Agt swartes is die afgelope week in die Sinoville-omgewing in hegtenis geneem. Sinoville-polisiewoordvoerder Mirna von Benecke sê verdagtes is vir onder meer roof, huisbraak, besit van gesteelde goedere en betreding aangekeer, het die Rekord Noord berig.
Maandag is twee 26-jarige vermeende diewe in Montanapark in hegtenis geneem toe hulle ‘n vrou beroof het wat op pad bank toe was om geld te deponeer. Hulle is deur ‘n lid van die gebiedspolisiëringsforum (GPF) opgemerk wat die SAPD sowel as ander GPF-lede in kennis gestel het. Die verdagtes is toe aangekeer.
In ‘n ander geval is twee verdagtes (27 en 35) Dinsdag vasgetrek nadat hulle by ‘n huis ingebreek het. Die twee diewe het ‘n huishulp in Wonderboom aangehou en onder meer ‘n televisie, drank, ‘n dvd-speler en juwele gesteel.
Twee rowers is deur die GPF opgemerk toe hulle oor die muur gespring het en ‘n derde wat buite in ‘n voertuig gewag het. Twee diewe het weggejaag nadat hulle die gesteelde items in die voertuig gelaai het.
Die derde een het te voet gevlug en is deur die GPF naby Laerskool Wonderboom voorgekeer. Die voertuig wat weggejaag het, is deur die polisie agtervolg.
Een van die verdagtes het uit die bewegende motor gespring en is naby die Deon Malherbe-swembad in hegtenis geneem.
In die harwar het die voertuig waarin die diewe gevlug het, weggekom, maar is later in klein Zambesi opgespoor. Al die gesteelde goedere is teruggekry, maar die derde verdagte is steeds soek.
Nog twee diewe (31 en 19) is Dinsdag in ‘n ander voorval vir huisbraak in hegtenis geneem. Hulle het verlede week by ‘n Montana-huis ingebreek. ‘n Onbekende persoon het die beroofde vrou geskakel en gesê sy kan haar gesteelde goedere by ‘n adres in East Lynn gaan haal. Sy het die polisie in kennis gestel en hulle het haar na die adres vergesel. Die twee rowers is daar in hegtenis geneem.
Die polisie het Maandag ook ‘n 26-jarige in hegtenis geneem toe hulle hom in Montana voorgekeer en in besit van onder meer gesteelde sparre betrap het. Die dief het erken dat hy die sparre gesteel het.
Von Benecke moedig die publiek aan om vertroud te raak met die GPF en om aan te sluit. Die GPF help om inligting vining by die polisie te kry wat spoedige reaksie verseker.
Die burgemeester, Kgosientsho Ramokgopa, sê die Metroraad wil die R25 miljoen van die organiseerders van die mislukte musiekfees verhaal.
Die fees op Cullinan oos van Pretoria, sou ‘n optrede van die Amerikaanse kunstenaar Nicki Minaj insluit. Die driedaagse fees sou eerskomende naweek plaasgevind het.
Daar was byna geen belangstelling in die TribeOne Dinokeng konsert nie en net 4000 van die 100.000 kaartjies is verkoop.
Ramokgopa het bewerings ontken dat die stad R65 miljoen op die misluke konsert verkwis het. Hy sê R40 miljoen was vir die “ontwikkeling van infrastruktuur”.
Die burgemeester sê van die R25 miljoen wat vir die konsert begroot is, was die helfte vir bemarking.
Volgens hom is 350 kunstenaars geïdentifiseer vir die vertoning, waarvan 70 persent plaaslik sou wees. Hiervan sou 40 persent van Tshwane wees.
Ramokgopa het gesê hulle kontrak met die organiseerders het voorsiening gemaak vir ‘n terugbetaling indien die konsert nie voortgaan nie.
Wayne Heenop en Janesque Vorster het albei skraps met hul lewens daarvan afgekom toe ’n koeël deur Vorster se motor se kopstuk getrek het en Heenop in die wang getref is.
Heenop moet Woensdag dié koeël by die Steve Biko Akademiese-hospitaal laat verdwyder nadat dit sy wangbeen vergruis het.
Hy en Vorster, Pretoria Tuine-inwoners, was omstreeks 22:00 Saterdagaand op pad huis toe na hulle Vorster se broer, Jaun-Jacques, by die OR Thambo-lughawe gaan haal het.
Vorster het gesê hulle was net so voor die Irene-afrit op die R21 toe daar ’n skoot van die pad se rigting na hul voertuig afgevuur is.
Sy vermoed net een skoot is gevuur.
Die koeël het dwarsdeur die sitplek se kopstuk getrek en Heenop in die wang getref.
“Gelukkig het ons nie afgetrek nie want ek vermoed die rowers sou ons gekaap het. Wayne het net aanhou ry selfs al het hy duiselig geword,” het sy gesê.
Vorster is dankbaar dat die voorval nie erger was nie en sy dank God dat Hy sy hand van beskerming oor hulle gehou het.
