Oproer na moetiemoord by Burgersfort

Sewe-en-veertig mense is op Mecklenburg buite Burgersfort in hegtenis geneem is op aanklagte van openbare geweld, brandstigting en kwaadwillige saakbeskadiging.

Die oproermakers sal na verwagting Maandag in die landdroshof op die dorp verskyn.

Van die gemeenskapslede het Donderdag twee sjebeens geplunder voordat hulle die kuierplekke aan die brand gesteek het.

Hulle beskuldig die eienaar van die sjebeens van die moord op ‘n vrou wat dood voor haar huis aangetref is.

Die polisie sê die vrou se liggaam is geskend en van haar liggaamdele verwyder.

Polisielid beseer na geweld in Kakemas

‘n Polisieman van Upington is in ‘n ernstige toestand in die hospitaal nadat hy beseer is toe geweld uitgebreek het tydens ‘n protesoptog in Kakamas.

‘n Lid van die Openbare Orde Polisie-eenheid in Upington moes per helikopter na Bloemfontein afgevoer word.

Polisiewoordvoerder Donald Mdhluli sê ongeveer 500 inwoners het Vrydag na hulle plaaslike munisipale kantore van die Kai!Garib munisipaliteit opgeruk.

Hy sê die optog was vreedsaam totdat die gemeenskap by die munisipale kantore uitgevind het dat die munisipale bestuurder nie beskikbaar was om hulle griefskrif te ontvang nie.

Hy het gesê die inwoners het kwaad geword toe hulle uitgevind het dat die munisipale bestuurder nie beskikbaar is nie.

Mdhluli gesê die betogers het probeer om in die kantore met ‘n bakkie in bars toe hulle die polisiebeampte raakgery het. Hy het gesê die saak word nou ondersoek.

Boere trek vermeende plaasaanvaller by Vrede vas

Die inhegtenisneming van ‘n 38-jarige swart verdagte in verband met die aanval op ‘n bejaarde egpaar op hul plaas by Vrede, kom na flinke optrede van die gemeenskap.

Die polisie het hulp van boere ontvang wat gelei het tot die inhegtenisneming Sondagaand op Vrede etlike ure nadat Johannes Kritzinger en sy vrou Rita vroeër die middag in hul huis op die plaas Brakdam deur twee mans oorval en geskiet is.

Plaaslike boere was vinnig op die toneel.

Die egpaar kon nog nie verklarings aflê nie.

Die twee swart aanvallers het omstreeks eenuur gistermiddag op die plaas aangekom. Volgens die polisie se voorlopige ondersoek het een van die aanvallers vroeër op die plaas gewerk.

Terwyl plaasmoorde en-aanvalle toeneem, weier die polisie om dié geweld teen blankes as priotriteitsmisdaad te verklaar.

Die egpaar word in die Netcare-Unie-hospitaal in Alberton vir skietwonde in die maag behandel. Johannes verkeer in ‘n kritieke toestand en sy vrou se toestand is ernstig.

Die verdagte sal na verwagting binnekort in die plaaslike landdroshof op ‘n aanklag van poging tot moord verskyn.

Die ander verdagte is nog op vrye voet.

Merkel oorweeg stabiliseringsmeganisme vir Grieke

Die Duitse kanselier, Angela Merkel, het vroeër gesê ‘n Europese Stabiliseringsmeganisme is nie uitgesluit tov Griekeland nie.

Merkel sê die EU sal die kwessie ondersoek voordat onderhandelinge oor ‘n ESM-program vir Griekeland oorweeg sal word.

Daar is nog geen ooreenkoms oor hoe die noodfondse oorgedra kan word nie.

Internasionale leners binne die Euro-gebied raam dat Griekeland tot 86 miljard Euro kan benodig om ‘n finansiële ineenstorting af te weer.

Die Griekse eerste minister, Alexis Tsipras, het Sondag met leiers van die Eurosone vergader, na die opskorting van ‘n volle beraad.

Volgens die BBC wil die leiers hê die Griekse regering moet oor die volgende drie dae ‘n reeks wette in die parlement deurvoer, voordat daar met gesprekke oor ‘n derde reddingsboei begin kan word.

Griekeland het intussen dringend miljarde Euro nodig om die land oor die korttermyn aan die gang te hou.

Aanvalle op buitelanders ‘nie xenofobie’

Die polisie in KwaMashu noord van Durban ondersoek ‘n aanklag van kwaadwillige saakbeskadiging nadat ‘n houer wat aan ‘n Ethiopiër behoort, aan die brand gesteek is.

Terwyl aanvalle teen buitelanders steeds voortduur, het die medevoorsitter van die portefeuljekomitee in die parlement rakende xenofobiese geweld Vrydag gesê die aanvalle op buitelandse burgers vroeër vanjaar was nie as gevolg van xenofobie nie.

Soweto is ontwerp om verskillende taalgroepe in afsonderlike gebiede te hou, wat ‘n gevoel van etnisiteit geskep het, het News24 berig.

