Kategorie: Suider-Afrika

Suid-Afrikaanse nuus, d.w.s. sowel nuus uit Suid-Afrika én Suider-Afrika.

ANC-raadslid slaan dood neer toe DA Johannesburg oorneem

‘n ANC-raadslid in Johannesburg, Nonhlanhla Mthembu, het tydens die stemming om ‘n nuwe burgemeester aan te wys, ineengesyg en gesterf, blykbaar aan ‘n hartaanval. Hierna is die aanwysing van die burgemeester en die hoofsweep van die stad gekombineer (foto hier bo), en is Herman Mashaba en Kevin Wax onderskeidelik as eerste burger en hoofsweep aangewys. Beide Mashaba en Wax is van die DA, wat die ondersteuning van die EFF tydens die stemmery geniet het.

Mashaba het egter dadelik belowe om nóg meer fondse op die stad se nie-betalende swart inwoners te bestee deur te verklaar dat hy “die waardigheid van inwoners gaan herstel deur werk te skep en dienslewering te verbeter, veral in lokasies soos Alexandra”.

Mashaba het insgelyks belowe om korrupsie in Johannesburg hok te slaan, ‘n stad waar omkopery en ‘n geknoei rondom tenders algemeen is. Mashaba het gisteraand net voor sy verkiesing as burgemeester gesê:

“Van vanaand af word korrupsie tot openbare vyand nommer een verklaar. Ek verbind my en lê ‘n belofte af dat ons sal omsien na openbare geld wat misbruik is, en dit sal gebruik om waardigheid aan mense te verskaf. Ons gaan ‘n regering bedryf wat na u geld sal kyk.”

Oor dienslewering het hy gesê: “Mense sonder toilette wat verwag om in ‘n stad te woon wat wêreldklas is, is nie regverdig nie. Ons wil hê dat Johannesburg daardie voortreflike stad moet wees waarin mense sal wil woon.”

Mashaba is met 144 stemme teenoor die 125 van Parks Tau, die ANC se uitgaande burgemeester, verkies. Die hoofsweep sal Kevin Wax wees en die speaker Vasco da Gama, al drie van die DA.

Da Gama se naam het al vir heelwat gekorswel op sosiale media gesorg, aangesien dit dieselfde as dié van die beroemde Portugese seevaarder is.

Uit eerbied vir die ontslape Mthembu, het Mashaba besluit om nie gisteraand ‘n lang toespraak te lewer nie en dit eerder uit te stel na 13 September, wanneer hy sy inhuldigingstoespraak sal lewer.

EFF-lede op die openbare galery het voortdurend gesing om die DA se kandidate te ondersteun. Telkens as ‘n ANC-raadslid se naam uitgeroep is, het hulle geboe.

Amptenare van die Onafhanklike Verkiesingskommissie het die raadslede bygestaan om die verkiesings vir die drie posisies te hou.

Enkele kere het chaos gedreig sodat die stadsbestuurder Trevor Fowler sy hande vol gehad het om die ondersteuners van die EFF en ANC op die openbare galery te beheer. Tydens die stemmery vir die speaker, het verskeie raadslede hul stembriewe aan die publiek getoon alvorens hulle in die stembus geplaas is. Van die party-amptenare het hierteen beswaar gemaak. Die OVK het beslis dat die stemmery in die geheim moes plaasvind en dat, indien dit weer sou gebeur, die stemmery oorgedoen sou moes word.

Toe die ANC-lid wat voorheen daarvan beskuldig is dat hy EFF-raadslede wou omkoop om vir die ANC te stem, Dan Bovu, se naam aangekondig is, het die skare hom uitgejou. EFF-ondersteuners het hom as ‘n “gesoekte misdadiger” beskryf.

Staats- mediese fonds feitlik bankrot

Die Staatswerknemers- mediese fonds kan teen die einde van die jaar heeltemal insolvent wees indien drastiese stappe nie geneem word nie.

Dit sou beteken dat die tesourie die fonds te hulp sou moes snel of andersins dat die fonds saamgesmelt word met ‘n ander, sterker fonds. Alternatiewelik sal die voordele van die fonds se 1,8 miljoen lede drasties verminder moet word of ledegeld sal met ten minste 15% moet styg – twee keer die inflasiekoers.

