Karin Roodt – Bladsy 85

Konsensuele seks tussen kinders nou wettig

Nege regters van die Grondwethof het eenparig beslis dat artikels 15 en 16 van die Wet op Strafreg (Seksuele Oortredings en Verwante Aangeleenthede) ongrondwetlik is.

Konsensuele seks, soen en vry tussen kinders van 12 tot 16 jaar sal dus nie meer as misdade beskou word nie.

Die hof het bevind die artikels die waardigheid en privaatheid van vroeë adolessente aantas en dat dit ook nie die beste belange van sulke kinders bevorder nie, wat glo teen die Grondwet indruis.

Die artikels het vroeër konsensuele seksuele kontak, liefkosings, soene en vry tussen 12- tot 16-jariges (vroeë adolessente) tot ’n misdaad verklaar. Sedert die wet in werking getree het is verskeie kinders ingevolge daarvan aangekla.

Seksaktiviste het Jeff Radebe, minister van justisie, aangespoor om ’n moratorium op alle ondersoeke, inhegtenisnemings, vervolgings en strafregtelike prosesse in verband met art. 15 en 16 sover dit konsensuele vroeë adolessente betref, te plaas.

Women’s Legal Centre, een van die partye in die geding, het gesê daar is ’n baie hoë persentasie onbeplande tienerswangerskappe, maar dit is nou nie meer “ondergronds” nie.

Dié stelling is vreemd aangesien die staat se maatskaplike uitkerings aan vroeë adolessente wat swanger raak, nog nooit ondergronds was nie.

Prof. Tom Coetzee, strafregkenner van Potchefstroom, het aan Beeld gesê deur die twee artikels “het die wetgewer ’n eeue oue fase waardeur elke kind gaan, naamlik seksuele ontwaking, op ’n absurde en vreemde manier strafbaar gemaak.”

Swart vrou doodgeskiet nadat sy op Withuis afjaag

‘n Swart vrou het Donderdagaand glo probeer om met ‘n motor deur ‘n hek by die Withuis te jaag, het die Amerikaanse TV-netwerk ABC gisteraand berig.

Dit was ‘n geïsoleerde voorval en blyk nie ‘n terroriste-aanval te wees nie, het ‘n polisiehoof wat die media in Washington te woord gestaan het ná ‘n voorval vroeër die dag naby die Withuis gesê.

‘n Vrouebestuurder het glo met ‘n eenjarige swart kind in ‘n motor gepoog om ‘n versperring naby die Tesourie binne te dring. Dié versperrings is deel van die afgesperde gedeelte om die Withuis.

Die motor het toe na Capitol Hill gejaag. ‘n Skietvoorval het na die jaagtog gevolg.

Die verdagte is doodgeskiet, het SkyNews berig. daar word bespiegel dat sy van Somaliese afkoms kan wees

‘n Geheime agent asook ‘n veiligheidsbeampte is in die voorval beseer en in die hospitaal opgeneem.

Jeugliga agter Ramaphosa vir president

Die ANC-jeugliga het sy steun aan Cyril Ramaphosa, adjunkpresident van die ANC, toegesê om Suid-Afrika se volgende president te word.

“Dit is die regte ding om te doen. Dit is die enigste manier waarop die ANC sy interne demokratiese prosesse kan uitbou,” het Mzwandile Masina, sameroeper van die liga se nasionale taakspan (NTT), aan die Sowetan gesê.

Ramaphosa is in Desember by die regerende party se nasionale verkiesingskonferensie in Mangaung tot adjunkpresident verkies en het oorgeneem by Kgalema Motlanthe, wat steeds die adjunkpresident van die land is.

Die jeugliga wil sien dat Ramaphosa ná volgende jaar se algemene verkiesing die leisels by Motlanthe oorneem. – Sapa

Boer in Sabie doodgeskiet in plaasaanval

Paul Mason (63) is Donderdag op sy plaas, Kruisfontein, by Sabie deur plaasaanvallers doodgeskiet.

