Katerina Krejcirova, die vrou van die Tsjeggiese voortvlugtige Radovan Krejcir, is by die Palm Ridge-landdroshof in hegtenis geneem Vrydagoggend, in verband met ‘n gesteelde motor en ‘n bedrogskema.
Sy is reeds in haar land van oorsprong aangekla omdat sy saam met haar man sy inkomste uit misdaad geniet het. Sy word eweneens deur Tsjeggië as ‘n voortvlugtige beskou.
Volgens ‘n woordvoerder van die Valke sal Krejcirova aangekla word van die besit van ‘n gesteelde voertuig in Bedfordview waarop beslag gelê is by haar huis verlede week.
Krejcir se vrou was by die hof om haar man se verskyning op aanklagte van ontvoering en poging tot moord by te woon.
Krejcirova sal nie alleen verskyn nie want ‘n ander persoon sal ook hierdie naweek in hegtenis geneem word.
Daar word verneem dat die mafiabaas reeds ‘n beloning uitgeloof het om getuies wat teen hom wil getuig te laat vermoor.
Vyf mense onder wie ‘n senior intelligensie-beampte wat moontlike bande met die Tsjeggiese voortvlugtende Radovan Krejcir het, verskyn vandag in die Alexandra-landdroshof, noord van Johannesburg.
Hulle staan tereg op verskeie aanklagte wat poging tot moord en regsverydeling insluit, het RSG berig.
Die intelligensie-beampte sersant Nandi Nkosi is Donderdag in hegtenis geneem omdat sy na bewering GPS-koördinate verskaf het om die spesiale ondersoekbeampte, Paul O’Sullivan en nog ‘n polisieman, kolonel Nkosinathi Ximba op te spoor.
Volgens O’Sullivan het Krejcir hom sedert 2010 minstens vyf keer met die dood gedreig.
O’Sullivan is sedert Krejcir se onwettige aankoms in die land in 2007 op sy spoor.
‘n Moordaanslag op ‘n senior polisiebeampte en ‘n privaat forensiese ondersoeker wat gekoppel word aan ‘n ondersoek na die Tsjeggiese voortvlugtige Radovan Krejcir, is Donderdag gefnuik na ‘n dramatiese aanval op ‘n Johannesburgse hotel.
‘n Taakspan het die Rivonia Road Lodge laat Donderdagmiddag bestorm, net ure voor drie mense, waaronder ‘n 23-jarige vrou, glo saamgesweer het om kolonel Nkosana “Killer ” Ximba en Paul O’Sullivan te vermoor.
O’Sullivan hou reeds Krejcir se bewegings dop sedert hy in 2007 uit die Seychelle in die land aangekom het.
Krejcir het by meer as drie geleenthede gedreig om hom te laat vermoor.
Die polisie se spesiale taakspan wat gemoeid is met die ondersoek na die mafiabaas se onderwêreldbedrywighede, het ‘n wenk oor die beplande moord ontvang.
Vroeër Donderdag het ‘n Johannesburgse regter aan Krejcir borgtog geweier. Hy word beskuldig van ontvoering en poging tot moord.
Krejcir, twee van die Valke van Germiston en ‘n Sandtonse eiendomsontwikkelaar word daarvan beskuldig dat hulle in Junie die ontvoering en marteling van die broer van ‘n handlanger van Krejcir gereël het, wat na bewering 25kg tik van hom gesteel het.
Die Tsjeggiese sakeman wou na bewering die vennoot, wat werk by die OR Tambo Internasionale Lughawe, oorreed om hom te help om die dwelms na Australië te smokkel.
‘n Bron sê die drie het beplan om outentieke polisietoerusting te gebruik. Hulle het selfs sirenes en blou ligte gehad, en wou die vermeende slagoffers Donderdag van die pad aftrek en doodskiet. Die twee sou met ‘n R5-polisiegeweer vermoor word.
O’Sullivan het laasnag aan timeslive.co.za gesê hy het van die beplande moordkomplot te hore gekom nadat hy drie mans buite sy huis opgemerk het.
