Tweede verkragting by UK skud kampus

Nog ‘n vrou is by die Universiteit van Kaapstad naby die kampus verkrag, vyf weke nadat ‘n verkragting daar aangemeld is.

Die universiteit het in ‘n verklaring aan studente en personeel gesê daar die twee slagoffers is vermoedelik deur dieselfde persoon aangeval en verkrag.

Die aanval het op Dinsdag 19 Januarie plaasgevind, terwyl die vorige verkragting op 11 Desember plaasgevind het.

Die vrou het van die Rhodes-gedenkteken na die universiteit gestap, toe sy oorval is. Die polisie ondersoek albei voorvalle.

“Dit is met woede en spyt dat ons julle in kennis moet stel van ernstige gewelddadige voorvalle wat naby die Rhodes-gedenkteken plaasgevind het,” het die UK in ‘n verklaring gesê.

“Ons wil almal versoek om hierdie gebied, veral saans as dit donker is, te vermy.” Die UK het berading aan die studente aangebied.

Nog ‘n student is verlede week gekaap naby die M3-hoofweg onder die Rhodes-gedenkteken. Die verdagtes is egter kort daarna gevang en in hegtenis geneem.

ANC-koukus wil DA-LP geskors hê omdat sy langs Paul Kruger-beeld afgeneem is

Die ANC se parlementêre koukus het vandag die swart leier van die DA, Mmusi Maimane, uitgedaag om van al die “rassiste” in sy party ontslae te raak deur die Afrikaanse LP, Anchen Dreyer, te skors. Sy word daarvan beskuldig dat sy verlede jaar by ‘n kartonafbeelding van Paul Kruger afgeneem is met die boodskap, “Lekker verjaar, Oom Paul.” Volgens die ANC getuig dit van “rassisme”.

Die ANC se parlementêre woordvoerder, Moloto Mothapo, het in ‘n verklaring gesê dat me. Dreyer se “skaamtelose bewondering” vir Paul Kruger neerkom op “instemming met die misdade wat sy bewind teen swart Suid-Afrikaners gepleeg het”.

“Enigeen wat Kruger as ‘n held sien, is ook ‘n rassis wat alles deel waarvoor hy gestaan het, waaronder die geloof dat swartes minderwaardige barbare is wat die ongehoorde lyding wat hulle jare lank onder kolonialisme en apartheid verduur het, verdien,” het Mothapo gesê.

Hy het voortgegaan deur te verklaar: “Hy (Maimane) beskik nou oor die geleentheid om die dapper verbintenis wat hy voor die hele nasie aangegaan het, uit te voer. Die vraag is of hy sy ambisieuse onderneming gestand sal doen en Dreyer sal uitskop, of gaan hy ons vermoede dat sy toespraak niks anders as ‘n sinnelose foefie was nie bevestig?”

In reaksie op Mothapo, het die DA se woordvoerder, Phumzile van Damme haar eie verklaring uitgereik waarin sy sê dat Mothapo se opmerkings ‘n “desperate” plan was om “Suid-Afrika volgens rassegrense te verdeel”.

“Suid-Afrika beskik oor ‘n ryk en ingewikkelde geskiedenis, wat nie weggewens kan word nie. Eerder moet die onregte van die verlede erken en daaruit geleer word. En diegene wat die regte van ons mede-Suid-Afrikaners geskend het, moet ook vir daardie misdaad onthou word,” het Van Damme gesê.

Volgens haar neig Mothapo se verklaring daarna om Suid-Afrikaners in kampe uiteen te jaag en standpunte te verhard wat versoening in die wiele ry.

“Die ANC het duidelik dié belangrike projek laat vaar, wat bepaal hoe die geskiedenis onthou moet word. Dis omdat hulle voortdurend verdere kiesersteun verloor, en daarom na strooihalms gryp om weereens ter sake te probeer word in die lewens van die miljoene Suid-Afrikaners wat hulle in die steek gelaat het,” het sy gesê.

Op Twitter het die rasaanhitsers soos die “skrywer” Eusebius McKaiser teen sowel Anchen Dreyer as die DA uitgevaar.

Ene Lwazistos het McKaiser op Twitter gesteun deur te sê:

Vragmotors sal loop: Spoorweë kan nie verhoogde graaninvoer hanteer

Met die verval in spoorinfrasktuur ná 21 jaar van ANC-bewind, sal Suid-Afrika se voorgenome voedselinvoere per pad vervoer moet word. Die reusehoeveelhede graan wat R15 tot R20 miljard gaan kos, is nodig weens die droogte en “grondhervorming” wat tot ‘n drastiese afname in graanproduksie gelei het. Die land word tans deur die ergste droogte sedert 1992 geteister.

