betogings – Bladsy 5

Medupi: Swart woonbuurt in oproer oor afleggings

Inwoners van die swart woonbuurt Ga-Seleka by Ellisras (Lephalale) in Limpopo het oproerig geraak oor afleggings by die Medupi-kragstasie.

Hulle het met geweldadige protesoptrede begin teen die ontslag van werkers by die aanleg.

Die polisie is tans in die gebied ontplooi.

Die kragstasie nader uiteindelik voltooiing nadat die werk weens arbeidsonrus maande lank gesloer het.

Meer as tweeduisend poste sal vanjaar verlore gaan by Medupi wanneer verskeie projekte ten einde loop.

Die gesamentlike projekspan het begin om die werkmag van 17.000 te verminder na 800 wanneer die aanleg voltooi is.

Eskom en sy hoofkontrakteurs het vaardigheidsopleiding beskikbaar gestel aan werkers om vir die grootskaalse werkloosheid wat gaan volg te probeer vergoed.

Paaie is met brandende bande en klippe versper.

Busse wat werkers vervoer na die kragstasie, word verhoed om te ry.

Die betogers is glo ontstoke omdat plaaslike werkers geteiken word.

Polisie skiet glo nog twee oproermakers in Limpopo

Die polisie in Limpopo sê hulle het geen ander keuse gehad nie as om hulself te verdedig teen die oproerige inwoners in Rhelela buite Tzaneen.

Hangwani Mulaudzi , polisiewoordvoerder, het het gereageer op die dood van twee lede van die gemeenskap wat omgekom het na skote buite ‘n satellietpolisiestasie in die gebied Dinsdagnag weerklink het.

Woedende inwoners is sedert Vrydag verlede week in oproer ná die noodlottige skietery van ‘n 15-jarige seun en die moord van ‘n 20-jarige vrou.

Hulle het ‘n satellietpolisiekantoor aangeval en beamptes met klippe gegooi. Die aanval het gevolg nadat woedende inwoners deur ‘n provinsiale leier van die Ekonomiese Vryheidsvegters toegespreek is.

Skote is afgevuur wat gelei het tot twee sterftes. Die skare is verwilder nadat die polisie versterkings ingeroep het.

Agt mense is dood in botsings tussen oproermakers en die polisie in die afgelope twee weke.

Sedert Vrydag is vier mense reeds in Rhelela dood

Oproer tussen Randfontein en Krugersdorp belemmer verkeer

Betogers het paaie in Roodepoort in Gauteng met klippe en brandende voorwerpe versper en verkeer tussen Randfontein en Krugersdorp word negatief geraak.

Motoriste wat die pad tussen Randfontein en Krugersdorp gebruik, is aangeraai om alternatiewe roetes te oorweeg weens oproer in die gebied.

Voorvalle waar betogers verbygaande motors met klippe bestook het, is aangemeld, volgens Wayne Minnaar, woordvoerder van die Johannesburgse metropolisie.

Die Johannesburgse Metroplisie het motoriste aangeraai om alternatiewe roetes via Albertina Sisulu-, Impala- en Ontdekkersweg te gebruik.

Volgens berigte is die oproermakers by die saamvloei van Main Reef-, Randfontein-, Miles Stoker- en Cemeteryweg saamgetrek.

Minnaar sê die oproerigheid het net ná 05:00 begin en polisiebeamptes is op die toneel.

In Alexandra, Johannesburg, betoog inwoners teen uitsetting.

Llt.kol Katlego Mogale, polisiewoordvoerder, sê plakkers wat ‘n pakhuis beset het kennisgewing ontvang dat hulle uitgesit gaan word.

Hulle het glo vroeg vanoggend motorbande aan die brand gesteek naby ‘n kliniek in Wynbergweg. Die SAPD monitor die situasie.

Wateropstand by Brits eis vierde slagoffer

‘n Vierde persoon is op Mothulung naby Brits in Noordwes dood nadat die polisie op oproeriges losgebrand het.

Die 36-jarige Enock Seimela het Sondagnag aan sy wonde beswyk.

Die polisie en oproermakers het verlede week gebots nadat inwoners die strate ingevaar het oor ‘n watertekort.

Die inwoners het betoog omdat hulle steeds nie lopende water het nie.

Seimela was vir ‘n week lank in die waakeenheid van die George Mukhari hospitaal in Garankuwa.

Hy en ‘n student is verlede week tydens die betogings in Mothutlung beseer. Nog twee ander is dood tydens die oproer.

