Internasionale nuus – Bladsy 39

Israel wil stemme uit Afrika koop om negatiewe beeld om te keer

‘n Standbeeld (foto hierbo) is opgerig by Aero-strand suid van Uganda se hoofstad, Kampala, van die ontslape Yonatan Netanyahu.

Yonatan was die broer van Israel se eerste minister, Benjamin Netanyahu, en ‘n offisier in die Israeliese weermag se elite-eenheid, Sayeret Matkal.

Hy is dood toe Israel ‘n reddingspoging op die internasionale lughawe Entebbe in Uganda in 1976 uitgevoer het om gyselaars te bevry.

Premier Netanyahu is Maandag in Uganda verwag om die 40ste herdenking van Operasie Entebbe te herdenk.

Israel en Uganda handhaaf glo goeie betrekkinge.

Die Eerste Minister het gesê sy doel is om Afrika-stemme by die VN en ander internasionale forums te gebruik om die negatiewe sentiment teen Israel te bekamp.

Hy sal met die leiers van sewe Afrika-lande vergader: Uganda, Kenia, Rwanda, Ethiopië, Suid-Soedan, Zaïre en en Tanzanië.

“As ons daarin slaag om die 54 lande van Afrika te oorreed, sal die outomatiese meerderheid teen Israel [in die internasionale gemeenskap] wegval langs die pad,” het hy gesê.

Netanyahu het opgemerk dat daar ‘n tendens onder sekere Afrika-state is om óf teen Israel te stem òf buite stemming te bly oor belangrike internasionale kwessies.

Volgens Netanyahu, het Afrika-lande twee basiese behoeftes waarmee Israel kan help. Die eerste is veiligheid, en die stryd teen terrorisme en die tweede is Israeliese tegnologie op die gebied van landbou, water, energie en gesondheid.

Britse soldate staar klagtes van oorlogsmisdade in gesig na Chilcot-verslag

Britse soldate is woedend en ontsteld dat die Chilcot-verslag wat oor die oorlog in Irak handel gebruik kan word om Britse troepe te vervolg, terwyl Tony Blair skotvry daarvan afkom.

Aanklaers in Den Haag, wat gewoonlik swart diktators lukraak oor volksmoord vervolg, het bevestig dat hulle die verslag van 2,6 miljoen woorde as bewys vir oorlogsmisdade deur die Britse troepe gaan gebruik.

Maar die Internasionale Strafhof (ICC) het gesê die voormalige eerste minister gaan nie aangekla word nie, selfs al het hy die 2003-inval geloods wat die lewens van 179 Britse dienspersoneel en tienduisende burgerlikes gekos het.

Individuele soldate gaan nou gejag word, maar die voormalige Arbeiderspartyleier Blair, wat gelieg het oor wapens van massavernietiging om Saddam Hussein uit die weg te ruim, ontduik sy verantwoordelikheid.

Sir John Chilcot se ondersoek, wat sewe jaar geneem het en meer as £10 miljoen verkwis het op die verslag, sal Woensdag vrygestel word.

Dit sal na verwagting Blair se rol sterk kritiseer, oor “die misbruik van intelligensie” om sy saak vir die oorlog te versterk.

Maar die ICC kyk reeds indringend na meer as 1000 bewerings dat die Britse magte Irakse gevangenes gemartel en mishandel het.

Dit beteken dat soldate wat reeds deur die Britse howe kwytgeskeld is, nog die beproewing van oorlogsmisdaadklagtes in die gesig staar.

Sersant Kevin Williams, wat reeds 12 jaar in die howe deurgebring het voordat hy vrygespreek is van die moord op ‘n burgerlike in Irak, het gesê: “Die kans dat soldate eerder ondersoek kan word as Blair is heeltemal walglik.

“Soldate is ingestuur in Irak gebaseer op vervaardigde bewyse dat Saddam ‘n wêreldwye bedreiging inhou. Diegene wat verantwoordelik is vir die vervaardiging van daardie getuienis dra baie meer verantwoordelikheid vir die talle lewens wat verloor is in die stryd vir Irak.”

Roger Bacon, wie se seun Matthew gedood is deur ‘n bom langs die pad in 2005, het gesê: “Dit is verregaande. Dit is dubbele standaarde. Hierdie soldate het uitgegaan om hul beste te lewer vir ons en hier word hulle gejag maar nie die ou wat hulle ingestuur het nie.”

