Kategorie: Internasionale nuus

Nuus oor die wêreld buite Suider-Afrika

Brexit-aardbewing tref linkses wêreldwyd

‘n Aardbewing het ons getref en die stof is so dik dat asemhaling onmoontlik is!

Dit was die paniekbevange geweeklaag van Brittanje se linkses en pro-immigrasie eenwêreldaanhangers nadat die Britte vir Brexit gestem het. Die Union Jack (foto bo) sal nie meer in Europa wapper nie.

‘n Meerderheid, meer as 51% het ten gunste van die beëindiging van lidmaatskap van die Europese Unie gestem in Donderdag se referendum. Net meer as 48-persent wou lid van die EU bly.

Slegs Londen, die sentrum van die banke, het gestem om in die EU te bly. Die noorde van Engeland het oorweldigend teen die EU gestem.

Oproepe vir David Cameron om te bedank na die groot nederlaag het reeds opgeklink.

Noord-Ierland en Skotland wat sterk ten gunste van voortgesette EU-lidmaatskap was, sal aanstons verklarings uitreik oor hul strewe om weg te breek uit die Verenigde Koninkryk.

In ‘n referendum wat hy net kon verloor, al wen hy ook, het Cameron sy eie posisie dermate verswak dat hy waarskynlik nie sal kan aanbly as premier nie.

Die nuus is met groot vreugde in Europa deur die onderskeie regse partye van Geert Wilders en Marine Le Pen ontvang.

In Brittanje het Nigel Farage gesê die “oorlog is gevoer teen multinasionale maatskappye, teen die groot handelsbanke, teen groot politiek, teen leuens, misleiding, korrupsie en bedrog”.

Die Britse pond het tot sy laagste vlak sedert 1985 teruggesak. Aandele in Japan het met meer as 3% gedaal en die Nikkei moes sluit. Goud het egter sterk vertoon.

Vroeë aanduidings het reeds getoon dat meer mense, as wat verwag is, ten gunste daarvan is om die EU te verlaat.

Die nuus kom nogtans as ‘n groot skok vir aanhangers van die Nuwe Wêreldorde.

Suid-Afrikaanse ekonome het ook vroeër gewaarsku dat ‘n wegbreekstem verreikende gevolge vir die land se ekonomie sal hê.

Raymond Parsons van die Noordwes Universiteit se Sakeskool sê so ‘n stap sal Suid-Afrika in ‘n tydperk van onsekerheid inlei.

Die Suid-Afrikaanse Reserwebank se swak besluit om rentekoerse te verhoog sal ná hierdie nuus die ekonomie waarskynlik in ‘n resessie dwing.

Brittanje was 43-jaar lank lid van die EU.

President Barack Obama, wat Brittanje aangemoedig het om te “bly” asook die voormalige minister van buitelandse sake Hillary Clinton se stemme is Donderdag uitgedoof.

Slegs Donald Trump het die veldtog om die EU te verlaat gesteun.

Aanvaller in Duitse fliekteater doodgeskiet

‘n Gemaskerde aanvaller is deur die Duitse polisie doodgeskiet nadat hy in ‘n rolprentteaterkompleks in die dorp Viernheim naby Frankfurt op mense losgebrand het.

Die gewapende man het ‘n springstofgordel en handgranaat langs hom gehad. Hy het “gebroke Duits” gepraat. Die owerhede het ‘n nuusstilte oor die besonderhede van die skieter aangekondig.

Talle mense is gewond terwyl ‘n elite reaksie-eenheid Spezialeinsatzkommando (SEK) na die toneel gehaas het. Die hospitaal in Darmstad het ‘n noodtoestand afgekondig.

Volgens die Duitse media het die aanvaller fliekgangers gyselaar gehou en die polisie moes geweld gebruik om in die gebou in te breek. Hy is glo na ‘n geveg met wetstoepassers doodgeskiet.

Ooggetuies sê tussen 50 en ‘n 100 beamptes het op die kompleks toegesak.

Die minister van binnelandse sake van die deelstaat Hessen, Peter Beuth, sê die Duitse polisie se spesiale reaksie-eenheid het die gebied rondom die teaterkompleks kort ná die begin van die voorval afgesper.

‘n Polisiewoordvoerder Bernd Hochstädter het gesê die polisie se operasie het ongeveer drie ure geduur.

