Kategorie: Internasionale nuus

Nuus oor die wêreld buite Suider-Afrika

Trump, Hillary fokus op terreur, immigrasie na oorwinnings

Donald J. Trump en Hillary Clinton het hul teenstanders in die Arizonavoorverkiesing Dinsdag oorweldig, volgens die Associated Press.

Die twee presidensiële voorlopers hoop om te verhoed dat die nominasiestryd ingewikkeld raak sodat hulle op mekaar kan begin konsentreer.

Dit blyk dat een van die belangrikste verkiesingskwessies sal handel oor immigrasie.

Trump, die Republikeinse presidensiële voorloper, het Dinsdag gesê as hy president word, sal hy die grense van die land sluit in die nasleep van gekoördineerde terreuraanvalle soos in België.

Hy het getwiet dat ten minste tussen 10% en 25% van Moslems terreuraanvalle steun en bygevoeg dat Moslemimmigrasie “selfmoord” is.

Clinton het egter dadelik teruggekap. “Dit is onrealisties om te sê dat ons ons grense heeltemal vir almal gaan sluit,” het Clinton tydens ‘n onderhoud op NBC gesê.

Sy het haar opmerkings aan die terreuraanval in Brussel gewy en dit in ‘n aanval op Trump, die voorste Republikeinse aanspraakmaker, verander.

“Die laaste ding wat ons nodig het, my vriende, is leiers wat meer vrees aanhits,” het Clinton gesê met verwysing na Trump.

“In die gesig van terreur, moet Amerika nie paniekerig te raak nie. Ons moet nie mure bou of ons rug draai op ons [Moslem]bondgenote nie.”

Trump het Ted Cruz maklik verslaan in Arizona, en al 58 van sy afgevaardigdes tot sy voorsprong gevoeg.

Maar Cruz sal waarskynlik Utah se Republikeine oorreed in die hoop dat die 40 afgevaardigdes Trump se kieswinste beperk.

Cruz het Trump probeer verantwoordelik hou vir die terreur in Brussel en uitgevaar teen die voorloper omdat hy NAVO se uitgawes in Europa wil besnoei.

Senator Bernie Sanders het Clinton in die Utah-koukusse verslaan, en hy toon sy blywende appèl onder liberale aktiviste.

Clinton het ondersteuners in Seattle toegespreek maar Sanders botweg geïgnoreer.

‘Geen Suid-Afrikaners in Brusselse aanvalle dood nie’

Nelson Kgwete, die woordvoerder van die die departement van Internasionale Betrekkinge, sê hulle is nie bewus van enige Suid-Afrikaners wat in die terreuraanvalle in Brussel omgekom het nie.

Die Afrika Unie Kommissie het die aanvalle in die Belgiese hoofstad veroordeel.

Die voorsitter van die Kommissie, Nkosazana Dlamini-Zuma, het haar medelye uitgespreek met die families wat geraak is deur die aanvalle.

Dlamini-Zuma sê die AU verwerp terrorisme en gewelddadige ekstremisme. Sy sê die AU sal met die internasionale gemeenskap saamwerk om terrorisme te bekamp.

Plaaslike en internasionale reise in België is steeds opgeskort en veiligheid regoor Europa is na die aanvalle opgeskerp.

‘n Vlag van ISIS en ‘n bom is gevind by ‘n huis in Brussel tydens ‘n soektog deur die Belgiese polisie in verband met Dinsdagoggend se aanvalle, het aanklaers gesê.

Die ploftoestel met spykers is by ‘n huis in die Schaerbeek-munisipaliteit gekry, het Belgiese aanklaers gesê.

Chemikalieë is ook gevind tydens die soektog.

Klopjagte word gedoen regoor die land in die nasleep van die terreuraanvalle, het die Belgiese federale aanklaer Frederic Van Leeuw aangekondig op ‘n perskonferensie.

‘n Moontlike verband tussen die Brusselaanvalle en die aanvalle in Parys word nog ondersoek.

Minstens 30 mense is dood toe selfmoordbomdraers by die Brussel-lughawe en die Maelbeek-moltreinstasie toegeslaan het. Bykans 200 mense is beseer, waaronder ook kinders.

Ploftoestelle, wat nie afgegaan het nie, is ook by die lughawe gevind. Alle lug- en spoorverkeer na en van Brussel is opgeskort.

