Kategorie: Internasionale nuus

Nuus oor die wêreld buite Suider-Afrika

Ban Ki-Moon soebat by Zuma oor Strafhof

Teenkanting teen die Internasionale Strafhof het duideliker geword tydens ‘n debat oor die Strafhof se jaarverslag wat in die Verenigde Nasies se Algemene Vergadering gelewer is.

Suid-Afrika het nie aan die debat deelgeneem nie. Die VN-sekretaris-generaal, Ban Ki-Moon het President Jacob Zuma die naweek in ‘n telefoniese gesprek probeer oorreed om die besluit te heroorweeg.

Talle Afrika-lande het hulle tydens die ope debat teen lande in Europa, Asië en Latyns-Amerika uitgespreek, maar ander het hul voortgesette steun toegesê aan die Strafhof.

Sommige lande het ook hul teleurstelling uitgespreek oor Suid-Afrika en ander lande se aankondiging dat hulle hul aan die Statuut van Rome gaan onttrek, terwyl die Strafhof Kenia en Burundi die skerpste veroordeel het.

Maar druk bou vir Afrika-state om die wêreld se enigste permanente oorlogstribunaal te verlaat, maar die hof sê hulle sal voortgaan.

“Selfs as die helfte van die Afrika-lande die hof verlaat, sou dit baie jammer en skadelik vir die konsep van internasionale reg wees, maar dit sal nie die einde van die hof wees nie,” het een IS amptenaar wat anoniem wou bly, aan Reuters nuusagentskap gesê.

“Dit is duidelik die IS nie regverdig is nie,” het die Keniaanse akstivis Ngujiri Wambugu in sy rubriek vir die Jamaica Observer geskryf en gevra waarom die voormalige Amerikaanse president George W. Bush en oud-Britse premier Tony Blair nog nie aangekla is vir die inval in Irak nie.

Uganda se president Yoweri Museveni het die hof beskryf as ‘n “klomp nuttelose mense” by sy inhuldiging in Julie, en is reeds besig om druk toe te pas om met die volgende AU-beraad in Januarie ‘n Afrika-uittog te bewerkstellig.

“Die IS verdien wat nou gebeur,” sê Okello Oryem, Uganda se junior minister van buitelandse sake.

Die mees kommerwekkende vir die IS, is bewerings van rassistiese vooroordeel en “neo-kolonialisme”. Byna elke Afrikaland het ingekoop by dié besware.

Brittanje se oorlogsonderrok hang ver uit

Rusland het NAVO se opbou aan sy grens gekritiseer en gesê dit sal geensins bydra om noordelike Europa veiliger te maak nie.

Die Britse sekretaris van Verdediging, Sir Michael Fallon het by NAVO se hoofkwartier in Brussel verklaar: “Dit is Brittanje wat NAVO wil versterk met die ekstra gerusstelling wat ons in staat is om aan te bied.

“Hoewel ons die Europese Unie verlaat het, sal ons baie meer doen om die oostelike en suidelike flanke van NAVO te help verseker.”

‘n MoD woordvoerder het bygevoeg: “Die Verenigde Koninkryk verhoog sy pakket van maatreëls om sy bondgenote in Europa te ondersteun, ten spyte van ‘n meer selfgeldende Rusland.”

Soveel as ses NAVO-lande is glo bereid om magte na die Swartsee-gebied te stuur in 2017, sê NAVO se sekretaris-generaal Jens Stoltenberg.

Hy het gesê Kanada, Duitsland, Nederland, Pole, Turkye, en die VSA het hul planne om eenhede te stuur na Roemenië vir ‘n versterking van NAVO in die Swartsee-gebied bevestig.

Sewentien NAVO-lidlande sal hul militêre magte aan die vier multinasionale bataljonne afstaan, wat die Noord-Atlantiese Verdrag sal ontplooi in Oos-Europa aan die begin van 2017.

Noorweë het Maandag aangekondig dat meer as 300 Amerikaanse seesoldate op ‘n rotasie-grondslag digby die Russiese grens gestasioneer sal word. Vanaf Januarie 2017 sal hulle met opleiding en maneuvers besig wees.

