Karin Roodt – Bladsy 110

Seriti-kommissie handhaaf slakkepas

Die eerste getuies sal Dinsdag geroep word om voor die Seriti-kommissie van ondersoek na die wapentransaksie in Pretoria te getuig.

Die proses wat gevolg sal word is Maandag aangedui en die lys name van die eerste week se getuies is bekendgemaak.

Die eerste getuies by die kommissie se openbare sitting is senior offisiere van die Suid-Afrikaanse vloot.

Hulle sal na verwagting verduidelik waarom nuwe wapens aangekoop moes word in die multi-miljard randse wapentransaksies in die laat 1990’s, en watter aanbevelings gedoen is.

Die getuienisleier, Matshego Ramagaga, sê die vloot en lugmag sal verduidelik hoe die wapens en toerusting gebruik is tydens plaaslike en multi-nasionale oefeninge, vredesendings, reddingswerk en patrollies.

Ontleders het die langdradige proses as ‘n vertragingstaktiek beskryf vir die ondersoek wat reeds gebuk gaan onder bedankings weens beskuldigings van partydigheid.

Maandagaand op die SABC se program, Justice Factor, het ‘n kommentator dié mening beaam en gesê sy glo nie die oormatige detail sal getuienis oplewer wat vermoedens dat korrupsie plaasgevind het, bevestig nie.

DA-hoofsweep loop na ANC oor

Die Demokratiese Alliansie het die nuus verwelkom dat sy voormalige hoofsweep in die Tshwane Metroraad, Derrick Flemming, na die ANC oorgeloop het.

Flemming was ‘n lid van die ANC voordat hy by die DA aangesluit het. Flemming het gister aangekondig dat hy uit die DA bedank en weer by die regerende party aangesluit het.

Die DA streekleier, Solly Msimanga, sê Flemming het sy ontevredenheid met die DA se beleid bekend gemaak voordat hy hom opnuut by die ANC aangesluit het.

Msimanga het die DA se goeie wense aan Flemming oorgedra.

Flemming sê die ANC is steeds die enigste party wat maatskaplike, ekonomiese en politieke verandering in die land kan bewerkstellig. – RSG

Die Afrikaner as postpostmoderne vreemdeling

deur Dan Roodt

[followbutton username=’danroodt’ count=’true’ lang=’en’ theme=’light’]

Hou van Dan Roodt se Facebookblad

Ná Albert Brenner se uiters interessante kommentaar oor die Afrikaner se identifikasie met rugby, dag ek ek sal so ‘n stukkie teorie (denk?) pleeg oor wie en wat die Afrikaner in 2013 nou eintlik is.

Nie lank gelede nie, het ek ‘n insgelyks fassinerende paar eposse met ‘n klassiek opgeleide musikus/pianis uitgeruil, waarin hy vir my gesê het:

“Soos ek dit sien is daar interessante verskynsels in die kunsmusiek van plaaslike komponiste, soos die ruimtegevoel, naatlose struktuurbeheer, onnaspeurbare ritmiese vitaliteit en ‘n universele lirisme in Arnold van Wyk se musiek, struktuurvaartbelyning en psigologiese skakels met kernelemente in die Europese erfenis in Hubert du Plessis se werke, ‘n “kop-omkeer” Afrika-vernuwing in Stefans Grové se styl, skakel met abstrak ekspressionistiese kunsrigtings by Dirk de Klerk, ‘n Namib-tydloosheid gepaardgaande met post-modernistiese perspektiewe in Etienne van Rensburg se musiek, konseptuele vernuwings in Jeanne Zaidel-Rudolph se styl – alles dinge wat wesenlik verband hou met die feit dat Afrikanerkultuur essensieel ‘n Nuwe Wereld-verskynsel is. Maar ek dink minderwaardigheidsgevoelens of ‘n gebrek aan juiste waardebepaling veroorsaak dat hierdie genre eerder uitsterf en ‘n populistiese potjiekoskultuur oorneem waar niemand juis geaffronteer word nie en ook waar intellektuele vernuwing nie entlik belangrik is nie.”

