Kategorie: Nuus

Ottowa geskud deur skietery

‘n Skietery by die land se parlement waarin een soldaat dood is, het die Kanadese hoofstad, Ottowa geskud.

Volgens omstanders is minstens 30 skote afgevuur nadat die aanvaller die parlementsgebou binnegegaan het.

Een van die aanvallers is in die parlementsgebou doodgeskiet.

Skote is afgevuur net buite die vertrek waarin die Kanadese eerste minister, Stephen Harper met lede van sy Konservatiewe Party vergader het.

Harper is haastig onder begeleiding uit die gebou vergesel.

Harper het intussen getwiet dat die land nie deur die aanval geïntimideer sal word nie en dat die aanval van Kanada ‘n hegter nasie sal maak.

Die strate om die regeringsgeboue in Ottowa wat gewoonlik besig is, was Woensdag verlate nadat die regeringsamptenare deur veiligheidsdienste gemaan is om binne te bly.

Owerhede het aanvanklike gevrees dat die skietery deel van ‘n groter aanvalsplan mag wees.

Jim Watson, burgemeester het aan die Ottawa Citizen-dagblad gesê die stad is “steeds een van die veiligste stede in die wêreld, nie net in Kanada nie.”

Kanadese parlementsgeboue was voorheen toeganglik vir die publiek, maar kenners meen veiligheid sal nou opgeskerp moet word.

Volgens die jongste berigte soek die polisie na `n Kanadese man van Quebec wat blykbaar die Islamitiese geloof aangeneem het.

Katolieke in Afrika eis transformasie

Die Rooms Katolieke Kerk gaan nie transformasiedruk vryspring nie, veral omdat die kerk se lidmate in Afrika groei.

Leiers van die kerk meen uitdagings van gelowiges in Afrika word nie behoorlik aangespreek nie.

Die byeenkoms van kerkleiers en akademici by die St Augustine-kollege van Suid-Afrika in Johannesburg volg nadat Pous Franciskus twee weke met die 200 Katolieke biskoppe in die Vatikaanstad vergader het.

Dokter Jakub Urbaniak van die teologie-afdeling by die kollege sê Afrika het die vinnigste groeiende aantal lidmate van die kerk, maar min aandag word ongelukkig volgens hom aan Afrika se probleme gewy.

Urbaniak sê vir Afrika is kwessies soos hoe MIV/Vigs gesinne raak, enkelouers en families wat deur kinders versorg word, belangriker as dié wat wel bespreek is.

‘n Professor van die departement van kerkgeskiedenis by die Universiteit van Pretoria, Graham Ducan sê die kerk het nie met planne vorendag gekom om die kerk te transformeer nie.

Wit én bruin uit staatsdiens gedryf

Daar is al hoe minder werk vir wit en bruin in die staatsdiens, en die twee minderheidsgroepe wat Afrikaans praat, is nou onderverteenwoordig volgens regstellende aksie (RA)-teikens om die demografie van die land te weerspieël, sê ‘n opposisie-woordvoerder.

In antwoord op geskrewe parlementêre vrae oor onder meer die aantal werknemers van elke bevolkingsgroep in die staatsdiens, blyk dit dat die teiken feitlik reeds vir swartes bereik is. Indiërs word die meeste bevoordeel en is met 0.75% oorverteenwoordig.

Wit en bruin is met bykans ʼn halwe ʼn persentasiepunt onderverteenwoordig. Waar wittes 9,2% van die land se bevolking uitmaak, is hul verteenwoordiging in die staatsdiens net oor 8,8%.

Uit die minister se antwoord blyk dit dat daar tans 1,328,687 werkers in die staatsdiens is. Hiervan is daar onsekerheid oor die ras of geslag van 1,637 persone.

Wat die res aanbetref is daar 1,055,274 (79,4%) swart, 43,120 (3,2%) Indiërs, 111,236 (8,3%) bruin en 117,420 (8,8%) wit.