“Ek het nie geweet wat om te doen nie. Ek was so geskok,” het sy gesê.
Uitspraak in die Oscar Pistorius-moordverhoor sal Donderdag gelewer word. Pistorius staan tereg op vier aanklagte waaronder moord met voorbedagte rade op sy vriendin, Reeva Steenkamp.
‘n Groot mediateenwoordigheid word vanoggend verwag by die Noord-Gautengse Hooggeregshof in Pretoria vir die uitspraak in die moordverhoor verwag.
Meer as 150 plaaslike en internasionale joernaliste sal na verwagting die hofsale GC en GD volpak om na die regter se beslissing te luister. Regter Thokozile Masipa sal om halftien met haar uitspraak begin.
‘n Woordvoerder van die mediamonitormaatskappy, Roi, Tonya Khoury, sê die uitspraak sal wêreldnuus wees vir die volgende twee dae.
Regskenners sê ‘n skuldigbevinding aan moord, sal beteken dat daar bevind word dat die gestremde atleet onwettig opgetree het en sy vriendin doelbewus doodgeskiet het.
Om hom skuldig te vind aan strafbare manslag, moet die hof bevind dat Steenkamp se dood aan nalatigheid aan die kant van die beskuldigde te wyte was.
Die regter sal albei weergawes van die verdediging sowel as die aanklaer moet oorweeg om te bepaal of die Staat sy weergawe bo redelike twyfel bewys het, naamlik dat Pistorius Steenkamp doelbewus doodgeskiet het.
Die verdediging hoef slegs te bewys dat Pistorius se weergawe van die gebeure redelik is en waar kan wees.
Die vlaag gewapende rooftogte by winkelsentrums wat Johannesburg dié week getref het, het na Pretoria uitgekring.
‘n Winkel in die Kolonnade winkelsentrum in Montana, Pretoria, is Dinsdag deur gewapende rowers aangeval. Die aanvallers het goedere van meer as R200.000 rand gebuit.
Niemand is nog in hegtenis geneem in verband met die rooftog by ‘n Telkomwinkel in die sentrum nie. Dit is die tweede rooftog by die sentrum binne twee weke.
‘n Polisiewoordvoerder, Johannes Maheso, sê twee gewapende mans het die winkel binnegegaan en nog twee het buite wag gehou. Hulle ondersoek die moontlikheid dat dit dieselfde rowers kan wees as twee weke gelede.
Die personeel is deur die rowers beveel om na die agterkant van die winkel te gaan. Niemand is beseer nie en die rowers het met die buit gevlug.
Die bestuur van die sentrum was nie beskikbaar vir kommentaar nie.
Hoë vlak samesprekings word vandag in Pretoria voortgesit in ‘n poging om die politieke krisis in Lesotho te beëindig. Die staatshoof, premier Thomas Thabane het gevlug en kruip glo in Ladybrand weg.
Intussen het die adjunk-premier Mothejoa Metsing aan AFP gesê hy het Lesotho vir samesprekings in Pretoria verlaat.
“Dit is weens die uitnodiging van die Suid-Afrikaanse president,” wat tans aan die hoof van die sekuriteitskomitee die Suider-Afrikaanse Ontwikkelingsgemeenskap staan, het Metsing gesê.
“Daar is geen staatsgreep in Lesotho nie,” het hy nadruklik gesê.
Die woordvoerder van die Suid-Afrikaanse departement van internasionale betrekkinge, Clayson Monyela, sê die vergadering is deur president Jacob Zuma gereël.
Monyela het vroeër gesê dit lyk asof daar ‘n staatsgreep in Lesotho beplan is.
Monyela kon nie bevestig dat ‘n vergadering tussen die eerste minister van Lesotho, Thomas Thabane en lede van die land se koalisieregering plaasgevind het nie.
Thabane het gevlug nadat die weermag beheer oor die polisie-hoofkwartier geneem het. Hy het glo noue bande met die Gupta-familie.
In die afwesigheid van die premier en sy adjunk, is die minister van Staatsdiens Motloheloa Phooko in beheer van die koninkryk soos deur hulle grondwet bepaal.
Phooko is ‘n lid van Metsing se Lesotho Kongres vir Demokrasie-party, wat in ‘n ongemaklike koalisie-regering met Thabane saam was.
Die party ontken bewerings van betrokkenheid by die staatsgreep.
Die sekretaris-generaal van die VN Ban Ki-moon, het ‘n beroep gedoen op alle betrokkenes om die grondwetlike orde en demokratiese regering te respekteer.
In ‘n verklaring Sondag, het Ban die pogings van die SAOG, die Statebond en ander vennote in Lesotho verwelkom om die herstel van vertroue te ondersteun onder lede van die regering.
Thabane, wat gevlug het saam met sy gesin, het intelligensie ontvang dat hy die teiken van ‘n militêre aanslag sou wees.