Een van die redes waarom die fonds in die moeilikheid is, is omdat nuwe lede aansluit, net om daarna groot hospitaalkostes aan te gaan. Van die 5000 nuwe lede wat onlangs by die fonds aangesluit het, het 70% in die hospitaal beland, iets wat baie hoër as die gemiddeld vir ander fondse is.

Guni Goolab, die uitvoerende beampte van die skema sê: “Oor die afgelope ses maande het ons ‘n beduidende toename in eise gesien. Ons het vanjaar ‘n afname in ons reserwe gesien, maar dit word bestuur.”

Mediese fondse moet egter oor ‘n reserwe van ten minste 25% van jaarlikse eise beskik, terwyl verskeie bronne in die mediesefondsbedryf meen dat die staats-mediese fonds se reserwe tussen slegs 5% en 6% mag wees, ongeveer 20% onder die verpligte vlak. Dokumente wat aan die media gelek is, voorspel dat die skema se tekort vir die jaar tot R1,2 miljard kan styg, wat sou beteken dat sy reserwe teen Februarie 2017 op 2% te staan sou kom. Teen daardie tyd sou die skema insolvent wees en nie meer in staat om al sy verpligtinge na te kom nie.

Die Suid-Afrikaanse regering is ietwat teleurgesteld aangesien die staats- mediese fonds as ‘n proeflopie vir sy voorgenome nasionale gesondheidskema gesien word.

Maar dit is ook ‘n aanklag teen die Raad op mediese fondse wat lankal moes ingegryp het om die fonds binne statutêre riglyne te hou. Daar is nou planne om die reserwevlak van 25% te verminder ten einde “groot fondse” tegemoet te kom.

 

Caster se turf kan eersdaags sit

Die manlike vroue-atleet, Caster Semenya, het ‘n goue medalje in die 800-meterwedloop vir vroue by die Olimpiese Spele in Rio de Janeiro gewen, maar nie almal is gelukkig met haar oorwinning nie.

Die kwellinge is geopper na ‘n aankondiging deur die president van die Internasionale Vereniging van Atletiekfederasies, Sebastian Coe, dat die IAAF wéér die internasionale hof vir arbitrasie in sport gaan nader.

Die hof het vroeër beslis dat vroue-atlete nie onderwerp mag word aan ‘n reël wat ‘n beperking stel op die hoeveelheid testosteroon wat natuurlik voorkom nie.

Vroue wat bo ‘n testosteroondrempel van 10 nanomoles per liter toets sal moontlik belet word om mee te ding, en sal waarskynlik “vernederende en potensieel riskante maatreëls” in die gesig staar as hulle besluit om deel te neem indien die testosteroonbeleid heringestel word.

In 2015, het die Hof van Arbitrasie vir Sport die beleid vir twee jaar opgeskort.

Die Verenigde Nasies se uitvoerende hoof vir vroue, Phumzile Mlambo-Ngcuka, het Suid-Afrikaners gevra om voort te gaan om Semenya te ondersteun.

Veiligheid moes voor haar deelname opgeskerp word. Verskeie media-instansies berig dat Olimpiese amptenare bekommerd was oor Semenya se verskyning en dat dit tot onluste deur ondersteuners van mededingers sou kon lei en in fisieke geweld sou kon ontaard.

Behalwe dat Semenya onderhoude met die media geweier het, is die media deur die Olimpiese komitee verbied om met haar te praat.

Alhoewel Caster deur Media24 vir ‘n voorblad van YOU as ‘n vrou opgetooi is, is sy intussen met ‘n vrou getroud, te wete Violet Ledile Raseboya (foto van die twee hier bo).

Die president van die Internasionale Olimpiese Komitee, Thomas Bach, het Brasilië geloof vir sy aanbieding van die Olimpiese Spele en sê dit is “puik” gedoen.

Bach het by die afsluitingseremonie van die 31ste Olimpiese Spele in die Maracana stadion in Rio de Janeiro gepraat.

Die Spele het 16 dae geduur en meer as 11 000 atlete van 206 lande en ‘n vlugtelingespan het daaraan deelgeneem.