Christiane Kobus, ‘n Duitse polisiewoordvoerder, het bevestig dat ‘n “bedreigingsituasie” ontvou het maar geen verdere besonderhede is gegee nie.

Plaaslike mediaverslae sê ‘n gewapende man ten minste een skoot afgevuur, maar volgens die Guardian is vier skote gehoor.

Aanvanklik was daar berigte in die media dat tot 50 mense beseer is tydens die aanval, moontlik weens traangas.

Volgens die nuusagentskap dpa, het die polisie gesê dit is die “individu is deurmekaar”.

Hochstädter het aan die koerant Die Welt gesê: “Ons het geen aanduidings wat die motief kon gewees het nie.”

Duitsland het een van die hoogste hoeveelheid wapens per kop in die wêreld, maar ook een van die laagste geweldsmisdaadkoerse in Europa: ‘n Sterftesyfer van 0,05 per 1000 mense, in vergelyking met 3,34 in die VSA.

Die terreurgroep ISIS het reeds herhaaldelik gewaarsku dat hulle aanvalle in Duitsland beplan.

Ontvoerde Suid-Afrikaner in Nigerië se lot onbekend

‘n Suid-Afrikaner, twee Australiërs en twee Nigerië is volgens AFP in Akpabyuo, Nigerië ontvoer.

Hulle werk almal vir ‘n Australiese myn- en ingenieursmaatskappy.

Twee van die buitelanders wat in Nigerië ontvoer is, het intussen daarin geslaag om te ontsnap.

‘n Voormalige Suid-Afrikaner wat nou in Nieu-Seeland woon, twee Australiërs en twee Nigeriërs is ontvoer nadat die bestuurder van hulle voertuig naby die hoofstad van die Cross River-staat, Calabar, doodgeskiet is.

Dit is nog nie bekend of die oud-Suid-Afrikaner een van die mans is wat ontsnap het nie.

Die mans werk vir Macmahon, in Perth. Die vyf mans is volgens ooggetuies op ‘n boot gelaai.

Luidens ander berigte is sewe mense ontvoer.

Britte stem vandag oor Brexit

Jeremy Corbyn, die leier van Brittanje se opposisie Arbeidersparty, het by ‘n byeenkoms in Manchester weer sy steun vir die veldtog om Brittanje in die Europese te hou, toegesê.

Corbyn en premier David Cameron wil albei hê dat Brittanje in die EU bly, maar Corbyn het onlangs van plan verander nadat hy jare lank gesê het die VK moet uit die EU tree.

Boris Johnson, die flambojante voormalige burgemeester van Londen (foto hierbo), lei die uittogstem om weer beheer te neem van die eilande en soewereiniteit te herstel.

Meer as 12 000 sakeleiers het op die vooraand van die emosioneel uitputtende en sterk betwiste referendum verenig om te waarsku oor die gevolge sou Brittanje wegbreek uit die EU.

Die wêreld se vyfde grootste ekonomie sal ’n gevoelige slag toegedien word indien Brittanje die eerste staat word om in die 60-jarige bestaan van die EU weg te breek het hulle gesê.

EU-leiers het gewaarsku dat daar geen omdraaikans is as die Britte besluit om die 28-lidlande vaarwel te roep nie.

“Uit is uit,” het die hoof van die Europese Kommissie Jean-Claude Juncker in Brussel gesê en dit duidelik gemaak dat enige kanse van ‘n post-referendum heronderhandeling oor Brittanje se lidmaatskap van die EU nie moontlik sal wees nie.

Die Franse president, Francois Hollande het gesê ‘n uittrede deur die Verenigde Koninkryk sal “onomkeerbaar” wees.

Die referendum het kommer oor die hele Europa laat ontstaan dat ‘n Britse onttrekking ‘n domino-effek kan sneller wat die integriteit van die blok dalk kan aantas.

Die EU verkeer reeds onder groot druk weens die Eurosonebeleid en migrasiekrisisse wat deur Duitsland se onbesonne verwelkoming van derdewêreld mense geskep is.

Selfs al is dit bly, sal die status quo nie meer ‘n opsie wees nie, meen leiers.

“Wat ook al sy gevolg gaan wees, moet ons ‘n lang harde kyk na die toekoms van die Unie neem. Ons sou dwaas wees as ons so ‘n waarskuwingsein ïgnoreer soos die Britse referendum,” het die EU-president Donald Tusk vandeesweek gemaan.