Die Amerikaanse soldate sal by die Vaernes-lughawe naby Trondheim ge­stasioneer wees.

Die aankondiging kom teen die agtergrond van Brittanje se insinking na Brexit. Die VK probeer tans om lewe te blaas in NAVO deur konflik met Rusland aan te blaas. Hulle gebruik die Oekraïne en Sirië as verskonings.

Al geniet Noorweë goeie betrekkinge met sy buurland Rusland, het die Noord-­Atlantiese Verdragsorganisasie bondgenote­ gevra om by te dra tot die grootste militêre opbou op Rusland se grense sedert die Koue Oorlog.

NAVO beplan ‘n uitgerekte stryd teen Moskou.

Frankryk, Denemarke, Italië en ander bondgenote sal na verwagting aansluit by die vier gevegsgroepe wat deur Amerika, Duitsland, Brittanje en Kanada gelei word en in Pole, Litaue, Estland en Letland ontplooi sal word.

Volgens Russiese bronne sal die NAVO-magte ook gekonsentreer word in die omgewing van Kaliningrad, ‘n Russiese enklawe tussen Pole en Litaue.

Nog ‘n bron het gesê Russiese skepe bewapen met Kalibr langafstandkruismissiele is na die enklawe gestuur. “Die vloot se potensiaal fokus en sal aansienlik uitgebrei word in die Noord-Europese militêre teater,” het die bron gesê aan Interfax.

Rusland is bewus daarvan dat NAVO hul energiebronne wil kaap en ‘n verskoning soek om dit te doen.

Daarbenewens raak die VSA se penarie in Sirië al hoe groter. NAVO het ook aangedring dat Rusland aanvalle op Sirië se Aleppo staak, het NAVO se sekretaris-generaal Stoltenberg Woensdag by sy aankoms die ministeriële vergadering van die alliansie gesê.

“Rusland het die reg om in internasionale waters te wees. […] Die ding wat anders is hierdie keer, is dat ons bekommerd is oor die moontlikheid dat die Kuznetsov gebruik kan word as ‘n platform vir meer aanvalle op Aleppo en Sirië, en sodoende die humanitêre katastrofe wat ons reeds sien in Aleppo en Sirië te vererger,” hy het gesê.

Die Obama-administrasie probeer hul “rebelle”, eintlik terroriste, in Sirië red nadat Rusland se skietstaking wat hulle die geleentheid gegee het om oor te gee, misluk het.

Twee kragtige aardbewings tref Italië

Twee kragtige aardbewings het sentraal-Italië twee ure uit mekaar getref.

Alhoewel honderde mense in Augustus in dieselfde gebied in ‘n aardbewing dood is, is daar nog geen verslae van ongevalle ontvang nie.

Albei die jongste aardbewings was oos van die stad Perugia. Die Amerikaanse Geologiese Instituut sê die eerste aardbewing was 5,5 en die tweede 6,1. Albei se episentrum was naby die dorpie Visso.

Volgens berigte is die dorp Ussita die ergste getref.

‘n Kragtige aardbewing het die dorp Amatrice in dieselfde streek in Augustus getref waartydens 300 mense dood en groot skade aangerig is. Amatrice is sowat 70 kilometer vanaf Visso.

Die twee sterk aardbewings in die sentrale deel van Italië Woensdagaand, het “apokaliptiese” skade veroorsaak volgens berigte.

Maar ‘n uur na die skuddings, was daar nog geen berigte van ernstige beserings of tekens van mense wat vasgevang word in puin nie, sê die hoof van Italië se burgerlike beskermingsagentskap, Fabrizio Curcio.

‘n Handjievol mense is behandel vir geringe beserings of angs by hospitale en ‘n 73-jarige man is dood aan ‘n hartaanval, moontlik veroorsaak deur skok weens die aardbewing, het plaaslike owerhede aan die ANSA-nuusagentskap gesê.

Al Sjabaab van AU-basis aan

‘n Selfmoordbomaanvaller van Al Sjabaab het met ‘n voertuig vol plofstof gister ‘n militêre basis van die Afrika-unie in sentraal Somalië binnegejaag.