Suid-Afrika het tien medaljes verower. Japan is die gasheer vir die volgende Olimpiese Spele in 2020.

DA-raadlid se moord: Valke arresteer gou-gou verdagte

Die Valke het binne enkele dae ‘n verdagte vasgetrek wat glo gekoppel kan word aan die moord op ‘n DA-raadslid.

Hy sal na verwagting vandag in die Postmasburg-landdroshof verskyn in verband met die moord op Johannes Baaitjies in die Noord-Kaap verlede Woensdag.

‘n Woordvoerder van die Valke, Hangwani Mulaudzi, sê ‘n 29-jarige man is in hegtenis geneem by ‘n huis in Postmasburg Vrydagmiddag.

Die verdagte staan ​​tereg op aanklagte van moord en poging tot moord nadat ‘n Daniëlskuil-raadslid in die Mgcawu Distriksmunisipaliteit, verskeie kere geskiet is.

Baaitjies se liggaam is gevind langs ‘n pad tussen Daniëlskuil en Postmasburg. Mulaudzi sê die Valke is “tevrede met die tydsverloop” van die ondersoek.

Hy sê die land moet trots wees op die kaliber van ondersoekbeamptes in die land. “In die meeste van hierdie gevalle het ons ‘n 100% suksessyfer en al ons gevalle [Valke] word ons [sake] nooit deur die hof uitgegooi nie.”

Mulaudzi sê ‘n voorlopige ondersoek het aan die lig gebring dat die 49-jarige oorledene niksvermoedend na sy dood gelok is. Baaitjies en ‘n sakevennoot was saam ten tyde van sy dood.

Die beseerde mede is steeds in ‘n kritieke toestand in ‘n plaaslike hospitaal.

ANC probeer EFF-lede glo omkoop om in Johannesburg vir hom te stem

Die EFF het oor die naweek in ‘n verklaring beweer dat lede van dié radikale afromarxistiese party tot R500 000 per stem aangebied is om vir die ANC se kandidaat in Johannesburg te stem as die burgemeester vandag aangewys word. Die omkoopgeld sou blykbaar in kontant betaal word.

Maar die EFF gaan nou ‘n strafregtelike klag van omkopery en korrupsie teen die ANC lê, volgens die party se woordvoorder Mbuyiseni Ndlozi.

“Die EFF in Johannesburg gaan ‘n saak van omkopery teen die ANC se Dan Bovu aanhangig maak wat meen dat ons demokrasie te koop is. Die ANC in Johannesburg moet weet dat geen mate van omkopery hom ooit met die mense gaan versoen wat hom in ‘n verkiesing verwerp het nie. Die ANC moet erken dat hy verslaan is en nie poog om verkiesings deur korrupsie te wen nie,” sê Ndlozi.

“Selfs al sou die ANC Maandag daarin slaag om ‘n raadslid te koop, sal die burgemeester nie hou nie want politieke partye beskik oor die reg om raadslede te vervang. Ons sal daarom so maak en verseker dat die ANC in Johannesburg uit die mag gestel word.”

Partye in Johannesburg gaan heel waarskynlik vandag tydens die eerste sitting van die nuwe stadsraad ‘n burgemeester en speaker aangwys. Tydens die plaaslike verkiesing op 3 Augustus kon die ANC nie daarin slaag om ‘n algehele meerderheid in die land se grootste en rykste stad te behaal nie. Die Johannesburgse metro sal heel moontlik deur ‘n koalisie tussen die DA en die EFF oorgeneem word, soortgelyk aan wat Vrydag in die hoofstad, Pretoria, gebeur het.

Die telling van nuwe raadslede is soos volg: ANC: 121; DA: 104; EFF: 30. Dit plaas die EFF in die gunstige posisie dat hy kan bepaal watter van die twee groter partye gaan regeer. Die res van die 270 setels in die Johannesburgse raad is deur kleiner partye ingepalm.

Gister het die ANC se kandidaat en huidige burgemeester, Parks Tau, gesê dat hy nie langer burgemeester mag wees nie, maar dat sy party gereed staan om die rol van opposisie in die stadsraad te speel. Volgens hom word daar steeds ter elfder ure samesprekings oor koalisies gevoer en sal die uitslag vandag eers onthul word.

