Die platinumprodusente, Amplats, Lonmin en Implats sal Dinsdag ‘n dringende hofaansoek deur die vakbond, Amcu teenstaan.
Amcu het aansoek gedoen dat die platinumprodusente nie meer die stakende mynwerkers per SMS mag kontak nie.
Die platinumprodusente het SMS’se gebruik om die werkers regstreeks oor die nuutste loonaanbod in te lig.
Die uitvoerende hoof van Lonmin, Ben Magara sê tot 67 persent van Amcu-lede het aangedui dat hulle wil terugkeer werk toe, maar hulle vrees vir hul lewens.
Magara sê die maatskappye oortree geen arbeidswetgewing deur die SMS’se uit te stuur nie.
Hy sê ‘n derde van die jaarlikse platinumproduksie is al verlore.
Die platinumprodusent, Lonmin, het die staking in Rustenburg in Noordwes as moordend beskryf. Dit duur reeds 17 weke.
Die maatskappy sê dit kan tot sy ondergang lei indien dit nie omgekeer word nie.
Magara, ‘n Zimabwiër, sê die staking gaan herstrukturering en afleggings onvermydelik maak.
Intussen het die president van Amcu, Joseph Mathunjwa, by ‘n inligtingsessie oor die mynbedryf en die bykans vier maande oue-staking in die platinum-sektor, sy eie rykdom verdedig terwyl werkers krepeer.
Mathunjwa het gereageer op ‘n berig in The Star dat hy “in luuksheid baai”.
Die koerant het berig dat hy drie BMW’s in sy naam geregistreer het teen ‘n beraamde totale waarde van R900 000.
The Star beweer dat hy ook drie huise besit wat in sy naam is. Een van die eiendomme is ‘n vier-ster gastehuis.
Mathunjwa het ook by die ontbytinligtingsessie gesê dat die minerale van Suid-Afrika aan sy burgers eerste behoort voordat dit na ander lande gaan.
“Die minerale moet Suid-Afrikaners eerste bevoordeel voordat dit tot voordeel van die mense in Londen of waar hulle ook al is, gaan” Mathunjwa gesê.
Hy het gesê demokrasie beteken niks as mense op die grond ly nie.
Sowat 200 Lonmin-myners, onder wie ook inwoners van Marikana, sal Dinsdag in die Ga-Rankuwa landdroshof, noord van Pretoria, verskyn.
Die groep word aangekla van openbare geweld, die besit van gevaarlike wapens en intimidasie.
Die mense is op 16 Augustus 2012 in hegtenis geneem, die dag waarop 34 mense deur die polisie doodgeskiet is.
Nog tien mense, onder wie twee polisielede en twee myn veiligheidsbeamptes, is ook destyds gedood toe die mynstaking in geweld ontaard het.
Aanklagte van moord is voorwaardelik deur die hof teruggetrek.
Ek dog die hele land (dis nou vakbonde, ANC ens.) is teen “labour brokers” gekant – dit is nou presies wat AMCU mee besig is. Die werkers is in die myne se diens – nie in AMCU s’n nie so waarom is dit ‘n probleem as die myne self met die werkers onderhandel?
Hier is ‘n magstryd aan die gang en die werkers op die grond is maar die pionne in hierdie skaakspel. Dit gaan hier oor die “onteiening” van die oorsese maatskappye se bates op ‘n manier wat die regering nie as die “vark” gaan uitwys nie maar as die “redder”. Die myne sal moet mense aflê – nou sal hulle heelwaarskynlik gedreig word – die volgende is dat hierdie myne onder “kuratorskap” geplaas gaan word (natuurlik deur die regering – sien ook onlangse wetgewing oor eiendom ens).
Die myne en mynbase (lees ook plaasboere, besigheidseienaars, huiseienaars ens) gaan hierdie selfde ding nog oorkom. Ek hoop hulle besef wat aan die gang is en plaas die nodige in plek om hierdie kommunistiese planne te fnuik.
het die myners nog geld vir selfone na soveel maande sonder inkomste
Die ontvang werk nog – net die stuur nie.