Dis ‘n mondvol, maar die “money quote” soos die Amerikaners sê, is sy gevolgtrekking: “dat Afrikanerkultuur essensieel ‘n Nuwe Wêreld-verskynsel is”. Dvorak het mos ‘n Nuwe Wêreld-simfonie gekomponeer, waarin hy die vitaliteit en aardsheid, maar ook die moderne van Amerika, wou vasvang. Blykbaar het Neil Armstrong ‘n opname van hierdie simfonie tydens die Apollo 11-sending saam maan toe geneem waar hy in 1969 daardie eerste beroemde tree op ons naaste hemelliggraam gegee het.

Anders as die stereotipe voorstellings van die Afrikaner as argaïese, landelike wese, ‘n soort “Ampie” uit die wêreld van Jochem van Bruggen, was die Afrikaner tot op hede die belangrikste draer van die modernisme en selfs die postmodernisme in Suid-Afrika.Tydens die dertigerjare van die vorige eeu het Afrikanerargitekte reise na Skandinawië onderneem in hul versugting na moderne argitektuur en ontwerp. Vele van die destyds ultramoderne geboue wat hulle in Pretoria en Johannesburg ontwerp het, is vandag besig om in puin en ruïne te verval.

Net vanoggend luister ek na my seun wat op pad skool toe vir sy suster differensiële wiskundige vergelykings met die grootste gemak en half aan die slaap – sit-lêend agter in die motor – uitlê. Benewens Afrikaans, Calvinisme en Europese argitektuur en filosofie, is wiskunde omtrent so eie aan die Afrikaner soos boerewors en koeksisters. Ondanks alle pogings van die ANC-bewind en sy kommissarisse soos me. Barbara Creecy om ons skole te vernietig, lééf daardie kennis en insig – tesame met en in Standaardafrikaans – hardnekkig voort.

Die linkse staatsgreep van 1994 het ons meteens vanuit modernisme en postmodernisme teruggeruk in ‘n barbaarse, primitiewe wêreld in. Dis ‘n sfeer van rituele, offerandes en buitenissige geweld: die mag van verskrikking (Julia Kristeva). Vir die Afrikaner het dit in alle opsigte ‘n rampspoedige breuk met sy voorafgaande geskiedenis meegebring, maar ook: toenemende blootstelling aan die paradys van wreedheid (Stephen Smith, Stephen Ellis), ontheemding en vervreemding.

Polities, ekonomies en tegnologies, het die Afrikaner – miskien meer as enige ander Westerse volk – ineens afskeid geneem van die moderne, maar ook die postmoderne. Trouens, die Duitse filosoof Jürgen Habermas het eens in sy kritiek van postmodernisme daarna as “die afskeid van die moderne” verwys. As uitgeworpene, sowel uit “die Weste” – daardie verkrummelende begrip – as uit die neoprimitiewe “uitgebreide stam van Suid-Afrikaners”, bevind die Afrikaner hom reeds as ‘n soort pionier op die rand van die beskawing en van rasionaliteit.

Die Afrikaner word aan ‘n intense proses van vervreemding onderwerp, in elke moontlike sin van die woord: verlies aan ‘n identiteit, ‘n heimat, ‘n self, selfs sy burgerskap en sy grond. Geen Afrikaanse naam mag in die neoprimitiewe Suid-Afrika oorbly nie. Om Afrikaner te wees, is daarom, in die eerste plaas en bowenal, om vreemdeling te wees: l’étranger. Met al die eggo’s van Albert Camus se beroemde novelle oor ‘n Fransman in Noord-Afrika, op die vooraand van die sogenaamde dekolonisering.

Buitestaanderskap (Camus, Lovecraft, Wilson). Om vreemdeling te word en as vreemd gesien te word, is die nuwe inhoud van Afrikanerskap. Die absurditeit – absurde mure, herinner ek my iewers ‘n frase uit Camus – van wette wat die Afrikaner tegelyk wil “ontras”, soos dit genoem word, maar tegelyk teen hom as blanke diskrimineer en ‘n soort geweldshorison definieer waarteen sy nuwe nuwe/ou status van slagoffer afspeel. Soos Retief en sy manne moet ons afgeslag word.