Maar ‘n militêre woordvoerder majoor Ntlele Ntoi het gesê die weermag probeer om die land beskerm teen ‘n massa-opstand wat geskeduleer is vir Maandag teen die regering.
Volgens die Lesotho-weermag het hulle intelligensieverslae ontvang dat daar elemente onder die polisie is wat van plan was om ‘n partypolitieke jeugfanatici te bewapen om verwoesting te saai, het Ntoi gesê.
Die polisie het gesukkel om te hergroepeer ná ‘n dodelike aanval Saterdag deur die weermag op sleutelinstallasies wat gelei het tot beslaglegging op ‘n wapenarsenaal.
Distrikspolisiekommissaris Mofokeng Kolo het bevestig dat een beampte in die aanval gedood is.
Die ministers van buitelandse sake van verskeie SAOG-lande het Sondag ontmoet om die krisis te bespreek.
Thabane, wat in Suid-Afrika is, het vroeër geweier om sy adjunk, Mothejoa Metsing in Suid-Afrika te ontmoet.
Die Statebond, sowel as Suid-Afrika het gewaarsku dat die Lesothoweermag se optrede “nie geduld sal word nie”.
Die Verenigde State van Amerika het sy kommer uitgespreek en het vir ‘n “vreedsame dialoog” in Lesotho gevra.
Lesotho het reeds ‘n hele aantal staatsgrepe sedert onafhanklikheid in 1966 beleef. Die politieke temperatuur in die land was besig om vinnig te styg in die afgelope maande, nadat die premier die parlement in Junie opgehef het.
Die Tshwane-metroraad het teruggekrabbel oor die besluit om die Pretoriase stadsaal te hernoem en gesê verskeie ander ikoniese geboue en terreine in en om die stad sal nuwe name kry, eers na uitgebreide “konsultasies” en oorweging van die Suid-Afrikaanse Pleknaamraad.
Voorheen het sulke “konsultasies” gelei tot ‘n voorkeur vir name van terreurstigters en kommuniste aangesien die Pleknaamraad gepak is met Boerehaters en hul handlangers.
Die metro het voorheen gesê die opgeknapte Pretoriase stadsaal sal na Marthinus Pretorius, stigter van Pretoria, hernoem word. Marthinus Pretorius is tans die enigste voorgestelde naam vir die stadsaal in die naambasis, maar dit beteken nie veel nie.
Volgens Blessing Manale, woordvoerder van Kgosientso Ramokgopa, uitvoerende burgemeester, is die stadsaal net een van vele geboue wat name gaan kry en hernoem gaan word.
“Ons wil eers die hele (naam)pakket neerpen om aan die Suid-Afrikaanse Pleknaamraad te stuur vir oorweging en dan ‘n proses van deelname deur die publiek en belanghebbendes aan die gang kry.”
In September sal “konsultasies” gehou word in oorleg met die kantoor van die speaker.
Manale sê hulle hoop dat die proses teen Januarie volgende jaar voltooi sal wees, waarna dit in Februarie voor die raad sal dien. Die eerste hernoemingsplegtighede sal in Maart en April gehou word.
Die Heldeakker-begraafplaas in Pretoria-Wes, Soshanguve, die Wonderboom-lughawe en selfs die nuwe Munitoria-gebou gaan glo nuwe name kry.
Die Tshwane-metroraad gaan glo die Pretoriase stadsaal na Marthinus Pretorius, stigter van Pretoria, vernoem, “want die Afrikaner en hul erfenis is ook vir ons belangrik”.
‘n Woordvoerder van Kgosientso Ramokgopa, burgemeester van Tshwane, het Maandag gesê die burgemeester wil glo nie ‘n “verdeelde stad lei nie”.
Pretoria is op 16 November 1855 deur oudpres. Marthinus Wessel Pretorius (1819 – 1901) gestig, seun van die beroemde Voortrekkerleier Andries Pretorius.
Die metroraad is sedert April met opknapping van die saal, wat meer as 80 jaar oud is, besig. Onderhoud aan die orrel, “een van die land se waardevolste kulturele bates” word ook gedoen.
Die orrel, met meer as 6 000 pype, is in die dertigerjare van die vorige eeu gebou, maar is jare laas gebruik.
“Die opknapping is ‘n simbool dat die Afrikaner en minderheidsgroepe vir ons belangrik is,” het die Tshwane se woordvoerder aan Beeld gesê.
Hy het gesê die ANC is besig om uit te reik na Afrikaners. “Ons is besig om goed te besin oor wat nasionale identiteit werklik is.”
Prof. Fransjohan Pretorius, geskiedenisdosent aan die Universiteit van Pretoria, het dit as “verrassende nuus” beskryf en die opknappingswerk verwelkom.
“Dit wys Afrikaners word as belangrik geag. Dit moet net nie in ruil vir Pretoria se naam wees nie.”
Dit is nie egter nie bekend of die straatname in Pretoria weer terugverander gaan word na die oorspronklike name nie.