Dit blyk duidelik uit die statistiek hoe daar toenemend teen wittes in die werkplek gediskrimineer word. Hy sê die hele proses is die laaste twintig jaar aggressief gedryf en Suid-Afrika het ʼn enorme prys daarvoor betaal deur met dienslewering in te boet.

“Die ANC-regering moet besef dat sy teikens nou bereik is en ophou jag maak op wittes en bruines. Indien daar voortgegaan sou word om regstellende aksie te dryf soos tot nou toe gedoen is, sal wittes binne enkele jare totaal uit die staatsdiens gedryf word,” het die VF+ gesê.

Jansen en Goldberg dans die Boerehaat-riel met oorgawe

Die geseur van die bruin rektor van die Universiteit van die Vrystaat oor “transformasie” oftewel gedwonge verengelsing van Afrikaanse instellings, het ‘n gehoor wat die Joodse redakteur van timeslive, Reuben Goldberg betref.

Goldberg het die ongewilde baas Jonathan Jansen se gedeeltelike mislukking om Engels af te dwing met sy gewone über-Boerehater-simpatie en growwe gemeenplase begroet.

Volgens Goldberg se blad het Jansen onlangs een oggend wakker geword met twee dosyn “te koop”-borde buite sy huis. Kennelik is die rektor nie so gewild in sy tuisdorp soos in sekere Jingo-voorstede van Johannesburg waar hy Afrikaners as agterlike, rassistiese bullebakke voorhou nie.

Jansen meen die borde is geplaas deur ‘n persoon of persone van sy universiteit wat ontsteld is oor sy anti-Afrikaanse transformasie-agenda.

Eerder as om te besin oor sy stommiteite om internasionaal erkende taalregte te ignoreer, het Jansen klaarblyklik homself eerder tot bruin vervolgingswaan voor sy Engelse gehoor gewend.

Diktator Jansen was ‘n lid van ‘n paneel van senior akademici in Kaapstad wat Dinsdagaand transformasie by universiteite bespreek het.

Jansen het sonder ironie na “tradisioneel” Engelssprekende universiteite verwys, ‘n onbewuste erkenning dat Afrikaanse instellings intussen ook verengels het.

Hy het gesê hoewel die ou Engelse universiteite soos Kaapstad, ‘n “kultuur van hoë intellektuele lewendige debat” het, ken “tradisioneel Afrikaanse universiteite soos Stellenbosch en Bloemfontein net doodsdreigemente en beledigings”.

Jansen het gesê hy kry glo gereeld doodsdreigemente. Indien dit waar is, is dit egter vreemd dat die polisie dit nog nie opgevolg het nie.

Die gehoor het egter merkbaar verstyf toe hy ‘n onbedekte aanval op die Universiteit van Stellenbosch geloods het. Jansen het gesê die US het ‘n ernstige gebrek aan sensitiwiteit vertoon deur die begrafnisdiens van hul eerste swart visekanselier Russel Botman, by die DF Malan-sentrum te hou.

“Ek het net gedink dit was hoogs onsensitief. DF Malan was die eerste apartheidspremier. Hy het chaos in die land gesaai. Om nie te besin daaroor as ‘n universiteit nie, is ‘n baie hartseer ding,” het hy gesê.

Swart boere waarsku minister, Absa prys grondbeleid

Swart boere het gevra dat grond slegs toegewys word aan nuwe swart boere wat die vermoë het om dit te gebruik.

Die president van die swart boerevereniging, Mzamo Mlengana, sê die minister van Grondhervorming, Gugile Nkwinti, moet sorg dat maatstawwe in plek is vir die keuring van nuwe boere.

Mlengana sê sonder boerderykennis, strek só ‘n grondbegunstigde tot nadeel van die landbou en skep dit die indruk dat swart boere nie kan boer nie.

Mlengana sê ‘n goeddeurdagte grondherverdelingsproses sal voedselsekuriteit verseker en tot voordeel van die land wees.

Die “hand van vriendskap en samewerking deur mnr. Gugile Nkwinti is dié geleentheid van ‘n leeftyd vir die landbou”, sê mnr. Ernst Janovsky, hoof van Absa AgriBesigheid.

