Kategorie: Nuus

Nederlandse premier knip staatsbesoek kort na ‘terreur’

Die staatsbesoek van die Nederlandse eerster minister, Mark Rutte is kortgeknip deur die terreur-aanvalle in Frankryk.

Rutte sal nie die res van sy program in Suid-Afrika voltooi vir Woensdag nie. Hy het Dinsdagaand teruggekeer na Nederland.

Die Nederlandse staatshoof sou besoeke aan Liliesleaf Farm gebring het om die Rivonia-terroriste te vereer, die Diepsloot-lokasie waar Nederlandse ontwikkelingsprojekte aan die gang is en Kaapstad waar hy verskeie Nederlandse projekte sou besigtig.

Rutte het sonder ironie gesê die “barbaarse” aanvalle in Parys het die belangrikheid van globale samewerking uitgelig in die stryd teen terrorisme.

Nederland het voorheen ANC-terreur teen burgerlikes in Suid-Afrika aktief ondersteun.

Rutte is ook gevra deur ‘n Nederlandse joernalis of hy nie bang is dat sy opmerking dat Nederland oorlog verklaar het teen die Islamitiese staat, van Nederland ‘n teiken van die terreurgroep sal maak nie. Hy het nie die vraag beantwoord nie.

President Jacob Zuma het by dieselfde mediakonferensie van die besoekende Nederlandse staatshoof ‘n beroep op wêreldleiers gedoen om die oorlog teen terreur te verskerp.

Zuma sê Afrika is reeds besig om terreurgroepe in die gebied te beveg. Hy sê almal stem saam dat `n saamgestelde poging onder die vaandel van die Verenigde Nasies die beste sal werk.

Hy het skerp kritiek teen die VSA se beleid van regime-verandering uitgespreek.

Zuma sê die volgehoue inmenging deur sekere lande in die onafhanklike state in die Midde-Ooste het die terreurgroepe veroorsaak.

Volgens hom skep die voorkeur vir militêre ingryping eerder as politieke oplossings, die teelaarde vir gewelddadige ekstremisme en terreur.

Internasionale sokkerwedstryd afgestel na bomdreigement

Geweervuur is Dinsdagnag tydens ‘n klopjag in ‘n noordelike voorstad van Parys gehoor.

Een polisiebeampte is glo beseer tydens die operasie in Saint-Denis, naby die Stade de France waar terroriste Vrydag twee ploftoestelle laat afgaan het.

Die klopjag, wat deel uitmaak van die soektog na terreuraanvalverdagtes, volg kort nadat die sokkerwedstryd tussen Duitsland en Nederland gekanselleer is.

Volgens sommige berigte is ‘n verdagte pakkie gevind in die Hannover-stadion waar die wedstryd sou gespeel word, maar Kreiszeiting.de het berig dat ‘n ambulans vol plofstof buite die stadion gevind is.

Swaargewapende anti-terreureenhede is in die gebied ontplooi. Die Duitse polisie het bevestig dat die bedreiging geloofwaardig is.

Nadat die nuus bekend geword het, het plaaslike polisie ondersteuners gevra om “vinnig, sonder paniek huiswaarts te keer” en die arena is ontruim.

Geen voertuie is toegelaat om die sportarena te verlaat nie.

Sekuriteit is verhoog ná Vrydag se terreuraanvalle in Parys.

Angela Merkel, Duitse kanselier, sou die wedstryd bywoon en ‘n verklaring maak ook terreur. Sy is vergesel deur die die visekanselier Sigmar Gabriel en minister van justisie Heiko Maas.

Die gebeure het egter die leierskap verhoed om hul toesprake te lewer.

‘n Operasionele kamer is by die stadion ingerig sodat kanselier Merkel, die Duitse minister van binnelandse sake Thomas de Maiziere asook die minister van binnelandse sake van die deelstaat Nedersakse, Boris Pistorius ingelig bly oor verwikkelinge.

Pistorius (SPD) het later gesê niemand is nog in verband met die voorval in Hannover in hegtenis geneem nie en geen plofstof is gevind in enige ambulans of ander voertuig nie.

Maar De Maiziere het ook beklemtoon dat hy nie kommentaar wil lewer oor nadere besonderhede rakende die omstandighede wat gelei het tot die kansellasie van ‘n internasionale wedstryd nie.

