Die polisie is op ‘n hoë gereedheidsgrondslag geplaas nadat oproer in Khutsong uitgebreek het. Inwoners steek polisievoertuie onder klippe en van die voertuie is beskadig.
Die situasie in die gebied is gespanne nadat lede van die gemeenskap lewendig verbrand is na boendoehofuitsprake. Die dodetal het intussen gestyg na ses.
Die waarnemende Gautengse provinsiale polisiekommissaris het die gemeenskap van Khutsong aan die verre Wes-Rand gevra om enige inligting aan die polisie te verskaf oor bendebedrywighede in die gebied.
Kommissaris Lesetja Mothiba het inwoners gevra om nie die reg in eie hande te neem nie nadat geweldadige botsings oor bendebedrywighede tot die aanvanklike dood van vyf mense gelei en verskeie beseer is.
Die geweld het uitgebreek na ‘n vergadering oor bendebedrywighede.
‘n Groep mense is na die huis van ‘n toordokter van 61. Hulle het hom en sy huis aan die brand gesteek waarna splintergroepe toe na bendelede in die gebied gaan soek het en nog twee mans aan die brand gesteek het.
Ander twee vermeende bendelede is met klippe bestook.
Ontstoke inwoners van Bekkersdal aan die Verre Wes-Rand dreig met anargie nadat die ANC gesê het hulle het nie inwoners se “vuil stemme” nodig nie.
Samesprekings met die minister van Samewerkende Regering en Tradisionele Sake, Lechesa Tsenoli het in duie gestort.
Verteenwoordigers het Sondag uit die samesprekings gestap nadat hulle sowat agt ure lank geredekawel het.
Die samesprekings het gevolg na dae van gewelddadige betogings in die gebied waarin een persoon dood is.
Inwoners eis onder meer die skorsing van die burgemeester en raadslede van die gebied en vra dat die munisipaliteit onder administrasie geplaas word.
Tsenoli sê die munisipaliteit kan nie sonder konkrete redes onder administrasie geplaas word nie, maar dat daar onmiddellik opgetree sal word indien bewys kan word dat die burgemeester en raadslede korrup en onbevoeg is.
Maar Bekkersdal was nie in die bui vir die ANC se pogings om hulle te paai nie.
Die gemeenskap het opstandig geraak ná ‘n ernstige teregwysing van die Gautengse provinsiale leier Nomvula Mokonyane oor hul oproerigheid. “Mense ons kan dreig en sê dat hulle nie sal stem nie, maar die ANC het nie hulle vuil stemme nodig nie,” het sy glo aan hulle gesê.
Die Bekkersdalgemeenskap dreig nou om die ANC uit die kussings te lig deur hul stemme aan die EFF te gee.
Mokonyane is deur Westonaria se burgemeester, Nonkoliso Tundz, ondersteun wat haarself na bewering nog meer ongewild as die premier gemaak het deur inwoners te beledig toe sy na hulle as “inkwenkwe” verwys het, ‘n term vir diegene wat nog nie by die inisiasieskool was nie en gesien word as seuns.
Inwoners sê die ANC nie hulle “vuil stemme” nodig het nie, is daar ander politieke partye wat dit beter sal aanwend om effektief na die kiesers om te sien in teenstelling met hoe die ANC hulle behandel.
Baie inwoners van Bekkersdal sal vir die EFF [ Ekonomiese Freedom Fighters ] stem, het ‘n swart student in mediastudies gesê.
Advokaat Dali Mpofu het intussen vir nog ‘n opskudding in die ANC gesorg nadat hy bedank uit die party om by die EFF aan te sluit.
“Interne verlamming [ in die ANC ] is sodanig dat dit ‘n kwessie van tyd is voordat dit irrelevant tot die breër revolusie raak,” het Mpofu aan City Press gesê .
Mpofu was vir 33 jaar ‘n lid van die ANC.
Hy is tans by die Farlam Kommissie van Ondersoek om gesinne van die mynwerkers wat dood is by Marikana verlede jaar, te verteenwoordig.
Die advokaat het aan City Press gesê dat hy glo dat “radikale beleid ” nodig is om die armes te help. Hy het gesê die rykes moet aan die armes gee om “stabiliteit” te bewerkstellig.
“My enigste voorspelling is dat kiesers met die verloop van tyd sal sien dat hulle net weens die sentiment en die naam [van die ANC] ondersteun.”
Aanklagte teen vier van die vyf mans wat van die ontvoering, verkragting en moord op twee kleuters in Diepsloot aangekla is, is Vrydag in Pretoria se landdroshof teruggetrek.
Die staatsaanklaer, Matric Lupondo, sê daar is bewyse dat die mans nie in Diepsloot was toe die misdaad gepleeg is nie.
Landdros Len Miller het die aanklagte teen vier van die mans teruggetrek, maar ’n vyfde sal in aanhouding bly.
Dié saak is tot 27 November vir verdere ondersoek uitgestel. – Sapa
Die Universiteit van die Witwatersrand (Wits) het ‘n ondersoek na die laaste saak van seksuele teistering voltooi nadat ’n vierde dosent bedank het.