Die stadsaal behoort glo teen einde vanjaar klaar te wees, want die metroraad wil die Nuwejaar-aftelling daar hou.
Die hele projek kos meer as R30 miljoen volgens die stadsraad se woordvoerder.
In 1857 is Pretorius jr. verkies tot eerste president van die Zuid-Afrikaansche Republiek. Pretorius jr. se standbeeld staan buite die stadsaal in Pretoria.
Die seun van ‘n bejaarde egpaar van Pretoria-Tuine het Dinsdag op die lyke van sy vermoorde ouers afgekom.
Hul seun Deon het op sy ouers afgekom waar hulle op die slaapkamervloer in bloedplasse gelê het.
Dolf en Pop de Lange is in hul huis in ‘n sekuriteitskompleks vermoor. Hulle was glo onlangs slagoffers van ‘n roof voor die kompleks.
Pop se haarkapper en hul seun het albei onraad vermoed toe hulle nie die egpaar per selfoon kon bereik nie.
Volgens kapt. Bonginkosi Msimango, polisiewoordvoerder sê daar was tekens dat die twee hulself teëgesit het, maar dis nog nie seker hoe hulle dood is nie.
‘n Pretorianer en sy vrou Woensdagmiddag deur ‘n bende oproerige Numsa-stakers in Hercules aangeval.
Kowie Fourie se bakkie se voor- en agterruite is stukkend geslaan, toe ‘n swart skare met rooi hemde en gewapen met knopkieries en sambokke op hulle toegesak het.
Fourie sê hy het aanhou ry omdat hy vir hul lewens gevrees het, het Beeld berig.
Die swartes het met geweld op die voertuig toegesak en die ruite uitgeslaan.
Fourie het aanhou ry, direk polisiekantoor toe om die voorval aan te meld. By die polisiekantoor was daar reeds ‘n ander slagoffer van die gewelddadige stakers wat ook ‘n klag ingedien het.
Die stakers het sy selfoon uit sy hand gegryp en gesteel en ander voertuie aangeval, het die vroeëre slagoffer gesê.
Fourie het gesê die polisie het die groep oproeriges vergesel, maar het nie ‘n vinger veroer toe sy bakkie aangeval is nie. Hy is geskok deur die polisie se ongeërgdheid, sê hy.
Volgens die polisie was die skare “vreedsaam”.
Die Nasionale Werkgewers-vereniging van Suid-Afrika, Neasa, sê hy is besorgd oor berigte van sy lede dat Numsa ook nie-stakende werkers intimideer en aanrand. Die vereniging is een van die grootste werkgewerverenigings in die metaal- en ingenieursbedryf.
Die bestuurshoof van die vereniging, Gerhard Papenfus sê verskeie berigte is ontvang van skade aan geboue en voertuie in Johannesburg.
Daar is beeldmateriaal beskikbaar van werkers wat uit voertuie gedwing en met sambokke geslaan word.
Papenfus sê daar is ook ‘n nuwe tendens om ingange na werkplekke te versper, wat beteken dat nie-stakende werkers nie kan gaan werk nie.
Tans is die sokkerwêreldbeker aan die gang en hoewel ek geen sokkergeesdriftige is nie, is dit tog interessant om die vordering van die spanne dop te hou.
Gisteraand het Oranje, soos die span van Nederland bekendstaan, tot die kwarteindronde deurgedring. Ook België het goed gevaar en was waarskynlik ongelukkig om insgelyks gister deur Argentinië uitgeskakel te word.
Oor die Belgiese span kan ‘n mens minder gaande raak. Soos Frankryk, beskik hulle oor ‘n multikulturele span wat net sowel uit Afrika kon gekom het en kwalik die land verteenwoordig. Boonop is België so ‘n kunsmatige politieke entiteit wat twee volkere federaal verbind dat ‘n mens jou moeilik kan voorstel dat enigiemand patrioties oor België kan raak. Vlaandere is ‘n ander saak en dit spreek vanself dat ons ‘n ewe noue band met die Vlaminge behoort te koester as met die Nederlanders.
Sonder die Lae Lande sou daar nooit ‘n Suid-Afrika gewees het, geen Afrikaans en geen Afrikaners nie. Vlaandere was ons Afrikaners nog altyd baie goedgesind, selfs in die dae van die kulturele en ander boikotte, dus moet my huidige opmerkings oor Nederland geensins afbreuk doen aan die warm gevoelens wat Afrikaners oor die algemeen vir Vlaminge koester nie. Die meeste Vlaminge is amper meer gaande oor Afrikaans en Afrikanerskap as Afrikaners self en ons kan by hulle heelwat leer oor hoe ‘n taalstryd gestry moet word!
