Die dorp Reddersburg het hom van ANC-politici bevry en inwoners verskaf nou self hul eie dienste aan blank en swart, soos wat mnr. Jaap Kelder in dié video verduidelik. Dit volg nadat die Kopanong-munisipaliteit weens wanbestuur onder administrasie geplaas is. Inwoners onthou wettiglik betalings aan die munisipaliteit en bedryf hul eie alternatief.
Tag: riool
-
Riool tas plakkers se ‘menseregte’ aan sê DA
Verskeie swart gesinne in Ikageng, naby Potchefstroom in Noordwes, woon al maande lank kniediep in onverwerkte riool wat in en om hul huise loop.
Nou gaan ‘n wit raadslid van die DA hulle bystaan, want self doen die mense niks daaroor nie. Die Demokratiese Alliansie in Noordwes het Dinsdag aan OFM-nuus bevestig dat die party van voorneme is om ‘n klag teen die munisipale bestuurder by die Suid-Afrikaanse Menseregtekommissie, sowel as ‘n kriminele klag by die polisie, in te dien.
Die DA beskou dit as ‘n “ernstige menseregteskending”, en dat die situasie ernstige mediese implikasies inhou vir diegene wat gedwing word om onder hierdie omstandighede te leef.
“Ons het klagtes uit die gemeenskap ontvang – spesifiek Uitbreiding 11 in Ikageng – dat hulle al sedert Desember in riool sit. Die mense se huise is omring deur riool, as gevolg van rioolpype wat nie skoongemaak word nie. Hul klagtes val op dowe ore by die munisipaliteit. Hul kinders het al veluitslae; van hulle kan nie meer in hul huise leef nie; en ons het besluit om hierdie [saak] na die Menseregtekommissie te verwys,” sê die raadslid.
-
Massiewe rioolstorting: Openbare Werke ontken aanspreeklikheid
Die nasionale Departement van Openbare Werke het hul aanspreeklikheid ontken vir die rioolbesoedeling van die Hartbeespoortdam na ‘n reusestorting van menslike afval.
In ‘n verslag in die Pretoria News word beweer dat die dam onaanvaarbare vlakke van besoedeling oor ‘n paar jaar sal bereik as niks gedoen word met dringendheid nie.
Die dam het ‘n massiewe probleem met rioolbesoedeling wat ontstaan het uit die Noordelike Werke se afvalwatersuiweringsinstallasie, geleë naby die Fourways/Diepsloot gebiede in die noorde van Johannesburg.
Die departement se woordvoerder het gesê die departement het van berigte in die media kennis geneem in verband met die besoedeling van die Jukskeirivier, wat op sy beurt uiteindelik na die Hartbeespoortdam vloei.
Verlede week, volgens die nuusverslag, die aanleg miljoene liter onbehandelde riool in die Jukskeirivier vrygestel.
Die rioolstortings voer af in die Jukskei, wat aansluit by die Krokodilrivier en dan in die Hartbeespoortdam invloei.
Benewens die stortings uit Noord-Werke, is daar nog meer besoedeling afkomstig van pompstasies, mangate en rioolaanlegte in die rivier.
Joburg Water, ‘n entiteit van die Stad van Johannesburg, het ‘n munisipale afvoerrioolpyplyn wat die Leeuwkop-gevangenis perseel kruis, wat parallel met die Jukskeirivier loop.
“Een van die afvoerrioolpyplyne is buite werking gestel weens blokkasies in die pyp. Dit het tot gevolg gehad dat stortings in die Jukskeirivier,” het die woordvoerder gesê.
Hy het gesê departementele tegniese kenners is op die perseel en het ‘n aantal aanbevelings gemaak.
Intussen het sake-ondernemings by Hartbeespoortdam gesê hulle vrees dat hulle inkomste gaan verloor weens die besmette water by dié dorp in Noordwes wat ‘n groot aantal toeriste lok.
Die Departement van Water en Sanitasie het vroeër bevestig dat die E-coli-bakterie in die dam se water opgespoor is wat tot siektes in mense kan lei.
Die besmetting is veroorsaak deur afval van verskeie watersuiweringsaanlegte. Die voorsitter van die Hartbeespoortdam Toerismevereniging, Ian Gunn, sê sake-ondernemings in die gasvryheidsbedryf in die omgewing het reeds kansellasies op vooraf besprekings ontvang.
-
Senekal: Lokasiebewoners drink riool weens waternood
Terwyl dele van die land toenemend onder waterbeperkings gebuk gaan met die droogtekrisis wat vererger, het die gemeenskap van Senekal in die Vrystaat reeds vir weke al geen watertoevoer nie.
Die situasie het so drasties geraak, dat verslae van lokasiebewoners wat rou rioolwater drink na vore gekom het.
Die uitwerking van die droogte het selfs daartoe gelei dat ‘n boer glo selfmoord gepleeg het.