“Ek het drie mans buite my huis opgemerk en hulle uitgedaag. Hulle het gesê dat hulle misdaadintelligensie-agente is en my vertel van die moordplan teen my wat dieselfde middag sou plaasvind.
“Hulle het my gevra om met hulle saam te werk – wat ek gedoen het – wat toegelaat het dat die beamptes hierdie voornemende moordenaars in hegtenis kon neem,” het O’Sullivan gesê.
Die staat het die eerste ronde teen die Tsjeggiese voortvlugtige Radovan Krejcir gewen toe landdros Reginald Dawa geweier het dat ‘n bekentenis deur Krejcir se mede-beskuldigde aan die mafiabaas se verdedigingspan getoon word tydens sy borgaansoek.
‘n Eiendomsontwikkelaar van Sandton Desai Luphondo se getuienis het glo die name van die staatsgetuies en verdagtes bevat wat nog in hegtenis geneem moet word.
Krejcir, Luphondo, en die polisie adjudant-offisiere Samuel Maropeng en Jeff Macheche, verskyn in die Palm Ridge se landdroshof, aan die Oos- Rand.
Dit was Woensdag die tweede dag van hul aansoek om borgtog .
Die vier is in hegtenis geneem vir die beweerde ontvoering, aanranding en poging tot moord op die broer van ‘n Krejcir-medewerker.
Daar word vermoed dat die ontvoering gereël is nadat ‘n R25 miljoen-dwelmtransaksie skeefgeloop het.
Aanklaer Louis Mashiane het gesê Krejcir behoort borg geweier te word. Die mafiabaas het self erken sy ma het intussen R40 miljoen na Suid-Afrika gestuur, hy besit verskeie paspoorte onder vals name en het dit reeds gebruik om na verskeie lande te vlug.
Die aanklaer het bygevoeg dat daar ‘n internasionale lasbrief vir Krejcir se arrestasie is.
Mashiane het gesê Krejcir kan maklik vlug en “nadat hy weg is, is hy weg en ons saak teen hom ook”.
Die borgtogaansoek deur die Tsjeggiese voortvlugtige, Radovan Krejcir, ern sy medebeskuldigdes is in die landdroshof op Palm Ridge aan die Oos-Rand tot Vrydag uitgestel.
Die borgtogaansoek van die Tsjeggiese voortvlugtige, Radovan Krejcir, sal vanoggend in die Palm Ridge-landdroshof plaasvind.
Die voortvlugtige Tsjeg en vermeende mafiabaas sal saam met twee offisiere van die Valke en nog ‘n medepligtige in die hof aan Gauteng se Oos-Rand verskyn.
Die twee Valke het na wat berig word ‘n skrikbewind in die lokasie waar hulle woon, gevoer en ver bo hul inkomste gelewe.
Die offisiere van die Valke is in hegtenis geneem vier dae nadat Krejcir gearresteer is. Die Duitse media het berig oor die gebeure en klem gelê op korrupsie in die SAPD wat beskerming aan die vermeende onderwêreldfiguur verleen het na talle onopgeloste moorde, waaronder dié van Uwe Gemballa, ‘n Duitse burger.
Al vier die mans staan tereg op aanklagte van poging tot moord en ontvoering na ‘n voorval in Junie vanjaar.
‘n Sigbare polisieteenwoordigheid is by die hof ontplooi en slegs ge-akkrediteerde media en hofamptenare sal in die gebou toegelaat word.
Met Krejcir se eerste verskyning moes die hofsaal ontruim word en snuffelhonde is gebruik ná ‘n bomdreigement.
Sy mede-aangeklaagdes se borgtogaansoek is na die Germinstonse streekhof verskuif nadat die beskuldigdes vanoggend in die Palm Ridge landdroshof verskyn het.
Joernaliste kon nie vanoggend elektroniese toerusting die hof in te neem nie, maar die bevel is intussen omgekeer.
Krejcir, sy vennoot Desai Lupsondo en twee lede van die Valke, Jeff Nthroane en Samuel Marupeng staan tereg op aanklagte van poging tot moord en ontvoering.
