Kategorie: Nuus

Nie genoeg mense daag op vir anti-Zuma-veldtog nie

As ongewildheid ‘n maatstaf vir presidente is om hul bedankings te oorweeg, moes verskeie Europese presidente al die handdoek ingegooi het. Francois Hollande van Frankryk se steun is af na 10%.

Volgens berigte het slegs sowat seweduisend mense, die meeste wit en Engelssprekend, landwyd die optogte bygewoon om druk op president Jacob Zuma uit te oefen om te bedank.

‘n ANC-woordvoerder, Zizi Kodwa het tereg opgemerk dat die getal mense wat aan vandag se optogte deelgeneem het, daarop dui dat die meerderheid Suid-Afrikaners nie met die ZumaMustFall-veldtog saamstem nie.

Zuma se steun onder die swart meerderheid is steeds hoog, veral onder Zoeloes.

Volgens die EFF-leier Julius Malema is slegs “wit kapitaliste” teen die president gekant.

“Ek het geweier om die petisie te teken #ZumaMustFall want dit is geïnisieer deur wit kapitaal wat #Marikana werkers misdadigers genoem het,” het Malema getwiet.

Hy het gesê ware revolusie teen die ANC en Zuma sal swart wees en fokus op wit monopolie-kapitaal en die oordrag van grond.

Malema het verklaar dat Zuma teen volgende jaar deur swartes uit sy pos verwyder sal word.

Die voormalige hoofsekretaris van Cosatu, Zwelenzima Vavi het intussen sonder ironie gewaarsku dat Suid-Afrika die volgende Zimbabwe kan word indien Zuma nie gekeer word nie.

Vavi het by die Nelson Mandela-brug in Johannesburg gepraat by ‘n optog as deel van die ZumaMustFall-veldtog.

Vavi het die ANC se leierskap, sowel as die President gekritiseer. Hy sê al wat hulle kan doen, is om die land se hulpbronne te plunder.

Aanval op Franse onderwyser as terreurdaad bestempel

‘n Kleuterskoolonderwyser naby Parys, Frankryk met ‘n mes aangeval deur ‘n man wat beweer dat hy namens die Islamitiese Staat (ISIS) optree.

Die voorval het Maandagoggend op die skoolgronde van ‘n skool in Aubervilliers, in die buitewyke van Parys, gebeur, het Reuters berig.

Volgens wetstoepassers het die verdagte die onderwyser in sy nek gesteek en gesê die aanval is ‘n gebaar van ISIS.

“Dit is Daesh. Hierdie is ‘n waarskuwing,” het die man in ‘n klapmus glo aan sy slagoffer gesê voordat hy gevlug het. Daesh is die Arabiese naam vir ISIS.

Die onderwyser is nie ernstig beseer nie, maar hy is in die hospitaal opgeneem.

Die voorval volg ‘n maand nadat 130 mense in ‘n veelvuldige gekoördineerde terreuraanval in Parys dood is.

Verlede week was daar ook ‘n mesaanval by ‘n Londense moltreinstasie wat deur die polisie as ‘n terreuraanval bestempel is.

Drie bejaardes slagoffers van swart aanvallers

‘n Bejaarde inwoner van Hoopstad, Adri Maree (67), is Saterdagmiddag vir dood agtergelaat nadat sy in haar motorhuis deur swartes oorval is.

Sy is eers Sondagoggend deur ‘n kennis ontdek en is na ‘n hospitaal in Bloemfontein gehaas.

Maree het veelvuldige kopbeserings opgedoen, en haar gesig is erg vermink. Sy verkeer tans onder swaar verdowing.

Nog twee bejaardes, Thomas Gardiner (76), en Rina Langenhoven (67) het ook onder swart aanvallers deurgeloop. Langenhoven van Haenertsburg in Limpopo het nie die aanval oorleef nie.

Langenhoven se drie swart aanvallers wat haar op Sweet Mist Farm doodgemartel het, is intussen aangekeer. Een was voorheen in haar diens.

Gardiner is Sondagaand in sy huis in Doorn, Welkom, deur swartes aangeval, maar kon die polisie ontbied voordat hy doodgemaak is.

Sy aanvallers het hom met ‘n tuinvurk aangerand en ernstig beseer voordat die polisie opgedaag het.

Die swartes het daarna op die vlug geslaan met die slagoffer se selfoon en beursie.

Gardiner word tans in die hospitaal in Welkom behandel.