Volgens waarnemers baklei lokasiebewoners nou oor water en jaag diere weg van drinkwater om hul dors te les.
Die waternood is besig om te vererger, met boorgate en krane wat heeltemal opdroog het. Die regering doen ook nie veel om inwoners by te staan nie.
Die Setsoto Munisipaliteit, wat verantwoordelik is vir Senekal en die omliggende gebied, het nie gereageer op navrae oor die droogte nie.
Boere in die gebied het water uit hul boorgate aan die lokasie voorsien, maar hulle sê hulle sal dit nie kan volhou nie, aangesien talle boorgate reeds opgedroog het.
-
Rou riool vloei deur droogtegeteisterde dorp
Die Mohokare-munisipaliteit in die Vrystaat, wat Smithfield en Zastron insluit, word geteister deur rou riool in die waterkanaal wat in Generaal Hertzogstraat in Smithfield ingeloop het.
Munisipale woordvoerder, Lehlonolo Mafatman, sê hoewel die rioolstelsel herstel word, is daar steeds ‘n krisis met lopende water, maar dit sal die week aandag geniet.
Smithfield gaan gebuk onder ‘n algemene watertekort weens die droogte. Riool het die laaste twee weke in die kanaal beland as gevolg van swak bestuur wat nou aan ‘n “blokkasie” toegeskryf word.
Agt plaaslike munisipaliteite in die Vrystaat se drinkwater-voorsieningstelsels het tans dringend aandag nodig.
Die nasionale departement van waterwese en sanitasie sal onverwyld moet ingryp om krisisse soos in Smithfield die hoof te bied.
Minister Nomvula Mokonyane het in antwoord op ‘n vraag in die parlement gesê ‘n lys van 250 plaaslike munisipaliteite landswyd– wat dringende watervoorsieningsprobleme ondervind – is saamgestel.
Verskeie van die dorpe in die Vrystaat wat reeds vir dae sonder water is as gevolg van die knellende droogte en verouderde infrastruktuur, vorm nie deel van die agt munisipaliteite nie.
Vrystaat premier Ace Magashule het die provinsie maande gelede tot rampgebied weens die droogte verklaar.
Mokonyane sê haar departement het begin om inspeksies by munisipaliteite landswyd uit te voer om die omvang van die probleem vas te stel en ‘n taakspan is reeds in sommige provinsies saamgestel om waterprobleme aan te spreek.
Intussen het haar departement ‘n ooreenkoms met die Deense regering gesluit in ‘n poging om die waterkrisis in die land op te los. Sy sê ingevolge die ooreenkoms gaan daar dringend gekyk word na ‘n langtermynoplossing.
Dit is nie duidelik hoe die Denemarke bevoeg is om ‘n droogteprobleem op te los binne die konteks van voortslepende wanbestuur en korrupsie nie.
-
Deneysville-inwoner sink in riool weg
‘n Swart inwoner van Deneysville se lokasie, Johannes Tlali sê die stank wat hom elke oggend groet as hy sy voordeur oopmaak, is ondraaglik.
Rou riool is al reeds sedert Oktober verlede jaar besig om by sy voordeur op te dam.
Hy het aan OFM-nuus se Cathy Dlodlo gesê dat beloftes deur die munisipaliteit om sy probleem op te los tot vandag toe nog nie nagekom is nie.
Tlali sê dit is nie eers moontlik om ‘n paar mieliepitte in die grond te sit nie, want sy voor- en agterstoep is deurdrenk met rou riool.
Die rou vuil lek glo ook direk in die Vaaldam.
Metsimaholo-munisipaliteit wil glo ‘n pyplyn bou wat rou riool sal pomp uit Refenkgotso na die Vaaldam in ‘n poging om druk te verlig op die nie-funksionerende rioolaanleg in die dorp.
Die munisipaliteit se beplande rietfilterprojek in die middel van Deneysville is met teenkanting van die gemeenskap begroet, waarna daar besluit is op die pyplyn.
-
Onverwerkte riool spoel in Vaalrivier
Die Matlosana-munisipaliteit by Stilfontein is glo besig om die Vaalrivier te besoedel met onverwerkte riool.
Die rioolstelsel in Stilfontein is gebrekkig, of werk glad nie, en onverwerkte riool spoel in die Koekemoerspruit in wat direk in die Vaalrivier vloei.
‘n Klag is glo reeds by die Groen Skerpioene gelê.
Die ANC-beheerde munisipaliteit se verantwoordelikheid om skaars waterbronne te beskerm, moet ‘n prioriteit wees het opposisiepartye gesê.
Daar bestaan tans ‘n gesondheidsrisiko vir gebruikers van Vaalrivierwater.
