Namibië – Bladsy 2 – praag.co.za

Angola kan nie meer buitelandse rekeninge betaal nie

Die Spaanse lugredery Iberia asook Air Namibia is van die rederye wat ernstig deur die valutakrisis in Angola geraak word.

Angola se sentrale bank beskik nie meer oor genoeg buitelandse reserwes om rekeninge te betaal nie.

Iberia sal vlugte tussen Luanda en Madrid van 1 Junie 2016 opskort en die maatskappy sal die inligting versprei aan kliënte en toeroperateurs.

Die Spaanse verklaring lui dat die besluit spruit uit die huidige ekonomiese situasie in Angola, na aanleiding van die daling in oliepryse en die gebrek aan buitelandse valuta.

Die maatskappy het gesê die klein aantal passasiers is ook nie versoenbaar met die vaste koste van die roete nie.

“Ons kliënte sal ‘n terugbetaling ontvang of aan ander maatskappye gestuur word, volgens hul behoeftes,” het die maatskappyverteenwoordiger gesê.

Die waarnemende besturende direkteur van Air Namibia, Mandi Samson, het gesê Angola skuld die nasionale redery miljoene Namibiese dollar omdat Air Namibia weier om die betaling in kwanza te ontvang.

Samson het egter twee weke gelede AirNam se bande met Angola, wat vanaf 1991 bestaan, geprys.

Die Angolese regering het betalings na buitelandse rekenings bevries en kan nie die inkomste wat Air Namibia op die Luanda-roete verdien, oorbetaal nie.

Benewens die redery se penarie, skuld die Banco Nacional de Angola (BAN), die sentrale bank, die Bank of Namibia (BoN) ook meer as N$5 miljard ná die aanvanklike omskakelingsooreenkoms tussen die twee lande se geldeenhede.

In Junie verlede jaar het die ooreenkoms tot ‘n massa-uitvloei van kapitaal uit Angola gelei.

Ingevolge die oorspronklike ooreenkoms sou die BoN elke 30 dae kwanza na die BNA terugstuur waarvoor die Angolese sentrale bank die plaaslike een in Amerikaanse dollar moes vergoed.

Die BNA kon dit egter nie bybring nie en ‘n hersiene betalingskedule van een keer per kwartaal is goedgekeur.

Benewens Angola, sukkel lugrederye ook om hul geld uit olielande soos Nigerië, Soedan en Venezuela te kry, het Iata bekend gemaak. Egipte, wat nie ‘n olieland is nie, het soortgelyke probleme maar weens onlangse vliegrampe.

Angola is sewe maande agterstallig met die uitbetaling en skuld rederye ‘n gesamentlike US$237 miljoen.

Nigerië is wat lande in Afrika betref die grootste sondaar en skuld lugrederye $591 miljoen wat ook reeds sewe maande agterstallig is.

Die regering in Venezuela is 16 maande agter met die oorbetaling van ‘n reuse $3,8 miljard wat rederye op roetes na en van hierdie land verdien het, blyk dit uit inligting wat deur Iata vrygestel is.

“Die rederybedryf is ‘n kompeterende bedryf met baie klein winsmarges. Daarom is die doeltreffende betaling van inkomste wat verdien is, kritiek belangrik. Dit is nie redelik om te verwag rederye moet in lande belê en roetes daarheen bedien indien hulle nie die geld wat hulle daardeur verdien, kan insamel nie,” het Iata se direkteur-generaal en hoof uitvoerende beampte, mnr. Tony Tyler, gesê.

Tyler het gepraat by die Internasionale Lugvervoervereniging (Iata) se jaarvergadering in Dublin, Ierland.

Hy het namens dié regering ‘n dringende beroep op regerings en hulle sentrale banke gedoen om die internasionale ooreenkomste wat hulle verplig om vinnige oorbetalings te doen, te eerbiedig.

Duitse verskoning vir Namibiese volksmoord vorder

Die Namibiese en Duitse regerings het Woensdag by ’n mediavergadering in Berlyn saamgestem dat geskiedkundige onregte soos die volksmoord wat Duitsland gepleeg het, “reggestel” moet word.

Die lande het ook ooreengekom op ’n onderhandelingsproses wat “voordelig vir albei lande en mense” is.

Dr. Zed Ngavirue, Namibië se spesiale gesant vir die Duits-Namibiese dialoog oor die volksmoord tussen 1904 en 1908, was verlede week saam met ’n regeringsafvaardiging in Berlyn vir samesprekings met die Duitse spesiale gesant, mnr. Ruprecht Polenz.

Die afvaardiging het ook met die president van die Duitse parlement, dr. Norbert Lammert, en die minister van buitelandse sake, dr. Frank-Walter Steinmeier, vergader.