Alle vlugte is gekanselleer en Brussel se lughawe sal minstens vir nog `n dag gesluit bly.

Eurostar het alle treindienste na en van die Belgiese hoofstad gekanselleer. Sekuriteit is ook in Brittanje by die Gatwick- en Heathrow-lughawens opgeskerp.

Die Nederlandse polisie het waarskuwingskote by Amsterdam se hoofstasie afgevuur toe drie verdagtes in hegtenis geneem is.

`n Polisie-woordvoerder sê die voorval het te doen gehad met dwelmmiddels, maar het plaasgevind nadat sekuriteit by Europese lughawens en stasies opgeskerp is weens die terreuraanvalle in België.

Belgiese polisie stel foto van Parysverdagte vry

‘n Foto wat Maandag deur die Belgiese federale polisie beskikbaar gestel is, toon die verdagte, Najim Laachraoui, wat glo met die onlangse aanvalle in België verbind kan word.

Belgiese aanklaers het ’n beroep die publiek gedoen om enige inligting aangaande Laachraoui aan wetstoepassers te oorhandig.

Daar word vermoed dat hy een van die topverdagtes in die Parys-aanvalle was en in 2015 na Hongarye gereis het.

Hy het in 2013 na Sirië gereis.

Veiligheidswagte by die Oostenryks-Hongaarse grens het Laachraoui opgemerk wat in ’n Mercedes saam met Salah Abdesalam en nog ’n ander persoon gereis het.

Abdesalam is vyf dae gelede deur die Belgiese owerhede in hegtenis geneem.

Daar word voorts vermoed dat die inhegtenisname van Abdesalam gelei het tot die jongste terreuraanvalle in Brussel.

Aanval in Mali op EU militêre sending

Gewapende mans het Maan­dagaand ’n hotel in Mali se hoofstad, Bamako, bestorm, waar die Europese Unie (EU) se militêre opleidingsending tuis is. Een persoon is in die aanval dood.

Die gewapendes het die hotel omstreeks 18:30 aangeval waarna hulle onder geweervuur van veiligheidswagte ontsnap het.

“Vier mense het probeer om hul weg te baan deur ’n barrikade terwyl hulle geskiet het,” het ’n lid verbonde aan die EU-opleidingsending in Mali (EUTM) gesê.

“Een van die vier is geneutra­liseer, ons soek nog na drie ander,” het hy aan AFP gesê.

Die polisie het ’n foto van die dooie aanvaller aan AFP gewys. Hy het ’n denim-broek aangehad en in ’n poel van sy eie bloed gelê.

’n Malinese veiligheidsbron sê troepe is op soek na ’n vermeende selfmoordbomaanvaller wat vermoedelik in die omgewing van die EUTM se hoofkwartier is.

Die minister van binnelandse veiligheid, Salif Traore, het gesê twee verdagtes is aangekeer en veiligheidsmagte is besig om die gebied te beveilig in dieselfde woonbuurt waar die Radisson Blu hotel geleë is.

Dit is daar waar 20 mense deur djihadiste in ­November vermoor is.

Veiligheidsmagte het ook die sak wat die dooie aanvaller by hom gehad het, deursoek omdat vermoed is dat dit moontlik plofstof kon bevat.

EUTM werk om Mali se weermag se vermoë te verbeter om djihadiste die stryd aan te sê. Die EU-sending benut die kundigheid van personeel uit 25 lande met meer as 600 personeel wat in Mali gesta­sioneer is.

Magte van Frankryk en die Verenigde Nasies probeer die weermag ondersteun, maar die ekstremiste gebruik voortdurend nuwe tegnieke om terreur te laat posvat nadat hulle in 2013 deur ’n Frans-geleide koalisie uit sleutel noordelike dorpe verdryf is.

Die noorde van Mali het in 2012 in die hande van ’n djihadistiese groep met bande met Al-Kaïda geval, en die regering was nie in staat om veiligheid met plaaslike magte te handhaaf nie.

Sedert hulle uit die noorde van Mali verdryf is, het die djihadiste sporadiese aanvalle op die land se weermag en VN-vredesbewaarders uitgevoer. Dosyne mense is in die aanvalle dood.

