Etiket: Nuus

Die IVP het Maandag mediaberigte ontken waarin beweer word dat Dr Mangosuthu Buthelezi inderhaas na 'n hospitaal gebring is.

"Die IVP-president is blakend gesond en het verlede week 'n roetine ondersoek ondergaan," het die party se voorsitter Zanele kaMagwaza-Msibi gesê.

"In teenstelling met kwaadwillige mediabeweringe, het die IVP-president die afgelope naweek tuis in Mahlabathini deurgebring."

Die berig van Buthelezi se ongesteldheid het in die Zoeloenuusblad, die Ilanga verskyn. Sy het 'n beroep op die media gedoen om af te sien van sensasiesoekende, onware beriggewing wat tot spanning en druk in IVP-geledere kan lei.

Senior IVP-leier Blessed Gwala het aan Sapa gesê Buthelezi het Maandag saam met hom 'n uitvoerende vergadering in Durban bygewoon. "Hy is op die oomblik hier by my. Hy is gesond. Ons is regtig geskok deur die berigte in die media."

Die ANC moet ophou met "egopolitiek" en die DA se Helen Zille 'n kans gee om die Wes-Kaap te regeer, het die leier van Cope in die provinsie, Alan Boesak Sondag gesê.

"Hoekom nou 'n opdraende stryd voer teen die administrasie van 'n opposisieparty as dit gewone Suid-Afrikaners is wat ly onder hierdie soort egopolitiek?" het Boesak in 'n verklaring gesê.

Die ANC het verlede week 'n "skadukabinet" in die Wes-Kaap bekend gemaak wat onder leiding van die huidige premier, Lynne Brown, sal dien.

"Terwyl die DA en Zille ook nie my ideale keuse vir die regering in die Wes-Kaap is nie, is die feit dat hulle ingestem is deur dieselfde mense wat vyf jaar gelede die Wes-Kaap in die hande van die ANC geplaas het, iets wat aanvaarding en respek vra en die Wes-Kaap moet dieselfde ondersteuning geniet van die regerende party as die ander gebiede wat hulle beheer," het Boesak gesê.

Die Wêreldgesondheidsorganisasie meen dat die Mexikaanse griepvirus die pandemiewaarskuwingsvlak van ses, ’n volskaalse pandemie, kan bereik. ’n Vlak van ses beteken daar is volgehoue uitbrekings van die siekte in minstens twee WGO-streke. Die waarskuwingsvlak is tans vyf.

Die WGO het verklarings van die Amerikaanse sentrum vir siektebeheer dat die virus nie so dodelik is soos die Spaanse griep (1918 -1919) nie, verwerp. Die WGO het gister aangekondig dat 17 lande intussen 787 bevestigde gevalle van Mexikaanse griep bekendgemaak het.

In die VSA het meer as 400 skole hul deure gesluit en ongeveer 250 000 kinders word hierdeur geraak.

Die virus het vermoedelik reeds by tot 1 000 mense in New York voorgekom, maar niemand in die stad is noodlottig geraak daardeur nie. Van die160 gevalle in die VSA is een kind dood weens die griep.

In die Europese Unie is die aantal mense wat positief vir Mexikaanse griep getoets het, 49.

Uit 'n onlangse genetiese studie blyk dit dat die Paradys langs die grens tussen Namibië en Angola lê, 'n dorre en leë stukkie aarde. In dié streek, waarvan die koördinate 12.5 grade O en 17.5 grade Z is, lewe die San. Hulle taal waarvan die klikgeluid kenmerkend is, is volgens sommige kenners 'n regstreekse oorblyfsel van oorspronklike menselike spraak.

Dit is van die bevindinge uit 'n studie van Afrika se genetika, die mees omvattende wat nog tot op hede onderneem is. Die navorsers, onder leiding van Sarah Tishkoff van die universiteit van Pennsylvanië, het die gene bestudeer van meer as 3 000 mense in 121 van die 2 000 bevolkingsgroepe in Afrika. Daaruit is bevind dat die genetiee diversiteit op die kontinent groter is as op om het enige ander plek op aarde.
  
Volgens dr. Tishkoff was die uitgangspunt van die studie die stelling dat die oudste bevolkingsgroep die grootste genetiese diversiteit sou vertoon en dat dit sal afneem namate bevolkingsgroepen migreer.

Die uiteinde: "Die brongebied vir migrasie in Afrika lê in die streek waar die San tans woon. Dit word weergegee in die groot mate van diversiteit binne die bevolking." Of die San dalk self geïmmigreer het uit 'n ander Tuin van Eden is uit die ondersoek nie duidelik nie,  "maar is wel 'n moontlikheid", aldus Tishkoff.