Kasrils en MK-veteraan pak mekaar oor wie die regte terroris is

‘n Skadevergoedingseis vir R1 miljoen is deur die voormalige minister van intelligensie Ronnie Kasrils (foto bo) teen die adjunkminister van Verdediging, Kebby Maphatsoe in die Gauteng Hooggeregshof, Pretoria, gebring.

Dit is nou openlike ‘n geveg tussen ‘n voormalige terreurbevelvoerder van MK, Kasrils en die hoof van MK se Militêre Veterane Vereniging (MKMVA), Mathapsoe.

Kasrils eis R500 000 omdat hy beweer dat Maphatsoe hom beskuldig daarvan dat hy die dryfveer agter die klagtes van verkragting teen Zuma is, en ene “Khwezi” daarvoor aangewend het.

Hy eis ‘n verdere R500 000 omdat hy beweer Maphatsoe hom as ‘n “sell-out” voorgehou het, ‘n teenrevolusionêr en ‘n vyand van die nasie.

Volgens hofstukke is Maphatsoe in die media aangehaal in 2014 waar hy gesê het dat “toe hy [Kasrils] minister van intelligensie was, het hy die meeste van die kaders van MK ontslaan omdat hy ons intelligensie wou verkoop aan die imperialiste tydens ons rekonstruksie”.

“Dit was duidelik van die begin af dat Uncle Ronnie nooit met ons was nie, en dat hy die vyand van ons revolusie was.”

Dit is ook in die dagvaarding vervat dat ‘n verklaring gemaak is wat suggereer dat Kasrils agter die klaer in die verkragtingsaak 10 jaar gelede gesit het.

“Khwezi” moes die land verlaat nadat haar bande met Kasrils aan die lig gekom het en Zuma is later vrygespreek.

Die stellings is volgens die dagvaarding gemaak met die bedoeling om Kasrils te belaster en sy reputasie aan te tas.

In Januarie verlede jaar Kasrils het gesê dat hy aangedring het op ‘n openbare verskoning van Maphatsoe, sowel as ‘n regstelling van die feite, maar Maphatsoe het geweier om dit te doen.

Kasrils sal bygestaan ​​word deur adv Dali Mpofu.

Suid-Soedan se rebelleleier in SA?

Suid-Soedan se voormalige rebelleleier en visepresident, Riek Machar, het die land verlaat ná die gewelddadige botsings verlede maand en is nou in ’n “veilige” land in die streek.

In ’n verklaring deur Mabior Garang de Mabior, ’n woordvoerder vir Machar se SPLM-IO party, word nie gespesifiseer in watter land Machar hom bevind nie.

Maar gerugte wil dit hê dat hy in Suid-Afrika is en nie na Ethiopië sal reis nie.

‘n Burgeroorlog het in Desember 2013 in Suid-Soedan uitgebreek toe pres. Salva Kiir sy adjunk, Machar, daarvan beskuldig het dat hy ’n staatsgreep beplan.

Die gevegte het die land langs etniese lyne verdeel en tot op die rand van totale ineenstorting gedryf.

’n Vredesooreenkoms tussen die regering en rebelle byna ’n jaar gelede, kon nie daarin slaag om ’n einde aan die konflik te maak nie.

Die Verenigde Nasies het Woensdag ’n ondersoek gelas na ’n aanval op ’n hotel in Suid-Soedan waar soldate vrouens verkrag en noodlenigingwerkers aangerand het, terwyl VN-vredebewaarders oënskynlik niks gedoen het om dit te stuit nie.

Die Verenigde Nasies (VN) het bevestig dat Machar in die Demokratiese Republiek van die Kongo (DRK) aangekom het, maar wou nie sy ligging onthul nie.

Dit kom ook te midde van berigte dat die leier van die opposisie ná ‘n mislukte sluipmoordaanval deur magte lojaal aan president Salva Kiir saam met sy vrou en ‘n konvooi van sowat 60 gewapende mans moes vlug.