Dié was die tweede aanslag op Mason, ‘n bosbouer, se lewe. Hy is in 2010 ook op sy plaas gewond.

Hy en sy vrou, Gwen (58), het vroegoggend van die huis vetrek om bosbou-spanne op die plaas te gaan besoek, berig Beeld.

Vier gewapende rowers het kort nadat die Mason-egpaar gery het toegang tot die perseel verkry deur ’n gat in die heiningdraad te knip.

Hulle het die bejaarde tuinwerker oorval, vasgebind en in ’n buitetoilet toegesluit.

Die tuinwerker het later aan die polisie gesê hy het sowat ’n uur later gehoor hoe die Masons terugkeer. Drie skote het geklap. Mason is twee keer in die bors en een keer in die onderlyf getref.

Inspekteurs gaan op sjebiens toeslaan

Die Gautengse Drankraad sê korrupsie met die uitreiking van dranklisensies is een van die faktore wat die bedryf die ergste kniehalter.

Die Raad het by die bekendstelling van ‘n bewusmakingsveldtog in Boksburg aan die Oos-Rand gesê handelaars met vervalste lisensies en informele persele sal vasgevat word.

Wetstoepassers het hulle steun aan die Raad se veldtog toegesê en beplan om in die aanloop tot die kerstyd toe te slaan op onwettige permitte, drinkplekke en handelaars.

Daar sal ook gefokus word op handelsure, en die verkoop van drank aan kinders. Amptenare van die Suid-Afrikaanse Inkomstediens het drankhandelaars ook ingelig oor belastingvereistes. – RSG

Chippy Shaik ook voor Seriti-kommissie

Die Seriti-kommissie wat ondersoek instel na die omstrede wapentransaksie is tot 14 Oktober uitgestel. ‘n Woordvoerder, William Baloyi, sê die besluit is geneem sodat sekere dokumente gedeklassifiseer kan word.

Die kommissie sal ook intussen persone wat tydens getuienis genoem is, raadpleeg.

Volgens berigte sal Chippy Shaik wat die hoof van verkrygings was vir die weermag tydens die wapentransaksie ook voor die kommissie gedaag sal word.

Shaik sal glo van Australië terugkeer om ondervra te word.

Die weermag se department vir militêre veterane, Krygkor, en die Tesourie sal na verwagting voorleggings doen oor die rasionaal agter die aankope.

Krygkor het vroeër vandeesweek gesê hulle was nie by die transaksie betrokke nie. – Sapa

Sindikaat maai onder Weenen-renosters

Twee renosters met afgesaagde horings is lewend gevind by die Weenen Wildreservaat in KwaZulu-Natal.

Daar word vermoed dat ‘n sindikaat in die gebied bedrywig is, nadat vyf renosters verlede week in dieselfde reservaat doodgemaak is.

Sewentig renosters is reeds vanjaar in die provinsie gestroop. Die woordvoerder van Ezemvelo KZN Natuurlewe, Musa Mntambo sê die renosters sal na die Hluhlwe Umfolozi park geneem word waar hulle behandel en versorg sal word.

Sewehonderd-en-vier renosters is reeds vanjaar vir hulle horings van kant gemaak. Dit is reeds 36 meer as verlede jaar se totaal. – RSG

DA verbaas oor vyandigheid by Fort Hare

Die DA-leier Helen Zille het die ANC Jeugliga en die studenteorganisasie Sasco van intimidasie beskuldig ná haar toespraak by die Fort Hare Universiteit deur uitjouery en ‘n kragonderbreking onderbreek is.

Dit is nie duidelik wat die kragonderbreking veroorsaak het nie.

Zille is deur die DA Studenteorganisasie genooi om in die aanloop tot die studenteraadsverkiesing by die Universiteit te praat.

