Etiket: Witrivier

Soektog na vermiste vrou afgeskaal

Die soektog na die vermiste Annetjie Myburgh van die Elanzeni-distrik naby Barberton is afgeskaal.

Myburgh is Woensdag as vermis aangegee nadat sy nie by die werk opgedaag het nie.

Daar was in die afgelope sewe weke twee inbrake en vier pogings tot inbrake by haar huis.

Myburgh werk by ‘n prokureursfirma in Witrivier. Nadat sy Woensdagoggend spoorloos verdwyn het, word daar geglo dat sy by die hek van haar kleinhoewe in Curlews naby Rocky Drift gekaap en ontvoer is.

Twee kapmesse is by die hek gevind sowel as haar bril. Twee stelle spore is langs die heining van Myburgh se kleinhoewe gevind.

Die vermeende kapers het in haar wit Pajero met die registrasienommer CHF 482 MP gevlug.

Haar twee selfone het in ‘n stadium na die Swalala Trust-selfoontoring ‘n sein gestuur, maar is sedertdien afgeskakel.

Soekspanne het in die lokasies inbeweeg met ‘n nuwe taktiese aanslag.

Kapt. Pottie Potgieter van die duikeenheid op Witrivier, koördineer die soektog en het by navraag gesê dat talle mense al ingebel het met inligting sedert daar nou ‘n beloning van R31 000 uitgeloof is.

“Ons volg alle leidrade op. As mense beweer hulle het haar Pajero in ‘n bepaalde area gesien, gaan stel ons dadelik ondersoek in,” het hy gesê.

Albert Gryvenstein van Bossies Community Justice, het by navraag gesê dat, hoewel die soektog nou afgeskaal is, hulle nog reg deur die nag na haar gesoek het.

Intussen stroom aanbiedinge van hulp steeds in van regoor die land om te help met kospakkies en vervoer vir die soekgeselskap.

Boodskappe van bemoediging en gebede word ook telkens op die Facebook-groep, Bid vir Annatjie Myburgh, geplaas.

Haar man, Wendell Myburgh, het almal bedank vir hulle gebede en ondersteuning.

Wrede moord en verkragting op bekende vroueveearts

Terwyl Helen Zille en die polities korrekte media veldtogte teen “blanke rassisme” voer, word al hoe meer blankes en Afrikaners uitgemoor. Die jongste slagoffer op Witrivier is dr. Rensia de Wet, 46, ‘n briljante veearts en perdekenner wat in 2002 die Theilermedalje as topstudent by Onderstepoort ontvang het.

Die bekende veearts en perdekenner, dr. Rensia de Wet
Die bekende veearts en perdekenner, dr. Rensia de Wet

De Wet is vermoedelik verkrag alvorens sy vermoor is, want haar lyk is halfkaal in haar slaapkamer gevind. ‘n Brigadier Selvy Mohlala van die SAPD het verklaar: ““Sy was in haar slaapkamer en was halfnaak. Sy is vermoedelik verkrag en is telkemale in die nek en bors gesteek.” Volgens berigte is sy in ‘n plas bloed gevind met haar twee honde wat by haar liggaam gewaak het. Bure het eergister teen 16:30 op die moordtoneel afgekom.

Niks word uit die houthuis waarin sy op die Nottinghill-Ruitersentrum gewoon het, vermis nie. Sy was geskei en kinderloos.

Vriende en bure op die perdelandgoed het haar as ‘n diere- en perdeliefhebber beskryf. ‘n Vriendin, Tanya Dekker, sê: “Sy het so ’n passie vir diere, veral perde, gehad. Die landgoed was vir haar ’n plek van veiligheid en sy en die eienaars het mekaar jare lank geken.”

Dr. De Wet het self ‘n perd op stal in die landgoed gehad. Op haar Facebook is talle foto’s van perde en vulletjies te siene, asook van haarself te perd. Sy het in perdevoeding gespesialiseer en het op ‘n stadium vir ‘n sjeik in Doebai gewerk na wie se perde sy omgesien het.

Nog ‘n vriendin, Kraai Kamffer het aan die media gesê: “Sy was my vriendin, en ʼn baie liefdevolle mens. Sy was baie lief vir diere én mense,” waarna haar gemoed vol geskiet het.

“Niemand is nog in verband met die voorval aangekeer nie, maar ons ondersoek die saak,” het brig. Selvy Mohlala van die SAPS gesê. ‘n Moordsaak is geopen.

 

Tien brand dood in gru-ongeluk

witrivierTien mense het Woensdagaand doodgebrand na ‘n botsing tussen ‘n bus, ‘n vragmotor en ‘n derde voertuig op die R40 naby Witrivier in Mpumalanga.

‘n Woordvoerder van die provinsie se Departement van Gemeenskapsveiligheid, Joseph Mabuza, sê tot dusver het die ondersoek daarop gedui dat die vragmotorbestuurder beheer oor sy voertuig verloor en teen ‘n bus en ‘n kleiner voertuig gebots het.

Die slagoffers is glo onherkenbaar verbrand in die ongeluk.

Russel Meiring, woordvoerder van ER24, het gesê die bus was reeds in vlamme gehul toe noodwerkers op die toneel aankom en brandbestryders het lank gesukkel om die brande te blus.

Meiring het gesê 35 mense is beseer, waarvan 5 passasiers in ‘n kritieke toestand is.

Die beseerdes is na hospitale in die gebied geneem.

‘n Voorlopige ondersoek toon dat die vragmotorbestuurder beheer oor sy voertuig verloor het.

Die Mbombela-munisipaliteit in Mpumalanga het hulle meegevoel betuig met die familie van die slagoffers.

Familie van mense wat vermis word, is gevra om met die polisiestasie op Witrivier in verbinding te tree.

 

Aangeklaagde in kinderporno-saak verskyn

'n Gekonfiskeerde rekenaar
‘n Gekonfiskeerde rekenaar

‘n Oud-onderwyser uit die Vrystaat, een van ‘n paar mans wat daarvan beskuldig word dat hulle ‘n deel van ‘n kinderpornosindikaat is, het Woensdagin die Bloemfonteinse landdroshof verskyn.

Die saak teen die man is uitgestel vir verdere ondersoek tot 28 Oktober.

In Augustus het talle mans waaronder ‘n afgetrede skoolhoof, verskyn in verskeie Suid-Afrikaanse howe.

Die polisie het op ‘n wenk van Interpol op 15 Augustus gereageer toe die ses mans in vier provinsies vir die besit van kinderpornografie vasgevat is. Hulle is in hegtenis geneem in Lichtenburg, Potchefstroom, Bloemfontein, Witrivier, Douglasdale, en Florida.

‘n Prokureur, ‘n dermatoloog, en ‘n sakeman is van die ses. Almal word verdink van betrokkenheid by ‘n internasionale kinderpornografie-sindikaat, het die polisie vroeër gesê.

Die polisie ondersoek ook of die ses betrokke was in die verspreiding en vervaardiging van kinderpornografie, en indien hulle gekoppel is aan ‘n internasionale sindikaat.

Dit is die saak het skakels na Kanada, die Verenigde Koninkryk, die Verenigde State van Amerika, Wes-Europa, en Australasië. – Sapa