Die Kaapstadse Metro het ‘n kennisgewing aan die bestuur van die Overbeek-gebou in Kloofstraat beteken om die gebruik van die kant van die gebou as advertensieruimte te staak, het RSG berig.
Die woonstelblok is in omstredenheid gehul nadat ‘n Zuma-Must-Fall-banier verlede week daar opgehang is.
Die banier is die afgelope naweek in ‘n gespanne atmosfeer deur ANC-ondersteuners afgetrek.
Dit is intussen met ‘n Suid-Afrikaanse landsvlag vervang.
‘n Stadswoordvoerder, Priya Reddy sê die gebruik van die spasie is strydig met die stad se verordeninge.
Sy sê indien die vlag nie teen môre verwyder word nie, sal die stad regstappe doen.