Etiket: VSA

NAVO, VN wil nie aan Amerikaanse Aleppo-aas byt nie

Amerika probeer Rusland blameer vir die aanval op ’n konvooi wat hulp aan die meer as 78 000 vasgekeerde mense in die Siriese stad Aleppo moes bring.

Maar NAVO se sekretaris-generaal Jens Stoltenberg het geweier om te spekuleer oor wie verantwoordelikheid moet aanvaar vir die aanval op die hulpkonvooi naby Aleppo, en gesê partye moet eers “die feite regkry”.

Nagenoeg 20 mense is in die aanval op die konvooi dood.

Rusland ontken ten sterkste dat die lug­aanval op die konvooi deur die land se magte en selfs Siriese regeringsmagte uitgevoer is.

Volgens verklarings deur Moskou was die aanval in die nag en die Siriese lugmag beskik nie oor die vermoë om nagvlugte uit te voer nie. Rusland gee militante die skuld vir die aanval.

Hooggeplaaste Amerikaanse weermagwoordvoerders hou egter vol dat hulle oor voldoende bewyse beskik dat Russiese vegvliegtuie die aanval uitgevoer het.

Rusland het intussen hommeltuig-video­materiaal vrygestel wat volgens hulle bewys dat die konvooi gevolg is deur ’n voertuig wat ’n mortierlanseerder op ’n sleepwa gesleep het.

Die Russiese regering het gesê slegs militante het geweet presies waar die konvooi was, alhoewel die VN alle partye in kennis gestel het van die konvooi.

Die Russiese ambassadeur by die VN, Witali Tjoerkin, het gesê sulke haastig beskuldigings, ontdaan van enige feite, is ontwerp, onder andere, om aandag af te lei van ‘n vreemde fout “gemaak deur vlieëniers van die Amerikaanse anti-ISIS koalisie op 17 September toe Siriese regeringsposisies naby Deir ez-Zor gebombardeer is”.

Amerika se veelvuldige verskonings en verduidelikings wat die land probeer verontskuldig, het reeds gespanne betrekkinge met Rusland verder versleg.

Rusland vermoed die VSA probeer ISIS in Sirië beskerm en sê die VSA moet onverwyld ‘n onderskeid tref tussen Siriese “opposisie” en ISIS-militante.

Die Russiese ministerie van verdediging sê ‘n Amerikaanse hommeltuig was ook in die omgewing van die humanitêre konvooi toe dit buite Aleppo aangeval is.

Hulle sê die Predator het van die Incirlik-lugbasis in Turkye opgestyg tot op ‘n hoogte van 3600 meter en teen ongeveer 200 kilometer per uur en die konvooi gevolg.

Die Verenigde Nasies (VN) het ná ‘n dodelike aanval op ‘n konvooi alle hulpverlening in Sirië opgeskort.

Die Amerikaanse minister van buitelandse sake, John Kerry, het intussen aan die VN se Veiligheidsraad in New York gesê alle vliegtuie in die noorde van Sirië behoort verbied te word om te vlieg sodat humanitêre hulp afgelaai kan word.

Kerry het by die raad gesê so ‘n stap kan die geloofwaardigheid herstel van pogings om ‘n einde aan die konflik in Sirië te maak.

Tweede nag van geweld in Charlotte, NC oor swart ‘boekleser’

Geweld het vir ‘n tweede nag die Amerikaanse stad Charlotte ontsier nadat swart inwoners die strate ingevaar het.

Hulle is ontstoke omdat ‘n swart man deur die polisie doodgeskiet is. Hulle beweer hy was besig om ‘n boek te lees toe hy in koele bloede doodgeskiet is, maar getuies vertel ‘n ander storie.

Een persoon is geskiet tydens die protesoptrede en is in ‘n kritieke toestand. Volgens die polisie is die persoon deur ‘n burgerlike geskiet, en nie deur die polisie nie.

Onluspolisie het traanrook gebruik om die tierende horde swart oproeriges uiteen te jaag. Hulle moes ook skokgranate gebruik nadat betogers hulle met vuurwerke bestook het.

BLM-aktiviste sê die polisie en “witheid” is verantwoordelik vir die geweld na die dood van ‘n “onskuldige” swart “boekleser”.

Die 43-jarige Keith Lamont Scott is Dinsdagaand deur ‘n swart polisiebeampte doodgeskiet.

Sestien polisiebeamptes is tydens die eerste nag van oproer beseer en een is ook in die gesig met ‘n klip getref, het amptenare gesê.

