Die minister van polisie, Nathi Mthethwa sê intussen hy’s vol selfvertroue dat die saak teen Radovan Krejcir waterdig is.
Hy het tydens ‘n New Age sake-toespraak in Midrand noord van Johannesburg gepraat. Mthethwa sê goeie werksverhoudinge tussen speurders het belowende uitslae opgelewer.
Die Tsjeggiese voortvlugtige en sy vennoot sal binne minute in die Palm Ridge landdroshof aan die Oos-Rand op aanklagte van poging tot moord en ontvoering verskyn.
Sy regspan het intussen ‘n klag van poging tot moord teen die polisie aanhangig gemaak. Hulle voer aan dat Krejcir gemartel is nadat hy Vrydagaand by sy huis in Bedfordview in hegtenis geneem is.
Uitspraak sal teen laatoggend in die Suid-Gautengse hooggeregshof gelewer word oor ‘n aansoek om Krejcir na ‘n hospitaal te verplaas.
Ná sy hofverskynings vandag is Krejcir se probleme met die Suid-Afrikaanse gereg nog nie verby nie.
Hy het ses jaar gelede met ‘n vervalste paspoort uit die Seychelle in die land aangekom.
Hy veg tans om nie na die Tsjeggiese Republiek uitgelewer te word nie, waar hy ‘n elf-jaar tronkstrafvonnis moet uitdien.
Die Suid-Afrikaanse Inkomstediens het ook twee weke gelede Krejcir se bates onder kuratorskap geplaas.
Die hooggeregshof in Pretoria het Krejcir tot volgende Maandag tyd gegun om ‘n saak te stel oor waarom sy bates nie permanent in beslag behoort te bly nie. – RSG
Die Mpumalanga Departement van Gesondheid sê hulle sal ondersoek instel nadat die Embhuleni-hospitaal, naby Badplaas, glo die afgelope week vrot vleis aan pasiënte bedien het.
Daar word beweer dat die yskas waarin vleis gehou word, verlede week gebreek het.
Die hospitaal is nie skaam vir omstredenheid nie. Vroeër hierdie maand, was personeel wat by die hospitaal inwoon vir meer as ‘n weesonder elektrisiteit.
Departementele woordvoerder, Ronnie Masilela sê dat hulle het mense gekry om te kom en vinnig te kyk na die vrieskas wat ‘n probleem het, sodat dit reggestel kan word.
“Ons sal kyk na die geheel. Dit lyk asof die Embhuleni-hospitaal aandag moet kry, so ons sal beslis die aandag wat dit verdien, gee sodat ons nie soortgelyke probleme kry nie.” – SABC
Een van die vier mans wat betrek word by ‘n motorkaping in die Johannesburgse middestad, wat op kringtelevisiekamera vasgelê is, sal Maandag om borgtog aansoek doen.
Siphelele Mdlalose (29), Khanyisani Ngubane (24), Mhlonishwa Mchunu (36) en Ntobeko Hlatshwayo (29) is Donderdag in hegtenis geneem.
Die polisie het op ʼn Rav4 en ʼn Toyota Corolla beslag gelê en ondersoek die mans se betrokkenheid by minstens vier kapings wat op kringtelevisiekamera vasgelê is.
In die een kapingvideo kan daar gesien word hoe ʼn gesin in ʼn Rav4 geteiken word op die hoek van Commisioner- en Crownstraat.
Die gesin word uit hul motor gepluk en van hul besittings beroof voor die kapers met die motor vlug. – Sapa
Die polisie in Mpumalanga moes ‘n bejaarde swartvrou na veiligheid bring om haar te beskerm teen ‘n woedende skare.
Inwoners van Waterval het gedreig om haar lewendig te verbrand.
Hulle sê die vrou is ‘n heks en verantwoordelik vir die tragiese busongeluk op die Molotopad twee weke gelede. Dertig mense is dood in die ongeluk met ‘n bus en twee vragmotors.
Een van die Molotopadgebruikers, Anastacia Terane, het aan IOL gesê die oorsake van ongelukke op dié, sowel as ander paaie, word toegeskryf aan toordery en geheimsinnige verskynings wat oor die pad kom en bestuurders verlei.
Sy meen dit is omdat Suid-Afrika nog nie verander het na Apartheid nie, en mense steeds openbare vervoer moet gebruik om te gaan werk. Sy sê die bestuurders is ook oormoeg.
