Kategorie: Internasionale nuus

Nuus oor die wêreld buite Suider-Afrika

BBC swig voor koninklike druk

Die Britse uitsaaikorporasie (BBC) word daarvan beskuldig dat dit onder druk van die koninklike familie besluit het om nie ’n kontroversiële dokumentêre program, Reinventing The Royals, uit te saai nie, het AFP berig.

Die tydskrif Radio Times, wat die storie gebreek het, voer aan regsverteenwoordigers van die koninklike familie het ter elfder ure ingegryp. BBC-base het geswig en besluit om die uitsending te kanselleer.

In ’n verklaring sê die BBC daar is besluit om die uitsending wat vir Sondag 4 Januarie geskeduleer was, “uit te stel tot later in die nuwe jaar om ’n aantal kwessie, insluitende die gebruik van argiefmateriaal, op te los”.

Nog lande sluit by soektog na AirAsia-vlug aan

Die lugsoektog na die Air Asia-vliegtuig met 162 mense, wat oos van Java verdwyn het, sal Dinsdagoggend voortgaan.

Daar is nog geen aanduidings van waar die vliegtuig kon geval het nie.

Twee oliekolle is in die see opgemerk, terwyl ‘n Australiese vliegtuig drywende voorwerpe honderde kilometer verder gewaar het.

Meer as vyftien vliegtuie en 30 skepe neem vir die derde dag aan die soektog deel.

Die hoof van die Indonesiese Nasionale- en Soek-agentskap glo dat die vliegtuig iewers ter see geval het.

Lugverkeerbeheer het kontak met vlug QZ8501 verloor sowat ‘n uur nadat dit Sondag by die Juanda Internasionale Lughawe in Surabaya opgestyg het.

Nog lande gaan by die soektog na die vermiste passasiersvliegtuig van Air Asia aansluit, nadat die Amerikaanse vloot Dinsdag aangekondig het dat hulle aan die soektog in die Java See gaan deelneem.

Daar sal egter ook op land gesoek word. Minstens 21 vliegtuie en 30 skepe van lande soos Indonesië, Australië, Maleisië, Singapoer en Suid-Korea help reeds met die soektog oor ‘n gebied van sowat 10 000 vierkante seemyl.

China sal ook aan die soektog deelneem.

AirAsia-vliegtuig vermoedelik op seebodem

Daar word vermoed dat die vermiste AirAsia-vliegtuig van vlug QZ8501 wat Sondag tussen Surabaya en Singapoer verdwyn het, op die bodem van die see verkeer. Die soektog daarna word vanoggend voortgesit.

Die lugredery het verklaar dat hy alle pogings steun om die vliegtuig te vind en sy volle samewerking bied.

Die lugredery het bevestiging ontvang van die Nasionale Soek- en Reddingsagentskap van die Republiek van Indonesië (Basarnas) dat ʼn internasionale opsporings- en reddingspoging van Indonesië, Singapoer en Maleisië geloods is.

AirAsia het intussen ʼn regstelling uitgereik oor die nasionaliteit van die passasiers en bemanning aan boord van vlug QZ8501. Een van die passasiers is van die Verenigde Koninkryk, een van Singapoer, een van Maleisië, drie van Suid-Korea, en 149 van Indonesië. Een van die bemanningslede is van Frankryk en ses van Indonesië.

Die vliegtuig is ʼn Airbus A320-200 met die registrasienommer PK-AXC. Dit het soek geraak nadat die kaptein, wat oor 20 537 vlugure se ervaring beskik, versoek het om die vlugroete  weens gure weersomstandighede aan te pas.

Eerste sooie vir Nicaragua-kanaal omgespit

Dit kan een van die mega-projekte van die 21ste eeu word vir die sowat ses miljoen mense in Nicaragua wat in uiterste armoede leef.

Die 300-kilometer-lange Nicaragua-kanaal wat die Karibiese See met die Stille Oseaan verbind, sal 100 jaar na die voltooiing van die Panamakanaal, die tweede kanaal deur die Sentraal-Amerikaanse vasteland wees.

