Etiket: Nkandla

ANC hoop om Nkandla dood te praat

‘n Veelparty adhoc-komitee in die Parlement sal op die been gebring word om die minister van Polisie se verslag oor Nkandla te bestudeer.

‘n Reusebedrag van die belastingbetaler se geld is aan die privaatwoning van ‘n politieke ampsdraer bestee, maar Zuma word in die verslag kwytgesteld van enige finansiële aanspreeklikheid vir die opgraderings van 246 miljoen rand aan sy huis by Nkandla.

Die minister van Polisie, Nathi Nhleko het die verslag Donderdag bekendgemaak.

Die ANC se kantoor van die hoofsweep sê alle partye het die name van hulle verteenwoordigers op die komitee bekendgemaak.

Die ANC hoop die proses om onregmatige aanwending van staatsfondse dood te praat, sal ‘n uitkoms “bespoedig” volgens die hoofsweep.

Die minister het vroeër gesê die opgraderings wat ‘n swembad, beeskraal, hoenderhok, amfiteater en besoekersentrum insluit, is om “veiligheidsredes” gebou.

In die verslag oor veiligheidsopgraderings by president Jacob Zuma se privaatwoning Nkandla, word gepoog om die uitgawes te verbloem.

Skuld word gepak op swak skakeling met die projekbestuur en die integriteit en geloofwaardigheid van bouspesialiste word as verdag voorgehou.

Die Openbare Beskermer, Thuli Madonsela, het verlede jaar aanbeveel dat Zuma van die geld terugbetaal wat nie verband hou met veiligheidsopgraderings nie.

Opposisiepartye het intussen skerp gereageer op wat hy genoem het die verwerping van die Openbare Beskermer se bevindinge dat die President vir sommige van die opgraderings by sy privaatwoning moet betaal.

Volgens berekenings is Zuma verantwoordelik vir minstens 52 miljoen rand van die koste.

Draaipunt vir samewerking tussen DA, EFF

Die leier van die opposisie, Helen Zille, sal uittree as leier van die DA.

Zille het Sondag op ’n dringende vergadering van die party se federale raad aangekondig sy gaan haarself nie beskikbaar stel vir nog ’n termyn as partyleier tydens die party se nasionale konferensie later vandeesmaand in Port Elizabeth nie.

Sy sou die enigste kandidaat as na­sionale leier gewees het. Met dié aankondiging wil die DA ‘n nuwe leier se beeld betyds vir die volgende verkiesing begin afstof.

Mmusi Maimane is die gunsteling om by Zille oor te neem.

Sy samewerking met die EFF in Februarie, toe albei partye saam pres. Jacob Zuma tydens die debat oor die staatsrede aangeval het, was klaarblyklik die draaipunt vir die swart siening van hom as nie net ‘n blote wit werktuig nie.

Zille het in 2007 by Tony Leon as DA-leier ­oorgeneem en dien sedert 2009 as Wes-Kaapse premier.

Dit blyk Zille sal aanbly as premier van die Wes-Kaap.

Alhoewel Zille beweer dat sy nie weer betrokke sal raak by interne leierskapkwessies nie, is dit bekend dat sy Maimane steun as haar opvolger.

Zille sê ouderdom is nie ter sprake nie, maar slegs dat die nuwe leier geskik vir die pos en voortreflik moet wees.

Die leier van die DA in die Oos-Kaap, Athol Trollip en Zille het in die verlede koppe gestamp toe sy vir Lindiwe Mazibuko as parlementêre leier bó Trollip aangewys het.

Trollip het haar destyds daarvan beskuldig dat sy ingemeng het by die party se demokratiese proses deur ‘n swarte aan te wys.

Die DA sukkel om swart kiesers te oortuig dat hulle nie ‘n wit party is nie.

Zuma-familie ontken dat hulle in weermag-helikopters reis

Die presidensie het Sondag ontken dat pres. Jacob Zuma se familie van weermag-helikopters gebruik maak om tussen Durban en Nkandla in KwaZulu-Natal te reis.

“Die presidensie verwerp die bewerings wat vandag in die City Press gemaak is,” het Mac Maharaj, woordvoerder vir die presidensie, in ʼn verklaring gesê. “Die president se reisreëlings word deur die presidensie getref en dit word duidelik gestel dat die vliegtuig of helikopter bespreek word vir sy gebruik.”

