Karin Roodt – Bladsy 38

DA, Agang SA gaan glo saamsmelt

Die Burger berig dat die DA en Agang SA Dinsdagoggend sal aankondig dat dié twee partye saamsmelt.

Volgens Die Burger is dit ikabod vir dr. Mamphela Ramphele se party, wat minder as ’n jaar oud is en miljoene in skenkersgeld uit die VSA ontvang het.

Helen Zille, DA-leier, sal glo binnekort ‘n aankondiging van “nasionale belang” maak.

Onderhandelings tussen die DA en Agang SA het verlede jaar platgeval en Ramphele het daarna besluit om die haar eie party te stig.

Intussen het sy met die DA in Kaapstad vergader oor besonderhede van die samesmelting. Daar word beweer dat Ramphele steeds ‘n hoë profiel wil handhaaf.

Agang SA sê in ‘n verklaring op sy webwerf dat die gerugte “geïgnoreer” moet word dat Ramphele op die DA se lys van kandidate vir die verkiesing verskyn.

“Ons maak geen geheim van die feit dat ons praat met ander partye in Suid-Afrika nie. Ons maak geen geheim van die feit dat al die partye en burgers nodig het om saam te staan teen die ANC en diegene wat ons hulpbronne wil gebruik om hul eie ego’s te befonds en lewenstyl …

“Daar is ‘n buitengewone venster van geleentheid wat geopen het sedert Madiba se dood en die verbrokkeling van die Drieparty-alliansie.

“Ons sal voortgaan om burgers te inspireer om die land eerste te stel in hul keuse van leierskap en samewerkingsgeleenthede,” lui die verklaring.

Gaap, nog ‘n ‘regse komplot’

President Jacob Zuma en sy kabinetslede was veronderstel om aan die hand van die “Boerevolk” te sterf tydens die verkiesingskonferensie van 2012 in Mangaung.

Die hof in Bloemfontein het Maandag gehoor dat die ANC-leierskap om die lewe gebring sou word.

‘n Polisiebeampte wat die groep “geïnfiltreer” het – mnr A – het in die Vrystaatse hooggeregshof getuig hoe ‘n groep “regses” beplan het om die land onregeerbaar te maak deur aanvalle op lughawens, stasies en olie-raffinaderye uit te voer.

Dit sou gebeur nadat president Jacob Zuma en sy kabinet vermoor is.

Hy het getuig dat die beskuldigdes, Johan Prinsloo en Mark Trollip, wapens gereël het om die sluipmoorde mee uit te voer. Hulle ontken skuld.

Hy het gesê een van die beskuldigdes in die beweerde komplot, Martin Keevy, het gesê dat iets gedoen moet word, en dat ‘n “aanval [ by Mangaung ] die Boerevolk sou laat opstaan, wat sou volg.”

Keevy, 49, is onbevoeg verklaar om verhoor te word in Oktober , en is tot ‘n pasiënt van die Staatspresident verklaar.

Dié bewerings is gehoor in die verhoor van Johan Prinsloo, 50, aangekla van verraad en terrorisme.

Sapa, wat klaarblyklik slaafs een of ander anti-Afrikaneragenda dien, het dadelik berig dat die “Boerevolk” ‘n los versamelnaam vir “regse Afrikaners is op soek na ‘n onafhanklike tuisland in die ou Transvaal en die Oranje-Vrystaat Republieke” in ‘n poging om etniese Afrikaners te stigmatiseer.

Dié beweerde komplot is duidelik deur staatsagente gereël wat kennelik nie genoeg publisiteit en waarskynlik befondsing uit die Boeremagsaak kon wring nie en toenemend, in navolging van Julius Malema, ‘n voorliefde vir die benaming “Boer” toon.

Die polisiebeampte wat onder dekking was, het voorgegee dat ontevrede voormalige weermaglui die “regse saak” ondersteun, wat hoogs onwaarskynlik is aangesien oud-Weermaglede voorheen saam met swart troepe gedien het en só ‘n plan ewe lagwekkend as enige konserwatiewe Afrikaner sal vind.