Die drie slagoffers is die naweek begrawe.

Derde dood in Brits-oproer

Die polisie sê ‘n derde persoon is by Mothutlung, naby Brits tydens die oproer dood nadat hy uit ‘n polisie-Nyala gespring het.

Twee oproermakers is vroeër doodgeskiet deur die polisie nadat inwoners die strate ingevaar het oor ‘n tekort aan water.

Die aangehoudene het glo uitgespring om uit aanhouding te ontsnap. Vroeër is berig dat nog twee mense beseer is tydens die opstand en in die hospitaal behandel word.

Die onafhanklike polisie-ondersoekdirektoraat (Opod) ondersoek al drie sterftes.

Die vakbond Numsa het die voorval veroordeel waar die polisie na bewering op lede van die Mothutlung gemeenskap naby Brits in Noordwes geskiet het.

Die minister van waterwese, Edna Molewa, het Dinsdag gesê die gebrek aan water kon doelbewus geskep gewees het.

Tegnici wat gemoeid is met die onderhoud aan die waterpompe het egter aan Praag gesê dat die munisipaliteit nie voorsorg tref om behoorlike instandhouding te doen nie.

‘n Woordvoerder van Numsa, Castro Ngobese sê hulle doen ‘n beroep op die minister van Polisie, Nathi Mthethwa en die nasionale polisiekommissaris,

Veertien mense wat tydens die oproer in hegtenis geneem is, is intussen met ‘n waarskuwing vrygelaat.

Die Noordwes-polisie het gesê die 14 is aangekla van die oortreding van die Nasionale Padverkeerswet.

Hulle het vlugtig in die landdroshof op Brits verskyn. Die saak is tot aanstaande maand uitgestel.

Bekkersdal, Malamulele in oproer oor munisipaliteite

Die polisie is ontbied na Bekkersdal in Westonaria aan die wesrand van Gauteng, waar inwoners beplan om vandag weer te betoog.

Hulle wil hê dat hulle plaaslike munisipaliteit ontbind word, en sê hulle gaan aanhou betoog totdat dit gebeur. ‘n Woordvoerder van die betogers, Thabang Wesi sê busse gaan die betogers uit Bekkersdal na die Westonaria plaaslike munisipaliteit vervoer.

Hulle beplan om sakeondernemings en skole in die gebied tot ‘n stilstand te dwing.

‘n Munisipale woordvoerder, Kgabane Madiehe sê die munisipaliteit sal nie ontbind word nie. Hy het sy teleurstelling uitgespreek oor die vandalisme wat tot dusver gedoen is.

Hy sê ook die betogers het tot dusver nie werklik hul samewerking gegee om die munisipaliteit toe te laat om die uitdagings rakende hul eise te bespreek nie.

Agt mense is in hegtenis geneem in verband met Maandag se gewelddadige betogings by Malamulele in Limpopo.

Die verdagtes het na bewering die polisie met klippe bestook, en winkels wat aan buitelanders behoort, geplunder en gevandaliseer.

Hulle sal vandag aangekla word van openbare geweld wanneer hulle in die hof verskyn. Die betogers wil nie meer deel van die Thulamela-munisipaliteit wees nie.

Die premier van Limpopo, Stan Mathabatha sê intussen dat die mense van Malamulele ‘n sterk saak het om die versoek vir hulle eie munisipaliteit te regverdig.

Dit volg na ‘n vergadering gister tussen die Munisipale Afbakeningsraad, die premier en die Malamulele munisipale taakspan.

Anders as wat vroeër berig is, is geen besluit tydens die vergadering geneem nie. Betogende inwoners het sake ondernemings en skole in Malamulele tot ‘n stilstand gebring. – RSG

Kya Sands kalm na oproer

Die Kya Sands-lokasie in die noorde van Johannesburg is kalm nadat inwoners in die gebied Woensdag oproerig geraak het.

“Dit is vanoggend kalm, maar beamptes monitor die gebied,” het hoofsupt. Wayne Minnaar, woordvoerder van die Johannesburgse metropolisie, gesê.

Inwoners het Woensdag die Malibongwe-rylaan naby Cosmo City met klippe en brandende voorwerpe versper.

Die pad is weer oopgestel vir verkeer, het Minnaar gesê.

