polisie – Bladsy 3 – praag.co.za

Twee polisielede vas vir roof en ontvoering

Die geloofwaardigheid van die polisie het opnuut onder skoot gekom.

Dit volg na ‘n verslag van die navorsingsmaatskappy Futurefact waarin bevind is dat 76 persent van Suid-Afrikaners van mening is dat baie polisielede self misdadigers is.

Net meer as drieduisend mense het aan die meningspeiling deelgeneem.

Twee polisielede, onderskeidelik 35 en 44 jaar oud, is intussen op Pongola in die noorde van KwaZulu-Natal vasgetrek op aanklagte van roof en van ontvoering, het RSG berig.

Daar word beweer dat hulle onder ‘n groep mans was wat veiligheidswagte by ‘n winkel vasgebind, hulle in ‘n suikerrietland agtergelaat en toe die winkel gaan beroof het.

Die KwaZulu-Natalse LUR vir Gemeenskapsveiligheid en Skakeling, Willies Mchunu, het die polisie se betrokkenheid by misdadige bedrywighede skerp veroordeel.

Mchunu sè die meerderheid polisielede in die provinsie is nog steeds mense van integriteit wat baie hard werk en hy het die publiek gevra om saam met die lede te werk en diegene te ontbloot wat by misdadige bedrywighede betrokke is.

‘n Woordvoerder van sy Departement, Sipho Khumalo, sè die polisielede sal later vandeesmaand in die landdroshof op Pongola verskyn.

Verskeie polisiebeamptes van die Douglasdale polisiestasie in die noorde van Johannesburg is blykbaar gister ontwapen nadat hulle kollegas gedreig het.

Die polisielede is na bewering op ‘n sloerstaking omdat hulle ontevrede is oor beweerde rassisme by die stasie.

Die Gautengse polisiewoordvoerder, kolonel Noxolo Kweza, wou nie kommentaar lewer nie.

Polisie skiet op Diepslootgrondbesetters

Die Gautengse polisie moes ‘n tierend swart skare met rubberkoeëls verwilder nadat hulle probeer het om ‘n stuk grond tussen Pretoria en Johannesburg te beset.

A.o. Daniel Mavimbela, polisiewoordvoerder, het gesê ‘n groep van nagenoeg 100 mense het vroeër op ‘n oop stuk grond in die ooste van Diepsloot toegesak en onwettig beset.

Volgens Mavimbela het die skare toegang met brandende bande en ander voorwerpe versper en was die toestand Saterdag gespanne.

‘n Mag is in die gebied ontplooi nadat die polisie met klippe bestook is. Die skare is met rubberkoeëls verwilder.

‘n Vierjarige het ‘n besering aan sy bolyf opgedoen en is na ‘n hospitaal geneem vir behandeling en ‘n volwassene is vir openbare geweld in hegtenis geneem.

Boer vas omdat hy waarskuwingskoot skiet

‘n Boer van Ficksburg is deur 20 swaargewapende polisiebeamptes in hegtenis geneem omdat hy waarskuwingskoot geskiet het toe twee swartes na bewering sy huis aangeval en gedreig het om sy gesin dood te maak, het Beeld berig.

Die mans het glo ook sy 18-jarige verstandelik gestremde dogter rondgeruk en op die grond neergegooi.

Prieur du Plessis (46), ‘n pa van twee verstandelik gestremde kinders, het Maandagmiddag ‘n waarskuwingskoot geskiet toe twee swartes, gewapen met ‘n knopkierie en kapmes, op hom afgestorm het.

Hy is later die dag in hegtenis geneem toe die swartes ‘n klag van poging tot moord teen hom ingedien het.

Du Plessis se prokureur, Jonker Botha, het reeds Dinsdagaand borgtog by die Ficksburg-polisiekantoor gereël, maar die polisie wou hom nie laat gaan nie.

Hy is eers die volgende dag op borgtog van R500 vrygelaat nadat hy op mindere aanklagte van die nalatige en roekelose gedrag verskyn het.