Meer onlangs het hulle gewilde burgerlike teikens gekies vir hul aanvalle. Al-Kaïda in die Islamitiese Maghreb (AQIM) het aanspreeklikheid vir drie onlangse aanvalle in Wes-Afrika aanvaar.

Dit sluit ’n aanval op ’n strandoord verlede maand in die Ivoorkus en nog ’n ander aanval in Januarie in Burkina Faso, asook die aanval op die Radisson Blu-hotel in Bamako in November 2015 in.

Die polisie in die Ivoorkus het intussen 15 mense in hegtenis geneem in verband met die aanval vroeër die maand by `n vakansieoord waarin 19 mense dood is.

Die polisie soek nog na die leier van die aanvallers. Die Ivoriaanse staatsaanklaer sê sy naam is Kounta Dallah.

Gewapende mans het op 13 Maart die oord by Grand Bassam aangeval. Ses aanvallers is doodgeskiet.

Volgens die staatsaanklaer is die verdagtes aangekeer op grond van inligting wat op die toneel gevind is.

België vrees nog terreuraanvalle

Belgiese owerhede vrees nog terroriste-aanvalle nadat bomontploffings die lughawe en moltreinstelsel vanoggend geruk het en hulle op ‘n selfmoordbomgordel afgekom het wat nie ontplof het nie.

Ten minste 34 mense is dood en 170 beseer na gekoördineerde bomaanvalle op die belangrikste lughawe en die moltreinstelsel in die hartjie van Brussel.

Die aanvalle, wat veroordeel is as “blind, gewelddadig en lafhartig” deur die linkse Belgiese eerste minister Charles Michel, kom na inhegtenisneming van die terreurmeesterbrein Salah Abdesalam.

Abdesalam word verbind met November se gekoördineerde terreuraanvalle in Parys wat in die berugte Molenbeekvoorstad van Brussel beplan is.

In reaksie op die aanvalle, het die Franse premier Manuel Valls gesê: “Ons is in ‘n oorlog. In Europa is ons onderwerp aan die wette van ‘n oorlog reeds al vir ‘n paar maande.”

Die Belgiese minister van buitelandse sake Didier Reynders het gewaarsku: “Ons vrees dat dié mense steeds op vrye voet verkeer.”

Die ontploffing in die moltreinstasie was naby die Europese Uniegebou en die Amerikaanse ambassade ongeveer ‘n uur later, nadat die lughawe Zaventem geteiken is.

Die Vlaamse uitsaaier VTM berig dat ‘n plofstoftoestel aan ‘n gordel later gevind is deur die polisie by die lughawe. En RTBF berig dat ‘n outomatiese Kalasjnikov-geweer in die vertreksaal gekry is.

Nóg ‘n bom ruk metrostasie in Brussel

Net na 9:00 het ‘n ontploffing die Maelbeek-metrostasie in die middestad van Brussel geskud, nie ver van die gebied wat die meeste van kerninstellings van die Europese Unie huisves nie, volgens die Belgiese uitsaaier RTBF.

Die EU-administrasie in Brussel het alle afsprake gekanselleer.

Die jongste aanval kom net ‘n uur na die verwoestende aanval op die lughawe in Brussel en het die lewens van ten minste 13 mense geëis.

Die Brusselse vervoerowerheid het op Twitter gesê dat alle metrovervoer nou gesluit is.

“Vir die oomblik, weet ons dat daar ten minste een, moontlik twee ontploffings was. Ons ondersoek nog,” het Sandra Eyschen, ‘n woordvoerder vir die Belgiese federale polisie verklaar.

“Daar is ‘n hele paar beseer, ons het nog nie presiese getalle nie, en ongelukkig, blyk dit dat daar ‘n paar sterftes was.”

België het haastig sy bedreigingstatus tot die maksimumvlak aangepas, het die Associated Press berig, met verwysing na die minister van Binnelandse Sake, Jan Jambon.

Na die ontploffings by die Zaventemlughawe vanoggend na 8:00 wat die lewens van elf mense geëis het, is die status eers na oranje gestel.

Die paaie na die lughawe is gesluit, en treindiens daar is opgeskort. Die lughaweowerhede het ‘n boodskap op Twitter gepos wat mense waarsku om weg te bly.

Maandag het die Belgiese owerhede gevra vir die publiek se hulp om Najim Dachraoui, 24, ‘n medepligtige van die Parysverdagte Abdeslam, op te spoor.