Die “regse saak” waarna Sapa verwys is duidelik ‘n gefabriseerde komplot wat daarop gemik is om rassespanning te verhoog.

Juju se Nkandla-foefie versuur

Julius Malema se groot publisiteitsfoefie om ‘n huis aan ‘n “arm gesin” in Nkandla te skenk, het versuur want die gesin is allesbehalwe behoeftig.

Twee weke gelede het Malema en sy ekonomiese vryheidsvegters aan S’thandiwe Hlongwane ‘n tweeslaapkamerhuis oorhandig.

Sy is getroud met ‘n senior staatsamptenaar wat sowat R250000 per jaar verdien en ten minste twee ander huise besit.

Hlongwane en haar man, Lucky Nene, 60, besit ook ‘n VW Polo en ‘n Hilux-bakkie .

Maar Malema het Vrydag gesê Hlongwane is ‘n ongetroude moeder van twee kinders tussen die ouderdomme van drie en vyf .

“Ons kan nie toelaat dat ons swart suster met haar kinders in daardie omstandighede woon nie,” het Malema gesê . Volgens die EFF was die modderhuis onstabiel met gapende krake.

Dit is algemeen bekend dat mishuise voortdurend gesmeer moet word en dat dit kraak en vervalle raak sonder aandag. Dit wil dus voorkoms asof niemand in die bouval gewoon het nie.

Nene het ontken dat sy gesin die EFF mislei het.

Die egpaar het ook ‘n huis van 338m² in Ulundi. Nene se vrou het nogtans die EFF se aanbod aanvaar.

Tydens die oorhandiging is Malema en sy ondersteuners bestook met klippe. Die polisie het tussenbeide getree met behulp van knuppels , ‘n waterkanon, traangas en rubberkoeëls.

Verhoor van vermeende Mangaung-bomplanters begin

Boonzaaier, heel links, en Trollip heel regs

Die verhoor van die laaste van die regses wat daarvan beskuldig word dat hulle beplan het om ANC-leiers tydens die party se verkiesingskonferensie in Bloemfontein in 2012 te vermoor, sal vandag in die Vrystaatse hooggeregshof in Bloemfontein begin.

Die beskuldigde, Johan Prinsloo was deel van ‘n groep mans wat ná die Mangaung-konferensie in hegtenis geneem is.

Nog ‘n verdagte, Mark Trollip het vroeër skuldig gepleit op aanklag van sameswering om terreurdade te pleeg. Hy het ‘n pleitooreenkoms met die staat aangegaan en is tot 8 jaar tronkstraf gevonnis.

‘n Derde verdagte, Martin Keevy was medies ongeskik verklaar om verhoor te word, terwyl aanklagte teen die vierde verdagte, Hein Boonzaaier laat vaar is. – RSG

Tata se Slym gly glo nie na sy dood

Karl Slym, die besturende direkteur van Tata Motors, het glo nie gegly toe hy na sy dood geval het nie.

Slym was verantwoordelik vir Tata se bedrywighede in onder meer Indië, Suid-Korea, Thailand en Suid-Afrika.

Die naweek is berig dat Slym (51), ’n Brit, uit sy hotelkamer in Thailand geval het. Hy was in dié land vir die direksievergadering van Tata Thailand.

Hy en sy vrou het op die 22ste verdieping van die Shangri-La Hotel gebly, maar sy liggaam is Sondagoggend op die vierde verdieping wat effens verder uit as ander verdiepings uisteek, gevind.

Luit. Somjot Boonjakaew, ondersoekbeampte, sê daar is geen teken van ’n struweling nie. “Ons het ’n oop venster gekry. Die venster is baie klein, so dis onmoontlik dat hy kon gegly het. Hy sou deur die venster moes klim voordat hy kon val, want hy was ’n groot man. Uit ons aanvanklike ondersoek glo ons hy het gespring.”