Botha het Woensdag gesê sy kliënt sal ‘n siviele eis teen die polisie in te stel weens onregmatige aanhouding.

Die twee swartes het Maandag sy huis se vensters stukkend geslaan en aanhoudend gedreig dat hulle sy kinders en familie gaan doodmaak omdat hy hulle glo geld skuld.

Die waarskuwingskoot wat die boer afgevuur het, het die agterruit van die swartes se motor getref. Sowat 20 polisielede het hom ‘n uur later in die dorp in hegtenis geneem.

Kapt. Phumelelo Dhlamini, polisiewoordvoerder, sê Du Plessis kon nie Dinsdag op borgtog vrygelaat word nie, omdat die ondersoekbeampte steeds besig was met die ondersoek.

Hy het bevestig dat Du Plessis klagte van intimidasie, aanranding en opsetlike saakbeskadiging teen die twee mans ingedien het en sê hulle is Woensdag in hegtenis geneem. Die mans, onderskeidelik 50 en 30 jaar oud, is dieselfde dag op waarskuwing vrygelaat en moet weer Donderdag in die hof verskyn.

Phaladi Shuping, woordvoerder van die NVG in die Vrystaat, sê die klag van poging tot moord teen Du Plessis is verander nadat die aanklaer die dossier gelees en besluit het “dit sou moeilik wees om te bewys”.

Twee van polisie vas vir gewapende roof

Twee polisiebeamptes, wat Woensdag in hegtenis geneem is vir gewapende roof sal na verwagting binnekort in die Sasolburgse landroshof verskyn.

Polisiewoordvoerder, Sellwane Mapamela, sê in ‘n verklaring die 30-jarige en 38-jarige verdagtes word daarvan beskuldig dat hulle deel was van ‘n gewapende roof by Zamdela op 18 Desember verlede jaar.

Volgens die 25-jarige klaer was sy, haar man en ‘n vriendin, van Johannesburg na Heilbron op pad toe hulle by ‘n kruising in Zamdela deur ‘n gemerkte polisie voertuig afgetrek is.

Hulle is deursoek en toe vertel dat hulle onder arres is. Op pad na die polisiestasie het die polisievoertuig onder ‘n brug gestop waar nog twee mans opgedaag het en geld vir hulle vrylating geëis het.

Almal is saam na ‘n winkelsentrum in Gauteng waar die vrou kontant uit haar bankrekening onttrek het.

Die verdagtes het die klaer en haar man by die winkelsentrum gelos nadat hulle die geld gekry het.

Volgens Mapamela is een van die mans ‘n sersant by die Vaal Rand honde-eenheid en die ander ‘n konstabel in die blitspatrollie.

SAIR: Polisie is ‘n staatsondersteunde ‘misdaadbende’

‘n Verslag wat Woensdag deur die Suid-Afrikaanse Instituut vir Rasseverhoudinge (SAIRV) vrygestel sal word, beskryf die Suid-Afrikaanse polisie as ‘n staatsondersteunde misdaadbende.

Getiteld “Broken Blue Line 2”, dui die verslag daarop dat oortredings nie meer net “geïsoleerde voorvalle” is nie, maar ‘n “patroon van misdadige gedrag” volg.

“Van die polisie word verwag om misdaadbendes te infiltreer. In Suid-Afrika het misdaadbendes die polisie geïnfiltreer. Dit is miskien die vreesaanjaendste en belangrikste bevinding,” lui die verslag.

Die SAIRV se inligting is gegrond op 100 gevalle tussen April 2011 en Januarie 2015 van ernstige misdade wat wissel van moord en verkragting tot roof, waarby polisielede betrek word. Dit studie sluit nie eens gevalle van korrupsie en omkopery in nie.

Die korrupte en veroordeelde Jackie Selebi, die eerste swart polisiehoof, het die mag van 100 000 tot 155 000 laat aangroei met swart aanstellings.