Verslae is vroeg Woensdag ontvang van motoriste wat op die Interstate 85 aangeval is en hul voertuie beskadig is toe betogers klippe, bottels en verkeerskeëls vanaf brûe gegooi het.

Swart betogers het die Time Warner Cable Arena, die tuiste van die NBA se Charlotte Hornets, geplunder. Hulle het ook die NASCAR Hall of Fame, ‘n Buffalo Wild Wings en ‘n Westin leeggedra, volgens die Charlotte Observer.

Charlotte se burgemeester Jennifer Roberts het ‘n Woensdag by ‘n perskonferensie gevra dat die gemeenskap kalm moet bly en moet wag vir die feite voor hulle haastige gevolgtrekkings maak.

Haar kommentaar kom net ‘n uur voor ‘n aktivistegroep sy eie nuuskonferensie gehou het om die swart gemeenskap oor te haal tot ‘n ekonomiese boikot van wit besighede in Charlotte.

‘n CNN-verslaggewer Ed Lavandera is neergevel deur ‘n oproerige terwyl hy besig was met lewendige verslagdoening.

Charlotte-Mecklenburg se polisiehoof Kerr Putney het gesê beamptes wat Scott genader het, het nie ‘n boek gevind op die toneel van die skietery nie, in teenstelling met wat sosiale media beweer.

Hulle het wel ‘n wapen op die toneel gevind. “Ons het ‘n wapen gevind. Die wapen was daar en getuies het dit bevestig, en meer [getuies] as net die beamptes.”

Maar die bewerings op sosiale media dat Scott besig was om ‘n boek te lees toe hy doodgeskiet is, is egter binne enkele ure meer as ‘n halfmiljoen keer gedeel.

Die swart inwoners het daarna uitgevaar op ‘n plundertog na Walmart op Noord Tryon Street omstreeks 03:30.

Drie of meer vragmotors is gestop en geplunder op die Interstate 85, en brande is gestig om die pad af te sper.

Slegs een persoon is tot dusver in hegtenis geneem, het die polisie gesê.

Die polisie het gesê hulle was op soek na iemand weens ‘n uitstaande lasbrief toe hulle sien Scott verlaat sy motor met ‘n geweer.

Beamptes het Scott genader waarna hy ‘n “dodelike bedreiging vir die beamptes” geword het toe hy die wapen op hulle gerig het, volgens die polisieverklaring.

Openbare rekords toon dat Scott skuldig bevind is in April 2004 aan ‘n misdryf van aanranding met ‘n dodelike wapen. Ander aanklagte sluit aanranding op ‘n kind onder 12 in, aanranding op ‘n vrou en doodsdreigemente.

Russe woedend oor blaam vir hulpkonvooi-aanval

“Ons is werklik woedend oor hierdie aanval. Daar was ‘n lang proses van toestemming en voorbereiding voordat die konvooi toegelaat is om geïsoleerde burgerlikes te gaan bystaan,” het die Verenigde Nasies (VN) se spesiale gesant vir Sirië, Steffan de Mistura, in ’n verklaring aan Reuters gesê, nadat ’n noodleni­gingskonvooi onderweg na Aleppo Maandagaand aangeval is.

Die VN het sy hulpkonvooie aan die konflikgesteisterde gebied gestaak en waarsku oor die gevolge.

Vroeër Dinsdag, het die Russiese ministerie van buitelandse sake ook hul verontwaardiging te kenne gegee oor die “flagrante pogings van ‘n paar buitelandse ondersteuners van gewapende rebelle en terroriste in Sirië” om blaam na Moskou en Damaskus te verplaas.

Die Russiese ministerie van verdediging se woordvoerder het gesê die Russiese weermag het videomateriaal van die toneel en daar is geen teken dat die konvooi geteiken is in ‘n lugaanval nie.

“Ons het nou die videomateriaal bestudeer van waar die voorval plaasgevind het en daar is geen tekens van enige ammunisie gevind in die konvooi wat getref is nie. Daar is geen kraters nie, die voertuie se onderstelle is ongeskonde en hulle is nie erg beskadig nie.”

Dinsdag het die Verenigde Nasies hul verklaring aangepas en gesê hulle weet nie of dit ‘n lugaanval was nie. “Ons is nie in ‘n posisie om te bepaal of dit in werklikheid lugaanvalle was nie. Ons is in ‘n posisie om te sê dat die konvooi aangeval is,” het die VN se humanitêre woordvoerder Jens Laerke gesê.

Die Withuis het volgehou dat dit “lugaanvalle” was.