Sy het na afloop van die onderbreking aan die SAUK gekla dat die stryd om demokrasie in die land gedaal het tot “onverdraagsaamheid en ondemokratiese gedrag”. Die DA het egter self in Midvaal asook Kaapstad alle Afrikanersimbole laat verwyder om hul eie onverdraagsaamheid teenoor Afrikaners te laat botvier.

Die party het twee maande gelede ‘n Xhosa-koning oorreed om aan te sluit in die hoop om in die Oos-Kaap stemme te trek. Dié openlike vyandigheid van die studente moes vir Zille ‘n verrassing gewees het aangesien sy spog dat sy en ander Litouers vir die ANC se bewindsoorname verantwoordelik is.

Die president van Sasco by Fort Hare, Mawande Njeza het ontken dat hulle vir die kragonderbreking verantwoordelik was. Hy sê Sasco kry die skuld vir alles wat verkeerd gaan op die kampus.

Stakings by BMW vervreem EU

Die vernietigende effek van stakings in onder meer die motorvervaardigingsektor, soos nou by BMW Suid-Afrika gesien, kan belangrike handelsvennote soos die Europese Unie (EU) al hoe verder van Suid-Afrika laat wegdryf, sê adv. Anton Alberts, die Vryheidsfront Plus se parlementêre woordvoerder oor handel en nywerheid.

Die verhouding tussen Suid-Afrika en die lidlande van die EU is reeds gespanne en Duitsland het onlangs hard en duidelik sy stem gevoeg by die EU se handelskommissaris, mnr. Karel de Gucht, wat skerp kritiek uitgespreek het teen die ANC-regering se beleid rakende bilaterale beleggingsooreenkomste met lidlande van die EU.

Adv. Alberts sê die Internasionale Monetêre Fonds (IMF) het nou ook sy kommer uitgespreek oor die hoë aantal stakings wat die land se ekonomie lamlê, en wat goed geïllustreer word deur die feit dat Suid-Afrika ondanks ‘n swak rand ook met sy uitvoer sukkel.

“Die ANC, wat sienderoë toelaat dat vakbonde die land se industrieë lamlê en beleggers verdryf, moet verantwoordelikheid neem vir die vernietigende effek wat stakings op die land se ekonomie het.

“Die ANC skep dan ook verdere onsekerheid oor eiendomsreg met beoogde wetgewing wat alle tipe eiendomsreg sal blootstel aan onteiening deur die staat.

“Verder is die ANC se strewe om Regstellende Aksie (RA) en Swart Ekonomiese Bemagtiging (SEB) nog strenger te polisieer kommerwekkend, aangesien dit van die faktore is wat ekonomiese groei strem. Die Ouditeur-Generaal het juis aangedui dat kaderontplooiing, wat moontlik gemaak word deur RA, juis die rede is vir swak dienslewering deur die staat. Wat SEB betref is dit alom bekend dat geen navorsing bestaan dat die beleid enige goeie invloed het op die ekonomie nie en of swartmense werklik opgehef word nie.

“Daarom is die voortsetting van dié beleide irrasioneel en daarom ongrondwetlik, bo en behalwe die feit dat dit inbreuk maak op die reg van minderheidsgroepe om op gelyke voet ekonomies mee te ding.

“Die Demokratiese Alliansie se ondersteuning en omarming van die beleid is ook skrikwekkend aangesien gerekende internasionale organisasies toenemend tot die debat toetree en pleit dat SEB vervang moet word met ‘n beleid wat aan almal in die land ‘n gelyke kans op ekonomiese welvaart sal bied.

“Rothschild, die konsultasiefirma wat self die eerste SEB-transaksies gefasiliteer het, is die jongste toevoeging tot lys van invloedryke organisasies wat hom openlik teen SEB uitgespreek het,” sê adv. Alberts.

Tom Clancy oorlede

Tom Clancy het die 9/11-aanval op die Twin Towers in New York lank voordat dit gebeur het, akkuraat voorspel. Clancy, ‘n ware genre-spesialis, het die fynste besonderhede van allerlei militêre toerusting sowel as strategie, ten seerste begryp.

