Twee ontploffings in die hoofsakesentrum van die Nigeriese stad Jos het die lewens van minstens 118 mense geëis.
Jos lê op die foutlyn tussen die strydende Christelike suide en meestal Moslem noorde. Dis die helfte van Nigerië se bevolking van 170 miljoen Christene.
Nog talle is beseer in die aanval wat volgens die polisie deur die terreurgroep Boko Haram gedoen is. Daar is glo minstens 45 beseerdes.
Die militante groep wat uit Londen befonds word, is tans in die nuus met die ontvoering van meer as 200 skoolmeisies ‘n maand gelede uit ‘n dorp in die noordooste van die land.
Die groep het in April meer as 200 skoolmeisies in Chibok in die noordooste van die land ontvoer en die VSA en sy bondgenote wil die ontvoering as ‘n rede gebruik om Amerikaanse troepe in land te ontplooi.
Die groep se naam beteken: “Westerse onderwys is sondig”, en word deur gematigde Moslems verwerp omdat hulle hulself vir ‘n fundamentalistiese Islamitiese staat beywer.
Boko Haram het plofstofaanvalle verskerp, nadat twee ontploffings ook die hoofstad Abuja geruk het.
President Goodluck Jonathan van Nigerië het die bomontploffings skerp veroordeel.
Jonathan het sy medelye met die families van die slagoffers betuig en Nigeriese burgers verseker dat die regering ten volle daartoe verbind is om die stryd teen terreur te wen.
Mense is steeds onder die puin vasgekeer en die dodetal sal na verwagting nog verder styg.
Die ontploffings het by ‘n busterminaal en ‘n besige mark plaasgevind.
Die voormalige goewerneur van die Abia-staat, Dr Uzor Kalu, het ‘n beroep op die Federale Regering van Nigerië gedoen om saam te werk met die Mosad, die Israeliese geheimediens, en die CIA.
Die voormalige goewerneur het die oproep gedoen by die internasionale vleuel van die Murtala Muhammed Lughawe (MMA), in Lagos die naweek voor joernaliste, het die Nigeriese Daily Independent berig.
Hy het aangevoer dat daar geen manier is waarop Nigerië terrorisme alleen kan beveg nie, en bygevoeg dat dit is hoog tyd dat die Federale Regering met die Mosad, die CIA en ander lande wat ervaring het van die stryd teen terreur, saamwerk.
“Enigiemand wat dink dat Nigerië ‘n vyand van Amerika sal wees, is ‘n grap. Dit is die belangrikste land in die wêreld en hulle moet ons beste vriend op aarde wees as ons wil vorentoe beweeg,” het hy gesê.
Die Parlement is gereed vir die vyfde Parlement wat Woensdagoggend sal open.
Minstens 40 nuwe parlementslede, onder wie 25 lede van die Ekonomiese Vryheidsvegters (EFF), sal ingehuldig word.
Die party sal glo hul rooi berets na die opening dra.
Die inhuldiging van die 400 Parlementslede sal die sitting open. Die LP’s het reeds geregistreer vir die eerste sitting van die Parlement.
Die sitting om halfelf sal gelei word deur die Hoofregter, Mogoeng Mogoeng wat LP’s in groepe van tien sal beëdig.
Die Nasionale vergadering sal die land se president aanwys.
Vierhonderd parlementslede van 13 partye word ingehuldig waarna die speaker, die adjunkspeaker en die president verkies word.
Die ANC het sy voorsitter, Baleka Mbete en ‘n voormalige minister, Lechesa Tsenoli as speaker en adjunk-speaker onderskeidelik genomineer.
Die ANC se besluit om die party se voorsitter, Baleka Meete as die Speaker van die Nasionale Vergadering te benoem. word as ‘n strategiese stap gesien.
Mbete is meer senior as haar voorganger, Max Sisulu, wat tot voordeel van die ANC kan strek. Die speaker is veronderstel om onpartydig te wees.
Dit is nie seker of Mbete die parlementêre komitee sal hernu wat net voor die be-eindiging van Sisulu se termyn saamgestel is om die Nkandla-kwessie te ondersoek nie.
Sisulu was net ‘n gewone lid van die ANC en nie deel van die ANC se nasionale werk-komitee nie.