Die Duitse ambassadeur in Namibië, mnr. Christian Schlaga, het Donderdag in Windhoek aan joernalsite gesê die hoëvlak-vergaderings is ’n aanduiding dat Duitsland die algehele konteks van die besprekings “baie ernstig” opneem.

“Dit was ’n doelbewuste sein oor hoe belangrik die onderhandelinge is en dat dit volle steun op die hoogste politieke vlakke geniet,” het Schlaga gesê.

Schlaga het gesê die kwessies van ’n formele verskoning vir die volksmoorde en vergoeding sal binne die raamwerk van onderhandelinge hanteer word.

“In die regte konteks sal Duitsland bereid wees om verskoning te vra,” het hy gesê.

Die huidige Duitse regering is van plan om dit af te handel voor sy algemene verkiesings aan die einde van aanstaande jaar.

Bron: Die Republikein

4 Mei, Cassingadag: ‘n Ope brief aan genl. Constand Viljoen

Geagte generaal, u is bekend daarvoor dat u nie ‘n deurslaggewende staatsveiligheidsoperasie sou uitvoer, indien die vrou en kinders van ‘n invloedryke vyand soos Chris Hani moontlik daarin kon omkom nie. (Vandag hou Hani se vrou vir Janusz Waluś in die tronk, en is sy magtiger as die hof, danksy u destydse besluit.)

Uit daardie oogpunt is die groot Cassinga-sukses vandag ‘n verlore slag, want sy dit SWAPO, FAPLA of u eie 32 Bataljon, feit is gister, vandag en môre: meeste manssoldate wat lank in die bosoorlog bly sonder gereelde rotasie terug na hulle gesinne en metgeselle, slaap snags tydens militêre diens saam met vrouens in hulle basis. U het dit self by u eie 32 Bataljon gesien.

Dog by Namibië se Cassingadagherdenking, bly in ‘n mate vir sommige ou Suid-Afrikaanse soldate behoue die herinnering aan een van die mees moderne en vermoënde militere afstandoperasies ooit in Afrika.

Sou Suid-Afrika vandag nog sulke broodnodige militêre vermoëns gehad het soos onder u, sou die land se weermag vrede en vooruitgang vir die DRK, Angola, Mosambiek en Zimbabwe verseker het, en sou die hele SAOG, oftewel Suider-Afrikaanse streek, se ekonomie nou ten minste twee keer groter gewees het.

‘n Vooruitstrewende ekonomies geïntegreerde Suider-Afrika wat internasionaal na potensiaal presteer, is prakties onmoontlik sonder u SAW en ‘n hoof van die SAW soos u.

U weet vir seker dat bogenoemde waar is, en daarom het u na u aftrede die skyn van moderne militëre vermoë en mag gebruik om van die nuwe Suid-Afrika ‘n sukses te probeer maak, maar u missie het misluk, omdat u teen daardie tyd net ‘n beroemde generaal in naam was, en nie meer regtig die hoof van die SAW nie.

As hoof van die magtige SAW tot in 1985, was u die magtigste man in Afrika, en dus die mees invloedryke, belangrikste mens, met verre die meeste verantwoordelikheid in Afrika, vir destyds, en vir vandag.

U het op bloedjong ouderdom ten minste tien jaar voortydig en vrywillig as die magtigste en belangrikste man in Afrika sonder enige weerstand of rasionele rede afgetree, en sedert daardie dag van u polities ondeurdagte aftrede, vaar die hele Suider-Afrikaanse subkontinent al hoe verder weg van sy ekonomiese en politieke potensiaal, met verskriklike gevolge vir honderde miljoene mense.

Ek is persoonlik baie lief vir u, en is baie bly dat u my nie geneutraliseer het, toe ek u beskermde basis in ‘n geheime oorgrens-operasie bekruip en binnegedring het, na deeglike verkenning van die strategiese terrein uit die lug met behulp van satelliete nie.

Bogenoemde missie was om u aan te spoor om die groot gevolge van u voortydige aftrede 30 jaar gelede te oordink, te erken, en met Suid-Afrika te deel, met die doel om Afrika weer te help.

Suider-Afrika sonder u SAW, en sonder ‘n hoof van die SAW soos u wat soms u eie politici kon weerstaan wanneer nodig, kan nie ekonomies genoeg integreer en industrieel ontwikkel, om met die wêreldmoondhede mee te ding nie.

Koning Goodwill Zwelithini en president Jacob Zuma sou u SAW en ‘n hoof van die SAW soos u, geweldig waardeer, en aanwend tot die broodnodige ontwikkelling van die SAOG, oftewel die Suider-Afrikaanse Ontwikkelingsgemeenskap. Nou egter is hulle magteloos, en word die ekonomiese streekschaos stadig maar seker groter, en die plaaslike streek ver agter ten opsigte van mededingende buitelandse moondhede.