SA se kernplanne glo reeds goedgekeur

Die dagblad Business Day het Maandag berig dat die kabinet verlede Woensdag in die geheim die kernkragplanne goedgekeur het.

Suid-Afrika beplan om tussen 6 en 8 kernkragreaktors van 9 600 MW op te rig teen ‘n geraamde koste van tussen R500 miljard en R1 000 miljard wat sowat ‘n kwart van die land se krag teen 2030 sal voorsien.

Die DA het sy kommer uitgespreek dat die Parlement gesystap is in die besluit om voort te gaan met ‘n kernkragprogram.

Die minister van Finansies, Pravin Gordhan het Maandag egter by ‘n mediakonferensie belowe dat die regering met fiskale omsigtigheid te werk sal gaan in die tenderproses.

Hy het gesê dat daar ‘n formele verkrygingsproses sal wees.

Die DA-woordvoerder, Gordon Mackay sê die besluit is kommerwekkend in die lig van die ekonomiese nagevolge van die afdanking van Nhlanhla Nene as minister van Finansies.

Mackay sê gegewe die omvang van die projek moes die kwessie in die Parlement bespreek word.

Gordhan wou nie nadere besonderhede oor die kerntender gee nie en dit wil voorkom asof besluite steeds in die geheim geneem sal word.

Daar is glo nog geen uitsluitsel oor die ligging van die sentrales nie.

Die DA vrees dat die Russiese Rosatom voorkeur kry sonder dat daar duidelike tenderspesifikasies bekend is.

In September 2014 het Tina Joemat-Pettersson, minister van energie, ‘n ooreenkoms in Wene met Rosatom onderteken wat Rosatom toestemming gee om te tender.

Die regering het daarna aangekondig dat ‘n onderneming onderteken is om agt kernreaktors op te rig, maar weens kritiek teruggekrabbel en gesê daar sal ‘n tenderproses wees.

“Die tesourie het volgens ons inligting reeds ‘n koste-ontleding gedoen en bevind die program is onbekostigbaar, maar hulle is aangesê dié bevinding is polities onaanvaarbaar en dat hul model herontwerp moet word,” sê Mackay.

Die tesourie wou glo nie die kostebepaling amptelik bekendmaak nie om die kabinet te keer om met die tenderproses te begin.

Dit is klaarblyklik hoekom Nene afgedank is.

Gambië nou ‘n Islamitiese staat

President Yahya Jammeh het verklaar dat Gambië ‘n “Islamitiese staat” geword het, maar Kersfees bly.

“President Yahya Jammeh se uitspraak of verklaring is ongrondwetlik, dit bevat geen grondwetlike basis nie en… dit is ‘n onwettige verklaring,” het Ousainou Darboe, die sekretaris-generaal van die vernaamste opposisieparty, die United Democratic Party, aan AFP gesê.

“Dit is steeds belaglik dat wanneer hy die openbare aandag wil aflei van wat gebeur in die land, hy kolonialisme aanval,” het Darboe gesê.

Die verarmde voormalige Britse kolonie, binne Senegal, is bekend vir sy wit sand strande. Gambië het ‘n bevolking van byna twee miljoen waarvan 90 persent Moslem is.

Van die oorblywende agt persent is Christen en twee persent is gedefinieer as inheemse oortuigings.

In 2013, het Jammeh onttrek uit die Statebond, en gesê die liggaam verteenwoordig “‘n verlenging van kolonialisme”.

“Gambië se lot is nou in die hande van die Almagtige Allah. Van vandag af, is Gambië ‘n Islamitiese staat. Ons sal ‘n Islamitiese staat wees wat die regte van burgers respekteer,” is hy aangehaal op die presidensiële webwerf.

In televisiebeeldmateriaal van die toespraak op GRTV, wat deur AFP Saterdag gesien is, het die president egter nie in detail uitgebrei oor wat die verandering sal beteken vir die land nie, maar het Christene gerusgestel.

“Kersfees sal voortgaan,” het hy gesê en bygevoeg dat hy nie Islamitiese polisie sal aanstel nie.

Jammeh, 50, is ‘n militêre offisier en voormalige stoeier met ‘n plattelandse agtergrond. Hy het tot dusver die land regeer met ‘n ystervuis, nadat hy mbv ‘n staatsgreep in 1994 aan bewind gekom het.

Teenstanders sê hy het al hoe meer paranoïes geword, skommel gereeld sy ministers en laat slegs ‘n klein aantal betroubare bondgenote naby hom toe.