Ons verhouding tot Nederland is egter meer gekompliseerd; dis amper ‘n liefde-haat-verhouding, iets soos die verhouding tussen die VSA en Brittanje, tussen die vrygeworde republiek en die koloniale moederland. Tussen koningin Wilhelmina se versigtige steun vir Paul Kruger tydens die tweede vryheidsoorlog en die Nederlandse anti-apartheidsbeweging wat aktief aan terreur teen ons deelgeneem het, loop daar ‘n wye kloof.
Nederland is letterlik familie van ons, want die meeste van ons beskik iewers oor Nederlandse voorouers. In weerwil van Afrikaners se vele Franse en Duitse vanne, stam die meeste van ons tog iewers verlangs van Nederlanders af.
In 1950 nog het die Nederlandse koningin ‘n toekenning aan ons grootste digter, NP van Wyk Louw, gemaak en hom in haar paleis onthaal. Tuis in Suid-Afrika was daar steeds ‘n lewendige belangstelling in Nederlandse kultuur en letterkunde wat aan al ons universiteite gedoseer is. In my matriekjaar het ons nog ‘n Nederlandstalige voorgeskewe boek deur die Vlaamse skrywer Stijn Streuvels bestudeer.
Sedert Afrikaners se verlies aan politieke mag word Afrikaans grotendeels onderdruk en gemarginaliseer. Daar word selfs gepoog om ons taalkundig te ondergrawe deur vergesogte teorieë dat Afrikaans eintlik ‘n vorm van Khoisan is of ‘n kreool wat deur die Hottentotte tot stand gebring is. Ek wil op ‘n later stadium meer breedvoerig op dié belaglike teorieë reageer wat om politieke en polities korrekte redes opgedis word. Ongelukkig is daar ook Nederlanders wat hulle daarmee besig hou, asof hulle ons noudat ons lê, wil skop. Die taalkundige Hans Den Besten het sulke twak in akademiese artikels kwytgeraak, maar dis nie iets wat onmoontlik is om in een of twee artikels met gemak te weerlê nie.
Dit sou ‘n fout wees om te dink dat alle Nederlanders ons goedgesind is. Weliswaar bestaan daar in Nederland ‘n taamlike sterk regse beweging, onder aanvoering van Geert Wilders, met Martin Bosma wat Suid-Afrika, asook Afrikaans, deel van die party se beleid gemaak het. Bosma het blykbaar ‘n nuwe boek oor Afrikaners in Nederlands geskryf wat eersdaags gaan verskyn. Dit gaan baie interessant wees.
Tydens die 2010-sokkerwêreldbeker in Suid-Afrika, het ek gesê dat ons eerder die Nederlandse span moet ondersteun as ons eie swart Bafana-spelers. Intussen het selfs die minister van sport, Filike Mblalula, my gelyk gegee dat die Bafana die mees hopelose sokkerspan ter wêreld is. As vorige gasheer van die wêreldbeker kon ons nie eens kwalifiseer om in Brasilië deel te neem nie. In vele opsigte is die “Suid-Afrikaanse” sokkerspan emblematies van Suid-Afrika: dit word met subsidies en privaatborgskappe gemamperlang, dog sonder enige prestasie. Ons betaal astronomiese bankfooie sodat die banke die korrupsie en maklike geld rondom sokker in ons land aan die gang kan hou.
Eintlik is dit jammer dat Afrikaners nooit leer sokker speel het nie. Rugby en krieket is sportsoorte wat ons onherroepelik aan die Britse Ryk of die Britse Statebond verbind omdat dit slegs in daardie lande beoefen word. Hoeveel keer is ons nie al deur die Britte, die Australiërs of Nieu-Seelanders verneder omdat hulle in ons geesdrif vir sport ‘n manier gesien het om ons polities te manipuleer nie? Indien ons teen Europese spanne sokker gespeel het, sou ons nie soveel Engelse hovaardigheid en lis hoef te verduur het nie.
Dus, ons behoort vandeesweek almal verder die Nederlandse sokkerspan in hul skreeuend oranje hempies te ondersteun! Hopelik vind ons meer uit oor Nederlandse klubspanne soos PSV Eindhoven of Ajax Amsterdam of Feyenoord en begin hul vordering volg. Die feit dat ondersteuners van PSV Eindhoven hulself “boere” noem, is dalk ‘n goeie aanknopingspunt. In Nederland is daar sedert onlangs ook “vrouwenvoetbal”. Terloops, eintlik behoort ons ook na sokker op’t Nederlands as “voetbal” te verwys; dit klink soveel Afrikaanser.
Waarom nie ook vrouevoetbal onder Afrikaners nie? Een keer per jaar kan ons nasionale vrouevoetbalspan dalk in Nederland ‘n paar wedstryde teen die Nederlandse dames gaan speel? Blykbaar is dit iets wat ook in Skandinawië beoefen word.
