Indonesiërs lewer munte by Australiese ambassade af

Indonesiërs het “Maak Abbott se mond stil en “Abbott, sê jammer”, geskree en op’n plakkaat met die Australiese premier, mnr. Tony Abbot, se foto getrap, terwyl hulle sakke met muntstukke by die Australiese ambassade in Jakarta afgelewer het.

Abbott het verlede maand gesê Jakarta moet die US$1 miljard wat Australië as bystandshulp aan Indonesië gegee het in die nadraai van die 2004 Indiese Oseaan-tsoenami onthou. Die tsoenami het die lewens van ongeveer 220 000 mense geëis.

Sy opmerkings was daarop gemik om die teregstelling van die Australiese dwelmsmokkelaars, wat deel uitmaak van die sogenaamde “Bali nege, te stop. Andrew Chan en Myuran Sukumaran sal na verwagting enige dag tereggestel word.

Abbott se poging het egter misluk en n lelike nadraai gehad met betogers in Indonesië wat met n veldtog begin het om muntstukke in te samel om Australiese hulp “terug te betaal.

Sewe sakke muntstukke ter waarde van ongeveer sewe miljoen rupiah (US$535) is gister by die Australiese ambassade afgelewer.

Die koördineerder van die veldtog, Andi Sinulingga, sê Abbott se opmerkings was laakbaar.

“Ons het nooit gevra vir hulp nie, maar Australië het dit aangebied. As ons geweet het hulle was nie opreg nie, sou ons dit nooit aanvaar het nie, het hy gesê.

Gaan Ban se opvolger ‘n vrou wees?

‘n Veldtog is Sondag op internasionale vrouedag van stapel gestuur om n vrou as sekretaris-generaal van die Verenigde Nasies te benoem.

Op die webtuiste, www.womanSG.org sal die profiele van ‘n groep moontlike kandidate van tyd tot tyd gepubliseer word.

Die huidige sekretaris-generaal, mnr. Ban Ki-Moon, se termyn verstryk op 31 Desember 2016.

Moontlike kandidate is Unesco se direkteur-generaal, Irina Bokova; die internasionale monetêre fonds se besturende direkteur, Christine Lagarde; Litaue se pres. Dalia Grybauskaite en die Deense premier, Helle Thorning-Schmidt. Onder v.l.n.r. is die Europese Unie se kommissaris, Kristalina Georgieva; die voormalige Nieu-Seelandse premier, Helen Clark en Chili se pres. Michelle Bachelet.

Vier van Zim vas vir wildboer se moord

Vier Zimbawiërs het Maandag in die Mokopane-landdroshof verskyn weens die moord op dr. Louis-John Botha (64), ‘n wildboer van Swartwater in Limpopo.

Die verdagtes Bruce Mho (23), Trymore Nyube (23), Daniel Lismart (27) en Anton Moyo (27), is glo voorheen deur Botha gehuur om ‘n heining op sy plaas te span.

“Die saak is tot 17 Maart uitgestel, wanneer die verdagtes na verwagting sal aansoek doen om borgtog,” het Kol. Ronel Otto, provinsiale polisiewoordvoerder, gesê.

Familielede wat onraad bemerk het toe Botha nie oproepe beantwoord het nie, het op die kluis afgekom wat oopstaan asook bloed in die huis.

Na ‘n soektog is sy liggaam Maandagoggend in ‘n waterkuil met krokodille, sowat 200 m ver van sy huis af, opgespoor.

Volgens die nadoodse ondersoek het ‘n harde hou teen Botha se kop moontlik tot sy dood gelei nadat hy met ‘n graaf en stokke geslaan is deur die aanvallers wat hom in sy huis ingewag het.

Kol. Otto het bevestig dat Botha dood is weens die hou aan sy kop.

Die swart aanvallers het hom daarna vermoedelik na die kuil gesleep en vir dood agtergelaat. Botha, wat vasgebind was, het nietemin klaarblyklik na die oewer probeer swem voor hy dood is.

Krokodille het aan sy liggaam gevreet.

Kleuterskoolhoof met brandende plastiek gemartel

‘n Afrikaanse kleuterskoolhoof is oor die naweek tydens ʼn plaasaanval met brandende plastiek gebrand en gemartel naby Pongola in KwaZulu-Natal, het Beeld Dinsdag berig.

Vier swart aanvallers het Saterdag ná middagete op Armand en Doulina Slabbert se plaas toegeslaan waar hulle ‘n kwekery en kleuterskool bedryf.

Doulina is gebrand deur brandende plastiek op haar maag te laat drup. Die swart aanvallers het haar gemartel om Armand te dwing om hul waardevolle besittings te oorhandig.

Jess Strumpfer, hul buurman, het Maandag gesê die aanvallers het Doulina buite die huis oorval en in die huis in geneem waar Armand besig was om te stort.

Die rowers het Armand se gestremde broer in die huis vasgebind en die egpaar na hul slaapkamer gedwing, waar hulle geld en vuurwapens uit die kluis gesteel het.