Twee onlangse aanvalle teen die Siriese weermag in Oos-Sirië dui volgens ontleders op ‘n Amerikaanse plan om die Siriese regering se teenwoordigheid oos van Palmyra uit te skakel.

Dit sal die VSA en sy bondgenote in staat stel om “Sunnie-entiteit” in Oos-Sirië en Wes-Irak op te rig wat ‘n permanente doring in die vlees van Sirië en sy bondgenote sal wees.

Volgens ‘n woordvoerder van die Rooikruis het meer as 10 mense in die aanval omgekom. Sowat 20 voertuie is ook aan die brand gesteek.

Die voorsitter van die Siriese Rooi Halfmaan was klaarblyklik onder die oorledenes.

Rusland en die VSA het gesê hulle sal werk om die skietstilstand staande te hou ten spyte van die terugslag, maar volgens sekere Westerse nuusbronne is dit beëindig nadat ‘n djihadisteleier gesê het hulle maak gereed om die aanvalle voort te sit.

Die ooreenkoms is verlede week bereik, maar is reeds etlike kere verbreek.

Rusland het die naweek gesê ‘n aanval van die VSA-geleide koalisie teen die Islamitiese Staat (ISIS) het meer as 60 Siriese soldate in die ooste van die land gedood.

Die jongste skietstilstand is die tweede vanjaar wat deur die VSA en Rusland bemiddel is om die oorlog in Sirië, wat nou al ses jaar duur, te beëindig.

VSA, Japan veroordeel Noord-Korea se grootste kerntoets

Washington en Tokio dring daarop aan die “sterkste moontlike” maatreëls teen Noord-Korea ingestel word nadat dié land Vrydag sy grootste en kragtigste kerntoets ooit uitgevoer het, het ‘n top Amerikaanse gesant oor die naweek gesê.

Meteorologiese agentskappe het vroeg Vrydagoggend ’n seismiese skudding naby Noord-Korea se kerntoetsterrein waargeneem.

Volgens Amerikaanse, Europese en Chinese agentskappe het dit volgens die Amerikaanse geologiese opname 5,3 geregistreer.

Noord-Korea se optrede is uit verskeie oorde skerp veroordeel. Die VN-veiligheidsraad het sedert 2006 ’n aantal belangrike resolusies aanvaar wat sanksies teen Noord-Korea instel en verskerp omdat die land voortgaan om sy kernwapenprogram te ontwikkel.

Sung Kim, die Amerikaanse departement van buitelandse sake se spesiale gesant vir Noord-Koreaanse beleid, het ook laat blyk dat die VSA moontlik sy eie sanksies gaan instel in reaksie op Noord-Korea se “uitdagende en onaanvaarbare” optrede.

“Ons sal ten nouste binne die VN-veiligheidsraad en daarbuite saamwerk om met die sterkste moontlike maatreëls teen Noord-Kore se jongste optrede vorendag te kom,” het hy aan joernaliste in Tokio gesê ná afloop van ‘n vergadering met sy Japannese ampsgenoot, Kenji Kanasugi.

“Bykomend tot sanksies deur die VN-veiligheidsraad, sal beide die VSA en Japan in samewerking met Suid-Korea ook kyk na eensydige sanksies,” het Kim gesê sonder om verdere besonderhede daaroor te verstrek.

Noord-Korea hou ondanks vyf verskillende stelle sanksies sedert 2006 deur die VN-veiligheidsraad vol dat hy met kerntoetse sal voortgaan.

Die internasionale gemeenskap het die naweek langs allerlei diplomatieke kanale probeer om China sover te kry om Pyongyang te oorreed om die VN-sanksies te gehoorsaam.

China het gesê hy “verwerp die toetse ten sterkste”, maar ontleders meen Beijing probeer die val van Noord-Korea voorkom ten einde te verhoed dat die magsbalans in die Koreaanse skiereiland na die VSA oorhel.

Volgens Kim sal Washington egter volhou met die gesprekvoering met China oor die jongste krisis. “Ons sal voortgaan om China te probeer oorreed om die bestaande sanksies te implementeer en met ons saam te werk ten einde te verseker dat Noord-Korea se gedrag en optrede verander,” het hy gesê.

Trump na Mexiko om oor muur, immigrante te vergader

Dit is bevestig dat die Republikeinse presidensiële kandidaat Donald Trump Woensdag ‘n reis na Mexiko sal onderneem om die Mexikaanse president Enrique Peña Nieto (foto) te ontmoet.

Nieto het voorheen uiters negatiewe kommentaar oor Trump gelewer, insluitende ‘n opmerking dat Trump ‘n “fascistiese diktator” is omdat hy ‘n muur tussen die VSA en Mexiko wil oprig om onwettige immigrante uit te hou.