Volgens veiligheidswoordvoerders is die ontploffing deur swaar geweervuur gevolg. Die voorval het by die Djiboetiese basis in die stad Beledweyne plaasgevind.

Al Sjabaab, met bande aan Al Kaïda, het via sy Radio Andalus mediaorganisasie, aanspreeklikheid vir die aanval aanvaar en sê “baie soldate is dood en beseer”.

Al Sjabaab veg om die internasionaal-erkende regering in Mogadisjoe omver te werp en val gereeld basisse van Amisom, die AU-sending in Somalië, aan.

In onlangse weke het Ethiopiese troepe wat in ‘n nabygeleë gebied ontplooi is, sonder enige verduideliking aan hul posisies onttrek. Ná die onttrekking het Al Sjabaab-vegters die dorpe opnuut beset.

Vier dood in Australiese pretpark-rit

Twee vrouens en twee mans is gister by ‘n vermaaklikheidspark aan Australië se gewilde Gold Coast dood.

Ooggetuies het beskryf hoe mense geskree het toe ‘n vaartuig op een van die waterritte omgeslaan het.

Queensland se polisie sê die vier slagoffers is op die “Thunder River Rapids”-rit by die Dreamworld park dood.

Australië se eerste minister, Malcolm Turnbull, het sy meegevoel aan hul families getuig en gesê hulle is in sy gebede oor die “baie, baie hartseer en tragiese gebeurtenis”.

Verhoor begin van Britse bankier oor grumoorde in Hongkong

Video’s wat ‘n Britse bankier gemaak het van die marteling en gewelddadige dood van twee Indonesiese vroue wat hy na bewering vermoor het, sal vir ‘n jurie vertoon word.

‘n Regter het Maandag in ‘n hof in Hongkong gelas dat die jurie daarna kyk nadat Rurik Jutting se verhoor begin het.

Jutting het vir Bank of ­America Corp gewerk.

Jutting (31), wat aan die Universiteit van Cambridge gestudeer en skoolgegaan het aan Winchester College, een van die prestige­rykste private skole in Brittanje,­ ontken skuld op klagte van moord op grond van verminderde aanspreeklikheid.

Hy beken skuld op klagte van manslag.

Hy is twee jaar gelede in hegtenis geneem nadat twee lyke in sy luukse woonstel gevind is.

Jutting het verskeie opnames van die moord gemaak. In een kan gesien word hoe die eerste slagoffer doodgemaak word en in ‘n ander praat hy oor sy planne vir die tweede slagoffer, lui die klagstaat.

Die polisie het die lyke van Sumarti Ningsih (23) en Seneng Mujiasih (26) in Oktober 2014 in sy woonstel gevind. Albei se kele was afgesny.

Lees verder.

Franse breek ‘Oerwoud’ af

Frankryk het gister begin om die sogenaamde “Oerwoud” migrante-kamp by die noordelike stad Calais te ontruim voordat dit opgebreek sal word.

Die migrante word nou na ontvangsentrums elders in Frankryk geneem.

Die kamp bestaan uit ‘n versameling tente en skuilings en staan op ‘n winderige moddervlakte naby Calais. Die kamp is ‘n trekpleister vir migrante wat probeer om die kanaal na Brittanje oor te steek.

Die 6 000 tot 8 000 inwoners van die kamp is hoofsaaklik Afgane, Irakese, Eritreërs en Soedanese.

Daar is gevrees dat geweld sou uitbreek oor die gedwonge verskuiwing, maar die eerste dag het glo ordelik verloop.

Die Franse owerhede is gretig om van die oogseer en kriminele nes ontslae te raak voor die verkiesing volgende jaar, maar die dorpies wat die uitlanders moet huisves is woedend en talle betogings teen die asielsoekers is reeds gehou.

Berigte van asielsoekers wat motoriste aanrand en hul motors kaap is reeds verskeie kere aangemeld.

Dodetal in Kameroen-treinramp styg

Die dodetal in verlede week se treinongeluk in Kameroen het tot 79 gestyg, het die staatsmedia in die land gister berig.

