betogings – Bladsy 2

Wits dank sekuriteitsmaatskappy af na klipgooiery

Wits het die sekuriteitsmaatskappy wat met swart studente gebots het, vervang, het ‘n woordvoerder Woensdag gesê.

“Ons het die sekuriteitsmaatskappy vervang, maar voel nie ‘n behoefte om personeel te verhoog nie, want daar is minder studente op die kampus,” het Shirona Patel gesê.

Die gedrag van die sekuriteitswagte wat Dinsdag met betogende studente gebots het, is in ‘n verslag vervat en sal oorhandig word aan die bestuur voor die einde van die dag.

Die twee groepe het mekaar met klippe en stukke beton gegooi buite die Grootsaal op die Oos-kampus. Studente was kwaad omdat hulle nie toegelaat is om na Senaathuis te gaan waar hulle ‘n vergadering wou hou nie.

Hulle het daarna die veiligheidswagte se optrede as verskoning gebruik om die Grootsaal te vandaliseer.

Gerugte dat wit studente (foto) ook weer geteiken is, is ook ontvang.

Woensdagmiddag het die polisie pogings van die swart oproeriges gefnuik om Braamfontein binne te vaar. Dit volg nadat die studente probeer het om in die strate ‘n optog te hou om studente van nabygeleë kampusse te mobiliseer.

‘n Groep oproeriges wou buite die kampus gaan betoog maar is aangesê om terug te draai omdat hulle nie toestemming gehad het om ‘n optog te hou nie.

Skermutselings het uitgebreek nadat die polisie probeer het om die studente na die Wits Braamfonteinkampus terug te dryf.

Twee studente is in hegtenis geneem en vier beseer tydens onderonsies tussen betogende studente en die polisie in die Johannesburgse middestad.

Die polisie het skokgranate gebruik, en sommige studente het die polisie met klippe bestook. Volgens die polisie sal diegene wat in hegtenis geneem is, aangekla word van openbare geweld.

Nog onluste dreig by kampusse

Die minister van Hoër Onderwys en Opleiding, Blade Nzimande het weer beklemtoon dat die regering nog nie besluit het oor klasgeld vir studente in 2017 nie.

Dit volg terwyl studente weer dreig met klasboikotte en betogings omdat die regering glo reeds ‘n besluit oor klasgelde geneem het.

Volgens berigte kan protesoptogte al vandag begin, het RSG berig.

PRAAG is reeds meer as ‘n maand lank bewus van die dreigemente van onluste by die Universiteit van die Witwatersrand. Studente is voor die Julievakansie al vertel dat hulle klasse in Augustus ontwrig gaan word.

Nzimande het in `n verklaring sy kommer uitgespreek oor dié dreigemente.

Hy sê nadat hy die verslag van die Raad op Hoër Onderwys ontvang het, het hy besluit om verdere standpunte van alle rolspelers te kry.

Die Raad op Hoër Onderwys stel voor dat klasgelde met ses persent verhoog word nadat die Tesourie gewaarsku het dat daar groot druk op staatshulpbronne sal wees indien studentegeld weer nié verhoog word nie.

Volgens Nzimande sal hy ook eers met sy kabinetskollegas samesprekings voer voordat `n besluit geneem sal word.

Intussen moes die wit dekaan van die Universiteit van KwaZulu-Natal se Nelson Mandela-mediese fakulteit, Professor Richard Hift uittree om blykbaar “ander verpligtinge” op te volg.

Die universiteit se studenteraad het onlangs gevra dat hy vervang moet word. Die studente eis ‘n swart dekaan sodat “transformasie” in die instelling kan “voortgaan”.

‘n Woordvoerder van die universiteit, Lisiba Seshoka sê Hift sal deel bly van die universiteit en het nie bedank nie.

Volgens Seshoka sal hy ook van die doelwitte van die fakulteit aandryf.

Bob blameer ‘derde mag’ vir opstand in Zim

Verslae uit Zimbabwe sê ten minste 30 mense is in hegtenis geneem oor gewelddadige betogings Maandag in die land.

