Die minister van Justisie en Korrektiewe Dienste, Mike Masutha sê voorleggings van familielede en ander belanghebbendes sal in ag geneem word voor ‘n finale besluit oor parool vir Clive Derby-Lewis geneem word.
Daar is aanbeveel dat Derby-Lewis parool toegestaan word, het Masutha Maandag gesê.
“Daar is ‘n positiewe aanbeveling, met ander woorde ‘n aanbeveling om vrylating op parool,” het hy aan verslaggewers gesê in Pretoria.
Hy het vroeër bekend gemaak dat daar ‘n memorandum van die SAKP in die verband ontvang is.
Masutha sê die “politieke en emosionele sensitiwiteit” oor die kwessie sal in ag geneem word.
Die 78-jarige Derby-Lewis is onlangs twee keer in die gevangenis aangeval en met ‘n skerp voorwerp gesteek.
Hy 25 jaar tronkstraf opgelê vir die dood van die SAKP-leier, Chris Hani in 1993. Hy het reeds meer as 20 jaar van die tronkstraf uitgedien, nadat twee aansoeke op parool reeds afgekeur is.
Derby-Lewis het nie self die sneller getrek nie en het ook nie amnestie ontvang nie, ten spyte van sy bekentenisse. Talle massamoordenaars en terroriste wat burgerlike teikens om die lewe gebring het, het wel amnestie ontvang voor die WVK.
Derby-Lewis het die geweer aan ‘n Poolse immigrant Janusz Walus gegee om die Kommunistiese Party se sekretaris-generaal Chris Hani in die oprit van sy Boksburghuis, aan die Oos-Rand, op 10 April 1993 dood te skiet.
Hy word by die Kgosi Mampuru-sentraal in Pretoria in ‘n sel vol ander misdadigers aangehou en sy gesondheidstoestand is uiters kommerwekkend volgens sy vrou, mev. Gaye Derby-Lewis.
Rian Malan het onlangs voorgestel dat mev. Derby-Lewis aan die ANC “erken” dat sy en haar man CIA-agente was wat die opmars van die kommuniste wou stuit deur die moord.
Masutha het Maandag gesê voorleggings deur familielede van Hani sal in ag geneem word voordat ‘n besluit geneem word.
Dieselfde geld vir die Vlakplaas-bevelvoerder Eugene de Kock.
Verlede maand het die hooggeregshof in Pretoria gelas dat Masutha parool oorweeg vir de Kock.
Die EFF-leier Julius Malema, sal voortgaan om sy seun na ‘n privaatskool te stuur, selfs al het hy gesê openbare verteenwoordigers moet openbare dienste gebruik.
Malema het gesê sy seun sal nie “disfunksionele en arm” openbare skole bywoon nie, en hy sal ook sy mediese fonds handhaaf, wat hom toegang tot private gesondheidsorg gee, het The Star berig.
Sondag het Malema egter aan verslaggewers gesê by ‘n mediakonferensie in Kaapstad dat dit geen sin maak vir die regering om dienste te lewer wat sy leiers, van LP’s tot ministers, nie bereid is om te gebruik nie.
“Ons wil skole en hospitale opgegradeer hê… hulle sal nooit van [goeie] gehalte wees as LP’s dit nie gebruik nie,” het hy gesê.
Maandag, het Malema gesê sy agt-jaar-oue seun, Ratanang, sal bly by die privaatskool, tensy ‘n wet aangeneem word wat verkose verteenwoordigers dwing om openbare geriewe te gebruik, het die koerant berig.
“Hoekom moet ek my kind aan swak onderwys onderwerp wanneer mense in magsposisies dit nie wil doen nie?” het hy gesê.
Die polisie in Johannesburg het beslag gelê op ‘n vragmotor vol elektriese kabels met ‘n geraamde waarde van R5 miljoen, het RSG berig.
