Karin Roodt – Bladsy 9

ANC-lid sê Indiërs wat kla moet teruggaan na Indië

Indiërs wat so kerm oor die swart ANC-regering moet teruggaan na Indië, sê Visvin Reddy.

Reddy is ‘n voormalige ANC-raadslid en Chatsworth-takvoorsitter. Hy sê die klakouse marginaliseer hulleself net verder.

President Zuma het Indiërs voorheen as swart beskryf.

Reddy het kritiek gekry vir sy Facebook-opmerking, maar hy het gesê hy staan by sy omstrede opmerkings.

Op sy Facebook-blad oor ‘n week gelede het Reddy uitgevaar teen anti-ANC kommentaar. “Wag tot 8 Mei. Die ANC sal steeds die land regeer. Julle kermkouse moet die land verlaat. Gaan terug na Indië, en julle sal sien watter goeie lewe wat ons hier het. Gaan voort met julle gemors en marginaliseer julleself verder. Moenie die ANC blameer nie, blameer jouself. Jy het nog nie die demokrasie omhels nie. Slegs ‘n dwase Indiër in SA sal nie betrokke raak by die meerderheid op ‘n konstruktiewe wyse nie… ”

Hy het gesê enige kwaadwillige kritiek teen die regering wat kan lei tot die gespanne verhouding tussen swart en Indiër Suid-Afrikaners wil hy ontmoedig.

“Ek sê nie die kritiek teen die regering is nie welkom nie, maar dit moet op ‘n konstruktiewe wyse gedoen word, anders kan dit gesien word as ‘n aanval op die meerderheid en dat dit kan spanning skep,” het hy gesê.

“Ek sê, laat ons die meerderheid omhels… Soms is die kritiek wat jy sien kwaadwillig en is afkomstig van mense wat DA-propaganda gevoer word.”

Hy het gesê Indië het, ten spyte van sy ryk tradisies, ‘n groot bevolking en hoë vlakke van armoede.

Indiese leiers het Reddy vir sy kommentaar geroskam.

“Ons is hier gebore, ons is Suid-Afrikaners en niemand moet vir my sê om terug te gaan na Indië nie,” sê Ashwin Trikamjee , president van die Suid-Afrikaanse Hindoe Maha Sabha .

Trikamjee het egter saamgestem dat kritiek teen die ANC ongegrond en kwaadwillig is.

SA Minority Rights Equality Movement (Samrem) het gesê die kommentaar toon Reddy se eie rassistiese mentaliteit.

“Ons wil die ANC daaraan herinner dat wetgewing soos die Wet op Gelyke Indiensneming, die kwotastelsel wat gebaseer is op ras in die toelating van ons kinders by instellings van hoër onderwys, en die uitsluiting van minderheidsgroepe uit breë-gebaseerde swart ekonomiese bemagtiging is op sigself om apartheidstyl rassisme te bevestig,” het waarnemende voorsitter, Daleep Lutchman gesê.

Die ANC het hom gedistansieer van die uitlatings deur Reddy. Die provinsiale sekretaris van die ANC in KwaZulu-Natal, Sihle Zikalala sê Reddy se kommentaar is ongevraagd en is nie in voeling met die beginsels van ‘n demokrasie nie.

Zikalala sê die ANC besef hy het Indiërs se steun nodig en sal nooit teenoor hulle oneerbiedig wees nie.

Verkiesing 2014 skop af

Die verkiesingswiele het vanoggend amptelik begin rol toe Suid-Afrikaners in die buiteland hul kruisies kon trek, het RSG berig.

Die sowat 26.000 geregistreerde kiesers in die buiteland kan slegs aan die nasionale verkiesing deelneem en kan nie vir verteenwoordigers op provinsiale vlak stem nie.