Baie mag bring baie verantwoordelikheid. Met die meeste mag in Afrika, nie net polities nie, maar ook moreel, het u die meeste verantwoordelikheid gehad.

U was een mens, wat werklik mees bepalend vir die geskiedenis van Afrika was, al is u nederig en wil die werklike waarheid daarom ontken. Politiek gaan nie net oor persone nie, maar u persoon was werklik bepalend vir Suider-Afrika se politiek. Vandaar vandag nog Casingadag in Namibië.

Hierdie is nie ‘n persoonlike aanval nie, net ‘n bewese historiese feit.

Sou u aangebly het as hoof van die SAW, sou UNITA wel in 1987 FAPLA se brigades by Cuito met ‘n twee-frontaanval almal laat inplof het, en sou u daarna vir generaal-president Fidel Castro in 1988 in Angola gewen het. Dan sou UNITA as paaslike meerderheidsgroep uiteindelik Angola demokraties regeer het, en sou UNITA-Angola en demokratiese IVP-Suid-Afrika saam as vriendskaplike superlande die hele Suider-Afrika ekonomies geïntegreer het.

In 1976 het u teen Fidel Castro se wilskrag, intelligensie en gesonde politieke instink te staan gekom. In 1987 en 1988 was u anders as hy, nie op u pos nie. Daarom is UNITA uitgewis, Angola vandag ‘n menseregtehel, Suid-Afrika besig om te verbrokkel, en die hele streek in ekonomiese chaos.

Dít glad nie weens een-mens een-stem nie. Maar weens een mens, voortydige aftrede – na ‘n Savannah-bosbasis wat nes Cassinga lyk.

U is welkom om te antwoord.

Saluut!

Luitenant Madelein Louw

Stropers teiken Etosja

Stropers het die Etosja Nasionale Park in Namibië geteiken met 29 karkasse wat reeds in 2016 gevind is.

Verlede jaar het Namibië 80 renosters aan wilddiewe afgestaan. Oor die afgelope 20 jaar is die Afrika-leeus, olifante, kameelperde en renosters se getalle gehalveer.

Altesaam is 34 renosterkarkasse in die eerste twee maande van 2016 gevind waarvan verreweg die meeste in Etosja. Dié skoksyfers is pas bekendgemaak.

Vyf van die 34 karkasse is volgens die Namibiese polisie se adjunk-inspekteur-generaal van operasies, genl.maj. James Tjivikua, tydens lug- en voetpatrollies in die omgewing van Kliprivier naby Grootberg Lodge in die Kunenestreek ontdek.

Meer as 30 verdagtes is reeds in hegtenis geneem en hul vuurwapens is gekonfiskeer, maar die stropery gaan onverpoosd voort.

Volgens Tjivikua is die karkasse wat gevind is meer as een jaar oud.

Vier Namibiërs is in verband met die stroop van een renoster naby Kliprivier in Desember in hegtenis geneem en hulle word ook verbind met nog renosterstropery.

Voorts is die Chinese burger met perlemoen en renosterhorings vasgetrek.

Zhi en sy vermeende medepligtige, James Barron Wallace, is Vrydag borgtog in die Windhoekse landdroshof toegestaan.

Geen olifantkarkasse is vanjaar nog gevind nie, maar ’n Zambiese burger is in Januarie op Kongola in verband met die besit van drie olifanttande in hegtenis geneem.

Die oorsprong van die olifanttande is egter nog nie vasgestel nie.

Wit Namibiër eerste om van terreur aangekla te word

Johannes (Johan) Martinus Mostert van die plaas Swartmodder in die Otjiwarongo-distrik is die eerste mens in die geskiedenis van Namibië wat ingevolge die Wet op die Voorkoming en Bestryding van Terroriste- en Proliferasie-aktiwiteite (Wet No.4 van 2014) aangekla is.

Mostert het Donderdag in die landdroshof op Otjiwarongo verskyn en is ingevolge artikel 17 (1a en 1b) van dié wet aangekla.

“Hy is die eerste mense ooit in die geskiedenis wat op dié klag teregstaan,” het staatsaanklaer, Lewis Chigunwe gesê.

Artikel 17 verwys na ’n oortreding wat verband hou met wapens en ’n oortreder wat hieraan skuldig bevind word, kan lewenslange gevangenisstraf in die oë staar.

Kortom verwys artikel 17 (1) na enige persoon, in of buite Namibië, met die bedoeling om enige omgewingskade, ekonomiese of sosiale terreur teweeg te bring, of enige regering, liggaam of instelling te intimideer of te dwing om politieke, godsdienstige of ideologiese standpunte te aanvaar of te verwerp deur ’n wapen te gebruik, of dreig om te gebruik, met die opset om mense dood te maak, te beseer of te infekteer, insluitende ’n stelsel wat ontwerp, aangepas of van voorneme is om so ’n wapen te lewer.

