Etiket: misdaad

Dawie Roodt in sy huis aangeval

Hoofekonoom van die Efficient Group en tv-aanbieder, Dawie Roodt, word in Pretoria-Oos-hospitaal se hoësorgeenheid behandel nadat hy en sy gesin Donderdagaand in sy huis aangeval en vasgebind is.

Roodt se kollega, Willem Basson, sê Roodt se dogter het gisteraand omstreeks 20:00 van aandklasse teruggekeer toe sy buite in haar motor deur vier gewapende swartes ingewag is.

Basson sê hulle het haar in die huis gedwing en almal vasgebind. Hulle was gewapen met ‘n pistool en messe. Die swart aanvallers het dit duidelik gemaak hulle soek geld.

Volgens Basson het Roodt egter kopgehou en aan die rowers gesê hy het geld in sy motor. Hy sê Roodt kon daarin slaag om sy hande los te wikkel, terwyl hy en twee rowers met messe na sy motor gestap het.

Roodt het onder meer ‘n kopwond opgedoen toe hy en die twee rowers baklei het nadat hy sy hande losgekry het.

Volgens Basson was Roodt by sy volle bewussyn vanoggend toe hy hom in die hospitaal besoek het.

‘Soos ‘n hond doodgeskiet’

’n Bekende inwoner van Grootfontein, mnr. Peter (Piet) Jakob (52), is Dinsdagaand op sy ma se kleinhoewe buite die dorp doodgeskiet.

“Hy is soos ’n hond doodgeskiet,” het ’n bekende sakeman van dié Noordedorp, mnr. Seeff Oosthuizen, gesê. Hy was een van die eerste mense op die toneel.

“Ek het omstreeks 17:24 ’n oproep van Brian Scott van Bank Windhoek oor die voorval gekry en ons het altwee na die plot gejaag en gelyktydig daar aangekom. Daar het ’n bloedkol by die hek in die veiligheidsheining gelê, so dit lyk of Piet daar geskiet is,” het Oosthuizen gister aan Republikein vertel.

“Die hek was oop en ons het ingestap en vir Piet op die grasperk voor die huis, sowat 15 treë van die heining, gekry. Hy het op sy maag gelê. Daar was ’n skietwond in sy agterkop en een aan sy regterblad.”

Oosthuizen sê Jakob se polsslag was toe al reeds baie swak en hy het vir Scott gevra om by hom te bly.

“Ek het in die huis ingegaan na Piet se ma toe. Sy het gesê Piet was met die werkers in dorp toe en toe sy bakkie buite stop, het sy skote gehoor en die honde hoor tjank,” vertel Oosthuizen.

“Sy het tydens die skietery die huis gesluit en met haar sekuriteitsflits wat ’n alarm het, groot lawaai gemaak. Sy het gesê sy het vier jong, onbekende mans by die hek sien uithardloop.”

Oosthuizen het met die swaargewonde Jakob hospitaal toe gejaag, maar hy was met sy aankoms dood verklaar.

Volgens Oosthuizen was daar goeie samewerking van die buurtwag en boere en selfs spoorsnyers is ingespan.

“Jaco van Dyk se helikopter is laat kom, maar dit was te laat, want die donker het ons gevang,” het Oosthuizen gesê.

Hy sê teen gister was een van die swart verdagtes by die weermagkamp vasgetrek.

Die woordvoerder van die polisie van die Otjozondjupastreek, adj.off. Maureen Mbeha, het gister die voorval bevestig en gesê dat die polisieondersoek steeds voortduur.

“Ek kan bevestig dat een van die verdagtes ondervra word en die polisie werk baie hard om die ander verdagtes aan te keer,” het Mbeha gister aan Republikein gesê.

“Een van die groot honde is doodgeskiet. Dit is ook nog nie vasgestel of enigiets gesteel is nie,” het sy gesê.

Die Jakobse het voorheen Bäckerei Jakob op Grootfontein besit waarvan Peter se pa, mnr. Fritz Jakob, die eienaar was. Sy pa het verlede jaar gesterf. Peter het by sy bejaarde ma, me. Gisela Jakob, op die plot naby die koeldrankfabriek op die pad na Rundu gebly.

Jakob was ’n verkoopsverteenwoordiger, maar volgens Oosthuizen wou hy in Februarie volgende jaar bedank om voltyds by sy ma op die plot te gaan bly om na haar om te sien.

Volgens sy niggie, me. Hildegard Brenner, het sy die skoknuus Dinsdag omstreeks 19:00 gekry. Sy het weer gesê twee van die groot honde is ook saam met Jakob doodgeskiet. Een van Jakob se broers, mnr. Günther Jakob, ook ’n bakker, is van Duitsland op pad.