Die meeste stemgeregtigde Suid-Afrikaners is in Londen, terwyl duisende kiesers ook in Afrika-lande woon en werk. In Nieu Seeland is die eerste kruisies in die Suid-Afrikaanse verkiesing getrek, terwyl Suid-Afrikaners in Amerika later vandag na die stembus sal gaan.

Slegs nege uit meer as 300 Suid-Afrikaners in Lesotho kon vandag hulle kruisies trek. Die adjunk-hoë kommissaris in Maseru, Sello Jele, sê gedurende die registrasieproses is meer as 300 mense geregistreer, maar slegs nege van hulle is goedgekeur om spesiale stemme uit te bring vir die komende algemene verkiesing.

Hy sê hulle was verbaas om dit te verneem. Hy sê van die redes is ongeldige identiteitsdokumente en die VEC-10-vorms wat voltooi moet word en wat nie betyds ontvang is nie.

In Swaziland verloop die stemmery vlot by die Hoë Kommissariaat in Mbabane. Die OVK se voorsittende beampte by die Kommissariaat,

Arron Themba sê kiesers kom drupsgewys aan en hulle hoop dat meer mense deur die dag sal opdaag. Meer as 70 Suid-Afrikaners in Swaziland het vir die verkiesing geregistreer. Stembusse sluit om negeuur.

In Kenia is Suid-Afrikaners besig om hul kruisies te trek by die Suid-Afrikaanse Hoë Kommissariaat in Nairobi.

Talle kiesers het reeds vroegoggend opgedaag om te stem vir die komende verkiesing Woesdag in Suid-Afrika.

Die Hoë Kommissaris in Kenia, Ratubatsi Moloi sê hulle verwag dat al 156 geregistreerde kiesers, wat oor ‘n wye gebied in Kenia woon, vandag na Nairobi sal reis om te stem.

FN-lede dreig om kommunistiese vlag voor DKD te verbrand

Front Nasionaal het sy wanhoop uitgespreek oor die departement van korrektiewe dienste se gesloer met Clive Derby-Lewis se mediese parool.

“Ons kom nou naby aan die 21-dae-ultimatum wat aan die departement van korrektiewe dienste gestel is tydens ons betoging op 12 April. Tot op hede het mnr. Clive Derby-Lewis nog nie enige mediese ondersoek deur die departement ondergaan nie,” sê dr. Dan Roodt, onderleier van die party. “Daarom gaan ons weereens ‘n memorandum aan die departement oorhandig op Vrydag 2 Mei om 12:00 by sy hoofkwartier in die Poyntons-gebou in Pretoria.”

‘n Stille betoging deur partylede wat plakkate dra, sal gehou word. Sekere partylede dreig om ‘n kommunistiese vlag te verbrand. “Ons begryp dat die hamer-en-sekel ‘n simbool van die Nasionale Demokratiese Revolusie is en deur Nelson Mandela en Joe Slovo gebruik is,” sê Roodt. “Maar sekere van ons lede is keelvol oor die onregverdige verlenging van Clive Derby-Lewis se straftydperk, dus is humeure besig om kort te raak.”

Terselfdertyd sal die party die eerste gebied in Pretoria verklaar wat vir kulturele selfbeskikking kwalifiseer. Afrikaans sal as die oorheersende kulturele, handels- en openbare taal in dié eerste “taaleiland” herstel word. Die plaaslike taal Afrikaans ly tans onder diskriminasie en marginalisering onder die ANC-bewind.

“Dis ongelukkig dat ons die term ‘taaleiland’, na die Duitse Sprachinsel, moet gebruik, maar in stryd met die SA grondwet is ons taal tot die status van ‘n dialek verlaag in ‘n openlik kolonialistiese, imperialistiese, verengelste Suid-Afrika,” sê Roodt. “In Johannesburg en in Kaapstad verwys vele mense beledigend na Afrikaans as ‘n “spreektaal” en ‘n “kombuistaal”. Drastiese stappe is nou nodig om die taal te bewaar, waaronder territoriale oplossings.”