Gebedsessies is reeds voorheen gehou op die Molotopad om die voortgesette slagting te verminder.
Die inwoners het die bejaarde vrou se huis afgebrand en die polisie moes haar inderhaas na veiligheid bring nadat die skare aangedring het dat sy die bestuurder getoor het.
Die aanval op die bejaarde kom nadat talle Putcobusse, geskut is in ‘n gesamentlike-multi-dissiplinêre padblokkade op die Molotopad buite Pretoria.
Honderde pendelaars was gestrand as gevolg van die operasie en dié stap het waarskynlik gemoedere verder opgejaag.
Die minister van vervoer, Dipuo Peters het polisie en verkeersbeamptes vergesel by die padblokkade, voordat sy ‘n aankondiging oor die e-tolstelsel verlede Woensdag gemaak het.
Peters sê die operasie sal voortgaan op verskeie plekke: “Ons sal op strategiese punte wees om seker te maak dat ons kyk padwaardigheid van voertuie, soos na die lisensievoorwaardes van bestuurders en seker maak dat motoriste die korrekte permit het om op die pad te wees. Ons wil ook seker maak dat ons met die passasiers in aanraking kom en hulle bewus maak van die feit dat dit ook hul verantwoordelikheid is om hul bestemming in een stuk te bereik.”
Die Suid-Gautengse hooggeregshof in Johannesburg het uitspraak voorbehou in ‘n dringende hofaansoek wat deur die Tsjeggiese voortvlugtige, Radovan Krejcir se prokureurs gebring is om hul kliënt vir mediese behandeling te laat neem.
Die hof het tot in die vroeë oggendure betoë van die staat aangehoor waarom die aansoek nie toegestaan moet word nie, het RSG berig.
Krejcir beweer dat hy in polisie-aanhouding gemartel is. Die regter sal Maandagmiddag ‘n beslissing gee.
Krejcir is Vrydag in Bedfordview in hegtenis geneem na ‘n voorval wat na bewering in Junie plaasgevind het.
Dit is steeds onduidelik of die Tsjeggiese voortvlugtige in die Palm Ridge landdroshof sal verskyn. Vroeër is berig dat hy saam met ‘n medebeskuldigde in die Albertonse landdroshof aan die Oos-Rand sal verskyn.
Een van Krejcir se prokureurs, Ulrich Roux sê ‘n dokter het Krejcir ondersoek nadat hy blykbaar elektriese skokke toegedien en gewurg is.
Die dokter het bevind dat Krejcir se bloedmonsters tekens van spierskade en moontlike nierversaking toon.
Die staat sê egter hy is bewus van Krejcir se kroniese siekte en dat hy in polisie-aanhouding daarvoor behandel kan word.
Die besonderhede van waar Krejcir aangehou word, word steeds geheim gehou, aangesien die polisie volgens die kommissaris, Riah Phiyega sy veiligheid wil verseker.
Toneel uit ‘n polisievideo van die ritueel wat op stakende mynwerkers uitgevoer is
deur Jonisayi Maromo en Gavin Emmanuel
‘n Groot groep kaal mynwerkers het die dag voor die Marikana-skietery rituele op ‘n koppie beoefen, het die Farlam-kommissie Vrydag aangehoor.
Brigadier Adriaan Calitz van die polisie het getuig dat ‘n wit Toyota-bakkie op 15 Augustus verlede jaar emmers by ‘n koppie naby die Nkaneng-plakkerskamp in Marikana naby Rustenburg in die Noordwesprovinsie afgelaai het.
”;n Groep stakers het na die bakkie toe gegaan en dit omring. Ek het dit aan die (GOK) gesamentlike operasieskomitee gerapporteer dat sommige van ons lede gedink het die emmers bevat moetie,” het hy gesê.
Ná 4 nm. het ‘n polisiehelikopter wat die toneel gepatrolleer het, verslag gedoen dat omtrent 800 kaal stakers agter die koppie geskuil het “en dat ‘n tradisionele geneser met hulle besig was”.
Die volgende dag is 34 mense, meesal stakende mynwerkers, tydens ‘n botsing met die polisie doodgeskiet. Agt-en-sewentig is gewond terwyl hulle uitmekaar gespat en naby die Lonmin-platinamyn in Marikana ontwapen is.