Selebi het dadelik ook gesorg dat hy die gespesialiseerde narkotikaburo ontbind as guns aan sy vriend die dwelmbaas Glenn Agliotti en daarmee toegesien dat die polisie die dwelmverspreider van voorkeur word.

‘n Kultuur van nepotisme, transformasie, rassebeheptheid, onbevoegdheid en wanbestuur heers glo binne die SAPD, het oud-polisielede gesê. Wit lede met ervaring het byna geen kans op bevordering nie.

Nie een van die bepalings in 2012 se Nasionale Ontwikkelingsplan (NOP) dat offisiere van die polisie geoudit moet word om te sien of hul vaardighede en kwalifikasies op peil is, is intussen nagekom nie.

Die verslag sal Vrydag aan genl. Riah Phiyega, die nasionale polisiehoof, oorhandig word.

Duisende diensvuurwapens wat jaarliks “wegraak” word deur polisielede aan misdaadsindikate verkoop.

Net verlede week het ‘n polisie-kolonel in die hof in Vereeniging verskyn nadat sy betrokkenheid by die beweerde verskaffing van wapens aan bendes op die Kaapse Vlakte aan die lig gekom het.

‘n Egpaar is ook in dieselfde week in die ooste van Pretoria gekaap deur lede in polisie-uniforms met polisietoerusting. Die SAPD het erken polisielede moontlik by die roofbende betrokke is.

Plaasmoorde neem krisisafmetings aan maar ANC swyg

Sedert 1 Januarie 1990 was daar meer as 1 700 plaasmoorde in Suid-Afrika volgens die landbou-unie TLU SA.

In 2007 was daar ’n styging van ongeveer 25% in plaasaanvalle, maar in dieselfde jaar het die departement van polisie besluit dat geen verdere statistieke daaroor vrygestel mag word nie, het TLU gesê.

Intussen het die ANC hulself met doelbewuste negatiewe klimaatskepping besig gehou ipv doelgerigte probleemoplossing.

Volgens die organisasie was daar ŉ totaal van 277 bevestigde plaasaanvalle en 67 bevestigde plaasmoorde in 2014. “Dit wil egter voorkom of die statistieke ten opsigte van 2015 tot op hede selfs donkerder as 2014 se syfers is.”

Gedurende die oggend van 12 Januarie 2015 het twee plaasaanvalle plaasgevind, waartydens drie moorde gepleeg is. Sedert 1 Januarie is daar al nege plaasmoorde in totaal gepleeg. Dit is meer as een plaasmoord elke twee dae. “As hierdie tendens ’n aanduiding vir die tempo van plaasmoorde in 2015 gaan wees, beteken dit dat daar in hierdie jaar meer as 200 plaasmoorde sal wees,” het die organisasie gesê.

“Ons ervaring is dat Suid-Afrika se voedselproduseerders as politieke slaansakke gebruik word en deur politici as sondebokke vir Suid-Afrika se krisisse voorgehou word. Die feit dat die regerende party nie hulle weg oop sien om uit eie oorweging in die openbaar standpunt in te neem vir die beskerming van boere se regte nie, word as bevestiging hiervan beskou.”

Die golf van plaasmoorde wat die land teister, is ‘n aanduiding dat die polisie se landelike veiligheidsplan ook nie doeltreffend is nie.

Zille verdedig geheime SAID-eenheid

Die Presidensie het ten sterkste beswaar gemaak teen bewerings van die DA-leier, Helen Zille oor die president se verbintenis met die inkomstediens.

Zille het president Jacob Zuma verbind met die skorsings van amptenare van die Suid-Afrikaanse Inkomstediens.

Volgens die Presidensie is haar pogings om die president daarmee te verbind, moedswillig. Klaarblyklik wil sommige koerante Zuma ook by die saak insleep.

Die Presidensie sê die president is nie gemoeid met enige van die bewerings wat teen die geskorste lede gemaak word nie.

Zille het in haar jongste nuusbrief gesê Zuma is “dalk” besig om die SAID oor te neem om homself en die ANC teen die betaling van belasting te beskerm.

