Afrikaanse nuus Archives - Page 41 of 166

Nog dodelike malaria in Pretoria gediagnoseer

’n Vrou van Hartbeespoort is verlede maand uit die bloute met ‘n dodelike vorm van malaria gediagnoseer, het Rekord Noord berig.

Dokters het die 29-jarige Anneli Wydeman vir tien dae in ’n gekontroleerde koma gelaat om haar lewe te red.

Sy is op 12 Junie uit in die Netcare Montana-hospitaal ontslaan en is stadig besig om die pad na herstel te loop.

“Dit is onwerklik dat ek malaria opgedoen het. Ek was nêrens waar ek dit kon kry nie. Ek was wel ’n hele paar weke gelede net vir ’n naweek in Pilanesberg wat ’n malaria-vrye omgewing is. Dit spook by my.”

Wydeman is met Plasmodium falciparum gediagnoseer, wat volgens die Wêreld-gesondheidsorganisasie (WGO) die dodelikste van die vier soorte malaria is.

Sy sê sy het op 28 Mei ‘n hoë koors van 41°C gehad en het onmiddelik haar huisdokter besoek. Sy het aanvanklik vermoed sy het griep opgedoen, maar nie veel aandag daaraan gegee nie.

Hoewel die dokters bloedtoetse laat doen het, het niemand vir malaria getoets nie. “Dit is mos nou die laaste ding wat op ’n persoon se brein is – malaria.”

Sy sê op 30 Mei het haar man Wikus haar na die Montana-hospitaal vir verdere behandeling gebring.

“’n Dokter het my net daar en dan vir malaria gediagnoseer. Malaria kan ’n mens se dood veroorsaak as jy dit nie vroeg genoeg ontdek nie.”

Wydeman is die tweede slagoffer van malaria in die afgelope maand.

Reinhardt Myburgh (14 maande) is vroeër in Mei ook in die Netcare Montana-hospitaal opgeneem nadat hy met malaria gediagnoseer is.

Volgens WGO word malaria uitsluitlik deur die vroulike Anopheles muskiet oorgedra.

ER24 woordvoerder Chitra Botha sê malaria-simptome verskyn so ‘n week of twee nadat iemand besmet is. Dit sluit in koors, hoofpyn, kouekoors, gewrigspyn, duiseligheid en naarheid.

Vrystater enigste klimaatsafgevaardigde uit Afrika

Die Universiteit van die Vrystaat se Sentrum vir Ramprisikobestuur se direkteur, Andries Jordaan, was verlede week die enigste verteenwoordiger van Afrika op die Verenigde Nasies se spesialiskomitee by ‘n werksessie oor klimaatsweerbaarheid in Genève, Switserland.

Hy is deur die VN-sekretaris Ban Ki Moon, as deelenemer genooi.

In ‘n eksklusiewe onderhoud met OFM-nuus, het Jordaan gesê hul sentrum by die universiteit het ‘n sterk voetspoor in Afrika met hul studente wat van 17 Afrika-lande afkomstig is.

Jordaan het die laaste tien jaar baie werk in Afrika gedoen en voel geëerd dat hy deur die VN genooi is.

Jordaan se deelname aan die werksessie was ter voorbereiding van COP 21 wat later vanjaar in Parys plaasvind.

Hy sal dié kongres na alle waarskynlikheid bywoon.

Rooi Antjie Krog sê blankes ‘moet toilette in lokasies gaan skrop’

Die digteres Antjie Krog, wat in Engels skryf al is haar Engels baie vrot, het Saterdagaand in ‘n tirade teen Suid-Afrikaanse blankes uitgebars toe sy die Sunday Times-prys vir Engelse poësie ontvang het. Soos ‘n wafferse Rosa Luxemburg, die beroemde Duits-Joodse vrouekommunis van ‘n eeu gelede, het Krog voorgestel dat “blankes toilette in die lokasies moet gaan skrop, geboue moet oppas, onderwys gee en vraestelle merk”, alles sonder betaling as straf vir “apartheid en kolonialisme”.

Sy meen verder dat alle middelklaswoonbuurte vrylik deur plakkers beset behoort te word om van Suid-Afrika ‘n “roereier” te maak en sodoende die gevolge van “apartheid en kolonialisme” ongedaan te maak. “Bevryding bly onvoltooid as die apartheids- en koloniale stad nie geherorganiseer word nie…” het Krog gesê.

Vir ‘n tydperk van twee jaar moet eiendomswette opgeskort word sodat plakkers vrylik plase, voorstede en selfs parke kan beset en oor die ruimtes met eienaars kan “onderhandel”. Dit sal Krog se droom van ‘n “roereier”-Suid-Afrika bespoedig. Die twee jaar van revolusie wat aan Pol Pot se Kambodja of Mao se “kulturele revolusie” in Rooi China herinner, noem Krog die “Tydvak van Radikale Heropbou”. Tydens “Radikale Heropbou” moet “alle energie, hulpbronne, asook elke Suid-Afrikaner, gebruik word om massiewe strukturele verandering te bewerkstellig”. In die praktyk sou dit beteken dat inwoners op die klassieke kommunistiese manier van die twintigste eeu as “slawe van die revolusie” gratis dienste aan die staat en sy revolusionêre leierskap moet lewer.