Die egpaar is vasgebind, maar Armand kon loskom en het die aanvallers glo gekonfronteer. Die swartes het daarna sonder die twee bakkies te voet gevlug. Sy vrou is in die hospitaal vir brandwonde behandel.

Kol. Jay Naicker, provinsiale polisiewoordvoerder, het gesê niemand is nog in verband met die voorval in hegtenis geneem nie.

Zuma vaar uit teen tienerswangerskappe

President Jacob Zuma het in ‘n toespraak in die Parlement beklemtoon dat swart tienermoeders geskei moet word van hul babas, totdat hulle hul skoolopleiding voltooi.

“Hulle moet geneem word en gedwing word om skool te gaan, ver weg,” het hy gesê in sy reaksie Dinsdag tydens die debat oor sy toespraak voor tradisionele leiers.
 
“Hulle moet opgevoed word deur die regering totdat hulle bemagtig word en hulle kan sorg vir hul kinders. Neem hulle na Robbeneiland of enige ander eiland, laat hulle daar sit, studeer totdat hulle gekwalifiseer is om terug te kom om te kyk na hul kinders.”
 
Zuma het erken dat toe hy die eerste keer die mening uitgespreek het tydens sy 2009-verkiesingsveldtog, dit omstredenheid veroorsaak het, maar het gesê tienermoeders wat die skool verlaat blyk ‘n onhoudbare las op die samelewing en die staat se welsyn te wees.
 
“Die vroue het gekla ek wil hul kinders weg van hulle wil neem en bla, bla, bla,” het hy gesê.
 
Hy het gesê kinders word só die ouers van kinders, en “hulle weet niks daarvan nie”.
 
Hy het gesê deur tienermoeders te dwing om skoolopleiding te voltooi, sal ‘n tendens om grootouers se pensioen te misbruik vir kindersorg, keer.
 
“Die werklikheid is jy het kinders het met kinders. Hulle weet nie hoe om ‘n kind op te voed nie, hoe om te kyk na hulle nie. Hulle is ‘n las vir oumas, vir die samelewing. So hoekom moet ons net sit en kyk?”
 
Die president het gesê tienerswangerskappe was iets vreemds in vroeër tye toe tradisionele kulture nog gerespekteer was.
 
“Daar was geen swangerskappe van tieners nie en mense het gesinne op die regte tyd gevestig. Hoekom kan ons dit nie doen nie?”
 
Hy het ook voorgestel dat welsyntoelaes nie in kontant betaal word nie, maar as koepons om te voorkom dat ouers dit misbruik.
 
Hy het gesê die koepons moet vir kos, skoolklere of skoolgeld aangewend word, sodat die geld nie gebruik sal word vir enigiets behalwe die behoeftes van die kind nie.
 
“Dit is ‘n kwessie om oor te praat… want geen moeder sal ‘n koepon neem na… wat is daardie plek vir hare? ‘n Salon nie.”

Brande vlam weer op in Jonkershoek

‘n Sterk wind oornag het die brand by die Jonkershoekvallei by Stellenbosch in die Boland weer laat opvlam, het RSG berig.

Die assistent-brandweerhoof van die Kaapse Wynlanddistriksmunisipaliteit, Jaco Thuynsma sê die brand woed nou in die rigting van Stellenbosch en talle eiendom word bedreig.

Die brand, wat reeds ‘n duisend hektaar plantegroei vernietig het, is Dinsdagmiddag glo onder beheer gebring.

Brandbestrydingspanne het egter in die gebied aangebly weens kommer dat sterk wind die brand weer kan laat opvlam.

Thuynsma sê sowat 150 brandbestryders is op die toneel.

Geen beserings is tot dusver aangemeld nie.

TV-joernaliste beroof tydens uitsending

TV-joernaliste van die SABC is Dinsdagaand tydens ‘n regstreekse uitsending in Johannesburg beroof.

‘n Bydraende redakteur, Vuyo Mvoko, buitelandse redakteur, Sophie Mokoena en verslaggewer Chriselda Lewis was besig om voor te berei vir ‘n regstreekse uitsending toe hulle ‘n gewapende roof moes trotseer.

Die nuusspan het vir die nuusbulletin op SABC3 vanaf die Milpark-hospitaal in Johannesburg uitgesaai waar president Edgar Lungu van Zambië mediese toetse sou ondergaan.

In die beeldmateriaal wat deur die SABC op YouTube gelaai is, kan gesien word hoe drie swart mans kort voordat die uitsending begin agter Mvoko verbystap en dan terugdraai en tot die aanval oorgaan.

Een van die mans gryp na Mvoko, oënskynlik om die selfoon uit sy hand te gryp.

Die rowers, wat gewapen was, het daarna gevlug.

Vrou by myn verkrag

‘n Vrou is glo by ‘n myn van Anglo American Platinum (Amplats) in Rustenburg verkrag, het die vakbond NUM Dinsdag gesê.

