Kategorie: Nuus

Brande vlam weer op langs Tuinroete

Brandbestryders langs die Tuinroete probeer steeds om veldbrande tussen Rheenendal en KaRatara buite Knysna te blus wat gisteraand weer opgevlam het.

Sowat 60 brandbestryders is in die gebied ontplooi, het RSG berig.

Die plaaslike brandweerhoof, Clinton Manuel sê die brande het die potensiaal om opnuut verwoesting te saai indien die wind begin waai. Dit brand ook by Plettenbergbaai. Geen huise of lewens word in die stadium bedreig nie.

Vroeër vandeesmaand is sewe mense dood en meer as 400 huise vernietig in brande in die gebied.

Knysna Toerisme sê intussen planne word beraam om alle besoekers te huisves wat die jaarlike Oesterfees volgende maand wil bywoon.

Vier-en-twintig gastehuise is tydens die onlangse wegholbrande in puin gelê. ‘n Woordvoerder van die Toerismeraad, Elmay Bouwer sê daar is genoeg akkommodasie.

Marine in parlement nadat sy setel wen

Die Franse anti-immigrasie politikus Marine Le Pen (48) het Sondag ‘n setel in Frankryk se parlement verower, het Reuters berig.

Sondag na die tweede ronde van die wetgewende verkiesing,sal haar party, die Front National na verwagting tussen vyf en sewe setels wen. Nadat hy teen Emmanuel Macron in die presidensiële verkiesing verloor het, het Le Pen aangekondig dat sy ‘n parlementêre setel sal betwis, aangesien dit belangrik is dat wetgewers Macron se beleid teenstaan.

Le Pen het weer eens kritiek op Frankryk se verkiesingsstelsel gehad en gesê dat proporsionele verteenwoordiging haar party baie meer setels in die parlement sal gee.

“Dit is ‘n skandaal dat ons party wat 7,6 miljoen stemme in die eerste ronde van die presidensiële verkiesing gekry het en drie miljoen meer in die tweede ronde, nie ‘n groep in die Franse parlement kan vorm nie,” het die FN-leier gesê.

‘n Groep kan slegs gevorm word as ‘n party 15 setels kry, wat toegang tot befondsing asook meer spreektyd beteken.

Le Pen het 59 persent van die stemme gewen in ‘n oortuigende oorwinning teen haar beginner-mededinger in Henin Beaumont, ‘n arm voormalige mynstad, het die FN-woordvoerder Steeve Briois bevestig.

Sy het maklik die eerste ronde van die stryd teen nie minder nie as twaalf teenstanders gewen, en het ‘n aanspraakmaker van die nuwe president se party, La Republique en Marche (REM), Anne Roquet, gewen.

Le Pen se vennoot en party-adjunk, Louis Aliot het sy setel in Suidwes-Frankryk gewen.

Florian Philippot, haar regterhand in die Nasionale Front (FN), kon nie sy setel behou in die voormalige industriële gebied van Moselle in Oos-Frankryk nie. Hy word verantwoordelik gehou vir haar verlies, nadat Marine nie Macron verslaan het nie.

Gilbert Collard, ‘n ander topadviseur en een van slegs twee anti-immgrasie wetgewers in die parlement van 2012-2017, het ook sy setel verloor.

Die stempersentasie was besonder laag, wat aan Macron se alliansie ‘n voordeel tot dusver besorg het. Die Franse president se REM het volgens aanduidings ‘n groot meerderheid behaal in die tweede rondte van die parlementêre verkiesing. Sy party wat saam met Modem ‘n alliansie aangegaan het, het tot dusver 351 van die 577 setels in die Parlement ingepalm. Finale uitslae word afgewag.

OB se verslae oor verskeie skandale glo nie besonder diepgaande nie

Inligting oor die verslae wat na verwagting vandag deur die Openbare Beskermer (OB), Busisiwe Mkhwebane, bekend gemaak gaan word, is klaarblyklik nie volledig nie.

