Karin Roodt – Bladsy 99

Zuma mag appelleer oor spioenasiebande

Regter Rammaka Mathopo het Vrydag in die Johannesburgse hooggeregshof verlof tot appèl aan president Jacob Zuma se regspan toegestaan ivm die openbaarmaking van transkripsies van die omstrede spioenasiebande.

Hulle voer aan dat die bande vertroulik is en kan Zuma benadeel indien die transkripsies oorhandig word. Die nasionale vervolgingsgesag (NVG) het in 2009 besluit nalv van die bande, om die korrupsieklagte teen Zuma te laat vaar.

Mathopo het in sy uitspraak gesê daar is verskillende interpretasies moontlik van die Appèlhof se vroeëre beslissing dat die NVG die dokumente aan die DA moet oorhandig.

Die appèlhof het die NVG destyds 14 dae gegee om alle dokumente, opnames, materiaal en getuienis wat gelei het tot die onttrekking van kriminele aanklagte teen Zuma te oorhandig.

Die DA het die hof genader in September verlede jaar om voormalige waarnemende NVG-hoof Nomgcobo Jiba te dwing om die verkorte rekord, insluitend die opnames, te oorhandig nadat die NVG versuim het om die opnames binne 14 dae te gee.

Regter Rammaka Mathopo het verlede maand beveel dat die interne memoranda, verslae of notules van vergaderings wat handel oor die inhoud van die opnames of die transkripsie self oorhandig moet word, vir sover hierdie dokumente nie die vertroulikheid van Zuma se skriftelike of mondelinge vertoë tot die NVG skend nie.

Die DA wil die transkripsies bekom wat hulle glo inkriminerende inligting bevat oor die president.

Mathopo het gesê daar is verskillende interpretasies van die hofbevel moontlik en dus sal die Appèlhof daaroor moet beslis.

Vermeende Bredasdorp-verkragter verskyn

‘n Voorverhoor gaan vanoggend in Kaapstad gehou word in die saak van verkragting en moord teen Johannes Kana.

Kana het reeds skuld beken op ‘n aanklag van seksuele aanranding.

Die Bredasdorp-tiener, Anene Booysen (17), is in Februarie op ‘n buitengewone wrede wyse vermoor. Sy is op ‘n konstruksieterrein gevind.

Die saak sal na verwagting na die Swellendamse hof verskuif word waar ‘n verhoordatum in Oktober bepaal sal word.

Booysen was nog lewendig waar sy erg geslaan en haar ingewande oopgesny op ‘n konstruksieterrein in Bredasdorp op 1 Februarie gevind is.

Sy het in die Tygerberg-hospitaal ‘n dag later aan haar beserings beswyk.

Die staat beweer dat Kana haar eers verkrag het en haar daarna oopgesny het, wat gelei het tot haar dood.

In Mei, het die Staat aanklagte teen Kana se mede-beskuldigde, 22-jarige Jonathan Davids, teruggetrek.

Die Nasionale Vervolgingsgesag (NV) se woordvoerder Eric Ntabazalila het gesê ‘n ondersoek het aan die lig gebring dat daar onvoldoende getuienis is om ‘n skuldigbevinding teen Davids te kry.

Voordat sy dood is, het Booysen gesê vanuit haar hospitaalbed dat vyf of ses mans betrokke was by die aanval.

Sy het die naam “Zwai” geprewel, wat beide die bynaam van Davids en ‘n ander man Zwelitsha is. – eNCA

Talle dakloos na brand 40 plakkershutte verwoes

Raadslid Dewes bou mooi plakkershutte

Sowat 50 mense is dakloos gelaat nadat ‘n brand by die Rugby Club-lokasie in Roodepoort uitgebreek het, het die Johannesburgse nooddienste gesê.

Robert Mulaudzi, woordvoerder, het gesê die brand, wat omstreeks 05:00 uitgebreek het, is vermoedelik veroorsaak deur ‘n foutiewe elektriese toestel of ‘n kers. Altesaam 40 plakkershutte is verwoes.

Die DA het verlede jaar vrywilligers en besighede genader vir skenkings nadat ‘n brand ook tientalle plakkershutte in die lokasie vernietig het. Raadslid David Dewes het gesê omdat die regering nie huise voorsien nie, sal hy deur privaatondernemings werk om sy eie “noodplan” vir behuising te skep.

Die DA het die media op 25 Junie 2012 op ‘n begeleide toer geneem om te wys wat gedoen is asook om al die planne in die pyplyn te verduidelik vir splinternuwe huise. Die plakkers was baie in hul skik oor hul nuwe wonings.

