verkiesing – Bladsy 4

Uganda begin voorberei vir 2016 se verkiesing

Uganda se presidentsveldtog het Maandag afgeskop met die oog op verkiesings wat in Februarie 2016 gehou word.

In die verkiesing kom die land se veteraanpresident teen ’n ou teenstander en afgedankte premier te staan.

Agt kandidate het hulle beskikbaar gestel vir die verkiesing wat op 18 Februarie 2016 gehou word. Die huidige president, Yoweri Museveni, is reeds 30 jaar lank aan bewind.

Museveni, wat in 1986 president geword het, se sterkste teenstand kom van Kizza Besigye van die Forum vir Demokratiese Verandering (FDC) wat reeds drie keer in die verlede die knie voor Museveni moes buig, en Amama Mbabazi, ’n voormalige eerste minister wat as onafhanklike kandidaat staan.

Die verkiesingskommissie in die land het kandidate aangemoedig om vreedsame veldtogte te voer en hulle by die landswette te hou, wat onder meer ’n skemeraandklokreël vir verkiesingsvergaderings asook ’n einde aan veldtogvoering twee dae voor die verkiesing insluit.

Ander kandidate is ’n universiteitsprofessor, Venansius Baryamureeba; Abed Bwanika wat beloof om homoseksuele mense te “rehabiliteer” as hy wen; ’n evangeliese pastoor, Joseph Mabirizi; ’n afgetrede generaal, Benon Biraaro, en ’n regsgeleerde, Faith Kyalya, die enigste vroulike kandidaat.

Museveni, van die regerende party (NRM), sal na alle verwagting die oorhand kry en vir nog ’n termyn van vyf jaar verkies word.

Moslemkwessie in Mianmar-verkiesing onderspeel

Stemme word getel in Mianmar se algemene verkiesing maar geen amptelike uitslae is nog aangekondig nie.

Voorlopige verslae van oral in die land dui op ’n oortuigende oorwinning vir die pro-Amerikaanse Aung San Suu Kyi se Nasionale Liga vir Demokrasie (NLD).

“Ons moet vasstel waarom ons verloor het,” het Htay Oo, ’n bondgenoot van pres. Thein Sein gesê. “Ons aanvaar egter die uitslae sonder enige voorbehoud. Ons weet nog nie met sekerheid wat die finale uitslae is nie.”

Htay Oo sê hy is verbaas met die omvang van sy nederlaag in sy eie parlementêre kiesafdeling in Hinthada in die delta-gebied, wat as die hartland van die USDP se landelike steun beskou is.

’n Woordvoerder van die NLD, Win Htein, sê die aanduidings is dat die party ongeveer 70 persent van die stemme wat tot dusver getel is, verwerf het.

Na verwagting het die party tussen 50 en 80 persent van stemme in Mianmar se 14 state ingepalm.

Hy het aan die nuusagentskap The Associated Press gesê die party se sterkste vertoning is in sogenaamde hartland-state waar dit voorkom asof die party tot soveel as 80 persent van die stemme gekry het.

Die steun neem effens af tot tussen 70 en 50 persent in etniese state.

“Dit is deur die verkiesingskommissie bevestig, maar ons is nog nie seker van die finale syfers nie. Indien hierdie opmerkings deur amptelike uitslae bevestig word, is die aanduidings dat die party onder leiding van Aung San Suu Kyi ’n oortuigende verkiesing-sege behaal het.”

Sy en haar party sal eintlik saam met die generaals wat Mianmar (Burma) in 1962 tydens ’n staatsgreep oorgeneem het, regeer sê ontleders.

Die generaals het tot in 2011 geregeer, waarna hulle die mag aan hul politieke vleuel oorhandig het nadat bewerings van korrupsie aan die lig gekom het.

Mianmar is verdeel in strydende etniese en godsdiensgroepe en die junta het ‘n balans gehandhaaf in ‘n land wat worstel met ‘n “krisis van minderhede”.

Boeddhiste vrees dat Moslems meer invloed in die land sal kry, maar Aung San Suu Kyi het sulke kwellinge onderspeel.

Ten minste 10 miljoen mense kon nie stem nie omdat hulle deel is van ‘n etniese minderheid.

Dit sal nie die eerste keer wees dat die NLD ’n oorwinning behaal nie. In 1990 het die party ook gewen, maar dié oorwinning is deur die generaals geïgnoreer.