Jakob was ongetroud en het geen kinders gehad nie. Hy word deur sy ma, drie broers en ’n suster oorleef.

Hy word deur Grootfonteiners as baie sagmoedig en vriendelik beskryf. “Hy was iemand wat niemand leed sou aandoen nie.”

PRASA-hoof lê klag van sameswering tot moord

‘n Klag van sameswering tot moord is by die Gautengse polisie gelê deur die voorsitter van die Passasierspooragentskap, Popo Molefe.

Die Gautengse polisie het bevestig dat die klag in Sandton gelê is.

Molefe is verantwoordelik vir die afdanking van PRASA se bestuurshoof, Lucky Montana en die skorsing van die hoofingenieur, Lucky Mthimkulu verlede week.

Die Openbare Beskermer, Thuli Madonsela sal na verwagting teen 3 Augustus ‘n verslag oor beweerde wanbestuur by PRASA bekendmaak.

Molefe beweer dat sy lewe bedreig word. Hy sê hy het notules van ‘n vergadering ontvang waarin sy veiligheid die onderwerp van bespreking was.

Molefe sê sedert die vergadering tree mense waar hy woon vreemd op.

Dit is nog nie duidelik wie die mense is wat by die sameswering betrokke is nie, maar die dreigement het glo van MK-kaders gekom.

Aanranding van plaasbestuurder by Winburg ondersoek

Die polisie in die Vrystaat ondersoek ‘n klag van gewone aanranding nadat ‘n plaasbestuurder gisteraand na bewering deur twee swart mans buite sy huis op ‘n plaas tussen Winburg en Virginia oorval en aangerand is.

Polisiewoordvoerder, Ian Gaobepe, sê Josef Mathetau se hande is glo vasgebind. Volgens Gaobepe word niks van die toneel vermis nie.

Hy sê Mathetau het glo ontsnap en hulp by ‘n buurman gaan soek, waarna die polisie ontbied is.

Luidens ‘n verklaring van Vrystaat Landbou is Mathetau met ‘n voorwerp teen die nek geslaan, waarna hy sy bewussyn verloor het.

Vrystaat Landbou sê Alf Bronner, eienaar van die plaas waar Mathetau al 25 jaar werk, is bekommerd oor sy werknemer se welstand en hy sal sy toestand monitor. Volgens Bronner het Mathetau sy bewussyn verloor nadat hy geslaan is.

Toe hy wakker word was die booswigte nog op die toneel.

‘n Swart driepootpot wat aan Mathetau behoort, is ‘n ent verder op ‘n oop vuur gekry met ‘n sak vleis langsaan.

Gaobepe sê niemand is nog in hegtenis geneem nie.

Die polisieondersoek duur voort.

Lindley-plaasmoordverdagtes steeds soek

Niemand is nog aangekeer vir die moord op ‘n bejaarde Lindley-boer, Hein Smith, die naweek nie.

Vrystaatse polisiewoordvoerder, Peter Kareli, sê hulle volg leidrade op en maak goeie vordering.

Polisiewoordvoerder, Annelie Wrensch, het vanoggend aan OFM-nuus gesê die 77-jarige Smith, van die plaas Rondekom, is gisteroggend omstreeks 10:00 sowat 800m van sy plaashuis gevind.

Volgens haar is hy vermoedelik Saterdagaand met sy terugkeer na die plaas aangeval. Hy het by vriende gaan kuier en die booswigte moes hom ingewag het.

Verdagtes verskyn volgende week ivm Vrede-plaasaanval

Twee swart verdagtes wat in hegtenis is vir die plaasaanval op ‘n bejaarde egpaar op hul plaas naby Vrede verlede naweek sal volgende Maandag weer in die plaaslike periodieke hof verskyn.

Volgens Vrystaatse polisiewoordvoerder, Peter Kareli sal Paul Mei Zulu (39) en Thabho Shadrac Motloung (31) dan formeel om borgtog aansoek doen.

Beide staar aanklagte van poging tot moord, huisbraak en gewapende roof in die gesig.

Intussen het familiewoordvoerder Ruan Combrink aan OFM-nuus gesê dat Johannes Kritzinger en sy vrou Rita se toestand steeds ernstig is.

‘Weldoener’ steel baba

‘n Swart vrou van Rustenburg sal na verwagting Woensdag in die plaaslike landdroshof verskyn nadat sy glo Maandag ‘n pasgebore baba by die Job Shimankane Tabane-hospitaal ontvoer het.