Dit is teen die wet om so ’n wapen teen ’n Namibiese burger of ’n regmatige inwoner van Namibië te gebruik, ongeag of die persoon in of buite Namibië bly.

Mostert verskyn op hierdie klag asook vyf ander: Die besit van ammunisie sonder ’n permit, die besit van vuurwapens sonder ’n permit, die besit van handgranate sonder ’n permit, die oortreding van die Wet op Plofstof en die besit van plofstof vir private gebruik sonder ’n permit.

Volgens die polisie het Mostert semi-outomatiese aanvalsgewere, jaggewere, handgranate en sowat 10 000 patrone in sy besit gehad asook verskeie uniforms van PLAN, Unita, die MPLA, Koevoet, SWATF, die Namibiese polisie en weermag.

Die beskuldigde bly in aanhouding tot sy volgende verskyning op 29 Maart.

Bron: Republikein

Namibiër middelpunt van pers rasherrie

‘n Bekende Namibiese stoetboer en ortodontis, dr. Joggie Briedenhann, se dogter is vasgevang in die absurde en kwaadwillige pers rasherrie op Stellenbosch.

Briedenhann het uit Stellenbosch gesê dit is betreurenswaardig dat Poekie, en ‘n koshuismaat op die Matie-kampus, Jo-Anne Cloete, hulself in die situasie bevind.

“Dit is jammer dat dit moes gebeur. Ons hier in Namibië leef in ander tye en beleef rasseverhoudinge anders as in Suid-Afrika.

Die twee vrouestudente is deur die Universiteit van Stellenbosch (US) uit die Heemstede dameskoshuis geskors ná hulle hul gesigte vir ’n sterreruim-koshuispartytjie pers geverf het.

Die getalarm drukgroep, Open Stellenbosch (OSB), wat hom vir die transformasie van die US beywer, het die onmiddellike en onvoorwaardelike skorsing van Briedenhann en Cloete sowel as die huiskomitee en huismoeder van die koshuis geëis. Hulle is van “blackface” beskuldig toe foto’s van Briedenhann en Cloete op sosiale media platforms gedeel is.

Briedenhann, het kort ná die voorval op Facebook geskryf dat sy en ’n vriendin hulle bloot vir die partytjie donkerpers geverf en met blinkers bedek het en nie met swart mense die gek probeer skeer het nie.

Die groep het egter Maandag in ‘n verklaring vir die twee studente om verskoning gevra en gesê die situasie is misverstaan, maar hul verskoning weer kort daarna teruggetrek.

“Ons besef dat die voorval nie meer algemeen deur die media as ’n geval van ‘blackface’ aanvaar word nie. Ons hou egter vol die feit dat die student ’n filter op die foto geplaas het sodat dit swart lyk, en dit willens en wetens op sosiale media geplaas het, dit wel ’n geval van ‘blackface’ maak,” het die groep in ’n verklaring gesê.

Prof. Wim de Villiers, US-rektor, het in ’n brief aan personeel en studente gesê die universiteit het ’n verantwoordelikheid om die saak te ondersoek.

“Die ondersoek moet plaasvind sodat al die feite voorgelê en deeglik oorweeg kan word. Die proses is in werking gestel met die skorsing van die twee studente uit hul koshuis terwyl die ondersoek aan die gang is.”

De Villiers sê dat die skorsing van die studente hangende ‘n ondersoek standaard praktyk is en dat dit nie gelykstaande aan ‘n skuldbevinding is nie.

Dit is duidelik dat De Villiers geswig het voor die opsetlik kwaadwillige vertolking van die twee se optrede.

Hy het in ‘n verklaring die flou verskoning voorgehou dat die universiteit nie ‘n afgesonderde “enklawe” is wat van die res van Suid-Afrika geïsoleer is nie.

“Ons maak deel uit van die res van die samelewing. In die lig van ‘blackface’- voorvalle aan die US en by ander universiteite in 2014, en die negatiewe impak wat dit gehad het, neem ons sulke bewerings ernstig op,” lui sy verklaring.

Dr. Briedenhann het minute voordat hy saam met ander betrokkenes om 13:30 ‘n vergadering met De Villiers sou hê, in ‘n kort telefoniese onderhoud die voorval betreur en onderneem om die gesprek na afloop daarvan voort te sit. Teen druktyd het hy laat weet die vergadering duur steeds voort.

Bron: Republikein

Stropers in Namibië voer skrikbewind

Die eienaar van Emanya Lodge tussen die Etosha Nasionale Park en Oshivelo, sê sy “wil weghardloop” uit moedeloosheid omdat stropers ’n skrikbewind voer en dit lyk of die polisie nie veel daaraan gaan doen nie.