Volgens bronne is Mexikaanse amptenare nóú betrokke by die beplanning van die besoek. Hulle het op voorwaarde van anonimiteit gesê die gesprek sal ‘n breë verskeidenheid van onderwerpe dek wat wissel van handel, sekuriteit, immigrasie en die omstrede kwessie van grenshandhawing.

‘n Vergadering met Nieto bied ook aan Trump die kans om skeptiese en besluitelose kiesers van sy presidensiële temperament te oortuig.

Daar word verwag dat Trump-adviseur en voormalige New York-burgemeester Rudy Giuliani, RNC-voorsitter Reince Priebus en Alabama Senator Jeff Sessions, saam met hooggeplaaste Mexikaanse amptenare die vergadering sal bywoon.

Die vergadering sal plaasvind ten spyte van kommer by beide die Mexikaanse veiligheidsdiens asook die Amerikaanse Geheimediens. Vrese vir Trump se veiligheid is reeds geopper weens doodsdreigemente wat hy voortdurend ontvang.

Die presidensiële verkiesing kan vertraag word of heeltemal geskrap word indien die samesweringsteorieë waar word en ‘n kandidaat sterf, sê Amerikaanse wetmakers.

Amptenare sê dat die twee leiers ‘n paar verklarings sal uitreik na aanleiding van die vergadering, maar hulle verwag nie dat ‘n volledige perskonferensie gehou sal word nie.

Die reis is veral histories vir Trump omdat daar nog geen vorige presidensiële kandidaat van ‘n groot party ooit na Mexiko gereis het as deel van sy veldtog nie.

‘n Nuwe verslag van Gallup dui daarop Trump se poging Spaanssprekende kiesers kan lok.

In 2012 het die Republikeinsgenomineerde Mitt Romney die Spaanse stem met ‘n yslike 44 persent vervreem.

Mugabe blameer VSA, Brittanje vir Vrydag se oproer

Die geweld wat Vrydag in Harare uitgebreek het, is die Weste se skuld, sê pres. Robert Mugabe. Hy het ook gewaar­sku het dat hy nie ‘n “Arabiese Lente” in Zimbabwe sal duld nie.

Die polisie het opposisie-ondersteuners by Freedom Square in die middestad met knuppels, traangas en waterkanonne uiteengejaag nadat oproeriges die naamborde vir Robert Mugabeweg afgeruk het.

Morgan Tsvangirai en Joice Mujuru, voormalige visepresident en leier van die opposisiegroep Zim-PF, het ook onder traangas deurgeloop.

Die Amerikaanse en Britse ambassades in Zimbabwe het hul “ernstige kommer” uitgespreek oor gebrek aan “vryheid van spraak”.

Mugabe het die Angelsaksers daarvan beskuldig dat hulle die oproeriges aanhits.

VSA stel sanksies in teen LRA

Amerika het vandeesweek aangekondig dat sanksies teen die seuns van Joseph Kony, leier van die Sentraal-Afrikaanse Republiek (SAR) se Lord’s Resistance Army (LRA) ingestel is.

Die Amerikaanse tesourie sê Salim en Ali Kony is geteiken omdat hulle namens die LRA en hul pa optree, het AFP berig.

Dit volg nadat sanksies in Maart teen Kony senior ingestel is omdat hy burgerlikes in die Sentraal-Afrikaanse Republiek teiken deur opdrag vir dade van geweld en ontvoering te gee en verantwoordelik is dat duisende mense haweloos gelaat is.

Die LRA, wat in 1987 vir die eerste keer in die noorde van Uganda na vore getree het, het ‘n vreesaanjaende reputasie verwerf vir barbaarse aktiwiteite in die noorde van Uganda, Suid-Soedan, die Demokratiese Republiek van Kongo en SAR.

Die groep het meer as 100 000 mense vermoor, meer as 60 000 kinders ontvoer en baie van hulle gedwing om kindersoldate te word, sê die Verenigde Nasies.

Kerry na Afrika te midde van stygende Moslembedreiging

Met die vredesooreenkoms in Suid-Soedan wat aan die uitrafel is en djihadiste wat voortgaan met aanvalle in Somalië, het die Amerikaanse minister van buitelandse sake, John Kerry, in Nairobi aangekom om met Kenia se pres. Uhuru Kenyatta samesprekings te voer.

Die twee het veiligheid in die streek en terrorisme bespreek voordat Kerry ministers van buitelandse sake van Kenia, Somalië, Suid-Soedan en Uganda vir samesprekings ontmoet het.