Tanzaniese verkiesing: Zanzibar-stemmery nietig verklaar

Verkiesings in Zanzibar is nietig verklaar omdat hulle nie vry en regverdig was nie, het die verkiesingshoof op die Tanzaniese eiland aangekondig.

Mededingers het hulself tot geweld gewend, het Jecha Salum Jecha gesê.

Die opposisie sê die stemmery op die eilandgroep is gekanselleer omdat hulle gewen het.

Die vernaamste uitdager in die nasionale presidensiële verkiesing, Edward Lowassa, het gesê die probleme in Zanzibar is verteenwoordigend van die hele land.

Vroeër, het hy die nasionale verkiesingskommissie gevra om die vrystelling van resultate te staak, en beweer dat die hele proses landwyd gekenmerk is deur bedrog.

Die verkiesings in Tanzanië is die mees bestrede in die land se geskiedenis, met vier opposisiepartye van die Ukawa-koalisie wat die regering se greep van 54 jaar uitgedaag het.

Vorige verkiesings het ook gewelddadig geraak op die semi-outonome Zanzibar, ‘n gewilde toeristebestemming.

Dit is nie duidelik of die verkiesing gekanselleer sal word nie.

Tanzanië wag in spanning op verkiesingsuitslag

Tanzaniërs het pas vir ’n president, parlement en plaaslike owerhede gestem, maar Chadema, die opposisieparty beweer verkiesingsbedrog is in Sondag se verkiesings gepleeg.

Die regerende Chama Cha Mapinduzi-party (CCM) staar ook vir die eerste keer, sedert ’n veelparty-demokrasie in 1995 in Tanzanië ingestel is, ’n geloofwaardige uitdaging in die gesig nadat nege ministers reeds hul parlementêre setels afgestaan het volgens die jongste berigte.

John Magufuli van die CCM word as ’n naelskraapse gunsteling beskou om die voormalige eerste minister, Edward Lowassa, ’n veteraan van die CCM wat onlangs na Chadema oorgestap het, te klop. Chadema lei ’n koalisie van opposisiepartye.

Ontleders waarsku egter dat ’n verkiesingstryd wat so kop aan kop is, grootskaalse spanning kan veroorsaak.

Stemmery het meestal vreedsaam verloop, maar ’n Chadema-woordvoerder sê die party is bekommerd oor ’n aantal “onderskeppings van volgestopte stembusse”.

Die beweringe kon nie onafhanklik bevestig word nie.

Verkiesingsbeamptes verwag die uitslae van die presidentsverkiesing binne drie dae, maar vroeë uitslae word verwag.

Politieke waarnemers meen die 55-jarige Magufuli, tans minister van werke, wat hom die bynaam “The Bulldozer” laat kry het, staar ’n stewige uitdaging van die 62-jarige Lowassa in die gesig.

Lowassa was van 2005 tot sy bedanking in 2008 eerste minister. Hy het bedank na aanleiding van bewerings van korrupsie wat hy ten sterkste ontken het. Hy was vir jare ’n CCM-lojalis, maar hy het kiesers nou gevra om die bewind van die party te beëindig.

Die uitgaande president, Jakaya Kikwete, wat nie weer verkiesbaar is nie omdat hy sy twee termyne uitgedien het wat deur die grondwet beperk word, het die polisie versoek om veiligheidsmaatreëls te verskerp in die land met 52 miljoen inwoners waarvan 22 miljoen geregistreer het om te stem.

Kiesers het ook vir lede van die parlement en plaaslike owerhede gestem, maar die weermag het ure gelede in die gebou ingestorm waar die tellery gehou word om kennisgewing van die uitslae te verbied.

Verkiesings is in die semi-outonome Zanzibar, na aan die kus van Tanzanië, gehou, waar die eiland sy eie presidents verkies.

Duitsland het intussen gerugte ontken dat hulle hul steun aan die opposisie toegesê het.

Trudeau se oorwinning slegte nuus vir Amerikaanse Neo-Konserwatiewes

Kanadese het ‘n einde aan die nege jaar lange bewind van eerste minister Stephen Harper se Konserwatiewe Party gemaak deur ‘n Liberale regering te verkies onder leiding van Justin Trudeau.

Justin is die seun van ’n charismatiese voormalige eerste minister Pierre Trudeau.

Meningsopnames Sondag het reeds aangedui dat die Liberales ’n hupstoot uit die derde plek gekry het en nou ’n sewe punt voorsprong op die konserwatiewes het.

Baie van Kanada se 26,4 miljoen geregistreerde kiesers moes ‘n politieke sirkus aanskou met kandidate wat hulself deurentyd deur hul belaglike manewales diskwalifiseer.