Haar woordvoerder, Cleopatra Mosene, het by navraag bevestig dat verskeie verslae vandag deur die kantoor vrygestel gaan word, maar wou nie verdere inligting bekend maak nie.

Die OB het gedurende haar besoek aan die Noord-Kaap verlede maand aangedui dat verskeie ondersoeke in die Vrystaat reeds afgehandel is en dat van die verslae nog vandeesmaand vrygestel kan word.

Mkhwebane het onder meer die omstrede multimiljoenrandse Vrede-suiwelprojek asook die Vrystaatse webtuiste-skandaal in die provinsie ondersoek. Van die verslae sou reeds in April bekend gemaak word, maar uitstel is glo gevra.

Intussen het die opposisie ‘n beroep op Mkhwebane gedoen om vandag die geleentheid te gebruik om verskeie verslae wat die betrokkenheid van die Gupta-familie insluit, ook openbaar te maak.

Dodetal kan styg na brand in Londense Moslemgebou

Die Britse polisie sê die dodetal na die brand in `n woonstelgebou in Londen het tot minstens 12 gestyg. Die woonstelgebou word hoofsaaklik deur Marokkane bewoon.

Op Twitter is daar gespekuleer dat dwelmhandelaars die gebou aan die brand gesteek het, maar dit kon nie bevestig word nie.

Sewentig pasiënte is in hospitale opgeneem en twintig van hulle se toestand is kritiek. Omstanders sê hulle het ligte aan die bokant van die gebou van 24 verdiepings en vasgekeerde mense met kinders voor vensters gesien.

Die polisiehoof, Stuart Cundy sê die dodetal sal waarskynlik nog verder styg. Cundy sê die soektog en opruimingswerk gaan nog lank duur.

Inwoners van die woonstelgebou het telkens oor die brandgevaar in die gebou gewaarsku en sê die afwerking van die gebou het moontlik bygedra dat die brand so vinnig versprei het.

Skietery op N1 met taxi-staking wat verkeer tot stilstand dwing in Gauteng

Geweerskote is afgevuur op die N1 in Midrand by die Mall of Africa, naby die Allandale-afrit. Nie net geweerskote het geklap nie, maar taxi’s word geskut en pendelaars word erg ontwrig weens protesoptrede deur taxibestuurders in Gauteng.

Groot verkeersontwrigtings kom regoor die provinsie voor. Meer as tien taxi’s is geskut omdat hulle die N1 hoofweg versper het.

Sommige pendelaars, veral in Pretoria, is met geweld uit busse gedwing. Taxi’s ry op plekke ook baie stadig om motoriste te frustreer.

PRAAG het met ‘n motoris in Fourways gepraat wat sê motors waag dit nie naby die taxi-versperrings nie weens die intimidasie.

Die Gautengse polisie probeer om die situasie onder beheer te kry. Mense is ook aangeraai om hul ritte uit te stel totdat die situasie onder beheer is.

Ontwrigtings kom voor op die N1 en M1 hoofweë tussen Johannesburg en Pretoria te midde van duisende taxi-pendelaars wat vandag staak.

Die Suid-Afrikaanse Taxi-raad het bevestig dat sy lede ‘n protesoptog na die kantore van die Suid-Afrikaanse taxi-finansieringsdiens in Midrand, noord van Johannesburg gaan hou.

Hulle betoog teen hoër finansieringskoste vir minibusse. Die taxi-eienaars en -bestuurders het toestemming vir die protesoptrede. SANTACO sê hulle sal ook motorvervaardigers, banke, versekerings- en brandstofmaatskappye teiken.

Linkse terroris wat op Republikeine skiet was Daily Show aanhanger

‘n Republikeinse kongreslid Steve Scalise verkeer in ‘n kritieke toestand nadat hy geskiet is deur ‘n linkse wit terroris wat belowe het om Trump te vernietig.