In reaksie op vrae oor die redes vir die ontruiming, het hy gesê: “Sommige van hierdie antwoorde sal die bevolking ontwrig.”

Hannover se polisiehoof Volker Kluwe het Dinsdagaand op NDR televisie ook herhaal dat hulle die bedreiging baie ernstig opneem: “Die deurslaggewende leidraad het ons 15 minute ná die opening van die wedstryd bereik.”

Gewelddadige lokasieprotes deur wit ANC-lede ondersteun

Die polisie oorweeg tans of die Masiphumelele-lokasie te gevaarlik vir hulle is om ‘n satelliet-polisiekantoor daar te vestig.

Adjunk-minister van polisie Maggie Sotyu het Masiphumelele se inwoners in September belowe dat ‘n mobiele polisiestasie opgerig sal word totdat grond vir permanente perseel gevind kan word.

Gewelddadige protes, waartydens “inwoners” herhaaldelik beter polisiëring en ander dienste eis, duur reeds maande.

Verlede week het die Wes-Kaapse polisie se kommunikasiehoof, brigadier Novela Potelwa gesê die polisie oorweeg veiligheid in die gebied om te bepaal of ‘n mobiele polisiestasie daar opgerig kan word.

Potelwa se kommentaar het gelei tot ‘n petisie vir ‘n permanente polisiekantoor wat egter onderteken is deur net 67 inwoners, onder meer deur die voormalige minister van verdediging, Ronnie Kasrils en ANC-aktivis Ben Turok.

Nie een van die twee ondertekenaars woon in die lokasie nie.

Die petisie is Sondag oorhandig aan LUR vir gemeenskapsveiligheid Dan Plato.

Univ. van Stellenbosch krabbel (voorlopig) terug oor verengelsingsplan

In die lig van oplaaiende verset en kritiek vanuit Afrikanergeledere het die Universiteit van Stellenbosch besluit om voorlopig sy onmiddellike verengelsingsplan op te skort. Tydens ‘n vergadering van die uitvoerende bestuur wat Sondag gehou is, is verklaar dat “ten minste die goedgekeurde minimum-taalaanbod in Afrikaans en in Engels in 2016 aan die Universiteit Stellenbosch (sal) geld. Die Afrikaanse aanbod sal nie afgewater word nie. Indien veranderinge aan die Taalbeleid in die vooruitsig gestel word, sal die proses volgens statutêre voorskrifte geskied.”

Die georkestreerde veldtog teen Afrikaans aan Stellenbosch en alle ander universiteite is egter nog nie verby nie. Die enkele geluide wat die DA se Belinda Bozzoli gemaak het oor die “grondwetlike reg van Afrikaanssprekendes om onderrig in die taal van hul keuse te ontvang” is hewig deur sowel die EFF se Julius Malema as die anti-wit kleurlingmeningsvormer Eusebius McKaiser aangeval. In sy rubriek in die Independent-groep se koerante en op iol.co.za, vaar McKaiser teen Afrikaans uit en sê:

“Afrikaans has a horrible history in our country, still labelled as the language of the oppressor by many people – even though it is the mother tongue of some of us who are black… This new language policy for Stellenbosch truly opens up the possibility of Afrikaans liberating itself from an odious socio-linguistic and political history.”

Ook Max du Preez bepleit steeds die verengelsing van sy almal mater, die Universiteit van Stellenbosch, terwyl die renegaatakademikus en Boerehater Fanie Cloete op Netwerk24 beweer dat “Stellenbosch nog nooit Afrikaans was nie”.

In die verklaring van die Universiteit van Stellenbosch wat gister uitgereik is, word daar gepraat van ‘n “versnelde Engelse aanbod” aanstaande jaar, asook onheilspellend vermeld:

“Die feit dat die Taalbeleid as gevolg van statutêre riglyne nie voor die einde van 2015 verander kan word nie, moenie gesien word as ʼn instrument om Engelssprekende studente te benadeel nie.”

Oor die benadeling van Afrikaanse studente word geen woord gerep nie. Die volledige verklaring van die universiteit se mediakantoor is hier te lese.

Alles in ag genome, sal die Matiestaalstryd dus aanstaande jaar voortduur met die ekstreemlinkses van Open Stellenbosch wat nou bloed geruik het en ‘n volledig Engelse US wil sien. Hierin word hulle deur die Engelse media en die vernaamste Naspers-rubriekskrywers gesteun.

