Gevaarlike gevangene ontsnap

‘n Gevangene wat vandag vir verkragting gevonnnis sou word het vanoggend by die Bloemfonteinse landdroshof ontsnap.

Die 35-jarige John Ntseki het glo by die hofsaal uitgehardloop, deur verskeie kantore en deur ‘n venster oor die dak ontsnap.

Die polisie se Chaka Marope sê Ntseki is gevaarlik en moenie gekonfronteer word nie.

Ntseki is van Batho. Voorheen is berig dat hy gevra het om na die toilet te gaan.

Namibiese plaasmoord: Verdagtes vas

Vyf swart mans wat van die moord op mnr. Reinhard Schmidt op die Namibië Hoodia Jagplaas verdink word, is Dinsdagaand in Windhoek in hegtenis geneem, het die Republikein berig.

Hoofinspekteur Samuel Gariseb van die Mariental-polisie het gister gesê die vermeende misdadigers sal vandag na Kalkrand vervoer word waar die ondersoek na die moord voortduur.

Gariseb kon egter nie gister die name van die verdagtes verstrek nie, maar het gesê drie van die swartes het vermoedelik by Schmidt se huis ingebreek, terwyl die ander twee in ’n motor vir hulle gewag het.

Van die items wat hulle uit Schmidt se huis gesteel het, is intussen gevind en die ander items is vermoedelik reeds verkoop.

Schmidt, ’n Duitse burger en eienaar van die jagplaas buite Kalkrand, is verlede Vrydag­oggend dood in sy huis aangetref met sy hande agter sy rug vasgemaak en sy mond en neus met kleefband toegeplak. Die nadoodse ondersoek is nog nie voltooi nie, maar Schmidt het vermoedelik versmoor.

Die mans is vyf dae ná die moord in hegtenis geneem, nadat die polisie en bestuur van die jagplaas met ’n onverpoosde ondersoek die Vrydag begin het.

“Ons is baie dankbaar vir al die hulp en ondersteuning wat ons van die Kalkrand-polisie, plaasbure en die gemeenskap van ­Kalkrand en Schlip gekry het,” het Schmidt se dogter, dr. Anja Huppertz, Donderdag gesê.

“Die een positiewe ding uit hierdie tragedie is die besef dat daar werklik ’n gemeenskap van wit en swart bestaan wat saamstaan om die land te ontwikkel en sy wettigheid te verseker.”

Huppertz en haar ma, me. Gudrun Schmidt, het van Duitsland na Namibië gevlieg ná die nuus van die moord. Huppertz sê haar ouers het 40 jaar gelede Namibië besoek en omdat hulle lief vir die land geword het, wou hulle nog altyd ’n plaas hier koop. Schmidt was die eienaar van die Reinhard Schmidt Lennestadt RSL GmbH maatskappy in Duitsland wat die hoofverskaffer van plastiese en metaalinspuiters vir General Motors, Volkswagen, Ford en tot ’n minder mate BMW was. Die maatskappy het ook produksieaanlegte in Spanje, Portugal en Kanada gehad.

Schmidt word Maandag op die plaas begrawe.

PUK se skorsing van SR-lid opgehef

Die Noordwes-Universiteit se visekanselier, Dan Kgwadi, is verantwoordelik om die Potchefstroom-kampus se studenteraadvoorsitter, Monica van Schalkwyk, se skorsing uit die Institusionele Verteenwoordigende Studenteraad (IVSR) op te hef.

Van Schalkwyk se prokureur, Werner Human, sê haar skorsing was onregmatig. Daar is ook geen redes verskaf nie. Human sê sy is geskors, vermoedelik weens ‘n meningsverskil met lede van die IVSR.

Human het in ‘n brief aan Kgwadi gevra dat hy haar skorsing teen môre moet ophef, omdat hy volgens die statuut die hoofdissiplinêre beampte is en die fout moet regstel.