Die hoofsweep van die Vryheidsfront Plus, Corne Mulder, wat deel van die ANC-regering was, het nuwe parlementslede aangeraai om baie versigtig te wees wat hulle in die Parlement sê.
Die Wes-Kaapse premier, Helen Zille, sal vanmiddag haar nuwe kabinet bekend maak.
Zille sal Woensdag as premier verkies word ná die inhuldiging van lede van die provinsiale wetgewer.
Die Wes-Kaapse regterpresident, John Hlophe, sal die inhuldiging van die 42 lede sowel as die verkiesing van die premier en die speaker waarneem.
Daar is steeds geen benoeming om Lindiwe Mazibuko van die DA as Parlementêre leier te vervang nie. Die benoemingslys is oop tot Maandag.
Die voorsitter van die DA se Federale Uitvoerende Raad, James Selfe, benoemings sal na verwagting eers inkom kort voordat die nuwe leier op 29 Mei verkies word.
Die DA-leier, Helen Zille, ten gunste is van Mmusi Maimane, vir die pos.
Zille se premierskap van die Wes-Kaap terwyl sy nie in die Parlement dien nie, kan vir spanning binne die DA sorg, sê ontleders.
Doelwitte op nasionale vlak sal sneuwel omdat die Parlement as ‘n nasionale forum vir openbare gesprekvoering dien, en nie deur Zille benut sal kan word nie.
Debatte oor sake van nasionale belang sal dus aan onervare lede soos Maimane oorgelaat word, wat soos Mazibuko maklik op sleeptou geneem kan word deur die meerderheid in die Parlement.
Cope het Dinsdag die media en beweerde onegte lede die skuld gegee vir die party se swak vertoning in die afgelope verkiesing.
In ’n verklaring wat Cope uitgereik het ná afloop van sy nasionale komitee-vergadering blameer hy ook al die hofsake wat daar teen Cope was vir die feit dat die party so swak gevaar het.
Cope was vir etlike jare gewikkel in ‘n leierskapstwis wat Terror (Mosiuoa) Lekota uiteindelik teen Sam Shilowa gewen het.
Lekota se onlangse beweerde verhouding met ‘n mede-koukuslid word egter as een van die vernaamste redes beskou oor hoekom die party uitmekaar geval het en baie lede na die ANC oorgeloop het.
Drie senior amptenare van Cope het aan City Press gesê Lekota se beweerde romantiese verbintenis met ‘n partylid, beïnvloed besluite.
“Hy het ‘n kind met hierdie jong vrou. Hy is oud genoeg om haar pa te wees,” het hulle gesê. Lekota is 65 jaar oud en die vrou is in haar dertigs.
“Sy is algemeen bekend as die eerste dame,” het ‘n koukuslid gesê.
Redes volgens Cope was egter die feit dat die SABC Cope deurentyd in ’n slegte lig stel het asook die infiltrasie deur onegte lede.
Cope het wel erken dat die party nie sy verkiesingsboodskap behoorlik uitgedra het nie. Volgens die verklaring was Cope ook nie gereed vir die verkiesing nie.
In 2009 het Cope meer as 1,3 miljoen stemme verwerf. Cope was daardie jaar derde met 7,4% van die stemme. Vanjaar het Cope gesukkel om selfs 1% van die stemme te kry.
Die party se nasionale stempersentasie was minder as 1%.
Duisende van die plakkate is nog steeds te sien aan lamppale oral in die land, twee weke nadat Suid-Afrika in die algemene verkiesing gestem het.
Die Onafhanklike Verkiesingskommissie sê die verwydering van verkiesingsplakkate is nie hulle verantwoordelikheid nie en word deur munisipale ordonnansies beheer.
Die stad Kaapstad het politieke partye tien dae tyd gegee om hulle verkiesingsplakkate te verwyder.
‘n Woordvoerder vir Kaapstad, Priya Reddy, sê kontrakteurs sal van môre af begin om verkiesingsplakkate af te haal.
Partye wat nie gehoor gee nie, sal deur met R126 per plakkaat beboet word, het Reddy gesê.
Die stad Johannesburg moet nog sy spertyd aankondig vir die verwydering van plakkate terwyl die eThekwini-raad in Durban partye drie maande tyd gegee het om hulle plakkate te verwyder.