Die polisie sê hulle is omstreeks 07:45 Sondagoggend na die hotel ingeroep toe personeellede op Slym se liggaam afgekom het. Hulle het Slym se vrou wakker gemaak. Sy het geskok gelyk toe sy ingelig is wat gebeur het.

Die polisie het ook ’n brief van drie bladsye in die kamer gevind, maar wou nie oor die inhoud daarvan uitwei nie. ’n Lykskouing sal Maandag uitgevoer word.

Tata Motors wou niks sê oor die oorsaak van Slym se dood nie, maar het Sondag gesê Slym het “leierskap in ’n mededingende markomgewing verskaf”.

Slym is in Mei 2012 by Tata, Indië se grootste en sukkelende motorvervaardiger, aangestel.

Slym was in Oktober in Johannesburg vir die bekendstelling van drie nuwe Tata-modelle. Hy het by dié geleentheid gesê die land is een van die fokusmarkte vir die vervaardiger.

Bron: Reuters

DA verswart kandidatelys

Die DA se kandidatelyste vir vanjaar se algemene verkiesing is verswart en tot die helfte van hul parlementslede kan swart wees.

Lindiwe Mazibuko, die DA se parlementêre leier, het bevestig dat die helfte swart kan wees.

Helen Zille, partyleier, wat die lys in Johannesburg bekend gemaak het, het jong swart kandidate poste belowe, na die party ook onlangs die populistiese swart temas van RA en grondhervorming omhels het.

Dr. Wilmot James, federale voorsitter, het ook bevestig dat die party “so divers moontlik” wil wees. Dit is ‘n bekende eufemisme vir “so swart moontlik”.

Selfs al vaar die DA besonder goed, sal meer as ‘n derde, 25 van die 67 LP’s in die Nasionale Vergadering uitval.

Die name van sewe kandidate is weerhou en wit, Afrikaanse DA-LP’s het van die lys verdwyn of is baie laag geplaas. RSG-omroeper Niekie van den Berg is byvoorbeeld te laag op die lys om ingestem te word.

Van den Berg het aan Beeld gesê “ek is hartseer, bitter teleurgesteld, heeltemal verslane. Dis ’n verskriklike terugslag vir my.”

Jacques Smalle, DA-leier in Limpopo, is nie op die lys nie, terwyl Zelda Jongbloed, ’n voormalige rubriekskrywer en hoofredaksielid van Rapport, hoog op dié provinsie se nasionale lys verskyn.

Die DA hoop waarskynlik op nog gunstiger publisiteit in Media24.

Gavin Davis, die DA se kommunikasiehoof en dr. Michael Cardo, Zille se toespraakskrywer, is verseker van plekke in die parlement.

Athol Trollip, voormalige parlementêre leier, is die DA se Oos-Kaapse premierskandidaat.

Die ANC se kandidaatslyskonferensie begin vandag in Pretoria.

Die konferensie sal na verwagting sy steun vir president Jacob Zuma as die presidentskandidaat gee in die komende algemene verkiesing, terwyl die adjunk-president van die party, Cyril Ramaphosa as die land se adjunk benoem behoort te word.

Die naam van die voormalige president van die reserwebank, Tito Mboweni sal ook moontlik op heelwat lyste verskyn wat deur die vakbonde voorgelê word.

Zuma fokus op grond, voorvaders, tenders

President Jacob Zuma het duisende ANC-lede in Dutywa in die Oos-Kaap toegespreek tydens die bekendstelling van die party se verkiesingsmanifes in die provinsie.

Zuma het gesê die grondliggende oorsaak van armoede, werkloosheid en ander maatskaplike probleme is gesetel in die wette van die apartheidsregime.

Volgens hom was wette doelbewus so ontwerp om swartes uit die sosio-ekonomiese aktiwiteite van die land te sluit.

Hy het aan die skare van 35.000 gesê dat sy regering “hand en tand veg” oor die grondkwessie met grondeienaarskap wat steeds in die hande van net ‘n paar gekonsentreer is.