Die Chinese maatskappy Hong Kong Nicaragua Kanaalontwikkeling (HKND) is van voorneme is om $40 miljard te belê in die projek, met die eerste skepe wat op die kanaal sal vaar teen 2019.

HKND het die gerespekteerde Britse raadgewende firma Environmental Resources Management sowat ‘n jaar gelede aangestel om die omgewings- en sosiale impak wat na verwagting 29.000 mense sal verplaas, te assesseer.

Nicaragua het Maandag ‘n sooispitseremonie gehou vir die skeepskanaal-projek.

Die kanaal sal na verwagting met die Panama-kanaal meeding en die ekonomie van die tweede armste land in die Amerikas ‘n hupstoot te gee.

Nicaragua se regering sê die kanaal van 278 kilometer lank, kan ekonomiese groei met meer as tien persent per jaar verhoog.

Die kanaal sal China ‘n ekonomiese houvas op die Amerikas gee.

‘n Woordvoerder van Nicaragua se president, Daniel Ortega, het dit beskryf as ‘n “groot Kersgeskenk” vir sy mense.

Die konstruksie sal aanvanklik 50.000 werkgeleenthede skep.

Olielande blameer nie-OPUL lede vir olieprys

Saoedi-Arabië sê hy sal nie olieproduksie verminder om markte te steun nie, het RSG berig.

Dit is een van die duidelikste aanduidings tot nog toe dat die wêreld se grootste olie-uitvoerder nie van plan is om die mark te hulp te snel wat sy grootste krisis in jare beleef nie.

Die land se olie-minister, Alial-Naimi sê oliepryse behoort teen die tweede helfte van aanstaande jaar te verbeter.

Hy plaas die skuld vir die lae olieprys op spekuleerders en die gebrek aan samewerking tussen nie-OPUL-lede.

Saoedi Arabië se standpunt word ondersteun deur die Verenigde Arabiese Emirate wat produsente gevra het om hul produksie onveranderd te laat.

Die olieprys het tot bykans die helfte van die prys ses maande gelede gedaal.

Demokrate hoop op Spaanse stemme met Kuba-besluit

Die gesamentlike aankondigings in Washington en Havana deur pres. Barack Obama en pres. Raul Castro dat Amerika en Kuba volle diplomatieke bande gaan herstel, is as “geskiedkundig” bestempel.

Kuba was voorheen ‘n bondgenoot van Rusland.

Die VSA hoop om hul betrekkinge met Latyns-Amerika te verbeter. Pres. Obama sal volgende jaar die spitsberaad van die Amerikas in Panama bywoon omdat Amerika se betrekkinge met Kuba nie meer die enigste onderwerp op die tafel sal wees nie.

Die Verenigde Nasies stem jaarliks ’n resolusie wat vra vir die opheffing van die embargo.

Met die jongste verwikkelinge sal struikelblokke in betrekkinge met nie net Kuba nie, maar met ver­skeie Spaanssprekende lande verbeter, hoop die VSA.

Diplomatieke bande tussen die twee lande kom nadat die VSA die Koue Oorlog-anachronisme in Oos-Europa en veral in die Oekraïne laat herleef het met militêre hulp aan die junta en die instelling van sanksies teen Rusland.

Lidlande van die Verenigde Nasies, het deurlopend beroepe vir die opheffing van die ekonomiese, finan­siële en handelsblokkade teen Kuba en die normalisering van handelsbande tussen die twee lande gedoen.

Die VSA beplan om wetgewing aangaande die blokkade teen Kuba, sanksies en ander reisbeperkinge op te hef, terwyl hulle juis sulke maatreëls teen Rusland implementeer.

Amerika het Kuba kort gelede nog gekritiseer oor die land se swak menseregterekord, alhoewel Obama Castro se hand geskud het by die Wêreldbekersokkertoernooi in Suid-Afrika in 2010.

Mediaberigte is dit eens dat heelwat Kubaans-Amerikaners ongelukkig voel oor die jongste aankondiging.