Die metropolisie het die voertuig naby die Gold Reef City pretpark voorgekeer. ‘n Woordvoerder van die polisie sê die bestuurder het nie die nodige dokumentasie by hom gehad nie.
Die vragmotor is deur ‘n wit Mercedes Benz begelei en die insittendes het probeer om die polisie met R15.000 om te koop. Hulle was volgens die polisie swaar gewapen.
Toe polisieversterkings ingeroep is, het die motor weggejaag. Die vragmotorbestuurder is na die Booysens-polisiekantoor geneem.
Amptenare van City Power het bevestig dat die kabels aan hulle behoort. ‘n Saak van roof is intussen geopen.
Die maande lange staking in die platinumbedryf in Noordwes word deur betaalde agente van die miljardêrfilantroop George Soros se Open Society aangehits.
Die sekretaris-generaal van die ANC, Gwede Mantashe, het by Luthuli-huis in Johannesburg na afloop van die bosberaad deur die Nasionale Uitvoerende Komitee, gesê die onrus word van buite die land aangemoedig.
Mantashe sê nie alleen die Ekonomiese Vryheidsvegters nie, maar ook wit buitelandse elemente is ten nouste by die staking betrokke.
Ene Lloyd Gedye, ‘n wit sake- en musiekjoernalis van die Mail&Guardian, is klaarblyklik deurdrenk van suiwer rewolusionêre ywer teen die “kapitalistiese mynbase”. Gedye is ‘n betaalde werknmener van OSISA, TheOpen Society Initiative of Southern Africa.
Dieselfde organisasie is betrokke by die betaalde opstande en aanhitsing van geweld in die Oekraïne waar vyandelikhede die land na ‘n burgeroorlog dwing.
Gedye se ywer word byna woordeliks deur Amcu se president Joseph Mathunjwa herhaal, wat die gerugte dat Gedye Mathunjwa se toesprake skryf, verder rugsteun.
Nadat Mathunjwa sowat 5 000 stakende mynwerkers by die Wonderkop-stadion toegespreek het, het hy hulle vertel die ANC is aan die kant van kapitaal en nie van die werkers nie.
Volgens Gedye verdien myners in Brasilië R25 000 per maand en in Australië R80 000.
Gedye het ook Anglo American Platinum se uitvoerende hoof Chris Griffiths se vergoeding onlangs ontbloot. In reaksie op die feit dat hy R17,6 miljoen verlede jaar betaal is, het Griffiths gesê hy “word betaal wat hy werd is”.
Gedye se marxistiese kritiek op Griffiths se salaris, het die mynbaas sedertdien gedwing om om verskoning te vra ná openbare kritiek oor sy ongeërgde kommentaar. Kennelik was Griffiths nie bewus dat hy ‘n slagoffer van die Open Society se “klassestryd” sal word nie, aangesien die miljardêr George Soros veel meer as Griffiths verdien.
Die joernalis het sy gifpen ingespan om slagoffers van die Marikana-slagting aan te moedig om te onttrek uit die Farlam-kommissie as Cyril Ramaphosa, ‘n nie-uitvoerende direkteur op Lonmin se direksie, nie getuig oor sy beweerde rol in die slagting nie.
Gedye beskuldig die ANC-regering daarvan dat hulle “die Farlam-kommissie ondermyn, sy vermoë om getuies te roep belemmer en die SAPD se rol in die slagting probeer toesmeer”.
Daarvoor het die wit Gedye oudergewoonte die swart postkoloniale teoretikus Frantz Fanon se waarskuwing ingespan dat die “inheemse elite” aandadig kan raak in die “uitbuiting van hul medeburgers in die postkoloniale projek”.
Net soos Beeld-lesers vreemd genoeg, gereeld moet verneem wat in Indië – nie Suid-Afrika nie – aangaan wat verkragting betref, haal Gedye die Indiese marxistiese teoretikus Aijaz Ahmad aan: “Fanon se haat teenoor die koloniseerder stem ten volle ooreen met sy minagting vir die uitbuitende inheemse elite.”