’n Tugproses teen dié dosent was nog aan die gang, maar hy het besluit om sy bedankingsbrief in te dien voordat hy sy lot gehoor het, berig Eyewitness News.
Twee dosente is in Julie afgedank en ’n derde dosent is verlede maand afgedank nadat hulle skuldig bevind is aan seksuele teistering.
Prof. Adam Habib, visekanselier van Wits, het gesê ’n nuwe ondersoekproses is in werking gestel om in die toekoms voorvalle van seksuele teistering beter te hanteer.
’n Gemiddeld van 200 aborsies word daagliks in Suid-Afrika uitgevoer, het dr. Aaron Motsoaledi, minister van gesondheid, gesê.
Die minister het Vrydag in ’n geskrewe antwoord op ’n vraag in die parlement gesê altesame 82 920 aborsies is tussen April 2012 en April vanjaar landwyd gedoen.
Altesame 21 794 van dié aborsies was in Gauteng en 14 357 in die Oos-Kaap.
Motsoaledi se antwoord verwys slegs na aborsies wat by openbare gesondheidsinstansies gedoen is.
Die minister het gereageer op ’n vraag van Cheryllyn Dudley, ACDP-LP, wie se party gekant is teen aborsies. – Sapa
Die African National Congress het ’n groot deel van hul mediadekking aan veral die DA verloor, ’n jaar voor die algemene verkiesings.
Volgens ’n opname deur die medianavorsingsmaatskappy Media Tenor het Julius Malema se nuwe politieke party, die Ekonomiese Vryheidsvegters, en ’n verbetering aan die dekking vir die Demokratiese Alliansie tot die afname in dekking in die druk- én TV-media gelei.
Die grootste deel van die gedrukte media sowel as DSTV behoort aan Suid-Afrika se mediamonopolie, Naspers.
Volgens ’n navorser, Stephano Radaelli, moet Agang SA eintlik bekommerd wees, “want dié party bly taamlik onsigbaar vir die media in vergelyking met ander politieke partye”.
Die resultate van die opname is gegrond op ’n ontleding 119 005 berigte of verklarings oor die land se politieke partye in 47 toonaangewende druk- en TV-nuusprodukte vanaf 1 Januarie tot 30 September 2013.
Die DA het ’n toename in dekking tot 37% gekry en die ANC staan op 52%. Die EFF het 3%. – Sapa
‘n Amerikaanse organisasie wat betrokke is by die eksplorasie van onder meer gas en olie, IHS, sê misdaad in Suid-Afrika “neem af”. Dié inligting is in die WSJ gepubliseer.
IHS Crime Index, wat self toegee dat hulle uitsluitlik op die SAPD se inligting staatmaak, het bevind dat misdaad in Suid-Afrika “op sy laagste vlak in 15 jaar is”.
Die HUB van IHS, Jerre Stead, is pas deur die deelstaat Colorado se goewerneur aangewys om die heropbou van Colorado na die onlangse uitgebreide vloedskade te onderneem.
“Geweldsmisdaad staan op die laagste vlak in ‘n dekade, en het met 40 persent afgeneem” sê die Minister van Polisie, Nathi Mtethwa.
“Eiendomsmisdaad het met 24 persent oor dieselfde tydperk afgeneem.”
Hy sê die IHS Indeks stem ooreen met die misdaadstatistiek wat die regering onlangs vrygestel het.
Die syfers het ‘n ses persent styging in die getal moorde in die afgelope jaar aangetoon.
Dit was egter die afgelope nege jaar 27 persent laer.
‘n Kleurlingonderwyser het in die Blue Downs-landdroshof op die Kaapse Vlakte verskyn in verband met die verkragting van ‘n 12-jarige leerder, het die Nasionale Vervolgingsgesag (NVG) gesê.
Eric Ntabazalila, woordvoerder van die NVG, het gesê die 39-jarige man is borgtog geweier en sal weer op 3 Desember in die hof verskyn.
Die man staan tereg op ses aanklagte van ontvoering en 12 aanklagte van verkragting.
“Ons verwelkom die hof se besluit om borgtog te weier, omdat dit die verkeerde boodskap aan die publiek sou uitstuur.
“Die onderwyser, wat daarvan beskuldig word dat hy die leerder verskeie kere verkrag het, was ook haar onderwyser en haar pa se vriend.” – Sapa
Beeld berig dat Salahdin Yacoubi, hoofamptenaar van Electronic Tolling Collection (ETC), skielik bedank het. Hy was die baas van die onderneming wat Gauteng se e-tol sal moet invorder.
Die redes vir sy skielike bedanking is nog onbekend, het Fin24 berig.
ETC is ’n filiaal van die Oostenrykse e-tolmaatskappy Kapsch Traffic-Com en is in 2009 gestig met die uitsluitlike doel om te help met die insameling van Gauteng se tolgeld. Dié massiewe taak sal die verantwoordelikheid van ETC en die plaaslike bemagtigingsmaatskappy Traffic Management Technologies (TMT) wees.
Die Nasionale Padagentskap (Sanral) het gesê hy is self eers gister van Yacoubi se bedanking in kennis gestel, maar dat dit geen uitwerking op sy kontrak met ETC sal hê nie.