Die 43-jarige Trudeau hoop om die “Trudeau-manie” te laat herleef wat in 1968 die ou garde uit die kussings gelig het.

Justin Trudeau se oorwinning is slegte nuus vir Amerikaanse Neo-Konserwatiewes.

Trudeau het bevestig dat hy Kanadese vegvliegtuie sal onttrek van die lugaanvalle in Irak en Sirië teen die demokratiesverkose president al-Assad.

Hy het die Amerikaanse president Barack Obama van sy besluit ingelig slegs ure na oorwinning by die stembus.

As deel van sy verkiesingsveldtog, het Trudeau belowe om die CF-18 vegvliegtuie wat tot Maart 2016 ontplooi is, huistoe te bring.

Trudeau, wat gekant is teen die onafhanklikheidstrewe van Quebec, het ook die wettiging van dagga belowe.

Kongo stem binnekort oor president se derde termyn

Pres. Denis Sassou Nguesso is reeds meer as 30 jaar aan die stuur van sake in die Republiek van die Kongo.

Die 72-jarige president word grondwetlik verhinder om hom vir ‘n derde termyn verkiesbaar te stel en daar is ‘n ouderdomsbeperking van 70 jaar vasgestel, het AFP berig.

Sassou Nguesso is onder verskeie Afrika-leiers wat in omstredenheid gedompel is omdat hulle verseg om die leisels prys te gee.

Sassou Nguesso se besluit om hom vir ‘n derde termyn verkiesbaar te stel, het tot protesoptrede in die hoofstad, Brazzaville, gelei nadat die regering verlede maand sy voornemens aangekondig het.

Soortgelyke planne deur sy eweknieë het vanjaar elders in Afrika tot geweldpleging gelei. In nabygeleë Burundi het pres. Pierre Nkurunziza se wyd veroordeelde derde termyn tot ‘n mislukte staatsgreep gelei.

Laat verlede jaar is die ystervuis-leier van Burkina Faso, Blaise Compaore, uit die kussings gelig ná wydverspreide en gewilde straatprotes. Dít nadat hy probeer het om sy 27 jaar lange bewind te verleng.

Die Oktober-referendum sal handel oor die twee-termyn-beperking en om die ouderdomsbeperking-voorsiening te skrap.
Die referendum sal op 25 Oktober plaasvind.

Sassou Nguesso was van 1979 tot 1992 president. Daarna was hy die leier van die opposisie en het ná ‘n kort burgeroorlog in 1997 na die presidensiële paleis teruggekeer.

Hy is in 2002 en weer in 2009 herkies as president midde ernstige besware van opposisiepartye rakende wydverspreide verkiesingsbedrog.

Staatsgreeppoging in Burkina Fasso dalk ontlont

Daar is luidens berigte aanduidings dat ‘n ooreenkoms in Burkina Faso bereik is en dat die mag weer aan die burgery oorhandig gaan word na ‘n staatsgreep.

Leiers van Benin en Senegal het blykbaar daarin geslaag om die politieke krisis in hul buurland te ontlont.

Volgens die ooreenkoms sal Burkina Faso se verkiesing, wat op 11 Oktober sou plaasvind, waarskynlik uitgestel word.

Soldate van die presidensiële wag het Woensdag president Michel Kafando en verskeie ministers gevange geneem en die politieke oorgang in die land ontspoor. Tien mense is dood en tientalle beseer toe die staatsgreep uitgvoer is.

Die president van Benin, Thomas Boni Yayi sal later vandag waarskynlik ‘n aankondiging maak.

Geweervuur het die naweek in die strate van Ouagadougou, die hoofstad van Burkina Faso, opgeklink.

Die weermag het vroeër in ’n radio-uitsending aangekondig dat dit nou in beheer van die land is en sodoende bevestig dat ’n staatsgreep uitgevoer is, slegs enkele weke voor verkiesings gehou sou word.

Ban Ki-moon, sekretaris-generaal van die Verenigde Nasies (VN), het Woensdag skerp gereageer op berigte dat die president en premier van Burkina Faso en verskeie ministers aangehou word. Hy het geëis dat hulle onmiddellik vrygelaat word.

Die presidentswag het vroeër Woensdag ’n kabinetsvergadering binnegestorm en die waarnemende president in hegtenis geneem.

Dié voorval het gebeur skaars ’n maand voordat ’n verkiesing gehou gaan word om die oorgang na ’n demokrasie af te handel. Blaise Compaore is in 2014 ná ’n lang heerskappy uit die kussings gelig.

