Etiket: Eskom

Begroting teiken wit belastingkoeie

Die regering het in sy begrotingsrede die bekommernisse van die gewone belastingbetaler herbevestig.

Staatskuld wat in 2017 tot ‘n enorme R2,3 triljoen gaan styg, was een daarvan. Reeds R153 miljard word begroot net om die rente op staatskuld vir 2015 te dek.

Die grootte van hierdie bedrag is nie onbenullig nie, veral in die lig gesien van ontwikkelende lande soos Griekeland wat tans ten gronde gaan weens skuld.

Vrese groei dat die regering met ‘n ekonomiese groeikoers van 2% nie in staat sal wees om Suid-Afrika op die lang termyn uit ‘n skuldput te kry nie.

Die ANC moes daarbenewens vir die eerste keer in twintig jaar die persoonlike belasting met een persentasiepunt opstoot.

Brandstofheffings sal ook aansienlik verhoog word binne die volgende twee maande om die sukkelende Padongelukfonds (RAD) te red.

BTW, ‘n baie meer regverdige belasting wat op alle Suid-Afrikaners gehef kan word, is egter nie verhoog nie. Twee persentasiepunte sou ten minste ‘n deel van die nypende tekorte aangespreek het, te wete byna R40 miljoen.

Die klem bly egter om die die krimpende groepie wit belastingbetalers te straf vir die ANC se spandabele landsbestuur.

Persoonlike belastingbetalers word geteiken om die las van wanbesteding, korrupsie en gebrek aan bestuur te dra.

Die deurlopende hulp aan openbare ondernemings soos Eskom en SAL, sonder planne om dié instellings na behore te reg te ruk, is net nog geld in die water.

Die regering het pas aangekondig dat die aankope van skoolboeke gesentraliseer sal word is ‘n poging om korrupsie hok te slaan.

Die staatsdiens beskik egter reeds nie oor die administratiewe vaardighede om so ‘n aankoopproses suksesvol te implementeer nie.

Die enigste goeie nuus is dat klein sakeondernemings ‘n aantal belastingvrystellings kan verwag.

Rokers en drinkers sal moet hoes en proes, met whiskey wat byna R4 per bottel duurder sal word en ‘n pakkie sigarette met byna R1.

Anglo American wil steenkoolbedryf verkoop weens aandrang op swart eienaarskap

Verskaffing aan Eskom ‘nie belangrik in ons portefeulje’, sê Mark Cutifani

Eskom se aandrang op “swart steenkool” mag daartoe lei dat die mynreus Anglo American al sy steenskoolverskaffing aan die elektrisiteitsmaatskappy staak. Volgens die HUB van Anglo, Mark Cutifani, word die maatskappy se besluit om sy steenkoolmyne vir die plaaslike mark te verkoop “ten dele” geneem as gevolg van Eskom se aandrang dat hul onderneming “meer as 50% swart” moet wees.

“Ons het ons planne geskets om vanuit ‘n deel van ons plaaslike verskaffing te onttrek,” het hy verlede week tydens ‘n mediagesprek gesê. “Ons reageer sowel op regeringsaandrang dat ons meer as 50% in plaaslike hande moet hê as op die feit dat, vanuit ons oogpunt, die plaaslike verskaffing ‘n goeie onderneming was, maar dit is nie so belangrik in ons portefeulje nie. Daarom, om strategiese redes en om die regering tegemoet te kom, sal ons ons eienaarskap tot onder 50% verminder, wat die New Largo-projek insluit.” Die transaksies sal egter op ‘n “handelsgrondslag” geskied en “enigeen” sal oorweeg word. Anglo sal ook geen hulp aan swart beleggers verskaf nie, wat self die fondse sal moet bekom om aandele by Anglo aan te koop.

