Kategorie: Nuus

Zuma, Merkel bameer NAVO vir vlugtelingkrisis

President Jacob Zuma het herhaal dat die aanval op Libië deur ‘n NAVO-geleide koalisie in 2011 tot die huidige vlugtelingkrisis in Europa bygedra het.

Hy het by ‘n funksie by die Verenigde Nasies se hoofkantoor in New York gepraat, waar Suid-Afrika as gasheer opgetree het Vrydag.

Die byeenkoms is gehou om Suid-Afrika se leierskap van die G77 Plus China te vier.

Dié groepering van ontwikkelende lande is deur Zuma aangemoedig om samewerking oor sekere kwessies te bevorder.

Nadat die Veiligheidsraad – ondersteun deur Suid-Afrika – militêre ingryping gemagtig het in Libië, “is onsekerheid geskep in daardie deel van die wêreld, en dit is die rede vir die vlugteling-intog,” het Zuma gesê.

Hy het gesê die vlugtelingkrisis is ‘n “mensgemaakte probleem”. Die G77 Plus China, ontwikkelende lande en die ontwikkelde lande moet “beweeg na ‘n ooreenkoms oor ‘n paar kwessies”.

Die funksie is bygewoon deur verskeie staatshoofde, insluitende die Duitse kanselier Angela Merkel, wat, in teenstelling met Suid-Afrika, teen die Veiligheidsraadresolusie om militêre optrede teen Libië te magtig, gestem het.

Die uitgaande Tanzaniese president Jikaya Kikwete, Lesotho se premier Pakalitha Mosisili, Mosambiekse staatshoof President Filipe Nyusi, Ekwatoriaal-Guinee se President Obiang Nguema, Liberiese president Ellen Johnson Sirleaf en ministers en ambassadeurs van verskeie lande, insluitend van die Afrika-unie self, was teenwoordig.

EFF wil Die Stem uit nasionale volkslied

Die EFF het ‘n beroep gedoen dat Die Stem uit die nasionale volkslied verwyder word, het RSG berig.

‘n Woordvoerder van die EFF, Mbuyiseni Ndlozi het in ‘n erfenisdag-verklaring gesê dat Nkosi Sikelel’ iAfrika gesing moet word soos dit tydens die koloniale- en apartheidsjare gesing is, sonder die vers wat uit die voormalige volkslied, Die Stem aangepas is.

Ndlozi sê ook die Krugerwildtuin se naam moet verander word, “omdat Paul Kruger president was van ‘n Boere-republiek wat die grondslag vir die apartheidstelsel gevorm het”.

Die EFF het in die verklaring gevra dat die grondkwessie opgelos moet word. Ndlozi sê slegs die onteiening van grond sonder vergoeding om herverdeel te word, kan aan mense waardigheid gee.

Onrus by Bloemfontein bedaar

Die situasie in Heidedal by Bloemfontein waar chaos Woensdag geheers het, blyk terug na normal te wees.

Dit volg na ‘n beweerde bendegroep genaamd die AmaRomans, amok veroorsaak het en skole op hol gehad het en met geweld gedreig het.

Skole is ontwrig toe bendelede net na 08h00 Wonesdagoggend skole in Heidedal probeer binnegaan het om leerders na bewering te beroof.

Volgens inligting wat aan OFM-nuus verskaf is, het die geweld in Fase6 begin voor dit na Heidedal oorgespoel het.

Polisie is ontplooi om die situasie onder bedwang te bring, maar nie voor die Heidedal-gemeenskap ‘n lid van die publiek, wat vir ‘n bendelid aangesien is, ernstig aangerand het nie.

Vrystaatse polisewoordvoerder, Joy Xaba, sê alles is onder beheer en geen nuwe voorvalle is aangemeld of verdere arrestasies is gemaaak nie. Een person is dood tydens gister se oproerigheid en ‘n ander ernstig beseer.

Moslems vertrap mekaar by pelgrimsbyeenkoms

Dit is steeds nie duidelik of Suid-Afrikaners dood of beseer is tydens ‘n stormloop by ‘n Moslembyeenkoms in Mekka nie.

Meer as 700 mense is dood en sowat 800 is beseer in die stormloop tydens die Hajj-pelgrimstog in Saoedi-Arabië.

Dit is die ergste ramp tydens die pelgrimstog in 25 jaar, ten spyte van miljarde dollar wat die regering van Saoedi-Arabië bestee het om die jaarlikse pelgrimstog veiliger te maak.