Dertien van haar 18 swartwitpense van etlike miljoene Namibiese dollar is al deur die stropers doodgeskiet, terwyl sy in die afgelope agt maande ook 35 beeste verloor het, vertel me. Nelie Lewies, wat benewens die lodge ook ’n boerdery bedryf.

Sondagnag het ’n span wat vermoedelik Maandag ook vyf beeste geslag het op die gasteplaas Sachsenheim van haar bure, mnr. en me. Gerd en Maria Sachse, by die lodge ingebreek en die rekenaarbediener asook al die sekuriteitskameras gesteel.

“Ek het by my kamervenster uitgekyk en die vier mans gewaar. Toe ek vir hulle skree ‘haai, wat maak julle hier’, het hulle nie eens weggehardloop nie,” vertel Lewies.

Volgens Maria Sachse het haar man Maandag omstreeks twaalfuur op vier vermeende stropers in die veld afgekom nadat hulle vyf beeste geslag het.

“Die stropers het gelê en slaap en hy het stilletjies terugbeweeg en my gebel sodat ek die polisie kan ontbied.”

Sy sê die polisie van Oshivelo het eers vieruur die middag daar aangekom en die stropers het toe al spore gemaak.

“Een van die polisiemanne het een van die spore geëien as dieselfde spoor wat hulle gewaar het toe hulle vroeër die dag die inbraak by Emanya ondersoek het.

“Hy het vir ons gesê die mans is gewapen.”

Volgens haar het die polisie die spore gevolg en in ’n stadium drie mans met vleis by hulle gewaar, maar die mans het hulle glo ontglip.

Sachse vertel verder dat een van die plaaswerkers verlede jaar deur ’n vermeende stroper met ’n mes in die rug gesteek is. “Ons het die saak by die polisie aangegee, want die man het gedreig om ons dood te maak, maar daar het niks van die ondersoek gekom nie.”

Lewies sê hulle het verlede jaar een aand in die restaurant by die Emanya Lodge gesit toe stropers lostrek en van die swartwitpense doodskiet. “Die werkers was vreesbevange en het in die wynkelder gaan wegkruip.”
Ook dié ondersoek het op niks uitgeloop nie, sê sy.

“Ons voel die weermag moet ingestuur word en die plase skoonmaak. Ons kan dit nie meer hou nie. Ek voel ek wil weghardloop. Aan die een kant baklei ons teen die droogte, want ons het nog nie eens 100 mm vir die seisoen gehad het. En aan die ander kant ly ons onder die strooptogte,” sê ’n moedelose Lewies.

Dit het haar N$100 000 gekos om haar rekenaarbediener en sekuriteitskameras te vervang. “Ons besoekers is meestal oorsese toeriste. Ons het nou al die inligting verloor van besprekings wat reeds gedoen is. Ek moes dadelik weer hierdie toerusting aanskaf.”

Bron: Die Republikein

Polisie in Windhoek rand witte aan

Polisielede verbonde aan die Sentrale polisiekantoor in Windhoek staar klagte van aanranding en brutaliteit in die gesig, nadat hulle glo ’n wit inwoner van Windhoek tydens ondervraging ernstig aangerand het. Die klagte, CR432/01/2016, is by dieselfde polisiekantoor aanhangig gemaak.

Na bewering is die 35-jarige mnr. Marco Bock Saterdagoggend deur polisiebeamptes by die sentrale polisiekantoor in die hoofstad vir meer as ’n uur aangerand.

Volgens Bock is hy vroeër die oggend by die Vredehof-woonstelle in Windhoek vir ondervraging na die polisiekantoor geneem. Die ondervraging spruit glo uit die diefstal van ’n iPad uit een van die woonstelle.

Drie jeugdiges was toe reeds vir ondervraging in een van die polisiebakkies na die polisiekantoor onderweg. Vingers is glo deur hulle na Bock gewys dat hy die skuldige was wat die iPad glo gesteel en onder die Tweelingbrug sou gaan wegsteek het. Die jeugdiges het na bewering die wegsteekplek aan die polisie gaan uitwys.

Die drie jeugdiges en Bock is glo beveel om by die polisiekantoor uit te klim en na die agterkant van die gebou te stap. Na bewering is hulle toe beveel om liggaamlike oefeninge waaronder opstote te doen. Polisiebeamptes het toe glo vir Bock met ’n staalpyp oor sy boude en blaaie begin slaan in ’n poging om hom tot erkenning te dwing dat hy wél die iPad gesteel het.