Die Hof beweer dat hulle nie die juistheid van Britse besluit om toe te tree tot die oorlog kan oorweeg nie.

ISIS-motorbom dood 120 in Bagdad

Minstens 120 mense is dood en 200 beseer in twee bomontploffings in Bagdad, Irak.

Reuters berig die eerste bom was in ‘n koeltrok versteek in ‘n besige markgebied in Karada.

‘n Tweede bom het langs ‘n pad ook in ‘n mark, die keer in al-Shaab, ontplof.

Albei aanvalle het omstreeks middernag plaasgevind.

Die Islamitiese Staat-militantegroep het aanspreeklikheid vir die aanvalle aanvaar.

Alhoewel ‘n onlangse oorwinning ISIS uit Fallujah gedryf het, is die groep nog lank nie verslaan nie, aangesien hulle deur ‘n staat of state befonds word en hulle internasionaal opereer.

Dit is dus nie ‘n probleem wat weggaan deur grondgebied van die terreurorganisasie weg te neem nie.

Kenners meen dat intelligensie-insameling – en nie net ‘n militêre operasie nie – nodig is aangesien daar talle ISIS-simpatiseerders in Bagdad is wat herhaaldelik sal probeer om aanvalle soos hierdie uit te voer.

In Karada heers ongelukkigheid, des te meer omdat die reregingslui verskans is binne die Amerikaanse Groensone, en nie uitgelewer is aan die geweld nie.

Bill en Loretta uitgevang dat hulle glo konkel oor Hillary

Nadat sy gedwing is om haar betrokkenheid by die Hillary Clinton e-pos-ondersoek te staak, het die Amerikaanse prokureur-generaal, Loretta Lynch erken dat haar skokkende onbesonne private vergadering met Bill Clinton ‘n skaduwee gewerp het oor haar loopbaan.

Haar vreemde besluit het sy as volg geregverdig: “Ek sou dit nie weer doen nie.”

Terwyl die Demokratiese Party se aanstelling, Lynch, beweer dat sy die besluit om te “onttrek” al dae voor haar ontmoeting met Bill Clinton geneem het, is die openbare mening nie oortuig van haar opregtheid nie.

Soos vroeër uiteengesit in berigte, het die gesette Amerikaanse prokureur-generaal Lynch Maandagaand “sommer toevallig” met Bill Clinton vir ‘n private vergadering in haar vliegtuig by ‘n Phoenix-lughawe op die aanloopbaan ontmoet.

Alhoewel Lynch almal verseker dat die enigste dinge wat bespreek is, Bill se gholfafslaan en sy kleinkinders is, het ‘n konserwatiewe waghond Judicial Watch versoek dat die Inspekteur-generaal ondersoek instel na die vergadering.

Die verslae het druk verskerp op Lynch om weg te staan van die oorsig oor die federale ondersoek na Hillary se private e-posbediener.

‘n Amptenaar van die Amerikaanse departement van justisie het gesê dat Loretta Lynch van voorneme is om enige aanbevelings deur federale agente in die ondersoek te “aanvaar”.

Maar sal inligting oor Hillary Clinton se ongeoorloofde gebruik van eposse werklik deur Lynch vrygestel word?

Dit is bekend dat Lynch gereeld ander aanbevelings van die FBI en departement verontagsaam.

Dit laat kwellings toeneem dat die Clinton-kamp nie sal skroom om die komende presidentsverkiesing op die mees laakbare maniere te beïnvloed nie.

Skokbesluit van Boris Johnson se vertroueling lei tot sy bedanking

Een van die groot Brexit-voorstanders en Britse minister van justisie, Michael Gove, het in skokaangekondig verklaar dat hy verkiesbaar is om David Cameron as Brittanje se eerste minister op te volg.

Hy het terselfdertyd ’n skerp aanval van stapel gestuur op sy referendum-bondgenoot, Boris Johnson, wat intussen sy uittrede aangekondig het.

“Ek wou help bou aan die span agter Boris Johnson sodat ’n politikus wat ten gunste van Brittanje se uittrede uit die Europese Unie (EU) ’n veldtog gevoer het, ons na ’n beter toekoms kan lei,” het Gove gesê.