Kapt. Lydia Mtila-Dikolomela, polisiewoordvoerder, het gesê die inwoners het betoog oor behuising nadat twee mense Sondag in ‘n brand gesterf het. Altesaam 50 plakkershutte is in die brand verwoes. – Sapa

Hof beslis dat Moebarak vrygelaat word

’n Hof in Egipte het beslis dat oudpres. Hosni Moebarak vrygelaat moet word, het ’n beampte gesê.

Dit is nie bekend of die aanklaers teen die beslissing gaan appelleer nie.

Die uitspraak kom na die verhoor waarin Moebarak tereggestaan het op aanklagte dat hy geskenke van ’n staatsbeheerde koerant aanvaar het.

Die 85-jarige Moebarak is sedert April 2011 in aanhouding.

Moebarak word ook saam met Habib Adly, sy voormalige minister van binnelandse sake, en ses polisiebevelvoerders verhoor op aanklagte wat verband hou met hul administrasie voor die opstand teen sy bewind en die die moorde op betogers. Dié verhoor is tot 25 Augustus uitgestel.

Egipte loop steeds onder hewige geweld deur.

Hernieude oproerigheid het teen die oudpresident se opvolger, Mohamed Morsi, uitgebreek.

Minstens 750 mense is verlede week oor ’n tydperk van vier dae dood. – AP

Polisie waarsku dat Soweto-onluste motoriste bedreig

Betogers in die suide van Johannesburg, is steeds besig om amok te saai en verbygaande motoriste op die N12 onder klippe te steek.

Motoriste is gevra om paaie in Protea-Suid in Soweto te vermy waar ontevrede plakkers hul protesoptrede van die afgelope paar dae oor dienslewering voortsit.

Die verkeer word herlei nadat inwoners deurpaaie met brandende bande en klippe versper het.

Ten minste 23 mense is vroeër in hegtenis geneem vir die afgelope paar dae se onrus toe Chris Hani-weg, die N12 aansluiting en nog paaie in die omgewing versper is.

‘n Woordvoerder vir die Johannesburgse Metropolisie, Wayne Minnaar het bevestig dat inwoners voertuie in die gebied met klippe bestook. Hy het gevra dat motoriste alternatiewe roetes gebruik.

‘Geweld in Fochville bedreig die demokrasie’: ANC-LUR

Polisie-Casspirs staan gereed op Fochville

Faith Mazibuko, die LUR vir gemeenskapsveiligheid, kom in Fochville aan. Sy is later onder die klippe gesteek.

Die geweld wat met diensleweringsbetogings gepaardgaan in Kokosi, die lokasie van Fochville, bedreig die demokrasie. Só het die LUR vir menslike nedersettings in Gauteng, Ntombi Mekgwe, gister verklaar.

“Geweld op hierdie stadium van ons demokrasie kan slegs die winste van ons demokrasie omkeer,” het sy in ‘n mediavrystelling gesê.

“Die eindresultaat van dié ongewenste en verkeerde optrede is dat, nadat eiendom en infrastruktuur verwoes is, ons mense slegter daaraan toe is, en nie andersom nie.”

Ten minste 45 mense is vandeesweek in verband met openbare geweld in die gebied in hegtenis geneem.

Volgens Mekgwe bestaan daar “opportunistiese elemente”, sowel polities as misdadig, wat die probleme van die Kokosi-gemeenskap uitbuit.

‘n Aantal vergaderings is reeds met inwoners gehou om die ontwikkeling van die buurt te bespreek en dienste is reeds op grond in uitbreiding ses aangebring, waar huise gebou sou word.

Mekgwe het gesê dat dit na vore gekom het dat die grond onwettig aan die munisipaliteit verkoop is.

“Hierdie ontstellende feit, asook die hofsaak wat daaruit voortspruit, het die program opgeskort.”

Sy het ‘n beroep op inwoners gedoen om geduldig te wees en die plaaslike en provinsiale regerings tyd te gee om die grond terug te kry.

Mekgwe beweer dat betogers klippe na die LUR vir gemeenskapsveiligheid, Faith Mazibuko, gegooi het.

Vroeër het luitenantkolonel Katlego Mogale gesê dat 45 mense Maandag en Dinsdag weens openbare geweldpleging gearresteer is.

Inwoners het paaie met klippe en brandende buitebande versper.

“‘n Spaza-winkel, ‘n drankwinkel en ‘n huis, wat vermoedelik aan ‘n raadslid behoort, is aan die brand gesteek,” het sy gesê.

Dinsdag sou die burgemeester van Mazibuko- en Merafong-munisipaliteit, Maphefo Mogale sud eLetsie, die inwoners ontmoet om hul kwellinge te bespreek, maar die vergadering moes ontbind toe betogings uitgebreek het.

