Ramaphosa, Fransman sit keel op oor uitsettings

Adjunkpresident Cyril Ramaphosa het die voorsitter van die ANC in die Wes-Kaap ondersteun oor sy teenkanting teen die uitsetting van plaaswerkers.

Ramaphosa en die voorsitter Marius Fransman, het Sondag plaasgemeenskappe besoek tydens ‘n deur-tot-deur veldtog op Mbekweni in die Paarl.

Ramaphosa het ‘n beroep gedoen op boere wat na bewering betrokke is by die uitsetting van plaaswerkers in die Boland, om dit te staak.

Hy het aan die SABC gesê dit strook nie met die rol wat boere veronderstel is om te speel nie. Hy sê boere moet die hervorming van die gemeenskap en plaaswerkers ondersteun.

Ramaphosa sê hy sal by enige proses betrokke raak om die onaanvaarbare uitsettings te keer.

Fransman het ‘n beroep gedoen op ‘n moratorium op uitsettings om die “massa-uitsetting” van plaaswerkers in die Boland te keer.

Fransman sê daar is ‘n massa-uitsettingstrategie aan die gang weens die minister se fokus op integrasie en eienaarskap tussen boere en plaaswerkers.

Hy sê ‘n moratorium moet geld hangende die uitslag van wetgewing.

ANC in Gauteng staan sterk teen e-tol

Die ANC se Gautengse provinsiale konferensie het vroeër in Pretoria ten einde geloop waar die e-tolstelsel onder meer bespreek is.

Afgevaardigdes het hul teenkanting teen die huidige formaat van die stelsel uitgespreek.

Volgens die afgevaardigdes is dit te duur en behoort ‘n brandstofheffing, wat geadministreer sal word deur SAID, die Inkomstediens, dit befonds.

Die ANC in Gauteng beplan om sy teenkanting teen die e-tolstelsel aan die hersieningspaneel oor die aangeleentheid, oor te dra.

Die provinsiale sekretaris, Hope Papo sê hulle wil voorleggings aan die paneel doen wat deur die Gautengse Premier, David Makhura aangestel is.

Woolworths dreig boikotters met die hof

Die kleinhandelgroep Woolworths het gewaarsku dat hy die BDS-organisasie (Boycott, Divestment and Sanctions) hof toe kan neem omdat betogers en boikotters glo die “veiligheid” van sy personeel en klante “bedreig”.

“Ons werknemers, van alle gelowe en kulture, vertel ons dat hulle toenemend deur die betogings bedreig voel. Daarbenewens berig die gesinne van ons werknemers dat hulle deur BDS beledig en daar op hulle gevloek word.

“Indien dit aanhou, sal ons verdere voorsorgmaatreëls neem, waaronder regsoptrede teen die individue wat daarby betrokke is,” sê die groep se mediawoordvoerder, Babs Dlamini.

Terwyl Afrikaners voorheen vir Woolworths geboikot het weens die groep se “slegs-Engels”-beleid, asook sy streng regstellende-aksie-voorskrifte, verkeer die winkelketting tans in die spervuur vanaf BDS omdat hy met Israel sake doen.

Tans is dit nog onbekend of die BDS-veldtog enige invloed op Woolworths se verkope uitoefen. Me. Dlamini sê: “Ons kliënte ondersteun ons steeds en verkope hou aan styg, van jaar tot jaar.”

Tot en met Junie vanjaar, het Woolworths se Suid-Afrikaanse verkope van klerasie met 10,6% gestyg en dié van voedsel met 14,8%. Maar in die mees onlangse jaarverslag waarsku die uitvoerende hoof, Ian Moir, dat “groei oor die kort termyn gedemp sal wees” in Woolworths se vernaamste markte in Suid-Afrika, Australië en die res van Afrika.
Volgens Dlamini beskik BDS oor die reg om te betoog, maar die groep se werknemers het insgelyks die reg om te werk en klante die reg om inkopies te doen sonder om geïntimideer te word.

Sy sê dat Woolworths nie seker is waarom hy uitgesonder word nie aangesien “meer as 95% van ons voedsel plaaslik aangekoop word en die regering steeds handel met Israel magtig”.

BDS, wat reeds 40 betogings by Woolworths-winkels regoor die land gehou het, waaronder Sandton City in Johannesburg, Gateway in Durban en Cavendish Square in Kaapstad, beplan egter om die druk verder te verhoog tydens die kleinhandelaar se algemene jaarvergadering op 26 November.