Owerhede in Kameroen is steeds besig om deur die wrakstukke na die oorskot van passasiers te soek.

Sondag is nog 11 liggame gehaal uit die puin van die passasierstrein wat ten tyde van die ongeluk met 1 400 mense volgepak was.

Die trein was tussen Kameroen se twee belangrikste stede, die hoofstad, Yaounde, en die sentraal-Afrikaland se hawestad, Douala, onderweg toe dit Vrydag naby die dorp Eseka ontspoor het.

Venezuela se referendum afgestel

Wetgewers in Venezuela is woedend oor ‘n besluit deur die verkiesingsowerhede om voorbereidings vir ‘n referendum te staak en sê daar is ‘n “aftakeling van grondwetlike orde” aan die orde van die dag.

Die aankondiging is tydens ‘n noodsitting oor die ekonomiese en politieke krisis in die olieryke Suid-Amerikaanse land gemaak. Die sitting is vir ‘n wyle in chaos gedompel toe ‘n groep van Maduro se ondersteuners verby veiligheidswagte gebars en die Nasionale Vergadering binnegestorm het. Die sitting is na 45 minute hervat.

Die wetgewers het ‘n beroep op inwoners van Venezuela gedoen om die grondwet “aktief te verdedig”.

“Die voortslepende staatsgreep wat in Venezuela aan die gang is, het daartoe gelei dat ons die geleentheid vir ‘n herroepingsreferendum ontneem is,” het die meerderheidsleier, Julio Borges, van die sentraal-regse opposisiekoalisie gesê.

Wetgewers wat die land se president Nicolas Maduro steun, het op hul beurt die opposisie daarvan beskuldig dat hulle ‘n staatsgreep beplan met die VSA wat daaragter sit.

Die hooggeregshof het die wetgewende meerderheid van minagting van die hof beskuldig nadat hulle, ondanks ‘n ondersoek na verkiesingsbedrog, onlangs drie wetgewers ingehuldig het.

Die opposisie sê die aantygings is vals en die hof is “Maduro se skoothondjie”.

Die hof het sedert die opposisie in Januarie van jaar beheer oorgeneem het, elke wetsontwerp afgeskiet wat in die Nasionale Vergadering aanvaar is.

Intussen het die Pous die land besoek om die krisis te bespreek. Sedert die olieprys gedaal het, sukkel die land ekonomies.

Hillary maak asof sy gewen het terwyl Trump voorloop

Volgens die jongste meningspeiling van IBD/TIPP loop die Amerikaanse presidensiële kandidaat, Donald Trump, voor.

Hy het die voortou geneem met 2 persentasiepunte teen die Demokratiese kandidaat, Hillary Clinton.

Volgens die peiling het Clinton se gewildheid onder belangrike kiesergroepe gedaal omdat sy opgehou het met stemwerwing en optree asof sy reeds gewen het.

Hillary is ver agter nadat talle vroue na vore gekom het en haar man van seksuele teistering en verkragting te beskuldig.

Meningspeilings wys dat Clinton nie meer voor gehore verskyn nie, en haar gedra asof sy reeds die verkiesing gewen het.

Trump het intussen geweier om te sê of hy die uitslag van die verkiesing op 8 November sal aanvaar. Hy het die verkiesingsproses vroeër as ‘n knoeiery bestempel.

WikiLeaks het reeds honderde gekraakde eposse van die Clinton-surrogate vrygestel wat op grootskaalse bedrog en korrupsie dui.

Die FBI het Vrydag ook dokumente vrygestel wat toon hoe ‘n skadu-regering Hillary beheer. Clinton se veldtoghoofkwartier is kort daarna Vrydagaand haastig ontruim nadat ‘n “wit stof in ‘n koevert” ontdek is, sê die polisie.

Dit klink na ‘n foefie om die aandag van die skokkende onthullings oor die Clintons se kriminele bedrywighede af te lei.

Die verdagte stof is by die veldtogkantoor in Manhattan in New York ontdek en is na Clinton se Brooklyn-hoofkwartier geneem wat die ontruiming van die 11de verdieping tot gevolg gehad het, sê ‘n woordvoerder van die New York-polisiedepartement.