Janovsky het Nkwinti, Minister van Landelike Ontwikkeling en Grondhervorming, by Agri SA se kongres geprys.

Hy het by die kongresdinee gesê die “oorlog” is verby. “’n Wit vlag is gehys wat sê kom ons werk saam en hierdie samewerking moet vir ons die pad vorentoe baan. Ek wil elkeen uitdaag om dit môre op jul plase te begin toepas.”

Hy het verwys na Nkwinti se opmerkings dat hy in sy skik is met die vordering wat Agri SA met hervormingsplanne maak. Hy het gesê hy is verleë dat hy nie daarvan bewus was nie.

Janovsky sê banke kan baat by grondhervorming en meer winsgewend wees. “Hierdie moet nie ’n meulsteun om jou nek wees nie. Hierdie is die geleentheid waarvoor almal gewag het. As jy kyk na hoeveel kos in die volgende 40 of 50 jaar geproduseer moet word, is hierdie die grootste enkele geleentheid wat nog binne Suid-Afrikaanse landbou bestaan het.

“Die Minister het gesê die planne het verander en júlle planne lyk beter as myne. Dit is ’n groot verandering. Moet nie daardie geleentheid laat verbygaan nie, al gaan dit nie maanskyn en rose wees nie. Daar is staatsdepartemente wat nog nie ingekoop het by dit wat gebeur het nie. Van die banke se kant af sal ons julle help bemagtig om die pad vorentoe te stap.”

Janovsky het boere gemaan om nie geleentheid te laat verbygaan nie: “Moet nie dat dit by julle verbygaan of toelaat dat klein jakkalsies die skape opvreet nie. Dit is ’n geleentheid om aan te gryp.”

Swartvlek-kwessie oor SA sitrus na WHO

Die krisis wat die EU oor swartvlek by SA se sitrus veroorsaak het, is op hoë vlak met die WHO opgeneem.

Sitrusboere het die stap van die Departement van Handel en Nywerheid verwelkom om die swartvlekkwessie na die Wêreldhandelsorganisasie (WHO) te neem, maar gesê ander EU-kanale moet ook oop bly.

Mnr. Rob Davies, Minister van Handel en Nywerheid, het die kwessie met die sanitêre en fitosanitêre komitee van die WHO opgeneem omdat die Europese Unie dreig om te weier dat sitrusvrugte uit Suid-Afrika die gebied binnekom omdat hulle glo bang is dat die siekte na boorde in die gebied oorgedra kan word.

Davies meen dat die EU se standpunt daarop gemik is om sy lidlande te beskerm deur hoogs mededingende sitrus uit Suid-Afrika te beperk, eerder as wat die unie oor plantgesondheid besorg is.

Hy sê wetenskaplike kennis ondersteun nie die EU se aantyging dat swartvleksiekte Europese boorde kan besmet nie. Volgens hom het die EU ‘n voorstel van Suid-Afrika om die EU in verskillende sones te verdeel en strenger regulasies in te stel vir sitrus wat na sitrusproduserende gebiede in die suide van Europa uitgevoer word, geïgnoreer.

Mnr. Pieter Nortjé, voorsitter van die sitrusprodusentevereniging (CGA), sê hulle verwelkom die stap, maar meen dat die aangeleentheid dalk uitgeklaar kan word vóórdat dit na die WHO gaan. “Daar is reeds gunstige verwikkelinge deurdat Europa ‘n onafhanklike paneel van kundiges saamgeroep het om die feite oor swartvlek om ‘n tafel te bespreek. Indien dit in ons guns afloop, sal die saak nié voor ‘n paneel van die WHO hoef te dien nie.”

Hy glo dat die deurlopende inligting wat hulle aan die Departement van Handel en Nywerheid deurgegee het, verseker het dat die minister baie goed ingelig is oor die aangeleentheid.

Nortjé sê gevestigde en nuwe sitrusprodusente is onder geweldige finansiële, operasionele en administratiewe druk om simptoomvrye vrugte te lewer. “Die sitrusbedryf se koste uit eie sak was vanjaar byna R1 miljard. Die Departement van Landbou, Bosbou en Visserye is onder net soveel druk om die proses te administreer.”