Volgens Krog het blankes “drie eeue lank skade aan die land aangerig” waarvoor “niks ooit sal vergoed nie”. Sy meen dat dit nou “die tyd vir woede is” en dat swartes rede het om blankes te wil doodmaak. Daar moet meer begrip wees vir waarom swartes blankes doodmaak, verklaar sy. “Ek respekteer woede,” sê Krog. “Woede is dikwels waar belangrike verandering begin. Nie die woede van blinde vernietiging nie, maar die woede wat helderheid van rigting en deurdagte doelwitte bring. As iemand kwaad is en sê: ‘Ons moet die blankes doodmaak sodat…’ dan is dit tyd vir reële reaksies, soos: ‘hoe? of op grond van watter beginsel? of belangriker: en wat dan?’.”

Studente wat afstudeer of mense wat afgetree is, moet ook gratis “in hul geboortedorp of -stad gaan werk om tekorte of agterstande in die howe, hospitale, skole, administratiewe kantore, korrupsie-ondersoeke, kindersorg werk… Sonder salaris. Die dorp sal kos en slaapplek verskaf.”

In kommentaar op sosiale media, het dr. Dan Roodt van PRAAG gesê:

Dit wys jou net hoe die mees idiotiese verloopte Afrikaners deur “die media” tot openbare figure opgebou word, net om agterna in dié kwasi-kommunistiese retoriek te verval.

Weet sy ooit wat sy sê? Sy het nie ‘n benul van ekonomie, politiek, filosofie of enige ander ingewikkelde onderwerp nie. Sy skryf rympies oor “wit Afrikanermans met boepense” waaroor die linkse Engelse (en Beeld) gaande is.

Sy behoort ‘n voorbeeld te stel en al haar besittings en sommer die kopiereg op haar derderangse “digkuns” op te skort sodat die werkersklas dit gratis kan lees.

Kom nou, Antjie, wys vir ons hoe Rooi jy regtig is!

Die Rosa Luxemburg van Kroonstad.

Familie verlig na twee swaar gestraf word vir plaasmoord

Die familie van die boer van Noordwes wat tydens ‘n plaasaanval vermoor is, is verlig dat twee sy moordenaars gestraf is.

Nog drie swartes wat by die moord en roof betrokke was, is steeds op vrye voet.

Twee Zimbabwiese burgers, Samuel Mabena en Bismarck Dik, is in die hooggeregshof in Pretoria lewenslange tronkstraf opgelê vir die moord op Mauritz Oberholzer in 2012.

Die twee swart mans is vir moord veroordeel, en het ook ‘n bykomende vonnis van dertig jaar tronkstraf vir roof, diefstal en die besit van ‘n ongelisensieerde vuurwapen gekry.

Oberholzer se broer, Pieter sê dis ‘n gepaste vonnis en het sy verligting uitgespreek oor die swaar straf wat die moordenaars opgelê is.

Die twee swartes het die 65-jarige boer doodgeskiet en ook vuurwapens, ammunisie en juwele geroof.

Die familie van die vermoorde boer het hul regspan geloof vir hulle goeie werk.

Olimpiese atletieklegende oorlede

Die Bloemfonteinse atletieklegende en wenner van die hoogspringtitel vir vroue by die Olimpiese Spele in 1952 in Helsinki, Finland, Esther Brand is gister op die rype ouderdom van 92 jaar in Bloemfontein oorlede.

Brand is tot op hede die enigste Suid-Afrikaanse vroue-atleet wat ‘n goue medalje by ‘n Olimpiese Spele kon vermag. Sy het gewen met die destydse skêr-styl met ‘n hoogte van 1,67 meter.

Brand het tot ‘n paar jaar gelede gereeld diens gedoen as hoogspringbeampte by atletiekbyeenkomste.

Haar man, Jan Brand, het ook sy Springbokleure verwerf toe hy die land in fietsry by die 1948 Olimpiese Spele in Londen verteenwoordig het.

Bejaarde in oog en rug gesteek tydens plaasaanval

‘n Bejaarde man is Sondagoggend met ‘n skêr in sy oog en rug gesteek toe hy en sy vrou deur twee swart verdagtes op hul plaas in Noordwes aangeval is.

Johannes Haasbroek (73) en sy vrou het albei in hul plaashuis op die plaas Friedslard in Ganyesa geslaap toe die aanval gebeur het.

Noordwes polisiewoordvoerder, Kealeboga Molale, het gesê twee swart verdagtes het deur toegang tot die huis deur ‘n venster verkry. Die verdagtes het ‘n pistool en twee selfone gesteel voordat hulle op die vlug geslaan het.