Teenoor die neoprimitiewe totale aanslag op sy wese en alles wat Afrikaans is, ken die Afrikaner net een reaksie: hy vlug. Om van die verskrikking af weg te vlug. Hy vlug in sy diaspora in. Of agter mure. Hy skuil agter sy Afrikaans, agter sy taalgrens van waar hy die verval met gelatenheid betrag. Hy ervaar sy vervreemding, sy vreemdeling-wording, om in sy eie land as vreemdeling en buitelander gesien te word, met angs, met onverskilligheid, met fatalisme, maar ook: woede. Ten minste sommige, ‘n minderheid.

Die Bantoe-imperialistiese ANC-bewind het daardie kennisgewing vervolmaak wat vroeër jare in die Engelse stad Durban vertoon is: “Woonstel te huur: Dutchmen en Indiërs hoef nie aansoek te doen nie.” Vandag is dit veral as Indo-Europeër (Dumézil), as Kaukasiër, wat ons nie meer in Suid-Afrika welkom is nie.

Noem die Afrikaner se nuwe peregrinasie – sy eksistensiële dwaal (ook die titel van ‘n novelle deur die skrywer Chris Barnard!), sy reise na nêrens, na die verre, uitgestrekte Oos-Rand wat Australië is of die aardbewings van Nieu-Seeland, die koue van Kanada, die klam, mistige wêreld van Engeland, ‘n verkenning van vreemdeling-wees. Die peregrinasie van die ewige peregrinus, die Afrikaner. Die Vlieënde Hollander (groete vir Wagner) wat nóg in Europa tuis is, nóg in Afrika. Daardie tussenwêreld wat Van Wyk Louw o so lowend beskryf het en in die beton van die Paarlse Taalmonument vasgegiet is, het nou die Afrikaner se nuwe hel geword.

Xenofobie. Moontlik die enigste Griekse woord wat aan die barbaroi van die nuwe Suid-Afrika bekend is en waarmee die doodmaak van vreemdelinge benoem word. Ook die daaglikse moorde op Afrikanermans, -vroue en -kinders.

Transformasie is die waansin van die dag, la folie du jour (Blanchot). Die paradoks is egter (en Afrikanerskap is ook, bowenal en by uitstek: paradoks) dat die Afrikaner bo die moderne en die postmoderne uitstyg, jenseits der Moderne, au-delà, anderkant, en hom in ‘n nuwe wêreld bevind waarvan die mees radikale postmoderne denkers maar net kon droom en dalk heenwys. Die lang naels van Gilles Deleuze, omring deur draagbare klankopnemers, wat waansin en skisofrenie as die Nuwe Jerusalem poneer. Die risoom, die Pink Panther wat die wêreld ligroos oorstroom, onbeduidende breuke agterlaat.

Ligroos soos bloed? Vanuit die bloedige orgie wat Suid-Afrika vandag is, vanuit die totalitêre totemstaat van multikulturele samesyn, sluip die Afrikaner op sy tone die toekoms in. Ontwortel, binnekort grondloos en sonder wortels, risomeer hy (as dit ‘n werkwoord kan wees) na nuwe werklikhede. Die risoom. Die uiterste revolusionêre begrip. Om in enige rigting te kan groei. Soos die internet. Virtuele bande tussen ontwortelde individue, ontheemdes, vervreemdes. Aussiekaner, Eurokaner, Englikaner. Een en almal Afrikaners.

Die grense van bloed is belangriker as geografiese grense (Alain de Benoist).

En in ons groei oor die aardbol heen en na mekaar toe, is daar iets van die laertrek van ouds te bespeur. Nou nie meer die geslote kring van waens nie, maar die oop teks, die losse alliansie en verstrengel raak in mekaar. Die “drade” en weefsel van virtuele gesprekke.