Die owerhede is ook op soek na Mohamed Abrini, 31, wat verfilm is saam met Abdeslam by ‘n vulstasie op ‘n snelweg na Parys twee dae voor die 13 November-aanvalle.

Twee ontploffings ruk Brussel se lughawe

Elf mense is na bewering dood en dosyne gewond nadat twee ontploffings die lughawe Zaventem in Brussel geruk het.

Geen vliegtuie land tans op Brussels nie en vliegtuie word herlei na Antwerpen. Vliegtuie wat steeds wag om te land, draai tans oor die stad Luik.

Verslae dat een van die ontploffings plaasgevind het naby American Airlines se inboektoonbank, is ontvang.

‘n Regeringsbron het aan VRT bevestig dat daar ‘n bomaanval was, terwyl Anke Fransen, woordvoerder vir die lughawe in Brussel, bevestig het dat daar verskeie beserings is.

“Ons kan bevestig dat daar twee ontploffings in die vertreksaal was. Ons het die nooddienste gebel op die grond. Hulle pas tans noodhulp op van die beseerdes toe.”

Ander ploftoestelle is by die lughawe ontdek, het ‘n RTBF-korrespondent Laurent Henrard aan brandbestryders gesê.

Spoorverkeer na die lughawe is opgeskort, berig Reuters.

Belgiese media het ook berig daar is ‘n paar beseerdes in die lughawe se vertreksaal en spoorverkeer na die lughawe is opgeskort.

Dié aanslag kom nadat die hoofverdagte van die terreuraanvalle in die Franse hoofstad Parys op 13 November 2015, erken het dat die Islamitiese Staat ‘n sportsta­dion wou opblaas, maar van plan verander het.

Salah Abdeslam het Saterdag aan Belgiese speurders die bekentenis gemaak ‘n dag nadat hy in die been geskiet en in hegtenis geneem is tydens ’n klopjag in Brussel.

Sy inhegtenisname het einde gebring het aan ’n vier maande lange mensejag.

Abdeslam se regsverteenwoordiger het gesê het Abdeslam beplan regstappe teen die Franse staatsaanklaer François Molins, omdat hy die vertroulikheid van die ondersoek geskend het.

Hy het aan die Belgiese uitsaaier RTBF gesê Molins se opmerkings op ’n mediakonferensie was “ ’n skending . . . ek kan dit nie onuitgedaag laat nie”.

Abdeslam sal uitlewering aan Frankryk teenstaan. Regskenners het gesê dit sal waarskynlik onsuksesvol wees, maar sal hom etlike weke gee om sy verdediging voor te berei.

Abdeslam en ’n man wat saam met hom in hegtenis geneem is, word van “deelname aan terreurmoorde” aangekla.

Flydubai-ongeluk kon weens uitputting gebeur het

Die Boeing 737-800 van Flydubai wat dié naweek digby die Russiese stad Rostof neergestort het, se vlugopnemers is só beskadig dat dit glo weke sal neem om inligting daarop te ontsluit.

Maar Russiese owerhede het reeds die swart vlugopnemers opgespoor, het ‘n woordvoerder van die IAC-vlugowerheid, wat ‘n ondersoek na die ongeluk begin het, aan Reuters bevestig.

Die vliegtuig het vroeg Saterdagoggend neergestort na ‘n mislukte landing en die 62 mense aan boord het omgekom.

Die Russiese minister van vervoer, Maxim Sokolov, het blomme op die toneel geplaas waar kerse gebrand het en foto’s van die gestorwenes neergesit is.

‘n Tegniese probleem met die vliegtuig kon die ongeluk veroorsaak het, maar klaarblyklik was die personeel oorwerk.

Intussen het ‘n voormalige Flydubai kaptein aan die media gesê dat vlieëniers gedwing word om te werk terwyl uitgeput is, ten spyte van klagtes.

In gesprekke met RT in Doha, die voormalige vlieënier op voorwaarde van anonomiteit gesê Flydubai se topbestuur was bewus van die probleem, maar het niks gedoen om dit op te los nie.

Die vliegtuig het neergestort toe die vlieënier ’n tweede keer probeer land het.