Na bewering is hy volgens die polisiebeamptes geslaan omdat hulle “die waarheid soek” en hy die jeugdiges sou gestuur het om die inbraak te pleeg. Die beweerde aanranding het sowat ’n uur geduur en het glo gestop toe die polisielede besluit het hy het wel die waarheid gepraat.

’n Mediese dokter het in ’n verklaring ingevolge die strafproseswet bevestig dat Bock kneusings aan sy boude en rug en bloed in sy urine gehad het.

Die woordvoerder van die polisie, insp. Slogan Matheus, kon teen druktyd geen antwoorde verskaf nie.

Bron: Die Republikein

Duitsland genader na plaasmoordverdagtes borg kry

Boere van die Kalkrand-omgewing en die gemeenskap van Omamas in Namibië is woedend en geskok nadat die vyf swart verdagtes van die moord op die bejaarde Duitse burger, mnr. Reinhardt Schmidt, Vrydag borgtog van N$5 000 elk gekry het.

Die vyf verdagtes te wete dr. Gerson Kandjii en mnre. Erwin Tjiteer, Domingo Juseus, Stefanus Jarson en Mawapunchila Nakapanda, het in die landdroshof op Kalkrand verskyn nadat hulle vroeg in Maart op klagte van moord en diefstal in hegtenis geneem is.

Landdros Ismael Huanga het nie die redes vir die toekenning van borgtog in die hof gelees nie.

Adjudant-offisier Aloy Haraseb van die Namibiese polisie het gister bevestig dat Kandjii, die Brave Warriors se spandokter wat ‘n ander hangende saak van renosterstropery teen hom het, reeds op vrye voet is nadat hy Saterdag sy borgtog betaal het.

Die ander vier is steeds in aanhouding tot tyd en wyl hulle hul borgtog kan betaal.

“Dit is absoluut onaanvaarbaar dat moordverdagtes borgtog van N$5 000 elk kry. Dit is ondenkbaar. Ek kan nie verstaan dat jy ‘n prys van N$5 000 op iemand se lewe kan plaas nie,” het die ontstelde bestuurder van die Namibië Hoodia-jagplaas, mnr. Derek MacKinnon, gister gesê.

Hy het bygevoeg: “Die regering sal moet ingryp. Hoe kan ‘n moordverdagte dieselfde borgtog as ‘n vermeende veedief kry?”

MacKinnon het gesê Schmidt se familie in Duitsland het Vrydag ‘n brief aan die Duitse ambassadeur in Namibië, mnr. Christian Schlaga, geskryf om hul skok oor die borgtog uit te spreek en te vra of hy met die Namibiese regering kan vergader om hul misnoeë oor die vrylating oor te kan dra.

MacKinnon het gesê hy is ook van plan om ‘n brief van protes aan die ministerie van landbou, water en bosbou te rig.

“Ek sukkel om te glo dat vermeende moordenaars toegelaat kan word om op vrye voet rond loop,” het MacKinnon gesê.

Schmidt is in die oggendure van 26 Februarie en 27 Februarie in sy huis op die Namibië Hoodia-jagplaas in die Omamas-omgewing vermoor. Die verdagtes het glo ook twee vuurwapens, ‘n platskermtelevisie en ander items uit sy huis gesteel.

Van die verdagtes is vasgetrek toe hulle van die gesteelde items verkoop het.

Toe die verdagtes in Maart in hegtenis geneem is, is gespekuleer dat hulle moontlik deel van ‘n sindikaat verantwoordelik vir renosterstropery is en die jagplaas vir ‘n ruk lank dopgehou het. Schmidt was glo van voorneme om renosters tot die wildbevolking van die plaas te voeg.

Bron: Republikein

‘Historiese boere’ iets van die verlede sê Piet Kopdoek

Piet Croucamp het tydens die 69ste kongres van die Namibië Landbou-unie (NLU) dié naweek aan produsente gesê, “historiese boere” is iets van die verlede.

Die Namibiese vleisbedryf is glo in die moeilikheid. Volgens mnr. Mecki Schneider, voorsitter van die Lewendehaweprodusente-organisasie (LPO), het die winsgewindheid van beesboerdery sedert 2006 met 40% gedaal.

Croucamp is ondermeer die aanbieder van die televisieprogram Megaboere op kykNET, en ‘n dosent in politieke wetenskap aan die Universiteit van Johannesburg met klaarblyklik onbeperkte toegang tot die media.

Hy het gepraat oor hoe hy deur middel van dié televisieprogram wou vasstel hoe die suksesvolste boere in Suid-Afrika dink en wat ander daaruit kan leer.

Volgens hom het hierdie boere die vermoë om baie goed by veranderde omstandighede aan te pas, hulle gryp nuwe tegnologie en ontwikkeling in die landboubedryf aan, grond is vir hulle ’n kommoditeit eerder as iets wat sentimentele waarde het en ’n boerdery word soos ’n besigheid hanteer.

