Kategorie: Suider-Afrika

Suid-Afrikaanse nuus, d.w.s. sowel nuus uit Suid-Afrika én Suider-Afrika.

SA Mediese Vereniging woedend oor 2 se skorsing

Die Suid-Afrikaanse Mediese Vereniging het die Minister van Gesondheid, Aaron Motsoaledi se besluit dat twee dokters van die Evander-hospitaal in Mpumalanga geskors word, as voorbarig bestempel.

Die dokters is geskors nadat hulle na bewering ‘n noodkeisersnee op ‘n swart tienerma in ‘n normale saal, in plaas van ‘n operasiesaal, uitgevoer het, het RSG berig.

Haar baba is dood gebore en die vrou het tien dae later beswyk. ‘n Saak van moord is teen die twee geopen.

Die vereniging sê dit is verregaande om ‘n saak teen dokters te begin, sónder dat ‘n beslissing deur lede van die mediese beroep gegee is.

Dit blyk dat die staatshospitaal sowel as ‘n privaathospitaal verkeerde inligting aan die ouers deurgegee het oor die welstand van die tiener en dat die ouers die dokters daarvoor verkwalik.

‘Weldoener’ steel baba

‘n Swart vrou van Rustenburg sal na verwagting Woensdag in die plaaslike landdroshof verskyn nadat sy glo Maandag ‘n pasgebore baba by die Job Shimankane Tabane-hospitaal ontvoer het.

Noordwes polisiewoordvoerder, Paul Ramaloko, sê die polisie het die 19-jarige-vrou, wat haarself voorgedoen het as ‘n weldoener en aangebied het om die baba vas te hou en toe met kind verdwyn het, ure daarna in Sondela naby Boitekong in hegtenis geneem.

Hy sê die verdagte het geld aan die babadogtertjie se ma gegee om kos te koop, terwyl die ma en haar kind vir vervoer gewag het nadat hulle uit die hospitaal ontslaan is. Toe die 31-jarige ma terugkeer was hulle nie meer daar nie.

Die eenheid teen gesinsgeweld en seksuele misdrywe en vir kinderbeskerming ondersoek die voorval.

Etniese geweld vlam weer op in Limpopo

Etniese konflik het weer kop uitgesteek in Limpopo. Die pad tussen Thohoyandou en Louis Trichardt in Limpopo is steeds gesluit weens ‘n gewelddadige betoging deur inwoners van dorpe in die Vuwani-gebied.

Inwoners versper die paaie na Thohoyandou, Vuwani en Malamulele met klippe en rommel.

Gemeenskapslede het die naweek ook vyf huise afgebrand. Hulle beskuldig die eienaars van die huise van moord. Dit volg nadat die liggaam van ‘n man verlede week in Lwamondo gevind is, na ‘n beweerde rituele-moord.

Die moord hou glo verband met die munisipale afbakeningsraad se besluit om dele van Vuwani en Malamulele saam te voeg om ‘n nuwe munisipaliteit te vorm, terwyl Tsongas daarteen gekant is.

Motoriste word aangeraai om eerder alternatiewe roetes te gebruik.

Dienste in die gebied is gestaak en onderrig by skole word ontwrig. Honderde pendelaars en motoriste is gestrand weens die paaie wat versper word.

Verkeer op die N2 by Borchards Quarry in die Wes-Kaap is vir die soveelste keer ontwrig nadat oproermakers Sondagaand die pad met rommel en brandende bande versper het.

Die pad is Maandag weer oopgestel vir verkeer en die polisie patrolleer die gebied.

Kaapstad se uitvoerende direkteur vir Veiligheid, Richard Bosman sê inwoners van informele woonbuurte in Nyanga is ontevrede met dienslewering in die gebied.

PRASA-hoof en ingenieur geskors

Die minister van Vervoer, Dipuo Peters sê sy verwag die week ‘n volledige verslag van die raad van die Passasierspooragentskap, PRASA.

Dit volg nadat die bestuurshoof, Lucky Montana se kontrak beëindig is en die hoofingenieur, Daniel Mthimkhulu geskors is.