Diegene wat in hegtenis geneem is, sal vandag in die Carletonville-landdroshof verskyn. – Sapa

Stakende werkers is Sasolburg se nagmerrie

“Die stert is besig om die hond te swaai, alhoewel die hond reeds dood is,” sê die Vryheidsfront Plus se raadslid in die plaaslike munisipaliteit, Theo du Toit.

Dit is bekend dat die werknemers van Metsimaholo-munisipaliteit herhaaldelik gestaak het en die dorpe verwoes deur geboue te beskadig en brand te stig. Die betalingskantoor in Sasolburg is in so ‘n brand verwoes. Die omvang van die skade aan munisipale bates beloop tans meer as R3 miljoen. Die bedrag sluit nie die bedrag in van nie-invordering van skulde tydens die staking nie.

Tydens ‘n spesiale raadsvergadering wat belê was vir Vrydag 19 Julie 2013 het die Speaker ‘n 27-blad regsdokumente uitgedeel vir bespreking. In die staande reëls en orders vir plaaslike regering is dit duidelik dat dokumente minstens 48 uur voor die aanvang van ‘n vergadering beskikbaar moet wees, wat reeds te min is om weldeurdagte besluite te neem.

Na drie koukus-sessies tydens die vergadering en baie verduidelikings van verskillende individue van die regerende party het dit duidelik geword dat die ANC-geleide munisipale bestuur ‘n ooreenkoms met die stakers en SAMWU (Suid-Afrikaanse Munisipale Werkers Unie) aangegaan het om teen Dinsdag, 23 Julie 2013, hulle salarisse te betaal vir die tydperk wat hulle gestaak het. Al die regsdokumente wat verskaf is, het dit duidelik gemaak dat dit teen die bepalings van die wet sou wees om die stakers te betaal. Indien die uitstaande gelde as gevolg van die staking aan die stakers betaal word, sal dit vrugtelose en verkwiste uitgawes wees.

Die Speaker het na ‘n koukus gesê dat die stadsraad oor die aangeleentheid moet stem.

Du Toit het na ‘n bepaalde koukus tydens sy spreekbeurt dit duidelik gemaak dat elke werknemer van Metsimaholo-munisipaliteit ‘n dienskontrak onderteken het wat “Geen werk – Geen betaling” uitspel. Verder het hy gesê dit is duidelik vanuit die gesprekke dat die ANC ‘n ooreenkoms met die werkers het om hulle te betaal voor Dinsdag 23 Julie 2013. Aanbevelings van die munisipale bestuurder is deur die Sweep van die ANC verander om voorsiening te maak vir oortydbetaling, verlof en dies meer. Du Toit het dit duidelik aan die Speaker gemaak dat hy homself nie met die besluite van die dag, wat teen die wet is, kan vereenselwig nie en uit die vergadering gestap. Die Speaker het Du Toit beveel om te sit, maar hy het hom geïgnoreer en uitgestap. Du Toit sê daar is geen manier hoe hy dit kan regverdig dat stakers, wat geen respek vir ander se eiendom het, vergoed word wanneer hulle onwettig staak nie. Hy sê ook voorts dat die ANC nou byna twee dekades aan bewind is en dat die agteruitgang van dorpe en die land skokkend is.

UJ-kampus met waterkanonne begaanbaar gemaak

Betogende studente van die universiteit van Johannesburg wat die kampus ongbegaanbaar wou maak, is Woensdag en Donderdagoggend deur die polisie met waterkanonne uitmekaar gejaag.

Studente wat aan die studente-organisasie Sasco behoort, eis dat tersiëre onderrig gratis moet wees.

SA Students Congress (Sasco) het Woensdag gesê hulle sal nege kampusse ontoeganklik maak vir lesings Donderdag.

Benewens die Buntingstraatkampusingang van UJ wat deur klippe en gebrande voorwerpe afgesper is, is geen ander ontwrigtings by die nege instellings gerapporteer nie.

Die registrateur van UJ, Professor Marie Muller sê akademiese en ande studente-aktiwiteite sal voortgaan soos gewoonlik.

Studenteleier Mhlobo Hoyi sê die studente eis nie aleen gratis onderwys nie, maar ook hulp vir studente wat hulle eerste jaar gedruip het.

Hy sê dit is nie studente se skuld nie omdat die onderwysstelsel hulle gefaal het.