Die regering het gesê hulle sal ‘n moontlike derde mag agter die onlangse betogings wat opgevlam het, ondersoek.

Vrydag is ‘n regeringspakhuis by Beitbrug afgebrand, ‘n kitskoswinkel is geplunder en verkeersligte is ook gevandaliseer.

Die betogers het die stoor afgebrand oor Zimbabwe se besluit om ‘n verbod op ‘n groot aantal invoere te plaas.

Betogers in die hoofstad het op ‘n vernietingstog gegaan met klippe en brandende bande om paaie na die middestad van Harare af te sper.

Hulle het gesê hulle sal nie toelaat dat enige voertuie die stad bereik totdat die polisie hul daaglikse padblokkades staak nie.

Frustrasies oor die vinnig verswakkende ekonomiese omstandighede in Zimbabwe, tesame met ontevredenheid oor beweerde regeringkorrupsie en onbevoegdheid, het tot byna daaglikse betogings in onlangse weke gelei.

PRAAG het met swart reisigers in Zimbabwe gesels wat beweer dat die polisie glo ‘n aanslag op Mugabe vrees. Hulle stel egter met dié verskoning padblokkades op om buitelanders se besittings en geld te eis.

Die betogers eis ook dat korrupte polisiebeamptes wat geld vra by die padblokkades in hegtenis geneem word.

Protes is aangemeld in Ruwa, Zimre Park, Hatfield, Epworth en Mabvuku waar paaie met klippe afgesper is en enige voertuie wat die stad wou bereik, met klippe bestook is.

Intussen het Zimbabwe se minister van arbeid Supa Mandiwanzira staatsamptenare gevra om geduld te gebruik as hul nie hul salarisse ontvang nie.

Hy het gesê die regering het geen kontantvloei nie, maar dinge sal binnekort terugkeer na normaal.

Intussen is verneem dat ten minste 71 mense reeds in hegtenis geneem is in verband met betogings die naweek aan die grens tussen Zimbabwe en Suid-Afrika.

Beitbrug-grenspos is sedertdien gesluit.

In ‘n afsonderlike verwikkeling het staatsdokters en ander regeringswerkers gesê hulle sal staak omdat die regering nie daarin kon slaag om hul Junie-salarisse betyds te betaal nie.

Die minister van finansies, Patrick Chinamasa, het by Westerse lande gepleit om finansiering in die vorm van lenings wat meer as twee dekades gelede gestaak is, aan Zimbabwe toe te staan.

Internasionale finansiering het opgedroog toe Zimbabwe nie in staat was om sy buitelandse skuld terug te betaal nie asook weens internasionale sanksies wat vanweë kommer oor die skending van demokratiese regte ingestel is.

Verlede maand het ‘n anti-regeringbetoger krete in die ingangsportaal van ‘n luukse hotel in Harare geskree en die polisie uitgejou totdat hulle inbeweeg en hom weggesleep het.

Die aktivis het sy woede betoon teenoor die visepresident, Phelekezela Mphoko, wat glo vir 18 maande in ‘n hotelsuite in Harare teen ‘n koste van US$400 per nag tuisgegaan het.

Gemeenskapsprotes lei tot geweld sê nuwe verslag

Die Suid-Afrikaanse navorsingsleerstoel vir Maatskaplike Verandering by die Universiteit van Johannesburg het ‘n verslag bekendgestel oor betogings in Suid-Afrika.

Die verslag is saamgestel mbv voorvalle wat deur die polisie aangeteken is. Dit sluit betogings in wat vreedsaam sowel as met geweld verloop het.

Dit blyk uit die verslag dat die aantal protesoptogte wat per dag plaasvind, heeltemal oorskat word.

Die voorvalle is oor ‘n tydperk van 16 jaar deur die polisie aangeteken vanaf 1997 tot 2013.

Een van die skrywers van die verslag, Professor Peter Alexander sê daar is sowat 71 000 voorvalle van betogings in die databasis aangebring.

Hy sê dit kom neer op minstens elf betogings per dag, terwyl sommige bronne dit as 30 aangee.

Volgens Alexander is dit meer as wat deur mediaberigte weergegee word, maar minder as syfers wat in die parlement bekendgemaak is.