“Ek het egter tot die slotsom gekom dat Boris nie die leierskap kan bied of die span kan bou vir die taak wat voorlê nie. Om dié rede het ek besluit om my vir die leierskap beskikbaar te stel,” het hy bygevoeg.

Die aankondiging is ’n gevoelige slag vir die voormalige burgemeester van Londen, wat ook sy kandidatuur wou aankondig.

Selfs meer dramaties nog: Teen 11:53 voormiddag, net sewe minute voor die afsnytyd om die Toryleierskapstryd te betree, het Johnson kop uitgetrek.

Gove was aanvanklik geoormerk as ’n potensiële minister van finansies in ’n Johnson-regering, maar die momentum het nou skerp in die rigting van die minister van binnelandse sake, Theresa May, geswaai. Sy het reeds haar kandidatuur aangekondig.

Boris Johnson het gesê die verantwoordelikheid vir die implementering van Brexit is nou aan “iemand anders” toevertrou na hy homself dramaties uit die wedloop onttrek het.

Op ‘n vraag of hy “verraai” voel deur sy langtermyn-vriend en kollega het hy geantwoord: “Ek kan ongelukkig nie verder gaan om te doen wat ek wou doen nie, so dit sal nou iemand anders wees en ek wens hom alle moontlike sukses toe.”

Johnson het gesê hy het geen berou oor die veldtog nie en vra mense om positief te bly. Hy het die kritiek Michael Heseltine as “volledige nonsens” afgemaak.

Aan die Arbeidersparty se kant staar Jeremy Corbyn, wat Dinsdag ’n gevoelige slag toegedien is toe partylede ’n mosie van wantroue teen hom aanvaar het, groot uitdagings in die gesig.

Albei partye is in chaos gedompel ná Donderdag se referendum waarin Britte gestem het om uit die Europese Unie te tree.

Die president van die Bank van Engeland het intussen aangedui dat rentekoerse aanstande maand waarskynlik verder verlaag sal moet word in reaksie op Brittanje se besluit om die Europese Unie te verlaat.

Die president, Mark Carney, sê die onsekerheid wat deur die onttrekking aan die EU geskep is, kan vir ‘n geruimte tyd nog ‘n uitwerking hê op die land se ekonomie.

Hy sê die sentrale bank sal alles in sy vermoë doen om dit teen te werk.

Landmyn eis agt na VSA se nuwe ambassadeur in Somalië land

‘n Landmynontploffing het dié week minibus net buite die Somaliese hoofstad, Mogadishoe aan flarde geruk en die lewens van minstens agt mense geëis en talle beseer, het ‘n ooggetuie gesê.

Niemand het onmiddellik aanspreeklikheid vir die aanval aanvaar nie, maar die Somaliese terreurgroep, Al-Sjabaab, wat bande met Al-Kaïda het, het in die verlede ‘n string soortgelyke aanvalle uitgevoer.

Al-Sjabaab-djihadiste is in 2011 uit Mogadishu verdryf, maar hulle bly steeds ‘n bedreiging in Somalië en naburige Kenia, waar hulle gereelde aanvalle uitvoer.

Hulle veg om Somalië se internasionaal-erkende regering omver te werp.

Die aanslag kom selgs ‘n dag nadat die VSA se nuwe ambassadeur na Somalië sy geloofsbriewe oorhandig het.

Volgens die Somaliese owerhede sal die nuwe ambassadeur met die bestaande [diplomatieke] benaderings misluk.

‘n Senior amptenaar het gesê die aanstelling van Stephen Schwartz as ambassadeur in Somalië is ‘n “historiese geleentheid” vir die Verenigde State om die “Turkse model” van ontwikkeling te gebruik.

“Grawe putte, herbou paaie, rig hospitale op net soos Turkye besig is om in Somalië te doen.”

“Hy het gesê sekuriteitbedrywighede soos hommeltuigaanvalle is nie ‘n beleid wat vrugte sal afwerp nie. Die soort benadering sal nie slaag sonder politieke stabiliteit nie, het die amptenaar gesê.

Die Verenigde State het ‘n aantal hoëprofiel-leiers van die radikale Islamitiese groep al-Sjabaab oor die jare met hommeltuie in militêre operasies gedood.