Volgens hom het die Suid-Afrikaanse Lugmag ook die presidensie in kennis gestel dat geen so misbruik van die helikopters plaasgevind het nie.

“Die presidensie verwerp die ongegronde en kwaadwillige bewerings in City Press en die departement van verdediging het ons in kennis gestel dat daar geen waarheid in die gerug steek nie, maar die koerant het dit steeds gepubliseer,” het Maharaj gesê.

“Die presidensie is besorg oor die blatante verslaggewing van so onwaarheid, en die doel kan slegs wees om by te dra tot die stereotipering van die president en sy familie.”

Die City Press het Sondag berig dat die lugmag die bystandhelikopterdiens opgeskort het wat vir Zuma se familie en vriende tussen Durban en Nkandla gebruik is.

Die Oryx-helikopter van 15 Eskader, wat gewoonlik saam met Zuma se weermagondersteuning vlieg, is opgeskort weens ʼn gebrek aan fondse, volgens berigte.

Die koerant het berig dat bronne gesê het die spesialeondersoekeenheid het die beweerde misbruik begin ondersoek.

Volgens die berig is die bystand-Oryx, waarvoor die presidensie R63 000 per uur aan die weermag betaal in plaas van die gewone R70 000 kommersiële tarief, glo gebruik deur familie en vriende in plaas van veiligheidspersoneel.

Zuma se lyfwagte is glo ‘n “paar keer” gedwing om die reis van drie ure te onderneem.

Die presidensie het gister gesê Zuma se familie het nie alleen militêre helikopters gebruik om te reis tussen Durban en Nkandla nie.

‘n Eggenoot of kind mag saamvlieg indien die president self per helikopter reis, maar nie alleen nie.
 

Nkandla-verslag gereed

Die minister van Polisie, Nkosinathi Nhleko, het bevestig dat hy gereed is om sy verslag oor Nkandla aan die Parlement voor te lê.

Die Speaker van die Parlement, Baleka Mbete, moet binnekort ‘n datum aankondig, het RSG berig.

Die Minister is deur die President opdrag gegee om verskeie verslae oor oorbesteding by die President se privaatwoning te bestudeer en te besluit of hy ‘n gedeelte van die geld moet terugbetaal wat aan die veiligheidsgraderings bestee is.

President Jacob Zuma het ingestem om op 16 April vrae oor Nkandla in die Parlement te beantwoord.

Mosie van wantroue teen Zuma misluk

Alhoewel Mmusi Maimane, die DA se parlementêre leier, President Jacob Zuma ‘n dief genoem het, tydens die nasionale vergadering se debat oor ‘n mosie van wantroue in die president, was dit nie genoeg vir die mosie om te slaag nie.

Maimane het gesê Zuma het belastingbetalers se geld gesteel om Nkandla te bou.

Speaker Baleka Mbete het Maimane versoek om sy uitlatings terug te trek nadat Stone Sizani, die ANC se hoofsweep, kapsie gemaak het.

John Steenhuisen, die DA se hoofsweep, het op ‘n punt van orde gesê die parlement is ondergeskik aan die beslissings en bevindings van die Grondwethof. Mbete het egter gesê die parlement word deur sy eie reëls bedryf.

Na verskeie punte van orde het Maimane sy uitlating dat Zuma ‘n dief is teruggetrek en weer ‘n beroep op LP’s gedoen om hul gewete in gedagte te hou wanneer hulle stem.

Die mosie is later verwerp. ‘n Totaal van 221 LP’s het teen die mosie gestem, 113 LP’s was ten gunste daarvan terwyl agt LP’s buite stemming gebly het.

Die stemmery is vertraag nadat gevind is dat die elektroniese stemstelsel nie werk nie. Die minister van behuising, Lindiwe Sisule het in reaksie gesê sy is nie verras dat die mosie verslaan is nie.

Sisulu sê die ANC sal sorg dat die parlement nie in ‘n sirkus ontaard nie.

Zuma stoei weer met Nkandla-vrae

Emosies het Woensdag weer hoog geloop in die Nasionale Vergadering toe President Jacob Zuma mondelinge vrae beantwoord het.

Die kwessie oor geld wat aan sy privaatwoning op Nkandla bestee is, is geopper ondanks die feit dat dit nie op die Ordelys was nie.