Vir ons lyk die wêreld oud en ons is nuut.

Só moes Prometheus gevoel het toe hy ‘n hele goddelike orde uitgedaag het.

[followbutton username=’danroodt’ count=’true’ lang=’en’ theme=’light’]

Hou van Dan Roodt se Facebookblad

Afrikanerbond doen voorlegging oor 1913-wet

Die parlement se Ad Hoc komitee oor die herstel van grondregte en die gevolge van die 1913 Wet op Naturellegrond voer vandag samesprekings met verskillende belangegroepe oor die vordering wat tot dusver gemaak is.

Die herverdeling van grond, die voorgestelde heropening van grondeise en kommer oor voortslepende onsekerheid oor grondonteiening, is van die kwessies wat bespreek sal word.

Die voorsitter van die Ad Hoc komitee, Jerry Thibedi sê terugvoering oor die vorige werksessie wat in Junie gehou is, sal ook gegee word.

Die Afrikanerbond, wat nie by die vorige sessie teenwoordig was nie, sal vandag ‘n voorlegging doen oor die nalatenskap van die 1913-wet.

Die ministeries van Openbare Werke en van Landelike Ontwikkeling en Grondsake sal ook terugvoering gee oor die voorgestelde Onteieningswet en die konsep-wysigingswetsontwerp oor die herstel van grondregte. – RSG

Oscar-moordverhoor tot volgende jaar uitgestel

Die moordverhoor van die Paralimpiese atleet Oscar Pistorius sal van 3 tot 20 Maart aanstaande jaar in die hooggeregshof in Pretoria plaasvind.

Die staat het amptelik die klagstaat teen hom bekendgemaak. Daar is glo bewyse dat Pistorius op 14 Februarie vanjaar sy vriendin Reeva Steenkamp met voorbedagte rade doodgeskiet het, is vroeër berig.

Hy het vanoggend vlugtig in die landdroshof in Pretoria verskyn waar hy wel van moord met voorbedagte rade op Steenkamp, die onwettige besit van ammunisie en die oortreding van die Vuurwapenwet aangekla is.

Volgens berigte beoog die staat om ten minste 107 getuies te roep. Pistorius hou vol dat hy Steenkamp vir ‘n inbreker aangesien het.

Die hofverrigtinge in die Pretoriase landdroshof in die saak teen Oscar Pistorius het Maandagoggend begin en daar is wêreldwyd daaroor berig.

Pistorius het kort voor negeuur by die hof aangekom. Hy is vergesel deur sy broer, Carl en suster Aimee. Sy gesin moes die huilende atleet troos.

Die hofsaal was stampvol met tientalle plaaslike en buitelandse joernaliste teenwoordig.

Die polisie het die Pretoriase landdroshof, voor Oscar Pistorius se hofverskynin met snuffelhonde deursoek .

Die groot groep joernaliste was sedert vyfuur vanoggend by die hof saamgetrek.

Grondwethof verwerp Marikana-aansoek om staatsbefondsing

Die Grondwethof het die appèlaansoek van regsverteenwoordigers van mynwerkers by die Marikana Kommissie van Ondersoek verwerp.

Die regters in die hof het in ‘n eenparige uitspraak die aansoek verwerp om ‘n tussentydse bevel van die Noord Gautengse Hooggeregshof ter syde te stel. Dié hof het gelas dat die staat nie ‘n verpligting het om die mynwerkers se regsverteenwoordigers te betaal terwyl hulle op ‘n hersienig van die befondsingskwessie wag nie.

Die Grondwethof sê hy hoor nie appèlaansoeke oor tussentydse bevele aan nie.

Die president van die Hof het die uitspraak gelewer.

Die uitspraak oor die Marikana Kommissie van Ondersoek se befondsinggeskil sou aanvanklik Vrydag – die eerste herdenking van die slagting – gelewer word.

Die hof het egter later ‘n kennisgewing uitgereik dat uitspraak Maandag gegee sal word.