Volgens die BDS-aktivis, Mohammed Desai, “moet ons ons veldtog verskerp”.

Hy ontken dat BDS enige personeel of klante geïntimideer het en sou wou sien dat Woolworths sulke gevalle by die polisie aanmeld.

BDS word ook gekritiseer omdat hy Woolworths uitsonder terwyl vele ander maatskappye soos Coca-Cola, McDonalds, Danone, Nestlé en Motorola insgelyks bande met Israel handhaaf.

“Ons weet dat daar ander maatskappye met soortgelyke aktiwiteite bestaan,” sê Desai, maar BDS beskik nie oor die vermoë om almal van hulle op dié stadium aan te pak nie.

“Tans is Woolworths ons teiken. Hulle begaan ‘n ernstige fout deur ons te ignoreer en as ons al daardie kleinhandelaars betrek, gaan ons ons veldtog afwater.”

BDS probeer ook druk op die openbare beleggingskommissaris plaas om sy aandele in Woolworths te verkoop.

Pastoor kry lidmate om blomme te eet

Lesego Daniel, die omstrede pastoor van Rabboni Ministries in Ga-Rankuwa, se lidmate het Sondag blomme geëet.

Die pastoor was voorheen in die nuus nadat hy lidmate aangemoedig het om petrol te drink en gras te eet.

Daniel het ontken dat hy ‘n luukse lewe op die rug van sy goedgelowige lidmate lei.

Hy het Sondag sy volgelinge aangemoedig om die blommeversierings op die podium te eet.

“Eet hierdie een,” het Daniel aan een van die kerkgangers gesê. Die swart vrou het haar na die blomme gehaas wat die pastoor uitgewys het, en begin kou aan die madeliefiekroon en die blare.

Ander het na die verhoog gestorm om ‘n voorsmakie van die blomme te kry. Aanvanklik het die vrou het geweier om te deel, maar Daniël het vir haar versoek om te deel met “wat die Heilige Gees doen”.

Gou-gou was die hele saal vol mense wat aan die blomme geknaag het.

“Ek maak nuus,” het Daniel aan sy gemeente gesê terwyl hulle begin stoei het oor die blomme.

Sondag het hy ook aan sy gemeente vertel dat berigte in die media wat beweer sy private lewe val uitmekaar en hy besit luukse motors en ‘n groot stuk grond, is nie waar nie en is slegs pogings om hom te diskrediteer.

“Ek betaal vir die C-klas [Mercedes], maar dit is nie eens in my naam nie.”

“Dit is God wat my bekend maak,” het hy gesê terwyl die gemeente hom toegejuig het en hande geklap het.

SADOU: Inheemse tale moet voorrang geniet

Afrikatale behoort in skole ontwikkel te word sodat hulle die medium van onderrig kan word, veral in die grondslagfase, het die onderwysunie SADOU in ‘n verklaring gesê.

Skole moet voorsien word van die menslike hulpbronne met betrekking tot onderrig in dié tale,” het die vakbond gesê.

Die kongres het gevra dat onderwyskolleges opleiding van onderwysers van inheemse tale moet prioritiseer.

Die tema van die kongres is “Die herstel van die karakter van Sadou as ‘n unie van revolusionêre professionele agente van verandering en voorstanders van die bemagtiging van mense deur opvoeding in die nastrewing van sosialisme”.

“Ons het verklaar sosialisme is die toekoms want dit waarborg volhoubare ontwikkeling en dekonstrueer die uitbuiting van een mens deur ‘n ander en sal armoede en ellende in die wêreld beëindig.”

Die kongres het ook verwys na “die toewysing van onderwysposte, waar die graad van kompleksiteit van die kurrikulum in verskillende skole oorweeg moet word”.

Afgevaardigdes was dit eens dat onderwysers in vroeëkinderontwikkeling hoogs gekwalifiseer moet wees, met relevante vaardighede in gesondheid, sosiale, sielkundige en opvoedkundige sake.

Hulle het die wenslikheid van ‘n “gestandaardiseerde kwalifikasie moet ooreengekom om eenvormige standaarde te vestig” benadruk.

Alle skole behoort ondersteuningspersoneel, terapeute en sielkundiges aan te stel om onderwysers te help met leerlinge wat in die hoofstroom sukkel.

