydse Victor Verster-gevangenis gegee.

Die provinsiale pad is deur die Wes-Kaapse departement van vervoer in samewerking met die distriksmunisipaliteit van die Kaapse Wynlande opgegradeer teen ‘n koste van sowat ses miljoen rand.

Zille sê die inisiatief is ‘n waardevolle belegging in ‘n deel van die land se geskiedenis. – RSG

Crawford-Brown se aansoek verwerp

Crawford-Brown
Crawford-Brown

Die Seriti kommissie van ondersoek na wapenaankope het ‘n aansoek van een van die latere getuies voor die kommissie, Terry Crawford-Brown, verwerp dat die wapenaankooptransaksies in die negentigerjare onwettig verklaar word.

Crafford-Brown maak in sy aansoek ook beswaar maak dat die kommissie sekere dokumente geklassifiseer het.

Crawford-Brown se aansoek by die Grondwethof oor beweerde bedrog van sowat R70 miljard by die wapentransaksie, het tot die aanstelling van die kommissie gelei.

Die kommissie sê hy kan nie aanbevelings maak voordat getuienis nie van mense aangehoor is om duidelikheid te verkry nie.

Intussen het die getuies voor die kommissie se openbare sitting begin getuig.

Hulle is senior offisiere van die Suid-Afrikaanse vloot, wat sal verduidelik waarom nuwe wapens nodig was tydens die transaksies en watter aankope aanbeveel is. – RSG

Nog ‘n Pagad-lid vas

pagad2Die organisasie, People Against Gangsterism and Drugs, PAGAD, sê nog een van sy senior lede is in hegtenis geneem is in verband met die driedubbele moord in Athlone verlede week.

Die organisasie sê Zacharia Albertyn is op die Kaapse Vlakte deur die polisie in hegtenis geneem.

Die leier van Pagad, Abdus-Salaam Ebrahim is verlede week in verband met die moorde in hetenis geneem.

Hy het reeds in die hof verskyn, waar sy saak tot 26 Augustus uitgestel is. – RSG

SA se handel met Brics-vennote groei

bricsPresident Jacob Zuma sê ‘n gebrek aan infrastruktuur is ‘n groot bedreiging vir Afrika se vermoë om sy volle potensiaal te bereik.

Zuma het by die Brics-sakeberaad in Sandton, Johannesburg gesê beleggings in infrastruktuur verwante projekte sal Afrika se ekonomiese medediging verhoog.

“Dit [Brics] verteenwoordig 16,8 persent van die internasionale handel,“ het hy gesê aan die afgevaardigdes. Zuma het gesê die totale handel met Indië, Suid-Afrika se sesde grootste handelsvennoot, het aansienlik gegroei van R53 miljard tot R67 miljard.

Handel met China het gegroei van R188 miljard in 2011 tot R201miljard in 2012.

“Hierdie indrukwekkende statistiek … moet julle die vasberadenheid en vertroue bied om die doelwit te behaal,” het hy gesê.

Die minister van Handel en Nywerheid Rob Davies het gesê die vergadering is daarop gemik om die vennootskappe te verdiep om samewerking en ontwikkeling op die Afrika-kontinent te verbeter.

Die Brics-raad se Suid-Afrikaanse voorsitter Patrice Motsepe het gesê dit is belangrik dat die verbintenis om handel en belegging te verhoog gesien word, asook “gemeet“.

“Daar is ‘n nuwe gevoel van dringendheid,“ het Motsepe gesê.

China het vroeër by die beraad gesê hy het meer 200 miljard rand in Afrika belê en beplan om nog 200 miljard rand oor die volgende drie jaar in die vasteland te investeer. Die Chinese regering sê die geld is vir die ontwikkeling van landbou, infrastruktuur en die vervaardigingsbedryf.

Die waarnemende voorsitter van die Brics-sakeraad, Ma Zehua, het ook duisende sakelui toegespreek by die Sakeberaad.

Zehua sê Afrika behoort in ruil daarvoor ‘n gunstige omgewing te skep vir suksesvolle handel en belegging. In 2012, het Suid-Afrika se totale handel met Brics-lande ​​op R294 miljard gestaan, op vanaf R264 miljard in 2011.