Die geskil oor betaling het die Kommissie se werksaamhede lamgelê. Die regsverteenwoordigers van die mynwerkers, en die families van die 34 afgestorwe mynwerkers, het hulle aan die Kommissie se werksaamhede onttrek nadat hulle aansoek dat die staat hulle regskoste betaal, in die Hooggeregshof van die hand gewys is.

Daarna het hulle ‘n dringende appèlaansoek by die Grondwethof ingedien. Uitspraak is gelewer sonder dat betoë aangehoor is.

Intussen sal die Kommissie van Ondersoek sy werksaamhede hervat. – RSG

Seksmisdadiger kry parool

Die seksmisdadiger Cezanne Visser, beter bekend as advokaat Barbie, gaan binnekort op parool vrygelaat word, het die Sunday Times Sondag berig.

Die departement van korrektiewe dienste het gesê die paroolraad het haar vrylating van Maandag af goedgekeur.

Visser dien tans tronkstraf van sewe jaar uit vir onsedelike aanranding en die vervaardiging en besit van kinderpornografie.

Sy is ook skuldig bevind dat sy bedrog gepleeg het by ‘n kinderhuis deur weeskinders onder valse voorwendsels uit te neem.

James Smalberger, adjunkkommissaris, het aan die koerant gesê Visser se parool val onder die maksimumkategorie, met streng voorwaardes wat Maandag geformaliseer sal word.

“Visser, soos enige ander oortreders in dieselfde kategorie, moes die helfte van haar vonnis uitdien, waarna sy oorweeg word vir parool,” het Smalberger gesê.

Smalberger sê die departement sal nie huiwer om haar weer in hegtenis te neem indien sy haar paroolvoorwaardes oortree nie. – Sapa

SAOG vra dat Zim-sanksies opgehef word

Suider-Afrikaanse leiers het die internasionale gemeenskap gevra om sanksies teen Zimbabwe op te hef in die lig van president Robert Mugabe se oorwinning by die stembus.

Die voorsitter van die SAOG, Joyce Banda sê Zimbabwiërs het nou genoeg gely.

Lede van die SAOG sê hulle is tevrede dat die Zimbabwiese verkiesing vry en vreedsaam was.

Die leier van die opposisie, Morgan Tsvangirai beweer egter dat daar grootskaalse ongerymdhede was.- RSG

Mosambiek se stropers teiken Kruger

Owerhede sê stropers uit Mosambiek is verantwoordelik vir grootskaalse stropery in die gebied.

“Mosambiek word algemeen beskou as ‘n veilige hawe vir stropers. Die renosterhorings word gesmokkel uit die land deur Maputo,” sê Limpopo Nasionale Parke se woordvoerder Antony Alexander.

Renosterhoring kos nou byna R700 000 per kilogram op die swartmark.Terwyl 25 renosters 10 jaar gelede vermoor is, is daar verlede jaar byna 700 doodgemaak. Die Kruger Nasionale Park is die belangrikste teiken.

Regeringsamptenare, het die polisie en wildbewaarders in Mosambiek is vinger in die stropery.

‘n Multi-miljoenrand hervestigingsprojek is aan die gang om gemeenskappe wat naby die twee parke woon, te hervestig, aangesien kommer aan die toeneem is oor die oënskynlike onvermoë van die Mosambiekse owerhede om te verhoed dat Mosambiek ‘n veilige skuilplek bied aan stropers wat renosters en olifante in die Krugerwildtuin stroop.

Owerhede sê stropers van Mosambiek vervoer renosterhoring deur die Limpopo Nasionale Park. Alexander sê stropers beweeg deur Massingir na Shokwe en dan na Maputo.

Hy sê Mosambiek word oor die algemeen beskou as ‘n veilige toevlugsoord vir stropers.

Oud-lid gevang met blouligte, polisie-uniforms, ammunisie

ŉ Voormalige polisieman is Sondag by sy huis in Ga-Rankuwa, noord van Pretoria, in hegtenis geneem nadat daar oa polisie-uniforms en ammunisie in sy besit gevind is.