Die Suid-Afrikaanse regering het vroeër in ‘n verklaring gesê hy wag nog vir inligting oor die status van Suid-Afrikaanse pelgrims in Mekka.

Die Suid-Afrikaanse Moslem-reisvereniging het ook gesê dat hy nie bewus is van enige Suid-Afrikaners wat in die stormloop dood of beseer is nie.

Pous pleit vir afskaffing van doodstraf, oop grense

Die Pous het ‘n oproep ter afskaffing van die doodstraf wêreldwyd voor die Amerikaanse Kongres gedoen. Hy het ook ‘n pleidooi vir oop grense geloods.

Dit is die eerste keer dat die leier van die Rooms-Katolieke kerk ‘n gesamentlike vergadering van Kongres toespreek.

“Die Goue Reël herinner ons ook aan ons verantwoordelikheid om menslike lewens te beskerm en te verdedig in elke stadium van sy ontwikkeling,” het die Pous in sy toespraak gesê.

“Dit het vir my oortuiging gelei, vanaf die begin van my bediening, om te pleit op verskillende vlakke vir die globale afskaffing van die doodstraf. Ek is daarvan oortuig dat hierdie manier die beste is, want elke lewe is heilig.”

Die 78-jarige Argentynse pous het ook die kwessie van immigrasie verdedig.

“Ons is nie bang vir buitelanders nie, want die meeste van ons was eers buitelanders,” het die pous Donderdag gesê, en bygevoeg dat die kwessie van immigrasie verdelend is en nie nasiebou bevorder nie.

Pous Franciskus het beklemtoon hoe belangrik dit is om immigrante te verwelkom. Hy het ‘n beroep op samelewings gedoen om ideologiese verdeeldheid opsy te skuif.

Hy het gepraat by ‘n gesamentlike byeenkoms van die Amerikaanse kongres, waar hy verwelkom is deur meer as 500 kongreslede, regters en regeringsamptenare.

Die Roomse leier is op ‘n driedaagse besoek aan die VSA.

Die pous het Woensdag in Amerika aangekom. Hy het ‘n beroep op mense gedoen om te besef hoe belangrik dit is om menseregte te beskerm.

Johannesburgse stadsraad beplan ‘ekomobiele’ Oktobermaand

Die Johannesburgse stadsraad maak gereed vir ‘n “ekomobiele wêreldfees” tydens aanstaande maand wat op die sakesentrum Sandton sal fokus. Die fees is deel van ‘n wêreldwye poging om meer ekovriendelike en gesonde vervoermiddels soos fietsry en stap, asook openbare vervoer, aan te moedig. Tesame met ekomobiliteit sal besoekers en pendelaars egter ook ‘n goeie dosis politieke korrektheid inkry, want volgens die stadsraad “sal die stedelike sentrum van Sandton met die nabygeleë lokasie Alexandra gekoppel word en vele van die aanbiedings is ontwerp om dié diverse woonbuurte te integreer”.

Die rede waarom Sandton gekies is om as ekomobiele uitstalruimte te dien, is omdat 300 000 voertuie elke dag die paar vierkante kilometer van die Sandtonse sakesentrum besoek en verlaat, ‘n getal wat na beraming binne die volgende tien jaar met 50% gaan toeneem. Onder ANC-bestuur het die middestad van Johannesburg, waar infrastruktuur reeds meer as ‘n eeu lank gebou word, tot ‘n derdewêreldstad van verlate geboue en straatsmouse verval, terwyl ‘n nuwe stad in die woonbuurt Sandton sonder enige beplanning verrys het.

Lisa Seftel, die huidige vervoerbaas van Johannesburg, was in haar jong dae ‘n marxistiese aktivis aan die Universiteit van die Witwatersrand. Sy wil die vervoerkrisis waarop Sandton afstuur, met ‘n “geïntegreerde plan” troef wat openbare vervoer en ekomobiele vervoer insluit. Die probleem is egter dat Suid-Afrikaners – veral diegene wat in Sandton werk – baie traag is om openbare vervoer te gebruik. Op enige weeksoggend kan welgeklede vroue in BMW’s op pad Sandton toe op een van die hoofare gesien word waar hulle Whatsapp-boodskappe vanaf hul iPhones versend.

Mense se houdings sal drasties moet verander. En dis nou waar die Wêreldekomobiliteitsfees 2015 inkom. Lisa Seftel sê: “Om infrastruktuur te bou en dienste bekend te stel, gaan nie noodwendig beteken dat mense uit hul motors gaan klim om openbare vervoer te gebruik of fiets te ry nie. Die stad moet gedragsveranderings moontlik maak en ondersteun deur hoëgehalte-openbarevervoerinligting te verskaf en om seker te maak dat dié middele veilig is. Dit kan deur bewusmakings-, wetstoepassings en opvoedkundige programme bewerkstellig word.”