Die eenparige terugvoer van die plakkers was dat hulle baie dankbaar en trots is.

Mulaudzi het gesê dit is die tweede brand in die laaste 24 uur. Altesaam 25 gesinne is Donderdag dakloos gelaat nadat 17 plakkershutte in Diepsloot in puin gelê is. – Sapa/praag

‘Staat besit net 14% van grond’

’n Grondoudit deur die kantoor van die landmeter-generaal het vasgestel dat die staat alleen 14% van die grond in Suid-Afrika besit.

Volgens die landmeter-generaal, Mmuso Riba, is 79% van die land se grond in privaatbesit.

Opmetings in die Transkei is nog nie voltooi nie, maar dit sluit slegs 7% van die totale landoppervlak in.

Opposisiepartye het gevra dat die verslag by die parlement ingedien word sodat die geldigheid van die bevindings nagegaan kan word.

Die kabinet het die verslag oor grondbesit tydens Woensdag se roetine-kabinetsvergadering aanvaar. Dit is deur die landmeter-generaal ter tafel gelê.

G20 diep verdeel oor Sirië

Die staatshoofde van die wêreld se vernaamste ekonomieë, die G20, kon nie daarin slaag om hulle diepe verdeeldheid oor die konflik in Sirië te oorkom by samesprekings by die G20-beraad wat tans in St Petersburg in Rusland plaasvind nie.

Die VN en Arabiese Liga se gesant vir Sirië, Lakhdar Brahimi, het hom ook by die leiers aangesluit en die hoofsekretaris van die VN, Ban Ki-Moon het druk probeer toepas vir ‘n internasionale vredeskonferensie oor Sirië.

Wêreldleiers het hulle eie standpunte probeer stel in toesprake van 10 minute elk, maar geen deurbraak kon bereik word nie.

Die Italiaanse Eerste Minister, Enrico Letta, het na afloop daarvan gesê die diepe verdeeldheid oor Sirië is nou slegs bevestig.

Amerika se gesant by die VN het vanuit New York, Rusland daarvan beskuldig dat hy die VN-Veiligheidsraad gyselaar hou, terwyl die Britse Eerste Minister, David Cameron, aangedui het dat Londen nuwe bewyse het van die gebruik van chemiese wapens. – RSG

Huldeblyke vir oud-rugby-administrateur stroom in

Huldeblyke stroom in na die dood van die voormalige rugbyadministrateur, Fritz Eloff. Die 93-jarige Eloff was vir 26 jaar die president van die Noord-Transvaalse Rugby-unie.

Hy was ook ‘n lid van die SA Rugbyraad se uitvoerende komitee vir 30 jaar, en ná die dood van Doc Danie Craven in 1993 het hy as die president van die SA Rugby Voetbalunie gedien.

Hy kon ook daarmee spog dat hy tussen 1989 en 1990 die voorsitter van die Internasionale Rugbyraad was.

Buiten rugby was hy die hoof van dierekunde aan die Universiteit van Pretoria vir 31 jaar asook die voorsitter van die Nasionale Parkeraad vir 16 jaar.

Die president van Saru, Oregan Hoskins sê Eloff was een van land se bestes en het ‘n integrerende rol gespeel om eenheid in rugby in Suid-Afrika teweeg te bewerkstellig. – RSG

Amnestie vir 1,6 miljoen op skuld-swartlys

Die Kabinet het Donderdag besware teen die opheffing van negatiewe kredietinligting opsy geskuif, en goedkeuring verleen aan die stap. Banke waarsku dat hul risiko’s sal verhoog en dit sal die verhoging van die koste van krediet beteken.

In terme van die Kabinetsbesluit, sal die negatiewe kredietinligting van verbruikers wat al hul skuld betaal het, skoongevee word as ‘n eenmalige gebeurtenis asook op ‘n deurlopende basis.

Die doel is om die swartlys van ongeveer 1,6 miljoen verbruikers uit te skakel – baie van hulle staatsamptenare – wat hul skuld betaal het, maar is nog steeds verhoed deur kredietburo’s van toegang tot krediet, verblyf en selfs werk .

Die skema sal die toegang van hierdie verbruikers tot die kredietmark verseker en hopelik ‘n hupstoot aan die verbruikersvraag meebring.

Terwyl die regering die plan op die basis van “herstellende geregtigheid” regverdig en die positiewe uitwerking op ekonomiese aktiwiteit beklemtoon, kan dit ‘n positiewe rol in die regerende party se vertoning in volgende jaar se algemene verkiesing speel.