Riah Phiyega, nasionale polisiekommissaris, sê die 47-jarige oud-polisieman se arrestasie kom na ŉ operasie wat gesamentlik deur die Valke en die nasionale intervensie-eenheid onderneem is.

Phiyega sê die polisie het die oud-lid se huis deursoek en op ammunisie, ŉ groot bedrag kontant waaronder Amerikaanse dollars, ŉ bloulig en polisie-uniforms beslag gelê.

Paul Ramaloko, woordvoerder van die Valke, sê die man was vroeër ŉ sersant by die Klipgat-polisiestasie en is 2010 uit die polisie geskors nadat hy van huisroof aangekla is.

“Die man is glo ‘n lid van ŉ bende wat hul as polisiebeamptes voordoen en niksvermoedende mense in Pretoria en omliggende gebiede teiken.”

Ramaloko sê hul verwag om nog mense in hegtenis te neem.

Die oud-polisieman sal Maandag in die Ga-Rankuwa-landdroshof verskyn. – Sapa

Bewerings ondersoek dat Britse weermag by Diana se dood betrokke was

Die Britse polisie ondersoek nuwe inligting oor die dood van prinses Diana, insluitend die bewering dat sy deur iemand in die Britse weermag vermoor is.

Scotland Yard het eergister gesê hulle gaan die geloofwaardigheid van die inligting na. Diana, haar kêrel, Dodi al-Fayed, en hul motorbestuurder, Henri Paul, is op 31 Augustus 1997 in ’n motorongeluk in Parys dood.

Volgens die Britse nuusagentskap Press Association (PA) het die voormalige skoonouers van ’n voormalige Britse soldaat glo die nuwe bewering gemaak, aan die hand van gesprekke wat hy glo in die verlede gevoer het.

Paul se familielede het die nuus verwelkom, en gesê hulle glo die die waarheid moet vertel word.

Die buitengewone bewering het na vore gekom tydens die tweede krygsraad van Sersant Danny Nightingale, wat skuldig bevind is van die onwettige besit van ‘n vuurwapen en ammunisie.

Die nuwe getuienis is uiteengesit in ‘n brief geskryf deur die skoonmoeder van ‘n SAS-sluipskutter, net bekend as soldaat N, wat ‘n belangrike getuie vir die vervolging is.

Die agt-bladsy korrespondensie beweer Soldaat N het gespog dit was die SAS was wat prinses Diana se dood gereël het en toegesmeer het.

PA en Sky News het berig die Britse militêre polisie het die nuwe inligting aan Scotland Yard oorhandig.

“Die metropolitaanse polisiediens ondersoek die inligting wat onlangs in verband met die sterftes ontvang is en ontleed die tersaaklikheid en geloofwaardigheid daarvan,” het Scotland Yard in ’n verklaring gesê.

Beamptes in die eenheid teen gespesialiseerde misdaad sal die ontleding doen.

“Dit is nie ’n herondersoek nie en val nie onder Operation Paget nie.” Paget was die polisieondersoek na die samesweringsteorieë oor die motorongeluk.

Vyftien jaar ná die ontydige dood van die prinses is ‘n nuwe boek vrygestel waarin die skrywer onthul hoekom hy weet dat die koninklike familie Charles se voormalige eggenoot laat doodmaak het.

Die boek Paris-London Connection: The Assassination of Princess Diana is geskryf deur John Morgan. Morgan sê in sy boek dat die motor-ongeluk “georkestreer” was deur MI6, die Britse buitelandse intelligensiediens. Hy onthul ook die korrupsie in beide die Franse en Britse polisie-ondersoeke.

Morgan, wat glo bande met die CIA het, het so ver gegaan in sy boek om 26 individue te noem wat meineed gepleeg het en verantwoordelik gehou moet word vir hul valse verklarings.