Krotoa, die feminis

Die minister van verdediging, Nosiviwe Mapisa-Nqakula, sal vandag ‘n monument by die Kasteel in Kaapstad onthul wat die lewe van die Khoi-vrou Krotoa uitbeeld.

Die minister het in ‘n verklaring in geradbraakte Engels gesê Krotoa “het ‘n ingesteldheid vir tale gedemonstreer ” en “word beskou as een van die hoofargitekte van die Afrikaanse taal”.

Sy is ook as ‘n “feminis” beskryf deur Max du Preez, wat klaarblyklik weer nie kon nalaat om die “spirituele begrafnis” tot die absurde te verhef nie.

Krotoa is later getroud met ‘n Deense dokter “in wat die eerste amptelike gemengderashuwelik in SA was”, maar het later die guns van die Nederlandse “Groot baases” (sic) verloor het en is weens haar drankmisbruik na Robbeneiland verban.

Die feit dat Krotoa ‘n alkoholis was, word egter verswyg.

Die dokter Peter Havgard, wat die Nederlanders Pieter van Meerhof genoem het, is met die Strandlopertolk getroud nadat sy eers gedoop is. Sy was daarna as Eva van Meerhof bekend.

Krotoa het van tienjarige ouderdom as huiswerker in die huishouding van Jan en Maria van Riebeeck gewerk, en haar later as tolk tussen Nederlandse setlaars en die Khoi-stamme aan die Kaap gevestig.

Die departement sal ‘n simboliese seremonie hou ter ere van Krotoa wie se oorskot aanvanklik by die Kasteel begrawe is, maar later op die terrein van die Groote Kerk in Kaapstad herbegrawe is.

Krotoa was lid van die Strandlopers, die Goringhaiconastam en die niggie van Autshumato, oftewel Harry die Strandloper, ook ‘n Khoi-tolk. Eva was dus goed met die Europese manier van doen bekend.

Haar dogter, Pieternella van die Kaap, se lewe is deur die skrywer Daleen Matthee verewig. In Eilande deur Dan Sleigh, is haar moeder en haar eie lewe ook weergegee.

Pieternella en Salamon, twee jongste kinders uit haar huwelik met Meerhof, is in 1677 na Mauritius.

Pieternella is later getroud Daniel Zaaijman, ‘n VOC-groenteboer van Vlissingen. Hulle het vier seuns en vier dogters gehad. Die gesin het weer later terug na die Kaap verhuis.

Hulle kleindogter, Engela Catharina Zaaijman is getroud met Abraham Peltzer, seun van Abraham Peltzer, ‘n VOC-soldaat van Hamburg, Duitsland en Elizabeth van den Berg.

Mangaung-metro moet weer stem vir burgemeester en speaker

Die eerste amptelike vergadering van die nuwe Mangaung-metroraad moes Donderdagoggend vir ure vertraag word toe die verkiesingsproses vir die uitvoerende burgemeester en die speaker verkeerd uitgevoer is.

Die vergadering was reeds in ‘n gevorderde stadium en die burgemeester, Olly Mlamleli, en speaker, Mxolisi Siyonzana, het reeds hul toesprake gelewer, toe DA-raadslid, Dulandi Leech, alles tot stilstand laat kom het.

Leech het op ‘n punt van orde opgestaan en uit die Wet op Munisipale Strukture aangehaal.

Sy het gesê die verkiesing van die speaker en die burgemeester is onwettig, want volgens die wet moet dit met ‘n geslote stembrief geskied.

Siyonzana moes onmiddellik sy posisie opgee en die Onafhanklike Verkiesingskommissie is ingeroep om die verkiesing van voor af te doen.

Die vergadering is met ure vertraag, maar die uitslag sal waarskynlik nie verander nie.

Die EFF werk nou saam met die DA om beheer van sekere metro’s by die ANC oor te neem. Julius Malema, EFF-leier sê die doel is om van die ANC ontslae te raak.

Die DA se burgemeesterskandidaat vir Tshwane, Solly Msimanga sal na verwagting die nuwe burgemeester van die metroraad word.

Die stad sal Vrydag sy eerste raadsvergadering hou.

Die EFF het onderneem om vir die DA te stem wat in koalisie met die kleiner partye getree het.