Luidens die verslag was 2012 die ergste jaar met 5500 betogings en 2003 die beste met 2300. Per kop het die Vrystaat die meeste betogings gehad.

Xenofobie het min emosies gaande gemaak en byna niemand wou die strate invaar om daarteen protes aan te teken nie.

Gemeenskapsbetogings is gewild, maar vakbonde se georganiseerde byeenkomste verteenwoordige byna die helfte van alle griewe wat na optogte lei, met 46%.

Interessant is dat optogte deur georganiseerde arbeid in meer as die helfte van gevalle nie lei tot geweld nie, maar dat gemeenskapsbetogings wel grootliks tot oproer neig.

Alhoewel diensleweringsprotes minder as 20% van alle optogte behels, lei dit in byna 50% van die aangetekende gevalle tot geweld.

Probleme wag vir Brasilië

Michel Temer, Brasilië se nuwe, waarnemende president, is self ‘n ongewilde leier en gaan met baie van dieselfde probleme te make hê as wat pres. Dilma Rousseff moes trotseer, het AFP berig.

Brasiliane hoop hul regering kan ná ’n maande lange stryd oor die geskorste Rousseff se staat van beskuldiging aanbeweeg.

Dit het die aandag afgelei van die land se ander probleme, waaronder die ergste resessie in jare en die reëlings vir die Olimpiese Spele wat in Augustus begin.

Hoewel Temer (75) die steun van sakelui het, meen politieke ontleders hy sal dieselfde struikelblokke as Rousseff teëkom.

Rousseff (68) is deur die senaat vir tot 180 dae geskors nadat sy in ’n staat van beskuldiging gestel is en sy verhoor moet word. Sy het glo begrotingsprobleme verswyg om tot president herkies te word. Temer, ’n regse veteraan, is ook nie gewild in Brasilië nie.

Hoewel Rousseff se goedkeuringsyfer onder 10% geval het, sal Temer maar 1% of 2% van die stemme in ’n presidentsverkiesing kan lok, is in ’n onlangse peiling bevind.

Rousseff het hom uitgekryt vir die leier van ’n “staatsgreep” om van haar ontslae te raak en hy moet nou die openbare vertroue herstel in ’n politieke stelsel wat Brasiliane as korrup beskou.

“Hy sal baie van die Brasiliane se ontevredenheid erf weens die soort tradisionele politiek wat hy verteenwoordig.

“Dit sal vir hom moeilik wees om hom as ’n nuwe mens sonder enige verbintenis met die vorige leierskorps te herskep,” sê Thiago Bottino, ’n ontleder aan die Getulio Vargas-stigting.

Lincoln Secco, ’n historikus aan die Universiteit van São Paulo, sê Temer kan later ’n ander probleem hê: Rousseff.
“Vir vyf of ses maande (terwyl die verhoor aan die gang is) het ons ’n nie-uitvoerende president.

“Haar skadu sal oor Temer hang en druk sal op sy regering geplaas word om gou resultate te lewer.”

Die Temer-administrasie se hoop is op die herstel van die sukkelende ekonomie gevestig.

Die sakewêreld sien reeds uit daarna om ’n regering te hê wat markvriendeliker is ná jare van linkse beleid en groeiende tekorte. Brasilië is in sy tweede jaar van ’n resessie en sal na verwagting eers teen 2018 groei toon.

Om die ekonomie aan die gang te kry, het Temer ’n “brug na die toekoms” voorgestel waaronder besnoeiing van staatsuitgawes en handelshervormings tel.

Onder Rousseff en haar voorganger Luiz Inácio Lula da Silva, het die land se maatskaplike programme miljoene mense uit armoede gelig. Vir talle Brasiliane is Temer ’n tree terug.

“Ek dink burgerlike bewegings sal die strate invaar. Hulle gaan die lewe vir Temer nie maklik maak nie,” sê Debora Messenberg van die Universiteit van Brasilië.

Situasie by Unisa gespanne met klipgooiers

Geweld weer uitgebreek buite die Unisa-hoofkampus Woensdag nadat swart studente blokkades opgerig het en paaie versper het in weerwil van ‘n hofbevel wat sulke optrede verhoed.