Morgan beskuldig selfs die dokters in die ambulans as synde deel van die moordkomplot. Hy sê hulle het “Diana vermoor agter in hul ambulans”. Hy voel dat die verklaring geregverdig is, want dit het ‘n uur en 43 minute geneem om die hospitaal na die ongeluk bereik.

Morgan gee ook die voormalige Eerste Minister Tony Blair deels die skuld vir prinses Diana se dood. John Morgan se boek onthul dat die 26 individue onder direkte invloed van senior koninklikes gehandel het.

Morgan noem onder meer Sherad Cowper-Coles as een van die 26 individue. Volgens die boek, was Cowper-Coles in beheer van die Parys-ondersoek. Cowper-Coles is later as die Britse ambassadeur na Israel, Saoedi-Arabië en Afghanistan aangewys. – Sapa/AFP/Examiner

Tweede huis in Krugersdorp brand weens leë brandkrane

Skaars ‘n week nadat ‘n gesin van Kenmare, Krugersdorp, al hulle besittings in ‘n huisbrand verloor het, is die besittings van nog ‘n gesin in dié area ook deur ‘n brand verwoes.

Elaine du Preez, ‘n buurvrou van die huis in Howthweg wat aan die brand geraak het nadat vlamme van ‘n veldbrand daarheen versprei het, vertel dat sy voor 3nm op 7 Augustus gesien het hoe die veld in die omgewing van die Donegal Villas kompleks brand.

“Skaars ‘n halfuur later was die vuur in die vallei. ‘n Sterk wind het die vlamme teen die huise gewaai en ons het die plante natgespuit toe ons sien hoe sterk die vlamme is.”

Sy sê daar was toe reeds vier brandweermanne met kannetjies water op hulle rûe wat ‘n oog oor die vuur gehou het.

“Die mense langs ons se lapa het eerste aan die brand geraak. Ons het dit probeer natspuit, maar dit het nie gehelp nie.”

Die hitte het die huis se ruite laat bars en in die tussentyd het die vlamme na ‘n grasdak lapa op die stoep versprei wat die huis laat vlamvat het.

Die eienaars was nie tuis nie en die diere op die perseel is nie beseer nie.

Du Preez sê een van die bure het aan haar gesê dat sy 12 oproepe na die brandweer gemaak het en dat hulle na bewering ook verdwaal het.

“Iemand moes hulle na die huis bring, maar dit was toe reeds te laat aangesien die huis reeds afgebrand het.”

Gerhardt Nieuwoudt, die streeksbevelvoerder van die nooddienste by die Wes-Randse Distriksmunisipaliteit bevestig die voorval en sê twee brandweerwaens asook ‘n Land Cruiser is na die veldbrand by die Donegal Villas kompleks gestuur en het het teen 3.51nm daarvan bewus geword dat ‘n huis aan die brand geraak het.

“Daar was ‘n probleem met die brandkrane wat nie in plek was nie en toe was. Die brandweerwaens het rondgery om na water te soek.”

Hy sê daar was die volgende dag ook ‘n veldbrand naby Howthweg.

“Die brandweer is daarheen ontbied nadat hulle ‘n oproep teen 11.52vm ontvang het en was teen 12.15nm op die toneel waarna die vuur dadelik geblus is.”

Na hierdie insident is die brandweer na die toneel van nog ‘n brand in die Magaliesburg-area. – looklocal.co.za

Sadou agter Vavi

Die onderwysersvakbond, Sadou, se grootste streek in KwaZulu-Natal, Kokstad, eis ‘n terugtrekking van die besluit om die president van Sadou, Thobile Ntola, en die hoofsekretaris van Cosatu, Zwelinzima Vavi, te skors.

Sadou se Kokstad-streek het gister ‘n vergadering in Port Edward gehou.

Ntola is geskors nadat hy ‘n platform aan Vavi verskaf het om Sadou toe te spreek by die vakbond se vergadering in Oos-Londen.