Volgens Molale het die polisie die verdagtes se spoor gevolg tot by ‘n veepos in Cassel, waar hulle die mans, onderskeidelik 27 en 28 jaar oud, aangekeer het.

Die verdagtes sal na verwagting vandag in die Ganyesa-landdroshof verskyn.

Boer oorleef wrede plaasaanval

‘n Boer van die Paarl het ‘n wrede plaasaanval oorleef. Hy is aangeval toe hy op die erf ondersoek ingestel het.

Isak Kleinhans (49) het tydens ‘n inbraak Dinsdagaand ernstige beserings opgedoen nadat gewapende swartes ingebreek het op die plaas wat hy huur.

Sy verloofde en hyself is op die bed vasgebind en die aanvallers het hom met ’n metaalpyp geslaan. Hulle was met ’n panga en koevoet gewapen.

Die aanvallers het hulself uit die voete gemaak met gesteelde items waaronder ook Kleinhans se bankkaart en PIN-nommer.

Kleinhans is Woensdagaand uit die hospitaal ontslaan. Hy het beserings aan sy kop, rug en arms opgedoen.

Die polisie het bevestig ’n saak van huisbraak word ondersoek. Niemand is nog in hegtenis geneem nie.

Pukke-raad sit glo oor rektor se termyn

Nuwe verwikkelinge rondom die termyn van die rektor van Noordwes-Universiteit (NWU) se Potchefstroom-kampus, Herman van Schalkwyk, is vandag na verwagting op ‘n raadsvergadering in Potchefstroom ter sprake.

Voorsitter van die raad, Johan Kruger, sê hy wil hom nie uitlaat oor wat bespreek gaan word nie.

Dit kom nadat die NWU-raad in Maart bekendgemaak het dat Van Schalkwyk se termyn as rektor van dié kampus op 31 Januarie 2016 sal verstryk.

Die raad het aangevoer die besluit is gemaak om die aangevraagde eksterne regsadvies wat aan hom voorgelê is, te aanvaar. Enige moontlike poging deur die raad om Van Schalkwyk se termyn te verleng sou onwettig wees.

Kruger sê geen finale besluite oor die NWU se vise-kanselier, Dan Kgwadi, en sy bestuurslui se strategiehersieningsproses en die moontlike verandering van die bestaande bestuursmodel gaan vandag geneem word nie.

Die raad het in Maart aanbeveel dat ‘n behoorlike ontleding deur die bestuur vandag oor die bestaande bestuursmodel se uitdagings asook die voorgestelde modelle self, gegee moet word.

Lesufi besoek wit boelies

Die Gautengse Departement van Onderwys het skriftelik geantwoord op ’n navraag deur OFM-nuus en bevestig dat die hoof van die Krugerlaan Hoërskool in Vereeniging met die ouers van ’n boelie-slagoffer vergader het.

Die Gautengse LUR vir Onderwys Panyaza Lesufi het vandag die skool, die ouers van beide wit seuns en die skool se bestuurspan ontmoet.

Dit volg nadat ’n video Vrydag op Youtube geplaas is wat wys hoe ’n wit seun deur ’n mede-leerling geboelie word, terwyl ‘n wit onderwyser niks doen om die voorval te keer nie.

Departementele woordvoerder Phumla Sekhonyane sê die departement wag steeds vir ‘n verslag van die skool. Lesufi het sy teleurstelling met wat by die skool gebeur het uitgespreek. Hy het verder sy departement opdrag gegee om die toesig van leerders by die skool te ondersoek.

Intussen het die voorsitter van die Federasie van Beheerliggame van Suid-Afrikaanse Skole (FEDSAS), Paul Colditz, gesê die video is skokkend.

Kovsie-taalbeleid draai in wetgewer

Die taalbeleid van die Universiteit van die Vrystaat het Woensdag vir die tweede keer ‘n draai in die Vrystaatse provinsiale wetgewer gemaak.

Dit volg nadat ANC hoofsweep Neels van Rooyen die UV tydens ‘n vorige sitting geloof het vir sy strewe na transformasie en verwys het na die instansie se taalbeleid.

Tydens vandag se sitting het die Vryheidsfront Plus se Wouter Wessels gesê transformasie behels nie die uitsluiting van Afrikaans as ‘n onderrig-medium nie.

Vrystaatse Onderwys LUR Tate Makgoe het egter terruggekap en gesê Wouter moet nie die publiek mislei nie. Hy sê die UV was oorspronklik ‘n enkelmedium-skool en dit het later verander as gevolg van sy studenteprofiel, maar die jongste aanduidings is dat dié profiel weer verander het, met 75% van studente wat swart en Engelssprekend is.

Die DA het in hul afwesigheid geskitter.

Makgoe, ook ‘n lid van die universiteitsraad, sê die universiteit gaan in elk geval ‘n proses volg – wat ‘n jaar gaan neem – waartydens verskeie rolspelers geraadpleeg gaan word voordat die taalbeleid van die UV verander kan word.