Die situasie is tans gespanne en die polisie is in die gebied ontplooi.

Volgens berigte is die hele gebied om die universiteit met klippe besaai. Verkeer is erg geraak tussen die Fonteine-sirkel en Sunnyside.

Studente van die EFF saai chaos omdat hulle glo gekant is teen die uitkontraktering van dienste deur die universiteit.

Motoriste is gewaarsku om die gebied te vermy en paaie is steeds gesluit.

Dit het tot reuse verkeersopeenhopings gelei sedert die protes begin het.

Die universiteit het verlede week ‘n interdik bekom om betogers te weerhou van geweld, intimidasie en om te verhoed dat hulle die akademiese program te ontwrig.

“Na aanleiding van dade van intimidasie, die uitjaag van personeel en gaste van die Unisa-perseel, gewelddadige gedrag en skade aan eiendom deur die protesterende werkers en studente, het die bestuur van Unisa ‘n interdik asook ‘n bevel teen die deelnemers aan die protesaksie gekry,” het die universiteit se woordvoerder Martin Ramotshela vroeër gesê.

Dit het egter nie die betogers verhoed om weer te begin met ontwrigtende gedrag op die hoofkampus van Unisa nie.

Protesoptrede kom steeds voor naby die Daspoort-tonnel in Pretoria-Wes wat vroeër vanoggend deur ontevrede inwoners van die Gomora-woongebied versper is.

Van der Hoffweg en Bremerstraat is steeds gesluit waar rommel en bande aan die brand gesteek is.

‘n Polisiehelikopter sirkel oor die gebied.

Volgens berigte het talle skole in die weste van die stad vanoggend hul leerders huis toe gestuur uit vrees vir hul veiligheid.

Die spanning by universiteite is ‘n georkestreerde en kunsmatige poging deur duistere politieke magte en die EFF om ‘n rewolusionêre klimaat te skep.

Geweld het uitgebreek by TUT se Soshanguve-kampus en Noordwes-universiteit se Mahikeng-kampus waar geen Afrikaans of ‘n wit studenteraad ‘n kwessie is nie.

Die EFF hou egter vol dat rassisme onder wit studente by verskeie universiteite ‘n probleem is.

‘n LP van die party, Thembinkosi Rawula het in die rassebat gesê dié kwessie is deel van ‘n volgehoue siklus wat ‘n omgewing van ongelykheid skep, en daardeur gaan swart drome glo verlore.

Pukke kry hofbevel teen betogers

Die Universiteit van Noordwes het ‘n Hooggeregshofbevel verkry om die ontwrigting van akademiese bedrywighede op sy kampus op Potchefstroom te verbied.

Studente wat bande het met die EFF, en skoonmakers het Vrydag op die kampus betoog. Chaos het op die universiteit se Mahikengkampus uitgebreek toe veiligheidswagte en studente gebots het.

Die kampus is sedertdien gesluit.

Akademiese en administratiewe dienste op die Noordwes-Universiteit (NWU) se Potchefstroom-kampus sal vandag voortgaan.

Om dit verseker is ‘n hofbevel ook bekom om enige protesaksie deur betogers op dié kampus te verhoed. NWU-woordvoerder, Louis Jacobs, sê die bevel verbied enige vorm van ontwrigting of inmenging op die kampus.

Jacobs sê dit kom nadat daar Vrydag onwettige protesaksies op dié kampus asook by die NWU se Institisionele kantoor was. Rommel is deur betogers gestrooi, maar geen eiendom is beskadig nie. Niemand is ook beseer nie.

Jacobs sê sekuriteit is opnuut verskerp.

Intussen bly die NWU se Mafikeng-kampus onbepaald gesluit na gewelddadige betogings verlede week uitgebreek het.

Jacobs sê die kampusbestuur moet met oplossings kom sodat die kampus weer ten volle funksioneer.

Studente gaan nie elders gehuisves word nie.

Oproeriges onderbreek gebedsessie by UV

Oproerige swartes met stokke het ‘n buitemuurse gebedsdiens op die hoofkampus van die Universiteit van die Vrystaat onderbreek.