Die uittredende burgemeester, Kgosientsho Ramokgopha van die ANC meen dat sy party se aanwysing van ‘n Zoeloe die ANC stemme gekos het. Die ANC se keuse van Thoko Didiza het tot wydverspreide onluste gelei voor die verkiesing.

Hy sê die stempersentasie was so laag dat dit die ANC se posisie verswak het.

Die EFF-leier sê sy party sal vir die DA se burgemeesterskandidaat in Johannesburg, Herman Mashaba stem.

Mashaba het Donderdag aangebied om afstand te doen van die pos, nadat die EFF hul bedenkinge oor sy kandidaatskap uitgespreek het. Malema het gesê Mashaba haat homself en respekteer nie arm mense nie.

Leeu verskeur kind op wildplaas

Die polisie in Parys ondersoek ‘n saak van strafbare manslag nadat ‘n 12-jarige seun verskeur is deur leeus by die Otavi-wildplaas buite Parys.

Daar word beweer dat die oorledene, Nkalamelo Latha, een van die plaaswerkers om die plaas vergesel het.

Die werker het in die leeukamp ingegaan saam met Nkalamelo. Die leeus het glo ontsnap uit hul voedingsarea en die plaaswerker en die swart kind aangeval.

Die plaaswerker het daarin geslaag om te ontsnap sonder beserings maar Nkananelo was nie so gelukkig nie. Hy het aan sy wonde beswyk.

Volgens die polisie was Nkananelo ‘n weeskind wat by sy suster en haar man gewoon het, ‘n toesighouer by Otavi.

Die plaasbestuurder, Ina Human, sê ‘n man in sy 30’s, wat in hul diens was vir die afgelope ses maande het die sleutel tot die hok gesteel en toegang verkry. Sy sê hulle is hartseer oor die voorval.

“Die polisie sê dit is verskriklik nalatig van hom om ‘n kind in ‘n leeukamp te neem. Ons maak altyd seker dat die hok ten alle tye gesluit is. Niemand kan die hok ingaan nie… Ons maak seker dat dit altyd toegesluit is, altyd. Dat die vereiste veiligheidsmaatreëls in plek is. Ek kan nie verstaan ​​waarom hierdie man besluit het om die sleutels te steel om by die hok in te gaan nie,” sê Human.

Die ondersoek duur voort.

DA-raadslid doodgeskiet

Nog niemand is in hegtenis geneem na die moord op ‘n DA-raadslid van Daniëlskuil in die Noordkaap nie.

Johannes Baadjies, wat Donderdag ingesweer sou word as raadslid van die Kgatelopele Plaaslike Munisipaliteit, is doodgeskiet, in wat vermoedelik ‘n politieke sluipmoord was.

Die DA-leier in die Noord-Kaap Andrew Louw (foto bo), sê Baadjies se vrou het onraad vermoed toe sy Woensdagaand tevergeefs op sy tuiskoms gewag het. Hy die huis Woensdag omstreeks 18:00 verlaat.

Louw het die ANC van die moord beskuldig en gesê Baadjies het doodsdreigemente ontvang. Hy het sy medelye met die familie uitgespreek.

“Ons innige meegevoel en simpatie met sy familie, spesifiek sy vrou en kinders. Hy was ‘n man van inbors en ‘n man met integriteit. Hy was iemand wat baie hoë respek in sy gemeenskap geniet het, soveel so dat hy dan ook in die onlangse plaaslike munisipale verkiesing ‘n merkwaardige oorwinning in Wyk 2 behaal het,” het Louw gesê.

Polisiewoordvoerder, Mariam Mochologi-Maleeme, sê Baadjies se lyk, met skietwonde, is Donderdagoggend omstreeks 06:45 naby Postmasburg deur ‘n verbyganger gevind.

Sy sê ‘n tweede slagoffer is in ‘n kritieke toestand na ‘n hospitaal in Kimberley gehaas.

“In hierdie stadium kan ons nie kommentaar lewer oor bewerings dat dit ‘n politiek-gedrewe moord was nie. Niemand is seker wat gebeur het nie,” sê Mochologi-Maleeme.