Die man het losgetrek op Republikeinse kongreslede wat bofbal geoefen het om in ‘n vriendskaplike wedstryd teen Demokrate te speel, nie ver van die Withuis nie.

Die skieter, wat deur die wetstoepassingsbeamptes geïdentifiseer is as die 66-jarige James T. Hodgkinson, is ‘n ondersteuner van Bernie Sanders en ‘n vurige ondersteuner van verlinkse TV-propagandiste, John Oliver, Rachel Maddow, en Bill Maher, het sy sosiale mediarekeninge gewys.

Oliver bied die The Daily Show aan waarin hy mbv “grappige” leuens veral wittes swartsmeer om ‘n anti-wit-agenda te bevorder. Verlinkses in Suid-Afrika is ook aanhangers van Oliver.

Volgens sy Facebook-bladsy was Hodgkinson ‘n “demokratiese sosialis” wat Bernie Sanders ondersteun het. Hy het selfs ‘n groot afbeelding van Sanders gehad as sy banier en ‘n profielfoto wat sê: “Demokratiese sosialis verduidelik in drie woorde: Ons die mense.”

Hodgkinson was onder die invloed van linkse samesweringsteorieë en het geglo dat president Trump bande met Rusland het. Hy het ‘n petisie onderteken waarin hy gevra het vir ‘n ondersoek na Trump-Rusland verhoudinge.

Minister sê Guptas se naturalisasie was niks buitengewoons

Daar is niks buitengewoon oor die toekenning van naturalisasie-sertifikate aan die Gupta-familie nie, sê die minister daarmee belas.

Die voormalige minister van binnelandse sake, Malusi Gigaba het Dinsdag ‘n verklaring uitgereik waarin bevestig word dat dokumente wat op sosiale media versprei is met betrekking tot hierdie besluit eintlik werklik is.

Gigaba se woordvoerder, Mayihlome Tshwete, het aan OFM News gesê die minister het die aansoek wettiglik goedgekeur ingevolge die Suid-Afrikaanse Burgerskapswet Amendement van 2010 in die Grondwet.

Tshwete het gesê die minister het die Gupta-familie se burgerskap aansoek goedgekeur nadat dit saam met ander aanbevelings van individue van ander dele van die wêreld na hom gebring is.

“Soos die meeste van die aanbevelings wat van die departement na die minister kom, het hy hulle goedgekeur,” het hy gesê.

“Die individue waaroor ons praat, was sedert 2008 selfs permanente inwoners. Ongelukkig is dit vir binnelandse sake, of hulle van sekere mense hou of nie en of sekere mense onaantasbaar geag word of nie, hulle het ‘n diens om aan elke individu of familie te lewer wat die dienste van Binnelandse Sake versoek.”

Hy het gesê daar was niks buitengewoon oor hierdie spesifieke geval nie en die feit dat dit in departementele dokumentasie geskryf is, bevestig dat die wet tot op die letter gevolg is.

Gigaba het in die verklaring gesê mediaberigte oor die saak was onregverdig en van sensasionele aard.

Hy het gevra dat die Departement van Binnelandse Sake chronologiese besonderhede verskaf van hoe al die aansoeke deur die Gupta-familie hanteer is sedert die familie die departement genader het.

David Hlabane, woordvoerder van die departement van Binnelandse Sake, het gesê hul departement het Gigaba se reaksie opgemerk. Hulle sal die feite verifieer en betyds ‘n ingeligte verklaring uitreik.

Gedenkdiens vir Afrikaanse skrywer PG du Plessis vandag gehou

Die NG Kerk Noord, Potchefstroom, hou Woensdag ’n gedenkdiens vir die befaamde Afrikaanse skrywer P.G. du Plessis.

Hy is Woensdag in die ouderdom van 83 oorlede ná ’n jare lange stryd teen prostaatkanker. Die diens is deur ds. Johan Raubenheimer behartig.

Een van die huldeblyke aan Du Plessis is gelewer deur sy vriend en medeskrywer, Hans du Plessis. Hy het veral sy vermoë geprys om karakters te skep waarmee lesers hulself kon vereenselwig.

