Suider-Afrika Archives - Page 127 of 888

AP lei heksejag teen Amerikaanse jagters in Zim

‘n Tweede Amerikaner word tans deur die media swartgesmeer oor “onwettige jag” in Zimbabwe.

Danksy ‘n smeerveldtog teen ‘n tweede wit jagter, het Zimbabwe intussen ‘n geleentheid raakgesien om ‘n nuwe anti-wit-veldtog van stapel te stuur.

Zimbabwiese owerhede beskuldig nou ‘n Pennsylvania-dokter dat hy onwettig ‘n leeu in April “vermoor” het.

Dié nuwe heksejag kom nadat ‘n Minnesota-tandarts ‘n leeu by name Cecil vroeg in Julie geskiet het. Die Zimbabwiese bewaringsowerheid sê die tweede Amerikaner het ‘n leeu onwettig met ‘n pyl-en-boog gejag.

Owerhede sê die tweede Amerikaner was in April by ‘n onwettige jagtog in die Hwange Nasionale Park betrokke.

Zimbabwe eis nou ook dat die tandarts, Walter Palmer uitgelewer word.

Die naam van die tweede Amerikaner is dr. Jan Casimir Seski van Murrysville, Pennsylvania, wat glo sonder goedkeuring op grond waar dit nie toegelaat word nie, gejag het.

Die sogenaamde grondeienaar Headman Sibanda is in hegtenis geneem en “help” glo nou die Zimbabwiese polisie.

Seski is ‘n ginekologiese onkoloog by die Allegheny Algemene Hospitaal in Pittsburg. Hy is ook ‘n aktiewe grootwildjagter, volgens safari-ondernemers.

Die Associated Press lei die heksejag teen Seski en het aan die deur van die huis waar Seski woon “gaan klop”.

AP het daarmee die man se woonplek en privaatheid geskend deur dit aan opgesweepte en oningeligte “diere-aktiviste” te openbaar.

Vrae oor miljarde by PRASA

Minstens R4 miljard se besteding by PRASA waaroor daar nou ernstige vrae is, sluit ook ‘n bedrag van R17 miljoen in wat blykbaar uit PRASA se koffers “verdwyn” het.

‘n Voorlopige opsomming van die Passasierspooragentskap van Suid-Afrika se geldsake wys dat die ouditeur-generaal (OG) in die 2014-’15-boekjaar reeds die meer as R17 miljoen wat betaal is vir die “huur” van ’n stuk grond sonder die nodige huurkontrak, opgemerk het.

Dit blyk uit die opsomming, waarvan Beeld ’n afskrif het, dat die OG bedenkinge het oor besteding van sowat R3,9 miljard. Dit sluit onreëlmatige, vrugtelose en verkwiste uitgawes in.

Lucky Montana, voormalige uitvoerende groephoof van PRASA, het nietemin Donderdag in ’n verklaring gesê sy beleid was “geen korrupsie nie met my aan die stuur”.

’n Stuk grond naby Nigel is vir die oprigting van ‘n passasierstreinvervaardigingsaanleg opsy gesit. Dit is deel van ’n R51 miljard-kontrak wat PRASA aan die Gibela-konsortium van die Franse vervaardiger Alstom toegeken het.

Die Ekurhuleni-metroraad het egter bevestig hy het nog nie ’n sent huurgeld van PRASA gekry nie.

Luidens ’n afskrif van ’n dokument wat die metro se eiendomsafdeling opgestel het, moet Gibela ná die eerste twee jaar R78 900 per maand (sowat R950 000 per jaar) daarvoor betaal.

Dit is dus nie duidelik hoekom PRASA reeds R17 miljoen vir die grond betaal het nie of waarheen die geld is nie.

Die OG-opsomming wys ook PRASA het nie ’n beheerliggaam aangestel het oor die tenderproses waarin Gibela die R51 miljard-kontrak gekry het nie, al vereis die tesourie dit.

In 2013, kort nadat Gibela dié kontrak ontvang het, het Montana in media-onderhoude gesê ’n ouditeursfirma wat deur PRASA aangestel is, het bevind die tenderproses het glo sonder korrupsie geskied.