 

Twee universiteite gesluit weens geweld

Twee universiteite in Kaapstad bly steeds gesluit weens gewelddadige betogings deur studente, het RSG berig.

Die Kaapse Skiereiland Universiteit van Tegnologie het opdrag aan studente gegee om nie later nie as Woensdagmiddag vieruur uit die koshuise te wees.

Die bestuur sê die besluit is geneem in die lig van die voortslepende betogings op kampusse. Eksamens van nie-finale jaar studente is tot 11 Januarie opgeskort.

Finale jaar studente sal teen die einde van die week ingelig word oor gewysigde eksamendatums. Personeel kan moontlik Donderdag terugkeer.

Alle akademiese aktiwiteite aan die Universiteit van die Wes-Kaapland is ook opgeskort.

UWK het vroeër sy eindeksamen na ‘n perseel buite sy Bellville-kampus verskuif, nadat grootskaalse vandalisme en brandstigting voorgekom het.

Maandag moes sowat 400 finale jaar studente hul eksamens elders aflê. Drie studente is in hegtenis geneem op aanklagte van brandstigting.

Die Universiteit van Kaapstad se eksamens word tans ook ontwrig deur ‘n groep oproeriges. Betogers het die Sportsentrum op die hoërkampus gevandaliseer.

Verskeie ruite is gebreek en rou riool is gestort terwyl eksamens aan die gang was.

Beurtwater vir Gauteng ingestel

Gautengers kan binnekort uitsien na beurtwater. Rand Water sê die vraag is groter as die water wat in opgaardamme beskikbaar is.

Die instelling sê om aan die hoër vraag te voldoen moet water uit opgaardamme vrygelaat word wat die provinsie in ‘n kwesbare situasie laat.

“Ons sal in sekere gevalle moontlik moet ingryp. Ons het Rand Water gevra om te kyk na die verbruikvlaktendense. As dit nodig raak om watervoorsiening veral gedurende sekere ure te beperk om die volumes water in reservoirs en stoorfasiliteite te bestuur, gaan ons dit doen,” het die voorsitter van die Gauteng Water en Sanitasie Forum Jacob Mamabolo gesê.

Intussen sal alle gebiede in Gauteng waar water gepomp, versprei en gestoor word, vrygestel word van beurtkrag.

Die Forum sê dit is om waterbesparing te verseker in die lig van die huidige waterkrisis oor die hele land. Rand Water sê die vraag na water het toegeneem.

Kragonderbrekings raak pompkapasiteit en verlaag sodoende water in die reservoirs, sê Mamabolo.

Onrus by universiteite duur voort

‘n Nagwaak by die Universiteit van Johannesburg se Kingsway-kampus in Aucklandpark het die nawwek gewelddadig geraak.

Die SABC berig polisie het rubberkoeëls gebruik om die studente uiteen te jaag, nadat hulle probeer het om by die universiteit se gronde in te kom. Betogers het daarna die verkeer op Kingsway-laan ontwrig deur buitebande te brand.

Hulle het ook ‘n park naby die kampus aan die brand gesteek. Die betogers het ‘n beroep gedoen vir die beëindiging van uitkontraktering en registrasiefooie by die universiteit.

Die Universiteit van Wes-Kaapland het intussen alternatiewe maniere aangekondig vir studente om hul akademiese jaar te voltooi weens ‘n onstabiele situasie op die kampus.

Die registrateur, Nita Lawton-Misra sê finale jaar-studente in al die fakulteite sal aan een of ander vorm van assessering onderhewig wees. Die huidige eksamenrooster vir finale jaar-studente sal ook nog steeds Maandag van krag wees.

Sy sê alle ander studente kan hul deurlopende punte in finale punte omskakel, of om alternatiewe assessering aansoek doen.

Droogte: SA moet mielies invoer

Die regering sê hy gaan meer as R2,3-miljard bestee om mielies in te voer.

Die SABC berig dit kom te midde van een van die ergste droogtes in die land in 23 jaar.

Suid-Afrika sal vir die eerste keer in sewe jaar ‘n netto-invoerder van mielies wees. Die regering sê witmielies sal van Zambië en Meksiko ingevoer word, terwyl geelmielies van Argentinië en Brasilië verkry sal word.

Die landbou-organisasie, AgriSA meen Suid-Afrika benodig sowat 770-duisend ton mielies vir die seisoen, waarvan sestig persent reeds ingevoer is.