DA werk saam met EFF wat eis dat Stem, eiendomsregte waai

Die EFF het Woensdag ‘n aantal eise gestel aan die ANC en die DA vir nouer samewerking. Dit blyk dat Julius Malema en Mmusi Maimane (foto bo) gemene grond gevind het.

Malema se party eis onder meer die uitgooi van Die Stem uit die Nasionale Volkslied, grondgryp sonder vergoeding, nasionalisering van banke en myne, asook die verwydering van Jacob Zuma as president.

Die leier van die EFF, Julius Malema, sê Die Stem is ‘n oorblyfsel van apartheid Suid-Afrika en hoort nie daar as deel van die Nasionale Volkslied nie.

Desnieteenstaande sê die DA hulle sal graag saamwerk met die EFF.

Die DA het intussen omonwonde verklaar dat geen gesprek met die ANC oorweeg word oor koalisies in bestrede munisipaliteite nie, maar Donderdagoggend in Sandton aangekondig dat hy ooreenkomste met verskeie opposisiepartye bereik het, waaronder die EFF.

Die EFF het Dinsdag by hul perskonferensie in Alexandra, by monde van Julius Malema bevestig dat een van die voorwaardes aan die DA was dat Die Stem uit die volkslied verwyder moet word.

Malema het gesê dat Maimane het saamgestem dat die sing van die Die Stem “soortgelyk is aan Jode wat volksliedere oor Hitler sing”.

Maimane het by die spoggerige Radisson Blu-hotel in Sandton oor sy opmerking gesê “meningsvryheid” laat sulke standpunte toe.

Die EFF het ingestem om die DA te steun sodat die party sekere munisipaliteite kan beheer, wat die metrorade van Tshwane en Nelson Mandelabaai insluit.

Die DA se federale voorsitter, James Selfe, sê hul ooreenkoms met die EFF berus daarop dat enige verskille tussen die partye “net woorde” is.

Die UDM het die EFF geloof vir sy besluit om nie ‘n koalisie-ooreenkoms met die ANC te sluit nie.

Die UDM-leier, Bantu Holomisa, sê die EFF het die regte besluit geneem en sal nou die rol van ‘n “waghond” op plaaslike en nasionale vlak speel.

Die EFF het egter reeds herhaaldelik in die Parlement getoon dat hulle graag reëls verontagsaam, dus is dit nie duidelik watter “waghond-rol” die party kan speel nie.

Holomisa sê dit is ‘n “groot tree nader aan ‘n veelparty-demokrasie”, terwyl dit duidelik is dat die huidige naakte politieke opportunisme juis ‘n veelparty-demokrasie waar beleidsverskille belangrik geag word, ondermyn.

Die EFF het Woensdag aangekondig dat hy nie ‘n koalisie met die ANC sal vorm om die metrorade van Gauteng, Nelson Mandelabaai en ander bestrede munisipaliteite te beheer nie.

Die EFF sal met die DA saamwerk in Tshwane, Johannesburg en Nelson Mandelabaai om beheer te verkry.

Die DA in Rustenburg het ‘n koalisie gevorm met ander partye voor die eerste raadsvergadering later vandag om ANC uit die kussings te lig.

Die ANC het 43 van die 89 raadslede in Rustenburg, gevolg deur die EFF met 24 en 14 van die DA. Die Forum for Service Delivery het vier setels en is die sleutelparty in die planne om die ANC te vervang.

Die DA se Oos-Kaapse leier, Athol Trollip, sal waarskynlik vandag by die Nelson Mandelabaai se raadsvergadering as burgemeester verkies word nadat die DA ‘n ooreenkoms met die UDM, Cope en ACDP bereik het om ‘n koalisie te vorm.

Die EFF het reeds aangedui dat hy vir die DA sal stem sodat die ANC vir die eerste keer die opposisie in dié Metro sal wees.

Die ANC in die nuwe munisipaliteit van Tlokwe en Ventersdorp in Noordwes het die opposisie uitgedaag om die uitslag van die munisipale verkiesing te aanvaar.

Die DA, EFF en onafhanklike kandidate beplan om die Verkiesingskommissie weens beweerde onreëlmatighede voor die hof te daag.