Die diens is deur ‘n pastoor gelei. Die betogers het slagspreuke geskree en die klankstelsel wat gospel-musiek gespeel het, afgeskakel.

Die polisie het ingegeryp en die twee groepe uiteen gehou sodat die diens kon voortgaan.

Die Universiteit se kampusse in Bloemfontein sal môre en Vrydag gesluit bly. Alle akademiese en administratiewe dienste sal glo Maandag hervat word.

By die Universiteit van die Wes-Kaap het ‘n hofbevel ‘n groep skoonmakers en sowat 50 studente verbied om aan te hou amok maak op die kampus.

Hulle ontwrig kampusbedrywighede, het die uitvoerende bestuur gister gesê.

“Die hofbevel magtig en gelas die polisie om in te gryp en te help by die Universiteit,” het hulle in ‘n verklaring gesê.

Werkers en swart studente is sedert verlede week in opstand oor uitkontraktering by die universiteit.

Voorvalle van klasontwrigting en personeelintimidasie is aangemeld.

Dinsdag het die skoonmakers ingestem om die oproer te staak, maar ten spyte van hierdie onderneming, het hulle Woensdag oproer op die kampus voortgesit.

‘Reform PUK’ dreig om universiteitsrugby op Potch ook Maandag te ontwrig

Terwyl die geweld en onrus ná die ontwrigting van ‘n universiteitsrugbywedstryd op die Bloemfonteinkampus steeds wyer uitkring, het die Afro-marxistiese organisasie ‘Reform PUK’ dreigbriewe aan rugby-afrigters op Potchefstroom gestuur. Onder die opskrif “Black Lives Matter” sê die groep dat hy “geen rugby Maandag” op die PUK-kampus gaan toelaat nie. Hier volg die volledige boodskap soos dit aan rugbybelanghebbendes op die Potchefstroomkampus gestuur is.

BLACK LIVES MATTER: NO VARSITY CUP RUGBY ON MONDAY

The events on Monday 22 February 2016 at the University of the (un)Free State have shook us and the rest of conscious South Africa to our core.

Black students protesting and interrupting the Varsity Cup rugby match were savagely beaten by barbaric white Afrikaner students and their parents.

Our hearts go out to the courageous Black students of the U.F.S. No one understands the fear and constant threat of physical violence as we do.

Please continue to protect each other.

Now is the time for us to stand up and publicly and loudly condemn this vicious attack!

Reform PUK is hereby demanding that campus management disassociate themselves with the tournament and cancel Monday 29 February 2016 match against the very same UFS that unashamedly continued the game after the attack.

A university that repeatedly professes to want equality and social justice can not continue to associate itself with a university and rugby team that viciously beats Black students.
We join the national call to protest or disrupt all Varsity Cup games and the organization and sponsors.

Stop the match or we will arrive in our masses to disrupt it.

The comforts of whiteness will not be allowed to continue while Black students and workers’ needs are sidelined.

We sympathize and offer our support to the courageous Black students of the University of Pretoria. Our struggles over a language policy that protects white Afrikaner privilege while disregarding and excluding Black students from education, mirrors ours.

We stand in solidarity with you.

We call on all sympathizers, allies and friends to join us as we undertake this massive task.

Knowing full well that the attitudes, privilege and ignorant mindset that cause the attacks at UFS is bred in huge quantities on this campus.

We will not be deterred.

A luta Continua.

Gewelddadige lokasieprotes deur wit ANC-lede ondersteun

Die polisie oorweeg tans of die Masiphumelele-lokasie te gevaarlik vir hulle is om ‘n satelliet-polisiekantoor daar te vestig.

Adjunk-minister van polisie Maggie Sotyu het Masiphumelele se inwoners in September belowe dat ‘n mobiele polisiestasie opgerig sal word totdat grond vir permanente perseel gevind kan word.

Gewelddadige protes, waartydens “inwoners” herhaaldelik beter polisiëring en ander dienste eis, duur reeds maande.