Hy vaar gereeld uit teen Gambië se koloniale verlede en gee dit die skuld vir baie van die land se ellende.

In Maart 2014, het Jammeh aangekondig dat Gambië Engels as amptelike taal sal laat vaar, maar nie aangedui watter van die inheemse tale Engels sal vervang nie.

Etniese geweld woed in Burundi

Byna 90 mense is Vrydag dood in geweldpleging in Burundi se hoofstad, in die hewigste gevegte sedert Mei wat op ’n mislukte staatsgreep gevolg het, het Reuters berig.

Ontploffings en geweervuur is Vrydag deurlopend in en om Bujumbura gehoor. Inwoners sê die polisie het die hele dag lyke van slagoffers van die geweldpleging verwyder. Kalmte is weer Saterdag in die hoofstad herstel.

’n Woordvoerder van die weermag, Gaspard Baratuza, het gesê ­gewapende mans het drie militêre basisse in Bujumbura aangeval wat die dag se geweldpleging begin het. Volgens hom is 79 aanvallers doodgeskiet en 45 ander is in hegtenis geneem.

Vier polisiebeamptes en vier soldate is ook in die gevegte dood. Beslag is op wapens en ammunisie gelê.

Die onluste in Burundi het in April begin toe pres. Pierre Nkurunziza aangekondig het dat hy hom vir ’n derde termyn as staatshoof verkiesbaar stel. Dit het skokgolwe deur ’n streek gestuur wat steeds onstabiel is, twee dekades ná die volksmoord in naburige Rwanda.

Vrydag se geweldpleging is deur Amerika en ander Westerse lande veroordeel wat vrees dat die sentraal-Afrikaland terug sou beweeg in etniese geweld.

Tot nou was die skeidslyne in die Burundi-krisis polities van aard. Westerse magte en buurlande vrees egter dat uitgerekte geweld ou etniese skeidslyne in die land met 10 miljoen mense kan trek.

In Burundi se 12-jaar lange burgeroorlog, wat in 2005 geëindig het, het rebellegroepe van die Hoetoe-meerderheid, insluitende ’n groep wat deur Nkurunziza gelei is, teen ’n weermag onder leiding van die Toetsi-minderheid geveg.

Dit is dieselfde etniese samestelling wat in Rwanda tot die volksmoord gelei het.

Merkel belowe dat Moslems Duitse identiteit sal aanneem

Angela Merkel, Duitse kanselier, moes Maandag terugkrabbel oor immigrasie om haar posisie te behou as voorsitter van die CDU by die party se jaarvergadering in Karlsruhe.

Die kanselier het sogenaamde asielsoekers aangemoedig om te integreer. Binne die eerste tien minute van haar toespraak wat 70 minute geduur het, het sy die kwessie van vlugtelinge aangespreek.

Sy het die teenkanting teen haar oopgrens-beleid goed afgeweer deur te verklaar dat multikulti ‘n leuen is omdat dit lei na parallel-gemeenskappe.

Kritici beskuldig Merkel dat sy verantwoordelik is vir die vlugtelingkrisis deur grense vir migrante oop te stel.

“Ons wil en sal die aantal vlugtelinge merkbaar verminder,” het sy belowe. Sy het gesê dit is in die belang van Duitsland, Europa en ook in die belang van migrante.

Sy het ook verklaar dat regse populisme geen kans staan in Duitsland nie omdat Moslems aangemoedig sal word om Duits te leer, Duitse wette na te kom en die “Duitse identiteit aan te neem”.

6,8 miljoen stemme vir Franse Front National: ”n verloorder wat swaar weeg’

Uiteindelik het die Front National van mevrou Marine Le Pen geen enkele streek in Frankryk kon inpalm nie: soos meningsopnames op die vooraand van die tweede rondte van die verkiesing voorspel het. Nietemin het die steun vir dié regse party skouspelagtig toegeneem en het hy 6,8 miljoen stemme op hom verenig. Vandaar die hoofopskrif van die koerant Le Parisien vanoggend: “Front National, ‘n verloorder wat swaar weeg”.

‘n Aspek wat ook allerweë in die media verswyg word, is dat die streeksparty wat meer onafhanklikheid vir die eiland Korsika bepleit, die Sosialiste verslaan het om ‘n verrassende oorwinning aan te teken.