Pravin Gordhan se heraanstelling in sy pos as minister van finansies, sal onstuimigheid en onsekerheid in markte kalmeer, sê sy ondersteuners.
Terwyl die voormalige voorsitter van die Suid-Afrikaanse Reserwebank, Tito Mboweni, volgens gerugte die voorloper vir die pos skyn te wees, sal dié aanstelling moeilik wees omdat markte en die vakbonde glo nie te vinde is daarvoor nie.
Die aanduiding was “baie sterk” vroeër in die jaar dat Gordhan sy pos sou verlaat aan die einde van sy termyn, sê een ontleder.
Mboweni, het hom intussen onttrek aan die ANC se lys vir die Parlement, en sal nie meer beskikbaar om as LP te dien nie.
Die ANC se sekretaris-generaal, Gwede Mantashe, wou nie reageer op die redes vir Mboweni se onttrekking nie.
Mboweni se redes vir sy besluit is vervat is in ‘n brief aan die ANC en volg na gerugte dat hy die Minister van Finansies, Gordhan sal vervang indien hy nie beskikbaar is vir aanstelling nie.
Mantashe het gesê die brief is aan die ANC gerig en daarom is dit nie gepas om dit openbaar te maak nie.
Ingevolge die wet kan die President twee ministers en twee adjunkministers in sy kabinet aanstel wat nie Parlementslede is nie.
Mboweni kan egter steeds as die minister van finansies in die nuwe kabinet aangewys word al het hy hom onttrek aan die ANC se lys vir die Parlement.
Die president van China, Xi Jinping en die Russiese leier Wladimir Poetin het Dinsdag ontmoet tydens geskiedkundige samesprekinge tussen die twee lande.
Poetin is tans in Shanghai vir ʼn Asiatiese veiligheidsberaad.
Die twee sal ook aan ‘n militêre magsvertoon deelneem waar 14 skepe vir ʼn week lank oefeninge in die Oos-Chinese See sal onderneem.
Dié twee leiers wil bande versterk nadat Westerse aanvalle en gebiedstwiste hulle belange nouer saamgedwing het
Rusland en China wil veral betrekkinge versterk na die VSA se gepoogde oorname van Russiese invloedsfere in die Krim en Sirië misluk het, maar nogtans Amerika se vyandigheid teenoor Rusland duidelik gemaak het.
China het steun nodig in die stryd oor gebiedsregte in die see met Viëtnam, Japan en die Filippyne. China het reeds sy weermag op die grens met Viëtnam saamgetrek om die eise te stuit.
China en Rusland sal binnekort ʼn ooreenkoms teken waarvolgens Rusland natuurlike gas sal uitvoer na China.
Die gaskontrak sal na verwagting Dinsdag gesluit word, waarin Beijing tot $456 miljard vir Russiese gas oor die volgende 30 jaar sal betaal.
Gazprom en China se Nasionale Petroleumkorporasie (CNPC) sal ‘n ooreenkoms vir 38 miljard kubieke meter natuurlike gas vir lewering vanaf 2018 sluit om China se groeiende ekonomie te ondersteun.
Die ooreenkoms hou ‘n wesentlike gevaar vir die Amerikaanse geldeenheid, die dollar, in omdat China die rekening in Chinese Yuan sal vereffen.
China se departement van verdediging het ook Dinsdag die VSA vir “skynheiligheid en dubbele standaarde” veroordeel oor beweerde kuber-spioenasie.
“Van ‘WikiLeaks’ na die ‘Snowden-saak, is die VSA skynheiligheid en dubbele standaarde ten opsigte van kuber-sekuriteit lank reeds duidelik,” het die ministerie in ‘n verklaring op sy webwerf, soos aangehaal deur AFP, gesê.
Die ANC sal Dinsdagoggend die name bekend maak van die premiers van die agt provinsies.
Hulle sal die ANC lei in provinsies waar die party in beheer is.
Dit volg na ‘n vergadering van die party se Spesiale Nasionale Uitvoerende Komitee wat in Pretoria gehou is.
Elke provinsie het drie name aan die NUK voorgelê. Dit is egter steeds die president se keuse wat deurslaggewend is in die aanstellings.
Alhoewel verskeie Mbeki-ondersteuners hoog op die partylyste is, is dit nie seker of Zuma hulle sal oorweeg vir hoë poste nie.