Na langer as ‘n uur se gekibbel oor of Zuma bykomende vrae moet beantwoord, is ooreengekom dat die saak Donderdag bespreek sal word, wanneer datums vir dié sessies bepaal sal word.

Dit sluit vrae in oor Nkandla wat oorgestaan het weens vorige ontwrigting. Die EFF het tydens Zuma se mondelinge vraesessie daarop aangedring dat hy eers die uitstaande mondelinge vrae van verlede jaar moet beantwoord voordat hy nuwe vrae antwoord.

Dit was die eerste mondelinge vraesessie in die Nasionale Vergadering sedert die sitting op 21 Augustus verlede jaar, wat verdaag is nadat lede van die EFF die Vergadering in ‘n sirkus laat ontaard het.

Zuma het aantygings van die opposisie verwerp dat hy probeer het om vrae in die Parlement te systap.

Hy het gesê hy is bereid om rekenskap te gee oor die staatsgeld wat aan veiligheidsopgraderings aan Nkandla bestee is.

President Zuma het opnuut herhaal dat hy nie die geld sal terugbetaal wat bestee is aan nie-veiligheidsopgradering aan sy privaatwoning op Nkandla nie, totdat ‘n besluit deur die Minister van Polisie, gedoen is.

Die DA se Parlementêre leier, Mmusi Maimane, sê indien die Nasionale Vergadering se Programkomitee nie ooreen kan kom oor ‘n bykomende datum vir die President om uitstaande mondelinge vrae te beantwoord nie, kan dit tot probleme lei by die volgende volle sitting.

Die Programkomitee vergader vandag om die sakelys vir die Nasionale Vergadering se volgende sitting te bepaal.

Maimane sê die komitee moet ‘n datum vasstel vir die uitstaande vrae aan die President.

Wie het Zuma probeer vergiftig?

President Jacob Zuma se kantoor het ‘n Sunday Times-berig dat sy vrou Nompumelelo Ntuli-Zuma hom vergiftig het, as skinderpraatjies afgemaak.

Mac Maharaj, die presidensiële woordvoerder, sê die berig is gebaseer op totale spekulasie en skinderpraatjies en hy sal nie kommentaar lewer daarop nie.
 
Die Sunday Times het berig dat drie “anonieme bronne” bevestig het dat Zuma siek was en in Junie verlede jaar in die hospitaal opgeneem is.
 
Tydens ‘n besoek aan die VSA twee maande later het hy ontdek dat hy vergiftig is. Die diagnose is glo bevestig deur die Russiese dokters in Augustus nadat die president agterdogtig was oor die Amerikaners se diagnose.

Ntuli-Zuma het die president op sy Augustus-reis na die VSA vergesel, maar het Kersfees en Oujaarsaand alleen in haar huis in Nkandla deurgebring.

Spekulasie oor die egpaar se gespanne verhouding is al vir maande ryp, en is verder verlede week aangevuur deur haar afwesigheid by Zuma se staatsrede.
 
Die koerant berig dat Ntuli-Zuma in Januarie uit Nkandla getrek het en nou in Durban met haar drie kinders woon.

Sy is steeds geregtig op voordele uit die presidensie omdat sy en Zuma nie geskei is nie.
 
Zuma se broer, Michael, het bevestig dat Ntuli-Zuma “nie lank gelede nie” uitgetrek het.

Die direkte skakel tussen Ntuli-Zuma en ‘n gifkomplot kon egter nie finaal vasgestel word nie.

Berigte dat sy ‘n buite-egtelike verhouding gehad het, het ‘n paar jaar gelede opgeduik, maar is nie afdoende bewys van die aanslag nie.

Zuma, as die voormalige hoof van ANC-intelligensie in ballingskap, glo dat net iemand in sy binnekring toegang tot sy kos kon gehad het.

Gedurende die 10 dae tussen 7 en Junie 17 Junie sou Zuma na Brasilië reis vir die opening van die Wêreldbeker-sokkertoernooi en die amptelike oorhandiging omdat Suid-Afrika die vorige gasheer in 2010 was.

Maar Zuma was so siek gedurende daardie tydperk dat hy verward en onsamehangend geraak het.

Kort na Zuma se terugkeer, het hy sy persoonlike geneesheer, dr Harold Adams, afgedank vir versuim om die regte diagnose te maak, volgens twee onafhanklike bronne.