Somalië het ‘n beroep op die nuwe ambassadeur gedoen om nie kanale soos die Afrika-unie te raadpleeg in die hantering van politieke kwessies in Somalië nie.

Soeke na bewyse oor dood van Mississippi-aktiviste gestaak

Meer as ‘n halfeeu ná die dood van pro-swart aktiviste in Mississippi, waarop die rolprent, Mississippi Burning gegrond is, is die soeke na bewyse gestaak om meer mense te vervolg.

Maar die heksejag teen die vermeende daders van die 1964 “Freedom Summer”-moorde van drie pro-swart aktiviste in Mississippi se Neshoba-distrik meer as ’n halfeeu ná hul dood, duur voort.

Sommige inwoners van Mississippi en die slagoffers se naasbestaandes sê hulle sal nie rus voor die skuldiges aan die kaak gestel is nie.

Mississippi se prokureur-generaal, Jim Hood, het verlede week gesê daar is geen manier om verdere getuienis in te samel om die oorblywende verdagtes in die dood van James Chaney, Andrew Goodman en Michael Schwerner aan te keer nie.

Die drie mans, skaars uit hul tienerjare, is op 21 Junie 1964 glo deur lede van die Ku Klux Klan om die lewe gebring. Die verdagtes is nou bejaarde mans.

Diegene wat die verdagtes geken het, is ook bejaard. Vir jonger inwoners van Mississippi is hul enigste herinnering aan die gebeure die 1988-rolprent, Mississippi Burning.

Familielede van Chaney, Goodman en Schwerner, en ander inwoners van die staat sê die soeke na geregtigheid om maatskaplike genesing te bring, is nog nie verby nie.

Chaney, Goodman en Schwerner het verdwyn nadat hulle die Neshoba-distrik besoek het om ondersoek in te stel na die afbrand van die Mt. Zion United Metodiste kerk.

Die drie mans, twee Joods en een swart, se oorskot is weke later in ’n gronddam aangetref. Ná ’n ondersoek deur die Federale Speurdiens is agt mense in 1967 skuldig bevind aan die skending van federale menseregte wat met die moorde verband gehou het.

Die finale vervolging het in 2005 begin toe Hood en die Neshoba-distrik se prokureur met welslae drie klagte van menseslagting teen ene Edgar Ray Killen, aanhangig gemaak het.

Hy dien steeds gevangenisstraf uit. Mississippi het tans honderde verkose swart leiers. Desnieteenstaande bly die bevolking, wat rasse betref, gepolariseer.

Cameron se opvolgers skop veldtog af

Die twee gunstelinge om die nuwe Britse eerste minister en leier van die Konserwatiewe Party te word, sal vandag hul veldtogte bekendstel.

Die minister van binnelandse sake, Theresa May en voormalige burgemeester van Londen, Boris Johnson (foto hierbo) sal waarskynlik klem lê op hul vermoë om die party weer saam te snoer ná die referendum oor lidmaatskap van die Europese Unie.

Hulle het die veldtog gelei om die EU te verlaat. Die voormalige minister, Liam Fox en die sekretaris van werke en pensioene, Stephen Crabb het hulle ook verkiesbaar gestel.

Die nuwe leier in die plek van David Cameron sal op 9 September aangewys word.

Wetgewers van die Europese Unie (EU) het intussen in Brussel vergader om die onverwagte besluit te bespreek van die Verenigde Koninkryk om die EU te verlaat.

Hulle het ’n beroep op Brittanje gedoen om so gou as moontlik met die uittrede-proses te begin.

’n Nie-bindende resolusie Dinsdag sê die proses moet begin sodra die Britse eerste minister, David Cameron, EU-leiers oor die uitslag van die referendum in kennis stel.

Cameron het die EU oor die referendum en Brittanje se toekoms ingelig en aangedui dat Brittanje waarskynlik nie artikel 50 van die Lissabon-verdrag vóór Oktober in werking sal stel nie.

EU-leiers het die politieke chaos in Brittanje erken, maar hulle wil steeds hê artikel 50 moet so gou as moontlik in werking gestel word om markte te kalmeer en Europese burgers te verseker.

Openbare steun vir uittrede uit die EU is besig om te groei weens die feit dat Duitsland ongebreidelde immigrasie aan lidlande opdring.

