Die Gautengse departement van Gesondheid gaan lughawens voortdurend monitor om te voorkom dat passasiers met aansteeklike siektes die land binnekom, het RSG berig.
Die LUR van Gesondheid, Hope Papo sê klinieke is geopen op die O R Tambo Internasionale Lughawe en die Lanseria Lughawe om gevaarlike virusinfeksies te voorkom.
Dit sluit alle hemorragiese virussiektes asook voëlgriep in.
Twee dokters, 14 verpleegkundiges en drie administratiewe personeellede is verantwoordelik vir die klinieke en om passasiers vanaf die buiteland te monitor.
Infrarooi-skandeerders is ook op die lughawens aangebring om reisigers met hoë liggaamstemperature te identifiseer.