Die Kabinet se besluit het nie die opposisie deur die banke in ag geneem nie. Banke het gewaarsku dat die gebrek aan inligting oor die kredietgeskiedenis van voornemende kliënte die risiko van kredietverskaffers verhoog.

Die Bankvereniging van SA is heftig gekant teen die plan en sal beswaar maak nadat die kennisgewing van die Kabinetsbesluit in die Staatskoerant verskyn het.

Die minister van Handel en Nywerheid Rob Davies verwerp die kommer, en het Donderdag verklaar dat dit bloot sou beteken dat kredietverskaffers behoorlike kredietvoorwaardes met al hul voornemende kliënte uitklaar.

Hulle sal nie langer in staat wees om net te kan staatmaak op die inligting wat verskaf word deur die kredietburo’s soos wat hulle gedoen het in die verlede nie, en sal eerder die bekostigbaarheid van krediet vir voornemende kliënte moet ondersoek.

Davies het gesê baie van die inligting wat deur kredietburo’s deurgegee word is “verouderd en misleidend”. Ook, onder die huidige stelsel is dit uiters moeilik, duur en tydrowend om die inligting deur die hof as sulks uit te wys. Dit sal ook aangespreek word.

Die Nasionale Kredietreguleerder ondersteun die skrapping van negatiewe kredietinligting.

In sy jaarverslag wat Donderdag ter tafel gelê is in die Parlement toon dit dat daar sowat 9,5 miljoen verbruikers met verswakte kredietrekords aan die einde van Maart was, ( 47,5 % van alle krediet-aktiewe verbruikers) , ‘n toename van ongeveer 500 000 meer as die vorige jaar.

‘n Kabinetsverklaring het opgemerk dat “toegang tot ‘n volhoubare kredietmark noodsaaklik is vir alle ontwikkelings-doelwitte”.

Derde Witsdosent afgedank oor seksuele teistering

‘n Derde dosent aan die Universiteit van die Witwatersrand (Wits) is skuldig bevind aan seksuele teistering, en afgedank.

Adam Habib, visekanselier, het gesê die instelling het ‘n beleid van zero-verdraagsaamheid tov seksuele teisteraars aanvaar. Twee ander dosente is in Julie oor dieselfde klagtes afgedank.

“Ons hoop dat die daadwerklike optrede in die gevalle ‘n duidelike voorbeeld stel dat seksuele teistering nie in enige vorm op ons kampusse geduld sal word nie.”

Die universiteit is besig met ‘n ondersoek teen nóg ‘n dosent. ‘n Taakspan is saamgestel om die oortredings te ondersoek.

Habib het Woensdag gesê hy aanvaar volle verantwoordelik vir die mishandelings wat op die kampus plaasgevind het.

“Ek wil om verskoning vra aan al diegene wat seksuele teistering ervaar het. Wits moet ‘n veilige plek wees en ons sal verseker dat dit is.” – Sapa

LUR gee bevel dat blou ligte aangeskakel word

Humphrey Mmemezi, destyds LUR vir plaaslike regering en behuising, het kort voor Thomas Ferreira se ongeluk beveel dat die blou ligte op sy motor aangeskakel moet word, het die Krugersdorpse landdroshof Donderdag gehoor.

Mmemezi het aanvanklik gelieg en gesê hy was nie in die voertuig toe die ongeluk gebeur het nie. Die Gautengse premier het egter later met die sak patats vorendag gekom.

Die bestuurder van die LUR se voertuig het homself ook nie aan die beseerde kind gesteur nie en net die skade aan sy voertuig bekyk, het omstanders aan die media bevestig.

Mmemezi het dié blouligbevel aan sy bestuurder, Joseph Semitjie, gegee voor hulle die LUR se huis op die dag van die ongeluk in November 2011 verlaat het.

“Ons het nie die blou ligte gebruik omdat ons wou nie. Die LUR het ons gesê om dit te doen,” het Semitjie se voormalige kollega Nomakhosi Onica Mashifane aan die hof gesê.

Semitjie staan tereg op vier aanklagte, waaronder die versuim om bystand aan beseerdes op ‘n ongelukstoneel te verleen.

Mashifane, wat ook nie haar gevorderde bestuurskursus voltooi het nie, het gesê hulle het nie stilgehou by stoptekens terwyl hulle die LUR vervoer het nie, omdat hulle haastig was.

Sy het gesê toe hulle in Paardekraal-rylaan in Krugersdorp aankom, het hulle die sirene aangeskakel om ander motoriste bewus te maak dat hulle aankom.