Meer as 80% van Amerikaners meen Brittanje behoort uit te tree.

Ryk Hillary kry Donald nie afgeskud nie

Luidens ‘n nuwe verslag wat deur die Amerikaanse Federale Verkiesingskommissie bekendgemaak is, het Hillary byna 10 meer hulpbronne om die presidentsverkiesing aan te pak.

Die kommissie toon aan dat die Demokratiese party se waarskynlike presidentskandidaat Clinton, bykans nege keer meer geld en tien keer meer personeel beskikbaar het vir haar verkiesingsveldtog as haar Republikeinse teenstander, Donald Trump.

Die Trump-veldtog het na bewering aan die einde van Mei net meer as drie miljoen dollar in die bank gehad teenoor Clinton se 26 miljoen dollar.

Trump, wat ‘n sakeman is, het vir ‘n geruime tyd sy eie veldtog gefinansier.

Bernie Sanders, wat die knie moes buig voor Clinton, het $9 miljoen in die bank oor.

Trump het tans minder geld as die veldtogte van Ted Cruz en Ben Carson, wat albei in die vorige maande uit die wedloop moes tree.

Ten spyte van dié geweldige voorsprong kan Clinton dit skynbaar nie regkry om Trump af te skud nie.

Clinton is effens voor Trump in Florida met 8 persentasiepunte, maar die twee is feitlik kop-aan-kop in Pennsylvania en in Ohio, volgens ‘n Quinnipiac-meningspeiling wat Dinsdag vrygestel is.

Clinton is voor Trump met 47% teen 39% in Florida, terwyl albei 40 persent stemme in Ohio trek en sy ‘n klein voorsprong van 42-41 persent in Pennsylvania kon behaal.

Die peiling fokus op die drie belangrikste slagveldstate, omdat geen kandidaat sedert 1960 die presidensiële wedloop gewen het sonder om ten minste twee van die drie deelstate in te palm nie.

Aanslag op Trump se lewe deur Britse burger

‘n Negentienjarige is aangekla vir ‘n poging om ‘n geweer van ‘n polisiebeampte te gryp by ‘n byeenkoms waar Donald Trump in Las Vegas opgetree het.

Hy wou dit vermoedelik gebruik om die Republikeinse presidensiële kandidaat te vermoor.

Volgens ‘n klagte in die Amerikaanse Distrikshof in Nevada Maandag, het Michael Sandford probeer om die beampte te ontwapen by die 18 Junie-saamtrek in die Mystere-teater van die Treasure Island Casino voordat hy oorrompel is.

Daar word beweer dat die jong man, wat ‘n Britse bestuurslisensie besit, ná sy inhegtenisneming gesê het dat hy van Kalifornië gery het na Las Vegas om “Trump te vermoor” en ‘n dag vroeër gaan leer het om te skiet omdat hy nog nooit ‘n wapen voorheen gebruik het nie.

“Sandford het erken dat hy waarskynlik net in staat sou wees om 1 of 2 rondes af te vuur en het gesê hy is daarvan oortuig hy sou deur wetstoepassers doodgemaak word tydens sy aanslag op Trump se lewe,” lui die klagte.

Daar word voorts beweer dat Sandford aan ondersoekbeamptes gesê het dat hy ook kaartjies gekoop vir ‘n saamtrek in Phoenix, waar hy “weer sou probeer om Trump dood te maak” in geval sy plan in Las Vegas misluk.

Sandford is reeds aan die Geheimediens oorhandig en hy is borg geweier.

Las Vegas Now het berig dat Sandford onwettig in die land is en dat sy visum verstryk het. Britse burgers mag slegs korter as 90 dae in die VSA vertoef sonder ‘n visum.

Sandford het ‘n gesprek met ‘n polisiebeampte van Las Vegas, Ameel Jacob, aangeknoop en beweer dat hy ‘n handtekening van Trump wou kry, volgens hofstukke. Hy het toe glo die wapen van dié betrokke beampte gegryp omdat sy veiligheidsknip af was.

Volgens die hofrekords, sal die Amerikaanse Prokureurgeneraal se kantoor die Britse konsulaat van Sandford se arrestasie in kennis stel.

Sandford sal weer in die hof verskyn op 5 Julie na ‘n voorlopige ondersoek.