Gewapende rowers skiet bejaarde in maag

‘n 63-Jarige vrou is in ‘n kritieke toestand nadat sy Woensdag buite ‘n huis deur gewapende swart rowers in die maag geskiet is.

‘n Motoris, (40) wat verby die huis gery het en haar te hulp gesnel het is in die been gewond.

Die voorval het ongeveer 1.25nm te McCullem Straat , Brakpan-Noord plaasgevind.

Volledige detail is nog nie beskikbaar nie.

Volgens kapt Joep Joubert, woordvoerder van die Brakpan SAPD, het die man verby die huis gery toe hy gesien het dat die vrou in die moeilikheid was.

Hy het verskeie skote op die rowers geskiet. Hy is deur een van die mans in die been geskiet.

Die twee booswigte kon daarin slaag om in hul silwer/grys BMW weg te jaag.

Bron: Brakpan Herald

Eise teen SAPD kos belastingbetalers R860 miljoen

Belastingbetalers moes die afgelope ses jaar al meer as R860 miljoen opdok vir siviele eise teen lede van die Suid-Afrikaanse Polisiediens (SAPD).

As die skikkingsooreenkomste wat die SAPD sedert 2011 aangegaan het ook bygereken word, styg die bedrag tot meer as R1,04 miljard.

In 2009 is slegs sowat R80 miljoen vir sulke eise uitbetaal, het Netwerk24 berig.

Gareth Newham, senior navorser van die Instituut vir Sekerheidstudie, het aan Netwerk24 gesê die stygende eisuitbetalings toon dat siviele eise gewilder is by die publiek eerder as om by die onafhanklike polisie-ondersoekdirektoraat (Opod) te gaan kla waar ondersoeke lank kan sloer.

Die SAPD se jaarlikse gebeurlikheidsbegroting vir siviele eise wat moontlik nog in die toekoms ingestel kan word, het in die afgelope boekjaar meer as R312 miljard beloop.

Die SAPD se jaarverslae en parlementêre antwoorde van Nathi Nhleko, minister van polisie, wys voorts die polisie het in die 2009-’10-boekjaar regskoste betaal van sowat R89 miljoen.

Teen Maart vanjaar was die bedrag reeds ‘n yslike R278 miljoen.

Die jaarverslae wys ook die meeste van die eise wat teen die polisie ingestel is, was weens algemene polisie-optrede wat byvoorbeeld gedrag tydens inhegtenisnemings insluit, skietvoorvalle en motorongelukke.

In 2012 is berig ’n interne SAPD-oudit het gewys meer as 27 000 polisielede uit nagenoeg 157 000 wat toetse afgelê het om vuurwapens te hanteer, het gedruip.

In die 2010-’11-boekjaar toe die rybewysvereiste vir nuwe rekrute geskrap is, was dié eisuitbetalings nagenoeg R10 miljoen. Dié vereiste is intussen heringestel weens die groot eisuitbetalings agv motorongelukke.

Die SAPD se jaarverslag vir die 2011-’12-boekjaar het gewys van die grootste eisuitbetalings (R12,7 miljoen) was weens skietvoorvalle.

Daar is vandag 1 448 veroordeelde misdadigers wat in die polisiemag dien.

Senior ANC-lid pleit vir boendoegereg voor sy eie vonnis

Ten minste een lid van die ANC se uitvoerende komitee in die Wes-Kaap is keelvol vir misdaad, alhoewel hyself met die gereg gebots het.

Andile Lili meen misdadigers moet “onmiddellik en gewelddadig” doodgemaak word in boendoeverhore.

Hy het die uitlating Dinsdag voor die landdroshof in Bellville gemaak waar hy aanstons gevonnis sal word weens ’n oortreding van die Burgerlugvaartwet.

Lili en nog agt mense was twee jaar gelede betrokke by ’n voorval waar mense-ontlasting by die Kaapstadse Lughawe uitgekeer is.

Die hofverrigtinge is egter uitgestel.

Lili het ‘n skare opgesweep oor die land se onvoldoende regstelsel. Talle misdadigers wat gearresteer word, word deur die regstelsel vrygelaat, het hy gesê. “Die enigste ding wat ons kan doen, is om ’n misdadiger dadelik dood te maak wanneer ons hom vind.