Volgens Cutifani is daar “aansienlike belangstelling” om ‘n belang in hul plaaslike steenkoolondernemings te bekom. Daarteenoor gaan die groep glad nie enige van sy steenkooluitvoerondernemings verkoop nie. In die 2014-finansiëlejaar het die groep 18,2 miljoen ton (mt) steenkool uitgevoer, wat op ‘n jaargrondslag ‘n toename van 7% beteken. Oorsese kliënte dring geensins op rassekwotas aan as dit by die verskaffing van steenkool kom nie.

Die plaaslike steenkoolmark wentel hoofsaaklik om Eskom wat tans sukkel om genoeg elektrisiteit op te wek weens jare lange wanbestuur en die uitwerking van regstellende aksie wat ‘n verlies aan ingenieurskundigheid in die maatskappy veroorsaak het. Verkope van Anglo aan Eskom het verlede jaar met 5% tot 37,5 mt gedaal, hoofsaaklik omdat Eskom minder van Nieu-Vaal aangekoop het, asook omdat die mynmaatskappy produksie by Kriel afgeskaal het terwyl nuwe myngebiede beplan word.
“Ons is egter van plan om teen volspoed te werk sover dit steenkooluitvoere betref,” sê Cutifani. “Dus gesels ons met die regering oor wat vir ons werk en wat vir hulle werk,” sê hy. Volgens die nuwe regulasies van die departement van handel en nywerheid – die breëswartbemagtiging – moet nuwe steenkoolmyne oor ten minste 51% swart beheer beskik, terwyl Eskom in sommige gevalle op nog “swarter steenkool” aandring met 60% swart eienaarskap. Dít, in weerwil van mededingende wetgewing in die vorm van die Mynhandves wat slegs op 26% “bemagtiging” aandring.Dinge het vir die eerste keer tussen Anglo American en Eskom begin krap toe ‘n verskaffingsooreenkoms betreffende die New Largo-projek onderhandel is. Eskom se voorsitter, Zola Tsotsi, het Anglo van dubbelsinnigheid beskuldig toe daar onderhandel is vir verskaffing aan die nuwe Kusile-kragstasie wat teen 2017/18 in werking sal tree. Dié stasie sal 4 800 MW opwek. Volgens Vusi Mboweni, die waarnemende hoof van Eskom se primêre energiedepartement, mik die maatskappy tans na 55% swart bemagtiging by verskaffers, wat geslykstaande is aan 80mt per jaar teen 2022 vanaf die huidige 30% of 42 mt verlede jaar.
Dus sal Anglo American sy verskaffingseenhede aan Eskom verkoop, tesame met sy kopermyne in Suid-Amerika en sekere platinamyne in Suid-Afrika om sy huidige skuld van $12,9 miljard te verminder. Anglo wil in die toekoms iewers tussen $10 en $12 miljard skuld.

Geen beurtkrag vandag?

Volgens ‘n twiet op Eskom se Twitterblad van gisteraand 11-uur, is fase-1-beurtkrag gekanselleer omdat verbruikers glo “elektrisiteit bespaar” het.

Soos praag egter gister berig het, kan verbruikers steeds beurtkrag en kragonderbrekings oor die langer termyn verwag soos wat Eskom se probleme weens ‘n jare lange gebrek aan instandhouding en goeie bestuur toeneem.

Paniek oor Eskom: binnekort dalk geen krag en water, maar wel onluste, plundery

Soos wat meer en meer nuus oor Eskom uitlek, kom dit voor asof jare se wanbestuur deur hoogs besoldigde “uitvoerende beamptes” uiteindelik hul tol begin eis. Die koerant Business Day berig vandag dat die elektrisiteitsreus Donderdag “ten minste 10 000 Mw van sy vermoë verloor het”, die ergste sedert die kragonderbrekings in 2008. Hierdie toestand gaan ten minste vir die volgende twee tot drie jaar duur.