Hoewel Donald Trump beskerm word deur die Geheimediens, het Politico berig dat Trump sy eie “huursoldate” ontplooi tydens sy saamtrekke. Hierdie private sekuriteitsbeamptes dra gewone klere en lyk soos ondersteuners.

Vroeër Maandag, is Corey Lewandowski, Trump se veldtogbestuurder afgedank. Trump het hom intussen bedank vir sy harde werk.

In sy plek is ‘n gesoute strateeg wat Ronald Reagan aan bewind gebring het aangestel, by name Paul Manafort. Trump ken Manafort al jare lank.

In die laat 1980’s is Manafort se firma gehuur om Jonas Savimbi, leier van die guerrillaleër in Angola te verteenwoordig.

Savimbi het hulp van die Verenigde State van Amerika ontvang. Danksy die werk van Manafort is die Amerikaanse Senaat en Bob Dole oortuig dat die departement van buitelandse sake wapens moet stuur na Savimbi en sy groep.

Volgens Slate, het Manafort het ook gehelp om Savimbi se rol as ‘n vryheidsvegter te belig.

In 2010, het Manafort gedien as raadgewer van Janukowitsj, die Oekraïene se presidensiële kandidaat wat bande met Vladimir Poetin gehad het.

Hy het uiteindelik die verkiesing in 2010 maklik gewen, maar is uit sy amp onthef in 2014 deur ‘n Neocon-putsch.

Bomaanvalle eis lewens van minstens 24 in Afganistan

Meer as 20 mense het reeds die week in afsonderlike bomaanvalle in Afganistan omgekom.

Veertien veiligheidskontrakteurs van Nepal is dood toe die minibus waarin hulle gery het, deur ’n selfmoordbomaanvaller in die Afgaanse hoofstad, Kaboel, aangeval is. Hulle is onder die meer as 20 slagoffers van afsonderlike bomaanvalle gister in die land.

Ure ná die aanval in Kaboel het ’n bom, wat in ’n motorfiets versteek was, die lewens van minstens agt burgerlikes geëis en die lewens van 18 mense in ’n volgepakte mark in die noordelike provinsie, Badakhshan, geneem. Provinsiale woordvoerders het gesê die dodetal kan styg.

Die aanvalle is die jongste in ’n vlaag geweldpleging wat die kollig plaas op die uitdagings wat deur die Afgaanse regering in die gesig gestaar word, terwyl hul Westerse ondersteuners voortgaan om troepe aan die land te onttrek.

Kaboel se polisiehoof, Abdul Rahman Rahimi, sê die selfmoordbomaanvaller in Kaboel het naby ’n kompleks gewag waar veiligheidskontrakteurs tuisgaan en toegeslaan toe hul voertuig deur die vroegoggend spitsverkeer beweeg het.

Die Taliban het op Twitter aanspreeklikheid vir die aanval in Kaboel aanvaar. Daar was egter nie dadelik aanduidings wie vir die aanval in Badakshan verantwoordelik was nie.

Bruin baronnes wil in EU bly oor Brexit se ‘rassisme’

‘n Indiërvrou, die voormalige voorsitster van die Konserwatiewe Party in Brittanje, het midde-in die Brexit-veldtog skielik omgeswaai en van kamp verander oor “rassisme”.

Sayeeda Warsi het voorheen die veldtog om Brittanje aan die Europese Unie (EU) te onttrek (Brexit)gesteun, maar het skielik van plan verander en steun nou die veldtog om Brittanje in die EU te hou.

Sy beskuldig veldtogvoerders wat voorstanders van Brexit is daarvan dat hulle “haat en xenofobie” aanwakker.

Haar beswaar was egter ontdaan van logika: Warsi het gesê gematigde stemme in die “verlaat”-veldtog word uitgedoof. Dit is nie duidelik waarom dit die Brexit-veldtog wat hoofsaaklik op ‘n ekonomiese argument steun, sou diskediteer nie.

Warsi is een van die mees prominente Moslem-politici in Brittanje. Sy sê haar besluit is beïnvloed deur ’n plakkaat waarin ’n skare migrante deur Europa loop met ’n waarskuwing in hoofletters: “Breekpunt.”

Warsi het in ’n onderhoud aan die BBC gesê “dié soort agteraf xenofobiese, rassistiese veldtog kan op die kort termyn polities nuttig en doeltreffend wees, maar dit hou langtermyngevare in wat skade aan gemeenskappe kan berokken.”