Tog is dit nie net slegte nuus nie. “Die goeie wat hieruit ontstaan het, is dat die sitrusbedryf en Departement van Landbou mekaar gevind en bygestaan het sodat ons nou net ‘n sterker uitvoerder gaan word.”

Bron: landbou.com

Poskantoorwerkers aangeval, petrolbomme gegooi

Drie personeellede wat by die Poskantoor werksaam is, is Dinsdag in Krugersdorp aangeval.

“Die drie persone het by die possentrum gewerk toe hulle met klippe bestook is,” het kapt. Appel Ernst, woordvoerder van die polisie in Gauteng, gesê. “Hulle het geringe beserings opgedoen.”

Drie vragmotors van die Poskantoor en ander privaat motors is ook beskadig. “Niemand is nog in verband met die voorval in hegtenis geneem nie,” het Ernst gesê.

Intussen het die Poskantoor bevestig dat die Belle Ombre- en Atteridgeville-poskantore gesluit is nadat petrolbomaanvalle twee geboue beskadig het.

Maandag het die Belle Ombre-poskantoor en Dinsdag het Atteridgeville deurgeloop. Die skade is glo gering.

“Die polisie volg alle leidrade en ondersoek tans kringtelevisiebeeldmateriaal om die verdagtes uit te ken,” het die Poskantoor in ʼn verklaring gesê.

“Nie een van die werknemers is beseer nie, maar traumaberading is vir die kassiere by die takke gereël,” lui die verklaring. Die aanvallers wat die petrolbomme gegooi het, het hulself glo geïdentifiseer as stakende werkers.

Geen posstukke is beskadig nie.

“ER24-paramedici en die Tshwane-brandweer het baie vinnig reageer op die voorvalle,” het die Poskantoor gesê.

Permanente Poskantoor-werknemers staak oor ʼn salarisverhoging van 15% en tydelike werknemers eis permanente aanstellings.

Britse koerant suig Zuma-kritiek teen Oscar uit hul duim

Die Britse koerant, The Guardian, het dié week voorgegee dat hulle ‘n eksklusiewe onderhoud met president Jacob Zuma gevoer het, maar dit blyk ‘n versinsel te wees.

Die president het glo nie enige onderhoud toegestaan aan die koerant in verband met die Oscar Pistorius-verhoor of enige ander kwessie nie.

“‘n Joernalis van die Guardian het die indruk geskep dat hy die afgelope week ʼn eksklusiewe onderhoud met die president gevoer het oor die Pistorius-saak,” het Mac Maharaj, woordvoerder van die presidensie, in ʼn verklaring gesê.

Maharaj sê die verslaggewer het oor ‘n byeenkoms betreffende mediavryheid tydens ʼn informele netwerksessie wat Sondag gehou is, berig.

Die Guardian het voorgegee dat Zuma Oscar se regspan gekritiseer het nadat hulle aangevoer het dat hul kliënt Pistorius nie tronkstraf behoort te kry nie omdat hy gestremd is en “baie geld het”.

Pistorius se prokureurs het ter versagting getuienis gebring oor Suid-Afrikaanse tronke wat nie behoorlik na gestremde mense kan omsien nie omdat die storte byvoorbeeld nie handrelings het nie.

Die Paralimpiese atleet het intussen sy eerste nag in sy sel in die hospitaalvleuel van die Kgosi Mampuru-gevangenis in Pretoria deurgebring.

Hy is gister tot vyf jaar tronkstraf gevonnis nadat hy skuldig bevind is aan strafbare manslag.

In die hospitaalvleuel is daar 24 uur permanente toesig en twee verpleegsters voltyds aan diens.

Die gevangenis se kommissaris, Zebilon Monama, sê hy is deur ‘n kapelaan en ‘n sielkundige besoek. Monama sê Pistorius is in ‘n enkelsel geplaas weens sy kwesbaarheid.