Volgens Eskom het daar Donderdag 10 424 Mw (een kwart van die land se totale elektriese vermoë) se opwekkeningseenhede “onverwags onklaar geraak”, wat die maatskappy naarstiglik laat soek het na maniere om ‘n totale ineenstorting van die netwerk te keer. ‘n Verdere 5 000 Mw se vermoë was boonop onbeskikbaar vanweë beplande instandhouding.

Ingenieurs en afgetrede ingenieurs wat buite die stelsel verkeer en dus meer vrylik kan praat, is bekommerd dat ‘n totale ineenstorting van die kragnetwerk nie meer ver is nie. Dit kan tussen 2 weke en 2 maande neem vir die netwerk om weer aan die gang te kom soos wat kragsentrales weer aangeskakel moet word, wat miljoene mense binne ure sonder krag, water, kommunikasie en veral veiligheid kan laat.

Die Amerikaanse ervaring in New Orleans na afloop van die Katrina-orkaan het getoon dat veral die swart bevolking dit as ‘n geleentheid om te roof, te plunder en te verkrag gesien het. Terwyl die hoofstroommedia in die VSA dié aspek van die ramp in Augustus 2005 geïgnoreer het, het konserwatiewe webblaaie in die VSA gewemel van eerstehandse berigte van die chaos wat gevolg het toe daar nie meer krag of water was nie.

‘n Ingenieur van Pretoria, mnr. Alex Bell, het gepoog om uit te vind of die Pretoriase munisipaliteit oor enige gebeurlikheidsplanne beskik om seker te maak dat inwoners ten minste water sou hê indien Eskom se kragnetwerk ineenstort. Hy skryf in ‘n epos dat mense hul eie voorsorgmaatreëls moet tref aangesien die Suid-Afrikaanse “owerheid” nóg besorg oor die krisis is nóg oor enige voorsorgmaatreëls beskik:

Ek woon in ‘n sekuriteitsoord met ongeveer 250 wooneenhede. Dit kan na my mening onverantwoordelik wees om NIKS te doen nie, maar elkeen moet sy eie plan beraam.

INDIEN die Eskom-NETWERK VAL – ineenstort, soos totaal, gaan dit ten minste enigiets van 2 weke tot 2 maande neem om dit weer aan te kry.
MAAR waar lê die grootste risiko? Dit is nie die feit dat ons nie gaan krag hê nie, daarvoor kan ons ‘n plan maak soos gas of iets, MAAR WAT MAAK ONS INDIEN DAAR NIE WATER IS NIE !!!!

Daar is geen bron van waar drinkwater aangery kan word nie – moontlik rou water vanaf nabygeleë damme. Die kettingwinkels sal net vir ‘n dag of twee water hê en die reservoirs wat in die Randwater- en byvoorbeeld munisipale verspreidingsnetwerke is sal maksimum vir ongeveer 48 uur water kan voorsien. En daarna ??? In ‘n stad soos Pretoria of Johannesburg sal dit afhanklik wees van waar die water voorsien word, maar nog steeds sal die munisipale pompstasies asook dié se Randwater-inlynpompstasies NIE water kan pomp sonder krag nie !!!!

Ek het met “bekwame persone” van byvoorbeeld Pretoria-munisipaliteit gesels en dié sê dat Pretoria geen bystandsgenerators het wat aangeskakel kan word vir dié doel nie.

Só het ek ook gesels met bekwame persone van Randwater, en dié sê hulle het by verre nie genoeg / voldoende / net enkele bystandskragopwekkers wat gebruik kan word, sou daar ‘n krisis ontstaan.

Ek dink dié boodskap moet uitgaan sodat ons mense NIE KAN SÊ HULLE IS NIE BETYDS GEWAARSKU NIE !!!

Die noodsaaklike behoefte aan water sal in die orde van sê 4 000 liter (4 kubieke meter) per persoon per maand wees. Bronne wat gebruik kan word is byvoorbeeld: boorgate, swembaddens en watertenks.

