Karin Roodt – Bladsy 89

‘Wit Weduwee’ se vals SA paspoort gekanselleer

Die minister van binnelandse sake, Naledi Pandor, het gesê dat die paspoort van ‘n vrou wat vermoedelik betrokke is by die terreuraanval by ‘n winkelsentrum in Kenia, in 2011 ondersoek en gekanselleer is omdat dit op ‘n bedrieglike wyse bekom is.

Pandor het in Pretoria gesê verdere ondersoeke moet gedoen word oor hoe die vrou genaamd Natalie Faye Webb, die paspoort bekom en hoe dit uitgereik is.

Samantha Lewthwaite, wat deur die Keniaanse polisie in verband met ander terreurdade gesoek word, het dié skuilnaam gebruik terwyl sy in Suid-Afrika gewoon en gewerk het.

Sy het vir die eerste keer in 2003 in die land aangekom. Lewthwaite is bekend as die ‘’Wit Weduwee’’ omdat haar man een van die selfmoordbomplanters op 7 Julie 2005 in Londen was.

Owerhede wou nie kommentaar lewer op berigte dat sy eiendom in Johannesburg gehuur het nie. Sy het klaarblyklik tot soveel as R183 000 se skuld aangegaan. – Sapa

EFF en Sasco raak handgemeen by Unisa

Ondersteuners van Julius Malema se Economic Freedom Fighters ( EFF) en lede van die Suid-Afrikaanse studente-organisasie (Sasco) het mekaar Donderdag getart en handgemeen geraak, kort voor Malema by Unisa opgedaag het.

Solly Nkuna, Sasco se voorsitter by Unisa, sê slegs geregistreerde studente sal toegelaat word in the ZK Matthews-saal, waar Malema veronderstel was om oor grondhervorming te praat.

“Ons sal enige optrede van Malema ontwrig,” sê Nkuna. “Ons is van mening dat diegene wat nie studente is nie, geen reg het om deel te neem nie.”

Hy het die bestuur van Unisa daarvan beskuldig dat hulle besig is om Unisa te verander in ’n platform vir ongelukkige voormalige ANC-lede.

Malema is in 2012 as leier van die ANC Jeugliga geskors.

Nkuna sê Sasco is verplig om die reënboognasie te beskerm en sal nie enige organisasie wat die land met geweld wil afneem, ondersteun nie.

Die EFF –ondersteuners was intussen besig om “Een Zuma, een idioot”, te sing, terwyl hulle hul hande in die vorm van ’n stortkop bo hul kop hou. – Sapa

Wit metropolisiebaas van rassisme, korrupsie beskuldig

‘n Senior lid van Johannesburg se metropolisie en sy departement word aangekla van rassisme en korrupsie.

The Star het Woensdag berig dat drie polisiebeamptes beweer dat hoof-superintendent Mike Smith hulle onregmatig uit hul poste ontslaan het.

Lesiba Kganyago het aan The Star gesê hy is afgedank nadat hy ‘n kollega in gewone drag per ongeluk in hegtenis geneem het, toe laasgenoemde hom van agter bekruip en op hom gespring het.

Die kollega het homself eers geïdentifiseer nadat hy teen die grond vasgedruk en geboei is.

Ten spyte daarvan dat alle klagte teruggetrek is, het Smith glo aangedring dat Kganyago ontslaan word.

Volgens Kganyago is Smith se departement heeltemal deurtrek van korrupsie. Swart beamptes word glo geviktimiseer.

Twee ander metrobeamptes het ook teen hul afdankings geappelleer.

Wayne Minnaar, polisiewoordvoerder, het Woensdag gesê die aantygings sal bespreek word nadat die Kommissie vir Bemiddeling, Versoening en Arbitrasie (KBVA/CCMA) hul bevinding bekend gemaak het.

Nuwe eiland gevorm na aardbewing in Pakistan

Die dodetal ná ‘n kragtige aardbewing in Pakistan, het Woensdag tot 327 gestyg nadat honderde modderhuise in die slag gebly het.

Die weermag het talle soldate per helikopter na die yl bevolkte Awaran in Baluchistan geneem. Dit is die ergste aardbewing sedert 2005 toe sowat 75 000 mense in die noorde van die land omgekom het. Maandag se aardbewing het 7,7 op die Richterskaal geregistreer.

Die aardbewing was so sterk dat ‘n klein eiland aan die Pakistanse kuslyn in die Arabiese See gevorm het. Die aardbewing volg dae nadat 80 Christene verlede naweek in die stad van Pesjawar dood is na ‘n selfmoordbomaanval.