Afrika gaan sukkel na Brexit sê ontleders

Brittanje sal eers wanneer David Cameron se plaasvervanger die leisels oorneem, art. 50 van die Verdrag van Lissabon aktiveer, maar ontleders waarsku reeds dat Afrika gaan sukkel na Brexit.

Luidens ‘n verklaring is dit te vroeg om te sê of die onderhandelinge handelsooreenkomste sal beïnvloed, insluitend die Ekonomiese Vennootskapsooreenkoms (EPA) wat onlangs tussen die EU en lande binne die Suider-Afrikaanse Ontwikkelingsgemeenskap (SAOG) onderteken is.

Ontleders meen Afrika gaan die slegste van Brexit afkom omdat die EU hulp aan die vasteland gemodereer het. Die Britte sal waarskynlik nie so vrygewig wees nie.

Sulke ooreenkomste soos die EPA sal voortaan bilateraal herbeding moet word met elk van die ander 162 Wêreldhandelsorganisasie-lede en skep groot onsekerheid.

Dit is kragtens hierdie artikel 50 waarvan die formele, wettige wegbreekonderhandelinge van die Europese Unie (EU) sal geskied.

Dié proses sal twee jaar duur, met Brittanje wat in die tussentyd ’n volle lid van die EU sal bly.

Dié verdrag, waarna ook soms as die EU se grondwet verwys word, is in 2007 in Lissabon, Portugal, deur die lidlande onderteken en het op 1 Desember 2009 van krag geword.

Art. 50 van die verdrag handel oor die formele onttrekking van ’n lidland uit die EU. Dit bepaal ’n lidland wat uit dié magsblok wil bedank, moet kennis gee van sy voorneme en het dan twee jaar tyd om sy betrekkinge met die EU en sy lidlande te onderhandel.

Indien Brittanje nie die sperdatum aan die einde van die twee jaar tydperk haal nie, verval die lidmaatskapwaarborge tensy elkeen van die lidlande individueel instem om die spertyd te verleng.

Dit is nog te vroeg om te sê wat die uiteinde van die onderhandelinge gaan wees, maar die Britse regering is glo van voornemens om een van die wêreld se ses sterkste ekonomieë te bly.

Brittanje sal steeds ’n lid van die Verenigde Nasies (VN) se Veiligheidsraad bly, asook van die G7, G20, die Noord-Atlantiese Verdragsorganisasie (Navo) en die Gemenebes.

Voormalige sekretaris-generaals van NAVO het voorheen gewaarsku dat Brittanje die Weste se vyande sal bevoordeel indien hy aan die Europese Unie onttrek.

In ‘n afsonderlike pleidooi het dertien voormalige Amerikaanse verdediging- en beleidshoofde gesê dat Brittanje se internasionale stand ondermyn sal word indien hy die EU verlaat.

Die voormalige Britse minister van verdediging, Liam Fox het die Brexit-teenstand as outyds afgemaak. Fox sê hy meen ‘n onafhanklike Brittanje kan ‘n nuwe aspek tot NAVO bydra.

Dodelike ISIS-aanval op Istanbul-lughawe eis talle

‘n Geweer- en bomaanval op Istanbul se Ataturk Internasionale Lughawe Maandagaand het die lewens van 50 mense geëis.

Meer as 239 mense is in die aanval beseer. ‘n Polisiewoordvoerder sê drie aanvallers het by die ingang van een van die terminale op mense begin skiet.

Hulle het hulself opgeblaas toe polisie op hulle begin skiet. Die Eerste Minister Binali Yildirim sê dit blyk asof die sogenaamde Islamitiese Staat vir die aanval verantwoordelik is.

Volgens mediaberigte word Ataturk-lughawe reeds vir ‘n geruime tyd as ‘n weerlose teiken beskou.

Baie gewone Turke is toenemend bekommerd en kwaad dat die oorlog op die grens teen Sirië oor die grens spoel en in die land binnegedring het.

Die aanvalle is nie eerste wat Turkye tref nie en is vermoedelik weer die werk van ISIS.

Van die drie selfmoordbommers in die lughawe-aanval, was twee by die internasionale terminaal, en die derde terroris was in die nabygeleë parkeerterrein, het ‘n Turkse amptenaar het aan CNN gesê.

Al drie ontploffing het het hulself opgeblaas.