 

Johannesburg beskik oor ‘n jaarlikse begroting van bykans R50 miljard. Die uitvoerende burgemeester, Mpho Parks Tau, sê dat die Fees “sal demonstreer dat ‘n ekomobiele toekoms moontlik is en dat openbare vervoer, stap en fietsry toeganklik, veilig en aantreklik kan wees”.

Die doelwit is om die aantal motors in die Sandtonse sakesentrum gedurende Oktober met 30% te verminder. Strate sal vir motors gesluit word en voetgangers en fietsryers sal voorkeur geniet. Spontane straatvertonings met musikante of ander kunstenaars sal aangemoedig word.

Die hele kommunikasieveldtog word egter net in Engels gevoer. Moontlik moet PRAAG van die geleentheid gebruik maak om die Johannesburgse stadsraad onder die indruk van veeltaligheid te bring?

Griekeland se Tsipras kry tweede kans

Alexis Tsipras se linkse Syriza Party het opposisiepartye in die algemene verkiesings in Griekeland verslaan.

Meer as vier uit elke tien Griekse kiesers het egter nie in Sondag se verkiesing gaan stem nie, ‘n aanduiding dat kiesers vuisvoos is.

Die 41-jarige leier is nietemin ’n tweede kans gegun om van die land se reuse­skuldlas ontslae te raak en omvattende hervormings deur te sien om die regering en die ekonomie te moderniseer.

Strydig met meningsopnames het Tsipras’n gemaklike oorwinning oor die konserwatiewe Nuwe Demokratiese Party behaal en ’n koalisie met die klein regse Onafhanklike Griekse Party gevorm.

“Die mense van Griekeland het onder moeilike omstandighede vir ons ’n duidelike opdrag gegee om ontslae te raak van dinge wat ons in die verlede vasgevang hou,” het Tsipras aan verslaggewers in Athene gesê.

Tsipras se Syriza het 35,5% van die stemme gekry en die Nuwe Demokratiese Party 29,1%.

Die land staar streng besuiningsmaatreëls in die gesig nadat ‘n derde internasionale finansiële reddingsboei onderhandel moes word vir die Grieke om in die Eurosone te bly.

Die verkiesing kom midde in Griekeland se stryd om met die Europese vlugtlingekrisis kop bo water te hou.

Net sewe maande in sy eerste presidentstermyn, het Tsipras sy meerderheid in die parlement verloor nadat regsgesinde rebelle in sy party streng nuwe voorwaardes teengestaan het waarop die Euro-sonelande in ruil vir die 86 miljard Euro reddingspakket aangedring het.

Die maatreëls het onder meer hoër verkoopbelasting, hoër belasting vir sakeondernemings, veranderinge in openbare administrasie en verdere besnoeiings aan pensioene vir die land se verouderende bevolking ingesluit.

Die rebelle, wat weggebreek en hul eie party gestig het, kon nie daarin slaag om ’n enkele setel in die parlement te verower nie.

Na jare se resessie en streng hervormings is ’n kwart van die land se bevolking steeds werkloos en die nasionale skuld staan op 175 persent van die land se jaarlikse inkomste. Die voortgesette swaarkry het meegebring dat Grieke min entoesiasme tydens die kort verkiesingsveldtog getoon het.

Die nuwe regering het ’n klein meerderheid van net vyf setels en min tyd om te verspeel. Krediteure sal na verwagting die hervormings hersien as deel van die finansiële reddingsboei.

Die regering moet nog die nasionale begroting vir 2016 opstel en ’n kritieke program in werking stel om die banke te herkapitaliseer.

Pleistervervaardiger ontdek rasverskille

Na 21 jaar van demokrasie, is daar ‘n pleister vir elke kleur van die “nie-rassige” Suid-Afrika.

‘n Maatskappy in Kaapstad het ‘n gaping in die mark raakgesien met die vervaardiging van pleisters wat voldoen aan swart en bruin voorkeure.

Plasta kom in drie verskillende skakerings. Dit sluit in donker, lig en medium-donker.

Wanneer jy dus jou vinger sny of jou kind ‘n skrapie op sy knie kry, hoef niemand meer “nie-rassig” te wees daaroor nie, want die nuwe skakerings pas by die ras van die persoon.