Die minister van landbou, Senzeni Zokwana het vroeër gesê die droogte kan nog ‘n ramp vir die hele streek van suidelike Afrika word indien dit voortduur. Vyf provinsies – Noordwes, KwaZulu-Natal, die Vrystaat, Limpopo en Mpumalanga – is tot dusver tot rampgebiede weens die droogte verklaar.

Ses vas na moord op wildsboer

Ses verdagtes na verwagting Maandag in die landdroshof in Warmbad (Bela-Bela) verskyn na Saterdag se moord op ‘n plaaslike boer, Piet Venter.

Venter, 51, ‘n wildsboer van die Rooiberg-omgewing, is in sy huis oorval terwyl hy geslaap het. Hy is vermoedelik verwurg deur sy werkers.

Een van die verdagtes is dieselfde dag nog mbv spoorsnyers vasgetrek. Die ander vyf is Sondag in hegtenis geneem.

Drie van hulle is in Pretoria opgespoor terwyl die ander in die Warmbad-omgewing in hegtenis geneem is. ‘n Hulle staan tereg op ‘n aanklag van moord.

Die verdagtes is betrap met die kluis wat uit die plaashuis gesteel is.

Venter se wildplaas is naby die plaas waar Petro Res op 18 September doodgeskiet is.

Haar bebloede lyk is saam met dié van haar swaar gewonde bejaarde man en vriendin in die huis op die Motlopi Lodge-wildplaas toegesluit.

Frankryk val ISIS-vestings in Sirië aan

Franse vegvliegtuie het vestings van die Islamitiese Staat in Sirië aangeval nadat ISIS verantwoordelikheid vir die gekoördineerde terreuraanvalle in Parys aanvaar het.

Amerikaanse intelligensie-dienste het na die aanvalle ingestem om hul data te deel met Frankryk, en het begin met die verskaffing van “fokuspakkette” oor die Islamitiese Staat se posisies, het die Wall Street Journal Sondag berig.

Die Pentagon se perssekretaris Peter Cook het in ‘n verklaring gesê dit is “konkrete stappe wat die VSA en die Franse moet neem in ons noue samewerking van vervolging om ‘n volgehoue veldtog verder te versterk teen ISIS.”

Die lugaanvalle is uit weerwraak vir die slagting waarin minstens 132 burgerklikes dood is.

Twaalf Franse vliegtuie, insluitend 10 vegvliegtuie, het deelgeneem aan Frankryk se grootste lugaanval nog ooit in Sirië, luidens die verklaring van die Franse ministerie van verdediging.

Volgens die Siriese groep is 30 lugaanvalle uitgevoer en is minstens 20 bomme is op teikens in Raqa laat val, wat as ‘n vesting van ISIS beskou word.

Die teikens sluit ‘n beheersentrum, ‘n wapenopslagplek en opleidingskamp in. Dit is nie bekend hoeveel skade aangerig is nie. Frankryk het die naweek onderneem om die ISIS te vernietig.

Intussen sê Frankryk hulle is op soek na een persoon wat moontlik een van die Parys terreuraanvallers is.

Daar is ‘n beroep op die publiek gedoen vir inligting oor ‘n man met die naam Salah Abdesalam.

Abdesalam is kortliks deur die polisie naby die Franse grens Saterdagoggend na die aanvalle aangehou, maar is later vrygelaat.

Hy het die Volkswagen Polo gehuur wat buite die Bataclankonsertsaal geparkeer was, waar 89 mense later doodgeskiet is.

Volgens ‘n berig van Associated Press, het vier Franse amptenare gesê hy was een van die drie mense wat by die Franse grens voorgekeer is, sowat 120 myl van Parys, ure nadat hy geïdentifiseer is as die huurder van die motor.

‘n Internasionale lasbrief vir sy inhegtenisneming is intussen uitgereik.

Vroeër is nog ‘n verdagte as die 29-jarige inwoner van Parys, Omar Ismail Mostefai geïdentifiseer.

Sewe mense is reeds in België in hegtenis geneem in verband met die aanvalle.

Die dodetal het vroeër tot 132 gestyg nadat nog drie mense in die hospitaal aan hul beserings beswyk het. Minstens 352 mense is in die aanvalle beseer.

Ontleders meen, nalv van die gekoördineerde aanvalle in Parys, dat ‘n groep soos ISIS nie sonder die ondersteuning van ‘n staat kan bestaan nie.