Kundiges meen die eiland se leeftyd sal van korte duur wees. Die eiland is 21 meter hoog, 100 meter breed en 40 meter lank. Dit het 200 meter van die kus uit die see gerys ná die aardbewing. Seismoloë verwag dat dit binne ‘n paar maande weer deur die see ingesluk sal word. – AFP

Atleet met vals penis betrap

Die Italiaanse atleet Devis Licciardi staar skorsing van twee jaar in die gesig nadat hy met ‘n vals penis tydens ‘n toets vir opkikkers betrap is.

Die 27-jarige is Saterdag by die Italiaanse kampioenskappe in Molfetta met dié kunsmatige orgaan gevang.

Licciardi is kort na die 10-km padwedloop tydens ‘n uriene-toets betrap.

Licciardi het vir die toetsbeampte gesê dat hy alleen wou wees tydens die toets maar die beampte het gesê hy moet by wees, want die regulasies stipuleer spesifiek dat die toets in die teenwoordigheid van ‘n beampte gedoen moet word.

Die vals orgaan, volgemaak met skoon uriene, is gekonfiskeer vir verdere ondersoek.

Die atleet het dit in sy onderklere verberg. – Sapa/AFP

Vrou verskyn ivm lyk in kattebak

‘n 24-jarige vrou het Woensdagmiddag in die Randburg-landdroshof verskyn nadat die ontbinde lyk van ‘n man in ‘n motor se kattebak by Montecasino ontdek is.

Die saak teen Maruschka Robinson is uitgestel en sy verskyn weer vroeg in Oktober in die hof om ‘n borgtogaansoek te bring.

Volgens die aanklaer in die saak word Robinson se kêrel en nóg ‘n verdagte nog gesoek. Drie verdagtes is op kringtelevisie opgeneem waar hulle glo geld uit die vermoorde se rekening getrek het.

Die man se lyk is Sondag gevind nadat veiligheidswagte ondersoek ingestel het na ‘n slegte reuk wat uit ‘n Nissan-motor gekom het.

Die voertuig was op die vierde verdieping van die sentrum geparkeer en het etlike dae daar gestaan.

Die slagoffer is geïdentifiseer as ’n enkellopende man van Jukskeipark, ’n aangrensende gebied tot Montecasino. Sy naam is nog nie bekend gemaak nie.

Daar is intussen ook vasgestel dat die oorledene die eienaar van die voertuig was. – Sapa

Genadedood styg skerp in Nederland

Die aantal Nederlanders wat genadedood vra, het meer as verdubbel in die 10 jaar sedert wetgewing verander het. Die aantal het met 13 persent verlede jaar tot 4188 gestyg.

Genadedood of geassisteerde selfmoord, waar ‘n dokter teenwoordig is, word gewoonlik deur ‘n sterk barbituraatdoepa geïnduseer, en is sedert 2002 wettig in Nederland.

Versoeke het geleidelik gestyg sedert 2003, toe 1626 mense aansoek gedoen het om genadedood – in die meeste gevalle met ‘n dodelike inspuiting – of geassisteerde selfmoord .

Voorheen was dit kwaai omstrede, maar het meer as verdubbel oor die dekade tot 2012 weens sosiale aanvaarding.

Een verduideliking vir die skerp styging in Nederlandse gevalle is die bekendstelling verlede jaar van mobiele eenhede wat rondreis om genadedood toe te laat. Pasiënte word deur die mobiele eenheid vermoor as gesinsdokters weier .

Sowat 80 persent van die mense wat genadedood versoek, word vermoor deur dokters op die gronde dat hulle ondraaglike pyn ly en ‘n ingeligte keuse uitoefen. Die mening van ‘n tweede dokter is ook nodig .

Genadedood word in drie Europese lande , Nederland, België en Luxemburg toegepas.

Nederland vermoor twee keer soveel mense as België. Genadedood is die laagste in Luxemburg, waar daar tussen 2011 en einde 2012 net 14 mense vermoor is, ‘n tiende van wat in die Nederlande gebeur.

Die meeste, 78 persent of 3251 versoeke het gekom van mense met kanker. Diegene wat ly aan senuweestelselafwykings was in die tweede plek, 257, gevolg deur die genadedood van 156 mense wat ly aan kardiovaskulêre siekte.

Twee en veertig mense met demensie en 13 pasiënte wat ly ernstige psigiatriese probleme is vermoor.

Vrou vas oor lyk in kattebak

‘n Vier-en-twintigjarige vrou is in hegtenis geneem in verband met ‘n liggaam wat in die kattebak van ‘n motor by Montecasino noord van Johannesburg gevind is.