Dit gaan egter om veel meer as voetbal en selfs vrouevoetbal. In die haglike omstandighede waarin ons ons bevind, hang ons oorlewing daarvan af om op een of ander manier by Europa aansluiting te vind. Die ramp wat as die “nuwe Suid-Afrika” bekendstaan, tesame met sy perverse, dekadente anti-wit kultuur, is byna volledig in die Engelssprekende lande uitgedink. Amerika en Engeland maak oorlog teen die Westerse en Europese beskawing en het in ons die eerste land gesien wat hulle volledig kon vernietig en in ‘n kwasi-kommunistiese utopie kon omtower waar alle klasse en rasse gelyk sou wees, met blankes wat permanente tweederangse status “vrywillig” sou aanvaar.
Die verengelste Afrikaners is vir my baie erger as Malema of enige radikale swarte. Hulle is tot die Amerikaanse leer van regstellende aksie en witskuld bekeer en sal hul eie mense na die brandstapel stuur as deel van hul popelende nuwe geloofsbelewenis. Hulle sal die universiteite, die skole, die sportspanne, die kerke en alles wat daar is “transformeer” en verengels en verswart totdat daar niks meer van ons oorbly nie. Dan is daar nog die hele uittog na Australië waar ons mense gaan verengels en ewe “vrywillig” instem tot Angel-Saksiese assimilasie.
Nou die dag het Gustav Venter hier by my kom koffie drink. Ons het saamgestem dat demokrasie in die land nie werk nie, veral nie vir Afrikaners nie. Om Afrikaners stemreg te gee, was een van die grootste foute wat ons ooit kon maak! As hulle die kans kry, stem hulle vir mev. Helen Zille of een of ander skynheilige swart Christen soos Kenneth Meshoe. As Mandela nog gelewe het, het hulle seker almal ANC gestem en hul eie leiers nogmaals verwerp. Die vinnigste manier om jou by Afrikaners ongewild te maak, is om iets vir hulle te probeer doen of ‘n standpunt ten gunste van Afrikaans of Afrikanerregte in te neem.
Vandag skryf die redakteur van Rapport in sy rubriek:
“… dat Afrikaans en Afrikaanse ruimtes gemaklik kan en moet bestaan in ’n Suid-Afrika wat asseblief tog nooit 100% Afrikaans en wit moet wees nie”.
Overgezet synde: ons kan saamleef met plaasmoorde, regstellende aksie, korrupsie, huisrowe en alles wat daarmee saamgaan, solank daar tog net nie ‘n wit, Afrikaanse skool of universiteit (of gesin?) iewers moet wees nie.
En: Wat is Rapport anders as ‘n 100% Afrikaanse koerant met hoofsaaklik wit lesers?
Dis genoeg om ‘n mens tot selfmoord te dryf. Gelukkig is daar geen wêreldberoemde katedrale in Suid-Afrika soos Notre Dame in Parys nie, anders het Afrikanerdenkers hulself ook in die kop gaan skiet soos die skrywerhistorikus Dominique Venner verlede jaar uit wanhoop gedoen het. So pas het daar twee boeke van hom postuum in Frans by die uitgewer Pierre-Guillaume de Roux verskyn. De Roux is iemand wat ook ‘n lewendige belangstelling in Suid-Afrika en Afrikaners koester. Dominique Venner het iewers gesê dat daar in Frankryk “erger vyande en van ‘n versteekte tipe is as op enige ander plek”.
Ons Afrikaners verstaan daardie gevoel van deur jou eie mense verraai te wees en versaak te word, maar té goed.
Ek dink ons moet aanvaar dat Suid-Afrika onder die impetus van Angel-Saksiese politieke korrektheid halfpad kranksinnig geraak het. Kollektiewe waansin. The madness of crowds. Daar was mos ‘n Skot, Charles Mackay, wat in die negentiende eeu so ‘n boek geskryf het. Dit volle titel is: Extraordinary Popular Delusions and the Madness of Crowds. Een van die bekende aanhalings daaruit lui:
“Men, it has been well said, think in herds; it will be seen that they go mad in herds, while they only recover their senses slowly, and one by one.”
Baie van ons ken daardie gevoel: om een vir een in ‘n malhuis wakker te word. Maar rondom jou duur dit voort.
Dis waarom ons ‘n soort uitweg of uitkoms nodig het, ‘n reddingsboei. Die Franse filosoof Gilles Deleuze, wat ook by tye ver heen was met politieke korretkheid en die uitwasse van die linkse sestigerjare in Frankryk, het gepraat van ‘n “buitekant” wat ‘n mens moet hê. Afrikaners het nie meer ‘n buitekant nie. Hulle leef volledig in ‘n lugdigte Anglo-Amerikaanse borrel waarin hulle elke dag meer en meer verdom en afgebreek word. Mense lees nie meer boeke nie; hulle lees dalk nie meer enigiets langer as ‘n paar paragrawe op die internet nie. Hulle kyk net hier en daar prentjies.