Sowel die verdere aanhouding van Derby-Lewis, ‘n siek ou man, as die ondergang van Afrikaans is te wyte aan die misbruik en sentralisering van mag in die hande van slegs enkele mense in Suid-Afrika, verklaar die party.

“Ons gaan nie stilsit terwyl ‘n gerekende konserwatiewe denker soos Clive Derby-Lewis weens laakbare aanvalle en verwaarlosing in die tronk sterf nie. Insgelyks sal ons nie toelaat dat Afrikaans tot uitsterwing gedwing word deur beide die regering en groot sake nie,” sê Roodt.

SADOU veroordeel lede wat poste koop

City Press het vroeër berig dat SADOU-amptenare senior onderwysposte in KwaZulu-Natal, Noordwes en Limpopo aan onderwysers verkoop.

Dié koerant beweer dat sommige van lede van die onderwysvakbond betrokke is by ‘n geldmaakskandaal rakende poste.

Die onderwysersvakbond SADOU het gevra dat enigeen wat oor inligting na vore kom. Hulle het die korrupsie sterk veroordeel.

Blykbaar word poste teen ‘n bedrag van minstens R30.000 “gekoop” en die geld is vooraf is betaalbaar om die pos te verseker.

Volgens die berig het die geldfoefie reeds gelei tot talle onwettige aanstellings regoor die land.

Polisie onderdruk geweld suid van Johannesburg

Die polisie het oproeriges in Finetown naby Ennerdale, suid van Johannesburg, met rubberkoeëls uiteengejaag.

Motoriste is gevra om die gebied te vermy weens die geweld, veral by Jamesweg en Provincialweg.

Die polisie het op oproermakers naby die Indiërwoonbuurt Lenasia geskiet nadat hulle paaie versper en motoriste met klippe bestook het.

Gewelddadige swart inwoners het polisiebeamptes ook met bakstene gegooi en ‘n beampte is beseer in die oproer.

Hy is na die hospitaal vir behandeling geneem.

Die rede vir die protesoptrede is nie bekend nie.

Ennerdale het ‘n lang geskiedenis van gewelddadige opstand wat reeds vanaf 2006 woed.

Die gebied kan nie ontwikkel word nie omdat die grond onstabiel is weens dolomitiese klei en oorhoofse elektriese kraglyne, maar die plakkers wil nie na rede luister nie

Chaos is deel van gemeenskap wat voorheen die veeldoelige gemeenskapsentrum en plaaslike kliniek onder klippe gesteek het en kort-kort motors en sakeondernemings aan die brand steek.

‘n Plaaslike regeringsamptenaar is ook voorheen in die hospitaal opgeneem nadat hy ernstige beserings in die geweld opgedoen het.

ANC-amptenare vermy die gebied weens die dreigemente teen hulle.

Dokters Sonder Grense in SAR aangeval, drie gedood

MSF, oftewel Dokters Sonder Grense, se hoof Stefano Argenziano sê sy organisasie sal hul teenwoordigheid in die Sentraal-Afrikaanse Republiek heroorweeg nadat drie van hul personeellede doodgemaak is.

Argenziano het gepraat na aanleiding van die aanval in Boguila waarin minstens 22 mense, onder wie drie lede van die organisasie MSF, in ‘n aanval deur gewapende mans op ‘n hospitaal in die Sentraal Afrikaanse Republiek dood is.

Sowat tweeduisend Franse en meer as vyfduisend Afrika-vredesmaglede sukkel om die geweld in die land wat al meer as 18 maande woed, onder beheer te kry.

Die Afrikageleide MISCA-vredesmag het ook die aanval bevestig.

Volgens ‘n leëroffisier het drie gewapende aanvallers die gebou in die dorp bestorm waar die mediese liefdadigheidsgroep en plaaslike stamlede ‘n vergadering gehou het.