Die Farlam-kommissie is later daardie maand aangestel om die omstandighede rondom die skietery te ondersoek, asook die dood van 10 ander mense, waaronder twee polisiemmanne en twee veiligheidswagte, gedurende die voorafgaande week.
Calitz, een van die polisie-offisiere wat tydens die arbeidsonrus aan die Marikana-operasie toegewys is, het Vrydag tydens die kommissie se openbare verhoor in Centurion getuienis gelewer.
Hy het gesê die wit Toyota-bakkie is waargeneem waar dit stowwe in emmers aan die mynwerkers gelewer het.
“Die helikopter het verslag gedoen dat die ongeveer 800 kaal stakers besig was om rituele uit te voer.”
Calitz het gesê dat een van die versetsleiers, wat as Noki geëien is, herhaaldelik die polisie aangesê het om die koppie te verlaat.
Mnr. Noki het na vore gekom en gesê dat hulle nie meer met die SAPD (Suid-Afrikaanse Polisiediens) gaan praat nie en dat hulle met die mynbestuur deur hul prokureur, Shapiro, wil praat. Hy het toe na die groep teruggestap,” het Calitz gesê.
“‘n Kort rukkie later het die bui van ‘n groep van ongeveer 300 mans merkbaar verander, want hulle het groter aggresssie getoon deur hul wapens teen mekaar te slaan en het heen en weer in ‘n hegte eenheid beweeg.”
In Maart het die kommissie aangehoor dat die sangoma wat blykbaar die rituele op die betogende mynwerkers uitgevoer het, doodgeskiet is.
Ishmael Semenya het namens die polisie die sangoma se dood by die openbare verhoor aangekondig.
Indertyd het hy gesê dat die polisie gepoog het om die 69-jarige sangoma, Alton “Ndzabe” Zikhuthele Joja, na die kommissie te bring om te getuig.
In Junie het die Nasionale Vervolgingsgesag gesê dat Lindelani Mkhize, 28, wat daarvan beskuldig word dat hy die sangoma gedood het, in die Bizana-landdroshof verskyn het.
Mkhize is in sy tuisdorp, KwaMaphumulo, in Kwazulu-Natal in hegtenis geneem.
Joja sou voor die Farlam-kommissie oor sy rol, en dié van sy seuns, getuig het, betreffende die rituele wat op die stakende mynwerkers uitgevoer is.
Die rituele was blykbaar veronderstel om die mynwerkers onsigbaar in die aangesig van geweervuur te maak.
Vyf gewapende mans het Joja geskiet toe hy na hul voertuig voor sy huis stap om hulle te vra wat hulle daar soek.
Die skieters het op die vlug geslaan. Hul motor is later verlate en uitgebrand met ‘n geweer daarbinne gevind .
Joja het by sy aankoms by ‘n plaaslike hospitaal gesterf..
Die openbare verhoor word Maandag voortgesit. – Sapa
Die polisie het Vrydagmiddag die Tsjeggiese voortvlugtige Radovan Krejcir op aanklagte van poging tot moord en ontvoering in hegtenis geneem, het Eyewitness News berig.
Hy is gister by sy huis in Bedfordview, oos van Johannesburg in hegtenis geneem.
Die polisie sal na verwagting vandag meer duidelikheid gee oor die inhegtenisneming van die Tsjeggiese onderwêreldfiguur by ‘n mediakonferensie.
Solomon Makgale, die nasionale kommissaris van polisie Riah Phiyega se woordvoerder, het gesê dat die polisie Saterdag om 12:00 Krejcir se inhegtenisneming met die media sal bespreek.
Krejcir was die afgelope ruk opnuut in die nuus.
In die jongste voorval is twee mense verlede Dinsdag dood en drie beseer in ‘n ontploffing by sy onderneming – Money Point – in Bedfordview. In Julie was daar ‘n mislukte aanslag op sy lewe.
Die inkomstediens het verlede week verklaar dat sy bates onder kuratorskap geplaas is
“Ek kan bevestig dat Krejcir in hegtenis geneem is om 06:00 by sy huis in Gauteng,” het Makgale gesê. “Hy is in hegtenis geneem op aanklagte van poging tot moord en ontvoering. “
Krejcir se woordvoerders kon nie vir kommentaar bereik word nie. Sy prokureur het gesê hy weet nie watter afdeling van die polisie sy kliënt gearresteer het nie.
Krejcir het onlangs enige betrokkenheid in ‘n reeks moorde van vriende en medewerkers sedert sy aankoms in Suid-Afrika as voortvlugtige in 2007, ontken.