Die Amerikaanse vredesending na Oos-Afrika is bekommerd oor die verswakkende toestand in Suid-Soedan en ander lande in die streek.

Die ontmoeting was gefokus op die herstel van die mislukte vredesooreenkoms in Suid-Soedan en verkiesings in Somalië wat voor die deur is.

Suid-Soedan sal intussen ‘n Amerikaanse hulppakket van $138-miljoen ontvang, is voorwaardelik aangekondig.

In ’n verklaring wat voor die besoek deur die Keniaanse presidentskantoor uitgereik is, is verduidelik dat die ontmoeting met Kenyatta op streekveiligheid en stabiliteit sal fokus.

Verkiesings vind volgende maand in Somalië plaas en Burundi beleef sedert April 2015 ’n politieke krisis.

Terrorisme was ook op die agenda, vanweë die bedreiging wat Somalië se Al-Sjabaab-militante vir die streek inhou.

Kerry se vorige besoek aan Kenia in Mei 2015 het die weg gebaan vir ’n besoek van pres. Barack Obama, twee maande later.

Die hoë-profiel Amerikaanse diplomatieke sendings beklemtoon Kenia se belangrikheid as streekvennoot vir Amerika, veral wat sekuriteit betref, en is ook ’n aanduiding dat betrekkinge met Kenia aan die verstewig is.

Dié betrekkinge was vir ’n geruime tyd gespanne terwyl Kenyatta voor die internasionale geregshof vir vermeende misdade teen die mensdom tereggestaan het.

Kerry wil die jaaroue vredesooreenkoms in Suid-Soedan, wat tot dusver nie daarin kon slaag om ’n einde aan die konflik te maak nie, weer laat herleef.

Kerry sal ook na Nigerië reis voordat hy Afrika môre onderweg na Saoedi-Arabië verlaat.

Hy sal samesprekings met President Muhammadu Buhari in Abuja voer. Amerika het sedert Buhari verlede jaar aan bewind gekom het, groter veiligheidsondersteuning aan Nigerië gegee teen die Moslemterreurgroep Boko Haram (foto bo).

Intussen het Libië se regeringsmagte, met die steun van Amerikaanse lugaanvalle, verdere vordering met die herowering van Sirte gemaak, het woordvoerders gesê.

Die magte het die sekuriteitsgebou wat deur die Islamitiese Staat-groep (ISIS) as gevangenis gebruik is, die hof, die Al-Naga-distrik en Dubaistraat herower.

Die nuutste oorwinning is in gevegte Sondag “in die aangesig van desperate weerstand van die djihadiste” behaal, lui ’n verklaring.

ISIS se skerpskutterposisies is in twee Amerikaanse lugaanvalle geneutraliseer en regeringsmagte het, sonder enige verlies in eie geledere, twee motorfopvaltoestelle onskadelik gestel.

China suur oor ontplooiing na Spratly-eilande

Viëtnam het verskeie van sy eilande gefortifiseer in die Suid-China See wat die bron van ernstige dispute tussen China en die VSA is.

Nuwe mobiele vuurpyllanseerders is glo na die eilande ontplooi, maar Viëtnam se minister van buitelandse sake sê die inligting is “foutief”.

Amerikaanse militêre personeel sê van die toerusting is na vyf basisse van die Spratly-eilande ontplooi.

Hierdie lanseerders is in staat om China se aanloopbane en militêre installasies oorkant die noodsaaklike handelsroete te bereik, het Westerse veiligheidsbronne gesê.

‘n Internasionale arbitrasie-paneel se bevinding verlede maand dat China se ekspansionistiese maritieme aansprake in die Suid-China See onwettig is, het vroeër woedende reaksie in Beijing ontlok.

China het Woensdag in ‘n verklaring gesê hulle het steeds volle soewereiniteit oor die gebied en is gekant teen “onwettige uitbreiding”.

Turkye se ‘staatsgreep’ lyk na Islamitiese suiweringsveldtog

Nagenoeg drieduisend vermeende militêre samesweerders is in Turkye in hegtenis geneem, ná ‘n mislukte staatsgreep Vrydagnag.

Duisende regters, staatsaanklaers, militêre leiers en soldate is gevange geneem en lasbriewe vir die ander se inhegtenisname is uitgereik.

Verskeie regsgeleerdes, onder wie tien regters en twee lede van die die grondwethof word ook aangehou in wat deur ontleders bestempel word as ‘n Islamitiese oorname van ‘n sekulêre staat wat deur die president self gelei word.