Een so ‘n geval is oud-minister van landbou Thoko Didiza, wat terug is na ses jaar in die wildernis.
Daar word druk bespiegel dat premiers Ace Magashule, David Mabuza en Senzo Mchunu na hulle poste sal terugkeer, ten spyte van wanprestasie.
In Gauteng is die huidige premier, Nomvula Mokonyane, nie benoem nie. Dit volg na bewerings dat Mokonyane ‘n faksie teen Zuma gesteun het wat gelei het tot die ANC se swakker vertoning in die provinsie.
Die sekretaris-generaal van die ANC, Gwede Mantashe, sê daar sal aandag gegee word aan vroue wanneer die premiers aangestel word.
Die voormalige minister van kommunikasie, Dina Pule, sal deur Mnyamezeli Booi vervang word as nommer 70 op die ANC se lys van LP’s wat môre ingehuldig word.
Booi was die voorsitter in die portefeuljekomitee oor verdediging in die vorige parlement.
Nadat Pule haar naam onttrek het, het Booi opgeskuif op die lys.
Die parlementêre woordvoerder sê intussen dat die uittredende parlementêre leier van die DA, Lindiwe Mazibuko haar setel in die Nasionale Vergadering aan Thomas Hadebe sal afstaan.
Die skaduminister van finansies, Tim Harris sal deur Marian Shinn vervang word.
Die eerste sitting van die vyfde demokratiese Parlement plaasvind na die inhuldiging van ampsdraers.
Die platinumprodusente, Amplats, Lonmin en Implats sal Dinsdag ‘n dringende hofaansoek deur die vakbond, Amcu teenstaan.
Amcu het aansoek gedoen dat die platinumprodusente nie meer die stakende mynwerkers per SMS mag kontak nie.
Die platinumprodusente het SMS’se gebruik om die werkers regstreeks oor die nuutste loonaanbod in te lig.
Die uitvoerende hoof van Lonmin, Ben Magara sê tot 67 persent van Amcu-lede het aangedui dat hulle wil terugkeer werk toe, maar hulle vrees vir hul lewens.
Magara sê die maatskappye oortree geen arbeidswetgewing deur die SMS’se uit te stuur nie.
Hy sê ‘n derde van die jaarlikse platinumproduksie is al verlore.
Die platinumprodusent, Lonmin, het die staking in Rustenburg in Noordwes as moordend beskryf. Dit duur reeds 17 weke.
Die maatskappy sê dit kan tot sy ondergang lei indien dit nie omgekeer word nie.
Magara, ‘n Zimabwiër, sê die staking gaan herstrukturering en afleggings onvermydelik maak.
Intussen het die president van Amcu, Joseph Mathunjwa, by ‘n inligtingsessie oor die mynbedryf en die bykans vier maande oue-staking in die platinum-sektor, sy eie rykdom verdedig terwyl werkers krepeer.
Mathunjwa het gereageer op ‘n berig in The Star dat hy “in luuksheid baai”.
Die koerant het berig dat hy drie BMW’s in sy naam geregistreer het teen ‘n beraamde totale waarde van R900 000.
The Star beweer dat hy ook drie huise besit wat in sy naam is. Een van die eiendomme is ‘n vier-ster gastehuis.
Mathunjwa het ook by die ontbytinligtingsessie gesê dat die minerale van Suid-Afrika aan sy burgers eerste behoort voordat dit na ander lande gaan.
“Die minerale moet Suid-Afrikaners eerste bevoordeel voordat dit tot voordeel van die mense in Londen of waar hulle ook al is, gaan” Mathunjwa gesê.
Hy het gesê demokrasie beteken niks as mense op die grond ly nie.
Sowat 200 Lonmin-myners, onder wie ook inwoners van Marikana, sal Dinsdag in die Ga-Rankuwa landdroshof, noord van Pretoria, verskyn.
Die groep word aangekla van openbare geweld, die besit van gevaarlike wapens en intimidasie.
Die mense is op 16 Augustus 2012 in hegtenis geneem, die dag waarop 34 mense deur die polisie doodgeskiet is.
Nog tien mense, onder wie twee polisielede en twee myn veiligheidsbeamptes, is ook destyds gedood toe die mynstaking in geweld ontaard het.
Aanklagte van moord is voorwaardelik deur die hof teruggetrek.