Maar ook in dié opsig voel ek Nederland kan ons red. Nederland het naamlik ‘n filmbedryf en Afrikaners kan met redelik min moeite volg wat op die skerm aangaan. Dis nie soos Frans of Italiaans waar jy sonder onderskrifte nie die verhaal sal begryp nie. Ons moet Nederlandse films onder Afrikaners bekendstel net soos Naspers en die Angel-Saksiese mediagroepe slegs Hollywood of hier en daar ‘n Britse produk bevorder.
Oor die afgelope tyd kyk ek heelwat “Kaasflieks”, soos ek hulle noem. Dis regtig ‘n vertroosting, veral ná ek my twee of drie keer aan die swak, polities korrekte Afrikaanse films wat deesdae gemaak word, blootgestel het. Sommige Kaasflieks het my ontroer of geamuseer. Ander het my weer geïrriteer en een of twee kon ek nie klaar kyk nie. In baie opsigte is Nederland ewe of nog meer dekadent as Suid-Afrika en ‘n mens moenie die land idealiseer nie. Maar ten minste is daar in Nederland verskeidenheid. Geen twee Kaasflieks is dieselfde nie! Die moderne Nederlandse argitektuur is asemrowend mooi en vele van die films is in huise of plekke geskiet waar mens doodgewoon die agtergrond kan geniet, ongeag waarheen die verhaal lei. Nederlanders is mooi mense, net soos Afrikaners. Wel, dit spreek eintlik vanself, want ons het gemeenskaplike voorouers.
Die mees onlangse Nederlandse fliek wat ek gekyk het, is Toscaanse bruiloft (2014). Dis ‘n lawwe soort romantiese komedie, maar word so oorspronklik, prettig en mooi aangebied dat die genre of die verhaal eintlik bysaak is. Alles speel in ‘n egte villa in Italië af waar Nederlanders heen gaan om te trou. Plek-plek word die Nederlandse dialoog ook onderbreek deur stukkies Italiaans en die kulturele anomalie van ‘n klomp Nederlanders wat skielik baie Italiaans en al fresco lewe, raak nooit kitsch nie. Dit word ‘n sorgvrye kyk op die “goeie Europeër” soos Nietzsche hom genoem het, iemand wat tuis in sy eie kultuur is, maar ook waardering het vir die lande, tale en tradisies rondom hom.
Die Alfa Romeo
Een van die sterre in die film is ‘n rooi Alfa Romeo GTV van dertig, veertig jaar gelede wat nog hier en daar op Suid-Afrikaanse paaie te siene is. Die film spreek van bewondering vir alles wat Italiaans is: die kookkuns, ou motors, selfs ‘n verspotte ou plaasbakkie met ‘n snaakse vorm, die landskap, die argitektuur, die meubels. Alles word met ironie aangebied, dog sonder dat dit ooit soos in Suid-Afrika afbrekend en stereotiep raak. Dis amper die postmoderne liefdesverhaal waarvan die Italiaanse kritikus en skrywer Umberto Eco op ‘n keer gepraat het.
Met die graad van geweld en wanorde in Suid-Afrika, beleef ons ‘n onverklaarde, voortslepende burgeroorlog. Maar dis juis in sulke tye dat ‘n mens ook behoefte aan kultuur en ontspanning het. Jy kan nie net sit en wag vir die volgende skoot om te klap, die volgende inbraak of huisroof nie. Terwyl ons identiteit deur die staat, die media en die fanatiese Angel-Saksers aangeval word, het ons behoefte aan ‘n “buitekant”, aan ‘n wêreld wat buite die Sowjet-Engelse borrel val.
Nederland en Nederlands kan in dié donker tye vir ons so iets raak. Ons kort ‘n bietjie Nederlandse voetbal sonder kwotas of sulke mooi Kaasflieks. Noudat Afrikanerpolitiek ‘n stille dood gesterf het en ons aan die giere van die Zoeloes of liberale Engelse in ons land uitgelewer is, kan ons gerus op ‘n afstand ook die Nederlandse nuus en Europese politiek begin volg. Toegegee, ons het geen invloed daaroor nie, maar net so het ons geen invloed oor die politiek in ons eie land nie. Ten minste deel ons ‘n afkoms, ‘n taal en ‘n beskawing met Nederland, wat meer is as wat ons kan sê oor wat tans in Suid-Afrika aangaan. Malema en sy trawante is vir my net tot op ‘n punt interessant of snaaks. En of Naledi Pandor by Russel Botman se begrafnis was, kan my ewe min skeel as om te weet wat die temperatuur vandag in Sacramento, Kalifornië, is. Dit traak my regtig nie.
Ons het ook nie toestemming van Nederlanders of Nederlandse amptenare nodig om daardie dele van hul kultuur wat tot ons spreek, toe te eien of te geniet nie. Die verkeerdste manier om enige kulturele wisselwerking tussen ons en Nederland aan te pak, sou wees om met die ambassade in Pretoria ‘n afspraak te maak. Nie net het iets van die vorige Hollandse vyandigheid by die ambassade oorgebly, uit die dae toe Nederlanders geld aan Stasi- en KGB-agente geskenk het om motorbomme in ons stede te plaas nie, maar alle amptelike kontak moet mos altyd met swartes geskied. Die belangstelling in Nederlandse films, boeke of idees by ons regering is seker nóg laer as in Afrikaans, met ander woorde iewers benede nul, dus sou ons ons tyd met enigiets ampteliks verspil.