Verlede week het die Wes-Kaapse polisie se kommunikasiehoof, brigadier Novela Potelwa gesê die polisie oorweeg veiligheid in die gebied om te bepaal of ‘n mobiele polisiestasie daar opgerig kan word.

Potelwa se kommentaar het gelei tot ‘n petisie vir ‘n permanente polisiekantoor wat egter onderteken is deur net 67 inwoners, onder meer deur die voormalige minister van verdediging, Ronnie Kasrils en ANC-aktivis Ben Turok.

Nie een van die twee ondertekenaars woon in die lokasie nie.

Die petisie is Sondag oorhandig aan LUR vir gemeenskapsveiligheid Dan Plato.

Eksamens verloop vlot sê NWU

Eksamens by die Noordwes-Universiteit se Potchefstroom- en Vaaldriehoek-kampusse het reeds begin en verloop sover vlot.

Dit is volgens die universiteit se Louis Jacobs.

Die eksamens by hierdie twee kampusse het op 2 November aanvang geneem nadat dit aanvanklik met een week uitgestel is weens die landwye studentebetogings teen studiegeldverhogins.

Die universiteit het later ‘n interdik bekom om te verseker dat die eksamens nie ontwrig sou word nie.

Tot op hede was daar egter volgens Jacobs nie verdere probleme nie.

Die NWU-raad het intussen volgens berigte die Reform Puk-groep uitgenooi om hul volgende raadsvergadering toe te spreek.

Die bestuur van die Universiteit van Johannesburg se onderhandelinge met betogers het intussen op ‘n dooie punt uitgeloop.

Die bestuur weier om met betogers te vergader totdat hulle respek betoon.

Verlede week is 141 betogers in hegtenis geneem toe geweld uitgebreek het.

Aanklagte teen die betogers en skoonmakers, is Maandag in die Johannesburgse landdroshof laat vaar.

Hulle het egter kort daarna weer opgeruk na die universiteit se Kingsway-kampus en geëis dat die vise-kansellier Ihron Rensburg hulle toespreek.

Die polisie moes skokgranate en traanrook inspan om die skare onder bedwang te hou.

Die adjunk vise-kansellier vir strategiese dienste, Mpho Letlape sê hulle sal eers met betogers vergader sodra orde herstel is.

Sy sê verteenwoordigers het nie Sondag se vergadering bygewoon nie.

Verteenwoordigers van die betogers wil nie agter geslote deure vergader nie, maar eis om in die openbaar met die bestuur te praat.

Polisie ontplooi by UK

Oproeriges het Maandagoggend buitebande op die kampus van die Universiteit van Kaapstad gebrand en ingange probeer versper.

Die polisie is inderhaas ontplooi om die situasie onder beheer te hou.

Die woordvoerder van die universiteit, Pat Lucas, sê ingange is weer oopgestel en studente kan eksamen gaan skryf.

Lucas sê eksamens sal voortgaan ten spyte van die ontwrigting.

Die visekanselier van die die Universiteit van Kaapstad, Max Price sê intussen die universiteit is daartoe verbind om met die eksamen voort te gaan.

Die universiteit het die keuse aan studente gestel om hul jaareindeksamen tot Januarie aanstaande jaar uit te stel.

Die registrateur, Hugh Amoore sê studente het tot 27 November tyd om te besluit. Hy sê die eksamen sal vir die res van die studente normaalweg voortgaan.

Price sê sowat 17 000 studente het gekies om hul eksamen vanjaar te skryf.

Die betogers eis gratis onderrig en dat agterstallige skuld afgeskryf word. Die betogers het onderneem om met hul ontwrigting voort te gaan totdat daar aan hul eise voldoen is.

Studente van die Universiteit van Kaapstad, die Kaapse Skiereiland Universiteit van Tegnologie, die Universiteit van Stellenbosch en die Universiteit van Wes-Kaapland beplan ‘n massa-optog na die parlement.

Hulle eis dat die minister van hoër onderwys, Blade Nzimande hulle toespreek.

Dit volg nadat hulle vroeër na die parlement opgeruk het, waar hulle geen verhogings van klasfooie en ‘n einde aan die uitkontraktering van werknemers geëis het, eise waaraan die ANC uiteindelik toegegee het.

