Brief: Aanvalle op Afrikaanse onderwys is volksmoord

Die beskawingspeil in die sogenaamde “Nuwe Suid-Afrika” het nou tot dié punt gedaal dat volksmoord nie net blatant gepleeg word nie; dit word met akademiese paaiwoordjies en retoriek deur paap en professor goedgepraat.

Onderstaande brief het ek op 28 Februarie 1996 aan Rapport gestuur. Dis nie geplaas nie, want die oorgaweproses deur die Nasionale Party-regering onder druk van die buiteland en groot geldbelange wat onder andere die terrorisme van die ANC en SAKP gefinansier het, was op dié tydstip ‘n fait accompli.

Geagte meneer,

Deur Afrikaansmedium skole en Afrikaanse tersiêre inrigtings se taal van onderrig (onderwyskultuur) te wil verander en deur Afrikaans drasties af te skaal op die groot openbare kommunikasiemedium, televisie, word daar nie net ongrondwetlik (volgens die oorgangsgrondwet) opgetree nie (‘n taal se status sal nie aangetas of afgeskaal word nie, eerder uitgebou word), maar daar word geflankeer met ‘n veel ernstiger misdaad: Volksmoord (genocide).

In die Suid-Afrikaanse Regskommissie se werkstuk oor Groeps- en Menseregte, Werkstuk 25, verskyn daar op bl. 334, die volgende oor volksmoord:

11.28 ‘Sedert die stigting van die VVO (nou VV) is vier belangrike konvensies aangegaan wat minderhede beskerm, te wete:

i) Die Volksmoord-konvensie van 9 Desember 1948 (Die Konvensie met betrekking tot die Voorkoming en Bestrawwing van die Misdaad van Volksmoord)

11.29 Die Konvensie bepaal dat aantasting van ‘n nasionale, etniese, rasse- of religieuse groep met die doel om dit ten dele of in die geheel te vernietig, strafbaar is. Onder volksmoord word nie alleen gereken die doodmaak van lede van die groep nie, maar ook die berokkening van ernstige liggaamlike of sielkundige leed aan lede van die groep…’

Kan die afdwinging van ‘n ander taal van onderrig of die gedwonge integrasie van rassegroepe nie gereken word as ten minste ‘ernstige sielkundige leed’ wat die lede van ‘n bepaalde bevolkingsgroep aangedoen word nie?

Terloops, ek wonder nog die heel tyd wie organiseer die sogenaamde ‘studente-opstootjies’ by Afrikaanse onderwysinstellings. Nee, dit gebeur nie spontaan nie. Terugskouend het geen rewolusionêre beweging nog ooit in die geskiedenis van die mensdom spontaan ontstaan nie.

En wat is dié betogings, optogte, sitproteste, vullisstrooiing en opstootjies met gereelde tussenposes anders as ‘n gestadigde rewolusie of omvergooiing van werkende strukture?

-Elma Potgieter, aktrise en skryfster