‘n Polisiewoordvoerder, Lungelo Dlamini sê die vrou is gisteraand naby Douglasdale in hegtenis geneem.

Die liggaam is Sondag ontdek nadat die motor vir ‘n aantal dae by Montecasino geparkeer was. Die motor is nie as gesteel aangemeld nie.

Die polisie het later vasgestel dat die oorledene die eienaar van die motor was.

Die verdagte sal binnekort in die landdroshof in Randburg verskyn. – RSG

‘Al Kaida het versplinter’

President Barack Obama het aan die Verenigde Nasies gesê ”die wêreld is ‘n meer stabiele plek as vyf jaar gelede, maar die aanval in Kenia wys hoe ernstig die gevaar van terreur steeds is.”

Obama sê al-Kaida het in streeksnetwerke versplinter en hou ‘n “ernstige bedreiging in vir regerings, diplomate, sakeondernemings en burgerlikes regoor die wêreld.”

Die Afrika-Unie is steeds daartoe verbind om aan te hou veg teen al-Shabab militante in Somalië na die aanval op ‘n winkelsentrum in Kenia wat nou reeds vir ‘n vierde agtereenvolgende dag woed. Die AU-mag van sowat 17 000 soldate veg al sedert 2007 teen die militante.

Al-Shabab het bande met al-Kaida en het aanspreeklikheid aanvaar vir die aanval op die Westgate-winkelsentrum. Twee-en-sestig mense is dood en sowat 200 is beseer in die aanval.

Al-Shabab het Kenia gewaarsku om sy soldate uit Somalië te onttrek. – Sapa/AFP

E-tol: appèl vandag in Bloemfontein gehoor

Wayne Duvenage, voorsitter van Outa, die Bondgenootskap teen Stedelike Tol, sê hulle appèl teen die Noord-Gautengse Hooggeregshof se beslissing rakende die e-tolstelsel in Gauteng word vandag aangehoor.

Dit sal een van die laaste pogings wees om die ongewilde e-tolstelsel in die howe te kelder in die appèlhof in Bloemfontein.

Duvenhage wat die laaste paar jaar die stryd lei, glo hul saak is steeds sterk. Hy sê die vorige beslissing was foutief en daarom is besluit om dit verder in die Appèlhof te voer.

Regter Louis Vorster het verlede Desember beslis dat die regering die publiek genoegsaam oor die projek ingelig het.

Outa meer as R11,4 miljoen ingesamel om vir hul regskoste te betaal. Die finale beslissing kan, volgens Duvenhage, binne weke wees.

Die Bondgenootskap teen Stedelike Tol (Outa), staan saam met die Suid-Afrikaanse vereniging vir motorverhuring en bruikhuur (Savrala), die KwadPara-vereniging van Suid-Afrika (Qasa), die Nasionale Verbruikersunie en die Verbruikerskommissie.

Hulle voer aan dat daar ander metodes is wat die regering kan gebruik om geld vir die onderhoud van paaie in te samel en dat e-tol irrasioneel, duur en ononuitvoerbaar is.

Sanral het gister gesê daar is net oor die 600 000 e-skyfies verkoop.

Voordat die stelsel ingestel kan word, moet pres. Jacob Zuma eers die Wysingswetsontwerp op Vervoerwette en Verwante Sake, die sogenaamde e-tolwet, onderteken.

Pres. Zuma die wetsontwerp onlangs teruggestuur het weens ongrondwetlike kwessies, maar die presidensie hou vol dat Zuma steeds die wet oorweeg.

Nie een staatsdepartement kon tot dusver sê wanneer e-tol in werking sal tree nie.

Dodetal in Keniaanse aanval kan verder styg

Buitelandse forensiese spanne help in Kenia met die uitkenning van die liggame van slagoffers van die naweek se aanval deur Al-Shabaab militante in die Westgate winkelsentrum in Nairobi.

Die dodetal kan vermoedelik verder styg met sowat 51 mense van wie daar nog nie rekenskap gegee kan word nie. Dit volg nadat drie vloere van die winkelsentrum ingetuimel het.

Die dodetal staan tans op 61 burgerlikes en ses soldate. Dit is Woensdag deur president Uhuru Kenyatta bevestig.

Volgens Kenyatta is 62 mense ook steeds in die hospitaal. Hy het vroeër drie dae van rou afgekondig.