Verlede week het die ANC-SAKP se minister van landbou, bosbou en visserye, Senzeni Zokwana, gesê dat die graan dringend ingevoer moet word aangesien Suid-Afrika se voedsel vir menslike en dierlike verbruik mag opraak. Zimbabwe gaan ook van graan deur Suid-Afrikaanse hawens voorsien word.

Transnet meen dat die land se hawens en spoorweë steeds oor die kapasiteit beskik om die graaninvoere te hanteer. ‘n Span “deskundiges” is glo deur die maatskappy byeengebring om ‘n “geïntegreerde benadering” te verseker. Die hawens wat in staat is om graaninvoere te hanteer, is Durban, Kaapstad, Port Elizabeth en Oos-Londen, met kapasiteit by Richardsbaai wat ook onlangs beskikbaar geraak het.

 

Daar heers onenigheid oor die hoeveelheid graan wat reeds per pad vervoer word, met die res wat per spoor verskuif word. Graan SA, wat 5 500 boere verteenwoordig, meen slegs 75% word per pad vervoer, maar die Standardbankgroep beweer dat die spoorweë so agteruit gegaan het dat ‘n volle 90% per pad vervoer word.

“Dit het meer te make met die gebrek aan instandhouding op spoortrajekte wat die graangemeenskappe bedien as enigiets anders,” sê die hoof van Standardbank se voertuig- en batefinansiering, vir sake- en handelsvoertuie, Toni Fritz.

Om die land se groeiende bevolking te voed, sal daar tussen 5 en 6 miljoen ton mielies ingevoer moet word, ná aanvanklike ramings van 4 miljoen ton.

Private vervoerkontrakteurs gaan waarskynlik goeie sake weens die verhoogde graaninvoere doen. Boere met hul eie vragmotors kan self inspring om daaraan deel te neem, maar indien daar haakplekke by die hawens is, kan hulle nogmaals geld verloor, afgesien van hul swakker opbrengste.

Transnet het blykbaar 2 000 goederetrokke weer in gebruik gestel om sy kapasiteit uit te brei.

 

‘n Ekonoom van Graan SA, Corné Louw, sê dat daar “beslis” ‘n toename in die padvervoer van graan gaan plaasvind. Transnet is egter “vol vertroue” dat die grootste deel van die graan per spoor gehanteer sal word.

Ongeveer 5 miljoen ton mielies sal in die bemarkingsjaar van 1 Mei tot April aanstaande jaar ingevoer word, volgens Graan SA.

Terselfdertyd sal koringinvoere meer as 2 miljoen tydens dieselfde periode bereik. Gewoonlik voer Suid-Afrika slegs 2 miljoen ton mielies en 1,5 miljoen ton koring in.

 

Ander lande wat ook via die Suid-Afrikaanse hawens bedien gaan word, is Zimbabwe, Botswana, Lesotho, Namibië en Swaziland wat 630 000 ton mielies en 270 000 ton koring sal ontvang.

Indien ‘n noodtoestand ontstaan, kan van Transnet se uitvoerkapasiteit ook in invoerkapasiteit omgeskakel word. “Gebeurlikheidsplanne” vir so iets bestaan.

 

ANC kla 3 ‘rassiste’ van DA aan, om ‘rasse-oorlogvoering’ te voorkom

Die ANC het losgetrek met ‘n reeks regsprosedures teen vier mense wat die party as die land se grootste “rassiste” beskou. Twee van hulle is DA-ampsdraers, Dianne Kohler Barnard en Chris Roberts, asook die sedertdien geskorste DA-lid wat reeds nasionale en internasionale berugtheid verwerf het, Penny Sparrow. Die enigste swart “rassis” wat aangekla word, is Velaphi Khumalo, ‘n werknemer van die dept. sport, kuns en kultuur in die Provinsie Gauteng. Khumalo het op Facebook geskryf dat blankes die “Hitler-behandeling” moet kry (sien hier bo).

Waarskynlik word Khumalo slegs aangekla omdat die Suid-Afrikaanse Raad van Joodse Afgevaardigdes druk toegepas het oor die verwysing na Hitler en die implisiete goedkeuring van sy beleid jeens Jode in die Facebook-uitspraak, en nie omdat die ANC-SAKP hoegenaamd begaan is oor antiblanke stellings nie. Dié afleiding word gestaaf deur die ANC se mediaverklaring gister waarin dié stap só omskryf word:

“Die ANC se sekretaris-generaal, Gwede Mantashe, sê die ANC beskik as regerende party oor die morele en wetlike verpligting om leierskap te betoon en die verantwoordelikheid om rassekonflik en -oorlogvoering te voorkom. Die aansoeke word primêr gebring om die waardigheid van die swart, kleurling- en Indiërmeerderheid te herstel en om die grondwet te verdedig.”