Die ontvoering van ‘n student wat op pad was om ‘n toets te skryf, het gesorg vir ‘n voorbladsy-berig in Die Burger (Praag 13 deser). Sedertdien het hierdie koerant afgesien van sy beleid om net gunstige berigte oor Russel Botman se Universiteit Stellenbosch (US) te plaas. Talle briewe oor die onverkwiklike misdaadsituasie op die kampus en in die dorp is gepubliseer. Pas (19 deser) het nog ‘n berig oor hierdie saak op die voorbladsy verskyn. ‘n Matie-student het omstreeks ses-uur in die middag gaan draf en is met ‘n mes aangeval. Sy het ‘n steekwond van 4 cm in haar ribbes gekry en toe sy ontvlug, is sy snymerke op haar rug toegedien.
Dit lyk asof baie mense in die universiteitsgemeenskap en elders nou uiteindelik sat vir Botman se transformasie en sy vryheidslofliedere is. Die wiel het gedraai. As ‘n voorbeeld hiervan, haal ek die uitstekend geformuleerde brief van Karl Kemp van Stellenbosch (Die Burger, 17 deser, p 11) volledig aan.
“Stellenbosch word deur misdaad verlam, en ons, die slagoffers, se hande is afgekap as gevolg van ons vertroue in die universiteit.
Ons studenteleierskap-struktuur is ‘n poespas van administratiewe tydmors en onbenullighede. Ons universiteitsraad is net ingestel op regeringsmandate en ‘n gedans na politieke pype. Ons polisiediens word beskuldig van geweld en haat, en is toegerus vir ondoeltreffendheid. Feitlik elke groot beleidsverandering of raadsbesluit is gerig op transformasie, winsbejag en om politici te paai.
Intussen word studente voor hul koshuise verkrag. Eiendom van etlike duisende rande word gesteel. Straataanvalle is alledaags; nie meer traumaties nie, maar net ‘n deel van die lewe. Ons leef in voortdurende vrees en paranoia.
Misdadigers lag vir ons. Stellenbosch is vir hulle soos ‘n inkopiesentrum met ‘n ewigdurende 100%-uitverkoping. Die grootste, mees drukkende en pertinente kwessie op ons kampus is nie transformasie of politiek nie – dit is misdaad.
Die prioriteit van die studente en die bestuur is heeltemal uiteenlopend – tot ‘n lagwekkende skaal.
Dit is nie ‘n kwessie van swart of wit nie. Dit is ‘n kwessie van lewe of dood. Dit is hier waar ons die streep in die sand trek; dit is hier waar die studente se stem oplaas gehoor moet word.
Dit wil voorkom of die universiteit nie meer uit lewende studente bestaan nie, maar uit klasgelde en demografiese verteenwoordiging. Ons hele beeld word op politieke korrektheid gebou.
Die studente word daarvan beskuldig dat hulle agterlosig, rumoerig en dronk is – kortliks, ons word daarvan beskuldig dat ons studente is, en daar word aan ons gesê dat ons die skuld moet kry vir die tragedie waarin die kampuslewe ontaard het.
Die universiteitsraad hou ons op ‘n afstand, van waar hy eerstejaars indoktrineer met vae konsepte soos ‘kritieke betrokkenheid’ en ‘sosiale interaksie’, wat lei tot ‘n leierskorps wat meer waarde in koffie-afsprake vind as in probleemoplossing.
Die universiteit het geen plig teenoor die armes en wanhopiges se veiligheid nie; diegene wat na bewering gedryf word tot misdaad soos verkragting. Eerder, die universiteit het ‘n plig om na die veiligheid van studente om te sien, en Russel Botman, sy raad, die polisie en die sogenaamde studenteleiers het almal hierin misluk.
Die grafskrif van die laaste sewe jaar onder Botman se bestuur is ‘n lang lys van roof, verkragting en verrotting. Dit is die absolute laaste strooi.”