Dié lughawe in die suide van Rusland het intussen weer vir lugverkeer heropen nadat dit vir twee dae gesluit was. “Die lughawe is weer ten volle operasioneel,” het ‘n lughawe-woordvoerder aan AFP gesê.

Noodwerkers het die ramptoneel, bedek onder ’n laag sneeu, Mandag gefynkam terwyl die kwik tot -5 °C gedaal het.

Flydubai sal die gesinne van die rampslagoffers vergoed met ongeveer R300 000 per passasier wat uitbetaal sal word, luidens ‘n verklaring.

Kubabesoek: ‘Moffie’ Obama se slap gewrig maak op- en trefslae

President Barack Obama se besoek aan Kuba word oorskadu deur sy slap gewrig aan die einde van sy mediakonferensie met president Raúl Castro wat sy hand in die lug probeer hou soos wat Mandela destyds met De Klerk gemaak het. Dit lyk egter asof die Amerikaanse president onwillig is dat sy Kubaanse eweknie hom byna letterlik soos ‘n marionet voor die kameras behandel en hy hou sy gewrig slap.

Die beeld wat via Vine miljoene kere op Twitter getwiet en hertwiet is, skep ook volgens sommige die indruk dat Obama “gay” is en dat hy deur ‘n meer manlike Castro gehiet en gebied word.

Castro het ook ‘n vraag van ‘n Amerikaanse joernalis oor “politieke gevangenes” in Kuba, wat in Spaans vir hom getolk is, minagtend beantwoord deur vir ‘n lys name van sulke gevangenes te vra. “As daar politieke politieke gevangenes in Kuba is, sal hulle voor vanaand nog vrygelaat word,” het hy uitdagend gesê.

Verder het Castro die teruggee van Guantanamo-baai aan Kuba deur Amerika geëis. ‘n Amerikaanse vlootbasis wat tans op die eiland gehuisves. Hy het die stand van menseregte in Amerika gekritiseer deur te sê dat daar nie gratis gesondheidsorg en hoër onderwys vir almal in die VSA is nie, anders as in Kuba.

Obama op die Rewolusieplein waar hy hulde aan José Marti bring, met Ché Guevara se muurskildery in die agtergrond
Obama op die Rewolusieplein waar hy hulde aan José Marti bring, met Ché Guevara se muurskildery in die agtergrond

In antwoord het Obama gesê: “Maar die Verenigde State erken die vooruitgang wat Kuba as ‘n nasie gemaak het, sy enorme prestasies in opvoeding en gesondheidsorg. En miskien belangriker, ek het bevestig dat Kuba se lot nie deur die Verenigde State of enige ander nasie bepaal sal word nie. Kuba is soewerein en beskik tereg oor enorme trots. En die toekoms van Kuba sal deur Kubane bepaal word, nie deur enigiemand anders nie.”

Raúl Castro is die broer van die vorige Kubaanse president, Fidel, wat jare lank die kommunistiese Karibbiese eilandstaat regeer het. Obama het insgelyks vir foto’s geposeer voor ‘n muurskildery van die revolusionêre guerillastryder, Ché Guevara.

Dit was die eerste keer in 90 jaar dat ‘n Amerikaanse president ‘n amptelike staatsbesoek aan Kuba gebring het. Daar heers egter steeds ekonomiese sanksies van die VSA teen Kuba. Obama en die Demokratiese Party in die VSA wil graag die sanksies opgehef sien, maar die Kongres word tans deur die Republikeine beheer wat daarteen gekant is.

Hier is die gewraakte video waarin Raúl Castro poog om Obama ‘n Mandelavuis te laat maak, maar nie daarin slaag nie.

Ebola tref Guinee weer

Gesondheidsowerhede in Guinee sê hulle het honderde mense opgespoor wat dalk in kontak met die Ebola-virus was.

Dit volg na ‘n reeks nuwe gevalle wat tot die dood van vier mense gelei het. Guinee se Ebola-eenheid sê 818 mense van 107 families is sedert Saterdag geïdentifiseer.

Die wêreld se ergste Ebola-uitbreking in die geskiedenis het na bewering in Guinee begin.

Die dorpenaars sal onder kwarantyn gehou word in hul huise vir 21 dae, waarna hulle sal vrygelaat word indien hulle nie simptome ontwikkel het nie.

Verlede jaar is ongeveer 2500 mense daar aan aktiewe oordrag oorlede in die land voordat aangekondig is dat die epidemie onder beheer is.