Die betogings gaan egter onverpoos voort met nuwe eise.

Duisende het reeds versoekskrifte onderteken om hul jaareindeksamen opsioneeel te maak.

In die eerste petisie word gevra dat studente aan die Universiteit van Kaapstad hul semester-punt as ‘n finale kursuspunt mag gebruik. Byna vierduisend mense het die petisie onderteken.

‘n Soortgelyke versoekskrif by die Universiteit van Wes-Kaapland het meer as drieduisend handtekeninge gekry.

Die woordvoerder van die UWK sê egter hulle verwag nie enige ontwrigtings met die eksamen wat vandag begin nie.

Skoonmakers sorg vir chaos by UJ

Die Studenteraad van die Universiteit van Johannebsurg sê “onafhanklike studente” minag die besluite van die raad deur met betogings aan te hou.

Die rektor, Ihron Rensburg, het die optrede van veiligheidspersoneel verdedig nadat oproer Woensdag uitgebreek het.

Werkers by die instelling beweer hulle word onnodig geviktimiseer omdat hulle wettige eise stel.

Die werkers se “griewe” het skielik opgeduik nadat skoonmakers by die Universiteit van die Witwatersrand sukses gehad het om die kampus te sluit gedurende “studente-opstande”.

Die bestuur sê hulle is daartoe verbind om die uitgekontrakteerde werkers in diens te neem, maar werkers sê hulle word nie ingelig oor besluite nie.

Chaos het Woensdag by die Kingsway-kampus in Auckland Park geheers toe die polisie en veiligheidswagte met betogende studente en werkers slaags geraak het.

Van die betogers, wat vroue insluit, is glo hardhandig hanteer.

Die leier van die Studenteraad, Mmangaliso Mkhonta, sê hulle het begrip vir die werkers se optrede, maar dat betogings tot nadeel van studente is wat vir die eksamen studeer.

Rensburg het bygevoeg dat die instelling sal moet kostes besnoei volgende jaar om te verseker dat die boeke klop nadat die ANC aangekondig het dat fooie nie verhoog sal word nie.

“Dit is in die orde van R60 miljoen. Kostebesnoeiingsmaatreëls sal oorweeg word vir reis, funksies en vermaak, kapitaalbesteding vir items onder R15 000 en prestasiebonusse. Alle pogings sal aangewend word om te verseker dat die sleutelbedrywighede, akademies en andersins, hou by die vlakke wat aan verwagtings voldoen.”

Skoonmakers het gesê die protes sal aanhou omdat werkers die bestuur wil dwing om ‘n einde te maak aan uitkontraktering.

Die Universiteit van Wes-Kaapland sê veiligheidsmaatreëls sal verskerp word wanneer die eksamen Maandag begin.

Die eksamen is verlede week vir die tweede keer uitgestel weens gewelddadige studentebetogings.

‘n Woordvoerder van die universiteit, Luthando Tyhalibongo sê sommige studente ontvang trauma-berading, terwyl ander van die kampus af verskuif is sodat hulle kan voorberei vir die eksamen sonder intimidasie.

Die Universiteit van Kaapstad het aangekondig dat sy finale eksamen Dinsdag sal begin en tot 27 November sal duur.

Die eksamen sou aanvanklik op 27 Oktober begin het, maar is uitgestel weens die geweld en intimidasie op die kampus.

Die universiteit sê voorgraadse studente in Gesondheidswetenskappe sal reeds Maandag begin eksamen skryf. Studente sal ook ‘n keuse hê om eerder hul eksamen in Januarie af te lê.

Die eksamen by die Universiteit Stellenbosch het reeds begin.

Bestuur van Unilofts ontken enige diefstal of plundery by studentekompleks

Die bestuur van Unilofts, die gebou met studentewoonstelle in Hatfield, Pretoria, ontken dat enige woonstelle in sy kompleks geplunder is of dat daar misdaadvoorvalle tydens studentebetogings plaasgevind het. Volgens mnr. Jan Botes, die uitvoerende beampte van Legprop, eienaars van Unilofts, is die inligting in Praag se berig “kwaadwillig en totaal onaanvaarbaar”. Hy eis ‘n regstelling van die feite wat ons oorspronklik van studente ontvang het en tot dusver nie self kon kontroleer nie.