Dit mag ‘n struikelblok wees vir voorgestelde wetgewing wat in die Amerikaanse kongres en senaat voorgelê sal word om volle diplomatieke bande te herstel en die handelsverbod op te hef.

Vir Amerika is dit belangrik om die diplomatieke betrekkinge te herstel wat in Januarie 1961 verbreek is. Sodoende sal nuwe gebiede vir wedersydse kontak tussen Amerikaners en Kubane geopen word wat kommersieel en finansieel voordele inhou.

Stappe om dit vir Kubane makliker te maak om met die buitewêreld te kommunikeer, word ook in die vooruitsig gestel. Internet-penetrasie in Kuba is onder die laagste in die wêreld, omdat die land in die verlede nie die nodige toerusting kon invoer nie.

 

Gebou in Kenia stort ineen

Een persoon is dood en die vrees bestaan dat ander onder die puin vasgekeer of moontlik dood is, nadat ’n vyfverdiepinggebou in Nairobi Woensdag ineengestort het.

Sewe mense is lewendig uit die puin gered.

Vanweë die hoë aanvraag na behuising in Nairobi, systap sommige eiendomsontwikkelaars bouregulasies ten einde koste te bespaar en hul wins te vermeerder.

Die vyf-verdieping residensiële gebou het Woensdag naby die Makongeni-polisiestasie in Nairobi meegegee.

Meer as 30 gesinne het reeds vroeër in die gebou ingetrek wat nog onder konstruksie was en huurders het die grond, die eerste en tweede verdieping beset.

‘n Koerant van die Nation Media Group Publications, die Business Daily het berig dat die meeste geboue in die Eastlands-gebied nie ‘n aardbewing sal oorleef nie.

Dié bevinding is in ‘n verslag gepubliseer deur deur Raul Figueroa van die Carnegie Mellon Foundation gedoen is wat aangedui het dat 3 uit 4 geboue ernstige skade in die geval van ‘n aardbewing sal oorhou.

China se verskaffer van konstruksiemasjinerie, XCMG, het Woensdag die reddingsoperasie gelei.

EU kan sanksies teen Rusland ophef

Die Europese Unie kan die moontlikheid van die opheffing van sy sanksies teen Rusland oorweeg as die Oekraïne se territoriale integriteit behoue bly, het die Duitse kanselier Angela Merkel Vrydag gesê.

“Ons sal sien of daar enige vordering in hierdie rigting is. Dan kan ons in die rigting die opheffing van die sanksies beweeg,” het sy tydens ‘n nuuskonferensie gesê ná ‘n vergadering van EU-leiers in Brussel.

Merkel het beklemtoon dat die EU sanksies teen Rusland ingestel het in reaksie op verwikkelinge in die Oekraïne.

Die sanksies kan moontlik opgehef  word teen vroeg aanstaande jaar. ‘n Diplomatieke bron in Brussel het Vrydag gesê staatshoofde asook die Europese Unie sal die Minsk-vredesooreenkoms met belangstelling volg en die moontlikheid van die opheffing van die blok se sanksies teen Rusland op ‘n beraad in Maart 2015 oorweeg.

“Sekere sanksies teen Rusland, kan opgehef kan word op ‘n EU-beraad in Brussel in Maart,” het die bron gesê.

Merkel het ook gesê sy hoop dat die EU-lande ‘n gekonsolideerde posisie sal nastreef.

Die Russiese president, Wladimir Poetin het intussen Westerse sanksies blameer vir die daling van die Russiese geldeenheid.

“Dit is die koste van ons natuurlike begeerte om Rusland te bewaar as ‘n volk, ‘n beskawing en ‘n staat,” het Poetin gesê. Hy het gesê dit het ook weinig met die verwikkelinge in die Krim te make gehad.