“Daar word beweer dat die vrou in ‘n aantrekkamer by die myn verkrag is,” het Sydwell Dokolwana, NUM se streeksekretaris in Rustenburg, gesê. Volgens Dokolwana is die vrou Sondag by die Thembelani-myn verkrag.

“’n Verdagte het glo die aantrekkamer met ‘n skroewedraaier binnegekom. Hy het die vrou beveel om haar klere uit te trek en gedreig om haar dood te maak indien sy nie gehoor gee nie.”

Die polisie in Noordwes het volgens Sapa bevestig dat ‘n klag van verkragting ondersoek word en dat ‘n 28-jarige man in hegtenis geneem is.

“Veiligheidsbeamptes kon daarin slaag om die verdagte voor te keer en het die polisie ontbied.” Hy sal na verwagting Dinsdag in die Rustenburg-landdroshof verskyn.

Volgens Dokolwana is daar aan hulle gesê dat die man nie ‘n werknemer van Amplats is nie, en wil hulle weet hoe die man toegang tot die myn se perseel verkry het.

Mpumi Sithole, woordvoerder van Amplats, het gesê die verdagte het glo ook nog ‘n vrou probeer leed aandoen. Volgens Sithole ontvang die vrou wat glo verkrag is sowel as die ander vrou albei traumaberading.

Chris Griffiths, uitvoerende hoof van Amplats, het gesê die maatskappy veroordeel enige vorm van geweld teen vroue. “Ons is baie hartseer oor die gewelddadige kriminele daad en veroordeel dit ten sterkste. Die veiligheid van ons werknemers is ons nommer een prioriteit.”

Kraanvoëls wél vergiftig

‘n Gifkenner sê die voorval waarin honderde kraanvoëls op ‘n plaas by Richmond in die Noord-Kaap vergiftig is, is een van die ergste gevalle wat hy in sy 30-jaar loopbaan nog teëgekom het.

Gerhard Verdoorn sê ‘n toksikologiese ontleding van monsters van die karkasse van die voëls, wat vermoedelik reeds in 2012 vergiftig is, dui aan dat daar hoë vlakke van die gif Diazinon teenwoordig was.

Die voëls is na bewering kwaadwillig met mielies, wat in die gif geweek is, gevoer.

Die saak is nie vroeër ondersoek nie, weens die owerhede se traak-my-nie-agtige houding.

Hy sê die Noord-Kaapse departement van omgewingsake en bewaring asook die polisie is besig met ‘n forensiese ondersoek. Die uitslag word nog afgewag.

Intussen sê Verdoorn, boere van oor die land heen oorval hom met oproepe om hul misnoë te kenne te gee. “Party boere is bekommerd oor die slegte naam wat dit die landbougemeenskap gee. Ek is self bekommerd daaroor, maar die meeste boere wat my gebel het ná hierdie voorval, net soos met die van die aasvoëls, was bitter knorrig omdat dié ou kraanvoëls vergiftig het.”

Verdoorn meen boere het ‘n baie sagte plek vir voëls en sê meeste boere sal in hul lewe nooit ‘n voël vergiftig nie.

Geweld in Ladybrand nadat Rooi Miere toeslaan

Geweld het in Ladybrand uitgebreek in die Oos-Vrystaat.

Die Manyatseng-lokasie in Ladybrand is in rep en roer nadat honderde huise, wat volgens die munisipaliteit onwettig opgerig is, deur die Rooi Miere afgebreek is.

Inwoners het hulle teen die uitsettings verset.

Die voorsitter van die Mantsopa Inwonersvereniging, Kaye Durant, sê die uitsetting, deur die Rooi Miere, moes onderbreek word toe die Manyatseng-gemeenskap gewelddadig geraak het.

Die Rooi Miere het later egter teruggekeer, vergesel deur die polisie, en het voortgegaan met die uitsetting.

OFM-nuus se verslaggewer op die toneel sê so ver die oog kan sien, is daar net sinkplate, pale en bourommel en tekens van buitebande en hout wat gebrand het.

Honderde mense sal sonder ‘n dak oor hul kop moet klaarkom.

Durant sê tans is dit ‘n hele oorlog. Verskeie buitelanders se ondernemings word geplunder, daar is by skole ingebreek, twee wyksraadslede se huise is afgebrand en skoolkinders dwaal sonder toesig rond weens die geweld.

Polisiemagte moes versterkings van Harrismith, Ficksburg en Bethlehem inroep om te help om die gewelddadige gepeupel onder beheer te hou.

Volgens Durant is ‘n Pakistani sake-eienaar beseer tydens die plundering wat plaasgevind het by sy winkel en is na Bloemfontein geneem vir dringende mediese sorg.
 
Die munisipale woordvoerder Mohlomi Mokoatsi sê die munisipaliteit het gelas dat die uitsettings voortgaan.
 
Volgens onbevestigde berigte is drie mense geskiet en gewond deur rubberkoeëls.