“Hulle is mense wat ek en jy geken het, want hy het hulle geteken met siel. Hulle is geteken dat ons deernis met hulle kan hê, omdat hy deernis in hulle ingeskryf het. Nou, as ek dink aan P.G. du Plessis, dan sal ek aan hom dink as die sin in Suid-Afrika se mooiste boek.”

Du Plessis se vriendin en Aardklop-feesbestuurder, Alexa Strachan, het ook hulde aan hom gebring.

“My respek vir jou op alle vlakke het bloot bly groei. Maar, dit is nie jou invloed op my as kunstenaar wat ek die hoogste ag nie, dis ure op die lang pad, jou gekerm oor ek te vinnig ry en dan te veel wil stop, die effe sardoniese moeilikheid soek met niksvermoedende slagoffers, die goedige geskinder en saam mense-kyk, asook die liefdevolle kuiers om Marie se kombuistafel waaraan ek my verlies die meeste meet.”

Strachan het die Vrydag ná Du Plessis se dood bevestig dat daar tydens vanjaar se Aardklop-kunstefees in Oktober ’n huldeblyk aan die skrywer sal wees. Die aard hiervan sal nog bekend gemaak word.

Moody’s gradeer agt instellings af

Die graderingsagentskap Moody’s, het ‘n aantal kredietafgegraderings voorgesit met Eskom, Sasol, MTN, die Lughawensmaatskappy van Suid-Afrika en sewe ander maatskappye wat afgegradeer word.

Dit volg op die land se kredietafgradering Vrydag tot die kerf bó rommelstatus, met negatiewe vooruitsigte. Moody’s het Maandag ook die vyf vernaamste banke en versekeraars afgegradeer meestal tot die kerf bó rommelstatus.

Eskom is van B-A-1 tot B-A-2 afgegradeer met negatiewe vooruitsigte. Dit is twee kerwe onder beleggingsgraad.

Moody’s sê sy negatiewe vooruitsigte vir Eskom weerspieël sy negatiewe vooruitsigte vir die regering. ACSA is van B-A-A-2 tot B-A-A-3 ook met negatiewe vooruitsigte afwaarts aangepas.

MTN is afgegradeer, maar sy negatiewe vooruitsigte is na stabiel aangepas. Sasol is van B-A-A-2 na B-A-A-3 afgegradeer met ‘n negatiewe vooruitskouing.

Zille kruip láág, maar nie laag genoeg vir swart joernaliste

Die voormalige leidster van die DA, Helen Zille, het vanoggend om 11:00 weereens om verskoning gevra vir haar gewraakte twiets oor die positiewe aspekte van kolonialisme. Sy en die huidige leier van die party, asook haar eertydse protégé, Mmusi Maimane, het by ‘n perskonferensie verskyn waartydens sy ‘n voorbereide verskoning voorgelê het.

Zille het gesê:

“Ná ‘n tyd van debat en besinning, erken ek die aanstoot wat my twiet op 16 Maart 2017 aangaande die erfenis van kolonialisme veroorsaak het. Ek vra daarom onvoorwaardelik om verskoning aan die Suid-Afrikaanse publiek wat aanstoot geneem het weens dié twiet en my daaropvolgende verduideliking daarvan.”

Agterna is slegs vyf vrae toegelaat. ‘n Swart joernalis van Enca, Thulasizwe Simelane,  het gesê dat “kolonialisme tot apartheid gelei het, wat die dood van ontelbare (countless) swartmense veroorsaak het”. Hy het apartheid ook met nazisme vergelyk en Zille kwalik geneem dat sy nie met die gelykstelling van apartheid en nazisme saamstem nie.

‘n Gesette swart joernaliste van City Press het ook ‘n aggressiewe houding teenoor Zille ingeneem.