Uit hierdie “teoretiese grondslag” maak Mathunjwa rewolusionêre stellings soos die volgende: “Van 1652 tot op datum het die betalingstruktuur in mynbou nog nie verander nie. Dit is deur die kolonialiste ontwerp.”
Die minister van minerale hulpbronne, Ngoako Ramatlhodi, het intussen aangekondig dat die regeringstaakspan wat hy aangestel het, sy betrokkenheid by die onderhandelinge gaan staak indien daar nie *vandag ‘n ooreenkoms bereik word nie”.
Ramathlodi sal Maandag vir die laaste keer samesprekings met Amcu en die mynmaatskappye Implats, Amplats en Lonmin voer in ‘n poging om die voortslepende staking te probeer beëindig.
Hy het die naweek gesê onderhandelings kan nie onbepaald voortgaan nie en dat hy hoop die partye vandag ‘n ooreenkoms kan bereik.
Die Ekonomiese Vryheidsvegters sê die party maak nie verskoning vir sy steun vir mynwerkers se eis van ‘n basiese salaris van R12.500 nie.
Die EFF het gereageer op die sekretaris-generaal van die ANC, Gwede Mantashe, se uitspraak dat hy twyfel of die voortslepende staking in die platinumbedryf oor kollektiewe bedinging handel en of dit eerder polities gemotiveerd is.
Die woordvoerder van die EFF, Mbuyiseni Ndlozi, sê die ANC probeer die skuld vir sy onvermoë om die staking te beëindig, na ander verplaas.
‘n Huisrooftog is in Ridgeworth, Kaapstad, uitgevoer deur gewapende mans waarvan een ‘n polisie-uniform en ‘n ander ‘n weerkaatsbaadjie gedra het. Hulle het by die huis ingestorm en gevra om met “mnr. Sjieng” te praat.
‘n Ooggetuie, Andrew Galant, meen die rowers was op soek na sy werknemer wat Koreaans en voorsitter van die Koreaanse vereniging van Kaapstad is. Die voorval het plaasgevind ‘n week nadat ‘n Nissan Sentra wat aan die huiseienaar se seun behoort in Pinelands gesteel is. In die motor was ‘n boek met vertroulike inligting oor Koreaanse inwoners van Kaapstad.
Volgens Galant het die rooftog op 27 Mei plaasgevind. Hy sê: “‘n wit Nissan Trida het in die inrypad ingetrek. Ek was besig om in my woonstel op die erf ontbyt te nuttig, en my werknemer was besig om in die huis koffie te drink. Skielik het vyf mans uitgespring. Een was in ‘n polisie-uniform en ‘n tweede het ‘n weerkaatsbaadjie gedra. Hulle het voorgegee dat hulle polisiemanne is.”
Sy Koreaanse werknemer het daarna die mans tegemoet gegaan en gevra of hy hulle kan help. Volgens die “polisiemanne” was hulle op soek na mnr. Sjieng. “Hulle het gedink omdat my baas Koreaans is, is hy mnr. Sjieng. Oplaas het ons vir hulle ons paspoorte gewys om te bewys wie ons is. Daarop het hulle hul weg in my woonstel se aparte ingang oopgedwing en geëis dat hulle tot die hoofwoning toegelaat word, wat ons geweier het.”
Volgens Galant het een van die valse polisiemanne by die eienaar gestaan terwyl die res sy woonstel geplunder het. Daarop het ‘n tweede voertuig, insgelyks ‘n wit Nissan Trida, opgedaag.
“Die ouens klim toe uit die voertuig uit. Die eerste wat na my baas toe loop, lyk asof hy die leier is (hy het ‘n volle polisie-uniform aangehad en het beweer dat sy naam sersant Warren is) en vra toegang tot die hoofwoning.