Noordwes polisiewoordvoerder, Paul Ramaloko, sê die polisie het die 19-jarige-vrou, wat haarself voorgedoen het as ‘n weldoener en aangebied het om die baba vas te hou en toe met kind verdwyn het, ure daarna in Sondela naby Boitekong in hegtenis geneem.

Hy sê die verdagte het geld aan die babadogtertjie se ma gegee om kos te koop, terwyl die ma en haar kind vir vervoer gewag het nadat hulle uit die hospitaal ontslaan is. Toe die 31-jarige ma terugkeer was hulle nie meer daar nie.

Die eenheid teen gesinsgeweld en seksuele misdrywe en vir kinderbeskerming ondersoek die voorval.

Vermeende plaasaanvaller is polisielid

Twee swartes, een ‘n lid van die Suid-Afrikaanse Polisiediens (SAPD), is in hegtenis geneem vir gewapende roof nadat ‘n boer, Peet Nortje, aangeval is op sy plaas Kareebosbult in Coligny, Noordwes, het die polisie Donderdag gesê.

Kolonel Sabata Mokgwabone het gesê vier swart mans het die eienaar met sy twee werknemers op Woensdagmiddag aangeval.

Hulle het die boer in die huis gedwing. Die verdagtes het die huis geplunder en die slagoffer erg aangerand, voordat hulle van die toneel gevlug het in ‘n wit Golf.

Die boer, 84, het daarin geslaag om te ontsnap en na die buurplaas te gaan waar hy hulp ontbied het.

Mokgwabone het gesê die twee is in hegtenis geneem op die N12-hoofweg Woensdag, na Coligny-polisie hul eweknieë in Klerksdorp en Potchefstroom gewaarsku het om op die uitkyk te wees vir ‘n wit Golf met vier swart insittendes.

Die motor is gestop en die twee is in hegtenis geneem. Die ander twee is nog op vrye voet.

“Een van die verdagtes is ‘n administratiewe klerk in diens van die SAPD. ‘n Interne dissiplinêre ondersoek sal ingestel word teen die werknemer,” het Mokgwabone gesê.

Nortje is wreed aangeval en sy vuurwapens is gesteel. Hy kon nog nie ondervra word deur die polisie nie, weens die aard van sy beserings. Hy is steeds in die hospitaal.

“Die polisie het begin soek na verdagtes in hul eie geledere nou. Hoe moet die publiek weet wie om te vertrou? Dit is besig om ‘n groter prioriteit vir gemeenskappe om hulself te beskerm, “Cameron het gesê nadat hy verneem het dat een van die mans in hegtenis geneem is in diens van die SAPD.

Mokgwabone gesê twee vuurwapens wat aan die boer behoort het, is in die SAPD-lid se huis gevind.

Die verdagtes sal aanstons in die hof verskyn.

Boere trek vermeende plaasaanvaller by Vrede vas

Die inhegtenisneming van ‘n 38-jarige swart verdagte in verband met die aanval op ‘n bejaarde egpaar op hul plaas by Vrede, kom na flinke optrede van die gemeenskap.

Die polisie het hulp van boere ontvang wat gelei het tot die inhegtenisneming Sondagaand op Vrede etlike ure nadat Johannes Kritzinger en sy vrou Rita vroeër die middag in hul huis op die plaas Brakdam deur twee mans oorval en geskiet is.

Plaaslike boere was vinnig op die toneel.

Die egpaar kon nog nie verklarings aflê nie.

Die twee swart aanvallers het omstreeks eenuur gistermiddag op die plaas aangekom. Volgens die polisie se voorlopige ondersoek het een van die aanvallers vroeër op die plaas gewerk.

Terwyl plaasmoorde en-aanvalle toeneem, weier die polisie om dié geweld teen blankes as priotriteitsmisdaad te verklaar.

Die egpaar word in die Netcare-Unie-hospitaal in Alberton vir skietwonde in die maag behandel. Johannes verkeer in ‘n kritieke toestand en sy vrou se toestand is ernstig.

Die verdagte sal na verwagting binnekort in die plaaslike landdroshof op ‘n aanklag van poging tot moord verskyn.

Die ander verdagte is nog op vrye voet.

Aanvalle op buitelanders ‘nie xenofobie’

Die polisie in KwaMashu noord van Durban ondersoek ‘n aanklag van kwaadwillige saakbeskadiging nadat ‘n houer wat aan ‘n Ethiopiër behoort, aan die brand gesteek is.

Terwyl aanvalle teen buitelanders steeds voortduur, het die medevoorsitter van die portefeuljekomitee in die parlement rakende xenofobiese geweld Vrydag gesê die aanvalle op buitelandse burgers vroeër vanjaar was nie as gevolg van xenofobie nie.