“Die motoriste uit verskillende rigtings het weens die sirene tot stilstand gekom en ons het gedink dit is veilig om aan te hou ry,” het Mashifane gesê.

Toe hulle aangehou ry het, het hulle ‘n geluid aan die linkerkant van die voertuig gehoor.

“Ons was reeds verby die kruising toe ons die geluid hoor en ons het toe gesien dat ons voertuig aan die linkerkant getref is,” het Mashifane gesê. – Sapa

ANC vra tugstappe teen City Power-stakers

Die ANC sê tugstappe moet teen stakende City Power-werknemers ingestel word.

Werkers staak sedert Woensdag oor n nuwe skofrooster en het meer as 10 woonbuurte vir die derde agtereenvolgende dag sonder elektrisiteit gelaat, het Eyewitness News berig.

Die kragonderbrekings het toevoer na die huis waar oudpresident Nelson Mandela aansterk ook geraak. Daar was spekulasie dat probleme met elektrisiteitsvoorsiening Mandela se herstel sal beïnvloed. Twee kragopwekkers is by die huis in Houghton opgemerk.

Jolidee Matongo, ‘n woordvoerder van die ANC, het gesê die party is teleurgesteld dat stakende werkers nie die regte kanale volg om aandag op hulle griewe te vestig nie

City Power ondersoek bewerings dat stakende werkers doelbewus sekere woonbuurte se kragtoevoer saboteer.

Die kragverskaffer het ‘n vergadering belê om die dispuut op te los, maar sê dit kan tot drie dae neem voor kragtoevoer weer na alle woonbuurte herstel is.

Matongo het gesê in die stadium is dit nie nodig vir plaaslike raadslede om in te gryp nie.

Twintig onderwysers vir bedrog gearresteer

Meer as 20 swart onderwysers van Mpumalanga is Donderdag in hegtenis geneem nadat hulle glo die Suid-Afrikaanse Inkomstediens (SAID) uit R7 miljoen geswendel het, het die Valke gesê.

Die onderwysers van die Ehlanzeni- en Bohlabela-distrik is by hul werkplekke in hegtenis geneem.

“Ons het 36 lasbriewe in Mpumalanga. Toe ek vanmiddag weg is, het ons reeds 22 mense in hegtenis geneem en nog mense word vasgetrek,” het kapt. Paul Ramaloko, woordvoerder van die Valke, gesê.

“Sommige van die onderwysers was nog by die werk, terwyl ander by rondgaande onderwyskantore in hegtenis geneem is. Hulle het na bewering die SAID deur belastingopgawes geswendel en die bedrag wat betrokke is, is R7 miljoen.”

Ramaloko het gesê die onderwysers sal Vrydag in vier howe op aanklag van bedrog verskyn.

“Hulle sal in die KaBokweni-, Komatipoort-, Bushbuckridge-, en Nelspruit-landdroshof verskyn.”

Die misdade is in 2012 gepleeg.

“In die tweede vlaag van arrestasies sal ons SAID-beamptes ook aankeer,” het Ramaloko gesê. – Sapa

Kabinet maan betogers, stakers tot kalmte

Die Kabinet het ‘n beroep op betogers sowel as stakers gedoen om hulself te weerhou van geweld. Die vakbond Amcu sê dat van sy lede by Sibanye se Beatrixgoudmyn in die Vrystaat aangeval is.

Dit het vrese opnuut laat ontstaan dat die staking in die goudsektor gewelddadig kan raak. Amcu se hoofsekretaris, Jeff Mphahle sê die vyf Amcu-lede is deur lede van die NUM aangeval wat wou keer dat hulle gaan werk.

Die reg om te staak moet op ‘n nie-gewelddadige wyse geskied, het die waarnemende regeringswoordvoerder Phumla Williams aan verslaggewers in Pretoria Donderdag gesê, na aanleiding van die uitvoerende gesag se vergadering Woensdag.

“Die Kabinet beklemtoon dat so ‘n reg uitgeoefen moet word op ‘n nie-gewelddadige wyse en in volle nakoming van die wet,” het sy gesê.

“Daar is ‘n verantwoordelikheid op die vakbondleiers, werkgewers, die staat, en die veiligheidsdienste om te verseker dat die wet gehandhaaf word en dat uitdagende optrede vermy word.“

Verskillende ekonomiese sektore in Suid-Afrika, insluitend die mynbou, konstruksie, en die motorsektor, is tans besig met onderhandelinge.

Die vakbond, die NUM het die Kamer van Mynwese se hersiene salarisaanbod na sy stakende lede geneem om oorweeg te word.