Die studenteraad van die Potch-kampus het intussen sy steun aan Van Schalkwyk gegee. Haar skorsing kom glo nadat sy standpunt ingeneem het teen ‘n grondwetwysiging wat deur ISR-lede, wat die Vaaldriehoek- en Mafikeng-kampusse verteenwoordig, voorgestel is.

Die voorgestelde wysiging verklaar dat besluitneming van die IVSR sonder instemming van die onderskeie partye kan plaasvind.

Dit kom daarop neer dat besluite oor kampusaangeleenthede deur die IVSR geneem kan word sonder dat hulle dié onderskeie kampusse verteenwordig.

Kgwadi het Vrydag bekend gemaak dat Van Schalkwyk heraangestel is in haar posisie as adjunkvoorsitter van die Institusionele Verteenwoordigende Studenteraad (IVSR) nadat sy haar vetoreg wou uitoefen.

Nog ‘n bomdreigement in Gauteng

Nog ‘n bomdreigement is in Pretoria ontvang nadat die Clearwater Mall in Roodepoort Maandag ontruim ontruim moes word vir dieselfde rede.

Die Absa-bank in Van der Hoffweg in die weste van Pretoria is Donderdag inderhaas ontruim word nadat die bank se assistentbestuurder omstreeks 11:40 ‘n anonieme oproep ontvang het om te sê dat ‘n bom oor twee minute sou afgaan.

Die gebou is vinnig ontruim en plofstofdeskundiges sowel as die honde-eenheid het die perseel gefynkam, maar kon nie enige teken van ‘n ploftoestel opspoor nie.

Cecile Braun, die sentrum se bemarkingsbestuurder, het bevestig dat die bank ontruim moes word na die dreigement.

Die polisie het intussen ‘n soektog na die anonieme oproeper van stapel gestuur.

Staatsveiligheid wil amptenare wat vir CIA werk uitsnuffel

Die departement van Staatsveiligheid sê bewerings wat op sosiale media gemaak word dat sekere openbare ampsdraers vir die Amerikaanse spioenasiediens, die CIA, werk, sal ondersoek word.

Daar word beweer dat die Openbare Beskermer, Thuli Madonsela en sekere opposisieleiers by spioenasie betrokke is.

‘n Woordvoerder van die departement, Brian Dube sê die bewerings is op ‘n webwerf en ander sosiale media-platforms gemaak.

Daar word bespiegel dat Madonsela, die EFF-leier Julius Malema, die voormalige parlementêre leier van die DA, Lindiwe Mazibuko en die president van Amcu, Joseph Mathunjwa CIA-spioene is.

Die adjunkminister van Verdediging en Militêre Veterane, Kebby Maphatsoe het voorheen gesê die openbare beskermer, Thuli Madonsela is deur die CIA geplant.

uThuliumele asitshele ukuthi ubani ihandler yakhe [Thuli moet ons vertel wie haar hanteerder is],” het Maphatsoe toe gesê.

“Hulle gebruik selfs van ons instellings nou … Hierdie Hoofstuk 9-instellings is deur die ANC geskep, maar word nou teen ons gebruik… Ama [die] Amerikaners wil hul eie uitvoerende hoof in Suid-Afrika hê, en ons moet dit nie toelaat nie,” het Maphatsoe gesê.

Die Openbare Beskermer sê sy is verras dat die departement van Staatsveiligheid bewerings dat sy en sekere opposisie politici by spioenasie betrokke is, ernstig opneem.

Madonsela se woordvoerder, Oupa Segalwe sê die bewerings is belaglik. Hy sê hulle het dit by misdaadintelligensie aangemeld om te ondersoek en uit te vind wie die misdadigers is wat daarvoor verantwoordelik is.

Segalwe sê hulle het nie verwag dat enige redelike persoon die bewerings in ‘n ernstige lig sou beskou nie.

Die webwerf beweer onder meer dat Mazibuko deur die Amerikaanse intelligensiedienste opgelei is nadat sy deur Madonsela gewerf is.