Intussen beweer al-Shabaab dat van sy aanvallers steeds in die winkelsentrum is. Dit kon egter nog nie bevestig word nie en dit is ook onduidelik of hulle moontlik van die slagoffers in die puin is. – RSG

Om stropers dood te skiet ‘skep probleme’

horny — Nog nie gereed om die bygeloof te laat vaar nie

Suid-Afrika se stryd teen renosterstropery kan net gewen word met ‘n politieke oplossing waarby buurstate en Asiese lande betrek word.

Professor Moses Montesh van die department Polisiepraktyk aan Unisa het dié boodskap oorgedra aan afgevaardigdes by ‘n byeenkoms van die Internasionale Vereniging van Polisievroue in Durban.

Montesh het daarop gewys dat renosterstropery in Mosambiek net as ‘n misdryf bestempel word, terwyl Mosambiekse burgers van mening is dat Suid-Afrika ‘n “doodskiet”-beleid in die Krugerwildtuin volg waar ‘n groot deel van die renosterstropery plaasvind.

Montesh sê dié verskillende sienings skep probleme vir samewerking. Tot dusver vanjaar is 688 renosters reeds vir hulle horings van kant gemaak.

Verlede jaar se totaal was 668. Montesh sê Viëtnam is steeds die grootste verbruiker van gestroopte renosterhorings.

‘n Afvaardiging van Viëtnamese regeringsapmtenare het die Nasionale Krugerwildtuin verlede week besoek om eerstehands kennis te neem van die renosterslagting.

Montesh het aan die afgevaardigdes gesê die regering het hom verlede jaar tydens sy navorsing afgeraai om Viëtnam te besoek, aangesien betrekkinge tussen die lande toe gespanne was. – RSG

Mdluli nogmaals aangekla

Die Pretoriase hooggeregshof het Maandag ‘n besluit deur die NGV om kriminele klagte en dissiplinêre optrede teen misdaadintelligensiehoof Richard Mdluli terug te trek, ter syde gestel. Die hof het ook beslis dat die polisiekommisaris, Riah Phiyega stappe moet doen om weer dissiplinêre aanklagte teen hom in te stel.

Regter John Murphy beslis het dat kriminele sowel as dissiplinêre klagte weer teen Mdluli ingestel word.

Die organisasie Freedom Under Law (FUL) het die aansoek gebrink dat Mdluli vervolg word nadat die klagte vroeër teen hom teruggetrek is.

Adv. Lawrence Mrwebi, hoof van die vervolgingsgesag se gespesialiseerde handelsmisdaadeenheid, het in Desember 2011 besluit om aanklagte van onder meer bedrog teen Mdluli terug te trek.

Adv. Andrew Chauke, ‘n direkteur van openbare vervolging, het in Februarie 2012 besluit om ‘n aanklag van moord en 17 verwante aanklagte teen Mdluli terug te trek.

Die polisie sê hulle bestudeer die hooggeregshof in Pretoria se uitspraak oor die saak. Luitenant-generaal Solomon Makgale wou nie kommentaar lewer oor berigte dat die polisie beplan om teen die hof se beslissing te appelleer nie.

Die Instituut vir Sekerheidstudies sê die individue of groep mense binne die Nasionale Vervolgingsgesag en die Polisie moet verantwoordelikheid neem vir hulle besluit om aanklagte teen die voormalige hoof van die polisie se misdaadintelligensie te laat vaar.

Die ISS het die Noord-Gautengse hooggeregshof- besluit verwelkom wat die besluit om die strafregtelike aanklagte teen Richard Mdluli te laat vaar, ter syde gestel het.

Die woordvoerder van die Instituut, Gareth Newham sê enige klag of bewering oor sameswering wat aan die NVG of die Polisie voorgelê is, moes behoorlik ondersoek word voor dit laat vaar kon word. – Sapa

Lyk in kattebak geïdentifiseer

Die Gautengse polisie is op soek na ‘n aantal verdagtes nadat die ontbindende lyk van ‘n man in die kattebak van ‘n motor by die Montecasino-sentrum in Fourways, noord van Johannesburg, gevind is.

Volgens amptenare het sekuriteitswagte Sondag op die lyk afgekom nadat hulle ondersoek ingestel het na ‘n slegte reuk wat vanuit die motor gekom het.

Die motor was op die vierde verdieping van die sentrum geparkeer.

Polisiewoordvoerder Lungelo Dlamini het gesê die slagoffer is geïdentifiseer as ‘n inwoner van Jukskei-park.

“Die slagoffer is nog nie formeel deur sy familie uitgeken nie. Ons het vasgestel dat die motor waarin hy gevind is, aan hom behoort.” – EWN