Indien mense twyfel oor die moontlikhede dat die Eskomnetwerk kan faal, skakel en gesels met verantwoordelike persone oor die stand van onderhoud wat by Eskom ondervind word.

Ongeag die vooruitsig van ‘n volslae krisis en moontlike chaos wat daarop kan volg, rig Eskom reeds enorme skade aan die ekonomie aan. ‘n Energiekundige wat gereeld selfs in die hoofstroommedia aangehaal word, Chris Yelland, het vanoggend soos volg getwiet oor ‘n verdere “menslike fout” by die Koebergkragstasie:

Benewens water, behoort mense ook droë kos soos rys wat min water verg om gaar te maak, byderhand te hou, tesame met genoeg gas, kerse en brandstof in voertuie aangesien die pompe by vulstasies ook nie mag funksioneer nie.

Beurtkrag waarskynlik met sukkelende Eskom

Die geskeduleerde instandhoudingswerk by Eenheid 1van die Koeberg Kernkragsentrale naby Kaapstad begin Maandag en sal na verwagting tot einde Mei duur.

Eenheid 1 het weens ‘n onverwagse tegniese fout aan die einde van Januarie onklaar geraak.

“Die stelsel sal hierdie week ook onder druk bly, dus bly die risiko vir beurtkrag hoog,” het Eskom gesê. “Daar is ‘n tekort aan opwekkingskrag weens eenhede wat tans weens beplande en onbeplande instandhouding nie krag aan die netwerk kan voorsien nie.”

Eskom het intussen gewaarsku dat die kragnetwerk steeds onder groot druk verkeer.

“Eenheid 1 by Koeberg word vanaf Maandag afgeskakel vir ʼn geskeduleerde inspeksie en instandhouding. Die eenheid sal na verwagting teen die einde van Mei weer beskikbaar wees,” het Eskom bygevoeg.

Fase Twee-beurtkrag is die naweek toegepas, wat die sesde agtereenvolgende dag van landwye beurtkrag was.

Eskom sê hy het die naweek gefokus op sy dieselreserwes en die watervlakke van damme vir die komende week se kragopwekking.

Die fokus is om die eenhede, wat onvoorsiend van die netwerk afgehaal moes word, so gou as moontlik weer aan die gang te kry.

Die maatskappy het Suid-Afrikaners gemaan om steeds elektrisiteitsbesteding in te kort om die erns van beurtkrag te beperk.

Eskom waarsku dat herstel tyd neem

Eskom het laat Donderdagaand sy fase drie beurtkrag beëindig, maar het gewaarsku dat dit kan tyd neem om die kragtoevoer na alle gebiede te herstel, het RSG berig.

Die kragverskaffer gaan gebuk onder geweldige druk om die ligte aan te hou, met 27 van sy 87 kragopwekkers wat Donderdag nie behoorlik gefunksioneer het nie.

Dit sluit in een van die twee opwekkers by die Koeberg kernkragsentrale in die Kaapse Skiereiland, wat vroeër vandeesweek onklaar geraak het.

Eskom het gister fase-twee beurtkrag toegepas en moes dit teen laatmiddag na fase-drie oorskakel.

Dit het chaos in die spitsverkeer veroorsaak. Die sakesektor het gewaarsku dat kragprobleme kan lei tot werksverliese.

Eskom het egter die moontlikheid van ‘n landswye ineenstorting van die kragnetwerk uitgesluit.

Eskom het intussen aangekondig dat beurtkrag ook Vrydag ingestel sal word.

“Fase 2-beurtkrag sal vandag van 08:00 tot 22:00 toegepas word,” het die kragvoorsiener gesê.

Landbou- en energie-belanghebbendes Vrydag wat ‘n werkswinkel oor energiebesparing, volhoubaarheid en klimaatsverandering by Glen Landboukollege buite Bloemfontein bywoon, het gehoor dat SA ten minste R7,5 miljard per jaar aan elektrisiteitdiefstal verloor.