Hulle dink op ’n “megaskaal”.

Hulle floreer in tye van onsekerheid, want hulle gebruik kwessies soos grondhervorming tot alle betrokkenes se voordeel en oorskadu selfs die regering se pogings tot swart bemagtiging. Hulle handhaaf ’n heel ander verhouding met plaaswerkers wat vir hulle ’n vennoot met kosbare spesialiteitsvaardighede word. Verder het dié boere die behoefte om risiko’s te neem. Boonop is die wêreld hul mark en brei hulle buite Suid-Afrika na lande soos Amerika uit, sê hy.

“As jy nog boer soos jou oupa dit gedoen het, is jy in groot moeilikheid en as jy boer soos jou pa, dan moet jy bekommerd raak. Die moderne boerdery is die mees dinamiese bedryf om tans in te wees en produsente moet anders oor moderne uitdagings in die bedryf begin dink,” het Croucamp gesê.

Volgens hom is die tipiese “historiese boere” besig om te verdwyn en uiteindelik sal net sowat 20 000 baie suksesvolle boere in Suid-Afrika oor wees.

“Megaboere stel vas hoe hulle hul boerderye so doeltreffend as moontlik kan bestuur en die melkprodusente in Suid-Afrika gee die toon aan in dié opsig. Onlangs is 22 ton per hektaar mielies in Suid-Afrika geoes. Oor tien jaar sal dit die norm wees.”

Namibië se mielieproduksie het vanjaar vanweë die droogte van nagenoeg 60 000 metrieke ton tot skaars 30 000 metrieke ton verminder. Hiervan is ongeveer 18 000 metrieke ton deur die regering se groenskemaprojekte geproduseer.

Bron: Die Republikein

Amerika kry welverdiende rugbyloesing

Suid-Afrika is met 16 punte bo-aan groep C van die Rugby Wêreldbekertoernooi wat in Brittanje gehou word.

Daarmee is die Bokke se plek in die kwarteindronde in Londen verseker.

Die Springbokke het Amerika Woensdag ‘n pakslae gegee van 64-0 en altesaam nege drieë gedruk, terwyl ‘n strafdrie ook toegeken is.

Die VSA se afrigter, Mike Tolkin, het 12 veranderinge aan sy beginspan aangebring, wat kennelik ‘n duur fout was.

Die belowende senter, Damian de Allende is as Speler van die Wedstryd aangewys nadat hy ‘n drie gedruk het.

Die veteraanspeler, Bryan Habana, het ‘n driekuns behaal, maar kon nie die rekord vir drieë in ‘n Wêreldbekerstryd van die All Black Jonah Lomu verbeter nie.

Die Springbokke sal in die volgende ronde teen Wallis of Australië te staan kom.

In sy laaste wedstryd het Georgië sy wedstryd teen Namibië naelskraap met 17-16 gewen.

Die Namibiërs se span het hoofsaaklik uit Afrikaners bestaan wat verbete verdedig het.

Jacques Burger, die Namibiese kaptein wat aan die voorpunt van die Namibiese fisieke aanslag was, is egter vroeg in wedstryd beseer en moes van die veld af.

Die span se Walliese afrigter Phil Davies het sewe veranderinge aangebring aan sy span. Die

Die hoop van die Namibiese span was die haker Torsten van Jaarsveld, een van die staatmakers met sy akkurate ingooiwerk.

Die Vrystaat Cheetahs se Curriebeker-kaptein het vanjaar se Superrugbyreeks as die haker met die meeste suksesvolle ingooie afgesluit.

Wittes verneder by SA Hoë-kommissariaat in Windhoek

Ná verskeie briewe en SMS’e van die publiek oor beweerde swak en stadige diens by die Suid-Afrikaanse hoë kommissariaat in Windhoek, het ’n Namibiese pa uit desperaatheid sy frustrasie onder die aandag van die openbare beskermer in daardie land, me. Thuli Madonsela, gebring.

Sy dogter [Die wit pa en dogter se name word weerhou om hulle nie aan enige intimidasie bloot te stel nie], het byna die hele derde kwartaal by haar skool in die Wes-Kaap misgeloop omdat sy vir ’n hernuwing van haar studiepermit moes wag.

Die aansoek is in Julie ingedien. Volgens die pa is herhaalde oproepe na die hoë kommissariaat gemaak om terugvoering te kry, maar is geen van die oproepe beantwoord nie.

Hy het vervolgens besluit om byna 1 000 kilometer na Windhoek te ry om self uit te vind waarom met die uitreik van die permit gesloer word.

Hy het net ná middagete by die hoë kommissariaat opgedaag, waar hy moes hoor die kantore is toe vir die publiek.