Mthimkulu word daarvan beskuldig dat hy oor sy kwalifikasies gejok het. Daar word ook beweer dat die agentskap R600 miljoen bestee het aan Spaanse lokomotiewe wat nie geskik is vir plaaslike spoortoestande nie.

‘n Woordvoerder van die departement van Vervoer, Tiyani Rikhotso sê die minister sal met die raad in gesprek tree nadat sy die verslag ontvang het.

Sinjaalfout dalk oorsaak van jongste treinongeluk

Die soveelste treinongeluk, hierdie keer by die Booysens-stasie, suid van Johannesburg, kon dalk weens ‘n foutiewe sinjaal plaasgevind het.

Daar is 239 mense beseer in die jongste botsing. Die Gautengse regering het vroeër sy kommer uitgespreek oor gereelde treinongelukke.

In April is ‘n veiligheidswag van Metrorail dood en 240 mense beseer in ‘n botsing tussen twee treine by die Denver-stasie.

‘n Voorlopige verslag oor Vrydag se ongeluk sal na verwagting Maandag vrygestel word.

Die Gautengse premier, David Makhura het ‘n beroep op die Passasierspooragentskap gedoen om voorsorg te tref dat passasiers hul bestemmings veilig bereik.

In Vrydag se ongeluk het een trein van agter teen ‘n ander wat stil gestaan het gebots, tussen die Booysens- en Crownmine-stasies. Albei treine was na Soweto onderweg.

Volgens ‘n voorlopige ondersoek van die Spoorveiligheidreguleerder was die sinjaallig geel in plaas van rooi en het die aankomende trein nie besef daar is reeds ‘n trein op die betrokke spoorlyn nie.

Die woordvoerder van die reguleerder, Babalwa Mpendu sê die voorlopige verslag word môre bekendgemaak.

Die reguleerder sê veiligheidstandaarde van spoorlyne in Gauteng sal ondersoek word.

Intussen sê Metrorail die diefstal van belangrikte toerusting van die spoorlynnetwerk is besig om toe te neem. ‘n Woordvoerder sê die diefstal lei tot ongelukke.

Branderplankkampioen oorleef haai-aanval

Die Australiese branderplankryer, wat Sondag deur ‘n groot withaai is tydens die J-Bay Ope in Jeffreysbaai, sê hy het die haai met die vuis geslaan terwyl hy in die water gespartel het.

Die kompetisie is opgeskort nadat die verdedigende kampioen, Mick Fanning, van sy branderplank deur die haai afgestamp is.

Fanning is nie beseer nie. Hy het die reddingspanne en bystandpersoneel geloof wat hom te hulp gesnel het voor die haai kon terugkeer.

Fanning, wat wêreldkampioen in 2007, 2009 en 2013 was, is onmiddellik ná die aanval opgetel deur die veiligheidspersoneel.

Die geleentheid is gestaak kort daarna nadat twee verdere haaie opgemerk is in die water.

Terug op droë grond, was Fanning merkbaar aangedaan oor sy noue ontkoming: “Ek kan dit nie glo nie. My bene wil meegee … Om dit te oorleef, ek is net so emosioneel.”

Vermeende plaasaanvaller is polisielid

Twee swartes, een ‘n lid van die Suid-Afrikaanse Polisiediens (SAPD), is in hegtenis geneem vir gewapende roof nadat ‘n boer, Peet Nortje, aangeval is op sy plaas Kareebosbult in Coligny, Noordwes, het die polisie Donderdag gesê.

Kolonel Sabata Mokgwabone het gesê vier swart mans het die eienaar met sy twee werknemers op Woensdagmiddag aangeval.

Hulle het die boer in die huis gedwing. Die verdagtes het die huis geplunder en die slagoffer erg aangerand, voordat hulle van die toneel gevlug het in ‘n wit Golf.

Die boer, 84, het daarin geslaag om te ontsnap en na die buurplaas te gaan waar hy hulp ontbied het.

Mokgwabone het gesê die twee is in hegtenis geneem op die N12-hoofweg Woensdag, na Coligny-polisie hul eweknieë in Klerksdorp en Potchefstroom gewaarsku het om op die uitkyk te wees vir ‘n wit Golf met vier swart insittendes.