Die Turkse president Erdogan het ‘n oproep gedoen om verenigde internasionale stryd teen terrorisme.

Dit is Europa se derde besigste lughawe.

Minstens twee Suid-Afrikaners het die aanval op die Ataturk-lughawe in Istanboel aanskou en oorleef.

Die 77-jarige Paul Roos en sy vrou Susie het gesien hoe een van die drie aanvallers wild in die vertreksaal geskiet het.

Hulle sê hulle het agter `n toonbank weggekruip, maar die man dopgehou. Roos sê daar was twee ontploffings voor die man met die roltrap na die onderste verdieping beweeg het.

Nog skote is afgevuur, gevolg deur `n ontploffing waarna dit stil geword het.

Roos en sy vrou was op pad Kaapstad toe na `n vakansie in Turkye.

Owerhede het bevestig dat drie selfmoordbomdraers eers op mense by die lughawe losgebrand het voordat hulle hulself opgeblaas het toe die polisie op hulle geskiet het.

Volgens amptenare was meeste van die slagoffers Turke, hoewel buitelanders ook in die aanval dood is.

Siriese konflik spoel oor na Libanon

Altesaam vyf mense is dood toe selfmoordbomaanvallers Maandag die oorwegend Christen-nedersetting, Qaa in Libanon, ongeveer 100 meter van die grens met Sirië geteiken en hul plofstof ontsteek het.

Vier selfmoordbomaanvallers was by die aanval betrokke.

Geen groep het nog verantwoordelikheid vir die aanval aanvaar nie.

Inwoners van die nedersetting het onraad vermoed toe die aanvallers omstreeks 04:00 deur die dorp beweeg het. Toe ’n veiligheidswag hulle geroep het, het hulle ’n handgranaat gegooi en toe agtereenvolgend hulself tussen inwoners van die nedersetting opgeblaas.

Vier lede van die weermag is onder die 15 gewondes.

Qaa se burgemeester, Bashir Matar, het gesê die vierde aanvaller is deur veiligheidsmagte doodgeskiet. Hy sê ná die eerste ontploffing het mense op die toneel saamgedrom, waartydens ’n tweede en toe ’n derde ontploffing plaasgevind het.

“Terwyl ons besig was om van die gewondes te help, het ek die vierde aanvaller na my toe sien beweeg. Ek het op hom geskree,” het Matar gesê. “Ons het op hom begin vuur en toe blaas hy homself op,” het hy gesê.

Libanon beleef die afgelope jare toenemend oorspoel-geweldpleging uit Sirië se dodelike burgeroorlog en die Libanese owerheid is op ’n hoë gereedheidsgrondslag met verskerpte sekuriteitsmaatreëls wat die afgelope dae geld.

Al is dit nog nie duidelik wie die aanval uitgevoer het nie, het Libanese Christene in Qaa die wapen opgeneem en selfverdedigingseenhede op die been gebring om inwoners teen moontlike aanvalle deur Moslem-ekstremiste uit naburige Sirië te beskerm.

Petisie vir tweede Britse referendum ‘n bedrogspul

Die werklike aantal Britse burgers wat glo ‘n petisie onderteken het om nog ‘n referendum oor lidmaatskap van die Europese Unie te eis, is buitelandse ondertekenaars.

Sommige kritici beweer dat ‘n “bot” of “script” gebruik word om name en ondertekenaars outomaties te genereer.

Vanaf vroeg Sondagmiddag, het meer as 3,1 miljoen handtekeninge waarskynlik byna almal vals, geregistreer op die petisie. Maar ‘n ontleding van die data op die petisie toon dat die ondertekenaars uit die buiteland kom.

Twitter-gebruikers sê hulle het ‘n PasteBin-skakel opgemerk wat dui op outomatiese handtekeninge. Handtekening uit die Vatikaanstad en vreemder nog, Noord-Korea, verskyn op die “Britse” petisie.

Nie verbasend nie, het Media24 die bedrogspul as ‘n feit aangekondig.

Anti-Brexit-aktiviste deel poskodes aanlyn uit ten einde meer handtekeninge te lok uit die buiteland.

Die petisie het byvoorbeeld 2735 ondertekenaars uit Antarktika gehad waar slegs 250 Britte tans woon.