“Ons as ‘n komitee het tot die slotsom gekom dat hierdie aanvalle nie kbeskou kan word as xenofobies nie,” het Tekoetsile Motlashuping gesê by die Moroka-polisiekantoor in Soweto.

Hulle het die kwessie in diepte bespreek, en die betekenis van die woord xenofobie in ‘n woordeboek opgesoek.

“Die woordeboek sê dit is ‘n “uiterste” haat teen buitelanders. Suid-Afrikaners het nie uiterste haat nie, het hy gesê, en bygevoeg dat enigiemand wat vroeër vanjaar die geweld teen buitelanders beskryf het as xenofobies, is verkeerd.

“Ons is uit ballingskap,” het hy gesê aan die LP’s van die Nasionale Vergadering en die Nasionale Raad van Provinsies, wat hom op ‘n feitesending vergesel het.

Buitelandse burgers kom na Suid-Afrika vir baie redes, insluitend ekonomies, akademies, politieke probleme by die huis, en as gevolg van die politieke stabiliteit in Suid-Afrika.

Hy het gesê sommiges kom want daar is “baie hulpgeld”.

Hoewel die man in die houer nie beseer is in die jonsge aanval nie, gaan die ondersoek in KwaMashu voort.

Verlede jaar het buitelandse eienaars van winkels in die lokasie in en om Durban briewe gekry wat hulle aangesê het om op te hou om sake in die lokasie te doen.

Die briewe was van mense wat aangevoer het dat hulle plaaslike sakelui verteenwoordig.

Die polisie sê niemand is nog in verband met die voorval in hegtenis geneem nie, en die polisie ondersoek nog die saak.

Suid-Afrika verkoop meer as 13 ton goud aan Iran, oortree VN-sanksies

Volgens ‘n berig in die plaaslike Times-koerant, het Suid-Afrika meer as 13 ton goud aan Iran verkoop, iets wat op ‘n oortreding van VN-sanksies teen die land sou neerkom.

Die sentrale bank van Iran het verlede week aangekondig dat “‘n som van 13 ton goud voorheen aangekoop is en oor die afgelope twee jaar in Suid-Afrika gedeponeer is en nie na Iran oorgeplaas kon word nie, te wyte aan sanksies. Dié berig is deur die Irannese nuusagentskap Fars vrygestel.

Die hoof van die Irannese sentrale bank, Waljolla Seif, sê die geslaagde vervoer van die goud verteenwoordig getuienis dat ‘n transaksie in die gange van die kerksamesprekings in Wene saamgestel is.

Iran onderhandel met die M5 + 1-groep, die VSA, Brittanje, Frankryk, Rusland, China, asook Duitsland, oor sy kernprogram.

Volgens die Times wou nóg die SA Reserwebank nóg die nasionale tesourie kommentaar lewer oor watter Suid-Afrikaanse instelling die goud verkoop en hanteer het.

‘n Woordvoerder vir die tesourie Phumza Macanda het bloot bekendgemaak dat ‘n “Suid-Afrikaanse instelling” betrokke was by die onderneming waaroor Iran en die VN ooreengekom het en “die regering geen rol by die oorplasing van die goud gespeel het nie”.

Afrikaanse name moet van RAU-koshuise af

Omdat die Universiteit van Johannesburg, die voormalige RAU (Randse Afrikaanse Universiteit) deesdae ‘n “pan-Afrika-sentrum van kritiese intellektuele ondersoek” is, moet sy oorspronklike Afrikaanse koshuisname verwyder word. Die huidige swart studentekorps is nie teen die name gekant nie, maar die universiteitsowerheid kan die name nie langer duld nie.

Volgens berigte is koshuisinwoners teen die veranderinge gekant. Die primarius van Bastion, Simpiwe Gqibane, sê: “Ek dink dit is vir hulle baie moeilik. Dieselfde mense (swart studente) wat hulle seker gedink het die transformasie sal steun, is die mense wat nou sê: ‘Nee, ons hou van die kultuur.’ ”

Die unversiteit het blykbaar verlede week advertensies in die pers geplaas en om voorstelle vir nuwe name gevra. Twee koshuise is reeds na die polities korrekte “Sophiatown” en “Hector Peterson” verander, wat nie weer sal verander nie.

Die naamsveranderings word gesien as deel van die algemene “transformasie” om alle spore van Afrikaans of Afrikanerteenwoordigheid wat daar eers by die universiteit uit te wis ten einde ‘n “pan-Afrika-universiteit” te skep. Die senior uitvoerende direkteur in die visekanselier se kantoor, Tumi Mketi, het gesê nuwe koshuisname is ook nodig ter wille “van die handelsnaam en waardes van die universiteit”.

Suid-Carolina verbied Suidelike vlag by wetgewershuis

Die deelstaat van Suid-Carolina in die VSA het met ‘n meerderheid van 94-20 gestem om die Suidelike vlag wat tradisioneel by sy wetgewershuis wapper, te verbied. Dit volg ná drie dae van intense debat rondom die kwessie.