Volgens ‘n interne partybyeenkoms wat bereik is, gaan sy geen pos meer in enige besluitnemingsliggaam van die DA beklee nie, waaronder die federale uitvoerende komitee, die federale raad en die provinsiale raad. Sy sal egter as premier van die Wes-Kaap aanbly totdat haar termyn oor 18 maande verstryk. Enige kommunikasie wat sy namens die provinsie onderneem – en waartoe sy beperk sal wees – sal onderhewig wees aan goedkeuring deur die party.

Verder sal sy as lid van die DA aanbly.

Dr. Dan Roodt van PRAAG het in sy kommentaar vanoggend droogweg opgemerk:

“Tagtig persent van blankes stem vir die DA, maar slegs ses persent van swartes. Om ‘n aantal swart twittereerders ter wille te wees, wat heel moontlik nie eens vir die DA stem nie, het die party die tagtig pesent vervreem.”

Ooggetuies betwis polisieweergawe van moontlike terreuraanval in Amsterdam

Die Nederlandse polisie sluit terrorisme uit by die voorval waarin agt mense beseer is toe ‘n motor buite ‘n Amsterdamse stasie in hulle vasgery het. Maar ooggetuies verskaf ‘n ander weergawe as die amptelike polisieverklaring van wat gebeur het en beskryf die voorval as “vreesaanjaend”.

Agt mense is beseer nadat ‘n swart Peugeot deur voetgangers buite die sentraalstasie in Amsterdam geploeg het. Ses mense is hospitaal toe geneem, waarvan twee in ‘n ernstige toestand verkeer. Twee ander slagoffers is op die toneel behandel.

Volgens die Nederlandse koerant, Het Parool, het die polisie met die bestuurder gepraat en gevra om sy lisensie te sien, wat hy wel getoon het. Die man het daarna weggetrek, verskeie mense raakgekry en in ‘n lae muurtjie naas die moltreiningang vasgery.

Die Amsterdamse polisie het die bestuurder in hegtenis geneem, maar meen daar is “geen aanduiding hoegenaam” dat die motorongeluk ‘n ekstremistiese aanval was nie. Die motor het by die moltreiningang tot stilstand gekom, ná die botsing.

“Die verdagte is ondervra, en dit wil voorkom asof dit nie doelbewus was nie. Maar ons doen verdere ondersoek,” het die Amsterdamse polisie op hul Twitter-rekening gesê.

Volgens die amptelike verklaring, is ‘n 45-jarige Amsterdamse man deur die polisie voorgekeer weens ‘n oortreding, waarna hy in ‘n muur vasgery het. Polisiebronne het aan die Britse koerant The Telegraph gesê dat die bestuurder “siek geword” het en “nie bedoel het” om die motor te laat bots nie. Die motor beskik volgens berigte oor ‘n gekraakte voorruit.

Die bestuurder het iewers op die tremspoor geparkeer, en is deur die polisiebeamptes versoek om sy voertuig te verskuif. Hy het toe weggery en “ongesteld begin voel weens lae bloedsuikervlakke”, waarna hy agt mense beseer het.

Ooggetuies vertel ‘n ander verhaal. Verskeie getuies het aan die Nederlandse nuuskanaal AT5 gesê dat die motor teen hoë spoed vanuit ‘n ander rigting aangekom het, waarmee die polisieverklaring bevraagteken word.

‘n Getuie, wat na trem 26 oorgestap het op die oomblik toe die voorval plaasgevind het, is verbaas oor die polisie se weergawe dat die man ongesteld geraak het.

“Ek het die motor op die tremspoor sien staan en gedink, wel, as daar ‘n aanval sou plaasvind, is dit nou. Die bestuurder is deur twee beamptes genader. Ek het na hulle gekyk en aangestap. Ek was omtrent ‘n honderd treë weg toe motor vinnig wegry. Dit het vir my gelyk asof die man doelbewus vir die polisie wegry, maar niemand gaan vir ons die waarheid vertel nie.

Die motor het die tremspoor na Damrak gevolg en uiteindelik met ‘n muur by die ingang van die moltrein gebots. “Hy het die draai (in die pad) gevolg.”