Die motor is gestop en die twee is in hegtenis geneem. Die ander twee is nog op vrye voet.

“Een van die verdagtes is ‘n administratiewe klerk in diens van die SAPD. ‘n Interne dissiplinêre ondersoek sal ingestel word teen die werknemer,” het Mokgwabone gesê.

Nortje is wreed aangeval en sy vuurwapens is gesteel. Hy kon nog nie ondervra word deur die polisie nie, weens die aard van sy beserings. Hy is steeds in die hospitaal.

“Die polisie het begin soek na verdagtes in hul eie geledere nou. Hoe moet die publiek weet wie om te vertrou? Dit is besig om ‘n groter prioriteit vir gemeenskappe om hulself te beskerm, “Cameron het gesê nadat hy verneem het dat een van die mans in hegtenis geneem is in diens van die SAPD.

Mokgwabone gesê twee vuurwapens wat aan die boer behoort het, is in die SAPD-lid se huis gevind.

Die verdagtes sal aanstons in die hof verskyn.

Oproer in Steelpoort by myne

Die Tubatse plaaslike munisipaliteit sê hy het berigte ontvang dat gewelddadige betogings in die gebied werksaamhede by myne in die Steelpoort-gebied ontwrig, het RSG berig.

‘n Munisipale woordvoerder, Thabiso Mokoena sê die mynwerkers kan nie werk toe gaan nie omdat paaie in die gebied deur betogers versper word.

Hy sê busse en taxi’s word nie toegelaat in die dorpe waar die inwoners betoog nie.

Intussen sê die polisie in Limpopo die 19 betogers wat op Steelpoort in hegtenis geneem is, sal vandag in die Landdroshowe in Burgersfort en Sekhukhune verskyn.

Hulle word aangekla van openbare geweld, brandstigting en kwaadwillige saakbeskadiging.

Betogende inwoners van Mampuru en Phasha in Steelpoort het sedert Sondagaand vyf voertuie aan die brand gesteek.

Rosatom ontken dat kerntender toegeken is

Die Russiese staatsenergiekorporasie Rosatom het ontken dat ‘n Suid-Afrikaanse tender in die geheim reeds aan hom toegeken is.

Rosatom se streeksvisepresident, Victor Polikarpof sê dit is net gerugte dat die kernkragtender aan Rusland gegee is.

Polikarpof neem aan ‘n energieberaad in Kaapstad deel.

Die departement van Energie het Dinsdag aangekondig dat die tenderproses vir agt kernreaktors teen die einde van die jaar afgehandel sal wees.

Vyf lande, Rusland, Frankryk, Sjina, die VSA en Suid-Korea ding mee om die kontrak.

Daar is hardnekkige gerugte dat president Jacob Zuma se noue bande met die Russiese president Wladimir Poetin reeds daartoe gelei het dat die transaksie ten gunste van Rosatom beklink is.

Regering appèlleer teen al-Bashir-beslissing

Die regering het hofstukke ingedien om te appèlleer teen die Hooggeregshof in Pretoria se beslissing dat die Soedannese president, Omar al-Bashir nie die land mag verlaat nie.

Die hof het verlede maand aanbeveel dat die Nasionale Direkteur van Openbare Vervolgings dit oorweeg om strafregtelike aanklagte oor die verontagsaming van die hofbevel in te stel.

Die regering voer aan dat Bashir immuniteit as ‘n Afrika-staatshoof geniet. Die regsproses kan glo etlike maande duur.

‘n Voormalige regter in die Konstitusionele Hof, Yvonne Mokgoro, het vroeër gesê sy is steeds geskok oor die regering se klaarblyklike nie-nakoming van ‘n hofbevel oor die al-Bashirkwessie.

Die Pretoriase Hooggeregshof het verlede maand beslis dat die regering se onvermoë om Omar al-Bashir aan te hou, indruis teen die Grondwet en dat die regering die Soedanese leier met sy aankoms in die land in hegtenis moes geneem het.

Mokgoro het die Kader Asmal Menseregtelesing by die Universiteit van die Witwatersrand aangebied.