“Die Weste het ‘n anti-Russiese houding gehad lank voor die huidige krisis [in die Oekraïne] begin het,” het Poetin gewaarsku. Die bewyse is daar, het hy gesê, wat wissel van “direkte ondersteuning van terrorisme in die Noord-Kaukasus,” tot die uitbreiding van die NAVO en die oprigting van missielstelsel in Oos-Europa, en die manier waarop die Westerse media die Olimpiese Spele in Sochi kwaadwillig gedek het.

Selfs al sit die Russiese beer stil en eet sy bessies en heuning, sal die druk nie ophou nie, het die president gesê. Hy het gesê die Weste wil die Taiga plunder. Daarvoor moet hulle die beer “vasketting, en as hy vasgeketting is, sy tande en naels uitskeur”.

Die roebel het die laaste ruk rekord-laagtepunte bereik. Poetin het op sy jaareind-nuuskonferensie in Moskou gesê die huidige krisis sal op die langste, twee jaar duur.

Hy is van mening dat die Russiese ekonomie vroeër kan herstel indien eksterne faktore verbeter.

Die roebel se waardevermindering beïnvloed tans die rand weens soortgelyke kommoditeituitvoere asook hul ontluikende markstatus.

Die Amerikaanse Senaat het intussen ‘n oorlogsugtige wet bekragtig dat sanksies teen Rusland moet verskerp word. President Obama het die wet van sy handtekening voorsien.

Die Amerikaanse regering sal aan die Oekraïne ook swaar militêre toerusting ter waarde van $350 miljoen lewer.

Rusland het die wet as ‘n uiterste provokasie beskryf wat tot konfrontasie sal lei as diplomasie nie seëvier nie.

Die Amerikaanse minister van buitelandse aangeleenthede John Kerry en sy Russiese eweknie Sergei Lafrow sal op 15 Desember in Rome ontmoet.

Die VSA het pas sanksies teen Kuba opgehef, “omdat dit nie werk nie”.

Israel se diplomatieke krisis verdiep

Verskeie diplomatieke krisisse het Woensdag saamgevloei om Israel se penarie te verdiep. ‘n Vergadering van die Geneefse Konvensie se ondertekenaars, ‘n beslissing van die EU se Hof van Justisie oor Hamas, ‘n EU-parlementsbesluit om Palestynse volkskap te erken, asook die Palestynse druk met ‘n VN-Veiligheidsraad konsepvoorstel om die Israeliese besetting van die Wesoewer binne twee jaar te beëindig.

Israel het die pogings van die Palestyne om ‘n spertyd in te stel vir die beëindiging van Israel se besetting van die Palestynse gebiede as ‘n slenter veroordeel.

Jordanië het die beskrywingspunt amptelik by die VN se Veiligheidsraad namens die Palestyne ingedien.

Dit maak ook voorsiening vir ‘n skietstilstand binne ‘n jaar. Die VSA het reeds aangedui dat hulle nie die beskrywingspunt sal steun nie, maar ontleders meen Israel is op dun ys nadat president Obama intussen aangekondig het dat bande met Kuba herstel sal word.

Die diplomatieke tsoenami wat teen Israel opbou, is deur die voormalige minister van verdediging, Ehud Barak ‘n paar jaar gelede voorspel.

Sedertdien het Israel se internasionale aansien bly taan.

Premier Benjamin Netanyahu se diplomatieke prestasie tydens sy ses jaar word nou ook deur voornemende kiesers veroordeel.

Die meerderheid kiesers wil nie hê hy moet aanbly as premier nie, maar gegewe die afstand en verskille tussen Israel se binnelandse en buitelandse probleme, is daar nie veel kandidate wat die eerste minister se pos wil hê nie.

Die voortsetting van konstruksie in Joodse nedersettings, die behoud van die status quo in die Wesoewer en Gasa, die onwilligheid om ‘n ernstige vredesplan te implementeer en die versuim om die internasionale gemeenskap se ondersteuning te verkry, plaas Israel in ‘n minderwaardige strategiese posisie.

Netanyahu demonstreer ongelukkig dat hy Europa hoegenaamd nie begryp nie. Sy benadering tot die diplomatieke krisis met Frankryk, Brittanje, Duitsland en ander is eenvoudig.