Sy sê die huidige konflik in die diens het ontstaan nadat Zuma Tom Moyane in September as die nuwe kommissaris aangestel het.

Moyane het vroeër vandeesmaand die adjunk-kommissaris Ivan Pillay en die hoof van strategie, Peter Richer afgedank.

Onder die leiding van dié twee figure, het hulle glo toegelaat dat SAID afgepers word om R3 miljoen te betaal om stil te bly oor die geheime intelligensie-eenheid wat Zuma se private huis in Forest Town, Johannesburg dopgehou het en meeluistertoestelle geplant het.

Sulke optrede is onwettig want dit oortree die Nasionale Strategiese Intelligensie Wet wat bepaal dat alleen Suid-Afrika se weermag, polisie en intelligensie-strukture geheime intelligensie mag insamel.

Die spioen, bekend as “Skollie”, wie se regte naam aan die Sunday Times bekend is, was die hoof van SAID se koverte Spesiale Projekte Eenheid, later hernoem na die National Research Group.

Zille het die bestaan van die geheime eenheid in die Inkomstediens verdedig en gesê dit het duidelik geword dat Zuma nie wil hê die diens moet ondersoek instel na sy belastingsake nie.

Swart polisie op Lichtenburg pluk wit oudburgemeester rond

‘n Gevaarlike voorval het op Lichtenburg ontstaan toe ‘n blanke oudburgemeester die swart polisie versoek het om ‘n dronk bestuurder in hegtenis te neem wat reeds teen voertuie in ‘n parkeerruimte gebots het. Vir sy weldaad is hy sélf deur die polisie rondgepluk en in hegtenis geneem weens “dwarsboming van die gereg”.

Hier is ‘n video wat deur ‘n omstander geneem is en tans op die internet versprei word.

De Kock weer hof toe oor parool

Eugene de Kock sal ‘n aansoek by die hooggeregshof in Pretoria indien nadat die minister van justisie en korrektiewe dienste geweier het om aan hom parool toe te staan.

Michael Masutha het in Julie De Kock se paroolaansoek afgekeur omdat die families van sy slagoffers nie daaroor geraadpleeg is nie.

De Kock (65) het reeds 18 jaar tronkstraf uitgedien.

Masutha het gesê daar moet in die volgende 12 maande ‘n nuwe paroolverslag en profiel oor De Kock opgestel word.

De Kock, die voormalige Vlakplaas-polisiebevelvoerder, het hom in Mei tot die hooggeregshof in Pretoria gewend om Masutha te dwing om ‘n besluit oor sy parool te neem.

Regter Thokozile Masipa het op 28 Mei beveel dat die minister 30 dae het – vakansiedae of naweke uitgesluit – om te besluit of De Kock op parool vrygelaat moet word.

Die nasionale raad vir korrektiewe dienste het glo in November verlede jaar al ‘n besluit geneem oor De Kock se parool. Die aanbeveling is aan Sbu Ndebele, die vorige minister van korrektiewe dienste, gestuur vir oorweging.

Hy het egter nooit ‘n besluit geneem nie en De Kock moes gevolglik vroeër vanjaar die hof nader om hom te dwing om dit te doen.

Die saak is as afgehandel beskou nadat Ndebele se regsverteenwoordigers aangedui het dat hy teen 12 Mei ‘n besluit sou neem. Weer is geen besluit geneem nie en nadat Ndebele sy pos ná die verkiesing verloor het, het De Kock weer die hof genader.

Adjunkminister sê polisie in parlement wettig

Die adjunkminister van Justisie, John Jeffrey, het klagtes uit die opposisiegeledere oor die polisie se betreding van die parlement van die hand gewys.

Die Speaker het die polisie vroeër versoek om parlementslede van die EFF uit die Nasionale Vergadering te verwyder, nadat hulle die vergadering probeer ontwrig het.

Lede van die EFF sowel as die DA het daarna handgemeen geraak met die polisie.