Meer as 28.600 mense is besmet en 11.300 is dood aan Ebola, byna almal van hulle in Guinee, Liberië en Sierra Leone sedert die epidemie in Desember 2013 begin het.

Die Wêreldgesondheidsorganisasie het verklaar dat aktiewe oordrag van die virus in Desember verlede jaar nie meer plaasgevind het nie.

Trump se adviseur is pro-Russies

Volgens Reuters word Donald Trump geadviseer deur genl. Michael T. Flynn, voormalige direkteur van die DIA.

Trump, die voorloperkandidaat, word in sy sieninge oor internasionale politiek deur Flynn bygestaan.

Die sakeman se uitsprake, waarvan talle getuig van realisme oor buitelandse beleid en immigrasie, is deel van sy gewildheid.

Hy beskryf president Poetin onder meer as ‘n “baie gerespekteerde man”, een van sy tallige pittige stellings.

In 2012, het Flynn teen die voorstel van die Withuis om die Daesh-kaart in Irak en Sirië te speel, te velde getrek.

Hy is skielik in Augustus, 2014 tot aftrede gedwing.

Op 10 Desember 2015, het hy deelgeneem aan die sy van President Poetin, tydens die viering van die herdenking van die nuuskanaal Russia Today.

Hillary op pad na die wenpaal

Hillary Clinton is heelwat nader daaraan om die Demokratiese Party se kandidaat in die presidentsverkiesing te word, met Bernie Sanders wat sukkel om by te bly.

Clinton het haar teenstander, Bernie Sanders, in al die deelstate waar gestem is – Florida, Noord-Carolina, Ohio, Illinois en Missouri – verslaan.

Sanders se kanse om Clinton se voorsprong met haar lang lys afgevaardigdes in te haal, lyk straks onmoontlik.

“Ons beweeg nader daaraan om die Demokratiese Party se benoeming te verseker en die verkiesing in November te wen,” het Clinton na afloop van die uitslae se bekendmaking verklaar.

Donald Trump se veldtog het nuwe momentum gekry.

Trump het Woensdag sleuteloorwinnings behaal in Illinois, Noord-Carolina en Florida

Die plaaslike senator Marco ­Rubio, het dadelik sy verkiesingsveldtog beëindig na sy swak vertoning.

Nadat bykans al die stemme getel is, het dit geblyk die 69-jarige Trump sou Missouri ook wen, maar hy het nie ’n volstrekte meerderheid in die belangrike kiesafdeling van Ohio nie.

John Kasich het in Ohio, sy tuisstaat, gewen.

Trump het mede-Republikeine Woensdag van ernstige gevolge gewaarsku indien hulle poog om ‘n bemiddelde konvensie te organiseer as hy nie ‘n volstrekte meerderheid kry nie

“Ek dink jy sal onluste hê. Ek dink jy sal onluste hê,” het Trump Woensdag op CNN opgemerk. “Ek verteenwoordig ‘n geweldige klomp, baie miljoene mense.”

Kasich se oorwinning het Trump, die party se voorloper, van sy 66 afgevaardigdes ontneem.

Dit maak dit moeiliker vir die miljardêr om die 1237 afgevaardigdes wat hy nodig het sonder ‘n vloerstryd, te kry.

Duitsland sluit diplomatieke missie in Turkye

Duitse diplomatieke missies en ‘n skool in Turkye het Donderdag gesluit na ‘n terreurdreigement, het die ministerie van buitelandse sake aangekondig, minder as ‘n week na ‘n selfmoordmotorbomaanval in die Turkse hoofstad.

Die ministerie van buitelandse sake het gesê die sluiting is ‘n “voorsorgmaatreël” en ‘n beroep op alle Duitsers tans in Turkye gedoen om besonder versigtig te wees wanneer in die openbaar.

Die e-pos aan Duitse burgers beskryf ‘n “terreurdreigement wat nie bo alle twyfel geverifieer kon word nie.”

Verlede Januarie is 12 Duitse toeriste dood in ‘n selfmoordbomaanval deur die Islamitiese staat in die hart van Istanbul se toeristedistrik.

Dit laat ernstige vrae oor die bomontploffing in die Duitse hoofstad Dinsdag waarin die bestuurder van ’n motor dood is.