Tydens haar toespraak ná die aankondiging van die uitslae en dat sy slegs 45,5% van die stemme gekry het, het Marion Maréchal-Le Pen gesê: “Daar is sommige oorwinnings wat die oorwinnaar in die skande steek.” Die regse en linkse partye wat in PACA en Nord-Pas-de-Calais-Picardie teen die Front saamgestaan het, het gewen maar het die argument van die FN dat hulle die “enigste ware opposisie” teenoor ‘n “verrotte en korrupte politieke klas” is, gestand gedoen.

Die Sosialistiese eerste minister, Manuel Valls, het gisteraand gesê dat “die gevaar van die Front National nog nie verby is nie”. Sy party het ook die belangrike Île-de-France, die streek van 12 miljoen mense rondom Parys wat 30% van die land se BNP verteenwoordig, met slegs 60 000 stemme aan die Republikeine se Valérie Pécresse moes afstaan. Die Sosialistiese kandidaat, Claude Bartolone, het hom hewige kritiek op die hals gehaal toe hy die “rassekaart” gespeel het deur te sê dat sy opponent die ryk voorstede en “die blanke ras” verteenwoordig.

Die Front National het sy aantal verkose streeksverteenwoordigers met drie vermenigvuldig, vanaf 118 tot 358, sedert die vorige verkiesing in 2010, iets waaroor Marine Le Pen gisteraand in haar noppies was. “Niks gaan ons keer nie,” het sy tydens haar toespraak in die dorpie Hénin-Beaumont gesê. “Die verdeling loop voortaan tussen globaliste en patriotte. Die globaliste beywer hulle vir die afwatering van Frankryk en sy volk.”

Die sentrum-regse Republikeine het sewe streke ingepalm, die Sosialiste vyf, terwyl die Korsikaanse nasionaliste dié op hul eiland gewen het.

Vir hierdie verkiesing is die aantal streke van 22 tot 13 verminder. Indien die ou, kleiner streke nog geldig was, sou die Front National onder mnr. Louis Aliot op grond van gister se stemme die streek Languedoc-Roussillon net-net gewen het.

Gedugte taalstryder Pieter Kapp oorlede

Prof. Pieter Kapp (76), gedugte taalstryder en emeritus-hoogleraar in geskiedenis aan die Universiteit Stellenbosch is Sondagoggend in die hospitaal in Somerset-Wes oorlede.

Kapp, gewese president van die universiteit se konvokasie, is verlede week geopereer maar het weens bloeding op die brein in ‘n koma verval.

Kapp het homself as president van die konvokasie tot 2011, onvermoeid vir die bevordering van Afrikaans as akademiese en onderrigtaal beywer.

Kapp was ook lid van die beheerraad van die Hugenotevereniging van Suid-Afrika.

Sy boek Nalatenskappe Sonder Einde – Die Verhaal van Jannie Marais en die Marais-broers is onlangs bekend gestel.

Die begrafnisreëlings is nog nie bekend nie.

Pravin Gorhan weer minister van Finansies

Die eertydse minister van Finansies, Pravin Gordhan sal Maandagoggend om tienuur vir ‘n tweede keer in sy pos ingehuldig word.

Die huidige minister, David van Rooyen word na Gordhan se ou portefeulje, Samewerkende Regering en Tradisionele Sake verskuif.

Gordhan was voorheen minister van Finansies van Mei 2009 tot Mei 2014.

President Jacob Zuma se aankondiging volg na felle kritiek uit alle oorde teen die aanstelling van Van Rooyen.

Zuma het glo talle voorleggings ontvang om sy besluit te heroorweeg.

Die rand het na die aankondiging van Gordhan se terugkeer na Finansies met bykans vyf persent gestyg.

Ekonome sê die aanstelling van Gordhan as Minister van Finansies gaan help om vertroue in die ekonomie te herstel, hoewel die skade reeds gedoen is.

Om terug te keer na waar die ekonomie `n week gelede was, gaan volgens ontleders, nie sommer gebeur nie. Vertroue sal eers herstel word as daar `n verandering in leierskap is, meen hulle.

Die rand het drasties verswak nadat Zuma verlede week aangekondig het dat David van Rooyen in die plek van Nhlanhla Nene aangestel word.

Die Reserwe Bank sal moontlik nog verplig word om rentekoerse aanstaande jaar te verhoog.

Die leier van die DA, Mmusi Maimane sê enige minister van Finansies moet kan standpunt inneem teen President Zuma om te keer dat sekere besteding goedgekeur word.