Nadat u hierdie weergawe van Karl Kemp se brief gelees het, kan u dalk die moeite doen om sy volledige brief op die werbwerf bonfiire stellenbosch te lees ten einde te sien wat Die Burger uitgelaat het. Die koerant se verskoning sal wees dat die brief te lank was om volledig te publiseer. Lees gerus ook die ander briewe oor hierdie onderwerp op daardie webwerf en die kommentaar onder hierdie briewe. Let op hoe baie Engels pleks van Afrikaans gebruik word; ook deur Afrikaanssprekendes. Dit blyk onder meer dat ‘n mens in Engels met die US se sekuriteitsdiens moet kommunikeer as jy reaksie wil hê. Dít aan ‘n universiteit wat eens Afrikaans was. Dít aan ‘n universiteit wie se sekuriteitsdiens geensins die demografie weerspieël nie.
Wanneer daar enigsins sprake van “rassisme” by die US is, in die sin van wittes wat nie-wittes “benadeel”, klim Russel Botman dadelik op die wa. Wanneer wittes die slagoffers is, soos in bogenoemde gevalle, word die saak aan ‘n viserektor en die skakelbeampte oorgelaat. Dié viserektor se reaksie is op die US-webwerf te lees.
Die leier van die Vryheidsfront Plus in Gauteng, Jaco Mulder het sy skielike uittrede uit die politiek aangekondig.
Mulder sê dit voel na die mees geleë tyd om ná die pasafgelope verkiesing die tuig neer te lê. Hy sê hy het die afgelope 20 jaar met ywer in die party gedien.
Hy is sedert Februarie 2003 die leier van die party in Gauteng en later as lid van die Gautengse Wetgewer.
Daar word bespiegel dat Mulder moes plek maak vir ‘n partylid wat nie deel van die Mulder-familie is nie weens besware van nepotisme teen die VF+.
Pieter Mulder, VF Plus-leier, het in sy reaksie sy dank en waardering teen mnr. Mulder uitgespreek.
“Hy het as voorsitter van die VF Plus se strategiekomitee ’n groot rol gespeel in die herloodsing van die party voor die 2014-verkiesing. Hiervoor is ons hom baie dank verskuldig,” het Pieter Mulder gesê.
Bloedige gevegte tussen strydende militante groepe in die Libiese hoofstad, Tripoli, het die lewens van 4 mense geëis en talle gewond.
Dit volg nadat gewapende magte van genl. Khalifa Haftar die gebou van die tussentydse parlement bestorm het en talle parlementslede uit die gebou moes vlug.
Gevegte het ook vroeg Maandagoggend uitgebreek in Benghazi in oos-Libië nadat gewapende aanvallers vuurpyle na die stad se lughawe, weermag en veiligheidmagte gevuur het.
Daar is gerugte dat die ondersteuners van die droster weermagoffisier, Haftar, die aanval uitgevoer het.
Sy magte het Vrydag ook ‘n grootskaalse lug-en grondaanval op Benghazi uitgevoer wat daartoe gelei het dat die regering die gebied tot ‘n vlugspersone verklaar het. Die aanvallers eis dat die regering ontbind word.
Tripoli beskuldig Haftar se magte, gerugsteun deur vegvliegtuie , helikopters en vuurpyllanseerders van die aanvalle wat talle ontleders meen tot ‘n volskaalse burgeroorlog kan lei.
Haftar probeer homself voorhou as ‘n verdediger van die Libiese mense wat die land van Islamitiese “ekstremiste” wil suiwer.
Haftar is ‘n belangrike speler te midde van die politieke chaos wat Libië steeds teister drie jaar ná die onwettige Amerikaanse inval in die land.
Haftar het sy militêre loopbaan onder Libië se voormalige monargie begin. In 1969 was hy een van ‘n klein groepie, gelei deur Gaddafi wat van Idris ontslae geraak het om Gaddafi vir die daaropvolgende 42 jaar aan bewind te kry.
Haftar se ommeswaai van ‘n lojale Gaddafi bondgenoot na leier van die opposisie, byna twee dekades later, was skynbaar as gevolg van Libië se lang en rampspoedige oorlog met Tsjad tussen 1978-1987.
Haftar is gevange geneem in Tsjad, maar is glo dadelik vrygelaat nadat hy die Libiese leier verloën het.
Die bevelvoerder van Libië se spesiale magte het Maandag aangedui dat sy troepe aangesluit het by Khalifa Haftar.
“Ons is met Haftar,” het die bevelvoerder Wanis Bukhamada aan Reuters gesê.
Die spesiale magte is die beste opgeleide troepe van Libië se ontluikende leër. Hulle is sedert verlede jaar in Benghazi ontplooi.