Die kongres het gesê die Jaarlikse Nasionale Assessering (ANA) moet nie “misbruik word om onderwysers en skole te demoraliseer en te etiketteer as onprofessioneel nie”.

ANA-toetse bepaal leerlinge se vaardigheidsvlakke wat geletterdheid en gesyferdheid betref.

Die toetsuitslae moet nie vir publisiteit aangewend word nie, maar eerder riglyne vir die nodige ingryping verskaf, het SADOU gesê.

Pa behandel nadat sitkamer afbrand

‘n Pa van twee is Sondagaand vir rookinaseming behandel nadat sy sitkamer in Wonderboom, Pretoria aan die brand geraak het.

Volgens Frikkie Gous, woordvoerder van Lifemed-ambulansdienste, is slegs die pa op toneel behandel.

Die vrou en twee kinders, onderskeidelik 2-jaar en 10 maande oud, is nie beseer nie.

Die brand het omstreeks 19:00 uitgebreek.Gous het gesê dit is onseker hoe die brand ontstaan het. Die brand is geblus voordat dit na enige ander vertrek versprei het.

Johan Pieterse, woordvoerder van die Tshwane-nooddienste, het die brand bevestig. Die brand was vinnig onder beheer gebring en daar was geen beserings nie.

Hong Kong se kleurrewolusie met Hollywood-tema

‘n Kleurrewolusie met elke keer ‘n soort van irriterende Hollywood-tema raak al lank in die tand.

In die Oekraïne was dit die Oranjerewolusie, in Georgië was dit die Roosrevolusie, in Mianmar die Saffraanrevolusie, in Libanon, die Sederrevolusie, en in Kirgizstan die Tulprevolusie.

Die jongste poging ter destabilisering van Hong Kong, is gemik op China, en heet “die Sambreelrevolusie”, die simbool van die studente se “saak”, só word ons vertel, as ‘n beskerming teen pepersproei.

Die tienerbetogers word glo deur ‘n tiener self gelei, wat die duisende mense op straat nog meer ongeloofwaardig maak.

Berigte het die betogings as “chaoties” beskryf, maar dit blyk dat dit baie goed georganiseer is.

Dit lyk dus na suiwer propaganda ontwerp om die verborge hand van beheer oor die skares te verberg. Tienduisende mense kan eenvoudig nie spontaan sonder goeie beplanning en bestaande infrastruktuur net betyds vir wanneer die VSA ‘n stok soek teen Rusland en China, skielik opdaag nie.

Die amptelike mondstuk van China se regerende Kommuniste Party sê die owerhede sal nie toegewings maak aan betogers in Hong Kong nie.

Die koerant sê die betogers sal nie in hulle doelwitte slaag nie omdat hul eise nie wettig of redelik is nie. Die Kommuniste Party het in Augustus beslis dat kandidate vir die verkiesing van Hong Kong se leier vooraf gekeur sal word.

Die betogers het intussen ingestem om samesprekings met die regering te voer, maar is nie van plan om die betogings op te skort nie.

Hulle het geëis dat die huidige leier van die stad bedank, maar hy het kort voor die spertyd vir sy bedanking verstryk het, gesê hy bly in sy pos aan maar is bereid om met die betogers samesprekings te voer.

Die Chinese minister van buitelandse sake het intussen verklaar dat die VSA moet ophou inmeng in soewereine lande.

DA wil Eskom-wanbetalers in Vrystaat help

Die DA in die Vrystaat gaan ‘n regsmening inwin om te voorkom dat kragtoevoer na drie munisipailiteite in die provinsie afgesny word.

Dit volg nadat Eskom gewaarsku het dat die krag na die Ngwathe, Dihlabeng en Maluti-a-Phofung munisipaliteite teen 12-uur vanmiddag afgesny word as R736 miljoen in agterstallige skuld nie betaal is nie, het RSG berig.

Dit sluit dorpe soos Parys, Betlehem, Clarens, Harrismith en Heilbron in.

‘n Woordvoerder van Eskom, Anthony Scott sê die munisipaliteite het geen reëlings vir die volgende ses tot 18 maande getref nie en kan ook nie hulle huidige rekeninge betaal nie.

Scott sê die afsny van die kragtoevoer is die laaste uitweg, nadat dit reeds tot 31 Augustus en daarna tot 30 September uitgestel is.

Verskeie samesprekings is ook met die provinsiale regering gevoer.

