Siriese konflik spoel oor na Libanon

Altesaam vyf mense is dood toe selfmoordbomaanvallers Maandag die oorwegend Christen-nedersetting, Qaa in Libanon, ongeveer 100 meter van die grens met Sirië geteiken en hul plofstof ontsteek het.

Vier selfmoordbomaanvallers was by die aanval betrokke.

Geen groep het nog verantwoordelikheid vir die aanval aanvaar nie.

Inwoners van die nedersetting het onraad vermoed toe die aanvallers omstreeks 04:00 deur die dorp beweeg het. Toe ’n veiligheidswag hulle geroep het, het hulle ’n handgranaat gegooi en toe agtereenvolgend hulself tussen inwoners van die nedersetting opgeblaas.

Vier lede van die weermag is onder die 15 gewondes.

Qaa se burgemeester, Bashir Matar, het gesê die vierde aanvaller is deur veiligheidsmagte doodgeskiet. Hy sê ná die eerste ontploffing het mense op die toneel saamgedrom, waartydens ’n tweede en toe ’n derde ontploffing plaasgevind het.

“Terwyl ons besig was om van die gewondes te help, het ek die vierde aanvaller na my toe sien beweeg. Ek het op hom geskree,” het Matar gesê. “Ons het op hom begin vuur en toe blaas hy homself op,” het hy gesê.

Libanon beleef die afgelope jare toenemend oorspoel-geweldpleging uit Sirië se dodelike burgeroorlog en die Libanese owerheid is op ’n hoë gereedheidsgrondslag met verskerpte sekuriteitsmaatreëls wat die afgelope dae geld.

Al is dit nog nie duidelik wie die aanval uitgevoer het nie, het Libanese Christene in Qaa die wapen opgeneem en selfverdedigingseenhede op die been gebring om inwoners teen moontlike aanvalle deur Moslem-ekstremiste uit naburige Sirië te beskerm.