“Die huiseienaar kom toe na die agterdeur toe en binne sekondes storm die ‘polisie’ in die huis in. Nog ‘n voertuig daag in die inrypad op, en die insittendes storm die aparte ingang binne. Van die aparte ingang dring hulle die huis binne. Ek is ook gedwing om in die huis in te gaan, tesame met die eienaar, sy vrou en hul seun.
“Terwyl ons in die kombuis staan, gaan ‘n paar van hulle by die eienaar se seun se kamer in. Hulle eis toe toegang tot die kluis maar het nie so ver gekom nie.”
Volgens hom het die hele voorval ongeveer 40 minute geduur en was daar omtrent 18 mense by betrokke. Slegs ‘n Galaxy-tabletrekenaar, ‘n iPhone en ‘n Zippo-aansteker is gesteel.
Die swartmans het ‘n taal gepraat wat Galant nie kon verstaan nie.
“Alles het so wettig gelyk weens die manier waarop hulle hulself aangebied het. Vier van hulle was in polisie-uniforms geklee en die ander in gewone klere. Van almal, was daar net twee sonder vuurwapens.”
Kaptein Fienie Nimb van die Bellevillese polisiestasie het bevestig dat vier Tanzaniërs wat soos polisiemanne aangetrek was, laat op 27 Mei in hegtenis geneem is, maar hulle kon nie met die voorval in Ridgeworth verbind word nie.
Kaptein Nimb sê: “Die misdaadvoorkomingsbeamptes en dagskofoffisiere is in kennis gestel oor die huidige neigings en verdagte voertuie en persone. ‘n Wit Nissan Tiida is vermeld as ‘n verdagte voertuig waarmee verskeie sakerooftogte in Kaapstad, Milnerton en in die gebied van vier ander polisiestasies in die Wes-Kaap gepleeg is.
“Die verdagtes teiken juwelierswinkels waar hulle juweliersware en edelgesteentes steel. Inligting is ontvang dat dié Nissan Tiida deur ‘n buitelander bestuur word en dat die verdagtes goed gewapen is en tydens die rooftogte polisie-uniforms, asook tweerigtingradio’s dra.”
Die ANC Jeugliga gaan vandag ‘n optog hou na die kantore van die Mail en Guardian-koerant in Rosebank.
Volgens die Liga is die koerant “een van die mediahuise wat bereid is om propaganda van ‘n teen-revolusie teen die ANC ter ondersteuning van die opposisie te bevorder”.
Die koerant se redakteur Angela Quintal het in reaksie gesê: “Net soos ons glo in die grondwetlik verskanste reg op vryheid van spraak, sal ons ook die reg van ‘n individu of organisasie verdedig om vreedsaam te protesteer. Dit is wat ons grondwetlike demokrasie is.”
Met die optog, noord van Johannesburg sal die Jeugliga hulle ontevredenheid te kenne te gee met die koerant se “eensydige” nuusdekking.
Die Jeugliga beskuldig die koerant daarvan dat hy sy beginsels van billikheid, objektiwiteit en akkurate verslaggewing versaak het.
Die koerant se nuusdekking in aanloop tot die verkiesing was glo eensydig was ten gunste van die opposisie, volgens die Liga.
Die Jeugliga se ondersteuners sal by Wyndham Park byeenkom vanwaar hulle na Rosebank sal stap. Verteenwoodigers van Cosas en die Jong Kommuniste Liga sal ook die skare toespreek.
Die Nasionale Kunsskool in Braamfontein het bevestig dat ‘n onderwyseres wat van rassisme beskuldig word, geskors is, het RSG berig.
Die Graad Agt geskiedenisonderwyseres het na bewering aan leerders gesê dat swartmense demone is, en dat die regering misluk omdat swartmense aan die hoof daarvan staan.
Die skool se beheerliggaam sê sy sal nie weer by die skool toegelaat word voordat ‘n interne ondersoek afgehandel is nie.