Eskom se Eugene Myburgh het die volhoubaarheidswerkswinkel aangebied vir Eskom.
 
By dieselfde geleentheid, is verklaar dat 2014 die warmste jaar op rekord was. Die landbousektor is gewaarsku oor die werklikheid van klimaatsverandering, veral in Afrika, waar ‘n temperatuurverhoging van 1,5-3 grade Celsius groot persentasies waardevolle landbougrond kan vernietig.

DA betoog teen Eskom-monopolie

Die DA het Woensdag gesê die regering se monopolie op kragvoorsiening moet gebreek word en privaatelektrisiteitsprodusente moet in die mark toegelaat word om mee te ding, het Sapa berig.

“Kom ons breek die monopolie voor Eskom ons breek,” het Mmusi Maimane, parlementêre leier van die DA, aan ondersteuners in Johannesburg gesê.

Die DA het buite Megawattpark, Eskom se hoofkantoor, in Sunninghill betoog. “Skrap nou die kernooreenooms … Zuma en sy kabinet jaag hul eie pensioene uit hierdie ooreenkoms. Dit het niks te make met die behoeftes van Suid-Afrikaners nie,” het Maimane gesê.

Hy het ‘n beroep gedoen op die parlement om die Wetsontwerp op Onafhanklike Stelsels en Markoperateurs (ISMOB) goed te keur. Indien die wetsontwerp goedgekeur word sal dit privaatinstansies tot die mark toelaat.

Eskom kondig fase-2 beurtkrag aan

Eskom het aangekondig dat beurtkrag vanaf Donderdagoggend na fase 2 sal aangepas word.

“Die kragnetwerk is steeds onder druk. Fase 2-beurtkrag sal vandag [Donderdag] van 08:00 tot 23:00 toegepas word,” het Eskom se woordvoerder, Khulu Phasiwe gesê.

Die kragvoorsiener ervaar steeds probleme met sy opwekkingvermoë.

Eskom het Woensdag van 10:00 tot 14:00 fase 1-beurtkrag toegepas waarna fase 2-beurtkrag tot na 22:00 toegepas is.

Fase 1-beurtkrag maak voorsiening dat tot 1000 MW se kragverbruik ingekort word, fase 2 tot 2000 MW en fase 3 maak voorsiening vir die inkorting van tot 4000 MW se kragverbruik.

Dit beteken ook dat verbruikers tot twee maal ‘n dag vir sowat twee tot vier ure ‘n dag sonder krag kan wees. Hy sê die druk kan toegeskryf word aan die verlies van nog opwekkingseenhede.

Volgens Phasiwe is vyf van die eenhede onklaar.

‘n Woordvoerder van Nasionale Energiereguleerder (NERSA) het vroeër gesê hulle is nog besig om te bereken nadat Eskom toestemming gegee is om kragtariewe te verhoog.

NERSA het toestemming vir ‘n verhoging gegee om bykomende dieselkoste te verhaal wat Eskom moes aangaan om gasturbines aan die gang te hou vir kragvoorsiening.

NERSA het in November verlede jaar ‘n 12,6% verhoging aan Eskom toegestaan

Koeberg sukkel weens tegniese probleme

Die Koeberg-kernkragsentrale het die helfte van sy opwekkingsvermoë – sowat 900 megawatt – weens ‘n tegniese prbleem verloor.

Eskom se woordvoerder, Khulu Phasiwe sê ‘n transformator het glo onklaar geraak wat die kragvoorsiener genoop het om eenheid-een van die netwerk te ontkoppel.

Hy sê die netwerk is tans stabiel maar het nie die moontlikheid van beurtkrag uitgesluit nie.

Phasiwe sê instandhoudingswerk sou vanaf 9 Februarie op Koeberg se Eenheid Een gedoen word.

Hy sê hulle vergader om 07:30 Maandagoggend waar vasgestel sal word of onderhoudswerk vroeër kan begin.