“Terwyl ons verbind bly tot die verskaffing van humanitêre hulp aan die gemeenskap, het ons ook die veiligheid van ons personeel om in ag te neem,” het Argenziano Maandag gesê.

Boguila is ‘n dorp naby die grens met Tsjad , waar MSF sedert 2006 ingegrawe is.

MSF het aangekondig dat die aanvallers ten minste 16 burgerlikes vermoor het.

‘n Woordvoerder vir die Franse ministerie van buitelandse sake, het Maandag gesê dat die Franse regering “die dodelike aanval sterk veroordeel”.

In Maart 2013 het Seleka-rebelle die Christelike President Francois Bozizé omvergewerp.

Die VN se hoof Ban Ki-moon, het reeds ‘n passievolle pleidooi aan die strydende partye gelewer om ‘n nuwe volksmoord in Afrika, 20 jaar na Rwanda, te voorkom.

Na ‘n eenparige stemming vroeër hierdie maand deur die Veiligheidsraad, sal ‘n VN-mag van 12.000 in September oorneem van 2000 Franse en 6000 Afrika-vredesmaglede reeds in plek.

Zuma vra dat godsdiensleiers uit politiek bly

President Jacob Zuma het godsdiensleiers gevra om hulle te weerhou van politieke aangeleenthede.

Zuma het Suid-Afrikaners gevra om te bid vir ‘n vreedsame verkiesing op 7 Mei by ‘n interkerklike diens by die Goeie Hoop-sentrum in Kaapstad.

Die EFF-leier Julius Malema het op sy beurt by ‘n verkiesingsaamtrek by Kwaggafontein in Mpumalanga swartes aangehits om grond terug te eis wat hulle sogenaamd onder die koloniale- en apartheidsbewind verloor het.

Malema se oproep kom nadat die Front Nasionaal die grootste wit grondeis ingedien het teen swart besetting.

Malema het na wittes wat die grond “gevat” het as “die vyand” verwys, maar bygevoeg dat “versoening” moontlik is as wittes swart aansprake aanvaar.

Malema het ook gesê dat hy nie in ‘n oorlog met president Jacob Zuma betrokke wil raak nie, maar dat Zuma in die pad staan van hul veldtog om die grond terug te kry.

Zoeloe-ondersteuners van die ANC het die EFF egter gekoggel oor hul onrealistiese grongrypdrome en gesê as wit bates genasionaliseer word sal geen enkele EFF-ondersteuner ‘n sent daarvan sien nie.

Die EFF se grondgrypaanslag is die breinkind van die wit Joodse aktivis Kim Heller.

Malema sal Dinsdag ‘n EFF-optog na die SAUK in Johannesburg lei oor die verbod op die party se verkiesingsadvertensie.

Okasa het die naweek ten gunste van die SAUK beslis oor sy besluit om nie die advertensie uit te saai nie.

Die komitee het beslis dat die advertensie onwettige optrede kan aanmoedig, omdat daarin gesê word dat mense fisies die e-tolpoorte moet afbreek.

Intussen sal die voorsitter van die Onafhanklike Verkiesingskommissie, Pansy Tlakula, haarself vandag in die Verkiesingshof moet verdedig, na bewerings van ongerymdhede oor die huurkontrak van die OVK-hoofkantoor.

Tlakula is deur die UDM-leier, Bantu Holomisa, gevra om haar pos te ontruim.

Hy voer aan dat haar posisie die geloofwaardigheid van die kommissie en die vertroue van die publiek in die uitslag van die verkiesings, in die gedrang kan bring.

Die oproep om haar uitrede sal na verwagting nie veel oplewer nie, aangesien talle swart kiesers dit as nog ‘n anti-Zoeloe-front beskou.

Die minister van polisie, Nathi Mthethwa, sal Dinsdag die interministeriële komitee lei na konflikbrandpunte in die Oos-Kaap waarby Holomisa geïmpliseer word.

Die komitee wil bestendigheid verseker in probleemareas voor aanstaande week se verkiesings.