Die spertyd vir Krejcir om sy bates van miljoene rand in die Noord-Gautengse Hooggeregshof in Pretoria bo verdenking te plaas, is besig om uit te loop.
Krejcir moet aanstons redes verskaf waarom daar nie permanent op sy eiendom beslag gelê moet word nie. Die Suid-Afrikaanse Inkomstediens het meer as twee weke gelede Krejcir se bates, waaronder sy Moneypoint pandjieswinkel in Bedfordview aan die Oos-Rand, onder kuratorskap geplaas.
‘n Bewaringsbevel is van die Hooggeregshof verkry vir dié stap. Die hofbevel stel die SAID in staat om die beheer te neem van bates van 15 bedrywe waarin die Tsjeg belange het.
Krejcir skuld volgens Ontvanger van Inkomste miljoene rand aan belasting, boetes en rente.
Die minister van polisie, Nathi Mthethwa sê intussen hy’s vol selfvertroue dat die saak teen Radovan Krejcir waterdig is.
Hy het tydens ‘n New Age sake-toespraak in Midrand noord van Johannesburg gepraat. Mthethwa sê goeie werksverhoudinge tussen speurders het belowende uitslae opgelewer.
Die Tsjeggiese voortvlugtige en sy vennoot sal binne minute in die Palm Ridge landdroshof aan die Oos-Rand op aanklagte van poging tot moord en ontvoering verskyn.
Sy regspan het intussen ‘n klag van poging tot moord teen die polisie aanhangig gemaak. Hulle voer aan dat Krejcir gemartel is nadat hy Vrydagaand by sy huis in Bedfordview in hegtenis geneem is.
Uitspraak sal teen laatoggend in die Suid-Gautengse hooggeregshof gelewer word oor ‘n aansoek om Krejcir na ‘n hospitaal te verplaas.
Ná sy hofverskynings vandag is Krejcir se probleme met die Suid-Afrikaanse gereg nog nie verby nie.
Hy het ses jaar gelede met ‘n vervalste paspoort uit die Seychelle in die land aangekom.
Hy veg tans om nie na die Tsjeggiese Republiek uitgelewer te word nie, waar hy ‘n elf-jaar tronkstrafvonnis moet uitdien.
Die Suid-Afrikaanse Inkomstediens het ook twee weke gelede Krejcir se bates onder kuratorskap geplaas.
Die hooggeregshof in Pretoria het Krejcir tot volgende Maandag tyd gegun om ‘n saak te stel oor waarom sy bates nie permanent in beslag behoort te bly nie. – RSG
Die Suid-Gautengse hooggeregshof in Johannesburg het uitspraak voorbehou in ‘n dringende hofaansoek wat deur die Tsjeggiese voortvlugtige, Radovan Krejcir se prokureurs gebring is om hul kliënt vir mediese behandeling te laat neem.
Die hof het tot in die vroeë oggendure betoë van die staat aangehoor waarom die aansoek nie toegestaan moet word nie, het RSG berig.
Krejcir beweer dat hy in polisie-aanhouding gemartel is. Die regter sal Maandagmiddag ‘n beslissing gee.
Krejcir is Vrydag in Bedfordview in hegtenis geneem na ‘n voorval wat na bewering in Junie plaasgevind het.
Dit is steeds onduidelik of die Tsjeggiese voortvlugtige in die Palm Ridge landdroshof sal verskyn. Vroeër is berig dat hy saam met ‘n medebeskuldigde in die Albertonse landdroshof aan die Oos-Rand sal verskyn.
Een van Krejcir se prokureurs, Ulrich Roux sê ‘n dokter het Krejcir ondersoek nadat hy blykbaar elektriese skokke toegedien en gewurg is.
Die dokter het bevind dat Krejcir se bloedmonsters tekens van spierskade en moontlike nierversaking toon.
Die staat sê egter hy is bewus van Krejcir se kroniese siekte en dat hy in polisie-aanhouding daarvoor behandel kan word.
Die besonderhede van waar Krejcir aangehou word, word steeds geheim gehou, aangesien die polisie volgens die kommissaris, Riah Phiyega sy veiligheid wil verseker.