Soweto is ontwerp om verskillende taalgroepe in afsonderlike gebiede te hou, wat ‘n gevoel van etnisiteit geskep het, het News24 berig.

“Ons as ‘n komitee het tot die slotsom gekom dat hierdie aanvalle nie kbeskou kan word as xenofobies nie,” het Tekoetsile Motlashuping gesê by die Moroka-polisiekantoor in Soweto.

Hulle het die kwessie in diepte bespreek, en die betekenis van die woord xenofobie in ‘n woordeboek opgesoek.

“Die woordeboek sê dit is ‘n “uiterste” haat teen buitelanders. Suid-Afrikaners het nie uiterste haat nie, het hy gesê, en bygevoeg dat enigiemand wat vroeër vanjaar die geweld teen buitelanders beskryf het as xenofobies, is verkeerd.

“Ons is uit ballingskap,” het hy gesê aan die LP’s van die Nasionale Vergadering en die Nasionale Raad van Provinsies, wat hom op ‘n feitesending vergesel het.

Buitelandse burgers kom na Suid-Afrika vir baie redes, insluitend ekonomies, akademies, politieke probleme by die huis, en as gevolg van die politieke stabiliteit in Suid-Afrika.

Hy het gesê sommiges kom want daar is “baie hulpgeld”.

Hoewel die man in die houer nie beseer is in die jonsge aanval nie, gaan die ondersoek in KwaMashu voort.

Verlede jaar het buitelandse eienaars van winkels in die lokasie in en om Durban briewe gekry wat hulle aangesê het om op te hou om sake in die lokasie te doen.

Die briewe was van mense wat aangevoer het dat hulle plaaslike sakelui verteenwoordig.

Die polisie sê niemand is nog in verband met die voorval in hegtenis geneem nie, en die polisie ondersoek nog die saak.

Mooters neem hul park terug

Mooters, mense van die Moot, het Saterdag self ingespring om die Trimpark op te ruim en ongewenste elemente te verwyder, het Rekord Moot berig.

Clinten Sulter, lid van die Moot-gemeenskapsinisiatief (MootGi), sê inwoners en lede van Moot Sektor 2 GPF het die middag omstreeks 15:00 by die Trimpark bymekaargekom en aan die werk gespring.

“Een van die grootste probleme is dwelms in die Moot. As dit uit die weg geruim kan word, behoort misdaad ook te daal.”

Sulter sê die lede het ook profiele oor die sluipslapers geskep wat in die park bly en ‘n noukeurige oog sal in die toekoms gehou word oor hul doen en late by die Trimpark.

“Daar is baie onwettige stortings van afval en ons beoog om die skuldiges te betrap.”

Hy sê baie rommel, tekens van dwelmverkope en gesteelde koperkabels is in die park gevind.

“Die opruiming van die Trimpark was ‘n groot sukses en ons beplan gereelde opvolg-aksies,” sê Sulter.

Vermeende ontvoerder weer voor

‘n Vermeende swart misdadiger, Fannie Mathebula, wat aangekeer is nadat hy glo ‘n skoolkind in Glen buite Bloemfontein ontvoer het, verskyn na verwagting Maandag weer in die Bloemfonteinse landdroshof.

Mathebula het vroeër in die hof verskyn in verband met ‘n gesteelde motor.

Daar word beweer dat Mathebula op 10 Junie die skoolkind ‘n rygeleentheid skooltoe aangebied het. Hy het begin jaag en ‘n verkeersbeampte het tot die kind se redding gekom.

Mathebula word van ontvoering, roekelose bestuur en die beskadiging van staatseiendom aangekla. Hy bly in aanhouding.

Linden, Jhb: Nog ‘n verkragting deur swart SA polisieman

‘n Swart offisier van die Lindense polisiestasie in Johannesburg word daarvan beskuldig dat hy ‘n vrou in aanhouding verkrag het. Sersant Derick Phanyana word tans aangehou, terwyl sy borgaansoek in die Randburgse Landdroshof tot 7 Julie 2015 uitgestel is.

Die Onafhanklike Polisie-ondersoekdirektoraat het bevestig dat hulle ‘n saak van verkragting teen die 45-jarige polisieman ondersoek.

“Daar word beweer dat die 25-jarige vrou Saterdag vir bedrog in hegtenis geneem is. Rondom 2 voormiddag op 28 Junie 2015, het ‘n polisiebeampte na haar sel gegaan en haar verkrag. Die volgende oggend het die slagoffer daarin geslaag om aan een van die polisiebeamptes oor te dra dat sy verkrag is en sy is na die kliniek geneem vir medikasie en om ‘n saak van verkragting te open,” sê Grace Langa, die woordvoerder vir OPOD.