“Ons moet hulle doodmaak, kamerade! Ons bevry ons van misdadigers. Die polisie probeer, maar die regstelsel laat ons in die steek.”

Obama, VN waarsku teen terreur en burgeroorlog

Pres. Barack Obama sê die bomaanval op Somalië se hoofstad is ’n wekroep dat terreurgroepe soos Al-Sjabaab niks anders as verwoesting aan te bied het nie en gestop moet word.

Obama het tydens ’n gesamentlike nuuskonferensie met eerste minister Hailemariam Desalegn in Addis Abeba, Ethiopië, gepraat. Hy sê Amerika en ander lande moet die druk op groepe soos Al-Sjabaab volhou.

Obama sê Al-Sjabaab is ’n ernstige bedreiging vir Ethiopië.

Dié Oos-Afrikaland is ’n vennoot van Amerika in die stryd teen terrorisme en deel inligting met Amerikaanse afgevaardigdes. Amerika het ook troepe gestuur om Somalië by te staan om die onstabiliteit in die land die hoof te bied.

Die Verenigde Nasies (VN) se hoof van bystand, Stephen O’Brien, het intussen gewaarsku oor die verwoestende gevolge vir burgerlikes in Suid-Soedan ná 19 maande se burgeroorlog wat deur gruweldade gekenmerk is.

O’Brien was op ’n vierdaagse besoek om “eerstehands die gevolge van die konflik en die pogings wat deur sy bystandsorganisasie aangewend word” in reaksie op die toenemende behoeftes waar te neem.

Volgens ’n VN-verslag is hongersnood aan die toeneem.

Byna 70 persent van die land se bevolking, oftewel 7,9 miljoen van die 11,6 miljoen inwoners, staar voedselonsekerheid in die gesig.

LUR dagvaar koerant vir naamskending

Die voormalige Vrystaatse LUR van Sport, Kuns en Kultuur, Dan Kgothule, dagvaar die Vrystaatse koerant, The Weekly, vir R250 000 vir naamskending.

Dit nadat dié weeklikse koerant tydens Kgothule se termyn, in ‘n artikel in Augustus 2010, berig het dat sy senior personeel oor sy gedrag kla; ook dat Macufe onder sy leierskap geen wins toon nie en dat Pacofs in chaos gedompel is.

Premier Ace Magashule het Kgothule verlede jaar die trekpas gegee.

Sy regsverteenwoordiger, Hennie Stander, sê Kgothule wil met die hofsaak sy eer en waardigheid herwin.

Die saak dien voor regter Albert Kruger in die hooggeregshof in Bloemfontein en is vir drie dae op die rol geplaas.

Kgothule het vanoggend aan die hof gesê dat hy tans werkloos is terwyl hy sy studies voortsit by Kovsies en die SUT.

Deneysville-inwoner sink in riool weg

‘n Swart inwoner van Deneysville se lokasie, Johannes Tlali sê die stank wat hom elke oggend groet as hy sy voordeur oopmaak, is ondraaglik.

Rou riool is al reeds sedert Oktober verlede jaar besig om by sy voordeur op te dam.

Hy het aan OFM-nuus se Cathy Dlodlo gesê dat beloftes deur die munisipaliteit om sy probleem op te los tot vandag toe nog nie nagekom is nie.

Tlali sê dit is nie eers moontlik om ‘n paar mieliepitte in die grond te sit nie, want sy voor- en agterstoep is deurdrenk met rou riool.

Die rou vuil lek glo ook direk in die Vaaldam.

Metsimaholo-munisipaliteit wil glo ‘n pyplyn bou wat rou riool sal pomp uit Refenkgotso na die Vaaldam in ‘n poging om druk te verlig op die nie-funksionerende rioolaanleg in die dorp.

Die munisipaliteit se beplande rietfilterprojek in die middel van Deneysville is met teenkanting van die gemeenskap begroet, waarna daar besluit is op die pyplyn.

Krieketreus groet, Tutu weer in hospitaal

Clive Rice, oudkrieketkaptein van Suid-Afrika en Transvaal is Dinsdag oorlede.