Rusland het Turkye vroeër daarvan beskuldig dat hulle ISIS steun deur die internasionale terreurgroep se gesteelde olie te herverkoop.

Die Turkse president, Tayyip Erdogan het intussen gewaarsku dat daar streng opgetree sal word teen diegene wat die staatsgreeppoging aangehits het.

Vrese dat Erdogan met mening gaan toeslaan op sy sekulêre teenstanders, het intussen opgevlam.

Minstens 265 mense is dood toe rebellesoldate Vrydagaand tenks, helikopters en vegvliegtuie ingespan het in ‘n powere poging om Erdogan se regering omver te werp.

Min van die vereistes vir ‘n suksesvolle staatgreep is egter nagekom en die vermeende poetsjiste het glo selfs gesorg dat die president nie tuis is nie. Hulle het ook geen ander leier in sy plek voorgestel nie.

Volgens die jongste syfers is 265 mense dood, wat 104 samesweerders insluit.

Die Amerikaanse president, Barack Obama het intussen sy land se steun aan die Turkse regering herbevestig.

Die president van die Turks-Suid-Afrikaanse Vriendskapsinisiatief, Abubekir Salim, het die mislukte staatsgreep veroordeel.

Salim sê hulle sal voortgaan om enige “demokratiese metodes” te ondersteun om die situasie te stabiliseer. Hy het Turkse burgers by die ambassade in Pretoria toegespreek.

Salim het ook gesê hulle sal “enige verkose regering” in Turkye steun.

Chaos het ten minste agt uur lank in Istanboel en Ankara geheers terwyl rebelle brûe, die parlementegebou en ander sleutelgeboue probeer beset het.

Van die soldate wat gevang is, het gesê hulle was onder die indruk dat hulle aan ‘n militêre oefening deelneem.

Die Turkse president het beroep op Amerika gedoen om Fethullah Gulen, sy eertydse bondgenoot, uit te lewer omrede Gulen glo die staatsgreep “georkestreer” het.

Gulen het die aantygings met minagting verwerp.

Erdogan het by sy vakansiebestemming geskuil toe hy op sosiale media ‘n beroep op die publiek gedoen om hom te steun. Duisende Turke het hierop die strate ingevaar om die rebellesoldate te konfronteer.

Die rol wat moskees regoor die land gespeel het in die mobilisering van Erdogan se ondersteuners soos die staatsgreep ontvou het, was deurslaggewend, maar ook ‘n teken van die ondergang van sekulêre Turkye.

Honderde Erdogan-ondersteuners het Saterdagaand op pleine, die lughawe in Istanboel en buite sy paleis bymekaargekom om hul steun te wys.

Turkye, ‘n lid van NAVO met graag deel van die Europese Unie (EU) wil word, is die deurgang vir die miljoene migrante wat jaarliks na die EU stroom.

Tans pers die president die EU af vir hulpgeld om die migrantestroom onder beheer te hou, maar met die jongste gebeure wat lyk na ‘n gereëlde toneelopvoering om van sekulêres ontslae te raak, kan die immigranteprobleem in Europa verder vererger.

Onstabiliteit in Turkye, wat as buffer tussen Europa en Sirië dien, kan met die voortslepende vlugtelingkrisis enorme gevolge vir Europa inhou.

Die Turkse Grondwet is intussen verander om net verwysings na Allah alleen te bevat.

Gulen het die staatsgreep veroordeel en bygevoeg dat dit aan Erdogan ‘n verskoning bied om met mening op enigeen toe te slaan wat van hom verskil in wat hy as ‘n suiweringsveldtog bestempel eerder as ‘n staatsgreep.

John Kerry, die Amerikaanse minister van buitelandse sake, het gesê Washington sal met die Turkse owerheid saamwerk, maar dat Gulen nie uitgelewer sal word sonder bewyse dat hy betrokke was nie.

Kerry het ook verbaas gereageer op hoe onbeholpe die vermeende staatsgreep uitgevoer is.

Honderde soldate word in Ankara aangehou, onder wie die bevelvoerder wat spesifiek in beheer is van die beveiliging van Turkye se grens met Sirië, Irak en Iran.

Erdogan se Islamitiese ideologie is in stryd met die weermag, wat al meermale staatsgrepe gebruik het om moderne Turkye se sekulêre grondslag te beskerm.

Die Franse regering het gewaarsku dat die mislukte staatsgreep nie president Recep Tayyip Erdogan rede gee om van die opposisie ontslae te raak nie.