Verteenwoordigers van die ANC se alliansievennote, die SAKP en Cosatu, het ook die byeenkoms toegespreek.

Zuma het ontevrede ANC-lede gewaarsku teen diegene wat die party verlaat, en gesê hulle sal die toorn van die voorvaders ontlok.

“Dit is verkeerd om die ANC te verlaat. Trouens, dit is koud en rof buite die ANC. Mense moet intern in die party bly en probeer om dinge op te los, want . . diegene wat uitloop, sal die toorn van die voorvaders ontlok, wat ook sal meebring dat daardie persoon slegte geluk sal aantrek.”

Zuma het gesê hy verwelkom meer as 100 lede wat van die United Democratic Movement oorgeloop het asook van COPE.

Twee ANC-lede wat oorgeloop het ná die ANC se Polokwane-konferensie in 2008 is ook terug.

Zuma het ook gepraat oor die stryd teen korrupsie wat een van die party en die regering se grootste vyande is.

Om korrupsie in die regering uit te skakel, het hy gesê die ANC is in die proses om tenders af te skaf.

“Tenders is die wortel van korrupsie in die regering. Hulle het ons land opgemors. Ons kyk na die sentralisering van die tenderproses deur ‘n sentrale tenderraad ,” het Zuma gesê.

Nog ‘n waterkrisis dreig in Vryburg

‘n Waterprojek wat in 2011 van stapel gestuur is deur die Dr Ruth Segomotsi Mompati Distriksmunisipaliteit, het misluk.

Die doel van die projek was om water uit die Taungdam na die Naledi Plaaslike Munisipaliteit te lei.

Die projek sou die waterkrisis aanspreek in die Vryburgarea van Noordwes, na wat berig word.

Gebiede van Kismet Park, Colridge en Huhudi in Vryburg is die ergste geraak deur watertekorte. ‘n Pyplyn wat net twee jaar oud is, het reeds ingegee.

Dr Ruth Segomotsi Mompati se burgemeester, Elvis Tladinyana het erken dat daar ‘n waterkrisis in die gebied is.

“Herstelwerk wat gemaak is, is nie volhoubaar nie, want dit is buite ons beheer. Die pype is nou oud.”

Hy voeg by dat die pype vervang moet word en dat die bestaande hoofpyp bedoel was om hierdie spesifieke probleem op te los.

Verskillende gebiede regoor die land ervaar watertekorte. Dit sluit Mothutlung in waar die inwoners oproerig geraak het.

Bloemfontein se noordelike voorstede sukkel ook en inwoners ondervind dieselfde uitdaging as gevolg van verouderde infrastruktuur.

Mynstaking tot dusver sonder geweld

Samesprekings wat daarop gemik is om die staking deur die vakbond Amcu by platinummyne te beëindig, sal vandag in Pretoria hervat word.

Die polisie in Noordwes het intussen bevestig dat geen voorvalle van geweld, wat met die staking verband hou, die naweek voorgekom het nie.

Die Kommissie vir Versoening, Bemiddeling en Arbitrasie het die samesprekings wat by sy kantore in Johannesburg plaasgevind het, na ‘n hotel in Arcadia in Pretoria verskuif.

Vakbondlede het verlede Donderdag begin staak by die platinummyne – Lonmin, Anglo American en Impala.

Impala Platinum het die naweek ook ‘n interdik bekom teen Amcu om nie betrokke te raak by geweld of intimidasie van nie-stakende werkers nie.

Amcu-lede is intussen vol vertroue dat die platinummaatskappye aan hulle salariseise sal voldoen.

Die stakende werkers sê hulle wil ‘n behoorlike salaris verdien en meen die regering se toetrede tot die onderhandelings sal tot hulle voordeel wees.

Amcu eis ‘n intreevlak salaris van R12.500 vir alle werkers, maar die werkgewer hou vol dat hulle dit nie kan bekostig nie.

Duisende stakende Amcu-mynwerkers sal na verwagting vandag by verskeie skagte van die platinummynhuise in Rustenburg in Noordwes saamtrek.