Die volgende dag was hy reeds om 09:00 by die kommissariaat, maar is ná ’n uur deur ’n “verergde” klerk ingelig dat studiepermitte slegs die dag daarna hanteer word en dat hy dan moes terugkeer.

Andersins kon hy vir ’n SMS wag om te hoor of die permit gereed was. Hy is voorts ingelig dat ’n proses gevolg moet word en dat dit agt weke sou duur voordat studiepermitte uitgereik word.

“Ek was verneder deur die behandeling wat ek van die klerk ontvang het en die feit dat sy slegs 30 sekondes aan my bestee het – dit ná al die opofferinge wat ek gemaak het,” het hy in sy brief aan Madonsela gesê.

Die pa het daarna tot sewe agente gekontak in ’n poging om die uitreiking van die studiepermit te verhaas. Dit was egter sonder sukses.

“Aangesien skoolvakansies so kort is, is dit nie prakties dat dit agt weke vat vir ’n studiepermit om uitgereik te word nie,” het die ontstoke pa gesê. “Wat is die eintlike boodskap wat Suid-Afrika vir ons probeer stuur? Wil hulle nie hê buitelanders moet daar studeer of ’n bydrae lewer nie?”

Hy het aan Madonsela geskryf dat die behandeling wat Namibiërs van die hoë kommissariaat ontvang, die reputasie van die Suid-Afrikaanse regering beskadig en ’n verleentheid veroorsaak.

Republikein is van bakboord na stuurboord gestuur om antwoorde by die hoë kommissariaat te kry. Dit is uiteindelik na me. Emma Ramokhele, die hoof van die konsulaat, verwys. Vrae en oproepe aan Ramokhele was teen saktyd nog nie beantwoord nie.

Bron: Republikein

Vryspraak in Namibiese hoogverraadverhoor

Regter Elton Hoff het Maandag sy uitspraak teen 65 beskuldigdes in die Caprivi-hoogverraadverhoor in Windhoek voltooi.

Altesaam 30 beskuldigdes is skuldig bevind op ŉ klag van hoogverraad, nege klagte van moord en 240 klagte van poging tot moord.

Die oorblywende 35 beskuldigdes is op al die klagte teen hulle onskuldig bevind. Drie van dié beskuldigdes is egter daaraan skuldig bevind dat hulle die Namibiese-grens wederregtelik oorgesteek het.

Die klagte hou verband met die afstigtingspoging van 2 Augustus 1999 waartydens die lugmagbasis by Mpacha, die spesiale veldmag van die polisie se kamp by Katounyana, Katima Mulilo se polisiekantoor, die Wenela-grenspos, die middedorp, kantore van die Namibiese Uitsaaikorporasie (NBC) en die huis van sersant Liswani Mabuku op Katima Mulilo geteiken is.

Namibië oorweeg tolhekke

Tolhekke sal die Namibiese padnetwerk in stand hou, het die Namibiese president, dr. Hage Geingob, verklaar, maar erken dat sy landgenote daarteen gekant is.

“Ek kan nie verstaan waarom Namibiërs teen tolhekke gekant is nie,” het die president bygevoeg tydens ‘n ontmoeting met sakelui.

Volgens hom is die Suid-Afrikaanse padinfrastruktuur, wat as een van die beste in Afrika geag word, juis aan tolhekke te danke, het die Republikein berig.

Die Suid-Afrikaanse padinfrastruktuur is egter deur ‘n wit regering geskep, lank voor tolhekke.

Volgens ’n bron in die ministerie van werke en vervoer is die voertuiggetalle in Namibië egter nie genoeg om tolhekdienste te regverdig nie.

Die swart sakegemeenskap meen voorts dat die regering nie genoeg grond gratis vir kommersiële en nywerheidsdoeleindes beskikbaar stel nie.

Beide Geingob en die Windhoekse burgemeester, mnr. Muesee Kazapua, het egter Shaanika se stelling verwerp en gesê grond is vir dié doeleindes beskikbaar gemaak.

“Die stelsel kan stadig wees, maar geen sektor is uitgelaat nie,” het Geingob gesê.

Hy het gesê grond is baie duur en die blaam op die sakegemeenskap geplaas. “Die oorsaak van hoë grondpryse is die middelman en dié middelman is niemand anders as die sakelui nie.”

Die Namibiese sakegemeenskap het aan die president gesê die skaarsheid van water in die hoofstad is nie net ’n bedreiging vir plaaslike sakelui nie, maar ook vir buitelandse beleggers.

Volgens Shaanika is hoë elektrisiteitstariewe ook een van die uitdagings wat hulle ervaar.

Die president gesê dit is ’n ope geheim dat Namibië deur klimaatverandering geraak word, maar die regering onderhandel tans om water van standhoudende riviere na die sentrale dele van die land te pomp.