Die goewerneur van Suid-Carolina, Nikki Haley, sal later vandag die wetsontwerp onderteken, om die besluit van die wetgewer te bekragtig. Daarna sal dit teen die wet wees om die vlag binne die omtrek van die wetgewershuis te hys.

Die herrie rondom die Suidelike vlag waaroor inwoners van die Suide van Amerika patrioties voel, volg op die beweerde skietery deur Dylan Roof in ‘n swart kerk in Charleston, Suid-Carolina op 17 Junie. Roof het na bewering 9 mense in die kerk gedood en daar is aanlynfoto’s van hom op ‘n webblad geplaas waar hy die Suidelike vlag vertoon. Hy het ook ‘n beweerde manifes geskryf waarin hy die ondergang van Rhodesië betreur en sy bewondering vir vorige Afrikanerregerings uitspreek wat hulle oor ‘n lang tyd teen ‘n swart demografiese meerderheid kon handhaaf.

Onlangse meningspeilings het egter getoon dat die meerderheid Amerikaners die Suidelike vlag as ‘n “simbool van trots” sien en nie as ‘n “simbool van rassisme” soos wat liberale dit dikwels tipeer nie.

Kommer oor Prasa-ingenieur se kwalifikasies neem toe

Die Passasier-spooragentskap van Suid-Afrika (Prasa) sê hy is baie tevrede met sy hoofingenieur, dr. Daniel Mtimkulu, al is hy nie amptelik as ingenieur geregistreer nie.

Netwerk24 het gister onthul dat Mtimkulu nie by die Ingenieursraad van Suid-Afrika geregistreer is nie.

Ingevolge wetgewing moet ingenieurs wat vir die staat werk, by die raad geregistreer wees.

Die Vryheidsfront Plus gaan ook die Staatsdienskommissie versoek om ondersoek in te stel na die geldigheid van die kwalifikasies van Mtimkulu.

Mtimkulu beweer hy het ’n ingenieursgraad by die Universiteit van die Witwatersrand en ’n doktorsgraad in Duitsland behaal, maar Wits se registrasiekantoor kon geen rekord van hom as student opspoor nie.

Mtimkulu, die hoof van ingenieursdienste by Prasa, is aangedui as die ontwerper van die Afro 4000-lokomotiewe wat as ongeskik vir Suid-Afrikaanse infrastruktuur verklaar is. Hy het die foutiewe aankope op ‘n perskonferensie verdedig.

Die hoogte van die treine is nie geskik vir Suid-Afrikaanse spore nie, omdat hulle 4.264m hoog is terwyl die nasionale limiet 3.965m is.

By dieselfde perskonferensie het Prasahoof Lucky Montana gesê dat die bohaai te danke is aan ‘n rassismeveldtog teen Mtimkulu, wat as onbevoeg voorgehou word omdat hy swart is.

Hy het gesê Prasa-werknemers word uitgebeeld “as ‘n klomp onbevoegdes [en] dit is waarskynlik ‘n rassekwessie”.

SA se bydrae aan BRICS nie ‘n kopseer sê ekonoom

Suid-Afrika se beloofde bydrae van $10 miljard aan die beplande Nuwe Ontwikkelingsbank oftewel die BRICS-bank, hoef nie onmiddellik die land uit te vloei nie.

Die geld sal slegs gegee word wanneer dit benodig word, volgens die ekonoom Dawie Roodt.

Roodt het bygevoeg dat China waarskynlik die grootste gedeelte van die nuwe bank sal finansier.

Roodt sê Suid-Afrika hoef hom dus nie te veel te bekommer oor die kapitale uitleg nie.

Rusland en Suid-Afrika het Woensdag ooreengekom om ‘n memorandum van verstandhouding te teken oor onder meer energie.

President Jacob Zuma lei die Suid-Afrikaanse afvaardiging wat bestaan uit ministers en sakelui.

Afgevaardigdes sal onder meer ‘n ooreenkoms oor ekonomiese integrasie van die BRICS-lande bespreek, asook moontlike vrye handelsgebiede.

Die sewende sessie van die BRICS-beraad is in Rusland in die stad Ufa, net buite Moskou, gehou.

Dit is voorafgegaan deur die bekendstelling van die BRICS ontwikkelingsbank wat gesien word as alternatief vir die IMF, die Wêreldbank en ander westerse instellings.

Die handelsomset tussen die BRICS-lande het verlede jaar meer as $291 miljard beloop.

Chinese aandeelpryse, wat ‘n tweede agtereenvolgende dag skerp gedaal het, is ‘n direkte gevolg van hoë aandeelpryse reg oor die wêreld heen, het Roodt ook gesê.

Die Shanghai Composite Index wat met 8.2% gedaal het voor verhandeling begin het, het egter ‘n uur later met drie persentasie punte herstel.

Sedert 12 Junie toe aandeelmarkte gepiek het, het die Shanghai Composite Index met nagenoeg 30% gedaal.