-
Vaalrivier vrot van die riool wat marxistiese ‘Emfuleni’ daarin stort
Die marxisties getransformeerde stadsraad van “Emfuleni” wat dorpe langs die Vaalrivier insluit, is besig om rou riool in die Vaalrivier te stort. Die E.coli-telling het reeds tot 77 000 eenhede per 100 ml water gestyg.
‘Emfuleni’ sluit die drie dorpe in die Vaaldriehoek, Vereeniging, Vanderbijlpark en Sasolburg in. Maar dit bevat ook Sharpeville waar betogers in 1960 deur die polisie doodgeskiet is en wat agterna deur die twee kommunistiese leiers, Joe Slovo en Ruth First, aangegryp is om ‘n propagandaveldtog teen die destydse regering te voer. Die huidige Suid-Afrikaanse grondwet is ook te Sharpeville onderteken.
‘n Afgetrede akademikus op Vanderbijlpark met wie praag gesels het, beweer dat “die Suid-Afrikaanse Kommunisteparty met ‘n biologiese oorlog teen ons besig is. Hulle besmet ons met kieme sodat ons kan siek word en doodgaan. Dis doelbewus. Die revolusionêre kaders wat Emfuleni beheer, ignoreer selfs hofbevele en hou aan om tonne en tonne riool in die Vaalrivier te stort. Dit gaan die hele Gauteng vergiftig.”
Omdat die departement van waterwese insgelyks onder beheer van die ANC-Kommunisteparty verkeer, staan die departement ook opsy terwyl die riool in die rivier inloop. ‘n Woordvoerder van die party, wat blykbaar in die destyds kommunistiese Oos-Europa opleiding in biologiese oorlogvoering ontvang het, Sputnik Ratau, het gesê sy departement “praat nie graag met die mediaverteenwoordigers van die reaksionêre en rassistiese magte nie”. Sputnik is vernoem na die trots van die destydse kommunistiese USSR, die eerste satelliet met daardie naam wat die ruimte ingestuur is.
Elise Tempelhoff, ‘n omgewingsverslaggeefster, berig dat “vlieghengelaars woedend is” omdat alle lewende wesens in die water deur die bakterieë gedood word.
In die voormalige kommunistiese Oos-Europa is grootskaalse omgewingskade aangerig. Met die hereniging van Duitsland moes die Duitse regering miljarde euro aan die herstel van die omgewing in “demokratiese” Oos-Duitsland bestee omdat omgewingsbesoedeling en die vergiftiging van mense hand aan hand met die kommunistiese ideologie. Vyandelike klasse en etniese groepe kan ook met wapens van massavernietiging aangeval word. Soos wat Suid-Afrika onder kommunisme “transformeer”, gebeur dieselfde.
‘n Woordvoerder van ‘n aksiegroep, Save our Vaal Environment, wat teen die besoedeling gekant is, het reeds ses hooggeregshofbevele teen Emfuleni verkry, maar die munisipale boboustruktuur ignoreer dit, aangesien “die vereistes van die klassestryd bo die omgewing in die dialektiese rangorde verkeer”. (Volgens Karl Marx se ideologie, bepaal die “onderbou” of die ekonomie, die “bobou” of politiek, daarom staan Emfuleni as ‘n “munisipale boboustruktuur” bekend.)
Die meeste van die hooggeregshofbevele gaan oor die herstel van rioolpype. Die Hooggeregshof van Gauteng, Johannesburgse plaaslike afdeling, het Emfuleni ook verbied om voort te gaan met sy biologiese planne om die hele Vaalrivier vol bakterieë te stort. Die hof het bepaal dat geen riool verder in die Vaal gestort mag word nie.
Desnieteenstaande gaan Emfuleni voort, want binne die Kommunisteparty word gevoel dat die howe aan die politieke mag ondergeskik moet wees en word hofuitsprake dus nie meer as bindend geag nie. Navrae aan Randwater is ook na die politieke kommissarisse by die departement van waterwese verwys en dié maatskappy staan magteloos teenoor die politburo van die Kommunisteparty wat besig is om alle mag in sy hande te konsentreer.
Emfuleni is besig om ekstra riool vir sy besoedelingsprogram te produseer. Sputnik Ratau het gesê dat “die apartheidsbewind sy program van rassesuiwerheid ook op water van toepassing gemaak het en nou sal vóél wat ons daarvan dink”. Die “apartheidsinstallasie” soos daarna verwys word, is destyds ontwerp om 7 megaliter rioolwater per dag te suiwer. Met die ekstra rioolproduksie waarop Emfuleni besluit het, vloei daar tans 47 megaliter rioolwater per dag deur die gebied en verhoog die bakterielading aanmekaar.