Die internettydvak is egter by uitstek geskik vir guerillabemarking en alternatiewe maniere van doen. Dus kan ons ons mense se belangstelling in Kaasflieks en vrouwenvoetbal en wat ook al begin prikkel.
Sodoende kan ons dalk minder soos zombies begin dink en optree en meer soos die beskaafde mense wat ons eens was.
Die hoop beskaam nie.
Wat Afrikaans betref, is ek baie trots op my taal. Ek is daarvan oortuig dat Afrikaans eintlik in sy huidige vorm reeds in die sewentiende eeu bestaan het en eeue gelede ‘n belangrike rol in Noord-Europa en in die handel ter see gespeel het. Daar is vele woorde in Afrikaans wat dit verklaar. Ons het Europa nodig, maar Europa het ons en ons oer-Europese dialek wat hier aan die Kaap kom uitspoel het en só lank in die skadu van Engels om oorlewing moes veg, ook nodig. Ons wedersydse voortbestaan mag daarvan afhang.
Ons moet ons oopstel vir die ander, sê die postmoderne filosowe. Laat ons meer ontvanklik en “oop” vir Nederland en Vlaandere raak.
Ns. Stuur ‘n epos aan inlig@praag.org en ons stuur vir jou ‘n aflaaiskakel vir Toscaanse bruiloft. (Hier is ‘n kort YouTube-voorprent van 55 sekondes.) Nooi jou vriende uit en hou bioskoop (die Nederlanders spel dit met ‘n “c”, “bioscoop”) sommer daar waar jy is, op jou rekenaar, tablet, foon of platskerm-TV, wat jy ook al het.
Polisiebeamptes gewapen met haelgewere het ‘n skare straatsmouse in die Pretoria Woensdag uitmekaargejaag.
Tshwane-metropolisie en die SA Polisiediens het die betogers van Isivuno House, die munisipale hoofkantoor, verjaag met dreigemente van skerppuntaksie.
Winkels en banke is gesluit toe die oproeriges met stokke en klippe in Lilian Ngoyi-straat afbeweeg het. Die straat is afgesper, wat veroorsaak het dat verkeer erg ontwrig is.
Die smouse, die Tshwane Barekisi Forum, het Dinsdag ‘n reaksie geëis op ‘n memorandum van griewe wat aan die munisipaliteit oorhandig is.
Hulle beweer die metropolisie teister sy lede en steel hul voorraad.
Die smouse het gedreig om die stad onregeerbaar te maak indien dit nie stop nie.
Die handelaars wil ook hê die metropolisie moet optree teen ‘n beampte wat hulle beskuldig van die moord van een van hul kollegas in Januarie.
Die forum beweer Foster Jan Rivombo, ‘n groenteverkoper, is doodgeskiet vir die weiering om van sy voorraad aan die Tshwane-metropolisie te oorhandig.
Die forum sê hulle het meer as 1000 gelisensieerde lede in Pretoria.
Somaliese winkeleienaars van Mamelodi-Oos, Pretoria is gedwing om uit die gebied te vlug.
Hulle skuil tans in ‘n huis in Pretoria-Wes met skaars genoeg ruimte, eerder as om die dood te trotseer.
Dit volg na xenofobiese aanvalle op hul winkels wat geplunder is. Een van hulle is glo doodgemaak sedert die geweld Saterdag begin het.
Sowat 300 mans, vroue en kinders woon nou saam in die huis wat deur Somaliërs besit word Pretoria-Wes.
“Ons oorweeg dit om terug te gaan na ons oorloggeteisterde land,” het een winkeleienaar gesê.
Hy was een van ‘n groep wat die dood ontsnap het Dinsdagaand in Mamelodi-Oos, nadat ‘n mede-Somali aangeval is deur ‘n groep swart jeugdiges wat ook toegeslaan het op sy spazawinkel en dit leeg gesteel het.
Die groepe van tot 100 jong swartes, plunder die winkels van alles – van kos tot vate paraffien, koeldrank en lugtyd-bewyse.
Die Somaliërs het gesê een eienaar was in Pretoria-Wes toe hy in kennis gestel is dat sy winkel aangeval word. Hy het daarheen gehaas, en is vermoor deur ‘n woedende skare, het hulle gesê.
“Sy gesig was ‘n groot gemors,” het ‘n ander Somaliese man gesê.
“Die stad en die regering het nie ingegryp in die humanitêre krisis nie, miskien is ons beter af as ons teruggaan huis toe,” het een gesê. Hulle sê die polisie ignoreer hulle.
Kapt. Tsekiso Mofokeng het gesê die ondersoek na die aanvalle duur voort.