Die werkers het Donderdag opgehou werk

Die platinumprodusente waarsku verder dat die staking nie net die myne nie, maar ook die werkers self sal raak.

Amplats sê reeds hy ly ‘n verlies van sowat 100 miljoen rand per dag. – RSG

SAIR probeer wit moorde toesmeer

Die Suid-Afrikaanse Instituut vir Rasseverhoudinge sê 81% van alle moorde wat in Suid-Afrika plaasvind, is in swart huishoudings.

Dié syfer wat kwansuis ras met moord verbind, is erg vreemd aangesien sulke inligting juis nie deur die SAPD verskaf word nie.

Dit is ook voorts welbekend dat die polisie plaasaanvalle doelbewus as gewone misdaad aanteken, terwyl dit spesifiek haatmisdade is wat teen blanke grondeienaars gemik word.

Bronne in die polisie het aan praag dokumentasie gewys van hoe daar met die bewyse gepeuter word.

Volgens die Suid-Afrikaanse Polisiediens is 16.259 mense is in 2013 vermoor.

Omdat 79% van die Suid-Afrikaanse huishoudings – volgens die jongste sensussyfers – swart is, beweer die SAIR dat swart mense proporsioneel meer geraak word deur moord as ander bevolkingsgroep.

Van die 14,6 miljoen huishoudings in Suid-Afrika, is 79% swart, 11% wit, 7,3% bruin en 2,3% Indiër, sê Statistiek Suid-Afrika.

Frans Cronjé, die uitvoerende hoof van die SAIR sê: “Dit is nie waar om te sê dat mense van ‘n sekere rassegroep, veral blankes, meer as ‘n ander geteiken word nie. En ek dink nie dit is ‘n tendens wat vinnig sal verander nie.”

Cronjé was oudergewoonte stom oor plaasmoorde wat duidelik deur rassehaat gedryf word en waar wittes geteiken word.

Hy het voorheen blankes daarvan beskuldig dat hulle nie boetvaardig genoeg is nie. Dit is nie bekend of hy verwant is aan die mediese dokter met dieselfde naam nie.

Sy eie plan B vir die rewolusie wat hy voorspel, is dat sy vrou Amerikaans is en hulle Amerikaanse burgerskap het.

Sowat 44 mense word gemiddeld in Suid-Afrika per dag vermoor, waarvan ten minste 20 wit is.

Wit mense is net 9% (4 500 000) van die demografie in Suid-Afrika en daarom is die wit moordkoers in Suid-Afrika kommerwekkend.

Bomdreigement derde teen Sanral

‘n Bomdreigement is Sondag ontvang by die Suid-Afrika Nasionale Padagentskap Beperk ( Sanral ) se hoofkantoor in Samrand, naby Midrand.

Dit is die derde dreigement teen Sanral. Die dreigemente spruit vermoedelik voort uit ontevredenheid met die Gautengse e-tolstelsel.

Wetstoepassers sal ondersoek instel na drie dreigemente wat binne ‘n week by Sanral se kantore in Gauteng ontvang is.

Die perseel is verlede week twee keer ontruim nadat ‘n verdagte poeier – wat volgens berigte moontlik antraks kon gewees het – gevind is.

ETC (Elektroniese Tolinvordering) het later berig dat die stof skadeloos is.

Die minister van vervoer Dipuo Peters het die dreigemente veroordeel as pogings om Sanral se werksaamhede te ontwrig.

Sy het ‘n beroep op wetstoepassers gedoen om die skuldiges so spoedig moontlik te vervolg.

Diegene wat geraak is deur die ontvangs van die poeier sal van die nodige aandag en hulp voorsien word in die hantering van die traumatiese ervaring van die afgelope week, het Peters gesê .

Jamie Surkont, die uitvoerende hoof van ETC, het gesê die gebou is Sondagaand deursoek en indien nodig, sal die betrokke dienste na rugsteunpersele verskuif word.