‘n Tweede getuie, wat besig was om die rigting van die Stationsplein te stap ten tye van die voorval, het ook ‘n ander weergawe van die gebeure. “Ek was aan die westekant en het so pas deur die fietstonnel na trem 5 geloop,” het die man aan AT5 gesê.

“Ek was besig om met ‘n vriend te gesels toe hy my naam skree. ‘Hardloop, hardloop,’ het hy gesê. Ek het na regs gekyk en ‘n swart Peugeot teen hoë spoed na my toe sien aankom.” Die twee mans het opsy gespring en gesien hoe die motor tot stilstand kom omdat daar trems in die pad was.

“Die twee beamptes het toe na die man toe gegaan en sy bestuurderslisensie gevra. Een van die beamptes het aan sy kollegas beduie dat hulle nader moet kom. Die ander beampte het toe die bestuurslisensie van die man teruggegee en gelyk asof hy was dat hy ‘verder moet ry’.”

 

Volgens die getuies, wat minder as tien meter van die motor af was, het die bestuurder ‘n geïrriteerde indruk gemaak. “Hy het die bestuurderslisensie min of meer uit die beampte se hand gegryp. Toe, met ‘n telefoon in sy hand, het hy die motor aangeskakel en op volle spoed in die skare ingery. Ons het letterlik gesien hoe mense deur die lug vlieg.”

Die motor het versnel terwyl dit vorentoe beweeg, het die getuie gesê.

“Daar was paniek, jy kon mense hoor skree. Ek het self oortuig geraak dat dit buite die kwessie was dat die man ongesteld kon geraak het. Ek het dit oral in die media gelees en dis baie frustrerend. Na my mening het hy bloot twee pogings aangewend! Die polisie moes raakgesien het dat iets nie pluis is nie. Dit was nie bloot ‘n ongeluk nie.”

Die stasie en die omringende area is afgekordon, het die Nederlandse spoorwegmaatskappy, die NS, gesê. Tremdienste wat by die stasie se hoofingang eindig, is herlei.

Die Nederlandse polisie wou nie die naam van die bestuurder bekendmaak nie, wat suggereer dat hulle nie die publiek op nog ‘n moontlike Islamitiese aanval wou attent maak nie.

Die voorval het plaasgevind, presies ‘n week ná die terreuraanval by London Bridge wat agt mense laat omkom het, met dosyne wat gewond is. Nederland was sedert op ‘n hoë vlak van waaksaamheid ná die reeks aanvalle in ander Europese stede oor die afgelope maande.

‘n Nederlandse burger is laat Vrydag in hegtenis geneem nadat hy betrap is terwyl hy besig was om ‘n video te neem van een van die land se grootste stadions, het die polisie gesê.

Die 29-jarige Amsterdammer is buite die Philips-stadion in die suide van Eindhoven in hegtenis geneem waar die Nederlandse popsanger Guus Meeuwis opgetree het. Hy kon geen verduideliking bied oor waarom hy besig was om ten tye van die konsert die infrakstruktuur te verfilm nie, het NDTV berig.

Die verdagte is geradikaliseer, glo die polisie, en het hom Saterdagaand ‘n tweede keer in hegtenis geneem. Meeuwis het met die beplande konsert voortgegaan.

Vier vas wat ontruimde huise in Knysna besteel

Vier verdagtes is in hegtenis geneem op Knysna vir die beweerde besit van gesteelde goedere wat behoort aan inwoners wat hul huise moes ontruim het weens die brande.

‘n Woordvoerder van die polisie, Chris Spies, sê hulle het vermoed dat eiendom gesteel is by huise wat die vorige dag deur die nooddienste ontruim is.

Die verdagtes is in die besit van goedere ter waarde van R80 000 gevind. Hulle sal aanstaande week in die hof verskyn.