Vier mense in totaal is aan die verdagte stof blootgestel, hoewel daar nog geen beserings of siekte aangemeld is nie, sê die polisie.

Die polisie is besig om die stof te toets en ondersoek die saak. Geen verdere besonderhede is nog beskikbaar nie.

VSA wil ISIS uit Mosoel dryf na Sirië

Irakse en Koerdiese magte sê hulle het sowat 20 dorpies om Mosoel beveilig in die eerste dag van optrede om die terreurgroep ISIS uit die stad te dryf.

Dié stap deur die VSA word gedoen in die hoop dat ISIS na Sirië sal uitwyk, maar hul beweegrede word nie openbaar gemaak nie.

Die jongste aanval op ISIS is ‘n berekende skuif vir pres. Barack Obama omdat die VSA die stryd in Sirië verloor het, maar Amerikaanse amptenare erken daar is geen tasbare plan vir die regering van die gebied rondom Mosoel sodra ISIS oorwin is nie.

Die Internasionale Organisasie vir Migrasie (IOM) sê hy kry die gasmaskers gereed omdat ISIS vantevore sulke wapens teen Irakse en Koerdiese magte gebruik het, maar die kanse daarvoor is skraal aangesien die terreurgroep Amerikaanse wapentuig gebruik.

Mosoel is Irak se tweede grootste stad en die grootste stedelike gebied wat deur militante van die Islamitiese Staat (ISIS) beset word.

Die val van Mosoel sal ‘n belangrike oorwinning teen die Soenni-­djihadiste in Irak wees, maar kan ook lei tot grondgrype tussen groepe wat in ‘n stryd teen mekaar gewikkel is sedert die regering van Saddam Hoesein in 2003 omvergewerp is.

Die Irakse weermag en Pesjmerga-­magte van Irakse Koerdistan het Maandag met groot mediageskal na Mosoel begin beweeg. Meer as 25 000 soldate is vir die veldtog ontplooi wat na verwagting weke indien nie maande nie kan duur.

Hulle ontvang lugbystand van ‘n Amerikaans-geleide koalisie wat gestig is toe Isis in 2014 van Sirië na Irak beweeg het.

Hoshjijar Zebari, ‘n senior Koerdiese amptenaar, sê die eerste operasies het geslaag danksy noue samewerking tussen die Irakse regering en Koerdiese Pesjmerga-vegters­ en ISIS kon uit tien dorpies oos van Mosoel verdryf word.

“ISIS is verward. Hulle weet nie of hulle ‘n aanval uit die ooste of die weste of die noorde moet verwag nie,” sê hy.

“Daar sal nie ‘n skouspelagtige aanval op Mosoel self wees nie. Dit sal baie versigtig gedoen word. Dit is ‘n hoë risiko-operasie vir almal.”

Aboe Bakr al-Baghdadi, Isis-leier,­ en Fawzi Ali Noeimeh, plofstofdeskundige, is albei in Mosoel, sê Zebari.

Dit beteken ISIS sal sterk weerstand bied.

Sy vegters het die aanvalsmag met tien selfmoordbomme aangeval en die aanvalsmag het vyf dorpies omsingel, maar nie oorgeneem het.

Die bewerings kon nie onafhanklik bevestig word nie.

Die aanvalsmag is nog tussen 20 km en 50 km van Mosoel. Amptenare sê dit is ‘n “vormingsoperasie” om die aanvalsmag se posisie te verstewig.

Haider al-Abadi, Irakse premier, het die aanval eergister bevestig, sowat twee jaar nadat Irak se naasgrootste stad in ISIS se beheer beland het.

Die operasie is al sedert Julie met die VSA beplan. Die Verenigde Nasies sê tot een miljoen mense kan uit Mosoel vlug.

Die eerste groep vlugtelinge word binne vyf of ses dae verwag.

Skelm Clinton-kamp se gekonkel met FBI gelek

Een van Hillary Clinton se senoir amptenare het haar van vervolging probeer beskerm deur die federale speurdiens (FBI) te probeer omkoop. Dit het duidelik geword uit die jongste WikiLeaks onthullings.