Jeffrey sê die wet maak daarvoor voorsiening daarvoor dat voorsittende beamptes lede in sekere gevalle uit die Raadsaal mag verwyder.

Die meeste lede van die uitvoerende gesag het gesê hulle gaan uit respek vir die vredes-ooreenkoms tussen adjunkpresident Cyril Ramaphosa, en politieke partye oor die gedrag in die Raad, nie reageer nie.

Jeffrey sê klagtes oor die polisie se teenwoordigheid is onnodig.

Hy het gesê wetgewing bepaal dat die voorsittende beamptes geregsdienaars mag ontbied indien nodig.

Polisie in hul eie vangwa toegesluit deur rowers

Drie verdagtes is Dinsdag in hegtenis geneem nadat twee polisiebeamptes in Rabierif in Midrand, Gauteng van hul vuurwapens beroof is en agter in hul eie vangwa opgeland het.

“Die drie verdagtes, tussen 25 en 30 jaar oud, sal binnekort in die Tembisa landdroshof verskyn,” het brig. Neville Malila, woordvoerder van die polisie, in ŉ verklaring gesê.

Hulle sal teregstaan op aanklagte van gewapende roof, kaping, poging tot moord en die onwettige besit van vuurwapens en ammunisie.

“Die verdagtes het twee polisiebeamptes oor middagete genader terwyl hulle by ŉ kosstalletjie gesit het,” het Malila verduidelik. “Die verdagtes het ŉ vuurwapen op die beamptes gerig en hulle wapens afgeneem. Hulle het die beamptes daarna in hul patrollievoertuig toegesluit en met die vuurwapens gevlug.”

Malila sê nog drie verdagtes het opgedaag en hulle het ŉ voertuig gekaap en daarmee gevlug.

“Lede van die gemeenskap het die vangwa oopgemaak en die polisiebeamptes bevry,” het hy gesê. “Die lede het bystand ontbied en die verdagtes is agternagesit.” Die verdagtes het verskeie skote op die polisiebeamptes gevuur voordat hulle beheer verloor het oor hul voertuig. Geen beserings is aangemeld nie.

“Die polisie het drie verdagtes in hegtenis geneem en drie vuurwapens gekonfiskeer,” het Malila bygevoeg. “ŉ Derde vuurwapen word verbind aan ŉ voorval in September 2014 waar daar op Johannesburgse metropolisiebeamptes geskiet is voordat hulle van hul wapens ontneem is.”

Nog verdagtes is op vrye voet.

Dosyn swart verdagtes soek na vangwa oorval word

Inligting oor 12 swart verdagtes wat ontsnap het kan aan die naaste polisiekantoor of Crime Line SMS by 32211.12 gekommunikeer word, vra die polisie.

Die 12 verdagtes het Vrydag noord van Pretoria uit aanhouding ontsnap, kort nadat van hulle in die hof in Ga-Rankuwa op aanklag van huisroof verskyn het.

As deel van die ondersoek na die voorval en soektog na die mans, het die polisie die publiek gevra om te help met enige inligting wat sal lei tot die arrestasie van die ontsnaptes en die mense wat hulle gehelp het.

Kapt. Doniah Mothutsane van die Gauteng-polisie het vroeër gesê die polisievoertuig was met 28 verdagtes op pad terug van die hof na die New Lock-gevangenis in Pretoria.

Die vangwa is op pad voorgelê en in ‘n lokval gelei in Lucas Mangopeweg naby Medunsa en die verdagtes is ontset.

Swart regter bevind teen blanke wat 2 polisiemanne glo ‘kaffers’ noem

Regter Winston Msimeki het William Fred Kidson se eis om skadevergoeding in die Pretoriase Hooggeregshof van die hand gewys. Kidson is vroeër deur die polisie in hegtenis geneem en in die polisiekantoor te Hercules oornag in die selle aangehou.