 

Die party wil hê die vier moet onder die Wet op die bevordering van gelykheid en die voorkoming van onbillike diskriminasie vervolg word. Die ANC het Dinsdag ‘n aansoek by die Wes-Kaapse Hooggeregshof teen die DA-lid, Dianne Kohler Barnard, geliasseer, waarin hy om ‘n bevel vra dat Paul Kirk se Facebook-inskrywing, wat verlede jaar in September deur Kohler Barnard gedeel is, as rassisties verklaar word en haatspraak en onbillike diskriminasie verteenwoordig, soos dit deur die wet omskryf word.

In sy funderende eedsverklaring beweer Gwede Mantashe dat “Kohler Barnard se oproep om die terugkeer van PW Botha ‘n oproep is vir die terugkeer van verdrukking, onderdrukking, aanhouding, marteling, skending en moord op ontelbare swart, Indiër- en kleurlingmense. Trouens, dit is ‘n oproep om die terugkeer van die gehate stelsel van apartheid self.”

Die ANC eis ook ‘n verklarende bevel dat die gedrag van Kohler Barnard die lede en ondersteuners van die ANC, asook die miljoene swartmense, kleurlinge en Indiërs hul inherente waardigheid misken, tesame met hul grondwetlike reg om hul waardigheid geag en beskerm te sien. Daar word ‘n beroep op die hof gedoen om te verklaar dat spraakvryheid nie rassistiese uitlatings en haatspraak insluit nie.

R500 000-boete vir Kohler Barnard

Die regerende party wil hê dat Kohler Barnard R500 000 moet betaal aan ‘n organisasie wat nie-rassigheid, vedraagsaamheid en versoening in Suid-Afrika bevorder en doen ‘n beroep op die direkteur van openbare vervolgings om ook strafregtelike stappe teen haar te neem.

In die Port Elizabethse Hooggeregshof doen die ANC insgelyks aansoek teen die DA-raadslid in die Nelson-Mandelabaai-metropolitaansemunisipaliteit, mnr. Chris Roberts, wat sy mederaadslid, Mongameli Bobani, tydens debat in die raadsaal op 30 Julie verlede jaar ‘n “bobbejaan”  genoem het.

Gisteroggend het die ANC insgelyks ‘n aansoek teen Penny Sparrow in die Scottburgse Landdroshof in Kwazulu-Natal geliasseer weens haar uitspraak dat swartes wat rommel strooi ape is. Dié uitlating moet volgens die ANC tot haatspraak verklaar word en sy moet vergoeding ten bedrae van R200 000 betaal, asook “as ‘n misdadiger” vervolg word.

Volgens dieselfde verklaring deur Zizi Kodwa, die ANC se mediawoordvoerder, het die ANC Dinsdag ‘n geding teen Velaphi Khumalo in die Roodepoortse Landdroshof ingestel vir haatspraak en onbillike diskriminasie na aanleiding van sy oproep “dat Suid-Afrika van alle blankes gesuiwer moet word soos wat Hitler met die Jode gemaak het” (sien skermskoot hier bo).

PW Botha en Verwoerd se beleid ‘identies met dié van Hitler’

Volgens Mantashe, “het die ANC vele blanke en Joodse lede en is dit die organisasie se plig om sy lede te beskerm en die fokus op die bou van ‘n nierassige maatskappy te behou. Hitler het die Jode aan die mees onmenslike vorme van menseregteskendings onderwerp, identies met dít waaraan swartes, kleurlinge en Indiërs in Suid-Afrika onder PW Botha en Hendrik Verwoerd onderwerp is.”

 

Boere in Nood is snelgroeiendste Facebook-groep ter wêreld en help boere landwyd

“Dit is ‘n wonderlike dag vir die mense van Suid-Afrika wat die Boere in Nood-groep op Facebook ondersteun,” sê die organiseerders. Die groep is gestig om boere wat deur die droogte ramp binne Suid-Afrika geraak word te ondersteun. Die inisiatief wat in November 2015 begin is, voor ander organisasies en georganiseerde landbou-organisasies, is vandag die snelgroeiendste Facebook-groep in Suid-Afrika. In die tweede posisie is die Facebook-groep wat help om water te versprei na Suid-Afrikaners wat ’n skaarste aan water ondervind – Water Shortage South Africa.