Vyf bejaardes sterf, drie kritiek na bussie verongeluk

Drie inwoners van die Bult Aftree-oord in Bultfontein in die Vrystaat is in ‘n kritieke toestand in die Mediclinic Bloemfontein.

Dit kom ná ‘n ongeluk Donderdag, waarin ‘n bussie waarin die groep gereis het, omgeslaan het ongeveer 6 km buite Bulftontein.
 
Die inwoners was op pad terug van ‘n uitstappie na Florisbad naby Bloemfontein. Lettie Muller, Daan Minnie, Dinie Aschar en Charlotte Lategan is op die toneel dood.
 
Amanda Appelgryn, woordvoerder van die hospitaal, sê vyf pasiënte is opgeneem.

Die bestuurder van die oord, Gert Bezuidenhout, sê Marie Ehlers is in die hospitaal oorlede.
 
Volgens hom is die bestuurder en ‘n verpleegster wat ook in die bussie gereis het, net lig beseer.

Die bussie is glo van agter deur ‘n bakkie getref. Die bakkie wou verbysteek, maar moes terugval vir ‘n aankomende vragmotor. In die proses het die bakkie die bussie getref.
 
‘n Woordvoerder van Life Rosepark-hospitaal in Bloemfontein het gesê die bestuurder van die bussie, Hendrik Neethling, is reeds ontslaan. Hy het ‘n sny in die kop en sy skouer is beseer.
 
Die verpleegster is getraumatiseer, maar fisies ongedeerd.

Minister dreig om huursoldate te laat arresteer

Die minister van verdediging, Nosiviwe Mapisa-Nqakula het gewaarsku dat voormalige SAW-soldate wat as huursoldate in Nigerië optree, in hegtenis geneem moet word wanneer hulle terugkeer huis toe.

“Die polisie het ‘n verantwoordelikheid om te verseker dat, as hulle terugkom, die mense in hegtenis geneem word en die [Nasionale Vervolgingsgesag] het ‘n verantwoordelikheid om hulle te beheer. Daar is gevolge om die land te verlaat en enige vorm van militêre hulp as ‘n huursoldaat te verleen wat nie deel van die ontplooiing deur die regering is nie,” het Mapisa-Ngqakula gesê.

Abuja het egter gesê dat die ooreenkoms wat hul betrokkenheid uiteensit is met president Jacob Zuma sowel as op die hoogste vlakke van die Suid-Afrikaanse regering uitgeklaar, selfs al is die minister van verdediging nie bewus daarvan nie.

Volgens die Instituut vir Sekerheidstudies (ISS) is verskeie oud-Suid-Afrikaanse Lugmag-vlieëniers ook deel van die oorlog teen die Islamitiese insurgente Boko Haram in Nigerië.

Met presidensiële verkiesings hierdie maand, is Nigerië daarop gefokus om van Boko Haram ontslae te raak in al die groot stede voor stemdag op 28 Maart.

Die Suid-Afrikaners, ‘n span van 100 mense, lei glo spesialiseenhede in die Nigeriese weermag op.

Die oud-soldate speel glo ‘n belangrike rol in die stryd teen die ekstremiste nadat hulle gehuur is deur die Wes-Afrika-land saam met ander militêre kenners van Brittanje, die Verenigde State van Amerika en Frankryk.

“Die voormalige SAW-lede speel beslis ‘n groot rol in hierdie offensief. Hulle is in die land vir ‘n hele tyd reeds betrokke in die opleiding van ‘n paar gespesialiseerde NDF [Nigeriese Weermag] eenhede,” het ‘n voormalige militêre intelligensiebron gesê.

Skadugroep teiken oud-rektor van Potch

Die skadudrukgroep, Higher Education Transformation Network, het aanklagte van bedrog teen die voormalige rektor van die Universiteit van Noordwes, Theuns Elof ingedien.

RSG berig dat Eloff en twee ander amptenare daarvan beskuldig word dat hulle die oordrag van tien miljoen rand na die Noordwes Hoër Onderwys-trustfonds onwettig goedgekeur het.