Hoewel voertuie elders voor die Uniegebou verbrand is, “is geen voertuie egter tydens die protes beskadig voor of binne Unilofts Pretoria nie”.

Aangaande diefstal of plundery, sê mnr. Botes in sy verklaring:

Daar was absoluut geen plundery hoegenaamd by Unilofts Pretoria nie – nog nooit nie nie eens ‘n poging daartoe nie.

Studente by Unilofts is ook nie beperk tot diegene wat nie tot koshuise toegelaat word nie.

Unilofts… verskaf verblyf aan studente wat privaat wil bly en nie noodwendig net dié wat nie koshuis-verblyf kry nie. Unilofts is ‘n gesogte en baie gewilde studentveblyfkompleks en elke jaar sover 100% beset met studente van alle rassegroepe. Besoek gerus ons webtuiste by www.Unilofts.co.za.

Wat veiligheid oor die algemeen by die gebou betref, verklaar die maatskappy:

Unilofts het seker die beste sekuriteit van alle studentebehuisingskomplekse en daarop is ons baie gesteld en ons is ook tans besig om dit nog verder op te gradeer tot die voordeel van ons inwoners en die eienaars. Daar was selfs addisionele sekeriteitswagte aangestel die dae van die betogings. Daar het nie een van betogers in ons kompleks ingekom nie! Daar is nie een deur afgebreek of in enige woonstel eenheid ingebreek nie want hulle was glad nie op die perseel nie. Hoegenaamd niks is geplunder of gesteel by Unilofts Pretoria nie – absoluut niks! Ons sekuriteit was op diens saam met ons bestuurder tydens die optogte en by Unilofts Pretoria was daar geen insidente hoegenaamd nie. Ons studente in die kompleks was almal veilig en nooit in enige gevaar nie.

Daar was geen plundery en geen artikels van enige iemand was gesteel nie. Die stelling dat ons veiligheidswagte aan sulke bedrywighede verbind word is total absurd en ‘n leuen, hulle was juis besig om die gebou op te pas om te verseker die eiendom word beskerm en dat ons huurders veilig is. Waar studente in die omgewing aan sulke snert kom sal nugter weet! Daar is geen konflik tussen ons veiligheidswagte en inwoners nie.

‘n Groep betogende swart studente het wel verby die gebou beweeg, maar die perseel self is nooit betree nie en daar is nie by die gebou deur stropers ingebars nie. Mnr. Botes sê:

Die betogers het voor die Universiteitshekke vergader en wel verby Unilofts Pretoria in ‘n groep beweeg maar niemand het by Unilofts Pretoria ingebars en al die skade en stelery aangerig soos beweer word nie. Ons sekuriteit was op hulle pos en alles het goed en ordelik by Unilofts Pretoria verloop. Miskien was dit ‘n ander studentekompleks met ‘n soortgelyke naam maar definitief nie Unilofts Pretoria nie. Die persoon wat hierdie inligting verskaf het, is heeltemal verward en verkeerdelik ingelig, of net ‘n kwaadstoker of net bloot ‘n leuenaar.

Volgens mnr. Botes sal hy graag die persoon wil ontmoet en ondervra wie se goed by Unilofts gesteel is,

“want ons dra geen kennis daarvan nie en daar is sekerlik niks by ons sekuriteitsarea uitgevat nie. Weereens beklemtoon ek dat daar geen insident by Unilofts Pretoria was nie”.

Tot dusver kon PRAAG nog nie weer die studente wat die bewerings gemaak het, opspoor nie, maar sodra ons oor meer inligting beskik, sal ons hul weergawe van die gebeure, moontlik by ‘n ander woonstelgebou, verder publiseer. Ons wil ook ‘n meer breedvoerige ondersoek na die bewerings van seksuele teistering deur voetgangers in Hatfield doen, wat video-onderhoude met damesstudente mag insluit.