Vavi is op sy beurt geskors na ‘n buite-egtelike verhouding met ‘n junior personeellid. Zamuxolo Matwasa sê die klagtes teen Vavi en Ntola dra geen gewig nie. – RSG

Dodetal in Egipte styg verder

“Hel“, “slagting“, “chaos“ is hoe die sogenaamde Dag van Woede in Egipte beskryf word in hoofopskrifte van dagblaaie regoor die wêreld. Nagenoeg 90 mense is gedurende die jongste skermutselings in die land dood.

Egipte word toenemend deur die internasionale gemeenskap veroordeel en massa-optredes teen die Egiptiese weermag word oor die wêreld gehou.

Die dodetal in Egipte hou aan om te styg en na beraming het meer as 800 mense reeds omgekom.

Die Times beskryf hoe ‘n protes in Kaïro se Ramses-plein vreedsaam begin het, maar met ‘n “skielike, oorverdowende geluid van outomatiese geweervuur” in straatgevegte ontaard het, nadat skares in paniek voor die koeëls gevlug het.

Intelligensieverslae dui daarop dat van die polisie- en weermaglede hul uniforms tuis gelaat en met die skare probeer versmelt het in gewone drag, maar nogtans gewapen was, op opponente begin skiet het en straatbarrikades opgerig het ná die chaos uitgebreek het en na woonbuurte versprei het.

Tydens die jagtogte op Morsi-ondersteuners het sommige gewone burgers glo by die veiligheidsdienste aangesluit. Die jongste verwikkelinge het die risiko van ‘n volskaalse burgeroorlog in Egipte verder verhoog.

Die Financial Times berig dat die onderdrukking deur die weermag teen Islamitiese ondersteuners van die afgesette pres Mohammed Morsi ‘n golf van geweld teen Christene in Egipte ontketen het.

Christelike kerke, besighede en skole is vernietig, geplunder en aangeval. Minstens vier mense het in dié geweld omgekom. Die Moslembroederskap het intussen ten sterkste ontken dat hulle Christene teiken.

Die Daily Mirror beskuldig die wêreld se magshebbers dat hulle op die kantlyn staan van wat gebeur in Egipte en pateties hulle hande vryf. Hulle het ‘n beroep op die VSA gedoen om sy militêre hulp dadelik op te skort totdat daar nuwe verkiesings gehou word.

Die Guardian, het in sy hoofberig gewaarsku dat Europa diplomatieke druk op Egipte se leiers moet volhou vir ‘n politieke skikking.

Die koerant wys daarop dat indien Egipte oorgaan tot ‘n burgeroorlog, die ontwortelde noorde ‘n dagreis ver na Europa is en dat die EU met ‘n vloedgolf van immigrante getref sal word.

Die betogings het ondanks ‘n aandklokreël tot in die nag voortgeduur en die Moslembroederskap beplan om vir nog ‘n week met betogings te volhard. Ondersteuners sê hul demokratiese keuse word vertrap deur die veiligheidsdienste se optrede.

Die Europese Unie se Raadgewer oor Buitelandse Sake het die geweld as skokkend bestempel en vir ‘n gekoördineerde reaksie teen die slagting gevra.

Die Duitse kanselier, Angela Merkel sê Duitsland sal sy betrekkinge met Egipte in heroënskou neem.

Die Franse Minister van Buitelandse Sake, Laurent Fabius sê hulp mag dalk heroorweeg word. Denemarke het reeds sy hulp aan Egipte gestaak.

Saoedi-Arabië het egter sy steun aan die Egiptiese weermag toegesê: “Die Koninkryk van Saoedi-Arabië, sy mense en die regering gaan staan vandag by sy broers in Egipte teen terrorisme,” het hy Vrydag gesê in ‘n verklaring op die staats-TV.

Hy het ook gesê dat hulle vol vertroue is dat Egipte sal herstel. Saoedi-Arabië is ‘n bondgenoot van die voormalige president Hosni Moebarak en het in die verlede ‘n moeilike verhouding met die Moslem-broederskap gehad.

Die koning het $5 miljard in hulp aan Egipte belowe verlede maand as Morsi verdryf word uit die presidentstoel.