Dié profetiese en outentieke skrywer van ondermeer The hunt for Red October, is Woensdag op die ouderdom van 66 oorlede.

Clancy se hoofkarakter, Jack Ryan, is die CIA-agent wat opeindig as President van die Verenigde State van Amerika in ‘n reeks blitsverkoperromans.

Die skrywer was omtrent so ver verwyder van James Bond as die held van ‘n aksieriller kan wees. Maar daar is ‘n treffende parallel tussen die loopbane van Clancy en Ian Fleming.

Net soos die beskeie Fleming literêre supersterstatus bereik het deur President John F. Kennedy se belangstelling in hom, is Clancy se loopbaan twee dekades later aangehelp deur die entoesiasme van die presidentskandidaat Ronald Reagan.

Reagan het Clancy se debuutroman Die jag vir Rooi Oktober (1984) as “my soort storie” en ‘n “moet-lees” beskryf. Clancy se verkope het daarna in die stratosfeer ingeskiet en daar gebly.

Sy 1989-boek, Clear and Present Danger het Amerika se topverkoper-roman van die 1980’s geword.

Dit blyk gepas te wees dat Reagan meegewerk het aan Clancy se sukses. Om mee te begin, het die filmster president gehelp om die loopbaan van ‘n fiktiewe president te loods.

Maar Reagan het van die Clancy-wêreldbeskouing gehou, waarin Ryan ‘n goedgunstige Amerika uitbeeld, wat die res van die wêreld se probleme oplos, ook sluipmoorde (van pous Johannes Paulus II in Red Rabbit of die Prins en Prinses van Wallis in Patriot Games).

En moenie ‘n Chinese inval van Taiwan (in verlede jaar se Threat Vector) vergeet nie. Jack Ryan sou nie te lank talm met die onderhandelingsproses in Iran of Sirië nie.

Soos baie skrywers van polities-militêre rillers, het Clancy ‘n aantal suksesvolle voorspellings gemaak deur sy geopolitieke belangstellings.

Hy het die aanval deur Arabiese terroriste op die Verenigde State van Amerika in sy 1991-roman The Sum of All Fears korrek voorspel. Die antagoniste in die gelyknamige film van 2002 is verander na neo-Nazi’s om lastige politieke stroomversnellings te vermy.

In sy 1994-roman Debt of Honour, het hy voorspel dat verskeie senior politici deur ‘n terroriste-aanval gedood sou word in die Capitol as ‘n straler die gebou tref.

Deel van wat Clancy se romans hul sin van egtheid gee, was nie alleen net sy vermoë om sy oor op die grond te hou oor wie Amerika haat en hoekom nie, maar ook sy grondige kennis.

Sy romans beskik oor ‘n ander soort egtheid as le Carré se inkleding van intrige, agv Clancy se vermoë om die leser te beïndruk met die diepte en die akkuraatheid van sy navorsing.

Miljoene lesers regoor die wêreld het verslaaf geraak aan sy romans, selfs diegene wat steeds nie van die idee van Amerika as die wêreld se polisieman hou nie.

Gyselaardrama eindig

‘n Beampte wat as gyselaar by die Mangaung-maksimumsekuriteitsgevangenis buite Bloemfontein aangehou is, is gered.

Op die vraag of enige ander persone beseer is tydens die reddingsoperasie of wat die operasie behels het, het Kirsten van der Nest , woordvoerder van G4S Africa, die maatskappy wat die private tronk bedryf, gesê geen verdere inligting sal bekend gemaak word nie.

Die vrou is ongedeerd nadat sy deur vier gevaarlike gevangenes aangehou is.

Dit is die tweede keer wat Abigail Wessen, ’n administratiewe assistent, in dieselfde gevangenis aangehou word, het Volksblad berig.

Wessen is as ’n toesighoudende offisier in een van die eenhede ingespan na stakings voorgekom het. Dit is glo hier waar sy Woensdagoggend oorval is en aangehou is. Sy is ongetroud en het geen kinders nie.