Die nuutste moord is dié van ‘n ander Tsjeggiese voortvlugtige Jan ” John” Charvat. Krejcir het toe gesê hy werk saam met die polisie om die moord op te los. – Sapa
Die Demokratiese Alliansie se beleidskonferensie sal vandag in Kaapstad begin te midde van groot spanning oor BSEB (Breë Swart Ekonomiese Bemagtiging).
Groot verwarring oor die DA se beleid oor regstellende aksie heers binne en buite die party. Die DA het verlede week in die Nasionale Wetgewer ten gunste van die Wysigingswetsontwerp op Gelyke Geleenthede gestem, net om daarteen te stem in die Nasionale Raad van Provinsies.
Khume Ramulifho, die DA se Suid- Gautengse streeksvoorsitter, het gesê daar is beleidsrigtings wat aanpassing verg, insluitend dié wat met grondhervorming, ekonomiese bemagtiging en regstelling te make het.
Die party se “Swart Koukus” voel die beleid word deur ‘n paar wittes bepaal en nie deur die mense op grondvlak nie. Hulle voel ook dat sulke rigtings nie bindend behoort te wees nie.
‘n Ander lid van die Koukus sê hy ondersteun [die BSEB-wetsontwerpe] want hy “is ‘n slagoffer” in die DA. “Ek ondersteun die DA omdat ek gedink het hulle is bewus van die uitdaging,” het hy gesê.
“Ons [swartes] is bewus van die onreg van die verlede. Jou gewete kan dus nie die feit ontken dat ons iets moet doen vandag as deel van die regstelling nie.
Masizole Mnqasela, ‘n LP en federale lid wat Khayelitsha verteenwoordig sê: “Mense moet toegelaat word om individueel te stem, gelei deur hul eie gewete oor hierdie wetsontwerpe. Ons moet nie ‘n partyposisie hê daaroor nie, want ek word nie goed verteenwoordig wanneer een sê dat hy diensbillikheid ondersteun nie.”
Mnqasela wil ook dat die DA sy energie fokus op BSEB.
“Ons het nog baie min swart miljoenêrs, in teenstelling met wit miljoenêrs, so ons moet nie bekommer daaroor dat swartes miljoenêrs word nie. Hoekom moet ons bekommerd wees wanneer ‘n swart persoon ryk word?”
Hy beskou BSEB as die “beenmurg” wat sal bepaal of die DA in die toekoms sal groei of vergaan.
Twintig beleidsrigtings sal bespreek word. Dit wissel van onderwys en ekonomiese groei tot gesondheid.
Tweehonderd afgevaardigdes van regdeur die land sal die konferensie bywoon.
Die federale voorsitter, Wilmot James sê die beleidskonferensie moet sy standpunt oor BSEB opklaar.
Die Mpumalanga regering het Vrydag gesê hulle sal kyk na die lewensomstandighede van konstruksiewerkers na die dood van agt mans wat deur weerlig getref is in Witbank.
“Die toestande waarin hulle leef is nie aanvaarbaar nie,” het die direkteur van openbare veiligheid Selati Matlejoane gesê.
Nege mense is Woensdag dood in die provinsie weens weerlig. Agt van die mense is dood terwyl hulle in ‘n tent in Witbank geslaap het.
Matlejoane gesê hul reaksiespan besoek die gebied ná die voorval en het bevind dat 14 mense gelê en slaap het in ‘n tent .
“Agt was reeds dood, terwyl ses is na die hospitaal geneem is,” het hy gesê.
Hy het gesê die mans het hulle ingelig dat hulle van Alexandra, Diepsloot en Soweto in Johannesburg kom en na Mpumalanga is vir werk.
Hy het gesê dit was ‘n natuurramp, hulle kan nie vingers wys na enigiemand nie, maar iets moet gedoen word.
“Die konstruksie-eienaar het die tent vir hulle op grond [ in private besit ] opgerig. Ons moet ondersoek of wette gebreek is en indien wel, ‘n sanksie toepas,” het hy gesê.
Nog ‘n man is deur weerlig getref in Middelburg op dieselfde dag . Polisiewoordvoerder Lt -kol Leonard Hlathi het gesê die weerlig het die man geslaan terwyl hy met sy kind geloop het.
“Hy is opslag dood, terwyl sy kind ernstig beseer is, ” het hy gesê .