Die minister van buitelandse sake Jean-Marc Ayrault het aan die Franse media gesê daar moet binne die raamwerk van die wet opgetree word.

Vanoggend het die Turkse nuusagentskap gesê bykomende polisiebeamptes is na Istanbul ontplooi in die lig van Vrydag se mislukte staatsgreep.

Hulle patrolleer die strate en het opdrag gekry om enige helikopter af te skiet wat oor die stad vlieg.

Die Turkse president oorweeg tans om die doodstraf weer in te stel.

Suid-Soedan: Oliekonflik woed

Minstens 150 soldate van Suid-Soedan is dood in hernude gevegte tussen die weermag en die voormalige rebelle wat lojaal aan visepresident Riek Machar is.

Hewige gevegte het Maandag in Suid-Soedan se hoofstad, Juba, gewoed ondanks internasionale beroepe tot kalmte nadat dodelike skermutselinge duisende mense op die vlug laat slaan het.

Die jong land se wankelrige vredes­ooreenkoms is opnuut in die gedrang.

Die Verenigde Nasies (VN) het diepe kommer uitgespreek oor die geweldpleging wat tot die dood van honderde mense gelei het en nou dreig om die land opnuut in ’n burgeroorlog te dompel.

Tenks en gewapende helikopters is ontplooi en artillerievuur is in verskeie dele van die hoofstad gehoor.

Inwoners het hulle in hul huise toegesluit en die Amerikaanse ambassade het gewaarsku oor die “hewige gevegte tussen magte van die regering en die opposisie”.

Die VN se veiligheidsraad het Sondag geëis dat pres. Salva Kiir en sy visepresident, Riek Machar, “hul uiterste bes moet doen om hul onderskeie magte te beheer, die gevegte te beëindig en die verspreiding van geweldpleging te voorkom”.

’n Beroep is op hulle gedoen om hulle “opreg tot die volle en onmiddellike implementering van die vredesooreenkoms te verbind, wat ’n permanente skietstilstandsooreenkoms en die herontplooiing van militêre magte uit Juba insluit”.

Soldate lojaal aan Kiir en voormalige rebelle wat Machar steun, het mekaar Sondag met tenks, bewapende helikopters, mortiere en vuurpylaangedrewe granate aangeval.

Die botsings, die eerste tussen die weermag en voormalige rebelle sedert Machar in April na Juba teruggekeer het om as visepresident ingehuldig te word, het Vrydag begin toe 150 soldate in ’n kortstondige, maar bloedige geveg dood is. Die plaaslike media berig dat die dodetal so hoog soos 270 kan wees. Dit is nie duidelik hoeveel mense Sondag, die dag ná die vyfde herdenking van onafhanklikwording, dood is nie.

Juba se lughawe is gesluit en Amerika het opdrag gegee dat alle nie-noodsaaklike Amerikaanse personeel die land moet verlaat.

Suid-Soedan, wat onafhanklikheid in 2011 verkry het, is jongste land ter wêreld. Nogtans het ‘n burgeroorlog in 2013 tussen faksies uitgebreek.

Die skuld vir die verbrokkeling in betrekkinge tussen die twee partye kan byna geheel en al op olie gepak word.

Alhoewel Suid-Soedan 75 persent van Soedan se olie-reserwes ingepalm het na onafhanklikheid en die derde grootste olie-reserwes in sub-Sahara-Afrika bevat, is die meeste pyplyne steeds onder beheer van die noorde.

Volgens Washington, is Amerika is die grootste enkele hulpskenker aan Suid-Soedan.

Die ander land met ‘n groot belangstelling in Suid-Soedan is China, wat ook vredesmagte gestuur as die grootste rolspeler in Soedan se olie-industrie.

Soeke na bewyse oor dood van Mississippi-aktiviste gestaak

Meer as ‘n halfeeu ná die dood van pro-swart aktiviste in Mississippi, waarop die rolprent, Mississippi Burning gegrond is, is die soeke na bewyse gestaak om meer mense te vervolg.

Maar die heksejag teen die vermeende daders van die 1964 “Freedom Summer”-moorde van drie pro-swart aktiviste in Mississippi se Neshoba-distrik meer as ’n halfeeu ná hul dood, duur voort.

Sommige inwoners van Mississippi en die slagoffers se naasbestaandes sê hulle sal nie rus voor die skuldiges aan die kaak gestel is nie.

Mississippi se prokureur-generaal, Jim Hood, het verlede week gesê daar is geen manier om verdere getuienis in te samel om die oorblywende verdagtes in die dood van James Chaney, Andrew Goodman en Michael Schwerner aan te keer nie.