Polisie lê beslag op houer vol kokaïen

Die polisie in Durban het beslag gelê op 95 kilogram kokaïen ter waarde van sowat 29 miljoen rand. RSG het berig dat dit heroïen was.

‘n Woordvoerder sê die dwelms was versteek in ‘n vraghouer in die hawe wat van Buenos Aires in Argentinië afkomstig was.

Die intelligensie-operasie is gelei in samewerking met die SAPD DPCI, die Valke en die Doeane-enheid by die Durbanse hawe.

‘n Houer met kokaïen wat positief geïdentifiseer is deur die forensiese span van die SAPD, het een kilogram-blokke verpak gekry. ‘n Totaal van 95 blokke was in die houer.

Voorlopige ondersoeke het getoon dat die oorspronklike seël van die houer mee gepeuter was. Daar word vermoed dat die dwelms verwyder sou word voordat die houer aan die eienaar oorhandig moes word.

Die skip met die houer het vertrek uit Suid-Amerika op 5 September 2014 en het by Durban op die aand van 30 September omstreeks 22:00 aangekom.

Niemand is in hegtenis geneem nie en die ondersoek duur voort.

FW speel Dalai Lama op sy eensnaar-ramkietjie

Volgens FW de Klerk is Suid-Afrika “nie meer die baken van hoop” vir ’n wêreld nie. Blykbaar is hy soos Brittanje en die VSA steeds van mening dat plaasmoorde en etniese haatveldtogte “hoop” verteenwoordig.

Dié en ander sotternye is Donderdag by ‘n mediakonferensie gehoor nadat ‘n feodale simbool van Tibet ‘n geleentheid raakgesien het om op Kaapstad se onkoste ‘n bietjie publisiteit vir sy moeë beeld op te wek.

De Klerk en Patricia de Lille het die mediakonferensie van die Kaapse stadsraad gehou om aan te kondig dat die 14de beraad van wenners van die Nobelvredesprys afgestel is.

Die beraad, wat van 13 tot 15 Oktober in Kaapstad gehou sou word, is tot niet nadat sekere pryswenners onttrek het uit protes teen Suid-Afrika se bande met China.

De Klerk het gesê die land se buitelandse beleid behoort die “waardes” van die Grondwet te weerspieël. Dit is klaarblyklik “waardes” wat wit aanstellings soos dié van Renate Barnard in die SAPD laat verbied deur die Grondwethof.

“Om ’n visum aan ’n geestelike leier te weier, is teen die Grondwet en teen gods­diensvryheid . . . dit skreeu teen grondwetlike waardes.”

Volgens De Klerk se soort logika, skreeu niks egter teen die mees ondemokratiese bestel in moderne tye, feodalisme, in Tibet nie.

Die Dalai Lama, wat reeds by verskeie geleenthede sy reise na Suid-Afrika afgestel het, het dié week weer so gemaak en ‘n konferensie wat R60 miljoen sou genereer, gekelder.

Die Tibetaan se besluit val toevallig saam met ‘n kleurrewolusie wat tans in Hong Kong afspeel uit “verset teen China se menseregtevergrype”.

Die mediasirkusbeswaardes se verbintenis tot menseregtevergrype teen etniese minderhede in Suid-Afrika is na dese onder groter verdenking.

Die regering het gesê dit is onsin om te beweer dat die Dalai Lama ’n visum ge­weier is.

“Die man het sy besoek gekanselleer terwyl sy aansoek nog hangende was,” het Clayson Monyela, woordvoerder van die departement van internasionale betrekkinge en samewerking, aan Bloomberg gesê.

​De Klerk het gesê weens die “agteruitgang sedert 2008”, is dié besluit van die Dalai Lama “die punt waarop Suid-Afrika uiteindelik sy aan­spraak verloor het as die land in Afrika wat iets besonders en internasionaal iets edels verteenwoordig het”.

Hy het daarmee sy noue verbintenis tot die Mbeki-era se Boerehaat, korrupsie en plundery bevestig. Sy swak besluit om Suid-Afrika se minderhede uit te lewer aan die genade van swart impi’s, word as iets “edels en besonders” voorgehou.

De Klerk het gesê hy en emeritusaartsbiskop Desmond Tutu, asook die Nelson Mandela- en Albert Luthuli-stigtings, het op 23 September in ’n brief aan die groep dit benadruk dat hulle nie die beraad moet boikot nie.