Die mediawoordvoerder van Emfuleni, Klaas Mofomme, het na bewering gesê dat “alle vorme van suiwerheid in die gebied uitgewis sal word ten einde ‘n totale transformasie van die samelewing te bewerkstellig. Voordat die nuwe tyd aanbreek, moet ons eers alles wat oud is tot in die grond afbreek”. Pogings om mnr. Mofomme te kry om dié bewering te bevestig, het tot dusver misluk, aangesien hy geen van sy telefone beantwoord nie. -
‘Alles wat ek gebou het gaan tot niet’
Onbehandelde riool stroom by Kroonstad in die Valsrivier in, alhoewel daar so onlangs as in 2008 R8 miljoen aan die rioolaanleg bestee is.
‘n Opposisieraadslid het tydens die Moqhaka-raadsvergadering die munisipaliteit gewaarsku oor die skokkende verval van die waterinfrastruktuur.
Die raadslid, ‘n voormalige stadsingenieur, het gesê die Kroonstad-rioolsuiweringsaanleg het heeltemal tot stilstand gekom.
Thys Vermeulen het aan die Volksblad gesê: “Die water staan stil. Dit stroom net so onbehandel die rivier in.”
Ongesuiwerde rioolwater het ook die netwerk van ondergrondse waterpype besmet wat gebruik kan word om parke, skole en sportterreine nat te lei.
Hy het ook gesê die rekenpligtige amptenaar van die munisipaliteit moet vir die storting van riool in die rivier vervolg word.
“Dit is nie vir my lekker as ek sien hoe alles wat ek gebou het, tot niet gaan nie.”
-
Watermonsters by Bloemhof toon nalatige rioolbesmetting
Uitslae van toetse op watermonsters wat by Bloemhof in Noordwes ingesamel is, toon dat die munisipaliteit nalatig was toe drinkwater met riool besmet is.
Die burgerregte-groep AfriForum het die toetse aangevra nadat drie babas dood is weens die vuil water.
Die toetse het bevestig dat die water uit die Vaalrivier besmet was.
AfriForum het die onafhanklike toetse gedoen nadat ‘n rioolstorting ‘n uitbraak van diaree tot gevolg gehad het.
Die drie babas is dood aan ontwatering nadat hulle diaree opgedoen het.
AfriForum se hoof van omgewingsake, Julius Kleynhans sê die watermonsters het getoon dat onbehandelde riool in die rivier gestort word, wat ‘n misdryf is.
Volgens Kleynhans het die plaaslike gemeenskap kriminele klagte teen die voormalige munisipale bestuurder ingedien oor die babasterftes.
-
Riool in Milnertonstrandmeer gestort
Milnertonstrandmeer ’n Gebarste pyp het veroorsaak dat riool in die Milnerton-strandmeergebied gestort het.
“Die stad Kaapstad se departement van water en sanitasie werk onverpoosd om die rioolpyp, wat afvalwater na die Koeberg-pompstasie neem, te herstel,” sê die betrokke burgemeesterkomiteelid, Ernest Sonnenberg.
Die stormwaterkanaal het die gebied ná swaar reën oorstroom.
Sonnenberg sê verskeie pogings – soos ensiembehandeling – word aangewend om die uitwerking van die storting te beperk.
Alle ontspanningsbedrywighede word tot verdere kennisgewing in die gebied verbied. – Sapa
-
Brits en Hartebeespoort se water te gevaarlik om te drink
Gevaarlike bakterieë in die water verhoed inwoners van Brits en Hartbeespoort om kraanwater te drink.
Die plaaslike Madibeng-munisipaliteit gewaarsku dat kraanwater gekook moet word voor gebruik..
Volgens Beeld toon die uitslag van toetse op vier watermonsters wat in Brits geneem is, dat sekere bronne glad nie geskik is vir mens óf dier nie.
Die watermonsters is volgens die koerant getoets in ’n onafhanklike ontleding wat Brits se vereniging van besorgde belastingbetalers (Corpa) laat doen het.
Corpa-voorsitter, Jaco Dercksen, het gesê ’n watermonster het positief getoets vir toksigeniese Vibrio cholerae, wat cholera veroorsaak.
-
Hartebeespoortdam loop tans vol riool
Rioolafval van miljoene liter van die Madibeng-munisipaliteit stroom al sowat ’n maand lank elke dag in die Hartbeespoortdam luidens ‘n berig in Beeld.
Madibeng sluit Brits, Hartbeespoort, Mothlutlung, Damonsville en Letlhabile in waar ‘n groot aantal pompe buite werking is en die water ná uitgebreide toetse onrusbarend hoë E. coli-tellings wys.
Strafregtelike klagtes ingevolge die Waterwet is teen die aanspreeklike munisipaleit ingedien.
Patrick Morathi, munisipale woordvoerder, het aan die dagblad gesê ’n vergadering is met amptenare van waterwese en lede van die Hartbeespoort-gemeenskapsforum gehou en ’n tekort aan geld is as een van die grootste struikelblokke geïdentifiseer.