Die drukgroep voer aan dat daar botsende belange is aangesien Eloff nou die nie-uitvoerende direkteur van die trustfonds is.

Die drukgroep sê hulle het `n saak by Pretoria se Sentrale Polisiestasie ingedien.

Hulle hou vol dat staatsgeld misbruik is.

Na bewering is ene dr Ingrid Nonjongo Tufvesson, die transformasiebeampte en uitvoerende adviseur vir die bestuur en beheer oor transformasie, die brein agter HETN.

Sy het aan die Malmö Universiteit in Swede studeer en maak graag die valse bewering dat sy in 1999 nie toegang tot hoër onderwys in Suid-Afrika gehad het nie omdat sy bruin is.

Op die HETN-webblad valse bewerings oor studiegeleenthede vir bruines
Op die HETN-webblad valse bewerings oor studiegeleenthede vir bruines

Landbouminister sê wit boere wil graag transformeer

Die minister van Landbou Senzeni Zokwana sê hy is baie tevrede met die houding van wit boere jeens rassetransformasie.

Dit kom na sy toespraak en deelname aan ‘n paneelbespreking by die jaarlikse Graan SA Kongres wat tans in Bothaville in die Vrystaat gehou word.
 
Hy sê die boodskap wat hy kry is dat boere nie teen rassetransformasie gekant is nie.

Oor die kwessie van die droogte, het Zokwana gesê dringende aandag sal gegee word aan wat hy “die mielieramp” noem.

Presiese tydsraamwerke kon nog nie gegee word nie, maar beide die minister en Graan SA se bestuur het media gerusgestel dat die hele proses beheer sal word deur wetgewing in terme van die Wet op Rampbestuur.

Die droogte kan meebring dat die mielieoes die kleinste die afgelope agt jaar gaan wees en beteken dat Suid-Afrika mielies sal moet invoer.
 
Zokwana het weer sy verbintenis herhaal om te verseker dat boere in ‘n posisie is om die volgende seisoen se oes in die grond te kry.

Zokwana, het gesê hy is besorg oor plaasmoorde, maar dat pro-aktiewe optrede nodig is om dit bestry en ‘n beroep op boere gedoen om as mentors op te tree en opkomende boere op te lei.

Hy sê boerdery is nie net ‘n sake-onderneming nie, maar voorsien voedselveiligheid vir die land.

Vroeër is bekend gemaak dat Suid-Afrika se mielieboere miljoen rande kan verloor nadat ‘n ooreenkoms om mielies na China uit te voer, deur die mat geval het.

Zokwana het vroeër gesê die regering se voorgestelde beperking van twaalf-duisend hektaar as maksimum grootte grond wat boere mag besit, is nog nie gefinaliseer nie.

Hy sê hy sal met die minister van grondhervorming samesprekings voer oor voorstelle wat boere gemaak het. Na gesprekke met boere, voel Zokwana dat daar nog nie genoeg duidelikheid oor die kwessie is nie.

Kovsies eis oor vals rasse-beskuldigings

Die Universiteit van die Vrystaat is bewus daarvan dat twee voormalige Kovsie-studente wat geskors is weens hul betrokkenheid by ‘n beweerde rassekwessie nou ‘n skadevergoedingseis teen die UV en sy rektor Jonathan Jansen gaan instel.

Die UV se Lacea Loader het aan OFM-nuus gesê die UV dra kennis daarvan.

Cobus Muller en Charl Blom se eis is op lasterlike bewerings wat teen die twee studente gemaak is gegrond.

Muller en Blom is verlede jaar in die Bloemfonteinse streekhof vrygespreek op ‘n aanklag dat hulle Muzi Gwebu in Februarie aangerand het.

Muller is ook op aanklagte van roekelose en nalatige bestuur en dat hy Gwebu probeer doodry het, vrygespreek. Daar is ook bevind dat Muller nie Gwebu die k-woord toegesnou het nie.

Human sê dit was ‘n traumatiese ervaring vir Muller en Blom. Geregtigheid moet nou geskied.