Misdadigers buit SA se kragkrisis uit

Die ANC se sekretaris-generaal, Gwede Mantashe, sê die regering oorweeg alternatiewe bronne van energie om Suid-Afrika se huidige energiekrisis die hoof te bied.

Die voortgesette kragkrisis in Suid-Afrika lei tot al meer kommer oor veiligheid omdat misdadigers die situasie uitbuit.

Volgens inligting monitor misdadigers die beurtkrag-skedules en weet dan watter gebiede geteiken kan word. Die geskeduleerde beurtkrag duur gewoonlik sowat twee ure per keer.

Diegene wie se huisalarms nie ‘n batterystelsel het nie, word die meeste blootgestel indien daar ‘n kragonderbreking is.

Hy het tydens ‘n mediavoorligtingsessie in Pretoria na die driedaagse vergadering van die ANC se Nasionale Uitvoerende Komitee die afgelope week gesê buurstate soos Mosambiek sal genader word vir kragvoorsiening.

Hy het ook gesê die NUK het die regering gevra om dringend in te gryp om Eskom te help om sy kragstasies vinniger te bou.

Eskom het intussen aangekondig dat beurtkrag vroeër as beplan gestaak is omdat die vraag na krag laer was as wat verwag is.

Mantashe het gesê hernieubare energie behoort aan die hoofnetwerk gekoppel te word.

Mantashe, het ook gesê die regering moet ‘n vaardigheidsoudit in plaaslike regerings doen om diegene te verwyder wat poste beklee waarvoor hulle nie gekwalifiseerd is nie.

Hy het gesê geskoolde en gekwalifiseerde mense word dringend benodig om te verseker dat plaaslike regering basiese dienste doeltreffend kan lewer.

Versekeraars het ‘n beroep op mense gedoen om hulle alarmstelsels na te gaan en so ook hul korttermynversekeringsdekking.

Eskom kondig Fase-2 beurtkrag aan

Eskom het Maandagmiddag aangekondig dat hy fase twee van beurtkrag begin toepas het, het Sapa berig.

“Beurtkrag het van 15:00 af van fase een na fase twee beweeg,” het die kragreus in ‘n verklaring gesê. Beurtkrag sal tot 22:00 Maandagaand voortduur.

Fase een maak voorsiening vir die besnoeiing van tot 1 000MW se kragverbruik, fase twee tot 2 000MW en fase drie maak voorsiening vir die besnoeiing van tot 4 000MW se kragverbruik.

“Ons weet nie om watter rede nie, [maar] ons het net ʼn oproep van Eskom ontvang om na fase twee te skakel,” het Sol Masolo, woordvoerder van City Power, gesê. “Eskom-bestuurders hou glo ‘n noodvergadering,” het hy gesê.

Eskom het vroeër Maandag gesê die kragnetwerk verkeer onder kwaai druk weens onvoorsiene tegniese probleme by kragstasies en het verbruikers gevra om nie-noodsaaklike toestelle af te skakel.

Beurtkrag wag vir Namibië na SA se kragkrisis

’n Verslag wat deur internasionale­ kenners saamgestel is, waarsku dat Namibië ’n ernstige kragkrisis­ in die gesig staar vanweë die plaaslike­ afgeleefde­ hidroëlektriese kragaanleg­, asook die land se steun op Suid-Afrika, het die Republikein berig.

NamPower se beplande Kudu- en Arandis-kragsentrale, asook kleiner beleggings in hidroëlektriese- en sonkragontwikkeling sal eers in die lang termyn vrugte afwerp. Tot dan sal kragverbruik in Namibië die aanbod van elektrisiteit ver oorskry en sal kragonderbrekings en beurtkrag by tye aan die orde van die dag wees, sê Business Monitor International (BMI), deel van die Fitch-groep, in sy verslag, “Namibia Power Report”.