Sterkspruit in die noorde van die provinsie is een van die plekke waar Holomisa inwoners aanhits om nie deel te wees van die Senqu-munisipaliteit nie.

Die munisipaliteit gee volgens die inwoners voorkeur aan ontwikkelings op Barkly-Oos en Lady Grey. Die UDM het inwoners belowe dat hy hulle eise na die Grondwethof sal neem.

Holomisa het inwoners ook belowe dat hulle geen regskoste vir die eise sal hoef te betaal nie. Dit is nie seker wie die koste sal dra nie.

Infrarooi by lughawens teen ebola, voëlgriep

Die Gautengse departement van Gesondheid gaan lughawens voortdurend monitor om te voorkom dat passasiers met aansteeklike siektes die land binnekom, het RSG berig.

Die LUR van Gesondheid, Hope Papo sê klinieke is geopen op die O R Tambo Internasionale Lughawe en die Lanseria Lughawe om gevaarlike virusinfeksies te voorkom.

Dit sluit alle hemorragiese virussiektes asook voëlgriep in.

Twee dokters, 14 verpleegkundiges en drie administratiewe personeellede is verantwoordelik vir die klinieke en om passasiers vanaf die buiteland te monitor.

Infrarooi-skandeerders is ook op die lughawens aangebring om reisigers met hoë liggaamstemperature te identifiseer.

Corniese minderheid in VK erken

Het Verenigd Koninkrijk erkent de ‘Cornish people’ als nationale minderheid, in navolging van de andere Keltische bevolkingsgroepen in Schotland, Wales en Noord-Ierland, aldus de BBC donderdag.

De Cornish leven in het Engelse graafschap Cornwall, de uiterste zuidwestpunt van Groot-Brittannië. Er zijn nog zo’n 300 mensen over die het Cornish vloeiend spreken. 1000 à 2000 mensen zeggen een basiskennis van de Keltische taal te hebben.

De oorspronkelijke bewoners van de Britse Eilanden zijn Kelten. De Angelsaksen kwamen pas in de 5e eeuw naar Engeland. Veel Kelten trokken zich daarop terug naar Schotland, Wales en Ierland.

De barden van Cornwall verwelkomden de erkenning als „historische bekendmaking”. Barden zijn in de Keltische cultuur lyrische dichters en zangers. De Grootbard van Cornwall verklaarde: „De mensen in Cornwall hebben een trotse eigen identiteit.” Hij hoopt dat het Cornish „een regulier schoolvak” gaat worden.

SAKP vereer Hani met optog in Kaapstad

Die Suid-Afrikaanse Kommunisteparty gaan vandag ‘n massaoptog hou na die Wes-Kaapse wetgewer omdat die provinsiale regering na bewering nie vir armes omgee nie, het RSG berig.

Die SAKP se Wes-Kaapse woordvoerder, Masonwabe Sokoyi sê die party vereer die nalentskap van die ANC-stryder, Chris Hani, maar die res van die provinsie doen dit nie.

Hy sê armes word steeds onderwerp aan die beleid wat kolonialisme en apartheid onderskryf.

Sokoyi sê die massaoptog gaan daarom gehou word om aan premier Helen Zille te sê dat sy die afgelope vyf jaar in die provinsie misluk het, en haar moet gereed maak om na 7 Mei haar kantoor te ontruim.

Die DA-leier Helen Zille het intussen gesê dat ‘n DA-oorwinning in die Wes-Kaap nie seker is nie.

Volgens ‘n afskrif van haar toespraak by Groentemarkplein, in Kaapstad, nie dit seker dat die DA sal wen in die Wes-Kaap of Gauteng nie.

Die provinsie spog met die hoogste misdaadsyfer in die land.