‘n Senior amptenaar in die departement van buitelandse sake het Clinton teen die FBI probeer beskerm oor haar onwettige gebruik van ‘n privaatepos­bediener toe sy minister van buitelandse sake was.

Patrick Kennedy, die mees senior bestuurder in die departement van buitelandse sake, se onverkwiklike rol is openbaar gemaak in die FBI se jaar lange ondersoek na die eposse.

Verlede jaar het amptenare die sowat 30 000 eposse ondersoek wat Clinton aan die departement oorhandig het. ‘n FBI-lid het ’n oproep van ’n amptenaar van die departement van buitelandse sake se regsafdeling gekry waarin die klassifikasie van die inligting in twyfel getrek is. Die FBI het voet by stuk gehou.

Kort daarna het Kennedy ’n ander FBI-lid gebel en gevra om die spesifieke e-pos se klassifikasie te verander as deel van ’n “ruiltransaksie”.

Die versoek is gerig sodat die inkriminerende epos geliaseer sou kon word buite bereik van nuuskierige ondersoekers.

Die lid het gesê dit het voorgekom asof Kennedy probeer om Clinton te beskerm deur dit te laat lyk of minder eposse vertroulike inligting bevat.

’n Ander FBI-lid het ook die bespreking van ’n “ruiltransaksie” bevestig. Die FBI-lid het ­gesê hy sal die epos se klassifikasie ondersoek op voorwaarde dat die departement van buitelandse sake meer FBI-agente oorsee ontplooi.

Die departement en die FBI het ’n gesprek oor die epos bevestig, maar ontken dat dit ’n ruiltransaksie was

Grondwetlike krisis dreig in Hongkong

Dosyne pro-Beijing wetgewers het dié week uit Hongkong se wetgewende raad gestap om die inswering van twee pro-onafhanklikheid aktiviste te verhinder. Dit lê die grondslag vir ‘n grondwetlike krisis in die Chinees-­beheerde stad.

Die onafhanklikheidsonderwerp is lank reeds taboe in die voormalige Britse kolonie wat ingevolge die een-land-twee-stelsels-beginsel regeer word sedert dit in 1997 onder China se bewind gekom het.

Pro-Beijing wetgewers sê hulle het geen keuse gehad as om uit te stap nie nadat die twee aktiviste geweier het om verskoning te vra nadat hulle “die moederland beledig het.”

Yau Wai Ching, pro-onafhanklikheidsaktivis, het op sy beurt gesê die pro-establishment kamp behoort om verskoning te vra omdat “hulle die mense van Hongkong verraai het”.

Opposisie verwerp uitslag van Montenegro verkiesing

Twee opposisie-alliansies in ­Montenegro het die uitslae van Sondag se parlementêre verkiesings, waarin die eerste ­minister, Milo Djukanovic se party die meeste setels gewen het, verwerp en die regering van intimidasie van kiesers beskuldig.

Djukanovic se Demokratiese Party van Sosialiste het 36 setels, vyf minder as ‘n meerderheid in die parlement met sy 81 setels gewen. Kritici kla dat onreël­matighede by die stemmery opgemerk is.

Sondag is 20 Serwiese burgers in hegtenis geneem nadat hulle glo ‘n “terreurkomplot” gesmee het om staatsinstansies aan te val.

‘n Voormalige Serbwiese polisiebevelvoerder Bratislav Dikic (foto), wat tans aangehou word in Montenegro, is op ‘n hongerstaking.

Dikic is Sondag in hegtenis geneem, voor die parlementêre verkiesing saam met 19 ander Serwiese burgers en word daarvan beskuldig dat hulle “terroriste-aanvalle op instellings wou uitvoer, burgerlikes wou doodmaak, en die premier wou ontvoer”.

Dikic se prokureur sê dat sy kliënt skuld ontken.

Montenegro, ‘n voormalige Joego-Slawiese­ republiek met 620 000 mense, is verdeel tussen diegene wat sterker bande met tradisionele bondgenote in Serwië en Rusland voorstaan en ander wat hulle by die Weste skaar.