MI meen voorts “ernstige tekortkominge­ in die struktuur van die mark” sal nuwe beleggings in veral hernubare energie bemoeilik. Daar heers ’n tekort aan ’n “robuuste­ regulatoriese­ raamwerk” in Namibië se energiemark en dit word boonop oorheers deur ’n “ondoeltreffende­ voorsiener in staatsbeheer wat private mededinging uitsluit”, aldus BMI.

Dié ontleders verwag dat Namibië se kragopwekking binne tien jaar met 500% sal styg, hoofsaaklik aangedryf­ deur termiese- en gasaangedrewe kragsentrale-ontwikkelings. Teen 2023 behoort die land 12,4 terawatt-uur­ (TWh) te bereik.

Volgens BMI behoort Namibië se kragverbruik teen dié jaar 6,6 TWh te beloop, wat beduidende uitvoere van elektrisiteit moontlik sal maak.

“Transmissie- en verspreidingsverliese in 2015 sal hoog wees – 24,9% van uitset – weens diefstal en die swak toestand van die kragnetwerk. Persentasiegewys­ behoort dit egter oor die tienjaar vooruitskattingstydperk­ stelselmatig­ te verminder,” sê BMI.

Namibië behoort binne die volgende­ vier tot vyf jaar geen ernstige­ kragonderbrekings­ te ervaar nie, het NamPower verlede week in ’n verklaring­ ­verseker.

Dié onderneming in staatsbeheer­ het voldoende maatreëls deur middel van sy kort termyn kritieke­ kragvoorsieningsinisiatiewe­ getref om as teenvoeter teen enige moontlike­ tekorte te dien, het NamPower­ gesê.

NamPower se planne om voldoende elektrisiteit in die afsienbare toekoms te voorsien, sluit in die bestuur van kragvraag, die opknapping­ van die Van Eck- en Ruacana-kragsentrale­, asook die ontwikkeling van ’n kragaanleg­ van 250 MW. Laasgenoemde gaan in samewerking met die private sektor aangepak word om in kragbehoeftes te voorsien totdat Kudu ontwikkel is.

In die medium tot lang termyn beplan NamPower die ontwikkeling van die Baynes-waterkragaanleg.

Intussen het Eskom in ‘n verklaring gewaarsku dat die vraag na krag in spitstyd sal tot Vrydag hoër wees as die kragvermoë wat beskikbaar is. Dit sal waarskynlik nog kragonderbrekings tot gevolg hê.

Die Suid-Afrikaanse verskaffer het Maandag tweeduisend Megawatt aan die netwerk onttrek in ‘n poging om te keer dat die vraag sy vermoë oorskry, na tegniese probleme by van die kragstasies.

Zuma: SA gaan krag van privaatinstansies aankoop

Die Suid-Afrikaanse regering het in Davos, Switserland aangekondig dat hulle krag van privaatinstansies sal aankoop.

Dié aankondiging is deur President Jacob Zuma gemaak wat die Wêreld Ekonomiese Forum in die Alpe bywoon. Zuma sê 923 megawatt se onafhanklike elektrisiteit is reeds by die nasionale kragnetwerk gevoeg.

Die land gaan vier duisend megawatt se elektrisiteit van privaat kragverskaffers bekom.

Die president het gesê die aanskaffing van hernubare energie het reeds meer as R80 miljard rand van privaatbeleggers gelok.

Zuma het ook erken dat instandhoudingswerk die afgelope paar jaar afgeskeep is en dat die land sukkel om die ligte aan te hou.

Hy sê Suid-Afrika sal bou op die sukses van sy hernubare energieprogram om ‘n betroubare, skoon en mededingende kragopwekkingsnetwerk te verseker.

Die Minister van Finansies, Nhlanhla Nene, het Woensdag die besluit van drie van Eskom se uitvoerende beamptes verwelkom om hulle besoek aan die WEF-byeenkoms in Switserland te kanselleer.

Eskom het vroeër die besoek van die drie amptenare gekanselleer na kritiek oor die besoek wat sou plaasvind te midde van die kragvoorsieningskrisis.