Meer as 30 Chinese afgevaardigdes, wat verskillende sektore verteenwoordig, het die twee dae lange beraad bygewoon asook sakeleiers van 19 Afrika-lande.

Die Brics-groep bestaan uit Suid-Afrika, Brasilie, Indië, China en Rusland. Saam is die bevolkings in die Brics-lande byna die helfte van die wêreldbevolking. – Sapa

SA Akademie gaan transformeer

Prof Wannie Carstens
Prof Wannie Carstens

Die SA Akademie vir Wetenskap en Kuns het hulself tot transformasie verbind, berig Martiens van Bart in Beeld. Die Akademie is in 1910 gestig om die Afrikaanse taal, literatuur, kuns en wetenskap te bevorder.

Die Akademie wil egter van sy wit en Afrikaanse beeld ontslae raak om demografie te weerspieël en met die internasionale asook politieke tydsgewrig in pas te wees.

Prof. Wannie Carstens, voorsitter van die Akademie, lig die 953 lede van die organisasie oor dié beleidswending in die voorwoord van die jongste uitgawe van die Akademie se Nuusbrief in.

Carstens skryf die Akademie is gebonde aan die huidige tydvak en verkeer onder druk om aan te pas.

“Daar kan nie voortgegaan word soos aan die begin van die 1990’s nie, aangesien die land sedert 1994 bloot te veel verander het.

“As liggaam transformeer ons, maar nie net in die betekenis waarin die ANC-regering van die dag die woord ‘transformeer’ beskou nie, naamlik verander die rassesamestelling van die organisasie om die demografie van die land te weerspieël.

“Die Akademie moet beslis ook in dié verband verander en dit word volgens ’n plan gedoen.

“As ons dit nie doen nie, gaan ons onsself as liggaam irrelevant maak vir die Afrikaanse gemeenskap omdat die Afrikaanse gemeenskap nie net wit is nie, ook nog nooit was nie.

“Ons wil hê dat die Akademie uit- eindelik die demografie van die Afrikaanse gemeenskap sal verteenwoordig.”

Staat hou vol dat regter met kleefplastiek versmoor is

Thandi Maqubela het glo haar man met kleefplastiek laat versmoor
Thandi Maqubela het glo haar man met kleefplastiek laat versmoor

Die moordsaak van waarnemende regter Patrick Maqubela sal vandag in die Wes-Kaapse hooggeregshof hervat word, nadat regter John Murphy verlede week die aanklagte teen die twee beskuldigdes gewysig het.

Die twee word nou daarvan aangekla dat hulle die dood van die regter veroorsaak het op ‘n sogenaamde “onbekende wyse”.

Maqubela se weduwee Thandi en haar mede-beskuldigde, Vela Mabena staan tereg op die moord in 2009.

Thandi word ook daarvan aangekla dat sy die regter se testament vervals het.

Die staat hou vol dat die beskuldigdes kleefplastiek gebruik het om hom te versmoor. Die verdediging beweer egter dat Maqubela weens natuurlike oorsake dood is. – RSG

Oscar onderhandel skikking met vermoorde se ouers

Reeva Steenkamp
Reeva Steenkamp

Oscar Pistorius, die paralimpiese atleet wat van moord aangekla word,  se prokureurs onderhandel met Reeva Steenkamp se ouers in ’n poging om ’n skikking buite die hof te bereik.

Pistorius se prokureurs het Steenkamp se ouers genader, berig The Times. Die prokureurs vir albei partye wou nie kommentaar lewer oor die bedrag wat onderhandel word nie.

Die Steenkamps het R3 miljoen siviele eis vir die verlies van inkomste teen Pistorius gebring.

Steenkamp en haar halfbroer, Adam, het hul ouers finansiël ondersteun en ook die huur betaal vir hul huis in Port Elizabeth.

Adv. Dup de Bruyn SC, die Steenkamps se regsverteenwoordiger, en Kenny Oldwage, Pistorius se prokureur, het bevestig dat hulle in gesprek is

Reeva is op Valentynsdag vanjaar in Pistorius se huis in die ooste van Pretoria doodgeskiet. Die atleet staan tereg op aanklag van moord met voorbedagte rade en die oortreding van die Wet op Vuurwapenbeheer.

Die saak is Maandag uitgestel tot die verhoor op 3 Maart 2014 begin.