Meer as 300 lede van die polisievakbond, Popcru, is onlangs by die tronk afgedank nadat hulle aan ‘n onwettige staking deelgeneem het. – Sapa

Swart, swarter, krieket

Suid-Afrikaanse krieketamptenare gaan ‘n voorstel oorweeg om professionele krieketspanne te dwing om minstens twee swart spelers in elke span in te sluit.

Hoewel die ses top spanne in onlangse seisoene ‘n aantal bruin- en Indiërspelers gekies het, is daar ‘n tekort aan swart krieketspelers.

Die nasionale sameroeper van die keurders, Andrew Hudson het die tekort aan swart krieketsterre uitgewys ná kritiek oor die tekort aan swart spelers in die nasionale span.

Krieket Suid-Afrika het nog nie amptelik kommentaar gelewer oor die voorstel nie, maar amptenare het bevestig dat die kwessie by ‘n vergadering op 11 Oktober bespreek gaan word. – RSG

Zuma betrek by Gupta-landing

Pres. Jacob Zuma is direk by die landing van ‘n Gupta-passasiersvliegtuig uit Indië op ‘n militêre lughawe betrek na ‘n eedsverklaring van een van die aangeklaagdes.

’n Sleutelgetuie in die weermag se ondersoek na die landing van die Gupta-familie se straler uit Indië beweer Zuma en Bruce Koloane, voormalige hoof van staatsprotokol, het ’n ontmoeting gehad oor die koms van die bruilofgaste.

Tydens die ontmoeting het Zuma gevra of “alles op koers is vir die vlug” wat by Waterkloof sou land.

Beeld het onthul dat lt.kol. Christine Anderson, tweede in bevel by die Waterkloof-lugmagbasis se verplasingsentrale, Zuma betrek in haar eedsverklaring.

Anderson is een van vyf lugmaglede wat moontlik weens die voorval vervolg gaan word.

Jansen: Argument oor taal is verdraai vir mediabohaai

Jansen ontken wat hy gesê het — Jansen ontken mediaberigte oor aanval op Afrikaners

Prof. Jonathan Jansen, rektor van die Universiteit van die Vrystaat, sê sy argument oor taal in onderwys is verdraai om ‘n mediabohaai te skep, sê

“Dit verbaas my steeds hoe ‘n versigtige argument oor taalinklusiwiteit ernstig verdraai kan word vir die maksimum mediabohaai,” twiet Jansen op Twitter in reaksie op ‘n berig oor ‘n lesing wat hy in September gelewer het.

Beeld het Woensdag berig Jansen het gesê blanke skole en universiteite wat eksklusief Afrikaans is, hou ’n ernstige gevaar in vir rasverhoudinge in Suid-Afrika.

Jansen se uitlatings is gemaak terwyl hy die English Academy of South Africa se Percy Baneshik-gedenklesing op 18 September gelewer het.

Volgens hom beteken dit “Engels, eerder as Afrikaans, sal die taal van versoening in hierdie land moet wees”.

Jansen het as oplossing vir swak prestasie deur die leerlinge wie se inheemse moedertaal swak onderrig word, voorgestel dat Engels as onderrigtaal ingestel word – van die grondslagfase tot op universiteitsvlak.

“Hier is een groot langtermynoplossing vir die onderwyskrisis: onderrig elke onderwyser en elke kind van dag een af in Engels, pleks daarvan om die las te verswaar wat veroorsaak word deur swak moedertaalonderrig in die grondslagfase.”

Hy het uitgewys moedertaalonderrig waarborg nie beter uitslae nie.

Jansen het verwys na ’n “revolusie” oor taalgebruik op die UV-kampus, waar “menseverhoudings uitgepluis is vóór taalverhoudings. Deur swart en wit studente saam te bring as mense… het die strak lyne rondom mededingende tale begin vervaag.” – Sapa