‘n Rooikop-brandslaner, die 24 jarige Bradley Richards word deur kollegas beskryf as toegewyd en altyd gereed om te gaan help brand slaan wanneer nodig.

Richards is oorlede nadat hy deur vlamme oorval is, terwyl hy en nog ‘n spanmaat besig was om brande te bestry in die Harkervillebos in die Plettenbergbaai omgewing, Woensdagoggend.

Die brande, oor ‘n groot gebied, het reeds groot skade aan eiendom en skole aangerig en duisende mense moes hul huise verlaat. Knysna is tot ‘n rampgebied verklaar.

Duisende inwoners van Knysna het vir ‘n tweede agtereenvolgende nag in skole en sale in die dorp deurgebring vir hul eie veiligheid. Nagenoeg eenhonderd huise, ‘n kerk en ‘n skoolkoshuis is in die brande vernietig.

Brandbestryders en lede van die weermag was deur die nag steeds besig om die brande te blus wat deur ‘n sterk wind aangeblaas word.

‘n Woordvoerder van die organisasie Working on Fire, Linton Rensburg, sê die brande woed oor ‘n groot gebied, wat pogings bemoeilik om dit onder beheer te kry. Rensburg sê verskeie groepe werk egter saam om die brande te blus.

Nog ‘n brandbestryder het ernstige brandwonde opgedoen in die verwoestende brandende in Knysna. Dit bring die dodetal in die gebied op vyf te staan.

Die brande is meestal onder beheer langs die Tuinroete tot by Nelson Mandelabaai waar vier brande steeds woed, maar onder beheer is.

Brandbestryders en weermagsoldate het deurnag in Knysna die vlamme onder beheer probeer bring waar vyftig hutte ook in die slag gebly het.

Veertig brandbestryders sal vandag vanaf die O R Tambo Internasionale Lughawe in Johannesburg vertrek na die Suid-Kaap om te help met brandbestryding in Knysna.

‘n Johannesburgse sakeman, Diederichs Stopforth het die span brandbestryders byeengekry. Hulp het intussen ingestroom en vliegkaartjies is gekoop om die brandbestryders met hul toerusting in die Suid-Kaap te kry.

Groot sakeondernemings het ook hulp beloof met vervoer, kos, komberse en tweerigtingradios.

Vier brande woed steeds in die Nelson Mandelabaai-metrogebied in die Oos-Kaap, maar brandbestryders is op die toneel by Colleen Glen, Bushbuck Ridge, Sardiniabaai en Elandsrivier. Die wind is glo besig om te bedaar.

Die polisie van Walmer ondersoek intussen ‘n saak van brandstigting ná ‘n verklaring van ‘n ooggetuie wat na bewering gesien het dat verdagtes petrol in die veld by Sardaniabaai uitgegooi het.

Die Bitou-munisipaliteit by Plettenbergbaai huisves 48 mense in gemeenskapsale nadat hulle daarheen geneem is weens brande en rook in die gebied.

‘n Woordvoerder, Howard Swartz, sê die een brand het gedurende die nag naby Airportweg opgevlam, maar is nou onder beheer. Onderbrekings in watervoorsiening in sommige gebiede is ook reeds herstel.

Theresa May: Findus pannekoeke in ‘n stukkende vrieskas

Die Skotse Nasionale Party, Brittanje se derde grootste party, kan moontlik ‘n sogenaamde progressiewe alliansie vorm met die Arbeidersparty om die Konserwatiewe Party uit die regering te kry.

Die leier van die SNP, Nicola Sturgeon wou dit nie bevestig of ontken nie en het slegs gesê dit is nog te vroeg om enige besluite te neem.

Die Skotse nasionaliste het meer as 20 setels in die verkiesing verloor. Die Britse eerte minister, Theresa May se Konserwatiewe Party kon ook nie ‘n volstrekte meerderheid behaal nie.