Sasco se president Mbulelo Mandlana het die berigte van “ongeoorloofde polisiegeweld” veroordeel en gesê alle optogte het vreedsaam verloop.

‘Blankes ondermyn munisipaliteite’

Die minister van samewerkende regering en tradisionele sake, Sicelo Shiceka, het gister gesê dat blanke belastingbetalersunies die vermoëns van munisipaliteite om dienste te lewer, ondermyn.

In ‘n klaarblyklike verwysing na mnr. Jaap Kelder se Nasionale Belastingbetalersunie, het Shiceka aan die media in Kaapstad gesê dat blanke belastingbetalers hul gelde vir munisipale dienste in private trustrekenings inbetaal.

“Ons het ontdek dat 280 belastinbetalersverenigings in Suid-Afrika, wat ongelukkig almal wit is, ‘n parallelle regering geskep het,” het hy gesê.

Hulle neem die geld en pleks van vir dienste aan munisipaliteite te betaal, plaas hulle dit in ‘n trustrekening. Dit ondermyn die vermoë van munisipaliteite om dienste te lewer.”

Schiceka het gesê die regering wil met almal in gesprek tree om munisipale probleme op te los.

“Almal moet daaraan deelneem. As u ongelukkig is oor slaggate, oor dienslewering, laat ons dit bespreek. Dit is waaroor munisipale herstel gaan. Dit moet deur al die mense nagestreef word.”

Schiceka het gesê daar is ontdek dat alle gewelddadige betogings, “sonder uitsondering”, geskied omdat mense “kwessies met munisipaliteite opneem sonder dat daar reaksie is”.

“Woede is besig om oor te kook. Wat ons doen, is om ‘n meganisme te ontwikkel wat al die kwessies met munisipaliteite gaan aanspreek.”

Hy het gesê dat ‘n plan oor hoe om gewelddadige betogings te beëindig vandag by ‘n vergadering met LUR’e en plaaslike regeringsleiers bekendgestel sal word.

Shiceka het die diensleweringsbetogings vergelyk met babas wat vir hul ouers huil.

“Ons het gevind dat dit is soos ‘n baie wat huil as hy sy ouer sien. Ons hanteer die kwessies noudat mense dit meer onder ons aandag bring.

“Teen 2014 sal ons graag ‘n situasie wil hê waar daar nie meer gewelddadige betogings in Suid-Afrika is nie, waar ons attent kan wees op mense se kwessies.

“Hulle hoef nie op straat te gaan om buitebande te brand nie, om eiendom af te brand vir hulle om na geluister te word nie.”

Shiceka het verwys na ‘n moontlike vergadering met belastingbetalersunies in April. Volgens die dagblad Beeld, het mnr. Jaap Kelder van die NBU hom soos volg hieroor uitgelaat: ““Uiteraard sal ons met die minister vergader, maar hy moet sy munisipale bestuurders saambring. Een ding moet hy wéét: Dit gaan nie net by praat ophou nie, ons wil aksie sien.”

Munisipale bestuur in Suid-Afrika het onder swart beheer grootliks in duie gestort, veral in plattelandse gebiede. Terwyl burgemeesters, raadslede en munisipale amptenare groot bedrae op groot salarisse, luuksevoertuie, oorsese reise en konferensies in hotelle uitmors, word basiese dienste soos instandhouding, vullisverwydering en watersuiwering nie verskaf nie.

лобановский харьков

12 vas na oproer

Twaalf mense is in hegtenis geneem tydens geweldadige betogings in Riverlea, het polisie Donderdag gesê.

Insp. Gordon Billing sê die betogers het teen 04:00 begin betoog en polisie moes rubberkoeëls gebruik om die skare uitmekaar te jaag.

“Dit was onverwags, ons was nie bewus van enige betogings nie,” het Billing gesê.

Dié betogings het glo oor swak dienslewering asook behuising gegaan en een inwoner is ook daartydens beseer.

“Ons moes rubberkoeëls gebruik toe die betogers motors met klippe begin gooi het en die optog geweldadig geraak het,” het hy gesê.

Billing kon nie bevestig presies hoeveel mense betoog het nie.

Die skare het in Nasrecstraat betoog en die pad is met brandende motorbande afgesper. Dit is sedertdien weer heropen.

Volgens Billing is die situasie meer kalm maar word dit steeds gemonitor en sal polisie steeds oornag op hul hoede wees. Hy sê hy is nie seker of die betogings Vrydag voortgesit sal word nie.

стенд развал