Die NUM se stakingskomitee het vroeër vandag vergader om die aanbod te bespreek. Die NUM-woordvoerder, Lesiba Seshoka sê die werkers se besluit kan teen môre reeds aangekondig word.

Die goudmynwerkers staak van Dinsdag af.

Williams is ook gevra oor die toestand van die drie Suid-Afrikaanse soldate wat beseer is tydens ‘n VN-sending in die Demokratiese Republiek van die Kongo.

“Suid-Afrikaners word geroep om ondersteuning en erkenning te gee aan hierdie soldate wat instrumenteel in die verwesenliking van Suid-Afrika se verbintenis tot vrede, stabiliteit en die versterking van die demokrasie in Afrika is.“

Sy het vrae na die Suid-Afrikaanse Nasionale Weermag verwys.

Spertyd vir grondeise verleng

Die kabinet het die spertyd vir grondeise tot 2018 verleng.

Die Wysigingswetsontwerp op die Herstel van Grondregte gaan binnekort by die Parlement ingedien word.

Dit stel eisers, wat te laat was vir die sperdatum in Desember 1998, in staat om hul eise opnuut in te stel.

Die adjunkkommissaris vir grondeise, Thami Mdontswa sê die wetsontwerp maak ook vals eise strafbaar en dit vereenvoudig die prosedure om regters tot die Grondeisehof aan te stel. – RSG

EFF registreer by OVK met beloftes van nasionalisering, grondroof

Die ekonomiese vryheidsvegters is geregistreer as ‘n politieke party by die Onafhanklike Verkiesingskommissie.

“Die registrasie van die EFF … is ‘n historiese oomblik en die begin van die werklike radikale, militante en beslissende politieke program wat sal lei tot ware bevryding van die mense van Suid-Afrika, Afrika en die wêreld,” het die EFF se leier Julius Malema Donderdag gesê.

Die goedkeuring beteken die party sal aan die algemene verkiesing deelneem in 2014, en wen, sê Malema .

“[Die ] EFF sal die verkiesings betwis om die regering oor te neem nie om ‘n tandelose opposisieparty in verskillende parlemente en wetgewers te wees nie.”

“Die demokratiese ruimte is nou oop vir die regte politieke en ideologiese geveg…”

OVK-woordvoerder Lydia Young het die registrasie bevestig.

“Ja, hulle het geregistreer, ” het sy in ‘n epos bevestig.

Malema het gesê Suid-Afrikaners kan nou ‘n “sug van verligting” slaak omdat sy “reuse-beweging” ‘n opsie is. Ander politieke partye, het hy gesê, het versuim om die land te transformeer.

“Die mense van Afrika moet besef dat daar nou ‘n beweging van die mense is wat die belange van die mense van Afrika bevorder, wat ‘n aggressiewe ekonomiese dekolonisasieprogram insluit, gelei deur massiewe ontwikkeling en industrialisering en [dit] sal binnekort [die] Regering van Suid-Afrika wees.

“Die mense van die wêreld wat onderdruk en uitgebuit word kan nou uitsien na daadwerklike anti-imperialistiese optrede en politieke programme wat prakties en programmaties neo-liberalisme en globale kapitalisme sal ondermyn.“

Malema het gesê die EFF is bewus van sy verpligtinge en verantwoordelikhede en sal dit met ‘n “militêre presisie” volvoer.

“Hierdie is die verpligtinge en die verantwoordelikheid om Suid-Afrika en Afrika se rykdom aan die mense as ‘n geheel te herversprei,” het hy gesê .

“Grond sal billik verdeel word onder die mense, myne sal genasionaliseer word, en gratis gehalte-onderwys, gesondheidsorg en sanitasie sal voorsien word.”

Hy het gesê die Afrika-ekonomie sal ontwikkel word, Suid-Afrika sal geïndustrialiseer word, en korrupsie sal uitgeskakel word onder die EFF se bewind.

Malema staar self aanklagte van korrupsie in die Polokwane-landdroshof in die gesig weens beweerde korrupte aktiwiteite . Hy is uit op borgtog van R10 000.

Die voormalige ANC Jeugliga-leier het belowe om nooit die mense op die grond te versaak nie.

Die party beplan om dele van die werkersklas te organiseer in “militante, onwrikbare vakbonde en werkersbewegings”.

Die omstrede leier het ‘n beroep op “vegters” gedoen om op die voorpunt van elke protes-beweging in alle gemeenskappe , werkplekke, en instellings te wees.

“Oorwinning is seker, geen oorgawe nie! Nooit terugwaarts nie! ” het hy gesê. – Sapa