Die Duitse kanselier, Angela Merkel, verkeer onder druk van Frankryk, Brussel en haar eie regering om Brittanje so gou as moontlik uit te kry uit die EU.

Regse partye in Europa het Britte se besluit om die EU te verlaat, geloof.

George Soros wat ‘n ekonomiese insinking vir Brittanje voorspel het, het intussen van deuntjie verander en gesê oor die lang termyn mag dit tot ekonomiese voorspoed lei.

Kort na die uitslae van die referendum, wat in die vroeë oggendure Vrydag bekend geword het, het die Britse premier, David Cameron, huilend bedank.

Boris Johnson, Michael Gove, en die minister van binnelandse sake, Theresa May word oorweeg as plaasvervangers van Cameron.

Boris Johnson, die man wat waarskynlik vir David Cameron as eerste minister gaan opvolg, het Vrydag gesê daar is geen haas om uit die EU pad te gee nie, maar die president van die Europese parlement, Martin Schulz, sê Brittanje kan nie meer insette lewer oor spertye nie.

In Brittanje het Brexit met 52-48 persent stemme in die referendum geseëvier, maar ontleders meen die anti-EU-sentiment is selfs groter.

Verdeeldheid binne die Arbeidersparty is besig om na ‘n totale ineenploffing te neig met die party se leier, Jeremy Corbyn, wat sy skadu-minister van buitelandse sake, Hilary Benn, afgedank het.

Corbyn probeer pogings om van hom ontslae te raak omdat hy teen Brexit was, stuit, maar dit sal ten koste van sy party wees. Geswore Arbeiderkiesers het gestem om die EU te verlaat, terwyl hul leier Corbyn, ‘n futlose veldtog gevoer het om te bly.

Die senior partylid Margaret Hodge het reeds ‘n mosie van wantroue in Corbyn ingestel. As dit aanvaar word vir debat, sal die Arbeiders se parlementêre koukus daaroor moet stem.

In Frankryk en Nederland het Marine le Pen (Nasionale Front) en Geert Wilders (Partij voor de Vrijheid) reeds soortgelyke referendums as Brexit aangevra.

In Oos-Europa, Skandinawië, Italië en Oostenryk, is daar soortgelyke weersin in Duitsland se eise dat hulle grense oopstel vir immigrante.

Leopold Scholz, Media24 se tweederangse Soros-buikspreker en voorstander van oop grense, het die linkse onsin dat “Europa weer tot die histeriese nasionalisme en ekstreme onstabiliteit van voor 1945 kan terugkeer” herhaal.

Dit is duidelik dat ‘n groepie bankiers Merkel omgekoop het sodat sy Duitsland se invloed in Brussel (hoofkwartier van die EU) gebruik om mag ten koste van nasionale regerings uit te oefen oor immigrasie en dat sy nou ironies genoeg juis deur demokrasie verhoed gaan word om daarmee aan te hou.

Hierdie onbesonnenheid om hordes uit die Derde Wêreld in te laat, kan beteken dat Brexit die waterskeiding word wat aanstons tot die verbrokkeling van die EU kan lei.

Merkel het met die leiers van die ses stigterslande van die EU se voorganger, die Europese Ekonomiese Gemeenskap, ‘n noodvergadering in Berlyn gehou.

Duitsland, Frankryk, Italië, Nederland, België en Luxemburg het die moontlikheid bespreek om ‘n “Europa van verskillende snelhede” te oorweeg om die blok te red.

Noord-Ierland en Skotland is ten gunste van voortsetting van lidmaatskap.

Skotland se eerste minister, Nicola Sturgeon, wil met regstreekse onderhandelinge met Brussel begin en moontlik ’n tweede referendum in Skotland hou oor onafhanklikheid van die Verenigde Koninkryk, iets wat die einde van die VK mag beteken.

In 2014 het die Skotte teen onafhanklikheid gestem, maar die kans op ‘n oorwinning lyk nou veel groter.

Formele onttrekking uit die EU word bepaal deur artikel 50 van die Lissabon-verdrag. Die artikel is slegs vyf paragrawe en 250 woorde lank en het eintlik twee bepalings: ‘n Lidland wat uit die klub wil bedank, moet kennis gee van sy voorneme en het dan twee jaar tyd om sy verhouding met die res van die EU te heronderhandel. Indien spertyd nie gehaal word nie, val Brittanje weg uit die EU sonder enige waarborge, tensy elkeen van die lidlande individueel instem om die spertyd uit te stel.