Die Gautengse Onderwysdepartement het gister ‘n beroep op die beheerliggaam gedoen om ‘n sterk standpunt in te neem teen die onderwyseres.
Die departement en die Suid-Afrikaanse Menseregtekommissie ondersoek ook die voorval.
Onder die DA-bewind in die Wes-Kaap is dwelmmisbruik kommerwekkend aan die toeneem en daarmee saam ook misdaad.
Terwyl Kinderbeskermingsweek landwyd gevier word, het dit aan die lig gekom dat dwelms die provinsie instroom.
Die Wes-Kaapse minister van Gemeenskapsveiligheid, Dan Plato, het sy ernstige kommer uitgespreek oor die verspreiding van dwelmmisbruik onder kinders in kleiner gemeenskappe.
Kinders op die platteland in die Wes-Kaap is skynbaar besig om in verslawing te verval.
Plato sê kleiner dorpe soos Bredasdorp, Worcester en Knysna het die teikenmark vir dwelmhandelaars geword.
Volgens die jongste berigte is daar weens ‘n skerp styging in die getal tikverslaafdes ‘n toename in misdade soos moorde, verkragtings en inbrake buite groot stedelike sentrums.
Plato sê sy departement sal die gebiede wat geraak word, binnekort besoek.
Tien mense het Woensdagaand doodgebrand na ‘n botsing tussen ‘n bus, ‘n vragmotor en ‘n derde voertuig op die R40 naby Witrivier in Mpumalanga.
‘n Woordvoerder van die provinsie se Departement van Gemeenskapsveiligheid, Joseph Mabuza, sê tot dusver het die ondersoek daarop gedui dat die vragmotorbestuurder beheer oor sy voertuig verloor en teen ‘n bus en ‘n kleiner voertuig gebots het.
Die slagoffers is glo onherkenbaar verbrand in die ongeluk.
Russel Meiring, woordvoerder van ER24, het gesê die bus was reeds in vlamme gehul toe noodwerkers op die toneel aankom en brandbestryders het lank gesukkel om die brande te blus.
Meiring het gesê 35 mense is beseer, waarvan 5 passasiers in ‘n kritieke toestand is.
Die beseerdes is na hospitale in die gebied geneem.
‘n Voorlopige ondersoek toon dat die vragmotorbestuurder beheer oor sy voertuig verloor het.
Die Mbombela-munisipaliteit in Mpumalanga het hulle meegevoel betuig met die familie van die slagoffers.
Familie van mense wat vermis word, is gevra om met die polisiestasie op Witrivier in verbinding te tree.
Die polisie op Beaufort-Wes het twee vermeende verkragters van twee minderjariges in hegtenis geneem.
Die swart mans word verdink van die verkragting van ’n 10-jarige meisie en ’n 16-jarige seun. Hulle verskyn Donderdag in die hof.
’n Man van 20 en ’n tiener van 17 is Dinsdag in hegtenis geneem.
Kapt. Malcolm Pojie, ’n polisiewoordvoerder, het gesê drie kinders het gevlug toe hul maats glo in die bosse langs Blythstraat in Beaufort-Wes verkrag is.
Die meisie het ernstige beserings opgedoen en is in die plaaslike hospitaal vir verdere mediese behandeling opgeneem
Volgens die kinders het hulle draad gesoek om draadkarre mee te bou. Die vermeende verkragters het honde by hulle gehad, en twee kinders is toe glo die veld in gedwing en verkrag.
Die polisie is na die toneel en die mans het gevlug. ’n Soektog is begin en die mans is in die woonbuurte Prins Valley en Rustdene in hegtenis geneem.
Die minister van Justisie en Korrektiewe Dienste, Mike Masutha sê voorleggings van familielede en ander belanghebbendes sal in ag geneem word voor ‘n finale besluit oor parool vir Clive Derby-Lewis geneem word.