‘n DA-apologeet, Theo Venter, verbonde aan die NWU, sê die EFF se besluit om nie nog nouer met die DA saam te werk nie, is ‘n “strategiese fout”.

Hy sê dit lyk of dié party ‘n poging aanwend om ‘n posisie te handhaaf waar hulle onaantasbaar is, maar die behoud van so ‘n posisie in die politieke arena is “onmoontlik” op die langtermyn.

“Die vraag ontstaan – waar gaan jy die ervaring kry om te bestuur as jy nie êrens aan ‘n koalisie of ‘n mede-bestuursproses deelneem nie. Die EFF diskwalifiseer hulself eintlik nou oor die langtermyn vir korttermynvoordele,” het Venter gesê.

Venter se “ontleding” is van ‘n onthutsende wêreldvreemdheid omgeef, aangesien daar hope voorbeelde is van uiters suksesvolle radikale swart aansprake, waaronder al Suid-Afrika se buurlande ingereken moet word.

Staat vra dat kinderverkragter sielkundig geëvalueer word

Die Staat het gevra dat die 42-jarige man van Sasolburg, wat aan 37 klagte van kinderverkragting skuldig bevind is, vir sielkundige evaluering gestuur word voor sy vonnisverhoor.

Die man is Woensdag ook skuldig bevind op 18 aanklagte van seksuele aanranding, 541 klagte weens die besit van kinderpornografie, 109 weens verspreiding en 228 weens die vervaardiging van kinderpornografie.

Regter Jack Moloi het in sy uitspraak met die Staat saamgestem dat die man die minderjarige kinders opsetlik verkrag het en dat dit bo redelike twyfel bewys is.

Die hof het die man se eie getuienis verwerp as ongeloofwaardig. Regter Moloi het gesê die man nie ‘n goeie indruk op die hof gelaat nie.

Hy het onsamehangend en ontwykend voorgekom het Moloi gesê.

“Ek stem saam met die Staat dat die beskuldigde die hof so dom ag dat hy gereken het hy kan enigiets sê en daarmee wegkom.”

Die saak volg nadat die Australiese polisie, deur Interpol, hul Suid-Afrikaanse kollegas oor die man se internetbedrywighede ingelig het.

Ná die uitspraak het die Staat die hof ingelig dat hulle die man vir sielkundige evaluering wil stuur voor vonnisverrigtinge.

Die saak is tot 1 November uitgestel.

Meer as 70 Metro-amptenare geskors te midde van koalisie-gesprekke

Meer as sewentig amptenare is tans in die agt Metro’s geskors. Dit is deur die Minister van Samewerkende Regering, Des van Rooyen bekend gemaak in `n geskrewe antwoord op `n parlementêre vraag.

Dit kom te midde van vier Metro’s wat moontlik deur koalisies beheer sal word, het RSG berig.

Die amptenare wat geskors is, sluit in stadsklerke, `n munisipale bestuurder, brandweerpersoneel, bou-inspekteurs, metropolisiebeamptes en `n opsigter by `n swembad.

Van die klagtes teen hulle is seksuele teistering, bedrog, ‘n onregmagtige mediakonferensie en die gebruik van munisipale eiendom om perlemoen te smokkel.

Die skorsings is in Buffalo City, Ethekwini, Mangaung, Nelson Mandelabaai, Ekhuruleni, Johannesburg, Tshwane en Kaapstad.

Die Suid-Afrikaanse Kommunisteparty het onderneem om ondersteuners teen ‘n DA-EFF-koalisie te mobiliseer in Gautengse metro’s waar die ANC nie ‘n volstrekte meerderheid behaal het nie.

Die DA is in koalisiegesprekke met die EFF oor die metro’s van Johannesburg, Tshwane, Ekurhuleni en Mogale City.

In die Kannaland-munisipaliteit in die Klein-Karoo sal die DA en ANC glo saamwerk. Die twee partye het elkeen twee raadslede, terwyl ICOSA die ander drie raadslede het.

Die DA en ANC hou vol dat hulle nie `n koalisie gevorm het nie, maar net gaan “saamwerk”.

Die nuwe burgemeester is Magdalene Berry van die ANC, terwyl Aletta Theron van die DA die speaker is.