In ’n verklaring eis Ban die vrylating van pres. Michel Kafando en premier Yacouba Isaac Zida. Volgens die verklaring is die voorval ’n oortreding van Burkina Faso se grondwet en oorgangswet.

In die verklaring word ook ’n beroep gedoen dat die rolspelers hulle nie tot geweld moet wend nie

President dank twee ministers af wat kla oor nuwe termyn

Reuters berig dat president Dennis Sassou Nguesso van die Republiek van Kongo twee ministers afgedank het wat gekant is teen voorgestelde grondwetlike wysigings om vir hom ’n verdere termyn as president moontlik te maak.

Die 71-jarige Sassou Nguesso regeer al vir 31 jaar die olie-ryke Kongo. Volgens die huidige grondwet is hy tot twee termyne as staatshoof beperk.

Hy het egter verlede maand ’n forum byeengeroep om grondwetlike hervormings te bespreek om die verhoging van die maksimum ouderdom van presidentskandidate en die tweetermyn-beperking te bespreek.

Nuwe Rwandese grondwet sal president drie termyne gee

Rwandese wetgewers het ná landwye konsultasies bevind net tien mense is gekant teen moontlike grondwetlike wysigings om pres. Paul Kagame ’n derde termyn as president te gee.

Luidens ’n verslag wat die week bekend gemaak is, het meer as 3,7 miljoen mense, meer as 60% van kiesers, ’n petisie onderteken om die grondwet te verander, het AFP berig.

Die president sal dus nie meer tot net twee ampstermyne beperk word as die grondwet verander word nie.

Die 57-jarige Kagame is sedert 1994 aan bewind nadat ’n offensief deur sy Rwandese Patriotiese Front (RPF) rebelle ’n einde aan die menseslagting deur Hutu-ekstremiste gemaak het, waarin nagenoeg 800 000 mense, meestal Tutsi’s, dood is.

Winkelgroep verbreek bande met Trump

Die winkelgroep, Macy’s het alle bande met Donald Trump verbreek, nadat hy uitgevaar het politieke korrektheid en onwettige immigrante wat dwelms, misdaad en verkragting na die VSA bring.

Trump se uitlatings word as ‘n klein bonus vir die Demokrate beskou wat meeding met die Republikeine om Latino-stemme te trek.

Ten spyte van die opskudding, het Trump se gewildheid in twee sleutelkieserstate, Iowa en New Hampshire, die hoogte ingeskiet.

Macy’s is die tweede maatskappy wat afstand doen van die televisiepersoonlikheid ná sy neerhalende opmerkings oor Meksikane.

Die winkel sal Trump se mansklerereeks uitfasseer, wat hemde, dasse, mansjetknope en pakke insluit.

Die reeks word al sedert 2004 by Macy’s verkoop, maar hulle sê hulle kan nie diskriminasie in enige vorm aanvaar nie.

Koerdiese minderheid wen groot in Turkse verkiesing

Meer as 50 miljoen Turkse burgers het teen die regering van president Tayyip Erdogan in die nasionale verkiesing gestem.

Die regerende AKP-party het sowat 10% steun verloor, wat veroorsaak het dat hulle hul parlementêre meerderheid verloor het.

Baie Turke het in die pasafgelope stemmery as ‘n waterskeidingsverkiesing vir dié land se nasionale politiek beskou.

Een uit elke vyf kiesers in Turkye is Koerde. Die Koerde is die mees godsdienstige gemeenskap in die land, en tog het hulle nie Erdogan se Islamitiese party ondersteun nie.

Dit was ten spyte van die feit dat dit Erdogan was wat gesorg het vir ‘n dramatiese verandering van status vir Koerdiese minderheid Turkye, iets wat selfs sy politieke teenstanders erken.

Die Sowjet-Unie het die Koerde in hul opstand teen die sentrale mag voorheen deur die verskaffing van wapens ondersteun.

Ná die USSR se ineenstorting, het Israel geleidelik verhoudinge met Koerdiese minderhede in die Midde-Ooste versterk.

As die Koerde se nuwe beskermheer in die streek, met die troefkaart van ‘n onafhanklike Koerdiese staat teen sy teenstanders, is die uitslag van die verkiesing ‘n groot oorwinning vir Israel.

Israel ondersteun Koerdiese nasionalisme as ‘n nuttige instrument om Turkye en sy ambisieuse leier in toom te hou.