Benghazi is ook in die nuus in die VSA omdat die aanval in 2012 op die Amerikaanse CIA-basis wat deur Hillary Clinton en die Obama-administrasie toegesmeer word, die Demokrate dalk die volgende verkiesing kan kos.
Clinton was glo besig om onwettig wapens uit die Libiese arsenaal te smokkel na die rebelle in Sirië om ‘n burgeroorlog daar aan te stig.
Bande tussen Haftar en die CIA is deur die New York Times bevestig en gaan sover terug soos 1991.
Die Amerikaanse intelligensie-dienste het die opleiding van Haftar en sy 350-sterk troepekontingent befonds en ondersteun in “sabotasie en ander guerrilla-vaardighede” in Tsjad as deel van pogings in die omverwerping van Gaddafi.
Toe die regering van Tsjad self omvergewerp is in 1990, het die VSA probeer om ‘n nuwe tuiste vir Haftar en sy troepe te reël.
Na mislukte pogings om hulle in Kenia en Zaïre (nou die Demokratiese Republiek van die Kongo) te vestig, moes Washington noodgedwonge uiteindelik asiel toestaan en Haftar na die VSA laat kom.
Die volgende hoofstuk van Haftar se lewe was 20 jaar, oënskynlik heel rustig saam met sy gesin in die voorstedelike Virginia, net ‘n paar kilometer weg van die CIA se hoofkwartier in Langley.
Die VSA se militêre magte het die getal vliegtuie in Italië verdubbel om Libië te ontruim, het CNN Dinsdag berig.
Die besluit om te ontruim as geweld in die Libiese hoofstad toeneem word tans “minuut per minuut, uur na uur” gevolg, het ‘n Amerikaanse verdedigingsamptenaar aan CNN gesê.
Intussen het die Saoedi-ambassadeur in Libië aangekondig dat sy land se ambassade en konsulaat in Tripoli gesluit is van Maandag as gevolg van die geweld, en die personeel het Tripoli verlaat.
Turkye, nog ‘n Amerikaanse bondgenoot, het soortgelyke maatreëls aangekondig en sy konsulaat in Benghazi gesluit, het die Anadolu-nuusagentskap berig.
Twee renosterkoeie is doodgemaak en van hulle horings gestroop by die Tala-privaatwildreservaat naby Pietermaritzburg, het RSG berig.
Die jongste voorval bring die getal renosters wat tot dusver vanjaar in Kwazulu-Natal gestroop is, op 41 te staan.
In dieselfde tydperk verlede jaar is slegs 27 renosters gestroop. Die bestuurder van die wildreservaat, Phelelani Duma, sê hulle het gisteroggend op die twee onthoringde renosters afgekom.
Duma sê die kwessie is by die Valke aangemeld.
Volgens hom is die stropery ‘n nuwe verskynsel in privaatreservate in en om Pietermaritzburg.
Johnny Clegg, die “wit Zoeloe” se een agtergrondsanger is tydens ‘n rooftog in Troyeville, Johannesburg doodgeskiet.
Die Gautengse polisie stel ondersoek in nadat Clegg se medesanger Bongani Masuku deur rowers vermoor is.
Die polisie sê Masuku is Sondagaand dood. Hy het in 1992 met Clegg begin saamwerk.
Volgens die polisie het vier swartes op Masuku toegesak terwyl hy besig was om sy motor te parkeer, ‘n vuurwapen op hom gerig en sy selfoon en die motorsteutels geëis.
Die rowers en Masuku het daarna handgemeen geraak waarna een van die mans Masuku verskeie kere geskiet het.
Die aanvallers het daarna in ‘n minibus op die vlug geslaan.
Masuku het toe self na ‘n nabygeleë brandweerstasie gery waar hy inmekaargesak en dood is.
Clegg het op sy amptelike webwerf gesê hy is geskok en hartseer oor Masuku se ontydige en sinlose dood. Hy wou nie met die media praat nie.
Dit is die tweede sanger wat met Clegg saamgewerk het, wat vermoor word. Dudu Zulu, ook ‘n goeie vriend en perkussiespeler in Clegg se eerste groep Savuka, is doodgeskiet in KwaZulu-Natal in 1992.
Duitsland het naas die VSA die wêreld se gewildste bestemming vir immigrante geword, het die Financial Times berig.