En die pleisters is so gewild dat selfs mense in Nederland, Lesotho en Namibië dit aankoop.

Plasta is die breinkind van Lize Hartley, 27, wat ook die hoofuitvoerendebeampte van die maatskappy is.

Eendag terwyl ‘n swart vrou onderklere in ‘n winkel gesoek het, het Hartley ‘n “gloeilamp-oomblik” beleef.

“Hierdie vrou het probeer om te verduidelik aan die verkoopsassistent dat sy ‘n “naakte” kleur soek en dit het my laat dink aan ander items wat mense soek om by hul velkleur te pas.”

Sy was verbaas om te ontdek dat swart- en bruinmense die normale “een-skakering-pas-almal”-pleisters op die mark haat.

“Pleisters is nie net vir mediese gebruik nie, dit is ook kosmeties,” sê Hartley.

Die pleisters word in China vervaardig.

China het Port Nolloth-hawe in die oog

Die Hunan-provinsie in China gaan meer as 20 miljard rand in die Noord-Kaap belê.

Dit is aangekondig by die ondertekening van ‘n memorandum van verstandhouding in Kimberley. Die geleentheid is deel van die 2015 Vriendskapsweek tussen die twee provinsies.

Die premier van die Noord-Kaap, Sylvia Lucas sê daar is baie geleenthede in die Noord-Kaap. Sy sê daar is ‘n goeie verstandhouding en betrekkinge met Hunan-provinsie.

Die beskerming van mense in Suid-Afrika ingevolge die regsraamwerk sal glo voorkeur geniet, het die premier gesê.

Die vergadering volg op die BRICS-beraad in Kimberley wat verlede jaar gehou is, en waar China ‘n onderneming gemaak het om met die Noord-Kaapse regering te skakel oor handel.

Hulle het onderneem om te belê in ‘n aantal ondernemings in die provinsie.

China stel glo belang in die potensiaal van Port Nolloth as ‘n hawe, het die uitvoerende vise-president van China se Hunan-provinsie, Zhaoxiong Chen, verduidelik.

“Hunan is baie sterk in die velde van ingenieurswese, masjinerie, spoorvervoer en dit is die rede waarom ons gekies het om in ‘n provinsie soos die Noord-Kaap te belê,” het hy gesê.

Chen het bygevoeg dat Suid-Afrika sulke beleggings nodig het.

Onderwysunie vra gewapende teenwoordigheid by skole

Die Nasionale Onderwysersunie (NATU) sê metaalverklikkers en gewapende sekuriteitswagte, sal probleme van geweld by skole oplos.

In die nasleep van onlangse die skietery by Qantayi High School in Empangeni, KwaZulu-Natal, sê NATU, die tragedie sou só verhoed kon word.

‘n Graad 12-leerling is geskiet en ‘n nog ‘n swart leerling vermoor. Die skieter het daarna die geweer op homself gerig.

In ‘n ander voorval het ‘n vyftienjarige swart tiener van Pietermaritzburg skuldig gepleit in die streekhof in Durban vir die moord op ‘n mede-leerling, en die poging tot moord van ‘n ander.

Die seun, wat sy pa se geweer skool toe geneem het, het gesê hy het genoeg van boelie gehad.

Sowat 80 persent van onderwysers by Qantayi, waar die twee leerlinge verlede maand vermoor is, het versoek dat hulle na ander skole oorgeplaas word.

Die twee leerders is op die skoolterrein voor onderwysers en kinders deur deur ‘n matriekseun doodgeskiet voordat hy selfmoord gepleeg het.

Die skool se beheerliggam sê die onderwysers vrees vir hulle lewens. ‘n Voormalige skoolhoof van die skool is ook vermoor.

NATU se adjunkpresident Allen Thompson het gesê die KwaZulu-Natalse Onderwysdepartement moet gewapende wagte in diens neem om leerlinge te deursoek en gewere, messe en ander gevaarlike wapens afneem.

NATU het ook ‘n beroep gedoen vir polisiepatrollies by skole in die oggende en middae.

Thompson het aangevoer dat met ‘n verhoogde sigbaarheid van polisielede, leerlinge en buitestaanders afgeskrik sal word van kriminele dade.

Die nasionale Departement van Basiese Onderwys het uitgevaar teen die gereelde teenwoordigheid van polisie om die hoë voorkoms van geweld in Suid-Afrikaanse skole te bekamp.

Die Nasionale Professionele Onderwysersorganisasie van SA (Naptosa) en die SA Demokratiese Onderwysersunie (Sadou) het ook gewaarsku teen “militarisering” van skole.