Volgens hom is hy onregmatig in hegtenis geneem en het hy gedink die twee swartes, wat in gewone klere was, is rowers vanaf ‘n nabygeleë plakkerskamp wat hulle as polisie voordoen. Regter Msimeki meen dié getuienis is egter nie “oortuigend” nie.

Kidson het die eis ingestel omdat hy as motorwerktuigkundige ‘n verlies aan inkomste gely het terwyl hy aangehou is.

Die swart regter het bevind dat Kidson se seun, Kevin, op die aand van 10 Maart ‘n Renault Clio in Booysens, Pretoria, roekeloos bestuur het. Kevin Kidson het ‘n man, Pieter Willem Grobler, amper by die kruising van Hjalmerstraat en Theo Slabbertlaan raakgery. Grobler moes inderhaas uit die pad “spring” om nie omgery te word nie.

Toe Kevin stilhou, het konstabels Selogo en Dikgoro in burgerdrag, maar in ‘n polisievangwa, agter sy motor stilgehou, volgens die regter se uitspraak.

Die twee swart konstabels het aan die jonger Kidson vertel dat hy weens dronkbestuur in hegtenis geneem gaan word. Kevin Kidson het egter sy pa se hulp ingeroep, waarna ‘n argument met die polisiemanne onstaan het. Hierna is pa en seun polisiekantoor toe geneem.

Regter Msimeki het in sy uitspraak verklaar dat Kidson nie die twee swart polisiekonstabels vir rowers kon aansien nie, aangesien hulle hul identiteit aan hom openbaar het. Ook moes sy seun hom vertel het wie sy motorsleutel afgeneem het.

In Kidson se getuienis het hy verklaar dat ‘n blonde vrou by die polisiekantoor aan hom gesê het dat “laer as slangk*k” is. Maar ‘n kaptein Margaret Uys het ontken dat sy so iets gesê het of dat sy ooit blond was.

Volgens Msimeki was die polisiediens se getuies meer konsekwent want hul weergawes van die gebeure het ooreengekom. Ook wou Kidson geen toegewings in sy getuienis maak nie, selfs waar sy weergawe deur ander getuienis weerspreek is.

Kidson was aggressief en het die polisiemanne met die vuis geslaan. In sy getuienis het Seloga beweer dat Kidson hulle “kafferrowers” genoem het. Tydens sy inhegtenisname het hy hom verset en hulle weereens “kaffers” genoem. “Kidson was vol bravade en is ‘n sterk man,” het Seloga aan die hof verklaar.

Dis nou volstoom vorentoe vir rassevoorkeure by SA Polisie, sê kommissaris

Die nasionale polisiekommissaris, Ria Phiyega, het haar vreugde uitgespreek oor die onlangse oorwinning in die hof oor die klaagster Renate Barnard en sê dat die hof die “noodsaak vir regstellende aksie” en rassevoorkeure bevestig het.

“Ons besef die belangrikheid van die Barnard-saak,” sê Phiyega. “Ons was die toetssaak om te veg vir die ruimte om met regstellende aksie in dié land voort te gaan. Dis ‘n baie veelseggende bevinding dat regstellende aksie wettig en nodig is.”

Die Grondwethof het bevind dat die polisie nie onbillik opgetree het deur Renate Barnard op grond van haar ras bevordering te weier nie.

Barnard voer reeds nege jaar lank ‘n hofstryd omdat sy twee keer vir promosie oorgesien is omdat sy blank is.

Volgens Phiyega het die Grondwethof nou regstellende aksie “in beton gegiet” sover dit die land se toekoms betref en gaan die polisie “volstoom vorentoe” om die diens demografies verteenwoordigend te maak met slegs ‘n klein persentasie blankes wat mag oorbly.

Verlede maand het Renate Barnard haar teleurstelling met die uitspraak uitgespreek. Sy het intussen ook uit die polisie bedank en sal voortaan in die privaat sektor werk.

Die Grondwethof het ‘n vroeëre uitspraak van die Appèlhof in Barnard se guns tersyde gestel.