Die drie mans, skaars uit hul tienerjare, is op 21 Junie 1964 glo deur lede van die Ku Klux Klan om die lewe gebring. Die verdagtes is nou bejaarde mans.

Diegene wat die verdagtes geken het, is ook bejaard. Vir jonger inwoners van Mississippi is hul enigste herinnering aan die gebeure die 1988-rolprent, Mississippi Burning.

Familielede van Chaney, Goodman en Schwerner, en ander inwoners van die staat sê die soeke na geregtigheid om maatskaplike genesing te bring, is nog nie verby nie.

Chaney, Goodman en Schwerner het verdwyn nadat hulle die Neshoba-distrik besoek het om ondersoek in te stel na die afbrand van die Mt. Zion United Metodiste kerk.

Die drie mans, twee Joods en een swart, se oorskot is weke later in ’n gronddam aangetref. Ná ’n ondersoek deur die Federale Speurdiens is agt mense in 1967 skuldig bevind aan die skending van federale menseregte wat met die moorde verband gehou het.

Die finale vervolging het in 2005 begin toe Hood en die Neshoba-distrik se prokureur met welslae drie klagte van menseslagting teen ene Edgar Ray Killen, aanhangig gemaak het.

Hy dien steeds gevangenisstraf uit. Mississippi het tans honderde verkose swart leiers. Desnieteenstaande bly die bevolking, wat rasse betref, gepolariseer.

Michelle Obama se laaste Afrika-vakansie

Die gade van die Amerikaanse president, Michelle Obama, het die week op ’n besoek aan Afrika vertrek.

Sy word van haar dogters, Sasha en Malia, en haar ma vergesel as deel van haar pogings om onderwys vir meisies te bevorder.

Sy besoek Morokko en Liberië en beoog om die kollig te laat val op die “laat meisies leer”-inisiatief van die Amerikaanse regering wat in 2015 deur pres. Barack Obama en die eerste dame van stapel gestuur is.

Die projek vorm deel van Amerika se poging om die struikelblokke uit die weg te ruim wat meer as 62 miljoen meisies wêreldwyd, in die besonder tienerjariges, in die gesig staar om toegang tot onderwys te kry, het ’n woordvoerder van haar kantoor gesê.

Michelle Obama word deur die wit aktrise Meryl Streep na Marokko ver­gesel (foto hierbo), waar hulle met jong meisies oor “uitdagings” sal praat.

In Liberië sal sy ’n opleiding­sentrum vir lede van die Amerikaanse vredeskorps besoek asook by ‘n skool aandoen saam met Liberië se pres. Ellen Johnson Sirleaf,­ Afrika se eerste verkose vroulike staatshoof en Nobelprys vir vrede-wenner.

Ryk Hillary kry Donald nie afgeskud nie

Luidens ‘n nuwe verslag wat deur die Amerikaanse Federale Verkiesingskommissie bekendgemaak is, het Hillary byna 10 meer hulpbronne om die presidentsverkiesing aan te pak.

Die kommissie toon aan dat die Demokratiese party se waarskynlike presidentskandidaat Clinton, bykans nege keer meer geld en tien keer meer personeel beskikbaar het vir haar verkiesingsveldtog as haar Republikeinse teenstander, Donald Trump.

Die Trump-veldtog het na bewering aan die einde van Mei net meer as drie miljoen dollar in die bank gehad teenoor Clinton se 26 miljoen dollar.

Trump, wat ‘n sakeman is, het vir ‘n geruime tyd sy eie veldtog gefinansier.

Bernie Sanders, wat die knie moes buig voor Clinton, het $9 miljoen in die bank oor.

Trump het tans minder geld as die veldtogte van Ted Cruz en Ben Carson, wat albei in die vorige maande uit die wedloop moes tree.

Ten spyte van dié geweldige voorsprong kan Clinton dit skynbaar nie regkry om Trump af te skud nie.

Clinton is effens voor Trump in Florida met 8 persentasiepunte, maar die twee is feitlik kop-aan-kop in Pennsylvania en in Ohio, volgens ‘n Quinnipiac-meningspeiling wat Dinsdag vrygestel is.

Clinton is voor Trump met 47% teen 39% in Florida, terwyl albei 40 persent stemme in Ohio trek en sy ‘n klein voorsprong van 42-41 persent in Pennsylvania kon behaal.

Die peiling fokus op die drie belangrikste slagveldstate, omdat geen kandidaat sedert 1960 die presidensiële wedloop gewen het sonder om ten minste twee van die drie deelstate in te palm nie.