Die regering het by die byeenkoms die versekering gegee dat die kragkrisis in die land, nie sy pogings om internasionale beleggers te lok sal ontspoor nie.

Die internasionale beraad word by die luukse ski-oord gehou, waar wêreldwye sosio-ekonomiese uitdagings bespreek word.

Nene sê die regering probeer om uitdagings soos die trae ekonomiese groei, energie-krisis en werkloosheid op te los.

ANC politiseer kragvoorsiening om privatisering te verhoed

‘n Witskrif van 1998 rakende Suid-Afrika se energie-aanvraag het voorspel dat kraglewering teen 2007 onder geweldige druk sou kom. Die ANC blameer ‘n moratorium wat tot 2004 in plek was, vir voorsieningsprobleme.

Eskom se eie ingenieurs het bereken dat ‘n nuwe steenkoolkragstasie elke drie jaar gebou sou moes word om aan die groeiende vraag te voldoen en die regering moes byna 10 jaar gelede ‘n moratorium ophef wat sou verhoed dat nuwe sentrales gebou word.

Boonop is die kragsentrales wat nog in gebruik is, meer as 40 jaar oud en moet dringend vervang word.

Eskom het intussen erken dat die nodige instandhouding nie gedoen is nie, maar president Jacob Zuma hou nietemin steeds vol dat dit ‘n historiese feit is dat die apartheidsregering die skuld moet dra vir die land se energiekrisis.

Zuma het met die ANC se 103de verjaardag in Kaapstad bygevoeg dat die nasionale kragnetwerk onder druk is omdat dit nie bedoel was om vir swartmense voorsiening te maak nie.

Alhoewel die meeste stedelike swartes tans toegang tot elektrisiteit het, is hulle berug as wanbetalers. Die meeste kragdiefstal, byna 10%, kom in Soweto voor. Herhaaldelike veldtogte om wanbetaling hok te slaan, het ook misluk.

Selfs Appèlhofuitsprake beskerm swart wanbetalers.

Daar is aanvanklik gemeen dat energievoorsiening geprivatiseer moes word, maar die ANC het ‘n stokkie daarvoor gesteek.

Kenners meen dat privatisering egter kragpryse negatief sal raak en dat dit weliswaar goedkoper is as ‘n funksionerende staat krag voorsien.

Die land het die afgelope tyd ‘n ernstige tekort aan krag wat verskeie kere tot beurtkrag gelei het.

Zuma het sedertdien onder kritiek deurgeloop omdat hy wit vaardighede misken en apartheid as verskoning vir sy regering se mislukkings gebruik, maar die president weier om van sy standpunt af te sien.

Die Tesourie is onder druk om die finansiële krisis binne Eskom te hanteer. Daar is R20 miljard aan Eskom toegewys om vir die voorkoming van beurtkrag aan te wend.

Kragonderbrekings het sedert 2008 die ekonomie ‘n geraamde 300 miljard rand gekos.

Intussen het Nampower, die Namibiese kragvoorsiener, elektrisiteit aan Eskom beskikbaar gestel. In die opvangsgebiede van die Kunenerivier, kan Namibië buite spitstye, laatnag, elektrisiteit uitvoer dansky milde reëns.

“Ons voer tans tot 200MW elektrisiteit aan Suid-Afrika uit,” het Werner Graupe, senior bestuurder vir energiehandel by NamPower, aan Sapa gesê.

“Die elektrisiteit kom van ons Ruacana-hidrokragaanleg op die Kunenerivier wat aan Angola grens. Weens die goeie reën in die area, veral in die suide van Angola, vloei die Kunenerivier sterk, soms tot 300 kubieke meter per sekonde, en kan ons tot 200MW uitvoer,” het Graupe gesê.

Namibië voer gewoonlik tot 60% van sy elektrisiteit in, insluitend van Eskom.