Die 66-jarige Rice is in Maart in Indië geopereer om ‘n gewas in sy brein te verwyder. ‘n Neurochirurg in Suid-Afrika het hom egter met sy terugkeer ingelig dat daar niks meer is wat hulle vir hom kan doen nie.

Die Krieketraad se uitvoerende hoof, David Richardson, sê Rice was een van krieket se grotes en een van die beste veelsydige spelers wat die spel opgelewer het.

Rice het nie doekies omgedraai oor die afgelope drie dekades se leuens, dubbele standaarde en omgekeerde rassisme in die land nie.

Hy het vir opslae gesorg in 2004 toe hy gesê het raspolitiek in sport sleep die land af na die vlak van Zimbabwe.

Rice, beroof van ‘n speelkans weens die isolasie van Suid-Afrika se toetskrieket, het gesê wit spelers word uit die land gedryf in groot getalle want “hier geen toekoms nie”.

Intussen is die Anglikaanse aartsbiskop Desmond Tutu, 83, weer in die hospitaal opgeneem, ‘n week nadat hy ontslaan is.

Hy is verlede Dinsdag uit die hospitaal ontslaan nadat hy vir ‘n longaandoening behandel is. Sy dokters het dit egter nodig geag om hom weer in die hospitaal op te neem vir waarneming.

Sy toestand hou glo nie verband hou met sy behandeling vir prostaatkanker nie. Sy onkoloog het gesê sy antigeenvlakke is beveredigend.

Dit is nie duidelik of die jongste behandeling om longinfeksie te behandel ‘n sukses was nie.

Bekende Windhoeker in plaasaanval doodgeskiet

Die 76-jarige mnr. Gerald Leitner is Vrydag op sy plaas in die Hochfeld-omgewing sowat 76 km buite Okahandja deur vyf verdagtes aangeval en doodgeskiet.

Die Republikein berig dat niemand nog in verband met sy dood in hegtenis geneem nie.

Volgens die skakelbeampte van die Namibiese polisie, insp. Pendukeni Haikali, het rowers Woensdag verlede week probeer om by Leitner in te breek. Hy het op hulle losgebrand en die verdagtes het in ‘n voertuig op die vlug geslaan.

Leitner het dit by die polisie aangemeld wat ‘n ondersoek na die voorval gedoen het. Volgens Haikali het Leitner egter geen klag gelê nie en is dié saak afgehandel.

Vrydag omstreeks 19:00 het vyf mans na die plaas teruggekeer en vyf keer met ‘n .45-pistool op Leitner losgebrand.

Een van die koeëls het hom deur die hart getref en hy is op die toneel dood. Die verdagtes het ‘n vuurwapen en kontant gesteel, voordat hulle in hul eie voertuig gevlug het.

Leitner het ‘n ruk gelede sy juwelierswinkel in Windhoek verkoop en plaas toe getrek om voltyds te boer. Sy dogter, me. Sabine Gamma, was gister te geskok om enige kommentaar oor haar pa se dood te lewer.

Intussen is ‘n grondkrisis in Namibië afgeweer nadat vergadering tussen ’n regeringsafvaardiging en nege lede van die Regstellende Herposisionering-beweging (AR) wat vroeër die trekpas uit Swapo gekry het.

Die vergadering het op versoek van die president Hage Geingob plaasgevind.

Volgens ’n gesamentlike verklaring wat ná afloop van die onderhandelinge uitgereik is, sal ’n reuse- nasionale projek onderneem word wat op die toekenning van stedelike en dorpsgrond gemik is. Dit is in pas met die “oorlog teen armoede” wat Geingob in sy inhuldigingsrede aangekondig het.

Die regering sal voorts begin om 200 000 erwe landswyd te diens. Windhoek, Walvisbaai en Oshakati is vir ’n aanvanklike loodsprojek geïdentifiseer. Die tydperk tussen 29 Julie en 5 Augustus sal aan die skoonmaak van geïdentifiseerde stedelike en dorpsgrond gewy word. Hierdie geïdentifiseerde grond sal gediens word en later aan begunstigdes toegeken word.

Ingevolge die projek om stedelike en dorpsgrond op ’n grootskaalse grondslag te diens, sal Namibiërs gevra word om op ’n vrywilliger grondslag deel te neem in die diens van geïdentifiseerde grond.