Adams, ‘n bruinman, het hierdie week ontken dat hy afgedank is, en sê dat hy tyd nodig het om verder te studeer.

Butana Komphela het voorheen Adams se rol in die Caster Semenya-sage gekritiseer, en hom beskuldig dat hy verantwoordelik is vir die uitlek Semenya se toetsuitslae aan die media.

“Waar is die Adams? Hy is die mees gevaarlike persoon wat ek nog gesien het in my lewe, wat ander mense se inligting uitlek. Ons moet na die raad waar hy geregistreer is gaan en hierdie kwessie met hulle opneem.”

Komphela het toe gesê Adams behoort nie naby die president toegelaat te word nie.

HSM dink landsbestuur is ‘n swart Idols-kompetisie

Die parlementêre sirkus waar die media sowel as lede klaarblyklik meen dit gaan om ‘n klugtige swart Idols-kompetisie eerder as landsbestuur, duur voort.

Hoofstroommedia berig oudergewoonte oor verskillende politieke persoonlikhede wat mekaar slegsê asof dit van enige wesentlike belang vir die produktiewe minderheid sou wees.

Opposisie-parlementslede het intussen tydens die debat oor die staatsrede hul ontevredenheid uitgespreek oor die weglating van sommige sleutelgebeure uit die notules van verlede week.

Hulle kla dat geen melding gemaak word van die blokkering van selfoonseine wat plaasgevind het nie. Dit is nie seker wat die meeste opposisiepartye kan kommunikeer of twiet wat aan die ANC se meerderheid sal verander nie.

Die uitsmyting van die EFF-lede sowel as die DA wat agterna uit die Nasionale Vergadering gestorm het om verrigtinge verder te ontwrig, is nie onder die besprekingspunte nie.

Soos verwag, het EFF-leier, Julius Malema sy toespraak weer begin met ‘n verwysing na Nkandla.

SOE-hoof wat Zuma kwytskeld, bedank

Die Presidensie het bevestig dat hy die hoof van die Spesiale Ondersoek-Eenheid, Vas Soni, se bedanking ontvang het.

Terwyl Soni aan die hoof van die Spesiale Ondersoekeenheid was het die eenheid die President kwytgeskeld van oorbesteding by sy privaatwoning in Nklandla.

President Jacob Zuma sê in ‘n verklaring dat hy Soni se bedanking aanvaar, maar dat dit ‘n verlies is omdat Soni goeie werk gedoen het. Soni is in Augustus 2013 deur President Zuma aangestel.

Hy het Maandag aangekondig dat hy bedank om meer tyd saam met sy vrou, wat siek is, deur te bring. Zuma het Soni en sy vrou sterkte toegewens.

Volgens Zuma het Soni die Ondersoekeenheid verander in ‘n effektiewe instrument in die stryd teen wanadministrasie en korrupsie.

Soni het gesê sy werk was baie stresvol. “Ek dink dit was stresvol en dit is ‘n ernstige uitdaging … Ek het amper my hele loopbaan in die private sektor spandeer en het nie besef wat ‘n uitdaging dit is om in die openbare sektor te werk nie,” het hy in ‘n onderhoud met eNCA gesê.

Soni het aangedui dat hy weer in die private sektor sal werk. Hy het vroeër gesê korrupsie en wanadministrasie skep “groot probleme” in die land.

Valkebaas het glo Zuma-bondgenote ondersoek

Die opposisieleier, Helen Zille, het die skorsing van die hoof van die Valke, Anwar Dramat, aan hoëvlak korrupsie verbind, nadat sy geskimp het dat die Valke-ondersoek met die President verbind kan word.

Zille het die opmerking in haar weeklikse nuusbrief gemaak. Sy sê Dramat se ondersoek is glo uitgebrei na president Zuma se netwerk van bondgenote, maar het toegegee dat die kwessie “ingewikkeld” is en “verdere ondersoek verg”.

Dramat se regspan het vroeër met Robert McBride, hoof van die polisie se Onafhanklike Ondersoekdirektoraat (Opod) ontmoet, wat Dramat van enige verbintenis aan Zimbabwiese deportasies onthef het.

Ná die Grondwethofuitspraak in November, het Dramat gevra dat die Nkandla-dossier aan die Valke oorhandig word vir ‘n ondersoek. Die SAPD wou glo nie betrokke raak daarin nie.