Caroline van Saasen, stigter van WSSA het met ‘n werknemer van die LA Times gepraat en ’n vrou van Facebook. “Sy was die een wat vir my gesê het dat ons die groep op Facebook is wat die tweede vinnigste groei en dat albei die top-groepe Suid-Afrikaans is.  ‘Boere in Nood’ is nommer een,” sê Van Saasen.

Die BIN-projek is ʼn skarewerwingsprojek en het al honderde boere in erge droogtetoestande regoor Suid-Afrika gehelp. Die Boere in Nood-groep was eerste op die grond en besig deur Kersfees en Nuwejaar om boere by te staan.

Die direkteure van dié nie-winsgewende organisasie, NC Schoombee (stigter), Nico Gerber en Carina Swartz, het die nood op voetsoolvlak raakgesien en het besluit om in te spring en werk te maak van die saak. Hulle het sosiale media gebruik om ʼn noodroep te begin na die burgers van Suid-Afrika. Die blad het binne 10 weke oor die 45 000 lede bereik en fondse het wêreldwyd vanaf Amerika, Brittanje, Europa en Kanada begin instroom.

NC Schoombee sê hy is so dankbaar om te sien dat sy visie wat deur die Here gegee is, posgevat het op die manier wat dit geskied het. “Die mense op voetsoolvlak is dié wat die verskil maak en ons is dankbaar teenoor al die lede van ons blad wat hande uitgesteek het om te help.” Die groep doen ook ‘n beroep op kunstenaars en bekende persone om hulle gewig saam met die mense in te gooi.

Verskeie boere en vervoermaatskappye hettot dusver gratis hulp gebied aan die groep. “Ons doen ʼn beroep op Suid-Afrika en die wêreld om hande te vat met ons en nog fondse, voer en vervoer beskikbaar te stel vir ons boere in die ramp,” sê die groep.

“Mense maak die verskil wat die verskil maak. Saam kan ons ‘n verskil maak.’

Boere wat in nood is, asook skenkers, is welkom om met Carina Swartz by die e-posadres boereinnood[by]gmail.com kontak te maak.

Die publiek kan aansluit en help om saam ʼn verskil te maak by die Facebookgroep, Boere in Nood.

 

Kaapstad wil nie SA-vlag op gebou sien nie

Die Kaapstadse Metro het ‘n kennisgewing aan die bestuur van die Overbeek-gebou in Kloofstraat beteken om die gebruik van die kant van die gebou as advertensieruimte te staak, het RSG berig.

Die woonstelblok is in omstredenheid gehul nadat ‘n Zuma-Must-Fall-banier verlede week daar opgehang is.

Die banier is die afgelope naweek in ‘n gespanne atmosfeer deur ANC-ondersteuners afgetrek.

Dit is intussen met ‘n Suid-Afrikaanse landsvlag vervang.

‘n Stadswoordvoerder, Priya Reddy sê die gebruik van die spasie is strydig met die stad se verordeninge.

Sy sê indien die vlag nie teen môre verwyder word nie, sal die stad regstappe doen.

Hillary, Bernie, Trump en Cruz stoei vir benoeming

Hillary Clinton en Bernie Sanders het mekaar Sondag gepak in die Demokratiese presidensiële benoemingstryd, die laaste keer voordat Iowa op 1 Februarie na die stembus gaan.

Clinton het sluikhoue na die gewilde Sanders in Charleston, Suid-Carolina probeer inkry.

Die twee kandidate het oor banke, lobbies, wapenbeheer en gesondheidsorg gestoei om swart kiesers te beïndruk.

Die ander kandidaat, Martin O’Malley, oudgoeweneur van Maryland, kon volgens ontleders, geen hond haaraf maak in die debat nie.

Na verwagting kan Sanders, ’n senator van Vermont, Hillary in New Hampshire op 9 Februarie verslaan.

Die Republikein, Donald Trump, het Maandag in sy toespraak aan 11 000 mense gesê hy sal “beleërde Christene” ondersteun.

Trump (69), die voorloper presidentskandidaat se verskyning by Liberty College in Virginië, is met dreigemente van studente-opstande begroet, maar hy het uiteindelik ontvanklike gehoor gehad.

Liberty is ’n evangeliese bas­tion. Trump en Cruz is tans in ’n taai stryd gewikkel in Iowa, die eerste staat wat op 1 Februarie sal stem vir die benoeming vir ’n Republikeinse presidentskandidaat.

Cruz se pa is ’n evangeliese predikant en Cruz reken daarom op steun vanuit die evangeliese gemeenskap.

Oudste Christen-monnikeklooster in Irak verwoes

Satellietfoto’s wat deur The Associated Press bekom is, het bevestig wat Midde-Oosterse geskiedkundiges en kerkleiers gevrees het: Van die oudste Christen monnikeklooster in Irak, het ‘n hoop rommel oorgebly.