Intussen is ‘n ander swart polisieman van die Vosloorus-polisiestasie tot 33 jaar gevangenisstraf gevonnis vir verkragting, roof met verswarende omstandighede en ontvoering.

Die Palm Ridge-landdroshof het dié vonnis aan konstabel Lungile Majola opgelê.

“Daar word beweer dat ‘n 18-jarige meisie met haar kêrel op straat geloop het toe ‘n rooi VW Polo met twee insittendes stilgehou het. Hulle het ‘n vuurwapen op die slagoffers gerig.

Die kêrel het met die verdagtes baklei maar hulle het die oorhand gekry. Hulle het die vroulike voetganger in die motor gedwing en na ‘n veld gery waar sy verkrag is,” sê Langa.

Volgens Langa het dit tydens die ondersoek geblyk dat een van die oortreders konstabel Majola was.

 

Namibiese egpaar oorleef huisaanval

Mnr. Willem Burger (70) en sy vrou, Alta (70), is Vrydagoggend­ in hul huis op Lüderitz­ deur twee swartes aangeval en ernstig aangerand, het die Republikein berig.

Burger is die eienaar van die OK Grocer op die dorp. Dit was Vrydag sy beurt om die winkel oop te sluit. Hy het omstreeks 05:15 sy huis se motordeur­ oopgemaak toe twee swartes ingestorm het en hom met kieries begin slaan het totdat hy bewusteloos­ was.

“Volgens die dokter is my pa verder geslaan terwyl hy bewusteloos was,” het me. Hannelie de Lange gesê.

Burger het sy bewussyn herwin en vir Alta, wat nog in die bed was, geskree dat sy die rewolwer moet bring. Voordat sy egter kon opstaan, het een van die aanvallers haar ook met ’n kierie begin slaan.

“Terwyl een van die aanvallers vir tannie Alta deur die huis gesleep en vir haar gesê het wat sy alles moet inpak, het die ander een my pa na die kluis toe gevat en gesê hy moet dit oopmaak. Hoe meer my pa vir hom gesê het dat hy nie sonder sy bril kan sien nie, hoe meer het die man hom geslaan,” het De Lange gesê.

Volgens De Lange het die aanvallers gedreig om Alta te verkrag as hy nie die kluis opmaak nie. Hulle het ook ’n plastieksak aan die brand gesteek en gedreig om haar met die warm plastiek­ te brand. Burger het die kluis oopgekry­ en die mans het vuurwapens en kontant gevat.

Burger en sy vrou is in die badkamer vasgebind en die mans het op die vlug geslaan. Alta kon daarin slaag om los te kom. Sy het haar man losgemaak en na vriende se huis gehardloop en die polisie gebel.

“My pa het erge hoofbesering opgedoen­ en sy arm is geswel soos hy probeer keer het toe hulle hom met die kierie slaan. Hy is in erge pyn. Tannie Alta moet ’n spesialis gaan sien, omdat haar kakebeen vermoedelik­ gekraak of gebreek is. Hulle het albei kneusplekke­ oor hul lywe soos hulle geslaan is. Albei sal vir skanderings Windhoek toe moet gaan,” het De Lange gesê.

Volgens haar is die aanvallers dieselfd­e swartmans wat twee maande gelede ook probeer het om die egpaar aan te val.

“My pa het van die werk af huis toe gekom en twee mans met balaklawas in die oprit gesien ophardloop. Alta het vir hulle geskree ‘ons gaan julle vrek maak’, waarna die twee mans weggehardloop het.”

Die twee swartes het glo tydens Vrydag se aanval vir Burger en sy vrou gesê “julle het mos gesê julle gaan ons vrek maak, nou wys ons julle hoe maak ons júlle vrek”.

“My pa en tannie Alta is al twee 70. As jy hulle goed wil vat, vat dit dan. Wat kan die twee ou mense doen? Maar om hulle so aan te rand en te slaan, is onmenslik en verskriklik.”

De Lange het ’n beloning van N$20 000 uitgeloof vir enige inligting­ wat tot inhegtenisneming kan lei. Die polisie het reeds twee van die gesteelde­ vuurwapens teruggekry.

“Ons het volle vertroue in die polisie dat hulle die twee mans sal arresteer­. Lüderitz is oor die algemeen ’n baie rustige dorp en die gemeenskap staan almal saam, want ons soek nie sulke elemente in ons dorp nie,” het sy gesê.