Die gay-gemeenskap in Turkye se aandrang op regte het verdamp en die verkiesing het bewys dat etniese minderhede belangriker vir kiesers was as seksuele voorkeure.

Burundi-verkiesing onbepaald uitgestel

President Jacob Zuma sê Afrikaleiers het op ‘n streekberaad in Angola besluit dat die presidentsverkiesing in Burundi vir ‘n onbepaalde tyd uitgestel moet word totdat daar weer politieke bestendigheid in die land is.

Die spesiale vergadering in Luanda is byeengeroep ná ‘n mislukte staatsgreep in Burundi teen president Pierre Nkurunziza, wie se besluit om vir ‘n derde termyn as staatshoof te staan, grootskaalse betogings en geweld in die land tot gevolg gehad het.

Zuma sê in ‘n verklaring daar is ook ooreengekom dat ‘n afvaardiging van staatshoofde van Kenia, Uganda, Tanzanië en Suid-Afrika Burundi so gou as moontlik sal besoek om die toestand te evalueer en by te dra tot die vreedsame oplossing van die huidige situasie.

Burundi se president ignoreer VSA, Brittanje se waarskuwings

Nagenoeg 2 000 mense het gister in ’n woonbuurt van Burundi se hoofstad, Bujumbura, betoog. Dit was ’n dag nadat die regering ’n verbod geplaas het op alle straatprotes teen pres. Pierre Nkurunziza se poging om vir ’n derde termyn verkies te word.

Die president sê “buitelandse magte” hits die betogers aan en probeer van hom ontslae raak.

’n Klein groepie mans het voetgangers en voertuie deursoek wat na die betoging onderweg was.

Nkurunziza se regering het alle staatsamptenare opdrag gegee om terug te keer werk toe en skole moes ook gister heropen het.

Burundi se grondwet bepaal ’n president kan net vir twee termyne van vyf jaar verkies word. Nkurunziza hou egter vol dat hy die reg het om vir ’n derde termyn te staan.

Hy voer aan die parlement het hom die eerste keer verkies en hy was nie regstreeks deur die bevolking aangewys nie. Betogings duur nou reeds weke.

België, die oud-koloniale mag, het intussen hulp opgeskort aan die land.

Die AU-voorsitter Nkosazana Dlamini-Zuma het Brittanje en die VSA se waarskuwings herhaal dat ‘n verkiesing nie in die huidige klimaat gehou sal kan word nie.

Burundi is een een van 15 lande in Afrika waar die staatshoof al langer as 15 jaar regeer.

UKIP en Rooi Ed sink

Die Skotse leeu het gebrul! Skotland wat vroeër in ‘n referendum teen onafhanklikheid gestem het, het die Arbeidersparty in Brittanje die nekslag toegedien.

Die Arbeiders lyk asof hulle afstuur op die grootste pak slae sedert Neil Kinnock van die toneel verdwyn het in 1987. Ontleders meen dis die laaste sien van Ed Miliband asook die Tories se koalisievennoot Nick Clegg.

Praag het tydens die Skotse referendum die gees reg voorspel. Skotse nasionaliste het intussen nie gaan lê nie en die indruk van ‘n eenpartystaat gewek soos hulle saamgestaan het.

Indien amptelike voorspellings korrek is, kan Brittanje binne die volgende twee jaar ‘n geskiedkundige referendum oor voortgesette lidmaatskap van die EU te wagte wees, sowel as onderhandeling oor die onafhanklikheid van Skotland.

Volgens vroeë aanduidings het die Britse Konserwatiewe Party van die eerste minister David Cameron die verkiesing in die Verenigde Koninkryk gewen en die linkse Arbeiders met hul kommunistiese oorblyfsel van ‘n leier, Ed Miliband, is gesink.

Die voorspelling is dat die Konserwatiewe Party 316 van die 650 setels in die Laerhuis kan verower en die Arbeidersparty 239.

Die finale uitslae word later vandag verwag, maar daar word bespiegel dat Miliband sy uittrede sal aankondig na die loesing.

Die Arbeiders het sowat 50 setels van die Tories nodig gehad om enige kans te staan vir die premierskap, maar moes 17 parlementslede afstaan.

UKIP en die Liberale Demokrate, die sogenaamde LibDems, van Nick Clegg het besonder swak gevaar. UKIP kon sover net een setel inpalm.

Die party het kennelik ‘n groot fout begaan met die skorsing van ‘n partylid, Jack Sen, omdat hy Afrikaners teen swart rassiste verdedig het.