Kortbroek waarsku boere oor grondreferendum

Die Boere-Afrikanervolksraad het ten sterkste beswaar gemaak “teen die misbruik van die Voortrekkermonument vir die ANC-politieke doeleindes onder leiding van die ANC se Cyril Ramaphosa”, nadat die ANC boere by die monument toegespreek het.

Nie Ramaphosa of Roelf Meyer het egter opgedaag nie en president Zuma self het by die vergadering gepraat.

Zuma het egter die taak om op grondkwessies te reageer gedelegeer aan die minister van Toerisme, Marthinus van Schalkwyk.

Van Schalkwyk, beter bekend as Kortbroek, was bereid om die gehoor in sy vertroue te neem en het laat deurskemer dat die ANC die moontlikheid van radikale grondhervorming bespreek het, en moontlik selfs ‘n referendum oor die aangeleentheid.

Maar om die kwessie aan ‘n stemmery te onderwerp is iets wat die party eenvoudig nie kon waag nie, het hy gesê.

“Wat dink jy sal gebeur as ons ‘n referendum oor grond hou? Hoe dink jy sal die meerderheid stem? Ek dink ons almal weet wat die antwoord is,” het Van Schalkwyk gesê, met instemmende knikke van sy gehoor.

En met dié, het die ANC ander opsies oorweeg, soos om die grondeiseproses onbepaald te heropen, te heropen tot 2020 of dit te heropen vir die volgende vyf jaar, het hy gesê.

“Ons het besluit op die heropening van die proses vir ‘n verdere vyf jaar,” het die minister gesê.

Adjunk-president Kgalema Motlanthe het intussen in Londen aangekom nadat die ANC met Afrikaners ontmoet het by die Voortrekkermonument.

Motlanthe is in die Britse hoofstad ter viering van Vryheidsdag op die 27ste April, by die Suid-Afrikaanse Hoë Kommissariaat.

Samesprekings is ook gevoer oor die noodsaaklikheid om bilaterale betrekkinge tussen Suid-Afrika en Brittanje te versterk na die ANC se ontmoeting met Afrikaners.

Motlanthe het gesê dit is “vanselfsprekend” dat die Britse nasie saam met Suid-Afrika sy demokrasie vier.

Veiligheidsraad dreig Suid-Soedan met sanksies

Die Verenigde Nasies se Veiligheidsraad oorweeg sanksies teen Suid-Soedan.

Die Veiligheidsraad het dié skerp waarskuwing gerig na die massaslagting verlede week in Bentiu toe rebellemagte honderde burgerlikes vermoor het nadat hul etnisiteit of nasionaliteit glo eers vasgestel is.

Die Veiligheidsraad sal ondersoek instel na sanksies indien aanvalle op burgerlikes en buitelanders in die land voortduur.

Dié verwikkling kom nadat president Salva Kirr, en die voormalige adjunkpresident Riek Machar asook ander politieke leiers, ‘n ooreenkoms, om vyandelikhede te staak, geïgnoreer het.

Die Veiligheidsraad eis dat die land se leierskap diegene aanspreeklik hou wat vir die konflik verantwoordelik is.

Die ooreenkoms is in Januarie onderteken.

Burgerlikes is intussen vermoor in sogenaamde plekke van veiligheid soos kerke, hospitale en moskees waar hulle skuiling gesoek het.

Die magstryd tussen president Kiir en sy voormalige adjunk, Machar, het tot die etniese botsings tussen die Dinka- en Nuer-stamme gelei.

Die Veiligheidsraad het ook ‘n aanval op ‘n VN-vesting in die dorp Bor veroordeel waar talle mense omgekom het of beseer is.

ANC-kantoor in Marikana afgebrand

Brandstigters het Donderdag ‘n klein kantoor van die regerende ANC in Marikana aan die brand gesteek, waar waar 34 stakende mynwerkers in 2012 doodgeskiet is, het die polisie gesê.

“Die polisie ondersoek ‘n saak van brandstigting,” het die polisiewoordvoerder Sabata Mokgwabona aan Sapa gesê.