Dit is ‘n groot taak wat voorlê. Ooreenkomste tussen die EU en Brittanje beloop 80 000 bladsye en die Britse parlement sal die EU-besluite wat deel is van Britse wetgewing moet ignoreer. Vir die lui verteenwoordigers is dit blykbaar ‘n aangename vooruitsig.

Die Amerikaanse minister van buitelandse sake, John Kerry sê Brittanje se onttrekking moet so gelykmatig moontlik gedoen word om ekonomiese ontwrigting te beperk.

Kerry sal vandeesweek besoek bring aan Londen en die hoofkantoor van die EU in Brussel om die oorgang te bespreek.

Volgens hom het Amerika gehoop dat die Britte sal verkies om lid van die EU te bly, maar dat Amerika die uitslag aanvaar.

Michelle Obama se laaste Afrika-vakansie

Die gade van die Amerikaanse president, Michelle Obama, het die week op ’n besoek aan Afrika vertrek.

Sy word van haar dogters, Sasha en Malia, en haar ma vergesel as deel van haar pogings om onderwys vir meisies te bevorder.

Sy besoek Morokko en Liberië en beoog om die kollig te laat val op die “laat meisies leer”-inisiatief van die Amerikaanse regering wat in 2015 deur pres. Barack Obama en die eerste dame van stapel gestuur is.

Die projek vorm deel van Amerika se poging om die struikelblokke uit die weg te ruim wat meer as 62 miljoen meisies wêreldwyd, in die besonder tienerjariges, in die gesig staar om toegang tot onderwys te kry, het ’n woordvoerder van haar kantoor gesê.

Michelle Obama word deur die wit aktrise Meryl Streep na Marokko vergesel (foto hierbo), waar hulle met jong meisies oor “uitdagings” sal praat.

In Liberië sal sy ’n opleidingsentrum vir lede van die Amerikaanse vredeskorps besoek asook by ‘n skool aandoen saam met Liberië se pres. Ellen Johnson Sirleaf, Afrika se eerste verkose vroulike staatshoof en Nobelprys vir vrede-wenner.

Veertien kom om in al-Sjabaab-aanval op Somaliese hoofstad

Minstens 14 mense is dood toe die ekstremistiese, Islamitiese groep al-Sjabaab ’n hotel in Somalië se hoofstad, Mogadisjoe, beset het.

Die aanval het met ’n kragtige ontploffing by die ingangshek begin, het AP berig.

“Ons het uiteindelik die beleg beëindig. Die laaste militante is op die boonste verdieping van die hotel doodgeskiet,” het kapt. Mohamed Hussein van die polisie gesê nadat veiligheidsmagte die gewapendes doodgeskiet het wat as sluipskutters stelling op die dak van die Naso-Hablod-hotel ingeneem het. Volgens die polisie was minstens vier mans in die aanval betrokke en twee is doodgeskiet.

Minstens 14 burgerlikes is in die aanval dood.

Die veiligheidsmagte het die meeste gyselaars bevry, maar teen druktyd was dit nie bekend of enige van hulle in die aanval dood is nie. Volgens mediese personeel is nege mense in die voorval gewond.

Die polisie sê die aanval het begin toe ’n selfmoordbomaanvaller homself in ’n voertuig, volgelaai met plofstof, by die ingang van die hotel opgeblaas en die hek aan flarde geskiet het. Gewapende mans het hul pad na die hotel oopgeveg en ooggetuies sê hulle het wild op hotelgaste begin skiet. Die hotel se vloer was met bloed bevlek en die mure het gate in gehad waar dit deur koeëls getref is.

Al-Sjabaab, met sy bande met Al-Kaïda, voer ’n dodelike insurgensie in Somalië en maak dikwels van selfmoordaanvallers met motorbomme gebruik.

Die aanval in die hoofstad beklemtoon die uitdagings wat die Somaliese regering en die magte van die Afrika-unie in die gesig staar om die land te beveilig. ’n Aanval in Februarie op nog ’n hotel in Mogadisjoe het die lewe van minstens nege mense geëis en in April het ’n motorbom buite ’n restaurant in die hoofstad tot die dood van minstens vyf mense gelei.