Die ANC het intussen aangedui dat hulle met Dramat sal onderhandel en ontken dat daar ‘n heksejag teen sekere lede van die Valke gevoer word.

Dramat het ook die ondersoek na misdaadintelligensiebaas Richard Mdluli behartig. Hy en sy bondgenote is ondersoek vir die beweerde plundering ‘n misdaadintelligensiefonds om vir hulself duur eiendomme en luukse motors te koop.

Die Gautengse hoof van die Valke, generaal-majoor Shadrack Sibiya is intussen weer geskors. Sy regsverteenwoordiger, Victor Nkhwashu sê Sibiya het gistermiddag die kennisgewing van sy skorsing met volle salaris ontvang.

Sibiya en sy regsverteenwoordiger sal Dinsdag vergader. Sy regsverteenwoordiger sê hulle sal dan hul reaksie op jongste gebeure oorweeg.

‘n Kennisgewing vir Sibiya se skorsing is verlede week teruggetrek nadat hy sy beplande skorsing in die Arbeidshof beveg het.

Die storm rondom Sibiya en ander senior lede van die Valke hou verband met die beweerde ontwettige deportasie van Zimbabwiërs in 2010.

Die Valke het intussen Sibiya se skorsing bevestig maar wou geen verdere besonderhede gee nie.

Nkandla se eerste sondebok behou werk

‘n Werknemer van die departement van openbare werke is die eerste sondebok van die omstrede opgraderings van R246 miljoen aan pres. Jacob Zuma se huis in Nkandla, het City Press Sondag berig.

Volgens bronne is Itumeleng Molosi (58), direkteur van projekte, geskors nadat hy skuldig gepleit het op aanklag dat hy onreëlmatig kontrakteurs aangestel het en aanskaffingsprosedures verontagsaam het, het die koerant berig.

Hy het glo verlede Maandag die ooreenkoms onderteken nadat hy onderneem het om skuldig te pleit.

Molosi sal glo sy pos behou nadat die departement hom twee maande lank sonder betaling geskors het.

Volgens Molosi het hyself asook ander werknemers onder druk geswig om prosedures te verontagsaam omdat dit die president se huis was.

Elf ander beamptes, wat almal deur die Vereniging vir Staatsamptenare (PSA) verteenwoordig word, kan soortgelyke ooreenkomste aangaan om uitgerekte verhore te vermy.

 

Ordelys vir Nasionale Vergadering bespreek

Die Nasionale Vergadering se Programkomitee vergader vandag om die program vir môre se sitting te finaliseer wat deur die Speaker, Baleka Mbete, byeengeroep is om onopgeloste kwessies af te handel.

Die komitee is die Parlementêre struktuur wat die finale besluit neem oor wat tydens ‘n sitting op die ordelys behoort te wees, het RSG berig.

Die bykomende sitting volg nadat verrigtinge verlede Donderdag sewe ure lank vertraag is.

Die partye is baie verdeeld oor of President Jacob Zuma na die sitting behoort te kom of nie.

Volgens die hoofswepevergadering dring die DA, die EFF en die VF Plus daarop aan dat hy wel vrae moet kom beantwoord.

Die ANC sê egter dat die opposisie bloot die verrigtinge weer wil ontwrig.

Volgens die ANC weet die opposisie dat die President nooit genooi word om vrae te beantwoord wanneer ander sake bespreek word nie.

Een van die sake wat na verwagting bespreek sal word, is die verslag van die Komitee oor Bevoegdhede en Voorregte wat tugmaatreëls teen 20 LP’s van die EFF aanbeveel het, nadat hulle skuldig bevind is op verskeie aanklagte van minagting van die Parlement.

Parlementêre orde ver van herstel

Gesprekke tussen adjunkpresident Cyril Ramaphosa en opposisiepartye het Maandag op ‘n dooiepunt uitgeloop.

“Die opposisiepartye wou vandag weet of daar ‘n manier is wat ons vir hulle ʼn verduideliking kan sê,” het Ramaphosa ná die vergadering aan verslaggewers gesê. “Ons het gesê die ooreenkoms kan nie bereik word nie.”

Volgens Ramaphosa het die gesprek op ‘n dooiepunt uitgeloop toe die Demokratiese Alliansie verlede week ‘n mosie van sensuur teen pres. Jacob Zuma in die Nasionale Vergadering ingedien het. “Dit is teenstrydig met die gees waarin die ooreenkoms bereik is en ons het ook gesê dat ons die proses in die parlement nou moet toelaat om sy gang te gaan.”