Hy glo Europa word gemotiveer deur Europese leiers se gretigheid om die stemme van die groeiende Moslem-minderheid in te palm deur die bevordering van ‘n pro-Palestynse agenda, terwyl Europese politici presies só ‘n verwikkeling van stemblokke wil vermy.

Daarbenewens, is hy oortuig dat Europa se houding teenoor Israel gebaseer is op diepliggende anti-Semitiese sentimente, wat hom tot histeriese uitbarstings teen Christene aanspoor.

Tuis wil sy kiesers hê hy moet sterk staan teen Hamas, maar Netanyahu verkies eerder om sterk teen Europa te bly uitvaar.

Om regse kiesers se negatiewe gevoelens teen die Franse, die Belge of die Iere aan te wakker, stof hy gereeld die Holocaust af.

En terwyl Europa op die ergste wyse beledig word, kan Netanyahu nie genoeg doen om sy vriendskap en lofprysinge aan die Verenigde State van Amerika op te dra nie.

Meer as 80% van die wêreld se Joodse gemeenskap woon in die VSA en nie in Israel nie, ongetwyfeld een rede vir die Israelse premier se houding.

Hy glo sy Republikeinse bondgenote in die Kongres, AIPAC en die verskillende Joodse organisasies, sowel President Obama se laaste twee jaar sal die voortgesette Amerikaanse veto in die Veiligheidsraad van die VN verseker.

Obama se dramatiese aankondiging Woensdag oor die hernuwing van diplomatieke betrekkinge met Kuba na meer as 50 jaar moet egter as ‘n waarskuwing vir Netanyahu dien dat sy ontleding verkeerd is.

Indië veroordeel terreuraanval in Pakistan

Indië se premier Narendra Modi, sê die land treur oor die slagoffers van ‘n dodelike terroriste-aanval op ‘n skool in Peshawar, Pakistan, waarin meer as 140 mense, insluitend kinders, gedood is.

Modi, sê die land rou oor die dood van 132 kinders en nege volwassenes, wat deur Taliban-militante Dinsdag vermoor is.

“In die nasleep van duistere aanval in Pakistan, ek doen ‘n beroep op skole in Indië om 2 min stilte môre te hou as ‘n gebaar van solidariteit,” het Modi getwiet.

Modi het sy medelye oorgedra aan Pakistanise  premier Nawaz Sharif in ‘n telefoongesprek. “Indië staan stewig by Pakistan in die stryd teen terreur,” het Modi getwiet, en bygevoeg dat sy land enige hulp soos nodig sal voorsien. Hy het verwys na die skoolslagting as “‘n sinnelose daad van onuitspreeklike wreedheid.”

Hy het ook die terroriste-aanval in Sydney, Australië veroordeel.

Die Pakistanse Taliban poog om ‘n kalifaat in die gebied te vestig onder hul beheer in die noordweste van Pakistan.

Drie dae van rou het begin in Pakistan. Sommige van die slagoffers van die aanval, wat wêreldwyd veroordeel is, is Dinsdag begrawe. Die res sal na verwagting Woensdag ter aarde bestel word, volgens AFP.

Intussen het die Suid-Afrikaanse regering die Taliban-aanval as onmenslik en barbaars bestempel.

Die woordvoerder van die departement van internasionale betrekkinge, Clayson Monyela het die aanval skerp veroordeel. Hy sê doelbewuste aanvalle op skole kom neer op misdade teen die mensdom.

Monyela sê Suid-Afrika sal voortgaan om pogings te ondersteun om terrorisme te voorkom. Al ses aanvallers is deur Pakistaanse veiligheidsmagte doodgeskiet.

Die Afgaanse Taliban het intussen die aanval deur die Pakistaanse Taliban veroordeel. Die groep sê die doelbewuste moord op onskuldige mense, kinders en vroue druis in teen die beginsel van Islam wat deur elke Islamitiese party of regering toegepas moet word.