Badplaas-uitstappie kos Steve R10 000

Steve Hofmeyr het dalk met die gereg gebots, maar Afrikaans se superster kon nie voorbly om handtekeninge by die hof uit deel nie.

Ten spyte van sy swaar straf, het Hofmeyr sy gewone sin vir humor behou toe hy aan die Pretoria News gesê het die R10 000-boete wat hy ontvang het Donderdag vir spoed sal ‘n duik in sy wittebroodbegroting maak.

Hierdie keer is die vrou Janine van der Vyver. Hy wou egter nie verder kommentaar lewer op sy beplande troue nie.

Hofmeyr, 49, het Donderdag in die Bronkhorstspruit-landdroshof verskyn . Hy is in hegtenis geneem vir roekelose en nalatige bestuur op 19 Desember.

Hy het skuldig gepleit op die spoedoorteding. Hy het ingestem om die boete te betaal, maar het versoek dat sy lisensie nie opgeskort word nie.

Hofmeyr het in ‘n verklaring deur sy prokureur gesê weens sy beroep reis hy tot 12 000 km per maand om sy verpligtinge na te kom .

“Dit is die eerste keer dat ek in hegtenis geneem is ten spyte van my uitgebreide reise,” het hy in ‘n verklaring gesê.

Hy het gesê hy is op sosiale media gekasty vir sy oortreding .

Landdros Elsie Schnetler het gesê sy kan sien Hofmeyr berou.

Hofmeyr is gevang dat hy 169kmh in ‘n 120 kmh-sone in sy swart Chrysler C300 op die N4 ry naby die Wilgerivier-afrit. Hy was laat vir ‘n konsert in Badplaas.

Die nudis, Beau Brummell – in die klere – het Hofmeyr in die hof kom ondersteun en vir hom gefluister in die beskuldigdebank.

“Ek is so bly vir Steve. Ek het selfs die geld gebring om te help om die boete te betaal indien hy dit nodig sou gehad het.

“Ek was so bang hulle vat sy lisensie, want dit sou ‘n ramp gewees het,” het Brummell buite die hof gesê .

Hofmeyr het vyf kinders. Hy was voorheen getroud met Egoli-aktrise Natasha Sutherland.

Waterkanon teen stakers ingespan

‘n Waterkanon is glo ingespan teen stakende mynwerkers by Anglo American Platinum (Amplats) se Khuseleka-myn in Rustenburg.

Die Association of Mineworkers and Construction Union (Amcu) het Vrydag gesê die werkers was saamgetrek op die mynperseel.

‘n Koördineerder van Amcu het gesê die situasie is “buite beheer en gespanne” nadat veiligheidspersoneel van die myn sonder enige waarskuwing die werkers met ‘n waterkanon bespuit het.

Hy het gesê die werkers het eers begin klipgooi nadat die waterkanon ingespan is.

Hy het gesê die myn moes Amcu eers in kennis gestel het voor hulle waterkanonne gebruik.

Amcu het Donderdag by Amplats, Impala Platinum en Lonmin begin staak.

Hulle eis ’n maandelikse salaris van R12 500.

Sokkerstadions vir Wêreldbeker dalk nooit voltooi

Die organiseerders van die FIFA-wêreldbekertoernooi in Brasilië het nog ‘n stadion vir die sokkerskouspel voltooi.

Daar is egter min rede tot vreugde weens die vrees dat die oorblywende vyf stadions dalk nooit voltooi sal word nie.

Die organiseerders het erken dat daar ‘n groot risiko bestaan dat geen wedstryde in Curitiba in die suide van die land sal kan plaasvind nie.

Die stadion in Sao Paulo, waar die openingswedstryd op 12 Junie moet plaasvind, is ook nog in aanbou.

Dit is ‘n reuse verleentheid vir Brasilië en vir FIFA omdat vorige waarskuwings oor die land se gereedheid vir die sokkerskouspel geïgnoreer is.

Meer as een miljoen kaartjies is reeds verkoop. – RSG