Mmusi Maimane, parlementêre leier van die DA, het die dooiepunt bevestig.

Die DA was op die voorpunt van ontwrigting toe hulle handgemeen geraak het met lede van die polisie wat vroeër ingeroep is om orde te herstel.

Ramaphosa het gesê die ANC is bereid om verder gesprek te voer met opposisiepartye.

Die vergadering is belê na ‘n ooreenkoms verlede week tussen politieke partye in die parlement op niks uitgeloop het nie. Ramaphosa het Dinsdag met die opposisiepartye ooreengekom dat tugstappe teen lede van die Ekonomiese Vryheidsvegters tydelik opgeskort sal word indien hulle ooreenkom dat hulle parlementêre reëls sal respekteer.

‘n Verslag deur die komitee oor regte en voorregte sou moontlik daartoe gelei het dat verskeie EFF-LP’s, insluitend Julius Malema, tot 30 dae lank uit die parlement geskors kon word. Die aanklagte is aanhagnig gemaak nadat pres. Jacob Zuma in Augustus oor die Nkandla-sage uitgejou is.

LP’s het mekaar egter Woensdag weer met obsene handgebare en beledigings getart wat die ooreenkoms in duie laat stort het.

Ramaphosa het Woensdag aangekondig dat die verslag van die komitee weer op die agenda geplaas is.

Die DA hou vol dat hy met die mosie sal voortgaan, omdat Zuma vrae nie mondelings wil beantwoord oor opgraderings van R246 miljoen by sy privaat woning in Nkandla, KwaZulu-Natal nie. Zuma het reeds skriftelik geantwoord.

Die ANC het Donderdagaand die debat in die Nasionale Vergadering laat vaar waartydens die verslag oor die EFF-LP’s se skorsing bespreek is. Ramaphosa het ‘n verklaring uitgereik waarin hy gesê het hy is steeds bereid om met politieke partye te onderhandel om vrede in die parlement te herstel.

Die opposisiepartye is die DA, die EFF, die Inkatha Vryheidsparty, die Vryheidsfront Plus, die National Freedom Party, die African Christian Democratic Party, die United Democratic Movement, die Pan Africanist Congress en die Congress of the People.

Die leier van die UDM, Bantu Holomisa sê egter opposisiepartye in die parlement is steeds verbind tot verlede week se ooreenkoms met Ramaphosa om orde in die parlement te herstel

Parlementslede slaan mekaar oor lukratiewe kontrakte

Die Nasionale Vergadering het die verslag van die ad hoc komitee oor Nkandla aanvaar, maar sluimerende jaloesie oor geld wou net nie bedaar nie.

Die verslag het president Jacob Zuma van enige blaam onthef nadat hy voorheen aanspreeklik gehou is vir die multi-miljoenrandse opgraderings by sy privaatwoning.

In die stemming wat gehou is, het 201 parlementslede dit aanvaar, 103 het dit verwerp en niemand het buite stemming gebly nie.

Opposisiepartye het egter ‘n minderheidsverslag ter tafel gelê wat eis dat Zuma uit sy amp verwyder word, nadat hulle die voorheen uit die komitee gestap het.

‘n Georkestreerde vertragingstaktiek deur die gesamentlike opposisie het vroeër Donderdag vir chaos in die parlement gesorg.

Opposisie-lede van verskeie partye het daarin geslaag om die Nkandla-debat met meer as drie ure te vertraag, deur ‘n rekord aantal kennisgewings van mosies in te dien.

Die Nasionale Vergadering is later weer ontwrig en moes verdaag word toe chaos opnuut uitgebreek het. Dit het kort voor elfuur gisteraand gebeur

Die EFF-parlementslid, Reneilwe Mashabela moes uit die Nasionale Vergadering verwyder word nadat sy geweier het die podium te verlaat. Sy het Zuma herhaaldelik ‘n dief genoem.

Die DA en EFF se humeure en klaarblyklike jaloesie het opgevlam oor lukratiewe kontrakte rakende ‘n verdrag tussen Suid-Afrika en die Demokratiese Republiek van die Kongo oor die Grand Inga hidro-ëlektrisiteitsprojek.

Volgens Mashabela het Khulubushe Zuma, president Zuma se neef, ‘n aandeel daarin.