Die terreuraanvalle in Londen en Manchester is op May se brood gesmeer na haar ses jaar van leiding, aangesien sy as minister van binnelandse sake onder die loep gekom het, veral weens die besnoeiing van polisiegetalle. Haar versuim om aandag te geen aan wetstoepassing het verhoed dat die jihadiste gestop word.

En haar toestemming dat Libiese terroriste mag gaan deelneem aan ‘n coup d’etat in Libië en dat hulle daarna mag terugkeer volgepomp met jihadistiese ideologiese ywer, het ook nie gehelp nie.

Die uitslae tot dusver dui op ‘n hangparlement. Die finale uitslae word binnekort verwag.

Die Britse Eerste Minister het in die onlangse Britse politieke geskiedenis een van die mees dramatiese ineenstortings ervaar van enige leier nog, en het ‘n algehele meerderheid in die parlement verloor in ‘n blitsverkiesing wat sy voorspel het dat sy gemaklik sal wen.

May se arrogansie kan ook beteken dat Boris Johnson na vore kan tree as nuwe premier, nog ‘n algemene verkiesing en ‘n groter gemors by die puinhoop wat die Brexit-onderhandelingstafel vir die Konserwatiewe Party is.

Haar eindelose mantra van “sterk en stabiele leierskap” het talle begin irriteer en aan haar die bynaam van “Maybot” besorg met haar robotiese herhalings en geprogrammeerde leë frases. Vergeleke met Arbeiderleier Jeremy Corbyn, ‘n veteraan, wat die publiek as eg ervaar het, was May ‘n teleurstelling.

In ‘n seldsame onbekende ontmoeting met ‘n kieser wat verfilm is en viraal geraak het, het May gereageer deur leë veldtogslagspreuke te herhaal nadat ‘n vrou wat kwaad was vir welsynsinkortings, haar gekonfronteer het.

“Theresa May het die persoonlike warmte, kwinkslae, oratoriese vermoë en aantreklikheid van ‘n Indesit-yskas-vrieskas, wat foutief deur ‘n man genaamd Trevor vir vyf pond, kontant in die hand, ‘n bietjie reggetimmer is en wat nou vol ontdooiende Findus Crispy Pannekoeke is,” het die satiriese skrywer Rod Liddle het in die konserwatiewe politieke weekblad The Spectator geskryf.

TV-aanbieder Johann Botha gisteraand doodgeskiet in Johannesburgse middestad

Die voormalige aanbieder van die TV-program 50/50, asook aanbieder van ‘n klassieke musiekprogram op Pretoria FM, Johann Botha, is gisteraand tydens ‘n rooftog in die Johannesburgse middestad doodgeskiet. Botha het in ‘n kroeg in die Maboneng-buurt gekuier toe daar ‘n rooftog plaasgevind het. Die kroegeienaar self is insgelyks tydens die rooftog doodgeskiet.

Die direkteur van Pretoria FM, Willie Spies, het in ‘n verklaring gesê dat sy “dood… ‘n reuseverlies vir die land, media en die mense van Suid-Afrika” is. Sy dood onderstreep weer eens die vlaag van gewelddadige misdaad en rampokkery wat Suid-Afrika tans gevange hou.

Die Johannesburgse middestad, waar feitlik geen blankes meer woon nie, is volgens die Suid-Afrikaanse Polisiediens se misdaadstatistiek die derde gevaarlikste polisiedistrik in die land, ná Mitchellsplein en die middestad van Kaapstad.

Die Maboneng-buurt wat aan die oostekant van die stad in Jeppesdorp geleë is, bestaan uit opgeknapte geboue wat deur ‘n jong eiendomsontwikkelaar, Jonathan Liebmann, tesame met kroeë en ander vorme van vermaak, tot stand gebring is. Liebmann is reeds enkele jare gelede as die “ABSA Jewish Report Achiever of the Year” vir sy werk in die Maboneng-buurt aangewys. ABSA borg dié seremonie jaarliks met R4 miljoen.

In 2016 is daar 75 moorde in die Johannesburgse middestad gepleeg, volgens polisiestatistiek.