Dis nog ‘n slagoffer van die Islamitiese Staat-groep (ISIS) se volgehoue vernietiging van erfenisplekke wat deur die groep as kettery beskou word.

Die St. Elijah monnikeklooster was die afgelope 1 400 jaar ‘n plek van aanbidding. In die vroeë millennia het geslagte monnike kerse in die nisse aangesteek en in die kapel en by die altaar aanbid.

Die Griekse letters, chi en rho, wat die eerste twee letters van Christus se naam is, is naby die ingang gegraveer.

Voor dit vernietig is, het die gedeeltelik gerestoureerde 27 000 vierkante voet klipgebou soos ‘n fort op ‘n koppie naby Mosul gestaan.

Deskundiges sê stootskrapers, swaar toerusting en waarskynlik plofstof is gebruik om van die klipmure in ‘n veld van grys stof te omskep.

St. Elijah is nou deel van die groeiende lys van meer as 100 godsdienstige en geskiedkundige plekke wat gestroop en verwoes is. Antieke monumente in die stede Nineve, Palmyra en Hatra het ook in die slag gebly.

Museums en biblioteke is geplunder, boeke is verbrand en kunswerke vernietig of verhandel.

Die monnikeklooster is in 590 gebou. Tragedie het in 1743 toegeslaan toe 150 monnike, wat geweier het om die Islamitiese geloof te aanvaar, daar deur ‘n Moslemgeneraal vermoor is.

MTN staar nog yslike boetes in die gesig

Die selfoonreus, MTN sê hy is nog nie amptelik in kennis gestel van boetes teen sy sakebelange in Kameroen nie, maar dat die kwessie ondersoek word.

Kameroen se teenkorrupsie-raad sê MTN het glo versuim om belasting op speletjies en dobbeldienste te betaal, het RSG berig.

Die maatskappye MTN en Orange is volgens berigte as deel van ‘n omvattende operasie met sowat 160 miljoen dollar beboet.

‘n MTN-woordvoerder, Chris Maroleng sê die maatskappy sal kommentaar lewer sodra sy ondersoek afgehandel is.

Die maatskappy is verlede jaar met sowat 80 miljard rand in Nigerië beboet.

Berigte is ook verlede jaar ontvang van ‘n boete in Uganda.

EU Immigrasiekrisis: Rooi voordeure en toedeure

Asielsoekers in ‘n noordelike Engelse dorp glo hulle is maklike teikens vir rassiste omdat hulle almal gehuisves word agter rooi voordeure.

Die huise in Middlesbrough word besit deur ‘n subkontrakteur van G4S.

Nadat ‘n verslag oor die rooi deure verskyn het op die voorblad van Woensdag se Times, het ‘n woordvoerder vir G4S gesê sy subkontrakteur, Jomast, sal die deure verf.

Asielsoekers sê hulle deure en vensters is met eiers en klippe gegooi, hondontlasting besmeer en hulle moes rassistiese skimpe verduur, het die Times berig.

Oostenryk het intussen aangekondig dat hulle die invloei van asielsoekers drasties sal inperk vir 2016.

Volgens die kanselier, Werner Faymann kan die land nie soveel asielsoekers aanvaar nie.

Die owerhede sal die syfer oor die volgende vier jaar tot 30 000 per jaar beperk word, in vergelyking met die 90 000 aansoeke verlede jaar.

Serwië het in antwoord hierop gesê die getal migrante wat toegelaat word om deur die land te reis om asielaansoeke in Oostenryk en Duitsland in te dien, sal ook beperk sal word.

Die Europese Unie het intussen gevra vir ‘n beraad oor migrasie. Faymann sê hulle het nog nie besluit wat sal gebeur wanneer die beperkings bereik word nie.

Serwië sal vanaf Woensdag begin om migrante weg te wys het Reuters berig.

Die nuusagentskap het ‘n Serwiese minister aangehaal. Die minister van Arbeid Aleksandar Vulin het gesê Belgrado sal dienooreenkomstig met Oostenryk en Duitsland optree.

Die Duitse kanselier, Angela Merkel het gesê Oostenryk se besluit is nie “behulpsaam” nie.

Sy verkeer onder groot druk van haar koalisievennoot, die CSU om asielsoekers te beperk. Merkel is egter deur George Soros geloof vir haar beleid om asielsoekers te instroom.

Die miljardêrfilantroop Soros, het in ‘n onderhoud aan die New York Review of Books gesê Merkel is die sleutel om die EU te dwing om die instroming te aanvaar.