Veldtogvoerders vir die “verlaat”-stem sê hulle was verbaas om van haar besluit te hoor, omdat hulle nie daarvan bewus was dat sy eens ’n ondersteuner was nie.

Britte gaan Donderdag stembus toe om in die referendum oor Brittanje se toekoms, binne of buite die EU, te stem.

Morsi ontsnap doodsvonnis na ISIS-dreigemente

Die Turkse ministerie van buitelandse sake het gister skerp gereageer op die lewens­lange vonnis wat die voormalige Egiptiese president, Mohamed Morsi, Saterdag in Kaïro opgelê is.

Ses ander mense, onder wie twee werknemers van Al-Jazeera, wat saam met hom tereg gestaan het, is ter dood veroordeel aangesien hulle na bewering aan spioenasie skuldig is omdat hulle nasionale sekuriteitsdokumente aan dié televisienetwerk in Doha gelek het.

Morsi se bewind is in 2013 deur die weermag omvergewerp en hy is in hegtenis geneem. Die Moslem Broederskapgroep wat hom ondersteun, is terselfdertyd tot ’n terroriste-organisasie verklaar.

“Ons is diep besorg en veroordeel die lewens­lange vonnis wat Egipte se eerste demokratiese verkose president opgelê is. Ons glo hierdie vonnis gaan nie tot vrede en stabiliteit in Egipte bydra nie,” lui ’n verklaring deur dié Turkse ministerie.

Morsi is voorheen tot die dood veroordeel, maar ISIS het gedreig om alle regters in Egipte dood te maak as Morsi die doodsvonnis kry. Hulle het ook intussen verskeie regters vermoor.

Die VSA en die EU het ook destyds die swaar vonnis veroordeel.

ISIS teruggedryf in Libië

Magte wat met Libië se eenheidsregering geallieer is, het Woensdag gesê hulle het ‘n teenaanval deur die Islamitiese Staat (ISIS) in die jihadiste se vesting, Sirte afgeweer.

ISIS het Dinsdag wes van die stad posisies van vegters lojaal aan Libië se regering, met tenks, mortiere en sluip­skutter-geweervuur aangeval wat die steun van die Verenigde Nasies (VN) geniet.

Vyf pro-regeringsvegters is in die aanvalle dood en 37 is gewond.

Lojale magte veg sedert die middel van Mei om ISIS uit Sirte, ongeveer 450 km oos van die hoofstad, Tripoli, te verdryf en het daarin geslaag om beheer oor die stad se hawe en lughawe oor te neem.

Hul vordering is egter teen die einde van verlede week verstadig toe hulle die sentrale en noordelike dele van die stad bereik het, waar ISIS in woongebiede geskuil het.

Die operasie om Sirte te herower, het volgens mediese beamptes reeds die lewens van 145 pro-regeringsvegters geëis en 500 is beseer.

Pro-regeringsmagte sê hulle het ook ‘n nuwe front in die ooste van die stad geopen en val nou teikens in die omgewing van die stad se voormalige konferensiesentrum aan, wat nou deur IS as ‘n krygsveld-hoofkantoor gebruik word.

ISIS het het in 2014 na Libië uitgebrei danksy Moeammar Ghaddafi se bewind in 2011 wat deur Hillary Clinton se toedoen geval het.

Libië se eenheidsregering sukkel om die geweldgeteisterde land te verenig en beheer oor die Noord-Afrikaland te kry.

Clinton-simpatiseerders het intussen toegesien dat ISIS steeds wapens kry in Sirië. Indien Hillary die stryd om die Withuis wen, sal die oorlog in die Midde-Ooste waarskynlik baie warmer word.

Voor 17 Februarie 2011, “Dag van woede,” het Libië ‘n nasionale begrotingsoorskot van 8,7 persent van die BBP in 2010 gehad, met olieproduksie op 1,8 miljoen vate per dag, op koers om sy doelwit van 3 miljoen vate per dag te bereik.

Olieproduksie het met meer as 80 persent gedaal intussen. Agv die revolusie, het die Libiese ekonomie met ‘n geskatte 41,8 persent gekrimp.

Dié mislukte beleid het direk bygedra tot die opkoms van ISIS sowel as die vlugtelingkrisis in Europa.