Die oorledene is ‘n 43-jarige Turkse man, Mesut T. Hy was alleen in die voertuig.

Die gebied rondom die Deutsche Oper U-Bahn stasie waar die motor ontplof het, is daarna afgesper en die polisie het inwoners gemaan om nie naby die motor te kom nie nie en binnenshuis te bly.

Ooggetuies het aan Tagesspiegel gesê dat die bestuurder aanvanklik daarin geslaag het om te ontsnap uit die motor, maar hy het kort daarna ineengestort as gevolg van sy ernstige beserings.

Pogings van die nooddienste om hom by te bring was tevergeefs. Op 08:40 is sy dood aangekondig. Niemand anders is beseer in die voorval nie.

Die gedeelte van Bismarckstraat in Berlyn is dadelik afgekordon nadat die voertuig omstreeks 08:00 ontplof het.

Alhoewel Martin Steltner, ‘n woordvoerder van die Berlynse staatsaanklaers, gesê het dit was nie ‘n terreuraanslag nie, is daar nogtans kommer dat die Turkse burger wat bande met dwelmsindikate en ander georganiseerde misdaad gehad het, ook met terreur verbind kan word.

Xinhua berig hy was aan die polisie bekend weens dwelmhandel, vervalsing van geld en onwettige dobbelary.

Die Berlynse polisie het beeldmateriaal op Twitter gelaai waar die voertuig in die middel van die straat sigbaar is met sy deure oop en vensters uitgeruk.

Die motor het ontplof terwyl dit beweeg het. Daarna het dit ongeveer 100 m verder beweeg voordat dit teen ’n stilstaande motor tot stilstand gekom het, het die polisie gesê.

Dié aanslag kom te midde van Duitse voorstelle wat EU-leiers Vrydagoggend na verwagting aan Turkye sal voorlê oor die vlugtelingkrisis.

Dit behels ‘n meganisme om voorsiening te maak dat Griekeland duisende ongewenste vlugtelinge wat vanuit Turkye in die EU aanland, deporteer.

Maar omdat Turkye die Geneefse Konvensie oor vlugtelinge nie ten volle bekragtig het nie, sal Ankara eers sy eie wette moet verander voordat die uitsettings uitgevoer kan word.

Honderde duisende migrante gebruik Turkye as ‘n deurgangsroete na die vleispotte van die EU en Turkye gebruik die instroming as ‘n hefboom om geld van die EU te bedel.

Brittanje gaan glo nie in Libië ingryp nie

Brittanje het geen planne om die stuur van troepe na en lugaanvalle op Libië te verleng nie.

Die verklaring deur die ministerie van verdediging volg ná ’n komitee van wetmakers gesê het die land kan tot ’n 1000 troepe ontplooi.

Die laerhuis se komitee vir buitelandse sake het gesê Brittanje kan deel wees van ’n internasionale weermag bestaande uit 6 000 troepe in Libië wat onruste sedert die val van Moeammar Ghaddafi in 2011 hanteer.

Die verwagting was dat die minister van verdediging, mnr. Michael Fallon, vandeesweek tot Brittanje se bydrae tot die weermag by ’n konferensie in Europa sou instem, het die komitee gesê.

’n Woordvoerder van die regering het egter gesê die komitee vir buitelandse sake was “op verskeie punte verkeerd”.

“Daar is geen planne om die lugaanvalle op Libië te verleng nie en daar is geen planne om Britse troepe te stuur om sekuriteit aan troepe op die grond in Libië te verskaf nie,” het die woordvoerder gesê.

“Dit is daarom verkeerd om te impliseer die minister van verdediging gaan vandeesweek tot enige Britse bydrae instem.”

Britse premier David Cameron sou na verwagting by ‘n EU-beraad sy bereidwilligheid verklaar om militêr in te gryp in die ondersteuning van Libiese opkomende eenheidsregering.

Egipte se president Abdel Fattah el-Sisi het egter gewaarsku dat die Weste moet uitbly.

Cameron het die EU-leiers gewaarsku oor ‘n nuwe golf Libiese migrante na Europa in die somer nadat dit bekend geraak het dat ISIS uit Sirië na Libië vlug.

Woensdag, moes die Foreign Office toegee dat soldate nie ontplooi sal kan word sonder die goedkeuring van die parlement nie.