‘n Woordvoerder van Korrektiewe Dienste, Manelisi Wolela, sê Pistorius word saam met nog agt gestremde oortreders aangehou.

Die Departement van Korrektiewe Dienste sê intussen geen spesiale maatreëls sal getref word om Pistorius se veiligheid in die tronk te verseker nie.

Dit volg na vroeëre beweerde doodsdreigemente van bendelede in die tronk.

Vyf jaar vir Oscar Pistorius

Die paralimpiese atleet, Oscar Pistorius, is vir vyf jaar tronk toe gestuur.

Hy het Dinsdag sy vonnis gehoor nadat hy vroeër skuldig bevind is aan strafbare manslag na die skietdood van sy vriendin.

Regter Thokozile Mazipa het Pistorius tot vyf jaar tronkstraf gevonnis vir die dood van Reeva Steenkamp op 14 Februarie 2014.

Hy is voorts tot drie jaar tronkstraf, opgeskort vir vyf jaar gevonnis vir die oortreding van die wapenwet. Die vonnisse sal gelyklopend uitgedien word.

Die vonnisoplegging het meer as ‘n uur geduur.

Regter Masipa het die verskillende vonnis-moontlikhede oorweeg en ‘n uiteensetting gegee.

Die belange van die gemeenskap, die erns van die misdaad en die persoonlike omstandighede van Pistorius is volgens die regter in aanmerking geneem.

Pistorius sal waarskynlik tien maande gevangenisstraf in die Kgosi Mampuru gevangenis in Pretoria uitdien voordat hy vir parool in aanmerking kom.

Volgens Artikel 276 van die Strafproseswet, kan ‘n sesde van ‘n gevangenistermyn omgeskakel word huisarres as die vonnis nie meer as vyf jaar is nie.

Regter Masipa het met haar vonnisoplegging gesê ‘n opgeskorte vonnis of korrektiewe toesig sou nie ‘n gepaste vonnis wees nie.

Die Nasionale Vervolgingsgesag sê intussen die NVG het nog nie besluit of hy gaan appelleer teen Pistorius se skuldigbevinding aan strafbare manslag nie.

Die regsverteenwoordiger van die Steenkamp-gesin, Dup de Bruyn het na die vonnisoplegging gesê die reg het geseëvier en die regte vonnis is opgelê.

Pistorius is na die hofverrigtinge in ‘n gepantserde voertuig na die gevangenis geneem.

Die atleet se loopbaan is waarskynlik verby aangesien hy nie toegelaat sal word om aan die 2016 Paralimpiese Spele deel te neem nie, selfs al word hy vroeër uit die tronk vrygelaat.

Die Internasionale Paralimpiese Komitee sê hy sal verbied word om aan enige van hulle byeenkomste deel te neem vir die volle vyf jaar wat sy vonnis is.

Die verbod sal steeds geld selfs al word hy vroeër vrygelaat onder huisarres of op volle parool.

Ryk sakeman van Johannesburg in hof oor gesteelde koperkabels

‘n Johannesburgse sakeman, wat in ‘n huis van R10m in die spogwoonbuurt Atholl woon, het gister in die Roodepoortse Landdroshof verskyn op aanklag van gesteelde koperkabels. Hy word saam met vier medepligtiges aangekla.

Na bewering het die sakeman gesteelde koperkabels by sy skrootwerf aangekoop. Hy word daarvan verdink dat hy aan die hoof staan van ‘n hele sindikaat wat koperkabels steel.koperkabelsHy besit ‘n skrootwerf in Roodepoort aan die Wes-Rand waar hy saam met die vier ander aangeklaagdes in hegtenis geneem is. Hy het gepoog om die polisiebeamptes met ‘n bedrag van R30 000 om te koop, maar die beamptes het geweier om dit te aanvaar en hom aangekeer.

Volgens sekere bronne is die gesteelde koperkabels verwant aan die waterskaarste wat Johannesburg verlede maand getref het. Inwoners was omtrent drie weke sonder water ná ‘n kragonderbreking weens kabeldiefstal en vandalisme by ‘n groot pompstasie.