“Die gebou is na berig word gebruik as ‘n kantoor vir ‘n politieke party,” het hy bygevoeg .

Die ANC het bevestig dat sy kantoor in die Nkaneng-lokasie afgebrand is.

Geen beserings is aangemeld nie en geen arrestasies is nog gemaak nie.

In minder as twee weke sal Suid-Afrikaners hulself na die stembusse wend waar president Jacob Zuma in alle waarskynlikheid vir ‘n tweede termyn herkies sal word.

Marikana is die tuiste vir sommige van die meer as 80.000 platinummynwerkers wat reeds drie maande ‘n staking volhou in hul eis vir hoër lone.

Die werkers is honger en desperaat en die ekonomie van Rustenburg word lamgelê deur die staking, maar die samesprekinge tussen die stakers en die mynbestuur het Donderdag op niks uitgeloop nie.

Die meeste werkers behoort aan die radikale Amcu wat die ANC-gesinde vakbond NUM uitgedruk het as die dominante unie.

Die nuwe linkse EFF-party van die populistiese Julius Malema geniet aansienlike steun in Marikana.

Malema uit saal gejaag deur skare in Durban

Die leier van die EFF, Julius Malema het Donderdag aan eie bas ervaar hoe dit voel om uitgejou te word. Voorheen was hyself die uitjouer.

Malema moes by die Howard Kollege-kampus praat as deel van sy eerste stemwerwingsbesoek aan die provinsie in aanloop tot die verkiesing.

Dit is egter die tweede keer dat die Ekonomiese Vryheidsvegters ‘n kil ontvangs in die provinsie kry.

Met Malema se besoek aan President Jacob Zuma se dorpie Nxamalala in Januarie is moes die polisie ingryp toe ANC-ondersteuners gebots het met Malema se volgelinge.

Die EFF-leier moes noodgedwonge ‘n lesingsaal by die universiteit van KwaZulu-Natal in Durban Donderdag self verlaat toe ANC-ondersteuners sy toespraak ontwrig het.

‘n Woedende Malema het buite gewag in ‘n wit Mercedes-Benz. Sy duur smaak word glo gefinansier deur ‘n Nigeriese weldoener.

Die polisie en personeellede het tevergeefs ingegryp om die situasie te kalmeer, en Malema moes noodgedwonge sy ondersteuners buite die saal toespreek.

Die polisie en die EFF-beamptes het ‘n menslike muur om Malema gevorm om verdere ontwrigting te voorkom.

Malema het ‘n man met ‘n ANC-T-hemp opgemerk en herhaaldelik vingerwysend vir hom geskree “Voertsek!”

Malema het aan die skare gesê dat sommige van die oproeriges deur die ANC gehuur is en moontlik nie eens aan die universiteit verbonde is nie.

Malema het die ANC-ondersteuners afgemaak as “Zuma se beeste wat van uit die duur kraal ontsnap het” en het gesê hulle ontwrig sy byeenkoms want hulle was bang vir die EFF .

Hy het bygevoeg dat Cyril Ramaphosa, die ANC se adjunk-president erger as Zuma is want hy het R18 miljoen vir ‘n buffel betaal.

Malema het kritiek op die Nasionale Studente Finansiële Hulpskema gelewer, en gesê studente moet dit verwerp want dit skep groot skuld vir hulle.

Hy sê die EFF sal die land se minerale hulpbronne nasionaliseer om gratis onderrig te befonds.

Hy het ook gevra vir rasseverdraagsaamheid. “Wit mense is ons vriende. […] Ons beleid is om nie wit mense uit te dryf uit die land nie.”

Malema is daarna na die landelike Tafelkop buite Pinetown, waar ANC-ondersteuners hom ook ingewag en beledig het.

Hy het gesê die ontwrigting in KwaZulu-Natal sal by die polisie en die Onafhanklike Verkiesingskommissie gerapporteer word.